ویا یازمق جهتیلە بر مقدار مشغول اولسەلر، حقیقی طلبۀ علومڭ ثوابلرینە و شرفلرینە مظهر اولدقلری كبی، اخلاص رسالەسندە یازیلان بش نوع عبادتە مظهر اولورلر. حقیقی علم طلبەلری كبی، اونلرڭ معیشتلرینی تأمین خصوصندەكی عادی معاملاتلری دە بر نوع عبادت حكمنە كچەبیلیر دییە قلبە اخطار ایدیلدی. بن دە قرداشلریمە بیان ایدییورم.

اَلْبَاقٖی هُوَ الْبَاقٖی

خستە و دعاڭزی طلب ایدن قرداشڭز

سعید النّورسی

(٦٢١)

صوڭ زماندە دینی جریدەلردە نشر ایدیلمش، غایت اهمّیتلی بر ذاتڭ بدیع الزّمان سعید النّورسی حقّندە بر مقالەسیدر.

بدیع الزّمان سعید النّورسی

بیوك و داهی آدملرڭ بشیگی اولان توركیە، شیمدی یە قدر نە قدر مبذول مجاهدلر، مجدّدلر و بتون معناسیلە بیوك انسانلر كورمشدر. اونلرڭ ادراك ایتدكلری حیات شرطلری و كوردكلری اعتبار و بولدقلری و مظهر اولدقلری حرمت، قدِر و قیمتلرینە اصلا نقیصە ویرمەمكلە برابر، یورودكلری حق یولندە محقّقكە كندیلرینە بیوك قولایلقلر تأمین ایتمشلردر. بو شرطلرڭ معكوس تجلّیسنە و ظلملرڭ اڭ آغیرینە معروض قالدیغمز شو كچمش یگرمی سكز ییل بزە

آغیر مجادلە و مجاهدەلر ایچندە یوغرولمش، دعواسنڭ و ایماننڭ عظمتندن الهام آلمش و بیوكلگنی دنیانڭ اڭ اوجرا كوشەلرینە یایمش بر داهی، بر نور و فضیلت تمثالی اولان سعید النّورسی یی هدیە ایتمشدر.

نوری، پك چوق مظلَم وجدانلری آیدینلاتمش، قدرتی، پك چوق ضعیف ایمانلی انسانلرە جسارت ویرمش، دهاسی، پك چوق نصیبسز انسانلرڭ روحنە الهام سرپمش اولان بیوك داهی، هیچ شبهە یوقدركە، سعید النّورسی حضرتلریدر. اوندن فضیلت و فداكارلق درسی آلان، پك چوق یولنی شاشیرمش انسانلر، كندیلرینی مسعود و آیدینلق بر شاهراهڭ اورتەسندە بولمشلردر. دهاسی و جلادتی قدر، ایمانی دە قوّتلی و یوكسك اولان بو محترم انسان، یگرمی سكز ییللق استبداد و ظلمە كوزلرینی قیرپمادن كوگس كرمش و اونڭ قورقونچ اشكنجە و عدالتسزلكلرینە ایماندن طوغان بر جرئتلە قارشو قویان تك بر شخصیتدر.

بو داهینڭ عصرندە بتون مسلمان دنیاسی، بو قطبڭ جاذبەسندن كندیسنی قورتارامامشدر. توركیەنڭ ایصسز و تنها بر كوشەسندە طوغان بو نور ضیاسنی پاكستانلرە، اندونزیەلرە قدر یایمش، آوروپە و آمریقەیە قدر كوندرمشدر. و كندیسیلە برابر ملّتمزڭ دە شان و شرفنە هالەلر اكلەمشدر. نە یازیقدركە، باغریمزدن فیشقیرمش، بزە شرف قزاندیرمش، قرارمش كوڭللریمزی آیدینلاتمش، ضلالت یولنە صاپمش انسانلری حق یولنە كتیرمش

اولان بو محتشم و مبارك داهی انسان، بزدن حرمت یرینە، سادەجە تضییق و ظلم كورمشدر. فقط او، بوندن نە ییلمش، نە دە یولنی دگیشدیرمش. بالعكس او داهی أیی بیلییوركە، مجادلەسز، فداكارلقسز، اضطرابسز هیچ بر دعوا تام كوكلشەمز.

نە دە اولسە، نە قدر ظالملر بو كونشڭ ایشیغنی سوندیرمگە چالیشسەلر، اونڭ نوری قراڭلق كوڭللردە برر مشعلە كبی یانییور و آیدینلاتییور. بو، بیوك داهینڭ حقّی و دعواسنڭ میوەسیدر. نە موتلی كندیسنە!

جواد رفعت عاتلخان

(٦٢٢)

[بِاسْمِهٖ سُبْحَانَهُ]

عزیز ملّت وكیللری، محترم آغابگلریمز قاسم كفروی و صلاح الدین بگلر،

سزڭ بو ملّتڭ معنوی تاریخندە و حیاتندە اڭ عزیز استادلری و مدار افتخارلری بولونان مبارك اجدادلریڭزڭ نامنە و اونلرڭ یوكسك شرفلری حسابنە بر اهمّیتلی وظیفەڭزی سزلرە عرض ایدییورز.

استادیمز بدیع الزّمان حضرتلرینڭ سزلرە پك چوق سلاملری وار. قرق سنەدنبری حیاتنی اوڭا صرف ایتدیگی و اوچ دفعە حپسلرە و دائما تجرید مطلقدە اشكنجەلرە معروض قالدیغی و اون بش دفعە زهرلندیگی و حیاتنڭ غایەسی و محصولی و میوەسی بولونان ١٣٣ پارچە رسالۀ نور اثرلرینڭ بوكونلردە

برائتنە ویا مصادرەسنە تمییز محكمەسنجە قرار ویریلەجكدر. آفیون محكمەسنڭ اوچ سنە اوّلكی، نورلری مصادرە و مؤلّفنی و طلبەلرینی محكوم ایدن قرارینی، ایكی سنە اوّل تمییز نقض ایتمش و وقتیلە برائت ایتمش و اعادە ایدیلمش اثرلرڭ نشری صوچ اولاماز.

بناءً علیه، محكومیت قراری قانونسزدر، دییە رسالۀ نورڭ مصادرەسنی و طلبەلرینڭ محكومیتنی ردّ ایتدیگی حالدە، آفیون محكمەسی بر تورلی برائتنە قرار ویرمەیەرك، محاكمەیی اوزاتمق یولنە كیتدی. و نهایت عفو قانونی ایلە بتون دوسیە اورتەدن قالدیریلدی. دموقرات ادارەنڭ باشنە كچدیگی زماندە هم محكمەیە، هم عدالت باقانلغنە اثرلرڭ اعادەسنی طلب ایتدیگمزدە، عدالت باقانی خلیل اوز یوروك خصوصی اولارق اعادەسنی محكمەیە یازمش. محكمە بالعكس مصادرە قراری ایلە هم بزە، هم خلیل اوز یوروكە جواب ویردی. و بز مصادرە قرارینی تكرار تمییز ایتدك.

ایشتە، شیمدی تمییزدە تدقیق ایدیلمكدە بولونان بو مسئلەدە هم اسلامیتڭز، هم ملّتڭز، هم مبارك اجدادلریڭز، هم سزلرڭ معنوی پك یوكسك شرف و حیثیتلریڭزڭ اقتضاسی اولارق، بو اهمّیتلی وظیفەلریڭزی تقدیر ایدرسڭز. بز سزلرە یالڭز خبر ویرییورز.

سزلرڭ چوق قیمتدار، مبارك اجدادلریڭزڭ یوكسك شرف و حیثیتلە طولی قهرمانلقلرینی انكار ایلە، او عزیز ذاتلرڭ عزیز اولادلری اولان سزلرە و

بیڭلرجە سزلرڭ اقربالریڭزە و دینداشلریڭزە، دینسز ظالملرڭ اشكنجەلرینی خاطرلاتمەیە لزوم یوق. ایشتە جناب حق، او ظالملرڭ او ظلملرینە مقابل، یینە سزڭ اجدادلریڭزڭ ایچندن، اونلرڭ نامنە بر الماس قیلیچ احسان ایدرك او ظالملردن ظلملرینڭ انتقامنی اویلە آلدی. و آلدیرتدیكە:

اڭ مستحكم قلعەلرینی و معظّم جسملرینی پارچە پارچە ایتدی. كە، او الماس قیلیچ، قرآن حكیمڭ معنوی اعجاز و حقیقتلرینڭ بو زماندە بر معجزۀ معنویەسی بولونان و عنایت و حمایت الٰهیە ایلە یوز بیڭلر نسخەلری یوز بیڭلر شاكردلرینڭ قلملریلە وطنڭ هر كوشەسنە نشر ایدیلن و بو مدهش عصرڭ مدهش معنوی یارەلرینە اڭ حقیقی علاج و اوڭنە كچیلمز بر جسامت ایلە و هر طرفە هجوم ایدن دینسزلك و ماصونلغە قارشو اڭ كسكین سلاح و بو عصرڭ طبیعیّون و فلسفیّون ظلماتنە قارشو اڭ پارلاق ضیا اولارق پاریلدایان رسالۀ نوردر.

ان شٓاء اللّٰه یاقین زماندە بو وطن و ملّتڭ ألندە دینی، اجتماعی، رسمی و سیاسی بتون حیاتندە اڭ قوّتلی خلاصكار و بتون ملّتلرە قارشو مفاخر عالیسی اولارق یاد ایدیلەجك بر اثرڭ مصادرەسی، بالخاصّە شیمدی دموقرات ادارە زمانندە هم وطن و ملّتڭ علیهندە، هم دموقرات ادارەنڭ سیاستنڭ علیهندە اولاجق و ملّتڭ و اسلامیتڭ علیهندەكی كیزلی زندیق دوشمانلرینڭ اكمكلرینە یاغ سورولمش اولاجقدر. بعض محترم ملّت وكیللرینە عرض ایتدیگمز بو حقیقتی، خصوصًا سزلر كبی فطرتلری او حقیقتڭ خموری ایلە یوغورولمش

اسلامیت قهرمانلرینە دە عرض ایدییورزكە، شیمدی الڭزە كنیش صلاحیت بخش ایدن رسمی وظیفەڭزلە نور رسالەلرینڭ مصادرەدن قورتولمسی خصوصندەكی خدمتڭزی رجا ایدییورز.

سوكیلی استادیمز دخی سزلری خبردار ایتمەمزی بزە امر ایتدیلر. بز دە سزە عرض ایدییورز. هم حرمت و سلام ایدرك موفّقیتڭزە دعا ایدییورز.

نور طلبەلری نامنە مصطفی صونغور

برنجی جزا، ٩٥١/١٨٧

١٢-١١-٩٥١

دوسیەلریمزڭ نومرەسی باش صاوجیلق، ٨/٤٦٦

[٦٢٣]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] مولد شریفڭزی روح و جانمزلە تبریك ایدییورز و موفّقیتڭزی و نورلرڭ فوق العادە تأثیرلی انتشارینی سزلرە مژدە ایدییورز و نورجیلری تبریك ایدییورز.

[ثانیًا] بو مبارك كیجەدە پك شدّتلی بر اخطار قلبمە كلدیكە، استانبولدەكی اونیورسیتەجیلر اسكی سعید ایلە یڭی سعیدڭ تاریخچەء حیاتندەكی خارقەلری یازمەلری مناسبتیلە ایكی فكر میدانە كلمش:

[بریسی] دوستلردە، بنم حدّمدن پك زیادە، فوق العادە بر نوع ولایت كبی بر حسن ظن حاصل اولمش. و معارضلردە دە و اهل فلسفەدە دە، پك خارقە بر دها ظنّی و حتّی بعضیلرندە دە قوّتلی بر سحر توهّمیلە حدّمدن بیڭ درجە زیادە بر توهّم حاصل اولمش. و بو معنایە دائر چوق یرلردە "بونڭ حقیقتی نەدر؟" دییە مادّی و معنوی ایضاحی بندن ایستنیلمشدی. بن دە بو كیجەدەكی شدّتلی اخطار ایچون چوق مقدّماتلی بر حقیقتی بیان ایتمەیە مجبور اولدم.

[برنجی مقدِّمە] ناصلكە بر چام آغاجنڭ بوغدای دانەسی قدر بر چكردگی، قوجە چام آغاجنە بر مبدأ اولویور. قدرت الٰهیّە او عجیب آغاجی او چكردكدن خلق ایدییور. میلیوندن آنجق بر حصّە او چكردكدە بولونوركن، او چكردك قدر قلمیلە یازیلان معنوی بر فهرستە اولمش. یوقسە بر كوی قدر فابریقەلر لازمدركە، او عجیب آغاچ، دال و بوداقلریلە تشكیل ایدیلسین. ایشتە عظمت و قدرت الٰهیەنڭ بر دلیلی دە بودركە، بر ذرّەدن طاغ كبی شیلری خلق ایدر.

ایشتە عینًا بونڭ كبی، هیچ بر محویّت و تواضع نیّتیلە اولمایارق، بتون قناعتملە اعلان ایدییورمكە، بنم خدمتم و سركذشت حیاتم، بر نوع چكردك حكمنە كچمش. عنایت الٰهیە ایلە بو زماندە اهمّیتلی بر خدمت ایمانیەیە مبدأ اولمق ایچون، قرآندن كلن و میوەدار بر شجرۀ عالیە اولان نور رسالەلرینی احسان ایتمش.

بن بونی قسملە تأمین ایدییورمكە، بتون حیاتمدە كچن او خارقەلردن طولایی بن كندمدە قطعیًّا بر قابلیت و بر مزیت و او فوق العادەلگە بر لیاقت كورمییوردم. حیرت، حیرت ایچندە قالییوردم. دگل فوق العادە بر دها ویاخود فوق العادە بر ولایت، بلكە كندی كندیمی ادارە ایدەجك و حیات اجتماعیە ایلە مناسبتدار اولاجق بر قابلیت كورمییوردم. كرچە ظاهرًا خودفروشلق كبی بعض حالات حیاتمدە كورونمشدی. او دە اختیارم خارجندە خلقلرڭ حسن ظنّنی تكذیب ایتمەمك ایچون بر نوع خودفروشلق كبی اولویوردی. فقط خلقلرڭ حسن ظنّی كبی حقیقتدە اولمادیغمڭ حكمتنی بیلمدیگمدن و دنیایە یارامدیغمی، بویلە بیڭ درجە حدّمدن فضلە بر توجّهە مظهر اولدیغمی بتون بتون خلاف حقیقت تلقّی ایدییوردم. فقط جناب حقّە یوز بیڭ شكر اولسونكە، یتمش-سكسان سنەلك حیاتمڭ صوڭلرندە اونڭ حكمتنی احسان الٰهی ایلە بر درجە بیلدك و قیصەجە بر قسمنە اشارت ایدەجگم. و چوق نمونەلرندن بر قسم نمونەلرینی بیان ایدییورم:

[برنجی نمونە] مدرسە اصولنجە، هیچ اولمازسە اون بش سنە تحصیل علم لازم كلییوركە، حقائق دینیە و علوم اسلامیە تام الدە ایدیلسین. او زماندە سعیددە، دگل خارقە بر ذكا ویا بر معنوی قوّت، بلكە بتون استعداد و قابلیتنڭ خارجندە بر عجیب طرز ایلە بر ایكی سنە صرف و نحو مبادیسنی كوردكدن صوڭرە، اوچ آیدە عجیب بر طرزدە قرق اللی كتابی كویا اوقومش و اجازت آلمش كبی بر حالت كوروندی.

بو حال آلتمش سنە صوڭرە طوغریدن طوغری یە كوستردیكە، او وضعیت، علوم ایمانیەیی اوچ درت آیدە، قیصە بر زماندە اللرە ویرەبیلەجك بر تفسیر قرآنی چیقاجق و او بیچارە سعید دە اونڭ خدمتندە بولوناجق اشارتیلە.. هم بر زمان كلەجككە، دگل اون بش سنە، بلكە بر سنەدە علوم ایمانیەیی درس آلاجق مدرسەلر الە كچمیەجك و آزالاجق بر زمانە بر نوع اشارت غیبیە كبی معنالر خاطرە كلییور.

[ایكنجی نمونە] او اسكی زماندە، سعیدڭ او چوجقلق زمانندە بیوك عالملرلە مناظرەسنی و او عالملرڭ سؤٓاللرینە جواب ویرمەسنی، حتّی كندیسی هیچ سؤٓال ایتمدن عالملرڭ اڭ مشكل سؤٓاللرینە طوغری جواب ویرمەسنی، بن قطعیًّا اعتراف ایدییورم و اعتقاد ایدییورمكە، او حال، نە بنم خارقە ذكاوتمدن و نە دە بر عجیب استعدادمدن نشئت ایتمش دگلدر. بن دە بیچارە، مبتدی، سرسم، كورولتوجی بر چوجق ایكن، هیچ بویلە، دگل بیوك عالملرە جواب ویرمك، بلكە كوچك خواجەلرە، حتّی كوچك طلبەلرە دە مغلوب اولور بر حالدە ایكن طوغری جواب ویرمكلگم، قطعیًّا استعدادمدن و ذكاوتمدن كلمەمش اولدیغنە قناعت قطعیەم وار. یتمش سنەدر دە حیرت ایدییوردم. شیمدی احسان الٰهی ایلە بر حكمتنی آڭلادمكە، چكردك كبی، مدرسە علملرینە بر آغاچ احسان ایدیلەجك و او آغاجڭ خدمتندە بولونانە قارشو پك چوق رقیبلری و معارضلری بولوناجق.

ایشتە بو زماندە اسلاملر ایچندە مختلف مشربلر و مسلكلر صاحبلری، بربریسنی تنقید ایتمك و اثرینە مقابل اثرلر نشر ایتمك.. معتزلە و اهل سنّت كبی بربرینی قیرمق عادتیلە بو زماندە او نور آغاجنڭ خدمتكارینڭ باشنە اوراجق و رقابت ویا مشرب مخالفتیلە اڭ تأثیرلیسی و اڭ مدهشی مدرسە خواجەلری اولمق لازم كلیركن، جناب حقّە یوز بیڭ شكر اولسونكە، اسكیدنبری دوام ایتمكدە اولان او عادتە مخالف اولارق، رسالۀ نور اڭ زیادە علمانڭ طمارلرینە طوقوندیردیغی حالدە، خواجەلرڭ نورلرە قارشو تنقیدكارانە اثرلر یازامدقلرینڭ سببی، او زماندە او چوجق سعیدڭ علمانڭ سؤٓاللرینە قارشو طوغری جواب ویرمسی علمانڭ جسارتنی قیرمشكە، هیچ بر یردە قیصقانچ خواجەلردن، هم مشربجە سعیدە چوق مخالف اولدقلری حالدە نور رسالەلرینە قارشو مقابل چیقمامەلری.. بو حالڭ بر حكمتی اولدیغنە قناعتم كلمش. یوقسە بویلە عجیب بر زماندە اهل مدرسەنڭ اعتراضی باشلاسە ایدی، دینسزلك طرفدارلری اولان كیزلی دوشمانلریمز هم نورلری، هم علمایی چوروتمك ایچون اهمّیتلی بر وسیلە یاپاجقلردی. جناب حقّە حدسز شكر اولسونكە، اڭ زیادە نورلرڭ طوقوندیغی رسمی علما، علیهندە بولونامدیلر.

[اوچنجی نمونە] اسكی سعیدڭ چوجقلق زمانندنبری هم كندیسی، هم باباسی فقیر اولدقلری حالدە، باشقەلرینڭ صدقە و هدیەلرینی آلمدیغنڭ و آلامادیغنڭ و شدّتلی محتاج اولدیغی حالدە، هدیەلری مقابلسز قبول ایتمدیگنڭ و

كردستان عادتی طلبەلرڭ تعییناتی اهالینڭ أولرندن ویریلدیگی و زكاتلە مصرفلری یاپیلدیغی حالدە، سعید هیچ بر وقت تعیین آلمەیە كیتمدیگنڭ و زكاتی دخی بیلەرك آلمدیغنڭ بر حكمتی، شیمدی قطعی قناعتملە شودركە: آخر عمرمدە رسالۀ نور كبی صرف ایمانی و اخروی بر خدمت قدسیەیی دنیایە آلت ایتمەمك و منافع شخصیەیە وسیلە یاپمامق ایچون، او مقبول عادتە و او ضررسز سجیّەیە قارشو بڭا بر نفرت و بر قاچینمق و شدّت فقر و ضرورتی قبول ایدوب، ألنی انسانلرە آچمامق حالتی ویریلمشدركە، رسالۀ نورڭ حقیقی بر قوّتی اولان حقیقی اخلاص قیریلماسین. و بوندە بر اشارت معنویە حسّ ایدییوردمكە، كلەجك زماندە معیشت دردیلە اهل علمڭ مغلوبیّتی، بو احتیاجدن كلەجكدر.

[دردنجی نمونە] یڭی سعید، اختیارلغندە بتون بتون سیاستدن و دنیادن كندینی چكمگە چالیشدیغی حالدە، اهل دنیانڭ بتون بتون قانونە و انصافە و وجدانە، حتّی انسانلغە مخالف بر طرزدە اشدّ ظلم ایلە یگرمی سكز سنە اشكنجەلرلە ازدكلرینە و بر سینگڭ ایصیرمەسنە تحمّل ایتمەین او بیچارە سعیدڭ بالطەلرلە باشنە اوردقلرینە و اهانتڭ اڭ شنیعلرینی یاپدقلرینە قارشو، امثالسز بر صبر و تحمّل اوڭا احسان اولونمسی و غایت عصبی و سیڭیرلی اولدیغی كبی، فطرتًا قورقاق اولمدیغی حالدە، "اجل بردر، تغیّر ایتمز" حقیقتنە ایمانندن كلن بیوك بر جسارتلە برابر، اڭ قورقاق، اڭ مسكین بر وضعیتدە سكوت ایدوب

صبر ایتمسی، حتّی بر مقدار صوڭرە او اشكنجەلر صوڭندە روحنە بر فرح ویریلمەسنڭ بر حكمتی، قناعت قطعیەملە بودركە: قرآن حكیمڭ حقائق ایمانیەسنی تفسیر ایدن رسالۀ نوری هیچ بر شیئە و شخصی منفعتلرینە و معنوی كمالاتلرینە آلت یاپمامق و حقیقی اخلاصی قیرمامق ایچون، اهل سیاست سعید حقّندە "دینی سیاستە آلت یاپمق" وهمنی ویروب، تا سعید اشكنجەلرلە، حپسلرلە دینی سیاستە آلت ایتمەسین دییە اهل سیاستڭ ظالمانە حكملری آلتندە قدر الٰهی نوردەكی حقیقی اخلاصی قیرمامق ایچون، سعیدە شفقتلی طوقاتلر اوروب "صاقین صاقین، حقائق ایمانیەنڭ تفسیری اولان رسالۀ نوری كندی شخصی منفعتلریڭە، حتّی معنوی كمالاتلریڭە و بلالردن و مضر شیلردن قورتولمقلغڭە آلت یاپما. تاكە نورڭ اڭ بیوك قوّتی اولان اخلاص حقیقی زدەلنمەسین!" دییە، قدر الٰهینڭ شفقتلی طوقاتلری اولدیغنە قطعی قناعت ایدییورم. حتّی هر نە وقت، صرف آخرتمە شخصی عبادتلە زیادە مشغولیتم سببیلە نورڭ خدمتنی بیراقدیغم عین زمانندە، اهل دنیا بڭا مسلّط اولوب بڭا عذاب ویردیگنە قطعی قناعت كتیرمشم.

بو دردنجی نمونەنڭ ایضاحنی اڭ صوڭ یازیلان مكتوبلردن، اهل سیاست، سعیدی "دینی سیاستە آلت یاپار" دییە حپسلرە آتمسی و صوڭرە سعیدڭ اونڭ حكمتنی، یعنی قدرڭ شفقت طوقاتلری اولدیغنی آڭلامەسیلە اونلری حلال ایتمسی و كندی تحمّلنڭ حكمتنی آڭلامەسنە دائر اولان او مكتوبە حوالە ایدییورز.

[بشنجی نمونە] بو بیچارە سعیدڭ غایت محتاج اولمسی و یتمش سنەدنبری او صنعتلە مشغول اولمسی و بعض كون ایكی یوز صحیفە قدر تصحیحە مجبور اولمەسیلە برابر، اون یاشندەكی ذكی بر چوجغڭ اون كوندە موفّق اولدیغی یازی قدر بر یازی یە مالك اولمادیغنە حیرت ایدییوردی. حالبوكە سعید بتون بتون استعدادسز دگلدر.

هم دە نسبی قرداشلرینڭ هپسنڭ دە كوزل یازیلری اولدیغی حالدە، بو قدر یازی یە محتاج ایكن، بویلە یاریم امّی وضعیتنڭ حكمتی، قناعت قطعیەملە شودركە:

بر زمان كلەجككە، جزئی و شخصی اقتدارلر و قوّتلر مقابلە ایدەمەیەجك دهشتلی و معنوی دوشمانلرڭ هجومی زمانندە، كوزل یازی صاحبلرینی روح و جانیلە آرامق و خدمتنە شریك ایتمك و او چكردگڭ اطرافندە صو، هوا، نور كبی او معنوی آغاجە خدمت ایتمك ایچون او شخصی و جزئی خدمتی، كلّی و عمومی و قوّتلی و بر قلمە مقابل بیڭلر قلمی بولمق حكمتیلە و بوز پارچەسی كبی بنلگنی او مبارك حوض ایچندە اریتمسیلە حقیقی اخلاصی الدە ایتمك و بو صورتلە ایمانە خدمت ایتمك حكمتیلە اولمش.

اَلْبَاقٖی هُوَ الْبَاقٖی

قرداشڭز سعید النّورسی

[٦٢٤]

دیندار و حمیتكار و وطنپرور ملّت وكیللرینە شونی عرض ایدییورمكە:

مكّۀ مكرّمەدە حجر الاسودڭ یانندە حرمت ایچون قونولدیغنی حاجیلرڭ كوردكلری ذوالفقار معجزات قرآنیە مجموعەسیلە، مدینۀ منوّرەدە پیغمبر علیە الصّلاة والسّلامڭ قبری اوزرندە حاجیلرڭ قونولدیغنی كوردكلری عصای موسی مجموعەسی كبی رسالۀ نورڭ بر قسم اجزالرینی، عالم اسلامڭ بزملە حقیقی اخوّتنی تأمینە وسیلە اولدقلری حالدە، مصادرە ایتمك صورتیلە، درت سنەدنبری اوراق مضرّە كبی دوسیەلر ایچندە محكمە مخزنلرندە چوروتولمك صورتیلە امحاسنە چالیشیلدیغی و درت محكمە برائتنە و سربستیتنە قرار ویردكلری و بز دە چوق دفعە مقاماتە استدعا ایلە مراجعت ایدوب سربستیتنی ایستەدیگمز و هم باش باقانڭ دین پروپاغاندەسی یوزندن شیمدی یە قدر بو وطنە هیچ بر ضرر كلمدیگنی سویلەدیگی حالدە، بو، دیندارلرڭ سربستیتی حقّندەكی قانونڭ تصدیقنڭ تعجیلی و تقدیمی لازم كلیركن تأخیر ایدیلمسی، دیندار مبعوثلرڭ نظر ملّتدە كندیلرینە دوشن اڭ اهمّیتلی دینی وظیفەلرینی یاپمایورلر دییە دیندارلرڭ بر تلاشلری وار.

بز دە تلاش ایدییورزكە، داخلی، كیزلی دینسزلر و قومونیزم حسابنە چالیشان خائنلر، بو وضعیتدن استفادە ایتمەمەلری ایچون، بو كلەجك حقیقتی سزلرە بیان ایتمەیە حمیّتًا مجبور اولدم. او حقیقت دە بودركە: