[٦٥٦]

[بِاسْمِهٖ سُبْحَانَهُ]

قلبە اخطار ایدیلن اجتماعی حیاتمزە عائد بر حقیقت

بو وطندە شیمدیلك درت پارتی وار. بری خلق پارتیسی، بری دموقرات، بری ملّت، دیگری دە اتّحاد اسلامدر.

[اتّحاد اسلام پارتیسی] یوزدە آلتمش یتمشی تام متدیّن اولمق شرطیلە، شیمدیكی سیاست باشنە كچەبیلیر. دینی، سیاستە آلت ایتمەمگە، بلكە سیاستی دینە آلت ایتمەیە چالیشابیلیر. فقط چوق زماندنبری تربیۀ اسلامیە زدەلنمەسیلە و شیمدیكی سیاستڭ جنایتنە قارشو دینی سیاستە آلت ایتمەیە مجبور اولاجغندن، شیمدیلك او پارتی باشە كچمەمك لازمدر.

[خلق پارتیسی ایسە] حقیقتًا عجیب و ذوقلی بر رشوت عمومیەیی قانونلر پردەسندە بعض مأمورلرە ویردكلری ایچون، یگرمی سكز سنەلك بتون جنایتیلە و باشقەلرڭ دە جنایاتی و اتّحادجیلرڭ ماصون قسمنڭ سیّئٓاتلری دە او پارتی یە یوكلنیلدیگی حالدە، دموقراتلرە بر جهتدە غالب حكمندەدرلر. چونكە عبودیتڭ نقصانیتیلە انانیت قوّت بولور، نمرودجیلقلر چوغالیر. بو بنلك زمانندە، مأموریت حقیقتدە بر خدمتكارلق اولدیغی حالدە، بر حاكمیت، بر آغالق، بر نمرودجیلق ایلە نفسە غایت ذوقلی بر حاكمیت مرتبەسنی بر قسم مأمورلرە رشوت اولارق ویردیگی ایچون، بتون او عجیب جنایتلرلە و كندندن اولمایان جریدەلرڭ

نشریاتیلە برابر بڭا یاپیلان معاملەلرندن حسّ ایتدمكە، بر جهتدە معنًا دموقراتلرە غالب كلییورلر. حالبوكە اسلامیتڭ بر قانون اساسیسی اولان، حدیث شریفدە [سَیِّدُ الْقَوْمِ خَادِمُهُمْ] یعنی مأموریت و امیرلك ایسە رئیسلك دگل، ملّتە بر خدمتكارلقدر. دموقراتلق، حرّیت وجدان، اسلامیتڭ بو قانون اساسیسنە طایانابیلیر. چونكە قوّت، قانوندە اولمازسە شخصە كچر. استبداد، مطلق كیفی اولور.

[ملّت پارتیسی ایسە] اگر اتّحاد اسلامدەكی اساس اولان اسلامیت ملّیتیكە، توركجیلك اونڭ ایچندە مزج اولمش بر ملّت اولسە، او دموقراتڭ معناسندەدر. دیندار دموقراتلرە التحاق ایتمەیە مجبور اولور. فرنك علّتی تعبیر ایتدیگمز عرقجیلق، عنصرجیلق فكریلە آوروپە، عالم اسلامی پارچەلامق ایچون ایچمزە بو فرنك علّتنی آشیلامش. فقط بو خستەلق و فكر، غایت ذوقلی و جاذبەدار بر حالت روحیە ویردیگی ایچون پك چوق ضررلری و تهلكەلریلە برابر، بو ذوق خاطری ایچون هر ملّت جزئی كلّی- بو فكرە اشتیاق كوسترییورلر.

شیمدیكی تربیۀ اسلامیەنڭ ضعفیتیلە و تربیۀ مدنیەنڭ غلبەسیلە اكثریت قزانارق باشە كچرسە، اكثریت تشكیل ایتمەین و آنجق یوزدە اوتوزی حقیقی تورك اولان و یوزدە یتمشی باشقە عنصرلردن اولانلر، هم حقیقی توركلرڭ، هم حاكمیت اسلامیەنڭ علیهنە جبهە آلمەیە مجبور اولاجقلر. چونكە اسلامیتڭ بر قانون اساسیسی اولان بو آیت كریمە: []وَلَا تَزِرُ وَازِرَةٌ وِزْرَ اُخْرٰی [] در. یعنی، بریسنڭ كناهیلە باشقەسی مؤاخذە و مسئول اولاماز. حالبوكە عرقجیلق طماریلە،

بر آدمڭ جنایتیلە معصوم بر قرداشنی، بلكە دە اقرباسنی، بلكە دە عشیرتنڭ افرادینی ئولدیرمگە كندینی حقلی ظن ایدر. او وقت حقیقی عدالت یاپیلمدیغی كبی، شدّتلی بر ظلم دە یول بولور. چونكە "بر معصومڭ حقّی، یوز جانی یە فدا ایدیلمز" دییە اسلامیتڭ بر قانون اساسیسیدر. بو ایسە چوق اهمّیتلی بر مسئلەء وطنیەدر و حاكمیت اسلامیەیە بیوك بر تهلكەدر.

مادام حقیقت بودر، ای دیندار و دینە حرمتكار دموقراتلر! سز بو ایكی پارتینڭ غایت قوّتلی و ذوقلی و جاذبەدار نقطەء استنادلرینە مقابل، داها زیادە مادّی و معنوی جاذبەدار نقطۀ استناد اولان حقائق اسلامیەیی نقطۀ استناد یاپمغە مجبورسڭز. یوقسە سزڭ یاپمدیغڭز، اسكیدنبری یاپیلان جنایتلری، ناصل اسكی پارتی یە یوكلەیورلرسە، سزە دە یوكلەیوب، خلقجیلر عرقجیلغی الدە ایدوب، تام سزی مغلوب ایتمەیە بر احتمال قوی ایلە حسّ ایتدم و اسلامیت نامنە تلاش ایدییورم.

اسكیلرڭ [حاشیە]لزومسز كیفی قانونلری و سٓوء استعماللری نتیجەسیلە، بلكە دە

تحریكلریلە ظهور ایدن تیجانی مسئلەسنی و آغیر جزالرینی دیندار دموقراتلرە یوكلەمەمەنڭ و عالم اسلامڭ نظرندە دموقراتلری دوشورمەمەنڭ چارەء یكانەسنی كندمجە بویلە دوشونویورم:

ناصلكە اذان محمّدینڭ علیە الصّلاة والسّلام نشریلە دموقراتلر اون درجە قوّت بولدیغی كبی، اویلە دە آیاصوفیەیی دە بش یوز سنە دوام ایدن وضعیت قدسیەسنە چویرمكدر. و عالم اسلامدە چوق حسن تأثیر یاپان و بو وطن اهالیسنە عالم اسلامڭ حسن توجّهنی قزاندیران و بو یگرمی سكز سنە محكمەلر، بر مضر جهتنی بولامدقلری و بش محكمە دە برائتنە قرار ویردكلری رسالۀ نورڭ رسمًا سربستیتنی دیندار دموقراتلر اعلان ایتملیدر. تا، بو یارەیە بر نوع مرهم اورملی. او وقت عالم اسلامڭ توجّهنی قزاندقلری كبی، باشقەلرینڭ ظالمانە قباحتلری دە اونلرە یوكلنمز، فكرندەیم.

دیندار دموقراتلر، خصوصًا عدنان مندرس كبی ذاتلرڭ خاطرلری ایچون، اوتوز بش سنەدنبری ترك ایتدیگم سیاستە بر ایكی كون باقدم و بونی یازدم.

سعید النّورسی

و بو حقیقتە یقینًا شاهد اولوب تصدیق ایدن رسالۀ نور طلبەلرندن

محمد چالیشقان، مصطفی آجت، حمزە، صادق، حلیم، راشد،

احمد خسرو و طاهری، طاهر، نوری، صونغور وسائرە

(٦٥٧)

قدرت غزتەسنڭ ١٧ تمّوز ٩٥٢ پنجشنبە كونی بویەجیكیللر امضاسیلە چیقان باش مقالەسندە [طریقتلری دموقراتلر ادارە ایدییورلر] دییە اولان یازیسنە بیوك طوغونڭ جوابی

[اوّلًا] روحًا بویلە بر یازیدن حجاب دویدم. طریقتلرلە علاقەم یوق. بو زماندە ایمانی قورتارمەنڭ و محافظە ایتمەنڭ، ممكن مرتبە اللّٰهڭ امرلرینی یرینە كتیرمەنڭ و رسولنڭؐ یولندن كیتمەنڭ كافی اولدیغنە اینانانلردنم. خلوتی طریقتنی بیلمم. فقط هر حالدە محرّرڭ یازدیغی كبی دگلدر.

[ثانیًا] بدیع الزّمان طریقتنە كلنجە، بویلە بر طریقتی ایلك دفعە بو ذاتڭ یازیسندە اوقودم. بن بدیع الزّمان سعید النّورسی حضرتلرینی پك یاقیندن طانییان بر كیمسەیم. دفعەلرجە خصوصی صحبتلرندە بولوندم. بو نجیب مسلمانلە و ملّتمزڭ اییلگنە خدمت ایدن مبارك طلبەلریلە ایچدن تماس ایتدم. بویلە بر طریقت نشر ایتدكلرینی نە آغیزلرندن ایشیتدم، نە دە طلبەلرندە كوردم، نە اثرلرندە اوقودم. بویلە بر طریقت وارسە، اولو اورتە شخص ویا منسوب اولدیغی پارتی منفعتنە یازمق اولماز، دلیل كوسترمسی لازم. بالعكس بدیع الزّمان بتون بو افترالردن منزّهدر. او، بوكونڭ پك محتاج اولدیغی دنیا چاپندە بر علّامەدر. بیوك بر دین آدمیدر.

اگر بو زواللی محرّر، بو مبارك وطنمزە اللّٰهڭ بر هدیەسی اولان بو ذات ایلە

یاقیندن تماس ایتسە ایدی و یوز اوتوز اوچ پارچە رسالۀ نور آدلی اثرلرندن بر تكنی اوقومش اولسە ایدی، بو افترادە بولونمش اولمازدی. و بو اصیل مؤلّفڭ نە كبی بر خدمت پشندە قوشدیغنی، هیچ بر منفعت كوزتمدن ناصل اِفنای وجود أیلەدیگنی آڭلار، بو ذاتە حیرتلە، حرمتلە و منّتلە باقاردی.

آرتق بزە قطعی قناعت كلدیكە، اساسًا تضادلر ایچریسندە یووارلانان ملّت پارتیسی، بو كبی تظاهرلرلە كندیسنی داها أیی كوسترییور. بوكون داخلدە و خارجدە میلیونلرجە مسلمانڭ روحلرندە یپ یڭی بر ایمان و اخلاق درسی ویرن بو مبارك ذاتە قارشو یالان سویلەین بر زواللی یی، اڭ ایلری بر كیمسە كبی باغرینە باصان بر پارتیدن یارین ایچون نە بكلەیەبیلیرز؟ اللّٰه محافظە ایتسین، بنی دە بو پارتیلە بوكونە قدر قونوشدیغم ایچون عفو ایتسین. بر باشە كچسەلر، مسلمانلری كندی افترا و شناعتلرینە بویایوب چشیتلی اتهاملرلە محو ایدەجكلرینی شیمدیدن كوسترییورلر.

یگرمی یدی ییلدر بدیع الزّمان و اثرلری، چشیتلی محكمەلردن كچمش، طریقتجیلق، بوزغونجیلق، عفّتسزلك حقّندە تك امارە دخی بولونامامشدر. زواللی، زعمنجە دموقرات پارتی یی قرەلامق ایستەیور. بدیع الزّمان طریقتی دییە بر شی وارسە، لطفًا ایضاح ایتسین. مادام تحقیقات ایتمشلر، مملكتڭ نبضنی یوقلامشلر، میدانە واضح بر شكلدە چیقارسینلر. بز دە اوڭا قارشو شونی ادّعا ایدرزكە، دنیانڭ اندر یتیشدیردیگی بو علم و فضیلت آبدەسی محترم ذات، "عصریمز

طریقت عصری دگل، حقیقت عصریدر. "دییە بر چوق اثرلرینە یازمش و حقیقتڭ نە اولدیغنی آچیقلامشلردر. برقاچ دینسز و سزڭ كبی موقع حرصی كوزلرینی بورومش برقاچ زواللی مستثنا، بدیع الزّمان، بو نجیب و اصیل ملّتڭ قلبندە لایق اولدیغی یری اشغال ایتمشدر. چونكە او، یاقینلرینە اییلك، طوغریلق، اخلاق و فضیلتدن باشقە بر شی ویرمەمشدر.

استانبول

ع. شرف اینانیر

(٦٥٨)

١٧ تمّوز پنجشنبە ٩٥٢ تاریخلی قدرت غزتەسنڭ باش مقالەسندە نشر ایدیلن بویەجیكیللرڭ افترالرینە حرّ آدم غزتەسنڭ جوابیدر.

عبد الرّحمن بویەجیكیللر دین حرّیتنی، خلقجیلر كبی طریقت قانالندن كیرەرك بالطەلامق ایستەیور. اسلام عالمی بدیع الزّمانی دە طریقتجیلق اسنادیلە ژورنال ایدییور.

١٧ تمّوز ٩٥٢ تاریخلی قدرت غزتەسندە بویەجیكیللر "طریقتلری دموقرات پارتی ادارە ایدییور" باشلقلی یالان و یاڭلیشلرلە طولی بر باش مقالە نشر ایتمشدر. بو باش مقالەیی، آنقە آژانسندە مال بولمش مغربی كبی نشر ایدییور.

١-مملكتدە طریقتلر ممنوع اولدیغی ایچون، خلوتی طریقتنڭ ماهیّتی اوزرندە طورمەمزدە بر فائدە یوقدر. فقط چیوریللی بر قولونیەجی احمدڭ سوزی ایلە

باش مقالەلر یازان بویەجیكیللرڭ سیاسی احتراصنی و منطق ضعیفلغنی بلیرتەلم.

٢- بدیع الزّمان سعید النّورسی مبارك بر اسلام عالمیدر، معلّمدر. هركسە اللّٰه رضاسی ایچون درس ویرر. شاكردلرینە نور طلبەلری دینیر. صاییسی یوز بیڭلری بولدیغی سویلنییور. بونلر اصلا سیاستە قاریشمازلر. خلق پارتیسی دورندە محكمەدن محكمەیە سوروكلنن محترم بدیع الزّمانە، هپ كتابلرندن و قرآن تفسیرلرندن دعوا آچیلمشدر. كچنلردە دە استانبول برنجی آغیر جزادە بر كتابندن أوتوری برائت ایتمشدی.

بدیع الزّمان طریقتی دییە بر طریقت یوقدر، افترادر. بدیع الزّمان هیچ بر زمان شیخلك طاسلامامشدر. ایچكیلی آیینلرلە بونی قارشیلاشدیرمق و بربرینە قاریشدیرمق انصافسزلقدر.

٣- دموقرات ملّت وكیللرندن شیخلر وارمش. اولابیلیر. فقط خلق و ملّت پارتیلردن اولمدیغی نە ایلە ثابتدر؟ طریقتلر لغو ایدیلدی. فقط "وقتیلە شیخ اولانلر مبعوث اولاماز" دییە بر قید، بر قانون وارمیدر؟ اونلرڭ مدنی حقلرینی ناصل اسقاط ایدەبیلیرسڭز؟ بویەجیكیللرڭ ملّت پارتیسی كنل یوروتمە قورولندە اهل طریق اولان ایكی اوچ محترم ذاتی بیلمییورمیسڭز؟

٤- ماصون درنگی، خلق پارتیسی زمانندە تكرار فعّالیتە كچدی. شمس الدّین كون آلطای باش وكیل و امین ایریشیركیل داخلیە وكیلی ایدی. بونی داها دون

اخراج ایدیلدیگڭ دموقرات پارتی یی كوتولەمك ایچون یاڭلیش كوسترییورسڭ، عیبدر. یوق "دموقرات پارتی اقتدارە كلنجە ماصونلغی یڭیدن قوردی" كبی باطل بر ظندە ایسەڭ، ناصل ملّت وكیلیسڭكە، داها ایكی ییللق تشریعی فعالیتی بیلمییورسڭ؟

صاقین شیمدیدن احتراص و چكەمەمزلكدن اختیارلق علامتلری كوسترمە دییەجگز.

٥- داها دون ملّت پارتیسنە دموقرات پارتیدن اخراج ایدیلەرك كیردڭ. ناصل اولور دە حكمت بایوری تنقید ایدنلری "صیزمش آژان" دییە كوسترەبیلییورسڭ؟ بیوك قونغرەدە اونی تنقید ایدن و اوڭا رأی ویرمەین یوزلرجە پارتی منسوبنی تهمت آلتندە بیراقییورسڭ.

٦- كلەلم اساسە: "اسكیدن پولیس و عدلیەدن قورقارلردی. شیمدی آچیقجە آیین یاپییورلر" دییە ژورنالدە بولونویورسڭ. بویەجیكیللرڭ بو ژورنالجیلگنی، ملّت پارتیسندەكی وجدان حرّیتنە طرفدار ملّیتجیلر دە محقّق بگنمەمشلردر. اونلر ذاتًا قدرت غزتەسنی دە بگنمییورلر.

نە دیمك ایستەیورسڭ بویەجیكیللر؟ یینە أولر باصیلسین، قرآن كریملر طوپلانسین، حپسخانەلر آدم آلسین، یعنی دین و وجدان حرّیتی بالطەلانسین، اللّٰە اكبر دیینلر اوچ آی حپس ایدیلسین. بونیمی ایستەیورسڭ؟

طریقتجیلغی بر طوتامق یاپوب، اندیرَكْت اولارق وجدان حرّیتنەمی تجاوز ایدییورسڭ؟ آچیق قونوش بویەجیكیللر! داها دون اسكی باشقانڭز كندلی "لائیك دولت مدرسە آچماز، تكیە آچماز. فقط تكیە و مدرسە دە قپایاماز" دییوردی. یینە كندلی "شرقدە لائیكلك دییە بر دوقترین یوقدر. لادینی معناسنە كلیر. اونڭ ایچون پروغراممزە لائیكلك كلمەسنی آلمدق." مأٓلندە قونوشویوردی. سز لائیك اولدیغڭزیمی بحث ایدییورسڭز؟ بو تناقضی و تضادی آراڭزدە حل ایدڭ. عكس تقدیردە ایكی یوزلی بر سیاستدە كورولدیگڭزی دوشونەجگز.

چونكە ملّت پارتیسنە كیرنلرڭ یوزدە طقسانی، وجدان حرّیتی طلسمی ایچون كیرمشلردی.

اوت، آچیق قونوشڭ و مملكتی آلداتمایڭ.

چوق سوكیلی (خسرو) آغابگم! بیوك طوغونڭ و حرّ آدمڭ بویەجیكیللرە ویردكلری جوابلری، سز آغابگمزە برای معلومات یازمەمزی استادیمز امر ایتمشدر. مناسب كورورسەڭز تكثیر ایدرسڭز. صوڭسز سلاملریمزی صونار، اللریڭزدن أوپر، وظیفەڭزدە موفّقیتلر دیلر، مبارك دعالریڭزە ال آچارز.

اَلْبَاقٖی هُوَ الْبَاقٖی

چوق قصورلی، بیچارە طلبەڭز مصطفی آجت

رسالۀ نورڭ وطنە، ملّتە و اسلامیتە بیوك خدمتنی قبول و تقدیر ایدن باش وكیل عدنان مندرسە استادڭ یازدیغی بر مكتوب

[٦٥٩]

[بِاسْمِهٖ سُبْحَانَهُ]

بن چوق خستە اولدیغم و سیاستلە علاقەسز بولوندیغم حالدە، عدنان مندرس كبی بر اسلام قهرمانی ایلە بر صحبت ایتمك ایستردم. حال و وضعیتم كوروشمەیە مساعدە ایتمدیگی ایچون، او صوری قونوشمق یرینە، بو مكتوب بنم بدلمە قونوشسون دییە یازدم.

غایت قیصە برقاچ اساسی، اسلامیتڭ بر قهرمانی اولان عدنان مندرس كبی دیندارلرە بیان ایدییورم:

[برنجیسی] اسلامیتڭ پك چوق قانون اساسیسندن بریسی []وَلَا تَزِرُ وَازِرَةٌ وِزْرَ اُخْرٰی [] آیت كریمەسنڭ حقیقتیدركە، بریسنڭ جنایتیلە باشقەلری و اقربا و دوستلری مسئول اولاماز. حالبوكە شیمدیكی سیاست حاضرەدە پارتیجیلك طرفدارلغی ایلە، بر جانینڭ یوزندن پك چوق معصوملرڭ ضررینە رضا كوستریلییور. بر جانینڭ جنایتی یوزندن، طرفدارلری ویاخود اقربالری دخی شنیع غیبتلر و تزییفلر ایدیلوب، بر تك جنایت یوز جنایتە چوریلدیگندن، غایت دهشتلی بر كین و عداوتی طمارلرە طوقوندیروب، كین و غرضە و مقابلەء بالمثلە مجبور ایدیلییور. بو ایسە حیات اجتماعیەیی تمامًا زیر و زبر ایدن بر زهردر

و خارجدەكی دوشمانلرڭ پارماق قاریشدیرمەلرینە تام بر زمین حاضرلامقدر. ایران و مصردەكی حسّ ایدیلن حادثە و بحرانلر، بو اساسدن ایلری كلدیگی آڭلاشیلییور. فقط اونلر بوراسی كبی دگل. بزە نسبتًا پك خفیف، یوزدە بر نسبتندەدر. اللّٰه ایتمەسین، بو حال بزدە اولسە، پك دهشتلی اولور.

بو تهلكەیە قارشو چارەء یكانە، اخوّت اسلامیەیی و اساس اسلامیت ملّیتنی او قوّتڭ تمل طاشی یاپوب، معصوملری حمایە ایچون، جانیلرڭ جنایتلرینی كندیلرینە منحصر بیراقمق لازمدر.

هم امنیّتڭ و آسایشڭ تمل طاشی، یینە بو قانون اساسیدن كلییور. مثلا، بر خانەدە ویا بر كمیدە بر معصوملە اون جانی بولونسە، حقیقی عدالتلە و امنیت و آسایش دستور اساسیسیلە او معصومی قورتاروب تهلكەیە آتمامق ایچون، كمی یە و خانەیە ایلیشمەمك لازم. تاكە معصوم چیقنجەیە قدر.

ایشتە بو قانون اساسئ قرآنی حكمنجە، آسایش و امنیت داخلیەیە ایلیشمك و اون جانی یوزندن طقسان معصومی تهلكەیە آتمق، غضب الٰهینڭ جلبنە وسیلە اولور. مادام جناب حق، بو تهلكەلی زماندە بر قسم حقیقی دیندارلرڭ باشە كچمەسنە یول آچمش، قرآن حكیمڭ بو قانون اساسیسنی كندیلرینە بر نقطۀ استناد و اونلرە غرضكارلق ایدنلرە قارشو سپر یاپمق لازم كلدیگنی، زمان اخطار ایدییور.

اسلامیتڭ ایكنجی بر قانون اساسیسی شو حدیث شریفدر:

[سَیِّدُ الْقَوْمِ خَادِمُهُمْ] حقیقتیلە، مأموریت بر خدمتكارلقدر. بر حاكمیت و بنلك ایچون تحكّم آلتی دگل. بو زماندە تربیۀ اسلامیەنڭ نقصانیتیلە و عبودیتڭ ضعفیتیلە، بنلك، انانیت قوّت بولمش. مأموریتی خدمتكارلقدن چیقاروب، بر حاكمیت و مستبدانە بر تحكّم و متكبّرانە بر مرتبە طرزینە كتیردیگندن، آبدستسز، قبلەسز نماز قیلمق كبی، عدالت عدالت اولماز. اساسیلە دە بوزولور و حقوق عباد دە زیر و زبر اولور. حقوق عباد، حقوق اللّٰه حكمنە كچەمییوركە، حق اولابیلسین. بلكە نفسانی حقسزلقلرە وسیلە اولور.

شیمدی عدنان مندرس كبی، "اسلامیتڭ و دینڭ ایجابلرینی یرینە كتیرەجگز" دیینە و مذكور ایكی قانون اساسی یە قارشو مخالفت ایدوب تام ضدّینە اولارق ایكی دهشتلی جریانڭ، غایت بیوك رشوت ایلە خلقلری آلداتمق و اجنبیلرڭ مداخلەسنە یول آچمق وضعیتندە هجوم ایتمك احتمالی قوّتلیدر.

[بریسی] برنجی قانون اساسی یە مخالف اولارق، بر جانی یوزندن قرق معصومی كسمش، بر كویی دە یاقمش. بو درجەدە بر استبداد مطلق و هر نفسڭ ذوقنە كچەجك مأموریتە، بر حاكمیت صورتندە رشوت ویرەرك، دیندار حرّیتپرورلرە هجوم ایدیلییور.

[ایكنجی هجوم دە] اسلامیت ملّیت قدسیەسنی بیراقوب -اوّلكیسی كبی- بر جانی یوزندن یوز معصومڭ حقّنی چیگنەیەبیلن، ظاهرًا بر ملّیتجیلك و حقیقتدە

عرقجیلق طماریلە هم حرّیتپرور دیندار دموقراتلرە، هم بتون بو وطندەكی یوزدە یتمشی سائر عنصرلردن بولونانلرە، هم حكومت علیهنە، هم بیچارە توركلر علیهنە، هم دموقراتلرڭ تعقیب ایتدیگی سیاست علیهنە چالیشارق و سرسری و انانیتلی نفسلرە غایت ذوقلی بر رشوت اولارق بر عرقجیلق قرداشلغی ویرییور. او ذوقلی قرداشلغڭ ایچندە، او ذوقلی فائدەدن بیڭ دفعە داها زیادە حقیقی قرداشلری دوشمانلغە چویرمك كبی عجیب تهلكەیی، او سرخوشلغی ایلە حسّ ایدەمییور. مثلا، اسلامیت ملّیتی ایلە درت یوز میلیون حقیقی قرداشڭ هر كون (اَللّٰهُمَّ اغْفِرْ لِلْمُؤْمِنٖینَ وَالْمُؤْمِنَاتِ) دعای عمومیسیلە معنوی یاردیم كورمك یرینە، عرقجیلق ایلە او درت یوز میلیون مبارك قرداشلری، درت یوز سرسری یە و لاابالیلرە یالڭز دنیوی و پك جزئی بر منفعتی ایچون ترك ایتدیرییور.

بو تهلكە هم بو وطنە، هم حكومتە، هم دە دیندار دموقراتلرە و توركلرە بیوك بر تهلكەدر و اویلە یاپانلر دە حقیقی تورك دگللردر. نجیب توركلر بویلە خطادن چكینیرلر. بو ایكی طائفە هر شیدن استفادەیە چالیشوب، دیندار دموقراتلری دویرمەیە چالیشدقلری و چالیشدیریلدقلری، میداندەكی آثار ایلە تحقّق ایدییور. بو عجیب تخریباتە و بو ایكی قوّتلی معارضلرە قارشو، قرق صحابە ایلە دنیانڭ قرق دولتنە قارشو میدان معارضەیە چیقان و غلبە ایدن و بیڭ درت یوز سنە ظرفندە و هر عصردە اوچ یوز - درت یوز میلیون شاكردی بولونان