[٦١٦]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، وفادار، فداكار قرداشلرم،

[اوّلًا] بتون روح و جانملە فوق العادە نورانی خدمت ایمانیەڭزی تبریك ایدرم.

[ثانیًا] آنقرەدە دیندار احرارلرڭ قونغرەسندە، بنی دیانت ریاستی دائرەسندە بر وظیفە ایلە توظیف ایتمەیی حرارتلە ایستەمەلرینە و مدرسة الزّهرانڭ نور طلبەلرینی، بو مسئلەدە بڭا قبول ایتدیرمكدە واسطە یاپمەلرینە قارشو دیرم:

او طوپلانتیدە بو تكلیفی یاپان مبعوثلرە و دیندار آرقداشلرینە چوق تشكّر و چوق سلام و موفّقیتلرینە چوق دعا ایدرز. فقط بن زیادە ضعیف و شدّتلی خستە و اختیار و قبر قاپوسندە و پریشان اولدیغمدن، او قدسی وظیفەیی یاپمغە اقتدارم اولمامسندن، بنم یرمدە رسالۀ نورڭ شخص معنویسی و بنم بدلمە نور شاكردلرینڭ خاص و خالص و اسلامیتڭ حقیقی فداكارلرینڭ شخصیت معنویەسی، او قدسی وظیفەیی شیمدی یە قدر غیر رسمی پردە آلتندە یاپدقلری كبی، ان شٓاء اللّٰه رسمی بر صورتدە دخی یاپابیلەجكلر. اونلرە حوالە ایدرز. [حاشیە]

اَلْبَاقٖی هُوَ الْبَاقٖی دعاڭزە محتاج قرداشڭز سعید النّورسی

[٦١٧]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] بتون روح و جانملە خدمت قرآنیە و ایمانیەڭزی تبریك ایدییورم. بو مكتوبدەكی بر اینجە مسئلەیی مشورت صورتیلە رأیڭزی آلمق ایچون كوندردك. مناسبمیدر؟ دگلسە اصلاح ایدرسڭز.

[ثانیًا] رسالۀ نوردە اثبات ایدیلمشكە، انسانلرڭ عین ظلملری ایچندە قدر الٰهی عدالت ایدر. یعنی، انسانلر بعض سببلە حقسز ظلم ایدر، بریسنی حپسە آتار. فقط قدر الٰهی، عین حپسدە باشقە سببە بناءً عدالت ایدییوركە، حقیقی بر صوچە بناءً او حپسلە اونی محكوم ایدییور. ایشتە شیمدی بو حقیقتی كوسترن، باشمە كلن عجیب بر مثالی شودر: یگرمی سكز سنەدر متعدّد ولایتلردە و محكمەلردە بنم مسئولیتمە و محكومیتمە و محبوسیتم كبی ظالمانە اشكنجە و جزالرینە كوستردكلری سبب و هیچ بر امارەسنی بولمدقلری موهوم بر صوچم شودر. دییورلركە:

"سعید، دینی سیاستە آلت یاپمق ایستر و یاپییور." حالبوكە بو دعوالرینە اوتوز سنەلك مصیبتلی یڭی حیاتمدە و اوتوز بیوك مجموعەلرمدە بو صوچە مثبت بر دلیل بولامدیلر. حالبوكە بویلە مسئلەلردە بر محكمە مادام بولمدی و مسئول ایدەمدی.. باشقە محكمەلرڭ مصرّانە عین مسئلەیی اساس طوتمەلری،

بتون بتون قانونە و عقلە و عادتە مخالف بر حالتدر. بلكە سیاستی دینسزلگە آلت ایدنلر قسمی، كندیلرینە بر پردە اولارق بو اتهامی بزلرە ایدییورلر. بونڭلە برابر دینە خدمت اعتباریلە تعلّق ایدن اسكی آلتمش سنەلك حیات علمیەم، قطعی بر حجّت و یقینی بر دلیلدركە، بتون حیاتمدە تماس ایتدیگم سیاستی و دنیایی و بتون اجتماعی جریانلری، دینە خدمتكار و آلت و تابع یاپمق دستوریلە حركت ایتمشم. محكمەلردە دە هم دعوا، هم اثبات ایتمشمكە، دگل دینی سیاستە آلت یاپمق، بلكە بر تك حقیقت ایمانیەیی دنیا سلطنتنە دگیشدیرمدیگمی قطعی دلیللرلە اثبات ایتدیگم حالدە، بویلە یگرمی وجهلە حقیقتە مخالف و دیوانەجەسنە، بیوك مقاملری اشغال ایدن بر قسم عدلیە مأمورلری و سیاسی آدملر، بو عجیب خرافە كبی مسئلەیی حقیقت ظن ایدوب یگرمی سكز سنە بڭا ظلم ایتدكلرینڭ حقیقی سببنی بوكونلردە بیلدم. سببی بوكە:

بو انانیتلی زماندەكی خدمت ایمانیەدە اڭ بیوك تهلكەم و معنوی اڭ بیوك صوچم و جنایتم، بو زماندە خدمت قرآنیەمی شخصمە عائد مادّی و معنوی ترقّیاتمە و كمالاتمە آلت یاپمق ایمش. جناب حقّە حدسز شكر ایدییورمكە، بو اوزون زمانلردە، اختیارم خارجندە خدمت ایمانیەمی، دگل مادّی و معنوی ترقّیاتمە و كمالاتمە و عذابدن و جهنّمدن قورتولمەمە و حتّی سعادت ابدیەمە وسیلە یاپمەمە، بلكە هیچ بر مقصدە قطعیًّا آلت ایتمەمكلگمە غایت قوّتلی، معنوی بر مانع كورییوردم. حیرت، حیرت ایچندە قالییوردم.

عجبا هركسڭ خوشلاندیغی معنوی مقاماتی و اخروی سعادتلری، اعمال صالحە ایلە اونلری قزانمق و متوجّه اولمق، هم مشروع، هم هیچ بر جهت ضرری اولمدیغی حالدە، نە ایچون بویلە روحًا منع ایدیلییورم؟ رضای الٰهیدن باشقە وظیفەء فطریەء علمیەنڭ سوقیلە، یالڭز و یالڭز ایمانە خدمتڭ كندیسی عین اجرت بڭا كوستریلمش. چونكە شیمدی بو زماندە هیچ بر شیئە آلت و تابع اولمایان و هر غایەنڭ فوقندە اولان حقائق ایمانیەیی، فطری عبودیت ایلە محتاجلرە تأثیرلی بر صورتدە بیلدیرمەنڭ بو دهشتلی زماندە چارۀ یگانەسی و ایمانی قورتاراجق و قناعت قطعیە ویرەجك بو طرزدە، یعنی هیچ بر شیئە آلت اولمایان بر درس قرآنی لازمدركە، كفر مطلقی و متمرّد و عنادجی ضلالتی قیرسین و هركسە قناعت قطعیە ویرەبیلسین.

بویلە بر درسە بو زماندە، بو شرائط داخلندە، هیچ بر شخصی و اخروی و دنیوی، مادّی و معنوی بر شیئە آلت ایدیلمدیگنی بیلمكلە قطعی قناعت كلەبیلیر. یوقسە قومیتەجیلكدن و جمعیتجیلكدن تولّد ایدن دهشتلی دینسزلك شخصیت معنویەسنە قارشو مقابل چیقان بر شخصڭ اڭ بیوك بر مرتبەء معنویەسی دە بولونسە، یینە وسوسەلری بتون بتون ازالە ایدەمز. چونكە ایمانە كیرمك ایستەین معنّدڭ نفسی و أَنَاسی دییەبیلیركە: "او قدسی شخص، دهاسیلە و خارقە مقامیلە بزی قاندیردی" دییە بر شبهەسی قالیر.

جناب حقّە شكركە، یگرمی سكز سنە، دینی سیاستە آلت اتهامی آلتندە قدر الٰهی بو ظلم بشریدە بنم روحمی اختیارم خارجندە، دینی هیچ بر شخصی شیدە آلت ایتمەمك ایچون، بنی بشرڭ ظالمانە ألیلە عین عدالت اولارق طوقاتلایور، یعنی "صاقین صاقین!" دییە ایقاظ ایدییور. "ایمان حقیقتنی كندی شخصڭە آلت یاپما! تا ایمانە محتاج اولانلر آڭلاسینلركە، یالڭز حقیقت قونوشویور. نفسڭ اوهاملری، شیطانڭ دسیسەلری قالماسین، صوصسون."

حقیقتًا رسالۀ نورڭ بحث ایتدیگی حقیقتلرڭ عین مأٓلندە میلیونلر كتاب او حقیقتلری بلیغانە نشر ایتدكلری حالدە و بیڭلر حقیقی عالملر درس ویرمەلریلە بو مملكتدە دهشتلی كفر مطلقی تام طوردیرامدقلری حالدە، نورلر مذكور سرّە بناءً بر جهتدە غلبە ایتدیگنی دوشمانلری دخی تصدیق ایدرلر. اوت، كفر مطلقە قارشو بو آغیر شرائط ایچندە، نورلر بو ایشی كورمش، میداندەدر. دیمك نورلرڭ قوّتی بو سرّ عظیمدن ایلری كلییور. بن دە بتون روح و جانملە، یگرمی سكز سنە بو اشكنجەلی مصیبتلریمە راضی اولدم. حقّمی حلال ایتدم. عادل قدرە دە دیرمكە:

مستحق ایدم سنڭ بو شفقتلی طوقاتلریڭە. یوقسە غایت مشروع، ضررسز، هركسڭ للّٰه ایچون تعقیب ایتدیگی مبارك مسلگە كیرسەیدم، یعنی مادّی و معنوی حسلریمی بتون فدا ایتمەسە ایدم، خدمت ایمانیەدە بو عجیب معنوی قوّتی غائب ایدەجكدم. ایشتە بو قوّتڭ بر نمونەسی بعض ذاتلرڭكە، بن اونلرڭ

آنجق ادنا بر طلبەسی اولابیلدیگم حالدە، اونلرڭ حقائق ایمانیەیە دائر بر كتابنی بریسی اوقومش، رسالۀ نورڭ دە بر صحیفەسنی اوقومش. رسالۀ نورڭ بر صحیفەسیلە داها زیادە ایماننی قورتاردیغنی اقرار ایتمش.

اَلْبَاقٖی هُوَ الْبَاقٖی

قرداشڭز دعاڭزە محتاج سعید النّورسی

(٦١٨)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

پك عزیز و قیمتلی چوق سوكیلی و مبارك خسرو آغابگمز،

[اوّلًا] بیڭلر سلام و روح و جانمزلە بتون قرداشلر حرمتلە اللریڭزدن أوپر، خیرلی دعالریڭزی بكلەیورز.

كوندرمش اولدیغڭز خطبة الشّامیەلر، مبارك استادیمزڭ خستەلغنە پك نافع بر مرهم اولدی. الماس قلمڭزدن چیقان بو پك قیمتلی اثر، ان شٓاء اللّٰه بتون اسلام عالمی ایچون دە عین شفا اولارق تأثیرینی كوستریر. استادیمز تصحیحاتنی یاپدی. معنایی دگیشدیرمەین پك آز خطا بولدی. "ما شٓاء اللّٰه، بیڭ بارك اللّٰه!" دیدی. "قرق سنە اوّل یازیلمش بر اثرڭ، بو قدر دقّت و اعتنا ایلە یازیلمەسی، جدًّا شایان تبریكدر" دیدی. و بو شكلدە سز مبارك آغابگمە یازمەیی امر بویوردیلر.

جملە قرداشلریمز، سلام و حرمتلە ایكی اللریڭزدن أوپر، خیرلی دعالریڭزی بكلرز افندیمز.

اسكیشهر نور طلبەلری نامنە پك عاجز و دعالریڭزە محتاج

عثمان طوپراق و شكری و حافظ عثمان

[٦١٩]

[بِاسْمِهٖ سُبْحَانَهُ]

بِسْمِ اللّٰهِ الرَّحْمٰنِ الرَّحٖیمِ

اهل ایمان آخرت همشیرەلرم اولان قادینلر طائفەسیلە بر محاورەدر.

بعض ولایتلردە، طائفۀ نسادن صمیمی و حرارتلی بر صورتدە نورلرە قارشو علاقەلرینی كوردیگم.. و حدّمدن پك زیادە، اونلرڭ نورلرە عائد درسلریمە اعتمادلرینی بیلدیگم صیرەلردە، مبارك اسپارطەیە و معنوی مدرسة الزّهرایە اوچنجی دفعە كلدیگم زمان ایشیتدمكە، او مبارك آخرت همشیرەلرم اولان طائفۀ نسا، بندن بر درس بكلەیورلرمش. كویا وعظ صورتندە جامعلردە اونلرە بر درسم اولاجق. حالبوكە بن درت بش وجهلە خستەیم. و هم ذهنم پریشان. حتّی قونوشمەیە و دوشونمەیە اقتدارسز بولوندیغم حالدە، بو كیجە شدّتلی بر اخطار ایلە قلبمە كلدیكە:

مادام اون بش سنە اوّل كنچلرڭ ایستەمەلریلە كنچلك رهبرینی اونلر ایچون یازدق. و پك چوق استفادە ایدیلدی. حالبوكە خانملر طائفەسی، كنچلردن داها زیادە

بو زماندە اویلە بر رهبرە محتاجدرلر. بن دە بو اخطارە قارشو، غایت پریشان و ضعف و عجزملە برابر [ اوچ نكتە] ایلە غایت مختصر بعض لزوملی مادّەلری، او مبارك همشیرەلریمە و معنوی كنچ اولادلریمە بیان ایدییورم.

[برنجی نكتە] رسالۀ نورڭ اڭ مهم بر اساسی شفقت اولمەسندن، نسا طائفەسی شفقت قهرمانلری بولونمەلری جهتیلە، داها زیادە رسالۀ نورلە فطرتًا علاقەداردرلر. و للّٰە الحمد بو فطری علاقەدارلق چوق یرلردە حسّ ایدیلییور. بو شفقتدەكی فداكارلق، حقیقی بر اخلاص و مقابلەسز بر فداكارلق معناسنی افادە ایتدیگندن، شیمدی بو زماندە پك چوق اهمّیتی وار.

اوت، بر والدە ولدینی تهلكەدن قورتارمق ایچون هیچ بر اجرت ایستەمدن روحنی فدا ایتمسی و حقیقی بر اخلاص ایلە وظیفۀ فطریەسی اعتباریلە كندینی اولادینە قربان ایتمسی كوسترییوركە، خانملردە غایت یوكسك بر قهرمانلق وار. بو قهرمانلغڭ انكشافیلە حیات دنیویەسنی، هم دە حیات ابدیەسنی اونڭلە قورتارابیلیر. فقط بعض فنا جریانلرلە، او قوّتلی و قیمتدار سجیە انكشاف ایتمز. ویاخود سٓوء استعمال ایدیلیر. یوزر نمونەلرندن بر كوچك نمونەسی شودر: او شفقتلی والدە، چوجغنڭ حیات دنیویەدە تهلكەیە كیرمەمسی و استفادە و فائدە كورمسی ایچون هر فداكارلغی نظرە آلیر، اویلە تربیە ایدر. "اوغلم پاشا اولسون!" دییە، بتون مالنی ویرر. حافظ مكتبندن آلیر، آوروپەیە كوندریر. فقط او چوجغڭ حیات ابدیەسی تهلكەیە كیردیگنی دوشونەمییور. و دنیا حپسندن قورتارمغە

چالیشییور، جهنّم حپسنە دوشمەسنی نظرە آلمییور. فطری شفقتڭ تام ضدّی اولارق او معصوم چوجغنی، آخرتدە شفاعتجی اولمق لازم كلیركن، دعواجی ایدییور. او چوجق، "نە ایچون بنم ایمانمی تقویە ایتمدڭ؟ بو هلاكتمە سببیت ویردڭ؟" دییە شكوا ایدەجك. دنیادە دە تربیۀ اسلامیّەیی تام آلمدیغی ایچون والدەسنڭ خارقە شفقتنڭ حقّنە قارشو لایقیلە مقابلە ایدەمز. بلكە دە چوق قصور ایدر.

اگر حقیقی شفقت سٓوء استعمال ایدیلمەیەرك، بیچارە ولدینی حپس ابدی اولان جهنّمدن و اعدام ابدی اولان ضلالت ایچندە ئولمكدن قورتارمغە او شفقت سرّیلە چالیشسە، او ولدڭ بتون ایتدیگی حسناتنڭ بر مثلی، والدەسنڭ دفتر اعمالنە كچەجگندن، والدەسنڭ وفاتندن صوڭرە هر وقت حسناتلریلە روحنە نورلر یتیشدیردیگی كبی، آخرتدە دە، دگل دعواجی اولمق، بتون روح و جانیلە شفاعتجی اولوب ابدی حیاتدە اوڭا مبارك بر اولاد اولور.

اوت، انسانڭ اڭ برنجی استادی و تأثیرلی معلّمی، اونڭ والدەسیدر. بو مناسبتلە بن كندی شخصمدە قطعی و دائما حسّ ایتدیگم بو معنایی بیان ایدییورم:

بن بو سكسان سنە عمرمدە، سكسان بیڭ ذاتلردن درس آلدیغم حالدە، قسم ایدییورمكە، اڭ اساسلی و صارصیلماز و هر وقت بڭا درسنی تازەلر كبی مرحوم والدەمدن آلدیغم تلقینات و معنوی درسلردركە، او درسلر فطرتمدە، عادتا مادّی وجودمدە چكردكلر حكمندە یرلشمش. سائر درسلرم، او چكردكلر

اوزرینە بنا ایدیلدیگنی عینًا كورویورم. دیمك بر یاشمدەكی فطرتمە و روحمە مرحوم والدەمڭ درس و تلقیناتنی، شیمدی بو سكسان یاشمدەكی كوردیگم بیوك حقیقتلر ایچندە برر چكردك اساسیە مشاهدە ایدییورم.

[ازجملە] مسلك و مشربمڭ درت اساسندن اڭ مهمّی اولان شفقت ایتمك.. و رسالۀ نورڭ دە اڭ بیوك حقیقتی اولان آجیمق و مرحمت ایتمەیی، او والدەمڭ شفقتلی فعل و حالندن و معنوی درسلرندن آلدیغمی یقینًا كورویورم. اوت، بو حقیقی اخلاص ایلە حقیقی بر فداكارلق طاشییان والدەلك شفقتی، سٓوء استعمال ایدیلوب، معصوم چوجغنڭ الماس خزینەسی حكمندە اولان آخرتنی دوشونمەیەرك، موقّت، فانی شیشەلر حكمندە اولان دنیایە، او چوجغڭ معصوم یوزینی چویرمك و بو شكلدە اوڭا شفقت كوسترمك، او شفقتی سٓوء استعمال ایتمكدر.

اوت، قادینلرڭ شفقت جهتیلە بو قهرمانلقلرینی هیچ بر اجرت و هیچ بر مقابلە ایستەمەیەرك، هیچ بر فائدۀ شخصیە، هیچ بر كوستریش معناسی اولمایارق روحنی فدا ایتدكلرینە، او شفقتڭ كوچوجك بر نمونەسنی طاشییان بر طاووغڭ، یاوروسنی قورتارمق ایچون آسلانە صالدیرمسی و روحنی فدا ایتمسی اثبات ایدییور.

شیمدی تربیۀ اسلامیەدن و اعمال اخرویەدن اڭ قیمتلی و اڭ لزوملی اساس، اخلاصدر. بو چشیت شفقتدەكی قهرمانلقدە او حقیقی اخلاص بولونویور.

اگر بو ایكی نقطە او مبارك طائفەدە انكشافە باشلاسە، دائرۀ اسلامیّەدە پك بیوك بر سعادتە مدار اولور. حالبوكە ارككلرڭ قهرمانلقلری مقابلەسز اولامییور. بلكە، یوز جهتدە مقابلە ایستەیورلر. هیچ اولمازسە، شان و شرف ایستەیورلر. فقط مع التّأسّف بیچارە مبارك طائفۀ نسائیّە، ظالم ارككلرینڭ شرلرندن و تحكّملرندن قورتولمق ایچون، باشقە بر طرزدە، ضعفیّتدن و عجزدن كلن باشقە بر نوعدە ریاكارلغە كیرییورلر.

[ایكنجی نكتە] بو سنە انزوادە ایكن و حیات اجتماعیەدن چكیلدیگم حالدە، بعض نورجی قرداشلریمڭ و همشیرەلریمڭ خاطرلری ایچون دنیایە باقدم. بنملە كوروشن اكثر دوستلردن، كندی عائلوی حیاتلرندن شكوالر ایشیتدم، "ایواه!" دیدم. "انسانڭ، خصوصًا مسلمانڭ تحصّنگاهی و بر نوع جنّتی و كوچك بر دنیاسی عائلە حیاتیدر. بو دەمی بوزولمەیە باشلامش؟" دیدم. سببنی آرادم، بیلدمكە:

ناصل، اسلامیتڭ حیات اجتماعیەسنە و طولاییسیلە دین اسلامە ضرر ویرمك ایچون كنچلری یولدن چیقارمق و كنچلك هوساتیلە سفاهتە سوق ایتمك ایچون بر ایكی قومیتە چالیشییورمش. عینًا اویلە دە، بیچارە نسا طائفەسنڭ غافل قسمنی دخی یاڭلیش یوللرە سوق ایتمك ایچون بر ایكی قومیتەنڭ تأثیرلی بر صورتدە پردە آلتندە چالیشدیغنی حسّ ایتدم و بیلدمكە، بو ملّت اسلامە بر دهشتلی ضربە، او جهتدن كلییور. بن دە سز همشیرەلریمە و كنچلریڭز

اولان معنوی اولادلریمە قطعیًّا بیان ایدییورمكە: قادینلرڭ سعادت اخرویەسی كبی، سعادت دنیویەلری دە و فطرتلرندەكی علوی سجیەلری دە بوزولمقدن قورتولمەنڭ چارۀ یگانەسی، دائرۀ اسلامیەدەكی تربیۀ دینیّەدن باشقە یوقدر!

روسیەدە او بیچارە طائفەنڭ نە حالە كیردیگنی ایشیتییورسڭز. رسالۀ نورڭ بر پارچەسندە دینیلمشكە: عقلی باشندە اولان بر آدم، رفیقەسنە محبّتنی و سوكیسنی، بش اون سنەلك فانی و ظاهری حسن جمالنە بنا ایتمز. بلكە قادینلرڭ حسن جمالنڭ اڭ كوزلی و دائمیسی، اونڭ شفقتنە و قادینلغە مخصوص حسن سیرتنە سوكیسنی بنا ایتملی. تاكە، او بیچارە اختیارلاندقجە، قوجەسنڭ محبّتی اوڭا دوام ایتسین. چونكە اونڭ رفیقەسی، یالڭز دنیا حیاتندەكی موقّت بر یاردیمجی رفیقە دگل، بلكە حیات ابدیەسندە ابدی و سویملی بر رفیقۀ حیات اولدیغندن، اختیارلاندقجە داها زیادە حرمت و مرحمت ایلە بربرینە محبّت ایتمك لازم كلییور. شیمدیكی تربیۀ مدنیە پردەسی آلتندەكی حیوانجەسنە موقّت بر رفاقتدن صوڭرە، ابدی بر مفارقتە معروض قالان او عائلە حیاتی، اساسیلە بوزولویور.

هم رسالۀ نورڭ بر جزئندە دینیلمشكە: بختیاردر او آدمكە، رفیقۀ ابدیەسنی غائب ایتمەمك ایچون، صالحە زوجەسنی تقلید ایدر، او دە صالح اولور. هم بختیاردر او قادینكە، قوجەسنی متدیّن كورور، ابدی دوستنی و آرقداشنی غائب ایتمەمك ایچون، او دە تام متدیّن اولور، سعادت دنیویەسی ایچندە سعادت اخرویەسنی قزانیر.

بدبختدر او آدمكە، سفاهتە كیرمش زوجەسنە اتّباع ایدر، واز كچیرمەیە چالیشماز، كندیسی دە اشتراك ایدر. بدبختدر او قادینكە، زوجنڭ فسقنە باقار، اونی باشقە بر صورتدە تقلید ایدر. ویل او زوج و زوجەیەكە، بربرینی آتشە آتیلمقدە یاردیم ایدرلر. یعنی مدنیّت فانتازیەلرینە بربرینی تشویق ایدرلر.

ایشتە، رسالۀ نورڭ بو مأٓلدەكی جملەلرینڭ معناسی بودركە: بو زماندە عائلە حیاتنڭ و دنیوی و اخروی سعادتنڭ و قادینلرڭ دە علوی سجیّەلرینڭ انكشافنڭ مسبّبی، یالڭز دائرۀ شریعتدەكی آداب اسلامیتلە اولابیلیر.

شیمدی عائلە حیاتندە اڭ مهم نقطە بودركە، قادین، قوجەسندە فنالق و صداقتسزلك كورسە، قوجەسنڭ عنادینە عائلە دوستلغی اولان صداقت و امنیّتی بوزسە، عینًا عسكریەدەكی اطاعتڭ بوزولمەسی كبی، او عائلە حیاتنڭ فابریقەسی دە زیر و زبر اولور. بلكە او قادین، ألندن كلدیگی قدر قوجەسنڭ اصلاحنە چالیشملیدركە، ابدی آرقداشنی قورتارسین. یوقسە او دە، كندینی آچیقلق و صاچیقلقلە باشقەلرە كندینی كوسترمگە و سودیرمگە چالیشسە، هر جهتلە ضرر ایدر.

چونكە حقیقی صداقتی بیراقان، دنیادە جزاسنی كورور. چونكە نامحرملرڭ نظرندن فطرتی قورقار، صیقیلیر، چكینیر. نامحرم یگرمی اركگڭ اون سكزینڭ نظرندن استثقال ایدر. كندینە باقمەلرندن صیقیلیر. اركك ایسە، نامحرم یوز قادیندن، آنجق بریسندن استثقال ایدر، باقمەسندن صیقیلیر. قادین

او جهتدە عذاب چكدیگی كبی، صداقتسزلك اتهامی آلتنە كیرر. ضعفیتیلە برابر، حقوقنی محافظە ایدەمز.

[الحاصل] ناصلكە قادینلر قهرمانلقدە، اخلاصدە، شفقت اعتباریلە ارككلرە بڭزەمدكلری كبی، ارككلر دە او قهرمانلقدە، اونلرە یتیشەمییورلر. اویلە دە او معصوم خانملر دخی، سفاهتدە هیچ بر وجهلە ارككلرە یتیشەمزلر. اونڭ ایچون فطرتلریلە و ضعیف خلقتلریلە نامحرملردن شدّتلی قورقارلر و چارشاف آلتندە صاقلانمەیە كندیلرینی مجبور بیلیرلر. چونكە اركك، سكز دقیقە ذوق و لذّت ایچون سفاهتە كیرسە، آنجق سكز لیرە قدر بر شی ضرر ایدر. فقط قادین، سكز دقیقە سفاهتدەكی ذوقڭ جزاسی اولارق، دنیادە دخی سكز آی آغیر بر یوكی قارنندە طاشیر. و سكز سنە دە او حامیسز چوجغڭ تربیەسنڭ مشقّتنە كیردیگی ایچون، سفاهتدە ارككلرە یتیشەمز. یوز درجە فضلە جزاسنی چكر.

آز اولمایان بو نوع وقوعات كوسترییوركە، مبارك طائفۀ نسائیّە، فطرتًا یوكسك اخلاقە منشأ اولدیغی كبی، فسق و سفاهتدە دنیا ذوقی ایچون قابلیتلری یوق حكمندەدر. دیمك اونلر، دائرۀ تربیۀ اسلامیە ایچندە مسعود بر عائلە حیاتنی كچیرمگە مخصوص بر نوع مبارك مخلوقلردر. بو مباركلری افساد ایدن قومیتەلر قهر اولسونلر! اللّٰه بو همشیرەلریمی دە بو سرسریلرڭ شرلرندن محافظە أیلەسین. آمین.