نشر ایدیلمەمش و عفو قانونلری كورمش، معلوماتم اولمامش و رسالۀ نور كتابلریلە علاقەسی اولمایان مكتوبلری، یڭیدن نظر دقّتە آلمق، هم اهل عدالتی، هم اهل وقوفی لزومسز مشغول ایدەجگندن، بویلە اشغال ایتمەمسی و ایشمزڭ تأخیرە اوغرامامسی ایچون مذكور خصوصی مكتوبلرم، او مبارك كتابلرە طاقیلمامسی عدالتڭزدن تمنّی ایدییورز.

بو مبارك عدلیە ایكی دفعە او كتابلرڭ برائتلە اعادەسنە قرار ویردیگی حالدە، بعض اسبابە بناءً محبوس قالمش عین كتابلری بعضًا تمامنی، بعضًا الە كچیریلن قسمنی بش محكمەنڭ اعادە ایتدكلرینی و بش امنیت دائرەسی دە صاحبلرینە تسلیم ایتدكلرینی سزە خبر ویرییورز. ان شٓاء اللّٰه عدالتڭز و حسن نیتڭز بو دفعە دە اعادەسنە وسیلە اولاجق.

خستە سعید النّورسی

[٧٠٠]

دموقراتلرە بیوك بر حقیقتی اخطار

شیمدی قرآن، اسلامیت و بو وطن ضررینە اوچ جریان وار:

[برنجیسی] قومونیست، دینسزلك جریانی. بو جریان یوزدە اوتوز-قرق آدمە ضرر ویرەبیلیر.

[ایكنجیسی] اسكیدنبری مستملكاتلرڭ، توركلرلە علاقەلرینی كسمك ایچون، توركیە

دائرەسندە دینسزلگی نشر ایتمك ایچون، افساد قومیتەسی نامندە بر قومیتە. بو دە یوزدە اون-یگرمی آدمی بوزابیلیر.

[اوچنجیسی] غربلیلاشمق و خریستیانلرە بڭزەمك و بر نوع پروتلق مذهبنی اسلاملر ایچندە یرلشدیرمەیە چالیشان و دیندە حصّەسی اولمایان بر قسم سیاسیلر هیئتیدر. بو جریان یوزدە، بلكە بیڭدە بریسنی، قرآن و اسلامیت علیهنە چویرەبیلیر.

بز قرآن خدمتكارلری و نورجیلر، اوّلكی ایكی جریانە قارشو، دائما قرآن حقیقتلرینی محافظەیە چالیشمشز. ممكن اولدیغی قدر دنیایە و سیاستە باقمامەیە مسلگمز بزی مجبور ایدییورمش. شیمدی مجبوریتلە باقمەیە لزوم اولدی، كوردككە:

دموقراتلر، اوّلكی ایكی مدهش جریانە قارشو، بزە (نورجیلرە) یاردیمجی حكمندە اولابیلیرلر. هم اونلرڭ دیندار قسمی، دائما او ایكی دهشتلی جریانە مسلكلرنجە معارضدرلر. یالڭز دیندە حصّەسی آز اولان بر قسم، غربلیلاشمق و غربلیلرە تام بڭزەمك مسلگنی تعقیب ایدنلر ایسە، اوچنجی جریانە بر یاردیم ایدییورلر. مادام او جریانڭ یوزدە آنجق بریسنی، بلكە بیڭدن بریسنی پروتلر و خریستیان كبی یاپمغە چویرەبیلیرلر. چونكە اینكیلیز، ایكی یوز سنە ظرفندە تحكّم ایتدیگی ایكی یوز میلیون اسلامدن ایكی یوز آدمی پروتلغە چویرەمەمش و چویرەمز. هم هیچ بر تاریخدە بر اسلام، خریستیان اولدیغنی و قناعتلە باشقە بر دینی اسلامیتە ترجیح ایتمش اولدیغی ایشیتیلمدیگندن، اقتدار پارتیسندە بولونان

آز بر قسم، دینڭ ضررینە سیاست نامیلە اوچنجی جریانە یاردیم ایتسە دە، مادام او دموقرات پارتیسی، مسلك اعتباریلە اوتەكی ایكی جریان عظیمەنڭ طورمەسندە و دفع ایتمەسندە مجبوری وظیفەلری اولمەسندن، بو وطنە و اسلامیتە بیوك بر فائدەسی طوقونابیلیر.

بو جهتدن بز، دموقراتلری اقتدار یرندە محافظە ایتمەیە، قرآن منفعتنە كندیمزی مجبور بیلییورز. اونلردن خیر بكلەمك دگل، بلكە دهشتلی، باشدەكی ایكی جریانە سیاستلرنجە معارض اولدقلری ایچون، اونلرڭ آز بر قسمی دینە ویردكلری ضرری، وجودڭ پارچەلانمەسنە بدل، یالڭز بر پارماغی كسمك كبی پك جزئی بر ضررلە پك كلّی بر ضرردن قورتولمەمزە سبب اولویورلر بیلدیگمزدن، او اقتدار پارتیسنڭ لهندە اهل دینی یاردیمە دعوت ایدییورز. و دیندە لاابالی قسمنی دخی جدًّا ایقاظ ایدوب، امان چابوق حقیقت اسلامیەیە یاپیشیڭز اخطار ایدییورزكە، وطن و ملّت و اونلرڭ حیاتی و سعادتی، حقائق قرآنیەیە طایانمق و بتون عالم اسلامی آرقەسندە احتیاط قوّتی یاپمق و اخوّت اسلامیە ایلە درت یوز میلیون قرداشی بولمق و آمریقە كبی دین لهندە جدّی چالیشان معظّم بر دولتی كندینە حقیقی دوست یاپمق، ایمان و اسلامیتلە اولابیلیر.

بز بتون نورجیلر و قرآن خدمتكارلری، اونلرە هم خبر ویرییورز، هم اسلامیتە خدمتدە موفّقیتلرینە دعا ایدییورز. هم دە رجا ایدییورزكە، بو مملكتڭ بر اهمّیتلی محصولی و وطندە و شیمدی عالم اسلامدە پك بیوك فائدەسی و خدمتی بولونان

رسالۀ نوری، مصادرەلردن قورتاروب نشرینە خدمت ایتسینلر. بو وطندەكی دیندارلری كندینە طرفدار ایتسینلر و سلامتی بولسونلر.

سعید النّورسی

[٧٠١]

محترم (خسرو) آغابگمز، استادیمزڭ عدلیە حقّندەكی فكری بودر:

مدار عبرت و حیرت و شكراندركە،

یگرمی طوقوز سنەدر، اللی سنەدنبری بنملە معارض كیزلی دوشمان قومیتەلر، بتون دسیسەلریلە علیهمدە عدلیەیی، حكومتی سوق ایتمەیە چالیشیركن و هر دسیسەیە باش اوروركن، یوز اوتوز كتابمی، بیڭلر مكتوبلریمی تدقیق و تحرّی ایچون عدلیەنڭ نظرینی جلب ایتمش. او عدلیەلر بشی قطعی برائت و عموم كتابلری صوچ یوق دییە اعادەیە [حاشیە]قرار ویرمەلری و كچن ملاطیە حادثەسی

مناسبتیلە، یینە كیزلی دوشمانلریمز حكومتڭ و عدلیەنڭ نظر دقّتنی بزلرە چویرمگە چالیشدقلری حالدە، یگرمی اوچ محكمە دیمشلركە، "صوچ بولامییورز." عجبا بنم كبی دنیا اهلی ایلە مناسبتی پك آز و رسالۀ نور كبی حقیقتی هیچ بر شیئە فدا ایتمەین، یوز اوتوز كتابندە بو قدر علیهمزدە بهانە آرایانلر واركن هیچ بر صوچ بولونمامەسی و یالڭز اسكیشهرڭ بر تك مسئلە اولان تستّردن باشقە، او دە جواب ویریلدكدن صوڭرە قناعت وجدانیەیە چوریلمسی.. حالبوكە، نور طلبەلری كبی تقوایە طرفدار اولانلردن بر تك آدمڭ اون مكتوبندە اون كوندە اونی مسئول ایدەجك بعض مادّەلر بولونور. بو قدر حدسز بر درجەدە كثرتلی بر شیدە مدار مسئولیت عدلیەلر كوسترەمەمسی، ایكی شیدن خالی دگل:

قطعیًّا بر عنایت و حفظ الٰهیدركە، بو جهتدە مرحمتنی، رحمتنی نور طلبەلری، قرآن خدمتكارلری حقّندە كوسترییوركە، بزە تماس ایدن بتون عدلیەلری بویلە خارقە بر عدالتە و هیچ بر جهتدە حقسزلق یاپمامەیە و بویلە علیهمزدە بیڭلر اسباب واركن او حقیقت قدسیەء قرآنیەنڭ بر خدمتنە یاردیم ایتمشلر. بز دە بتون روح و جانمزلە اونلرە تشكّر ایدرز.

اسكی زمان عدلیەلرینڭ اوڭندە پادشاهلر، فقرالرلە دیز چوكوب محاكمە اولمسی و حضرت عمرؓ، عدالتی زمانندە عادی بر خریستیانلە.. حضرت علیؓ، عادی بر یهودی ایلە محاكمە اولمسی ایلە كوستریلن، عدلیەدەكی حقدن باشقە هیچ بر شیئە آلت اولمدیغنی كوسترن عدلیەلك عدالتنڭ بو سرّ عظیمنە بزملە علاقەدار اولان

بو عدلیەلر -بزە تماس ایدن جهتدە- مظهر اولمشلر. اونڭ ایچوندركە، یگرمی سكز سنە بو قدر اشكنجەلر، حپسلر، تضییق كوردیگم حالدە، هیچ بر عدلیە آدملرینە، بر سرّ عظیمە بناءً دگل كوسمك و بد دعا، بالعكس قلبًا بر منّتدارلق، بر نوع تشكّر، بر تبریك وار.

سعید النّورسی

[٧٠٢]

[بِاسْمِهٖ سُبْحَانَهُ]

[ایمانڭ دنیادە دخی بر نوع جنّت لذّتنی بنم حیاتمدە تأمین ایتدیگنە دائر]

بن طقوز یاشندنبری شفقتلی والدەمی كورمدیگمدن صحبتندە بولونامدم. او حرمتلی محبّتدن محروم قالدیغم و اوچ همشیرەمی دە اون بش یاشمدن صوڭرە كورەمدیگم، اللّٰه رحمت ایتسین، والدەملە برابر برزخ عالملرینە كیتدكلری ایچون، دنیانڭ چوق ذوقلی، لذّتلی اولان اخوّتكارانە صحبتلرندن، مرحمت و حرمتدن محروم قالدیغمدن و اوچ قرداشمدن ایكی قرداشمی اللی سنەدنبری كورمدیگمدن، (اللّٰه اونلرە رحمت ایتسین) اویلە قیمتدار، دیندار، عالم ایكی قرداشمڭ صحبتندن، حرمتكارانە محبّت، مرحمتكارانە شفقتدەكی سروردن محروم قالدیغمدن، بو دنیادە رسالۀ نورڭ ایماندە جنّت چكردگی بولوندیغنی كوستردیگی كبی، بوكون درت فداكار خدمتمدە بولونان معنوی اولادلرملە بر سیاحت ایتدیگم زمان، ایماندەكی جنّت چكردگنڭ بر ذرّەجگی قطعیًّا روحمە اخطار ایدیلدی.

عمرمدە مجرّد قالدیغمدن دنیادە چوجقلرم اولمامسندن، چوجقلرە قارشو شفقتكارانە ذوقلرندن، ممنونیتلرندن دە محروم قالدیغم ایلە برابر، بو نقصانیتی حسّ ایتمییوردم. بوكون درت یارەمە مقابل، جناب حق غایت ذوقلی بر معنایی احسان ایتدی. اوچ جهتلە تداوی ایتدی.

[برنجیسی] رسالۀ نوردە بیان ایدیلن حدیث شریفدەكی [عَلَیْكُمْ بِدٖینِ الْعَجَٓائِزِ] سرّیلە، اختیار قادینلرڭ رسالۀ نور جهتندە خارقە استفادەلری و ذوقِ روحانیلری، مرحومە والدەمڭ مرحمتكارانە خصوصی شفقتندن كلن لذّتە مقابل، كلّی و عمومی بر صورتدە بیڭلر والدەلری رحمت الٰهیە بڭا احسان ایتدیگی كبی، اوچ مرحومە همشیرەلریمڭ شفقتكارانە، قرداشانە سوینچ و سرورلرینە بدل، یوز بیڭلر كنچ خانملری بڭا همشیرە نوعندە رسالۀ نور جهتیلە ویروب، دعالری ایلە و نورلرلە علاقەدارلقلری ایلە، همشیرەلرم یوزندن غائب ایتدیگم اوچ فائدە یرینە، بیڭلر فائدۀ معنویە و سرور روحی احسان ایتمش. بو ایكنجی قسمڭ حقیقت اولدیغنە چوق دلیل و امارەلری وار، قرداشلرم بیلییورلر. هم مرحوم قرداشمڭ وفاتیلە، فداكارانە دنیادەكی مادّی، معنوی معاونتلرندن و محبّت و شفقتلرندن محرومیتمە بدل، رحمت الٰهیە او خصوصی ایكی اوچ قرداش یرینە یوز بیڭلر حقیقی قرداش كبی حقیقی شفقت، معاونت و یاردیم ایدن، حتّی دگل یالڭز دنیا حیاتنی، بلكە حیات اخرویە سرمایەسنی دە رسالۀ نورڭ خدمتندە بڭا یاردیم ایتمك ایچون فدائی قرداشلری احسان ایتمش.

دنیادە اولادلرم اولمدیغندن، غایت ذوقلی اولان چوجقلرە شفقت مزیّتندن محرومیتمە بدل، بر ایكی چوجق شفقتنە بدل، یوز بیڭلرلە معصوملریكە، ایلریدە رسالۀ نورلە بسلنمەلری جهتیلە، بو خصوصی، جزئی اوچ شفقتكارانە وضعیتی یوز بیڭلرە چویردی. بوڭا دائر چوق امارەلری وار. حتّی بڭا خدمت ایدنلر بیلییورلركە، پدر و والدەسندن چوق زیادە بر شفقت، بر حرمت، بر باغلیلق معصوم چوجقلرڭ بڭا قارشو بولوادیندە و امرطاغندەكی اكثر یوللردە كوسترمەلری، بو جزئی، شخصی، خصوصی ذوقی، لذّتی، شفقتكارانە حرمتی بیڭلر كلّی و عمومی بر صورتە چویردیگنە چوق مثاللری وار.

مبارك بر قسم ذی روحلردە حسّ قبل الوقوع اولدیغی كبی، معصوم چوجقلرڭ بر حسّ قبل الوقوع ایلە، رسالۀ نورڭ اونلرە دنیوی، اخروی بر بابالقلە تربیە و محافظە ایتمەسنی روحلری حسّ ایتمشكە، نورڭ خدمتكارینە بابالرندن و والدەلرندن داها شدّتلی بر حرمت كوسترییورلر. حتّی بنم هیچ كورمدیگم، طانیمادیغم اوچ یاشندەكی بر قیز چوجغی، یالین آیاق دیكنلرە باصارق، قوشارق كلدی. حتّی پك چوق دوستلرم بولوادیندە بولوندیغی ایچون اوطوموبیل ایلە چوق خیزلی كیتدیگمز حالدە قورتولامایورز. حتّی هر یردە هیچ بنی ایشیتوب كورمدكلری حالدە، پدر و والدەسنە كوستردكلری علاقەیی كوسترمەلری، بنم حقّمدە نفسم، هوسم جسمانی جهتندە دخی ایماندە بر جنّت چكردگی وار اولدیغنی كوردم.

سعید النّورسی

[٧٠٣]

[بِاسْمِهٖ سُبْحَانَهُ]

استادیمزی زیارتە كلوب دە كوروشەمەینلرڭ و بز كوروشدیرمدن كیدنلرڭ خاطرلری قیریلمامق ایچون، استادیمزڭ كیزلی، خارقە بر احوال روحیەسنی بیان ایتمەیە مجبور اولدق. حتّی بوكون بر پارچە دقّتسزلك ایتدیگمزدن، غایت چوق محتاج اولدیغی خدمتمزە نهایت ویرمك نیت ایتدیگی حالدە، شیمدیكی یازاجغمز شی خاطرینە كلدی، بزی دە عفو ایتدی، حلال ایتدی.

ایشتە حقیقت بودر:

بز دە قطعیًّا آڭلادقكە، استادیمز اكثر حیاتنی تجرّدلە كچیردیگی كبی، بتون حیاتندە هدیەلری قبول ایتمەمك و مقابلسز هدیە اونی خستە ایتمك كبی، شیمدی حرمت و دوستلق جهتیلە اونڭلە كوروشمك اوڭا غایت آغیر كلییور. حتّی مكرّرًا بز دە آڭلادق، مصافحە ایتمك، ألنی اوپمك، كندینە طوقات اورمق كبی روحًا متأثّر اولویور. و اوڭا باقمقدن، دقّت ایتمكدن دە شدّتلە متأثّر اولویور. حتّی خدمتندە بز بولوندیغمز حالدە، ضرورت اولمادن باقامییورز. بونڭ سرّ و حكمتنی قطعیًّا آڭلادقكە،

رسالۀ نورڭ اساس مسلگی حقیقی اخلاص اولمق جهتیلە شیمدیكی تظاهر، صحبت ایتمك، فضلە حرمت ایتمك، بو انانیت زمانندە بر نفسپرستلك، ریاكارلق، تصنّع علامتی اولمق جهتیلە اوڭا شدّتلە طوقونویور. چونكە دیر: "بنملە كوروشمك ایستەین، اگر آخرت ایچون، رسالۀ نور ایچون ایسە، رسالۀ نور قطعیًّا بڭا

احتیاج بیراقمامش. میلیونلر نسخەسی، هر بریسی، اون سعید قدر فائدە ویرییور. اگر دنیا جهتیلە و دنیایە عائد ایشلر ایچون كوروشمك ایسە، او، دنیایی شدّتلە ترك ایتدیگی ایچون، دنیایە دائر شیلری مالایعنی، وقتی ضایع ایتمك اولدیغی ایچون جدًّا صیقیلیر. اگر رسالۀ نورڭ خدمتنە، انتشارینە عائد اولسە، بڭا خدمت ایدن حقیقی فداكار طلبەلرم و معنوی اولادلرم و قرداشلرم بنم بدلمە كوروشمەلری كافی، بڭا هیچ احتیاج یوق. "اوزون یرلردن اوزاق مملكتلردن كلنلرلە برابر باشقە قرداشلریمزڭ دە خاطرلری قیریلماسین. چونكە، اون سنەدنبریدر هر صباح اوقودیغی و باشقەلری اونی توكیل ایتدیگی اوراد اوقومەسندە ثوابی باغیشلادیغی وقت دیركە:

"یا ربّی! بنملە كوروشمك ایچون كلوب كوروشمدن دوننلرڭ دفتر اعمالنە دە یازیلسین" دییە روحلرینە هدیە ایدییور. استادیمزڭ بو حالنی قرداشلریمزە بیان ایدییورز.

اَلْبَاقٖی هُوَ الْبَاقٖی

خدمتندە بولونان نور طلبەلری

[٧٠٤]

[ایلری غزتەسنڭ ١٣ نیسان ١٩٥٧ تاریخلی نسخەسندن آلینمشدر]

استاد بدیع الزّمانڭ اوغورلی اللریلە یڭی بر جامعڭ تملی آتیلدی.

استاد بدیع الزّمان سعید النّورسی، اوچنجی اگیتیم تومنی جامعنە خرج قویدی. اسپارطە خصوصی مخابریمز بیلدیرییور:

اسپارطەنڭ كچن ییللردە تشكّل ایتمش بولونان اوچنجی اگیتیم تومنی ایچون یاپدیریلمەسنە قرار ویریلن جامعڭ تملی، ترتیب ایدیلن معظّم بر مراسملە آتیلمش و بو تورنە اسپارطەدە بولونان رسالۀ نور مؤلّفی استاد بدیع الزّمان سعید النّورسی حضرتلری دە دعوت اولونمشلردر. بیوك بر علاقە ایلە قارشیلانان استاد، تورندن صوڭرە اوغورلی اللریلە تملە ایلك خرجی قویمشلر و دعالردە بولونمشلردر.

[٧٠٥]

[عجیب بر حادثە]

استادیمز سعید النّورسیدە، بالخاصّە صوڭ زمانلردە بر حال واقع اولمشكە، قطعیًّا كیمسە ایلە قونوشمییور. حتّی بز خدمتجیلری ایلە دخی ایكی دقیقەدن فضلە قونوشسە بر حرارت باشلایور. بو عجیب حالتڭ سكونت بولمسی ایچون، آرا صیرە، بعض كونلر تبدیل هوا نیّتیلە قیرلرە چیقییور. هیچ بر غلبەلق یرە كیدەمییور. حتّی جامعە دە كیدەمییور. اوطەسندن چیقدیغی وقت، همن خصوصی اوطوموبیلنە [حاشیە]بر ویا ایكی خدمتجیسیلە بینر. بعضًا دە هفتەدە بر ویا ایكی دفعە كرا ایلە طوتدیغی اگیردیردەكی اوینە كیدییور. برقاچ ساعت قالدقدن صوڭرە یینە اسپارطەدەكی اقامتكاهنە دونویور.

بوكون دە یینە اگیردیرە كیتمشدی. تام اوینڭ اوڭندە بریسی راست كلدی و بزە خطابًا "درحال اسپارطەیە دونمەڭزی امر ایدییورم" دیدی. بز اوڭجە كیم اولدیغنی بیلەمدك. صوڭرە آڭلادقكە، اگیردیرە برقاچ كون اوّل وان ولایتنڭ بر قضاسندن كلن یڭی قائممقام ایمش. بز، "هانكی قانون ویا هانكی تعلیمات و نظامنامەیە استنادًا آرابەمزڭ اوڭنە كچوب شهرە كیرمەیی منع ایدییورسڭز؟" دییە بو كیفی و قانونسز حركتە مقاومت ایدەجگمز آندە، استادیمز سعید النّورسی بزی بوندن منع ایتدی. هم دە سعید النّورسی یە صارصیلماز بر باغلیلق و بیوك بر حرمتلری اولان شهرلی و كویلی اهالینڭ، خصوصًا پازار مناسبتیلە بوكون غلبەلق اولمەسیلە، قانون خلافنە حركت ایتدیریلن بر كیمسەنڭ یوزندن چیقاجق هر هانكی بر حادثەیی اوڭلەمك ایچون كری یە دونولمشدر.

شویلە قناعتمز كلدیكە: استادیمز سعید النّورسی سیاستە قطعیًّا قاریشمدیغی و انسانلرلە كوروشمدیگی حالدە، رسالۀ نورڭ آناطولی و شرق ولایتلرندە و حتّی عالم اسلامدە فوق العادە بر حسن قبول كورمسی و آنقرەدە حكومتڭ مساعدە و تأییدیلە بیوك مجموعەلرڭ رسمًا طبع ایدیلمسی و بتون محكمەلرندن برائت قزانمەسی سببیلە، رسالۀ نورلە علاقەدار اولان چوق بیوك بر كتلە دموقرات لهندە اولارق حركت ایتدكلرندن و بالخاصّە بو وضعیت شرق ولایتلرندە پك ظاهر مشاهدە ایدیلدیگندن، نور طلبەلریلە حكومتڭ مابیننی بوزمق ایچون بعض كیزلی زندیقلر و اسكی پارتی طرفدارلرینڭ پلانیلە

بو یڭی قائممقامی، آسایش و دین علیهندە اولان بویلە معاملەیە وسیلە یاپمشلر.

استادیمز اڭ جبّار فرعونلرە قارشو بیلە عزّت اسلامیەیی محافظە ایدوب باش اگمدیگی و حتّی اسارتی وقتندە روسڭ باش قومانداننە قیام ایتمەیەرك و اعدامی قبول ایدەجك درجەدە بر عزّت دینیەیی طاشیدیغی حالدە، بو مبارك وطندە آسایشە ضرر كلمەمك ایچون، اڭ كوچك بر ژاندارمەنڭ دخی حرمتسز و عصمتسز معاملەسنە سس چیقارمییور، صبرلە قارشیلایور. سببی دە قرآنڭ بر قانون اساسیسی اولان [وَلَا تَزِرُ وَازِرَةٌ وِزْرَ اُخْرٰی] سرّیلە، "بر آدمڭ جنایتیلە باشقەسی مسئول اولاماز" قرداشی دە اولسە.

سعید النّورسی رسالۀ نوری اوقویانلرە، خصوصًا بتون ولایات شرقیەدەكیلرە نور درسلریلە دیمشكە: "داخلی آسایشە ایلیشمك، یوزدە اون جانی یوزندن طقسان معصومە ظلم و ضرر ایتمكدر. اونڭ ایچون، رسالۀ نوری اوقویانلرە ایلیشمك دگل، محافظە ایتسینلر." ایشتە بو سرّ ایچون سیاستە ایلیشمییور. آسایشی بتون قوّتیلە محافظەیە چالیشییور.

یینە بوكون دە، بو مؤسّف حادثەدن طولایی قائممقامە حدّت ایتمەمش، بالعكس سلام كوندرەرك حقّنی حلال ایتدیگنی بیلدیرمشدر. آسایش لهندە عزّتنی و ملّتڭ آخرتی ایچون دنیاسنی و حتّی لزوم اولسە آخرتنی فدا ایدن بویلە بر اسلام قهرمانی محترم بر اختیار مسافرڭ حقوقنی مدافعە قدرشناسلغی،

هركسدن اوّل مسافر بولوندیغی اسپارطە ولایتنڭ حكومتنە و دموقراتنە دوشمكدەدر.

١٥/٤/١٩٥٧ دموقرات نور طلبەلری نامنە

رشدی چاقین، محمد سوزر، محمد باباجان، طاهری موتلی، زبیر كوندوز آلپ

دوشونجەلرینڭ خالصانە اولدیغنی بن دە بیلمكدەیم. دموقرات ملّت وكیلی كمال دمیر آلای

[٧٠٦]

حسین عونی و تحسین طولە ایلە بر حسب حالدر.

بز نور شاكردلری استادیمزڭ خدمتندە و مسلگندە بولوندیغمزدن، سیاستلرلە علاقەمز یوقدر. فقط دموقراتلر، نورلرڭ نشرینە مساعدەكار اولمەلری و اسكیدنبری نورڭ منعنە دائر ظلملری یاپمدقلرندن، دموقراتڭ خاطری ایچون سچیملرلە علاقەدار اولدق. اوّلكی دفعە كبی بو دفعە دە نورجیلرڭ أپی فائدەسی، دموقرات لهنە اولدی. استادیمزە و نورلرە اڭ زیادە فائدەسی طوقونان اسكی عدلیە وكیلی حسین عونی و سڭیركند مبعوثی تحسین طولە، هركسدن زیادە قزانمەلری لازم ایكن قازانمامەلری، بزی چوق متأثّر ایتدی دییە استادیمزە سویلەدك. بزە دیدیكە:

متأثّر اولماییڭز. بن دە سزڭلە برابر اولارق اونلری تبریك ایتملی ییز. چونكە