(٥٦٥)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق سوكیلی، چوق مبارك و چوق قهرمان (خسرو) آغابگمە،

سوكیلی استادیمز بویورویورلركە:

[اوّلًا] خسروڭ اخوان مسلمینە یازدیغی غایت پارلاق مكتوبنڭ بر صورتی آنقرە نورجیلری واسطەسیلە آلینمشدر. قیمتلی مكتوبڭزە ما شٓاء اللّٰه و بیڭ بارك اللّٰه دییور.

[ثانیًا] باقانلقلرە یازیلان قیمتلی استدعاڭزە عین كلمەلرلە مقابلە ایدوب كوندریلوب كوندریلمەمسی حقّندە مدرسة الزّهرانڭ اركانلرینە حوالە ایدییورم.

بو وسیلە ایلە باشدە سز سوكیلی آغابگم اولمق اوزرە بتون قرداشلریمە مخصوصًا سلام ایدوب مبارك اللرندن اوپرم. بونڭلە برابر درت عدد مكتوب لفًّا تقدیم ایدیلییور. قهرمان قرداشم.

اَلْبَاقٖی هُوَ الْبَاقٖی

عاجز و هم چوق قصورلی قرداشڭز محمد

[٥٦٦]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ عِلْمِ اللّٰهِ

عزیز، محترم و مبارك، مشفق استادم،

بو عریضەمی نورلرلە علاقەدار و حج رفیقلرمدن قرە قوچانلی حاجی صبری قرداشم ایلە تقدیم ایدییورم.

[اوّلًا] مبارك اللریڭزی كمال احتراملە تقبیل ایدر، بو عاجز و پرتقصیر قرداشڭز و طلبەڭزی مستجاب و مبارك دعاڭزدە داخل بویورمەڭزی استرحام أیلرم.

[ثانیًا] حاجی صبری قرداشمزی و دیگر یڭی علاقەدارلری دە دعالریڭزە داخل بویورمەڭزی رجا ایدرم.

[ثالثًا] قرداشمز خسرو كرك ذات عالیلرینڭ و كركسە دیگر قرداشلرڭ مكتوبلرینی امرلریڭزە عطفًا كوندرمكدە دوام ایتدیگی ایچون، للّٰە الحمد وضعیتدن خبردار بولونویورز.

[رابعًا] كرك خسرو قرداشمڭ و كرك جیلانڭ كوندردكلری اثرلری قرداشلرە ویردم و پارەسنی كندیلرینە كوندردم. اورفەدن براز داها ایستەدم. كلنجە ان شٓاء اللّٰه اونلری دە طالبلرە ویرەجگم. اثرلردن بر طاقیمنی حاجی صبری آلمشدر.

[خامسًا] رئیس جمهورڭ نطقندن كلن مژدەلی استخراجڭ تحقّق ایتمەسنی الطاف الٰهیەدن نیاز ایدرز.

[سادسًا] نورلرڭ نشری و فتوحاتی ایچون رحیم و كریم ربّمز موفّق بویوردیغی نسبتدە استخداممز للّٰە الحمد دوام ایدییور. آقشاملری نورلی جماعتدن مركّب فقیرخانەمزە كلن جماعتە تدریسات نوریەدە دوام اولونویور.

ملاطیە سیاحتمدە اورادەكی علاقەدارلرڭ چالیشمە طرزلرینی سویلەدم. بیوك طوغوجیلرڭ بو فقیری كندی زمرەلرینە قاتمق خصوصندەكی تكلیفلرینە: بیوك طوغوجیلق سیاسی بر تشكّلمیدر؟ دییە صوردم. اوت، دیدكلری ایچون، "سزڭ یالڭز ایمانی و قرآنی مسائلدەكی مشكللریڭزی و ایضاحنی آرزو ایتدیگڭز نقطەلری رسالۀ نورڭ یاردیمی ایلە حلّە چالیشیرم. بنم مسلگم، اختیار و شعورم تعلّق ایتمدن رسالۀ نور دائرەسندە استخدامدن عبارتدر. ایمان و قرآن مسئلەلریڭزدە همفكریڭزم. فقط سیاستلە اشتغال ایدەمم" مأٓلندە جواب ویردم. یالڭز بو زمرەدن نورلرلە علاقەدار اولانلر وار. اونلرڭ ال الە ویرەرك هم اثرلری اوقومەلرینی و آڭلایامدقلری یرلری صورمەلرینی، قرآنی خطّی اوگرنمەیە دە غیرت ایتمەلرینی رجا ایتدم. ملاطیە، اورفە و عینتابدەكیلری اثرلری ایدینمەیە و علاقەلرینی آرتدیرمەیە عاجزانە یازیلرملە تشویق ایتمكدەیم. شیمدیلك مساعئ نوریەم بویلەدر.

جناب حقّە نهایتسز حمد و شكرلر اولسونكە، حسابسز قصورلرملە برابر بو قرآنی و ایمانی خدمتدە استخدامە لایق كورمشدر. البتە مبارك و مشفق استادیمڭ دعالری

بركاتیلە زمرۀ نوریەنڭ عاجز بر فردی اولمقدە دوام و اویلەجە لوای احمدی علیە الصّلاة والسّلام تحتندە طوپلانانلردن اولورم.

تكرار تكرار مبارك اللریڭزی كمال تعظیملە تقبیل أیلر، علاقەدار قرداشلرڭ دە سلام و دعا و احتراملرینی عرض ایدر، محیطڭزدەكی مادّةً و معنًا یاقین بتون قرداشلرە دە عرض احترام أیلرم. ارحم الرّاحمین اولان ربّمز عزیز، محترم و مشفق استادمدن ابدیًا راضی اولسون و بتون مقاصدینی حاصل أیلەسین. آمین.

اَلْبَاقٖی اَلْحُبُّ فِی اللّٰهِ

محبّ مخلصڭز خلوصی

[٥٦٧]

قرداشلرم،

بو معلّم عثمان، جیلانڭ حپس آرقداشیدر. اوندن تام درس آلمش. ایكنجی بر جیلان اولمق قابلیتی وار. مدار حیرتدر، دعامدە نورجیلر دائرەسندە هر كون اسملریلە یاد ایتدیگم ایكی صوفی مشرب، كندیلرینی صاتمق فكریلە بڭا و نورە ایلیشدكلرینە دائر مكتوب كلدی. بن كوجنمدم، اونلری داها زیادە دعامە آلدم. عینًا اسكیدە استانبولدە اسكی پارتینڭ دسیسەلریلە بزە ایلیشن معلوم اختیار شیخ كبی، اونلری هم كندیمە مبارك قرداش، هم دوست بیلدم، حقّمی حلال ایتدم. فقط ایكی اخلاص لمعەلرینی اوقومەلرینی آرزو ایدییورم. قرداشلرم، سز دخی بویلەلردن كوجنمەییڭز، مناقشە ایتمەییڭز.

سعید النّورسی

[٥٦٨]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

(محكمۀ كبرایە شكوا و مدافعاتڭ بر حاشیەسیدر.)

عزیز، صدّیق قرداشلرم،

بو مأٓلدە عدالتپرور دموقراتلرە استدعا یازابیلیرسڭز. خستەیم، سز ناصل مناسب ایسە اویلە یاپیڭز. آووقاتمزدن بر كون اوّل آلدیغمز مكتوبدە "كتابلریمزڭ صوچ موضوعی اولان و اولمایانلرینی تفریق ایتمەیە چالیشییورلر" دییە خبر ویرییور. شیمدی یە قدر یاپدقلری كبی، یینە هیچ بر قانونە اویمایان بر طرزدە، بیڭلر كلمە ایچندە بر رسالەدە بر تك كلمەیی بهانە ایدوب صوچ موضوعی یاپمق، او رسالەیی ویرمەمك صورتیلە نورلرڭ انتشارینە غرضكارانە مانع اولمق فكریلە، هم قرارنامەلرینی محكمەء تمییزجە بتون بتون بوزان او قرارنامەدە صوچ موضوعی كوستردكلری، بزم علیهمزدە اولمدیغی حالدە و مدّعئ عمومینڭ ادّعانامەسنە قارشو خطا-صواب جدولندە سكسان بر خطاسنی و غرضكارلغنی قطعی اثبات ایتدیگمز حالدە، شیمدی عین غرضكارلقلە درت یوز صحیفە ذوالفقار رسالەسنی برقاچ سطر تستّر و ارثیّت حقّندەكی یوز بیڭ تفسیرڭ عین معنایی سویلەدكلری، اوتوز قرق سنە اوّل یازیلان جملەلرینی صوچ موضوعی یاپوب او مجموعەء عظیمەیی مصادرە ایدوب بزە ویرمەمك، دنیادە هانكی قانون بوڭا مساعدە ایدر؟

هم آفیون محكمەسندەكی اثرلر -تكرارات قرآنیە و ملكلر حقّندەكی ایكی پارچەجق مستثنا اولارق- بتون اثرلر ایكی سنە اللرندە قالارق هم دڭزلی، هم آنقرە آغیر جزا محكمەسی برائتنە قرار ویرەرك، ایچندە صوچ موضوعی بولامدقلری و بزە اعادە ایتمەیە قرار ویردكلری و عین اثرلر اسپارطە حكومتنڭ بر وقت مصادرە ایلە تمامًا النە كچدیگی حالدە، تمامیلە صاحبلرینە اعادە ایتدكلری و صوڭرە دە ذوالفقارلە عصای موسی یی رخصتسز، اسكی یازی ایلە نشر بهانەسیلە درت سنەدنبری مصادرە ایدوب، عینًا هیچ بری ضایع اولمادن یوز یتمش مجموعەیی بر صوچ بولامدقلری ایچون بزلرە تمامًا اعادە ایتدكلری و بزم اڭ مهم صوچمز كوستردكلری اسكی پارتینڭ بر قسم شفلرینە حقیقت نامنە اعتراضمزڭ یوز مثلی زیادە شیمدیكی دینی مجموعەلر، رسمی جریدەلر عین اعتراضی شدّتلە اوردقلری حالدە، رسالۀ نورڭ بر محرم پارچەسی شیمدیكی زمان تمامیلە تعیین ایتدیگی بر حدیثڭ بر حقیقتنی تفسیر بحثندە، شفلرڭ باشی لوزان معاهدەسندە، هیچ بر زمان هیچ بر مسلمان حقیقی توركی، هیچ بر نصرانیتە و یهودیلگە و باشقە دینە كیرمەین و اسلام قهرمانلری اولان توركلری پروتستان یاپمغە معلوم خاخام باشی ایلە اتّفاق ایدرك رأی ویرن او آدم، بتون علمای اسلامڭ جوازی یوق دییە اتّفاقًا حكم ایتدكلری حالدە، اون جهتلە قانونلرلە اونی بتون بو وطندەكی معصوم مسلمانلرە جبرًا كییدیردیگی و تاریخ بشردە بو چشیت معناسز، عجیب بر جبر عمومی یاپمق و هیچ بر قانونە اویمایان كیفی قانون نامنە، قانون ایلە اونی

بو ملّت اسلامیەیە جبرًا كییدیرمك.. البتە او آدم، او لوزان معاهدەسندە ویردیگی دهشتلی فكرینی اثبات ایتمشكە، دین اسلامە غایت مضر اولارق حدیثڭ خبر ویردیگی آدم بو زماندە او شفدر.

ایشتە حقیقت بویلە ایكن، آفیون محكمەسی عدالت نامنە دگل، بلكە او ئولمش آدمڭ محبّتی، تعصّبی نامنە، اسكی حرفلە دە نشر ایدیلن قرارنامەنڭ آخرندە بزی محكوم ایتمك ایچون اڭ مهم سبب، صاوجینڭ غرضكارلغی سببیلە، محكمە هیئتی دیمشلركە: "سعید و آرقداشلری، مصطفی كمالە دین ییقیجی، سفیان دیمشلر و قلبلردەكی سوكیسنی بوزمەیە چالیشمشلر، اونڭ ایچون محكوم ایدییورز." عجبا، ئولمش كیتمش بر آدمڭ شخصنە قارشو بیڭ دفعە بویلە اعتراض دە اولسە، شخصی بر دعوا اولویور، محكمەء عدالت بوڭا دائر بویلە بر حكمی ویرمك، البتە پك عجیب بر معنا، ایش ایچندە وار. شیمدی بویلە آدملرڭ الندەكی نور اثرلری درت دفعە برائت قزاندقلری و شیمدی عدلیە باقانی اوچ دفعە نور اثرلرینڭ برائتنە و او اثرلردە صوچ موضوعی اولمادیغنە، بزی محكوم ایدن آفیون قرارینی بوزمسیلە صوچ موضوعی اولمادیغنە حكم ویردیگی حالدە، شیمدی بتون ملّت، عدالت و شفقت و دیانتە خدمت بكلەدكلری دموقرات حكومتی زمانندە، اسكی مستبدلرڭ دهشتلی پلانلریلە رسالۀ نورە قارشو غرضكارلرینڭ كیفنە بیراقمق، دموقرات حكومتی علیهندە بیوك بر خیانتدر و ملّتڭ تسلّی امیدینی قیرمقدر.

بنم آنقرەدە بر وكیلم، مصطفی صونغور ١٧-١١-٩٥٠ تاریخلی چكدیگی تلغرافدە

"عموم رسالەنڭ بزە اعادەسنە قرار ویریلمش" دییە مژدە ویردی. و عادل عدلیە وكیلی اوچ دفعە برائت ویردیگی و شیمدی دە صونغورڭ مكتوبنە كورە، هم اعادەسنە امر ویریلدیگنی و شیمدی تلەفونلە یینە خبر ویرەجگم سویلەدكلری حالدە، بو اون آلتی سنەدنبری علیهمزدە اولان افترالر و ژورناللر.. هم اسكیشهر، هم دڭزلی محكمەسندن بتون دوسیەلری آفیون محكمەسی معناسز طوپلامق و عفو قانوننڭ چیقمەسیلە و محكمەلرڭ برائت ویرمسیلە او مبارك اثرلری او دوسیەلر ایچریسنە قاریشدیرارق چوروتمك ایچون مخزنە آتمق و اوچ سنەدنبری بزی آلداتان بعض اشخاصە نورلرڭ ایشلرینی بیراقمامق لازم كلییور. باش باقان و عدلیە باقاننە، بو غایت مهم مسئلەیی نظر دقّتلرینە عرض ایدییورز. [حاشیە]

سعید النّورسی

استادیمز شدّتلی خستەلق مناسبتیلە یازدیغی بو شیلری بز دە تصحیحە حق بولامدیغمزدن، سزڭ كبی قرداشلریمزە برای معلومات كوندرییورز.

محمد، خیری، ابراهیم

بنی آنقرەیە آلمەیە چالیشان عثمان نورینڭ بو مكتوبی برای معلومات كوندریلدی.

(٥٦٩)

[بِاسْمِهٖ سُبْحَانَهُ]

حضور نورە

مَجْمَعُ الْمَزَایَا وَالْمَحَاسِنِ وَالْحَقَٓائِقِ وَالدَّقَٓائِقِ صَاحِبُ النُّورِ بدیع الزّمانمز افندیمز حضرتلری،

اَلسَّلَامُ عَلَیْكُمُ وَرَحْمَةُ اللّٰهِ وَبَرَكَاتُهُ دَٓائِمًا اَبَدًا سَرْمَدًا

(هٰذَا مِنْ فَضْلِ رَبّٖی) آنجق لطف حق و امداد محمّدیمزؐ و هممات رشادیەلریلە اقامتڭزە هر آن حاضر، ناظر و آمادە بر حالە كلن مدرسۀ نوریەلرینی ابدیًا روح و جانڭزلە قبول بویورمەلری و بر ایكی آیە قدر مدرسەء نوریەلرینە تشریف بویوراجغڭزی تبشیرلری و وعد جلیل و جمیللری، عبد عاجزی و بتون نورجیلری دلشاد بویوردی. روحمزە روح نفخ ایلەدی. اللّٰهمزە هر آن لا یتناهی حمد و ثنا و پیغمبریمزە دە صاییسز صلات و سلام و ذات نوریەلرینە دە اللّٰهمزدن كافّۀ سودكلری حرمتنە تضرّع و نیازیمز، حقوق اللّٰه و حقوق عبادڭ حقلرینڭ احكام قرآنیەیە اَوْفَقْ صورتدە و مِحْوَرْ لایقندە عیارلانمسی ایچون افندیمزە عمر طویل،

صحّت و عافیت تامّە و كاملە و سلامت و سعادت سرمدیە شان الوهیتیلە متناسب لطف و انعام و احسان بویورمەسنی لیل و نهار تضرّع و نیاز ایتدك و ایدییورز. همن جناب حق مناجاتمزی احسن شرائط دائرەسندە مستجاب بویورسون. آمین یا معین.

اَخْ فِی اللّٰهم بو كرە لطف بویورولان نامەء نوریەلرندە بویورویوركە: (سنڭ بویلە عجیب زماندە بنم كبی بر بیچارە، خستە و غریب حقّندە بیوك اییلگڭزی و شفقتڭزی آخر عمریمە قدر اونوتمایاجغم. او یاپدیغڭ منزلی، ابدی بر مدرسۀ نوریە اولارق روح و جانملە قبول ایتدم.) بو بیانات قدسیەلرینە معروضات عبیدانەم، اشارات حكیمانەلری وجهلە جدًّا و حقیقتًا اَعْجَب العجائب و اَغْرب الغرائب زمان ایچندە یاشادق و یاشایورز.

زمانڭ عجائب و غرائبلگی نە قدر كسب اشتداد ایدرسە، حقلە باطلڭ مدافعە، محافظە، مناقشە، محاورە و مكالمە و مجادلەسی دە او درجە كسب صعوبت أیلر.

فقط حقّی مدافعە بویوران حزب اللّٰه ایچون ثواب و باطلی مدافعە ایدن حزب الشّیاطین ایچون عقاب كسب عظمت أیلر. تام بو آنلردە حزب الشّیاطینە قارشو دائما میدان ابتلادە، حزب اللّٰهدن، ذات نوریەلرینی كوردم. الحق بویوردیغڭز كبی، صورت ظاهرەدە بیچارە، غریب الدّیار، خستەسڭز. لكن حقیقتدە میدان ابتلا و امتحان و علم و عقل سلیمە خطابدە اِلٰی ما شٓاء اللّٰه، آسلانلرڭ آسلانی، انسان كامللرڭ اكملی و ارشدی بر شاە مردان اولدیغڭزی

دَوْرِ استبداد كبی دورلری، شاه پادشاه و رئیس جمهور و اركان و عونەلریلە برلكدە لطف حق و امداد محمّدیمزلە دەؐ ویردیگڭزە حق و خلق اِلٰی آخر الدّوران شاهد دائمیدر. خلاصەء معروضات عبیدانەم، مدرسۀ نوریەیی عجیب بر زماندە یاپدیرمەیە موفّقیت عبیدانەم آنجق عون حق و امداد محمّدیمزؐ و ذات نوریەلرینڭ بتون حال و شانڭزلە حلّ ایتمەیی نفس عبیدانەمە مشق و اورنك ایتمەیە یلتنمكدن عبارتدر. همن جناب حق تقلیدیمی تحقیقە قلب بویورسون دائمًا و ابدًا آمین، یا معین، یا نصیر.

حزب اللّٰهڭ سَرْ افرازی بدیع الزّمانمز،

مدرسۀ نوریەلرینی ابدیًا بتون روح و جانڭزلە قبول بویورمق تقدیر قدسیلرندە بولونمەلری حسبیلە اهل بیتملە و بتون نورجیلرلە برلكدە عید اكبر ایتدك و ایدییورز. لطف حقّدن مأمول قویدركە، حق دە، خلق دە، یوردڭ داخل و خارجندەكی بتون نورجیلر دە، بزم معنوی، روحی و لاهوتی بایراممزە عشق و شوق ایلە اشتراك بویورورلر. بر آن اوّل بتون وارلغڭ كلّیات و جزئیاتندە توحید حق تجلّی بویورور. انس و جن حقیقتًا صلح و سكونە قاووشور. بلای عمومیدن قریبًا اثر قالماز ان شٓاء اللّٰە تعالی.

صادق الوعد الامین افندم،

مساعدۀ جلیلە و جمیلەلریڭزە كوونەرك ذات نوریەلرینە بر آن اوّل مدرسەء نوریەلرینە شرف بخش ایتمك ایچون (اَلصُّلْحُ سَیِّدُ الْاَحْكَامِ) مقامندە بر تكلیفدە بولوناجغم.

مكتوب نوریەلرندە بویورویورسڭزكە: "ایكی مهم سببە بناءً، بر ایكی آی بورادە بولونمقلغم لازم كلییور." عبد عاجز بو بیانات قدسیەلرینە شویلەجە معروضاتدە بولونویورم. مادام فم مباركڭزدن ایلك اوّلا [بر آی] صادر اولمش. لطفًا بر آیی اساس قبول بویورمەلرینی خاصّةً رجا أیلرم. چونكە ذاتڭزی خصوصی اوطوموبیل ایلە ان شٓاء اللّٰه بالذّات آلوب كتیرەجگم. یوللریمزی ایكی آی صوڭرە قارلر قپاتمق احتمالی پك چوقدر. بر آی قبول بویورولورسە بو احتمال آزالیر.

مكتوب نوریەلرینڭ ظرفندەكی تاریخندن اعتبارًا حساب بویورولور ایسە، بو قاسم آینڭ اون بشندە یازیلوب پوستەیە ویریلدیگی كورولویور. شو تاریخە كورە أوڭمزدەكی آیڭ اون بشندە بر آی تمام اولویور. و جمعە كونی ختام بولویور. بو حسابە نظرًا ربیع الاوّلڭ بشنە و شیمدی آرالق دینیلن اسكیدن كانون اوّل تسمیە اولونان آیڭ اون بشی اولویور. بوكون بر آی نطق قدسیلری وجهیلە ختام بولویور. و كون دە جمعە اولویور. ان شٓاء اللّٰه عبد عاجز، جمعەنڭ فرداسی اولان جمعەایرتەسی كونی مساعدەء جلیلەلریلە امرطاغنە كلەیم. ذات نوریەلرینی آلارق روح و جانڭزلە قبول بویوردیغڭز مدرسەء نوریەلرینە كتیرمك شرفیلە ابدیًا مباهی اولایم. ان شٓاء اللّٰه بو شرفی عبد عاجزە بخش ایتمك لطفندە بولوندیغڭزە دائر قریبًا مكتوب نوریەلریلە تبشیراتلریڭزی چهار چشم ایلە بكلرم افندم حضرتلری. كمال تعظیمات و تكریماتلە سلاملار و خاطرلار، ایكی جهاندە

عزیز و نائل مراد اولمەلرینی حق تعالی و تقدّس حضرتلرندن تضرّع و نیاز أیلر، پك مبارك اللریڭزدن تقبیل ایلە دعای دائمی و ابدیلرینی تمنّی أیلر، اللّٰهە امانت أیلرم افندم حضرتلری.

اَلْبَاقٖی هُوَ الْبَاقٖی

منتهای ذروۀ هیچدە بریجك عبد غُبار عثمان نوری

بونی دە برای معلومات و لاحقەیە كیرمك ایچون كوندردك.

خسروڭ اخوان مسلمینە یازدیغی مكتوبیدر.

(٥٧٠)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

حلبدە اخوان مسلمینڭ مبارك جمعیتنە،

سزلری و قیمتدار جمعیتڭزی بتون روح و جانمزلە تبریك ایدییورز. اثرلریلە فحول علمانڭ و فحول مفسّرینڭ اڭ یوكسگی اولان بدیع الزّمان حضرتلرینە قیمتدار جمعیتڭزڭ مبارك بر اعضاسی طرفندن یازیلمش اولان بر تبریكی تقدیم ایتمشدك. بدیع الزّمان حضرتلرینڭ بزلرە یازدیغی جوابی مكتوبلرندە، او قیمتدار، بی نظیر استاد بدیع الزّمان حضرتلری سزلری بیڭلرلە تبریك ایتمش و آناطولیدە اتّحاد محمّدی جمعیتنڭ خلفلری اولان نورجیلرلە عربستاندە اخوان مسلمین

منسوبلرینی ایكی قرداش اولارق، حزب القرآنڭ و اتّحاد اسلام جمعیت قدسیەسی دائرەسی ایچندە چوق صفلردن ایكی موافق و ایكی مترافق صف تشكیل ایتدكلرینی مژدەلەمش و اخوان مسلمین جمعیتنڭ رسالۀ نورلە جدّی علاقەلریلە برابر بر قسمنی عربجەیە ترجمە ایدوب نشر ایتمك نیتلریڭزدن فوق الحد ممنون اولدقلرینی و مبارك جمعیتڭزڭ اورفەدەكی نور شاكردلریلە و نور اجزالریلە حمایتكارانە علاقەدار اولمەسنی یازمقلغمزی بزلرە امر ایتمش بولونویورلر.

ای عزیز و نجیب قوم عربڭ نورانی اعضالری! تاریخڭ اعماقنە كومولن ماضیدن استقبالە آتلایان اجدادلریمزە بو ملّتِ اسلامی پارچەلامق ایچون بیڭ درت یوز سنەدنبری هجوم ایدن كفّار اوردولری، اڭ نهایت برنجی حرب عمومیدە امللرینە موفّق اولدیلر. تورك و عرب ایكی حقیقی مسلمان قرداشڭ بیڭ سنەلك صارصیلمایان محبّتلرینی، پك چوق دسیسەلرلە، یالانلرلە سوندیردیلر. اهل اسلامڭ، نوع بشرڭ مدار فخری و بتون موجوداتڭ سبب خلقتی و بتون فیوضات الٰهیەنڭ مظهری او عالی پیغمبرڭؐ روضەء مطهّرەسنە یوزلر سورمك ایچون پك بیوك بر اشتیاقی قلبلرندە یاشاتدقلرینە تحمّل ایدەمدیلر. او عالی پیغمبر ذی شانڭؐ كوچوجك بر التفاتنە مظهر اولمق ایچون روحلرینە وارنجەیە قدر هر شیلرینی فدا ایتدكلرینی هضم ایدەمدیلر.

بیڭ درت یوز سنەدنبری زمینڭ یوزندە، زمانڭ صحیفەلری اوزرندە، شهیدلرڭ و غازیلرڭ بیاض قیلیچ قلملریلە، قیرمیزی مركّبلرلە یازوب، تاریخە امانت