[٥٠٨]

محترم (خسرو) آغابگمز! آشاغیدەكی استدعا رئیس جمهورە، باش وكیلە، هیئت وكیلەیە، عدلیە وكیلنە و برای معلومات دیانت ریاستنە كوندریلمشدر. قهرمان صونغور بو وظیفەیی كورمك ایچون بوكون آنقرەیە حركت ایتمشدر.

رئیس جمهورە، هیئت وكیلەیە، باش باقانلغە، عدلیە باقانلغی یوكسك قاتنە، دیانت ریاستنە آنقرە

حقیقی عدالت و حرّیت ایچون چالیشان ذاتلرە برقاچ نقطە بیان ایدییورم:

[برنجی نقطە] هم دڭزلی محكمەسی، هم آنقرە آغیر جزا محكمەسی، بتون رسالۀ نور اجزالرینی تدقیق ایدوب و اهل وقوفڭ دە اشتراكیلە برائتلرینە و صاحبلرینە اعادە ایتمەسنە بر محذور اولمادیغنە قرار ویروب، سعیدی آرقداشلریلە برائت و تخلیە ایدرك، ایكی سنە اللردە و محكمەلردە قالان نور رسالەلرینڭ تمامیلە سعیدە و آرقداشلرینە اعادە ایدیلدیگی و عین قراری محكمۀ تمییز قضیۀ مُحكمە حالنە كتیروب تصدیق ایتدیگی حالدە، شیمدی آفیونڭ، سعیدڭ شخصنە قارشو ایكی غرضكارڭ عین كتابلری، هم غایت آنتیقە معجزاتلی یازیلی قرآننی، بتون بتون خلاف قانون اولارق مصادرە ایدوب، سعید و آرقداشلرینە ویردیگی اصلسز حكمنی یینە عین محكمۀ تمییز بوزدیغی و شیمدی وطن و ملّتی اسكی پارتینڭ غرضكارانە استبدادندن قورتاران حمیتكار، وطنپرور بعض دموقرات لیدرلری كمال استحسان ایلە او رسالەلری قبول ایدوب صاحب اولدقلری

حالدە، اوچ سنەدر هیچ سببسز بیڭلر لیرە بزم كبی فقرایە ضرر ویرمك، اوچ دفعە برائت ایتمش بر محكمەیی اوچ سنە اوزاتوب -عجیب بر ظلم ایچندە شخصی بر غرضكارلق واردركە- یگرمی آی تجرید مطلقدە خدمتجیسیلە تماس ایتدیرمدیلر. تخلیەدن صوڭرە ایكی پولیس قاپوسندە نوبتجی بیراقدیلر. هم او غایت متّقی نور شاكردلرینی قصدًا، سببسز، صرف تقوالرینە اهانت ایچون، مغرب نمازینڭ وقتندە محاكمە ایدوب، نمازلرینی قضایە بیراقارق عجیب بر ظلم ایتمشلر. هم بتون بو رسالۀ نور اثرلرینی بر دفعە دە اسپارطە تمامًا مصادرە ایدوب تدقیقدن صوڭرە تكرار عینًا اعادە ایتمش.

دموقراتلرڭ زمانندە مادام اذان محمّدیؐ و دین درسلری كبی شعائر اسلامیە ایلە قرآنە خدمت و اسكیلرڭ قرآن ضررینە تخریباتلری تعمیرە باشلانیلمش. و مادام دینسزلرڭ و ماصونلرڭ و قومونیستلرڭ اثرلری انتشار ایدییور. عالم اسلامڭ مكّە، مدینە، شام كبی یرلرندە بیوك عالملرڭ تقدیر و تحسینلرینە مظهر اولمش و دیانت ریاستندە خواجەلرە اوقوتدیریلان ذوالفقار، عصای موسیؑ و سراج النّور كبی، فیلسوفلری صوصدیران مبارك مجموعەلری مصادرە ایتمك، اوچ سنە اونلرلە برابر بیڭلر لیرە قیمتندە دگرلی، معجزاتلی، آلتون ایلە اسم جلال یازیلمش، دیانت رئیسی بتون تقدیری ایلە طبعنە چالیشدیغی قرآنی مصادرە ایدن آدملر، البتە عدالت و عدلیە و حقیقت حسابنە دگل، بلكە قومونیست، ماصونلق حسابنە بر غرضكارلق ایدییورلر. بن كندم زهر خستەلغیلە شدّتلی

خستە اولدیغمدن و كندی حقوقمی مدافعە ایدەمدیگمدن، صونغوری كندیمە وكیل ایدییورم. اسكی حكومتڭ بڭا قارشو یگرمی سنەلك اشكنجە ایلە بو تخریباتڭ قالدیریلمەسنی، عدالتپرور یڭی حكومتڭ باقانلرندن بكلەیورم. قرداشلرمدن مصطفی صونغوری توكیل ایدییورم.

نور شاكردلری نامنە سعید النّورسی

(صونغور آنقرەدە ایكن استادیمزە یازدیغی مكتوبڭ صورتیدر)

[٥٠٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ بِعَدَدِ ذَرَّاتِ الْكَٓائِنَاتِ اَبَدًا دَٓائِمًا

چوق عزیز، چوق مبارك، چوق مشفق، چوق سوكیلی استادیمز افندیمز حضرتلری،

مبارك، مقبول دعالریڭز ایلە بوكون رسالۀ نور دینیلن شمس معنویەیی، هم چوق مبارك و قیمتلی مكتوبڭزی دیانت ریاستی باشقانی احمد حمدی افندی یە تسلیم ایتدك. سوینچلر ایچندە مبارك مجموعە و نورلری كندی خصوصی كتبخانەسنە قویدی. "ان شٓاء اللّٰه بونلری كندی ئوز و خاص قرداشلریمە اوقومق ایچون ویرەجگم و بو صورتلە تدریجی تدریجی نشرینە چالیشاجغز" دیدی.

چوق سوكیلی استادم افندم! مبارك مكتوبڭزدەكی امرلریڭزی یاپاجغنی سویلەدی. "فقط شیمدی، همن، بردنبرە بونلرڭ نشری اولماز. بن بو اثرلری

خاص آرقداشلریمە اوقوتدیروب، مراقلیلرە كورە ایلریدە نشر ایدرز. ان شٓاء اللّٰه تام و پارلاق شكلدە ایلریدە نشرینە چالیشاجغنی "سویلەدی.

عزیز استادم افندم، شیمدی درحال بو بیچارە طلبەڭز، نورلرڭ نشری ایچون المزدە بر وثیقە ویرمدیگندن اوزولدم. فقط كندیسی رسالۀ نورڭ نشرینە طرفدار و بتون قوّتیلە چالیشاجغنی سویلەدیگی ایچون سویندم.

چوق سوكیلی استادم! احمد حمدی افندی، سز سوكیلی استادیمزە ناصلدر دیدیلر. بو بیچارە "اوراد و معنوی وظیفەلر جهتندە بر نقصانلق یوق. فقط باشقە جهتدە هر تورلی پریشانم" پریشان اولمایان و دائما عزیز اولان سز سوكیلی استادیمزڭ بو سوزلرینی سویلەینجە، كوزلری یاشارارق دیدیلركە: "ان شٓاء اللّٰه او داها چوق یاشایاجق و پك بیوك خدمتلر داها یاپاجق" دیدیلر.

چوق سوكیلی استادم افندم! بوندن صوڭرە بو بیچارە، یینە كوروشمك اوزرە اورادن آیریلدم. قونیەلی و ملكیەدە اوقویان، نورلرە چوق باغلی احمد آتاق قرداشمزلە و اونڭلە برابر كلن و عین مكتبدە اوقویان، آفیونلی و امرطاغندە سزڭلە برابر كوروشن و مبارك اللریڭزی اوپمك شرفنە نائل اولان جمیلڭ قرداشی مصطفی ایلە برابر، شیمدی آنقرە مفتیسی اولان و سز سوكیلی قهرمان استادیمزلە ارزنجان و استانبولدە آرقداشلق ایدن و اختیار اولان صادق ایلە كوروشدك.

آه، سوكیلی استادیمز! بزە، قورتاریجیمز و وسیلەء سعادتمز اولان سوكیلی استادیمزڭ اسكی خاطرەلرندن براز بحث ایتدیلر. كندیسی آڭلاتیركن دائما آه چكییور. حیرت و استحسانلە كاه كولویور، كاه اوزولویور. و بزە دییوركە: "قرداشلر، او ذات بزە بڭزەمز. او بر خارقەدر. هم اونڭ بعض حاللری واردركە، او زمان كندینە صاحب دگلدر. قلبنە نە طوغارسە او تجلّیات الٰهیەدر" دییە رسالۀ نورڭ قدسی ترجماننی بزە آڭلاتییوردی. حتّی آیاصوفیە جامعندە، بیڭلرجە كیشی یە عزیز، قهرمان ملّا سعیدڭ نطقنی آڭلاتیركن، حیرتلر ایچندە قالدق. "ای مُهدیلر! بو قورولاجق بنای دولتڭ مُهدیلری سزسڭز. بو بنا یا بنای كفر، یا بنای ایمان، یا بنای نفاق اولاجق!" اِلٰی آخِر.. نطقڭزی و صوڭلرندە "قلبدن حقائق چیپلاق چیقییور. نامحرم اولانلر طیشاری یە كیتسینلر." دییە بتون بیڭلرجە خلقی حیرتلرە سوق ایدن، قهرمانلر قهرماننڭ نطقنی بزە سویلركن، "كاشكە نە اولایدی، او زمانكی نطقنی دیڭلەسە ایدك،" دییە ایچمزدن آه ایتدك. جناب حقّە حدسز شكر، مبارك قلبڭزدن فیشقیران رسالۀ نوری اوقودق الحمد للّٰه، او بزە یتر.

هم دیوان عرفیدە، محكمەدەكی پاشالرە، عزیز استادیمزی اعداملە تهدید ایتمەلرینە قارشو: "بن اجل ایستاسیونندە، ئولوم شمندوفرینی بكلەین بر كیمسەیم. بن قورقمام!" دییە استقبالڭ قهرمان قورتاریجیسنڭ قهرمان سوزلرینی بو مبارك اختیار مفتیدن دیڭلەدك. صوڭرە اوچمز آیریلوب پوستەخانەدە بو مكتوبی سز

مشفق و چوق سوكیلی استادیمزە یازدق. بو ایكی قیمتلی قرداشلر، پك چوق سلام و حرمتلر ایلە مبارك ال و آیاقلریڭزدن أوپویور و مبارك دعالریڭزی پك چوق یالوارییورلر. و اونلر دە معنًا امضالرینی سز سوكیلی استادیمزە دعالریڭزلە عرض ایتدیگمز بو سونوك، پریشان و پك عجلە یازابیلدیگمز بو مكتوبە امضالرینی آتییورلر.

چوق سوكیلی استادم! قصور و خطالریمی عفو بویورڭ. بو نهایتسز لطفلرە مقابل، بن بر هیچم. بیڭلر سلام و حرمتلە مبارك ال و آیاقلریڭزدن أوپر، دعالریڭزی یالواریر، قصورلریمی عفو ایتمەڭزی چوق مشفق استادم، یالواریرم. چوق عزیز، چوق مبارك، چوق سوكیلی استادم افندم حضرتلری، امرلریڭزی بكلەیورم. [حاشیە]

اَلْبَاقٖی هُوَ الْبَاقٖی

دعاڭزە محتاج، پریشان و چوق قصورلی خدمتكاریڭز صونغور

[٥١٠]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

محترم احمد حمدی افندی حضرتلری،

بر حادثەء روحیەمی سزە بیان ایدییورم. چوق زمان اوّل، ذاتڭز و سزڭ مسلگڭزدەكی خواجەلرڭ، ضرورتە بناءً رخصتە تابع و عزیمت شرعیەیی بیراقان فكرلرینە، بنم فكرلرم موافق كلمییوردی. بن هم اونلرە، هم سڭا حدّت ایدردم. نەدن عزیمتی ترك ایدوب رخصتە تابع اولویورلر؟ دییە، رسالۀ نوری طوغریدن طوغری یە سزلرە كوندرمزدم. فقط اوچ درت سنە اوّل، یینە شدّتلی، قلبمە سزی تنقیدكارانە بر تأسّف كلدی. بردن اخطار ایدیلدیكە:

بو سنڭ اسكی مدرسە آرقداشلرڭ اولان، باشدە احمد حمدی اولان ذاتلر، دهشتلی و شدّتلی بر تخریباتە قارشو اهون الشّر دستوریلە ممكن اولدیغی قدر، بر درجە، بر قسم وظیفەء علمیەیی مقدّساتڭ محافظەسنە صرف ایدوب، تهلكەیی درتدن برە ایندیرمەلری، اونلرڭ مجبوریتلە بعض نقصانلرینە و قصورلرینە

ان شٓاء اللّٰه كفّارت اولور، دییە قلبمە شدّتلە اخطار ایدیلدی. بن دخی سزلری و سزڭ كبیلرینی، او وقتدنبری یینە اسكی مدرسە قرداشلرم و درس آرقداشلرم دییە حقیقی اخوّت نظریلە باقمەیە باشلادم. اونڭ ایچون بنم بو شدّتلی تسمّم خستەلغم وفاتملە نتیجەلنمەسی دوشونجەسیلە، سزی نورلرە، بنم بدلمە حقیقی صاحب و حامی و محافظ اولاجغڭزی دوشونەرك، اوچ سنە اوّل، مكمّل بر طاقیم رسالۀ نوری سزە ویرمك نیت ایتمشدم. فقط شیمدی هم مكمّل دگل، هم تمامی دگل، فقط اكثریت مطلقە اجزالری نور شاكردلرندن غایت مهم اوچ ذاتڭ اون-اون بش سنە اوّل یازدقلری بر طاقیمی، سزڭ ایچون شدّتلی خستەلغم ایچندە بر درجە تصحیح ایتدم. بو اوچ ذاتڭ قلمنڭ بنم یانمدە اون طاقیم قدر قیمتی وار. سندن باشقە بو طاقیمی كیمسەیە ویرمیەجكدم. بوڭا مقابل اونڭ معنوی فیئٓاتی دە اوچ شیدر:

[برنجیسی] سز ممكن اولدیغی قدر دیانت ریاستنڭ شعبەلرینە ویرمك ایچون.. ممكنسە اسكی حروف، دگلسە یڭی حرف ایلە و خاص آرقداشلرمدن تصحیحە یاردیم ایچون بریسی باشدە بولونمق شرطیلە، مملكتدەكی دیانت ریاستنڭ شعبەلرینە یگرمی اوتوز دانە تكثیر ایدیلمكدر. چونكە خارجی دینسزلك جریاننە قارشو بویلە اثرلری نشر ایتمك، دیانت ریاستنڭ وظیفەسیدر.

[ایكنجیسی] مادام نور رسالەلری مدرسە مالیدر. سز دە مدرسەلرڭ هم اساسی، هم باشلری، هم شاكردلریسڭز. اونلر سزڭ حقیقی مالڭزدر. مناسب كورمدیگڭز رسالەیی، شیمدیلك نشرینی كری بیراقیرسڭز.

[اوچنجیسی] توافقلی قرآنمز، ممكنسە فوطوغراف مطبعەسیلە طبع ایدیلسینكە، توافقدەكی لمعۀ اعجازیە كورونسون. هم باشدەكی توركجە تعریفاتی ایسە، او، قرآن ایلە برابر طبع ایدیلمەسین. بلكە آیریجە بر كوچك رسالەجك اولارق یا توركجە ویا عربی یە كوزلجە چویروب اویلەجە طبع ایدیلسین.

س * ع

[٥١١]

حضرت استادیمزڭ تصحیحاتدە علاوە ایتدیگی نكتەلر

[اوّلًا] یگرمی طقوزنجی مكتوبڭ ایكنجی مقامنڭ اڭ باش صحیفەسندەكی سؤٓال جوابدن صوڭرە شو نكتە یازیلاجق:

بو رسالەنڭ سبب تألیفی، قرآنڭ ترجمەسنی قرآن یرندە جامعلردە اوقوتمق اولان دهشتلی سٓوء قصدینە قارشو، بر نوع مقابلەدر. زیادە تفصیلات و لزومسز بحثلر كیرمش. فقط او مجاهدانە و هیجانلی مقابلەدە، قیمتدار بر غیبی آناختاری حسّ ایدوب مجذوبانە آراتدیرمق ایچندە، لزومسز تفصیلات و ضعیف و پك اینجە امارەلر دخی كیرمش.

قلبمە كلدیكە: یگرمی طقوزنجی مكتوبڭ غایت اهمّیتلی و لزوملی و پارلاق و ایجازلی اولان برنجی مقامی، بو ایكنجینڭ بتون قصوراتنی و اسرافاتنی عفو ایتدیرر. بن دە كمال سرورلە شكر ایتدم، او قصورلریمی اونوتدم.

[ثانیًا] یگرمی طقوزنجی مكتوبڭ ایكنجی مقامنڭ سكزنجی قسمڭ اوچنجی رمزڭ

برنجی قسمندەكی دردنجی لطافتندە بر صحیفە قدر صوڭرە، توافق سرّیلە شاهد كوستریلن اون یدی سورەدن ١٤ نجی سورەدەكی ٣٥٩ تاریخنڭ اوزرینە حاشیە قونولارق، حاشیەسنە شو نكتە یازیلاجق: 〚 اِذَا السَّمَٓاءُ انْفَطَرَتْ〛 اوچ یوز اللی طقوز حروفیلە، بشرڭ باشنە سمادن آطوم بومبەسنڭ اینمەسنە و قلبنە آنارشی میكروبی كیرمەسنە رمز ایدر.

[ثالثًا] یگرمی طقوزنجی مكتوبڭ ایكنجی مقامنڭ سكزنجی قسمڭ اوچنجی رمزینڭ ایكنجی قسمندەكی (مهم بر اخطار) دن بر صحیفە قدر صوڭرە، اوچ یوز اللی بر عددی بو سنەء عربیەیی كوستردیگندن، اوتوز بر دفعە جملەسندەكی (اوتوز بر دفعە) كلمەلرینڭ اوزرینە حاشیە قونولاجق و حاشیەسنە شو نكتە یازیلاجق: بو اشارتە اوتوز بیڭ دفعە بارك اللّٰه! چونكە ایكنجی حرب عمومی، بشرڭ شكرسزلك و كفران نعمتندن چیقدی.

ایكنجی مقامدە:

[خامسًا] یگرمی طقوزنجی مكتوبڭ سكزنجی قسمندە، برنجی رمزڭ بشنجی رمزندەكی خاتمەیە بر حاشیە یاپیلاجق. و شو نكتە یازیلاجق:

اهمّیتلی یتمشلر، یتمش یدی سنەدەكی سعیدڭ یاشنی كوستردیگی كبی، نور تألیفی او تاریخدە تمام اولور دییە رمز ایدر.

مدافعاتدەكی جزئی سهو:

[برنجیسی] مدافعاتڭ آلتمش دردنجی صحیفەسندە، اون و اون برنجی سطرلرندە

(جاذبۀ عمومیە ) كلمەلرندن صوڭرە (یی) حرفی و (محافظە) كلمەسی سهوًا كیرمش. قالدیریلسین.

[ایكنجیسی] سكسان آلتنجی صحیفەدە، اوننجی سطرڭ آخرینە یاقین (دیمەسی) كلمەسی قالدیریلاجق. بیڭ بارك اللّٰه خسروەكە، قوجە مدافعاتدە اوچ درت سهودن باشقە یوق.

سعید النّورسی

[٥١٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] هم مدرسة الزّهرا شاكردلرینی، خصوصًا مباركلر هیئتنی و اسپارطە ولایتنی، مرحوم حافظ مصطفینڭ وفاتیلە تعزیە ایلە، حافظ مصطفی یی تام وظیفەسنی یاپمەسیلە، یگرمی سنەدە ایكنجی بر حافظ علی اولارق، یگرمی سنەدنبری اوصانمدن، صارصیلمادن نورلرڭ نشرینە چالیشمەسنی بتون روح و جانمزلە تبریك، هم اونی، هم اسپارطە ولایتنی، هم مدرسة الزّهرایی تبریك ایدییورز. حقیقتًا بو مرحوم قهرمان قرداشمز، عینًا حافظ علی كبی وظیفەسنی بیتیردی.. عالم نورە و برزخە حافظ علی و حسن فیضی كبی قرداشلرینڭ یاننە كیتدی. جناب حق رسالۀ نورڭ حروفاتی عددنجە اونڭ دفتر حسناتنە خیرلر یازسین و روحنە رحمت أیلەسین.

[ثانیًا] اسكیشهرڭ دهشتلی مصیبتندن انتباهە كلمەین اسكیشهرلی معنّد مدّعیسنڭ افترالی دسیسەلریلە، مرور زمان و عفو قانونلرینی كچیرن، اون آلتی سنە اوّل غرضكارانە اتهامنامەلرینی طوپلاتدیروب، ایكی چووال قدر اوراقلری اسكیشهردن آفیونە جلب ایتدیروب، او بهانە ایلە رسالۀ نورڭ سربستیتنە و انتشارینە مانع اولمق ایچون بر وسیلە یاپمق غرضیلە، بتون بتون قانونسز و امثالسز بر صورتدە آفیون محكمەسی، بو دفعە دخی یینە اوتوز طقوز كون محكمەیی تأخیر ایتدیردی. فقط بونلرڭ اشدّ ظلمنە مقابل، عنایت الٰهیە برقاچ جهتدە بو تأخیردە نورلر و شاكردلرینە، خصوصًا حقیقت اخلاصلرینە منفعتە چویردیگنە قناعتمز وار. هر نە ایسە، اوزون سویلەیەجكدم، فقط راحتسزلق یتر دیدی.

[ثالثًا] سبیل الرّشادڭ حقّمزدە نشر ایتمك ایچون سزە لفًّا كوندردیگمز مقالەیی، سز مناسب كورسەڭز نشر ایتسین. بڭا او فكرلە كوندرمشدیلر. بن دە سزە حوالە ایدییورم. هم اونیورسیتەدەكی كوچك سعیدلرڭ و اونیورسیتەیی تنویر ایدن و نورلاندیران نور شاكردلرینڭ نامنە عبد المحسن امضاسیلە كلن و لفًّا سزە كوندریلن مكتوبلری كوسترییوركە، اونیورسیتە ایلریدە بر نور مدرسەسی اولاجغنە بر امارەدر.

اَلْبَاقٖی هُوَ الْبَاقٖی

قرداشڭز سعید نورسی

[٥١٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

سزە، شخصمە عائد برقاچ مسئلەیی بیان ایتمك قلبمە اخطار ایدیلدی.

[اوّلا] بعض خاص قرداشلرم شخصمە خدمتدە دقّتسزلك ایتدكلرندن، اونلرڭ بڭا قارشو آجیمەسنی نقصان كوردیگمدن، بعضًا حدّت و تكدیر ایتدیگم وقت، قلبمە كلدیكە: او بیچارەلر، زیادە حسن ظنلە تخمین ایدییورلركە، "استادیمز ایستەسە، بلكە بعض روحانیلر، جنّیلر دە خدمت ایدەجكلر، بلكە ایدییورلر. خدمت نوریەدە عنایتڭ آشكارە جلوەسی كوسترییوركە، اونڭ شخصنڭ پریشانیتنە میدان ویریلمییور و شفقتمزە محتاج دگل" دییە خدمتدە بعض قصورلری اولویور. حتّی بوكون دە بریسی آرابە كتیرەجكدی، دقّتسزلك یوزندن بن یایان چیقدم. بر ساعتدە اون ساعت قدر زحمت چكدم. بن دە برقاچ كون اوّل بویلە قصوری یاپانلرە دیمشدم، تكرار ایدەجگم، سز دە دیڭلەییڭز:

ناصلكە رسالۀ نوری و خدمت ایمانیەیی، دنیوی رتبەلرینە و شخصم ایچون اخروی مقاماتلرینە آلت یاپمقدن سرّ اخلاص شدّتلە بنی منع ایتدیگی كبی، اویلە دە، كندی شخصمڭ استراحتنە و دنیوی حیاتمڭ كوزلجە، زحمتسز كچمەسنە، او خدمت قدسیەیی آلت یاپمقدن جدًّا چكینییورم. چونكە اخروی حسناتڭ

باقی میوەلرینی فانی حیاتدە جزئی بر ذوق ایچون صرف ایتمك، سرّ اخلاصە مخالف اولمەسندن قطعیًّا خبر ویرییورمكە، تارك الدّنیا اهل ریاضتڭ آرزو و قبول ایتدكلری روحانی، جنّی خدّاملر، بڭا هر كون، هم آچ اولدیغم زماندە و یارەلی اولدیغم وقتدە، اڭ كوزل ییمك و اڭ كوزل علاج كتیرسەلر، حقیقی اخلاص ایچون قبول ایتمەمگە كندیمی مجبور بیلییورم. حتّی برزخدەكی اولیادن بر قسمی تمثّل ایدوب، بڭا حلوا باقلاوەلری خدمت ایمانیەیە حرمتًا ویرسەلر، یینە اونلرڭ ألنی أوپوب قبول ایتمەمك و اخروی، باقی میوەلرینی دنیادە، فانی بر صورتدە ییمەمك ایچون، نفسم دە قلبم كبی قبول ایتمەیە رضا كوسترییور. فقط قصد و نیّتمز اولمادن، عنایت جهتندە كلن بركت كبی اكرامات رحمانیە، خدمتڭ مقبولیتنە بر علامت اولدیغندن، نفس امّارە قاریشمامق شرطیلە، روحملە قبول ایدرم. هر نە ایسە.. بو مسئلە بو قدر كافی.

[ثانیًا] اسكی حرب عمومیدە، پاسینلر جبهەسندە، شهید مرحوم ملّا حبیب ایلە برابر روسە هجوم نیّتیلە كیدییوردق. اونلرڭ طوپچیلری، بر ایكی دقیقە فاصلە ایلە بزە اوچ طوپ كلّەسی آتییوردی. اوچ كُلّە، تام باشمزڭ ایكی مترە اوستندن كچوب، آرقەدە درە ایچنە صاقلانان عسكریمز، كورونمدكلری حالدە كری قاچدیلر. تجربە ایچون دیدم: "ملّا حبیب، نە دیرسڭ، بن بو كاوورڭ كلّەسنە قارشو كیزلنمیەجگم." او دە دیدی: "بن دە سنڭ آرقەڭدن چكیلمەیەجگم." ایكنجی