تسلّی بولویوردم. سزە محكمە مدافعاتمزدن بعض پارچەلر اوّلجە دائرەڭزە كوندردیگمز حالدە، شیمدی تمام، مكمّل و عین حقیقت بر نسخە مدافعاتمی دە سزە كوندرییورم. اوڭا كورە سزڭ دلالتڭزلە نورلرڭ سربستیتنە چالیشاجق ذاتلرە بر مأخذ اولارق كوسترمك نیّتیلە كوندردك.

اَلْبَاقٖی هُوَ الْبَاقٖی

سعید النّورسی

[٥٠٦]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

غایت قیمتلی، فداكار، نور قهرمانی آغابگمز خسرو،

شیمدی بش دفعەدر، دیانت رئیسی، نوردن بر طاقیمی مصرّانە ایستەدی. استاد دە شدّتلی خستەلغی ایچندە تصحیح ایدوب -شیمدی بیتمك اوزرەدر- دیانت رئیسندن اونڭ معنوی فیئٓاتی اولارق اوچ مادّە ایستەمش.

بریسی، سزڭ خارقە یازدیغڭز معجزەلی قرآنی فوطوغرافلە طبع ایتمك. بو مادّەیی قبول ایتمش، یالڭز "باشندەكی توركجە تعریفاتی مستقل قالسە، آیری طبع ایدیلسە مناسبدر" دیمش. ایشتە استادیمزڭ اوڭا یازدیغی مكتوبی، برای معلومات لفًّا سزە كوندرییورز. استاد دییوركە: "هم بر طاقیم رسالۀ نوری، هم ماكینە ایلە چیقان مجموعەلری اوڭا كوندرمك و خسرو كبی بو ایشتە اڭ زیادە علاقەدار بر قرداشمزڭ ألیلە تسلیم ایتمك جهتنی مشورتڭزە حوالە ایدییورز." سز دە تام بر مشورتلە، سزڭ بو مسئلەدە اورایە كیتمەڭزڭ، وجودجە صحّتڭز مساعدسە

و فكریڭز دە موافق ایسە، معیّن بر وقتدە عجلە اورایە كیدرسڭز و آدرسڭزی بیلدیررسڭز. بز دە طاقیمی و مجموعەلری سزە آنقرەیە الڭزە یتیشدیرەجگز. حتّی سز ایسترسەڭز، كندی حسابڭزە، اونلری مفتیلر نشر ایتمك نیّتیلە دیانت رئیسنە ویررسڭز.

نور طلبەلرندن صادق، ابراهیم

استادڭ خدمتندە خلیل

[٥٠٧]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم زغفرانبولی، افلانی حوالیسی نور شاكردلری،

سزلرە، كوندردیگڭز نور اجزالرینڭ هدیەسنە بیڭلر بارك اللّٰه و ما شٓاء اللّٰه دیرز. جناب حق سزلری ایكی جهاندە مسعود أیلەسین. آمین.

نورڭ مبارك، فداكار شاكردلرینڭ هر بری، بر قسم رسالەلری كوزلجە یازوب، بو صیرەدە بڭا هدیە ایتمەلری و بر قسم طاتلی تبرّك ایلە برابر، شدّتلی خستەلغم و صیقینتیلرم ایچندە غریب بر طرزدە بڭا كلمەسی، اسكیدنبری مقابلەسز هدیەیی قبول ایتمەمك قاعدەم ایكن، او قاعدەنڭ عكسنە اولارق كمال سوینچ و ممنونیتلە قبول ایتدیگمە سبب، اوچ معنیدار و غریب حادثەلردر:

[برنجیسی] بر قسم پارەملە آلدیغم بڭا مخصوص ماكینە محصولی اون بر مجموعە و الماس قلملی نورڭ قیمتدار اوچ شاكردینڭ یازدقلری تام بر طاقیم

رسالۀ نوری، دیانت ریاستنڭ بش آلتی دفعە مصرّانە ایستەمسی اوزرینە حاضرلادیغم عین زماندە و بر درجە یبانی قالان مفتیلر و خواجەلرە بر معنوی هدیە و مشوِّق اولارق كوندرمك تشبّثی زمانندە، بویلە چوق اهمّیتلی بو وظیفەیی یرینە كتیرمك ایچون خسروی بورایە ایستەیوردم. حالبوكە وضعیتم مشكل بر حالدە، چوق مراق ایدییوردم. بردن كوچك بر خسرو اولان قهرمان صونغور عین وقتدە كلدی. بنی چوق اندیشە و تلاشلردن و مصرفلردن قورتاردیغی كبی، بو وظیفە، ایكی سنە متمادیًا یانمدە خدمتی قدر قیمتدار اولدیغی ایچون، قطعی قناعتم كلدیكە، بو دە نورڭ نشرندەكی موفّقیتڭ بر كرامتیدر.

[ایكنجی حادثە] بن كندیمە عائد نسخەلریمی دیانت ریاستنە كوندردیگم عین زماندە، عینًا میزانلە زیادە-نقصان اولمایارق طارتیلسە، عینًا او قدر، نورڭ زغفرانبولی، افلانی حوالیسندەكی نورڭ كوچك قهرمانلری كوندردكلری مبارك هدیەلری لسان حال ایلە بڭا دیدیلر: مراق ایتمە! بز ضایعات یرینە كلدك. او ضایعاتڭ یرینی طولدیردق. بن دە روح و جانلە قبول ایتدم و كوندرنلری تبریك ایتدم. داها تبرّكلری بڭا طوقونمدی.

[اوچنجی حادثە] او مبارك هدیەلر اوطەدە كلدیگی زماندن اون دقیقە اوّل، سرچە قوشنە بڭزر بر قوش یاتاغمڭ آیاغی آلتندە كوردم. حالبوكە پنجرەلر و قاپو قپالی. هیچ بر دلیك یوقكە، او قوش كیرەبیلسین. باقدم، بندن قاچمییور. بر پارچە اكمك ویردم، ییمەدی. قلبًا دیدم: اوچ درت سنە اوّل، عین بورادە

قوشلرڭ مژدە ویرمسی كبی، بو دە مژدە ویرییور. حقیقتًا عین زماندە او مبارك نورلی هدیە كلدیگی كبی، اوچ سنەدر خبر آلمدیغم مفتی قرداشم عبد المجیددن كوزل بر مكتوب آلدم. بڭا خدمت ایدن خلیل كلدی. "بو قوشە باق، بو دە اسكی قوشلر كبی بر مژدەجیدر" دیدم. صوڭرە پنجرەیی آچدقكە، كیتسین، كیتمییوردی. یوقاریدە بش آلتی دفعە اوچدی، كیتمدی. صوڭرە صونغور دە كلدی: "ایشتە سن دە كور" دیدك، او دە كوردی. یاریم ساعت صوڭرە، ناصل كورولمسی خارقە اولدی، بولونمامسی دە خارقە اولدی. پنجرەدن چیقمادن، خلیل ایلە آرادق، بولامدق، غائب اولدی. حتّی بو معنوی هدیەنڭ كلمەسی و خسرو یرندە صونغور امدادە یتیشمەسی، اهمّیتنی كوسترمگە بر قطعی حادثە بودركە، صونغور كلمدن ایكی كون اوّل -دیمك او أودن چیقدیغی كون- خلیل رؤیادە كورییوركە، صونغور، مصطفی اوسمان ایلە بورایە كلمشلر. بیوك بر حادثە و شعشعەلی بر مراسم یاپیلمش. بندن "تعبیری نەدر؟" دییە صوردی. بن دە مراق ایتدم، "سن نە ایچون بو رؤیایی بڭا سویلەدڭ؟ عجبا اونلرڭ باشنە بر ضررمی كلمش؟" دییە بر كیجە صباحە قدر اندیشە ایلە متأثّردم. او رؤیای صادقە آز تعبیر ایلە چیقدی. [حاشیە]

اَلْبَاقٖی هُوَ الْبَاقٖی

سعید النّورسی

[٥٠٨]

محترم (خسرو) آغابگمز! آشاغیدەكی استدعا رئیس جمهورە، باش وكیلە، هیئت وكیلەیە، عدلیە وكیلنە و برای معلومات دیانت ریاستنە كوندریلمشدر. قهرمان صونغور بو وظیفەیی كورمك ایچون بوكون آنقرەیە حركت ایتمشدر.

رئیس جمهورە، هیئت وكیلەیە، باش باقانلغە، عدلیە باقانلغی یوكسك قاتنە، دیانت ریاستنە آنقرە

حقیقی عدالت و حرّیت ایچون چالیشان ذاتلرە برقاچ نقطە بیان ایدییورم:

[برنجی نقطە] هم دڭزلی محكمەسی، هم آنقرە آغیر جزا محكمەسی، بتون رسالۀ نور اجزالرینی تدقیق ایدوب و اهل وقوفڭ دە اشتراكیلە برائتلرینە و صاحبلرینە اعادە ایتمەسنە بر محذور اولمادیغنە قرار ویروب، سعیدی آرقداشلریلە برائت و تخلیە ایدرك، ایكی سنە اللردە و محكمەلردە قالان نور رسالەلرینڭ تمامیلە سعیدە و آرقداشلرینە اعادە ایدیلدیگی و عین قراری محكمۀ تمییز قضیۀ مُحكمە حالنە كتیروب تصدیق ایتدیگی حالدە، شیمدی آفیونڭ، سعیدڭ شخصنە قارشو ایكی غرضكارڭ عین كتابلری، هم غایت آنتیقە معجزاتلی یازیلی قرآننی، بتون بتون خلاف قانون اولارق مصادرە ایدوب، سعید و آرقداشلرینە ویردیگی اصلسز حكمنی یینە عین محكمۀ تمییز بوزدیغی و شیمدی وطن و ملّتی اسكی پارتینڭ غرضكارانە استبدادندن قورتاران حمیتكار، وطنپرور بعض دموقرات لیدرلری كمال استحسان ایلە او رسالەلری قبول ایدوب صاحب اولدقلری

حالدە، اوچ سنەدر هیچ سببسز بیڭلر لیرە بزم كبی فقرایە ضرر ویرمك، اوچ دفعە برائت ایتمش بر محكمەیی اوچ سنە اوزاتوب -عجیب بر ظلم ایچندە شخصی بر غرضكارلق واردركە- یگرمی آی تجرید مطلقدە خدمتجیسیلە تماس ایتدیرمدیلر. تخلیەدن صوڭرە ایكی پولیس قاپوسندە نوبتجی بیراقدیلر. هم او غایت متّقی نور شاكردلرینی قصدًا، سببسز، صرف تقوالرینە اهانت ایچون، مغرب نمازینڭ وقتندە محاكمە ایدوب، نمازلرینی قضایە بیراقارق عجیب بر ظلم ایتمشلر. هم بتون بو رسالۀ نور اثرلرینی بر دفعە دە اسپارطە تمامًا مصادرە ایدوب تدقیقدن صوڭرە تكرار عینًا اعادە ایتمش.

دموقراتلرڭ زمانندە مادام اذان محمّدیؐ و دین درسلری كبی شعائر اسلامیە ایلە قرآنە خدمت و اسكیلرڭ قرآن ضررینە تخریباتلری تعمیرە باشلانیلمش. و مادام دینسزلرڭ و ماصونلرڭ و قومونیستلرڭ اثرلری انتشار ایدییور. عالم اسلامڭ مكّە، مدینە، شام كبی یرلرندە بیوك عالملرڭ تقدیر و تحسینلرینە مظهر اولمش و دیانت ریاستندە خواجەلرە اوقوتدیریلان ذوالفقار، عصای موسیؑ و سراج النّور كبی، فیلسوفلری صوصدیران مبارك مجموعەلری مصادرە ایتمك، اوچ سنە اونلرلە برابر بیڭلر لیرە قیمتندە دگرلی، معجزاتلی، آلتون ایلە اسم جلال یازیلمش، دیانت رئیسی بتون تقدیری ایلە طبعنە چالیشدیغی قرآنی مصادرە ایدن آدملر، البتە عدالت و عدلیە و حقیقت حسابنە دگل، بلكە قومونیست، ماصونلق حسابنە بر غرضكارلق ایدییورلر. بن كندم زهر خستەلغیلە شدّتلی

خستە اولدیغمدن و كندی حقوقمی مدافعە ایدەمدیگمدن، صونغوری كندیمە وكیل ایدییورم. اسكی حكومتڭ بڭا قارشو یگرمی سنەلك اشكنجە ایلە بو تخریباتڭ قالدیریلمەسنی، عدالتپرور یڭی حكومتڭ باقانلرندن بكلەیورم. قرداشلرمدن مصطفی صونغوری توكیل ایدییورم.

نور شاكردلری نامنە سعید النّورسی

(صونغور آنقرەدە ایكن استادیمزە یازدیغی مكتوبڭ صورتیدر)

[٥٠٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ بِعَدَدِ ذَرَّاتِ الْكَٓائِنَاتِ اَبَدًا دَٓائِمًا

چوق عزیز، چوق مبارك، چوق مشفق، چوق سوكیلی استادیمز افندیمز حضرتلری،

مبارك، مقبول دعالریڭز ایلە بوكون رسالۀ نور دینیلن شمس معنویەیی، هم چوق مبارك و قیمتلی مكتوبڭزی دیانت ریاستی باشقانی احمد حمدی افندی یە تسلیم ایتدك. سوینچلر ایچندە مبارك مجموعە و نورلری كندی خصوصی كتبخانەسنە قویدی. "ان شٓاء اللّٰه بونلری كندی ئوز و خاص قرداشلریمە اوقومق ایچون ویرەجگم و بو صورتلە تدریجی تدریجی نشرینە چالیشاجغز" دیدی.

چوق سوكیلی استادم افندم! مبارك مكتوبڭزدەكی امرلریڭزی یاپاجغنی سویلەدی. "فقط شیمدی، همن، بردنبرە بونلرڭ نشری اولماز. بن بو اثرلری

خاص آرقداشلریمە اوقوتدیروب، مراقلیلرە كورە ایلریدە نشر ایدرز. ان شٓاء اللّٰه تام و پارلاق شكلدە ایلریدە نشرینە چالیشاجغنی "سویلەدی.

عزیز استادم افندم، شیمدی درحال بو بیچارە طلبەڭز، نورلرڭ نشری ایچون المزدە بر وثیقە ویرمدیگندن اوزولدم. فقط كندیسی رسالۀ نورڭ نشرینە طرفدار و بتون قوّتیلە چالیشاجغنی سویلەدیگی ایچون سویندم.

چوق سوكیلی استادم! احمد حمدی افندی، سز سوكیلی استادیمزە ناصلدر دیدیلر. بو بیچارە "اوراد و معنوی وظیفەلر جهتندە بر نقصانلق یوق. فقط باشقە جهتدە هر تورلی پریشانم" پریشان اولمایان و دائما عزیز اولان سز سوكیلی استادیمزڭ بو سوزلرینی سویلەینجە، كوزلری یاشارارق دیدیلركە: "ان شٓاء اللّٰه او داها چوق یاشایاجق و پك بیوك خدمتلر داها یاپاجق" دیدیلر.

چوق سوكیلی استادم افندم! بوندن صوڭرە بو بیچارە، یینە كوروشمك اوزرە اورادن آیریلدم. قونیەلی و ملكیەدە اوقویان، نورلرە چوق باغلی احمد آتاق قرداشمزلە و اونڭلە برابر كلن و عین مكتبدە اوقویان، آفیونلی و امرطاغندە سزڭلە برابر كوروشن و مبارك اللریڭزی اوپمك شرفنە نائل اولان جمیلڭ قرداشی مصطفی ایلە برابر، شیمدی آنقرە مفتیسی اولان و سز سوكیلی قهرمان استادیمزلە ارزنجان و استانبولدە آرقداشلق ایدن و اختیار اولان صادق ایلە كوروشدك.

آه، سوكیلی استادیمز! بزە، قورتاریجیمز و وسیلەء سعادتمز اولان سوكیلی استادیمزڭ اسكی خاطرەلرندن براز بحث ایتدیلر. كندیسی آڭلاتیركن دائما آه چكییور. حیرت و استحسانلە كاه كولویور، كاه اوزولویور. و بزە دییوركە: "قرداشلر، او ذات بزە بڭزەمز. او بر خارقەدر. هم اونڭ بعض حاللری واردركە، او زمان كندینە صاحب دگلدر. قلبنە نە طوغارسە او تجلّیات الٰهیەدر" دییە رسالۀ نورڭ قدسی ترجماننی بزە آڭلاتییوردی. حتّی آیاصوفیە جامعندە، بیڭلرجە كیشی یە عزیز، قهرمان ملّا سعیدڭ نطقنی آڭلاتیركن، حیرتلر ایچندە قالدق. "ای مُهدیلر! بو قورولاجق بنای دولتڭ مُهدیلری سزسڭز. بو بنا یا بنای كفر، یا بنای ایمان، یا بنای نفاق اولاجق!" اِلٰی آخِر.. نطقڭزی و صوڭلرندە "قلبدن حقائق چیپلاق چیقییور. نامحرم اولانلر طیشاری یە كیتسینلر." دییە بتون بیڭلرجە خلقی حیرتلرە سوق ایدن، قهرمانلر قهرماننڭ نطقنی بزە سویلركن، "كاشكە نە اولایدی، او زمانكی نطقنی دیڭلەسە ایدك،" دییە ایچمزدن آه ایتدك. جناب حقّە حدسز شكر، مبارك قلبڭزدن فیشقیران رسالۀ نوری اوقودق الحمد للّٰه، او بزە یتر.

هم دیوان عرفیدە، محكمەدەكی پاشالرە، عزیز استادیمزی اعداملە تهدید ایتمەلرینە قارشو: "بن اجل ایستاسیونندە، ئولوم شمندوفرینی بكلەین بر كیمسەیم. بن قورقمام!" دییە استقبالڭ قهرمان قورتاریجیسنڭ قهرمان سوزلرینی بو مبارك اختیار مفتیدن دیڭلەدك. صوڭرە اوچمز آیریلوب پوستەخانەدە بو مكتوبی سز

مشفق و چوق سوكیلی استادیمزە یازدق. بو ایكی قیمتلی قرداشلر، پك چوق سلام و حرمتلر ایلە مبارك ال و آیاقلریڭزدن أوپویور و مبارك دعالریڭزی پك چوق یالوارییورلر. و اونلر دە معنًا امضالرینی سز سوكیلی استادیمزە دعالریڭزلە عرض ایتدیگمز بو سونوك، پریشان و پك عجلە یازابیلدیگمز بو مكتوبە امضالرینی آتییورلر.

چوق سوكیلی استادم! قصور و خطالریمی عفو بویورڭ. بو نهایتسز لطفلرە مقابل، بن بر هیچم. بیڭلر سلام و حرمتلە مبارك ال و آیاقلریڭزدن أوپر، دعالریڭزی یالواریر، قصورلریمی عفو ایتمەڭزی چوق مشفق استادم، یالواریرم. چوق عزیز، چوق مبارك، چوق سوكیلی استادم افندم حضرتلری، امرلریڭزی بكلەیورم. [حاشیە]

اَلْبَاقٖی هُوَ الْبَاقٖی

دعاڭزە محتاج، پریشان و چوق قصورلی خدمتكاریڭز صونغور

[٥١٠]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

محترم احمد حمدی افندی حضرتلری،

بر حادثەء روحیەمی سزە بیان ایدییورم. چوق زمان اوّل، ذاتڭز و سزڭ مسلگڭزدەكی خواجەلرڭ، ضرورتە بناءً رخصتە تابع و عزیمت شرعیەیی بیراقان فكرلرینە، بنم فكرلرم موافق كلمییوردی. بن هم اونلرە، هم سڭا حدّت ایدردم. نەدن عزیمتی ترك ایدوب رخصتە تابع اولویورلر؟ دییە، رسالۀ نوری طوغریدن طوغری یە سزلرە كوندرمزدم. فقط اوچ درت سنە اوّل، یینە شدّتلی، قلبمە سزی تنقیدكارانە بر تأسّف كلدی. بردن اخطار ایدیلدیكە:

بو سنڭ اسكی مدرسە آرقداشلرڭ اولان، باشدە احمد حمدی اولان ذاتلر، دهشتلی و شدّتلی بر تخریباتە قارشو اهون الشّر دستوریلە ممكن اولدیغی قدر، بر درجە، بر قسم وظیفەء علمیەیی مقدّساتڭ محافظەسنە صرف ایدوب، تهلكەیی درتدن برە ایندیرمەلری، اونلرڭ مجبوریتلە بعض نقصانلرینە و قصورلرینە

ان شٓاء اللّٰه كفّارت اولور، دییە قلبمە شدّتلە اخطار ایدیلدی. بن دخی سزلری و سزڭ كبیلرینی، او وقتدنبری یینە اسكی مدرسە قرداشلرم و درس آرقداشلرم دییە حقیقی اخوّت نظریلە باقمەیە باشلادم. اونڭ ایچون بنم بو شدّتلی تسمّم خستەلغم وفاتملە نتیجەلنمەسی دوشونجەسیلە، سزی نورلرە، بنم بدلمە حقیقی صاحب و حامی و محافظ اولاجغڭزی دوشونەرك، اوچ سنە اوّل، مكمّل بر طاقیم رسالۀ نوری سزە ویرمك نیت ایتمشدم. فقط شیمدی هم مكمّل دگل، هم تمامی دگل، فقط اكثریت مطلقە اجزالری نور شاكردلرندن غایت مهم اوچ ذاتڭ اون-اون بش سنە اوّل یازدقلری بر طاقیمی، سزڭ ایچون شدّتلی خستەلغم ایچندە بر درجە تصحیح ایتدم. بو اوچ ذاتڭ قلمنڭ بنم یانمدە اون طاقیم قدر قیمتی وار. سندن باشقە بو طاقیمی كیمسەیە ویرمیەجكدم. بوڭا مقابل اونڭ معنوی فیئٓاتی دە اوچ شیدر:

[برنجیسی] سز ممكن اولدیغی قدر دیانت ریاستنڭ شعبەلرینە ویرمك ایچون.. ممكنسە اسكی حروف، دگلسە یڭی حرف ایلە و خاص آرقداشلرمدن تصحیحە یاردیم ایچون بریسی باشدە بولونمق شرطیلە، مملكتدەكی دیانت ریاستنڭ شعبەلرینە یگرمی اوتوز دانە تكثیر ایدیلمكدر. چونكە خارجی دینسزلك جریاننە قارشو بویلە اثرلری نشر ایتمك، دیانت ریاستنڭ وظیفەسیدر.

[ایكنجیسی] مادام نور رسالەلری مدرسە مالیدر. سز دە مدرسەلرڭ هم اساسی، هم باشلری، هم شاكردلریسڭز. اونلر سزڭ حقیقی مالڭزدر. مناسب كورمدیگڭز رسالەیی، شیمدیلك نشرینی كری بیراقیرسڭز.

[اوچنجیسی] توافقلی قرآنمز، ممكنسە فوطوغراف مطبعەسیلە طبع ایدیلسینكە، توافقدەكی لمعۀ اعجازیە كورونسون. هم باشدەكی توركجە تعریفاتی ایسە، او، قرآن ایلە برابر طبع ایدیلمەسین. بلكە آیریجە بر كوچك رسالەجك اولارق یا توركجە ویا عربی یە كوزلجە چویروب اویلەجە طبع ایدیلسین.

س * ع

[٥١١]

حضرت استادیمزڭ تصحیحاتدە علاوە ایتدیگی نكتەلر

[اوّلًا] یگرمی طقوزنجی مكتوبڭ ایكنجی مقامنڭ اڭ باش صحیفەسندەكی سؤٓال جوابدن صوڭرە شو نكتە یازیلاجق:

بو رسالەنڭ سبب تألیفی، قرآنڭ ترجمەسنی قرآن یرندە جامعلردە اوقوتمق اولان دهشتلی سٓوء قصدینە قارشو، بر نوع مقابلەدر. زیادە تفصیلات و لزومسز بحثلر كیرمش. فقط او مجاهدانە و هیجانلی مقابلەدە، قیمتدار بر غیبی آناختاری حسّ ایدوب مجذوبانە آراتدیرمق ایچندە، لزومسز تفصیلات و ضعیف و پك اینجە امارەلر دخی كیرمش.

قلبمە كلدیكە: یگرمی طقوزنجی مكتوبڭ غایت اهمّیتلی و لزوملی و پارلاق و ایجازلی اولان برنجی مقامی، بو ایكنجینڭ بتون قصوراتنی و اسرافاتنی عفو ایتدیرر. بن دە كمال سرورلە شكر ایتدم، او قصورلریمی اونوتدم.

[ثانیًا] یگرمی طقوزنجی مكتوبڭ ایكنجی مقامنڭ سكزنجی قسمڭ اوچنجی رمزڭ

برنجی قسمندەكی دردنجی لطافتندە بر صحیفە قدر صوڭرە، توافق سرّیلە شاهد كوستریلن اون یدی سورەدن ١٤ نجی سورەدەكی ٣٥٩ تاریخنڭ اوزرینە حاشیە قونولارق، حاشیەسنە شو نكتە یازیلاجق: 〚 اِذَا السَّمَٓاءُ انْفَطَرَتْ〛 اوچ یوز اللی طقوز حروفیلە، بشرڭ باشنە سمادن آطوم بومبەسنڭ اینمەسنە و قلبنە آنارشی میكروبی كیرمەسنە رمز ایدر.

[ثالثًا] یگرمی طقوزنجی مكتوبڭ ایكنجی مقامنڭ سكزنجی قسمڭ اوچنجی رمزینڭ ایكنجی قسمندەكی (مهم بر اخطار) دن بر صحیفە قدر صوڭرە، اوچ یوز اللی بر عددی بو سنەء عربیەیی كوستردیگندن، اوتوز بر دفعە جملەسندەكی (اوتوز بر دفعە) كلمەلرینڭ اوزرینە حاشیە قونولاجق و حاشیەسنە شو نكتە یازیلاجق: بو اشارتە اوتوز بیڭ دفعە بارك اللّٰه! چونكە ایكنجی حرب عمومی، بشرڭ شكرسزلك و كفران نعمتندن چیقدی.

ایكنجی مقامدە:

[خامسًا] یگرمی طقوزنجی مكتوبڭ سكزنجی قسمندە، برنجی رمزڭ بشنجی رمزندەكی خاتمەیە بر حاشیە یاپیلاجق. و شو نكتە یازیلاجق:

اهمّیتلی یتمشلر، یتمش یدی سنەدەكی سعیدڭ یاشنی كوستردیگی كبی، نور تألیفی او تاریخدە تمام اولور دییە رمز ایدر.

مدافعاتدەكی جزئی سهو:

[برنجیسی] مدافعاتڭ آلتمش دردنجی صحیفەسندە، اون و اون برنجی سطرلرندە