او وقوفسز اهل وقوف، سیاستی و عدلی وظیفەلرینی دینسزلگە آلت ایتمك ایستەدكلرینی دلیللرلە كوسترمك وظیفەسنی، او نورجی قرداشلرە حوالە ایدییورم.

سعید النّورسی

(٦٠٩)

[بِاسْمِهٖ سُبْحَانَهُ]

سوكیلی خسرو آغابگمز افندیمز،

استادیمزڭ بزە "هم اعتراضنامەیە یازڭ، هم بتون نسخەلرە علاوە ایدیڭز" دییە كوندردیگی اوچنجی كلمەكە: بونڭ بر صحیفە صوڭندە اسكی سعید (اَعُوذُ بِاللّٰهِ مِنَ الشَّیْطَانِ وَالسِّیَاسَةِ) دییوب سیاستی ترك ایتدی. [حاشیە]

استانبول امین أوڭی اوچنجی صلح جزا یارغیچلغنە

بدیع الزّمان سعید نورسی طرفندن باصدیریلان كنچلك رهبری آدلی كتابڭ تورك جزا قانوننڭ ١٦٣ نجی مادّەسندە یازیلی اولارق، (دولتڭ اجتماعی ویا اقتصادی ویا سیاسی ویا حقوقی تمل نظاملرینی قسمًا دە اولسە، دینی اساس و اینانچلرە اویدیرمق آماجیلە ویا سیاسی منفعت ویا شخصی نفوذ تأمین أیلەمك مقصدیلە، دینی و دینی حسّیاتی ویا دینجە مقدّس طانیلان شیلری آلت ایدەجك هر نە صورتدە اولورسە اولسون پروپاغاندە یاپمق ویا تلقیندە بولونمق) ماهیتندە اولوب اولمدیغنی تثبیت ایچون بیلیر كیشی سچیلن هیئت تمییز، سوزی كچن كتابی تدقیق ایتمش و آشاغیدەكی نتیجەلرە وارمشدر.

اوّل امردە ١٦٣ نجی مادّەنڭ تحقّقی ایچون، اوچ عنصر موجود اولمسی كركلیلگنی كوز اوڭندە طوتان هیئت تمییز، بو عنصرلری شو شكلدە صیرەلامشدر:

١-پروپاغاندە یاپمق ویا تلقیندە بولونمق، مادّی عنصر.

٢- بو پروپاغاندەدە دینی و دینی حسّیاتی ویا دینجە مقدّس طانیلان شیلری آلت ایتمك، مادّی عنصرڭ وصفی.

٣-شو اوچ مقصددن برینڭ تعقیب ایدیلمسی، معنوی عنصر.

(آ) لائیكلگە آیقیری اولارق، دولتڭ اجتماعی ویا اقتصادی ویا سیاسی ویا حقوقی تمل نظاملرینی قسمًا دە اولسە، دینی اساس ویا اینانچلرە اویدیرمق مقصدیلە،

(ب) سیاسی منفعت تأمین و تأسیس ایتمك مقصدی،

(ج) شخصی نفوذ تأمین و تأسیس ایتمك مقصدی.

شیمدی بو اساسلرڭ ایشیغی آلتندە، تدقیق موضوعی اولان كتابدە بو اوچ عنصرڭ بولونوب بولونمدیغنی تثبیت ایدەلم:

[١] تدقیق موضوعی اولان كتابدە پروپاغاندە یاپیلمشدر. مؤلّف دائما، رسالۀ نور آدینی ویردیگی دینی دوشونجەسنی یایمغە و طرفدار طوپلامغە چالیشمشدر. قالدیكە، كتابڭ آدی كنچلك رهبریدر. بویلەجە مؤلّف، كنچلرە رهبر اولاجق فكرلر سرد ایتمك، یعنی بو فكرلرڭ پروپاغاندەسنی یاپمق مقصدینی كوتدیگنی بو صورتلە بللی ایتمكدەدر. بو اعتبارلە صوچڭ بر عنصری تحقّق ایتمشدر.

[٢] بو پروپاغاندەدە دینی، دینی حسّیاتی و دینجە مقدّس طانیلان شیلر آلت ایدیلمشدر. تدقیق موضوعی اولان كتابڭ "طوغریدن طوغری یە قرآن معجز البیانڭ اعجاز معنویسندن سوزولن و چیقان و تولّد ایدن رسالۀ نور اساسلرینە طایاندیغنی" (صحیفە ٣٣). مؤلّفی طرفندن مكرّرًا و مصرًّا بیان و ادّعا ایدیلمكدە و بویلەجە پروپاغاندە دینی دلیللرە، تلقینلرە و حسّیاتە استناد ایتمكدەدر. بو اعتبارلە صوچڭ بو ایكنجی عنصری دە تحقّق ایتمشدر.

[٣] لائیكلگە آیقیری اولارق، دولتڭ اجتماعی ویا سیاسی ویا حقوقی تمل نظاملرینی قسمًا دە اولسە، دینی اساس و اینانچلرە اویدیرمق.

(آ) مؤلّف تستّر طرفداریدر. قادینلرڭ یاریسی چیپلاق و آچیق باجاقلە

طولاشمەلرینی، اسلامیتە قارشو محاربەدە شیطان قوماندەسنە ویریلن فرقەلر اولارق تصویر ایتمكدە، قادینلرڭ بوكونكی اجتماعی حیاتدەكی كیینیشلرینی بر كناه صایمقدە و آچیق باجاقلرڭ جهنّمدە اودون اولوب یاناجقلرینی سویلەمكدەدر. یینە مؤلّفە كورە، قادینلرڭ حال حاضر كیینیشلرینی، أولنمەلرە مانع اولوب، فحشە تشویق ایدیجی ماهیتدە صایمقدەدر. یینە مؤلّفە كورە ” قادینی كوزللشدیرن شی، اجتماعی حیاتدە یر آلان سوسلنمك اولمایوب، تربیۀ اسلامیە دائرەسندە آداب قرآنیە زینتیدر“ (صحیفە ١٦). بو صورتلە قادینلرڭ اجتماعی كیینیشلرینی دینی اساسلرە اویدیرمق مقصدی كورولمكدەدر.

(ب) مؤلّف، دینی تدریسات طرفداریدر. رسالۀ نور آدینی ویردیگی دینی تدریسات سایەسندە، محكوملرڭ اون بش هفتەدە اوصلاناجقلرینی (صحیفە ٣٧). كنچلرڭ "جاذبەدار بر فتنە" آدینی ویردیگی عالمدن قورتولابیلەجكلرینی (صحیفە ٥). بو اعتبارلە ممكن اولان هر یردە نورجیلرڭ دینی تدریسات یاپمەلری و بالخاصّە رسالۀ نورڭ شخص معنویسی نامنە حركت ایتدیگنی ایلری سورن مؤلّفڭ فكرلرینی یایاجق برر درسخانۀ نوریە آچمەلرینی، بش اون هفتەدە یاپیلاجغنی سویلەیەرك، بو درسخانەلرلە اسكی مدرسەلر آراسندە غایە اعتباریلە دگل، سادەجە غایەیە وصول ایچون كچەجك زمان اعتباریلە بر فرق كورولدیگنی، استانبول اونیورسیتەسی قاپوسنڭ اوزرندە یڭیدن میدانە چیقاریلان یازیلرڭ

بو مؤسّسەلرڭ ایلریدە بر نور مدرسەسی اولاجغنی دلیل تشكیل ایتدكلرینی بیان ایتمكلە، لائیك تدریساتڭ دە اصلندە دینی تدریساتە استناد ایتدیگنی سویلەمكدەدر. بو اعتبارلە اجتماعی تمل نظاملری قسمًا دە اولسە، دینی اساس و اینانچلرە اویدیرمق مقصدی كودولمكدەدر.

ب-سیاسی منفعت تأمین و تأسیس ایتمك مقصدی. بو مقصدڭ كورولدیگنە دائر بر امارەیە تصادف ایدیلمەمشدر.

(ج) شخصی نفوذ تأمین، تأسیس مقصدی. بو مقصدڭ موجودیتنی كوسترن بعض خصوصلرە تصادف ایدیلمشدر. شویلەكە:

آ-مؤلّف، شخص معنویسنی تمثیل ایتدیگنی ایلری سوردیگی رسالۀ نور دوقتریننڭ ممثّلی اولدیغنی بلیرتیر شكلدە قونوشمقدەدر.

ب-مؤلّف، وحی نازل اولمش كبی یازمقدە و "قلبە اخطار ایدیلدی، لیلۀ قدردە اخطار ایدیلمش، قلبە كلمش بر حقیقت" كبی تریملر قوللانمقدەدر. سیاسیّون و اجتماعیّون فكرلر درمیان ایتمكدەدر (صحیفە ٥٥).

ج-رسالۀ نور بر مكتب، بر دوقترین اولارق كوستریلمكدەدر. و بو دوقترین شاكردلرندن، طلبەلرندن بحث ایدیلمكدەدر. مؤلّف، جاذبەدار بر فتنەنڭ اسیری اولان بر نسل، رسالۀ نوردن مدد اومانلرە ویردیگی جوابلرلە قورتولاجغنە قانعدر. و یینە فتنەیی آتشلندیرن و تعلیم ایدن ارتدادكار بر شخص معنوی موجود اولدیغی و بو شخصڭ كندیسنە كوروندیگنی سویلەمكدە، فقط

بونڭ كیم اولدیغنی بیلدیرمەمكدەدر. اتّفاقلە واریلان بو نتیجەیی صایغیلریمزلە عرض ایدرز.

بیلیر كیشی جزا حقوقی و جزا صلح حقوقی دوچنتی ساهر ارمان

بیلیر كیشی عمومی عامّە حقوق دوچنتی طارق ظفر طونایا

بیلیر كیشی جزا حقوق و جزا اصول حقوقی دوچنتی نور اللّٰه قونتر

(٦١٠)

امین أوڭی اوچنجی صلح جزا یارغیچلغنە استانبول

اهل وقوف طرفندن كنچلك رهبری آدلی اثر حقّندە ویریلن راپورە اعتراضمزدر. راپوردە، كنچلك رهبری بر پروپاغاندە اثری اولارق كوستریلمشدر.

كنچلك رهبری، رسالۀ نور پارچەلرندندر. رسالۀ نور ١٣٣ پارچەدر. بونلرڭ هپسی قرآن حكیمڭ بر تفسیریدر. كنچلك رهبری مادّی نظرلری براز معنایە چویرمك، بو حیاتدن صوڭرە دیگر بر حقیقی حیاتڭ موجودیتنی اونلرە آڭلاتمق و اونلری صرف مادّیلكدن عبارت اولمقدن قورتارمقدر. هر اثرڭ طبیعی اولارق بر غایەسی بولوناجقدر. بو اثرلرڭ دە غایەسی، دینڭ یوكسك حقیقتلرینی آنا لسانمزلە و هركسڭ آڭلایاجغی شكلدە آڭلاتمقدر. راپوردە "رسالۀ نور آدینی ویردیگی دینی دوشونجەسنی یایمق ایچون پروپاغاندە یاپمقدەدر" دینیلییور. رسالۀ نور،

قرآنڭ توركجە بر تفسیری ماهیتندە بولوندیغنە و بدیع الزّمان سعید نورسی دە بر دین عالمی اولدیغنە كورە، طبیعی دینی اثرلر وجودە كتیرەجكدر. یالڭز، بو دینی اثرلرندە اللّٰهڭ رضاسنی قزانمق غایەسی واردر، حسبیدر. و بو فكرلرڭ اساسی قرآن كریمڭ احكامیدر. شخصنی و شخصی فكرلرینی پروپاغاندە یاپمق دگلدر. قرآن كریمڭ اساسلرینی تعلّم ایتمكدر. اوتوز سنەدنبری دنیایە باقمامقدەدر. سیاستلە تمامًا علاقەسنی كسمش بولونمقدەدر. حتّی "خطبۀ شامیە" نام اثرینڭ ترجمەسنڭ بر حاشیەسندە، مؤلّف استادیمز شویلە دیمكدە: "اسكی سعید (اَعُوذُ بِاللّٰهِ مِنَ الشَّیْطَانِ وَالسِّیَاسَةِ) دیدی. و اوتوز بش سنەدنبری سیاستی ترك ایتدی." جملەسندن صوڭرەكی حاشیەدە،

"استادیمزڭ یگرمی یدی سنەلك حیاتنی، یوز اوتوز پارچە كتابنی و مكتوبلرینی، اوچ محكمە و حكومت مأمورلری تام تدقیق ایتدكلری و علیهندە چالیشان ظالم، مرتد منافقلرە قارشو مجبور اولدیغی حالدە، دینی سیاستە آلت ایتدیگنە دائر اڭ اوفاق بر امارە بولامامەلری، دینی سیاستە آلت ایتمدیگنی قطعی اثبات ایدییور. و حیاتنی یاقیندن طانییان بز نور شاكردلری ایسە، بو فوق العادە حالە قارشو حیرانلق دویمقدەیز. و رسالۀ نورڭ دائرەسندە حقیقی اخلاصە بر دلیل صایییورز." دینمكدەدر.

بو حاشیەدن آڭلاشیلدیغنە كورە، مؤلّفڭ غایەسی صرف اخرویدر. "شخصی نفوذ تأمین ایتمك مقصدلری واردر" دینیلییور. شخصی نفوذ تأمین ایتمك

مقصدی اولسە ایدی، آنقرەدن و استانبولدن شخصنە أو تخصیص ایدوب دعوت ایتدكلری و بر چوق ولایتلردن دە چاغریلدقلری حالدە، امرطاغی كبی اوجرا بر كوشەیە چكیلوب، كیمسەدن هدیە آلمایارق، صدقە قبول ایتمەیەرك، غایت بسیط بر حیات كچیرمزدی. خلاصە، بورادەكی قناعت انطباق ایتمكدەدر. یوقاریدە سویلەدیگمز كبی، ١٣٣ پارچەدن عبارت اولان رسالۀ نور پارچەلری، شیمدی یە قدر اوچ بیوك محكمە كورمش، اثرلرڭ ماهیّتنی حقّیلە تدقیق ایدن اهل وقوفلر طرفندن تدقیق ایدیلمش و برائت قزانمشدر. كنچلك رهبری دە بونلرڭ ایچریسندە داخلدر.

بناءً علیه یڭی بر اثر كبی و محكمە صفحاتی كچیرمەمش كبی نظر اعتبارە آلمق طوغری دگلدر. اثرلرڭ دینی اولدیغی، شخصی نفوذ تأمین ایتمك ایچون یازیلمدیغی و مملكتە ضررلی بولونمدقلری، محكمەلر طرفندن قبول ایدیلمش. و طوپلاتدیریلان اثرلر صاحبلرینە اعادە ایدیلمش. یاقیندە، مرسین ولایتنڭ طرسوس قضاسندە، ضابطە بر چوق رسالۀ نور پارچەلرینی الە كچیرمش، آنقرەیە كوندرمش. آنقرەدن اعادە امری كلمش و صاحبلرینە اعادە ایتمكلە برابر اللرینە "بو اثرلر سربستدر. هر یردە اوقونابیلیر" دییە وثیقە ویرمشلر. یعنی حكومتڭ بر ولایتی "بو اثرلر سربستدر" دییور. دیگر بر ولایتی "یاساقدر، لائیكلگە آیقیریدر" دییە محكمەیە ویرییور. بو ایشتە مدهش بر تضاد واردر. بناءً علیه، محكمەنڭ اوّلجە برائت ایتمش بر اثری شیمدی یڭیدن الە آلمسی و بو ایشدن آڭلامایان

اهل وقوفلرە تدقیق ایتدیریلمەسی یولسزدر. اهل وقوف، رسالۀ نوری بر دوقترین اولارق قبول ایدییور. رسالۀ نور مؤلّفڭ اثریدر. و قرآن كریمڭ حقیقتلرینی ایضاح ایتمكدەدر. شخصی بر دوقترین دگلدر. داها بویلە مسئلەنڭ اساسنی قاورامایان بر اهل وقوفە راپور تنظیم ایتدیرمك، بزم حقوقمزڭ ضَیاعە اوغرامەسنە سببیت ویرمكدر. اوّلكی محكمەلرڭ بر تمییز لایحەسندە و تستّر رسالەسنڭ بر حاشیەسندە استادیمز دییوركە:

"بیڭ اوچ یوز اللی سنەدە و هر عصردە اوچ یوز اللی میلیون انسانلرڭ حیات اجتماعیەسندە اڭ قدسی و حقیقی و حقیقتلی بر دستور الٰهی یی، اوچ یوز اللی بیڭ تفسیرڭ تصدیقلرینە و اتّفاقلرینە استنادًا و او بیڭ اوچ یوز اللی سنە ظرفندە كچمش اجدادیمزڭ اعتقادلرینە اقتداءً تفسیر ایدن بر آدمی محكوم ایدن حقسز بر قراری، البتە روی زمیندە عدالت وارسە، او قراری رد و بو حكمی نقض ایدەجكدر!" دیمكدەدر.

خلاصە، اوچ محكمەدەكی اهل وقوف راپورلرینڭ تدقیق ایتدیریلمەسی و بو اثرلر دفعەلرجە محكمەدن كچدیگنە و برائت قزاندیغنە كورە، یڭیدن حقّندە بر حكم ویرمەنڭ قانونسز اولدیغنی و اساسًا بو محكمەنڭ ردّینە قرار ویریلمسی لازم كلدیگنی عرض ایدرز.

امرطاغ نور طلبەلرندن

سلیمان حمزە احمد عبد اللّٰه محمد صادق طاهر

[٦١١]

(١٩٥٢‘دە استانبولدە كورولن كنچلك رهبری محكمەسنە، اهل وقوفە جوابًا ویریلن اعتراضنامەدر.)

استانبول امین أوڭی برنجی آغیر جزا محكمەسنە،

رسالۀ نور اجزالرندن كنچلك رهبرینڭ طبعی و انتشاری مناسبتیلە، مؤلّفی بدیع الزّمان سعید النّورسینڭ محكمەیە ویریلدیگنی و كنچلك رهبرینڭ ماهیّتی ایچون بیلیر كیشی نامیلە، حقیقتلری تمامًا دینسز و اسلامیت دوشمانلری ماهیتندە مطالعە ایدوب، صوچ موضوعی چیقاران اهل وقوفڭ راپورینی اوقودق.

١٣٠ پارچەدن متشكّل، ایمان، علم و فضیلت خزینەسی حكمندەكی رسالۀ نور كلّیاتندن بو كنچلك رهبری بر جزئی اولمسی و رسالۀ نوردەكی یوكسك حقیقتلرە روح و جانلریلە باغلانارق، او اثرلر خزینەسنی بو ملّتڭ مادّی معنوی- حیاتندە بر سعادت رهبری اولدیغنی اثبات ایدوب بیلدیگمزدن، رهبرڭ علیهندەكی او بیلیر كیشی اسنادلرینی رد و اهل وقوفڭ وقوفسزلقلرینی بتون قوّتمزلە یوزلرینە چارپارق اعلان و اثبات ایدییورز. و محكمە هیئتنە عرض ایدییورزكە:

ویریلن اهل وقوف راپوری، وطن و ملّتڭ حیاتنە، تاریخنە، عنعنەسنە، مقدّساتنە، قانوننە تمامًا یبانجی، حال حاضر قانونلرە افترا ایدن، حكومتی تحقیر ایدن، بیڭ ییللق بو ملّتڭ تاریخنی تزییف ایلە بتون بر ملّتڭ اجدادینی

تحقیر ایدن و بوكون بو وطندە یاشایان یگرمی میلیون قرداشلریمزڭ معنویاتنە تعرّض ایدن بر سٓوء قصدڭ اورنگیدر. محكمەء عدالت، بو راپوری نظر اعتبارە آلمسی غیر ممكندر.

ایشتە بز دە، بیلیر كیشی اسمنی آلوب بو سٓوء قصد وثیقەسنی امضا ایدنلرە صورییورز: بو ملّت، حاشا، دینسزمیدر؟ بو ملّت، یوز ییللر بوینجە دیندن و ایماندن، حاشا، محروم بر وضعیتدە یاشامش اڭ سفیه بر ملّتمیدر؟ بو ملّت و بو ملّتڭ پارلاق تاریخنی آلتونلە یالدیزلایان بر اجداد، بتون حیاتلرینی دنیایە سفاهت و ضلالت طاغیتان كفر یولی اوزرندەمی یورومشلر؟

استانبولی فتح ایلە دنیا حیاتندە یڭی بر دور آچان و شرقە-غربە قرآنڭ بایراقدارلغی وظیفەسیلە نور هدایت، علم و فضیلت صاچان، آوروپەیە حقیقی مدنیّتی درس ویرن و اسلامی مدنیتڭ ضیاسیلە بشریتی آیدینلاتان و قوس قوجە بر تاریخ، اونلرڭ قهرمانلغیلە طولی اولان ییلدیریملر، فاتحلر، سلیملر و سلیمانلر و اونلرڭ منسوب اولدیغی بر ملّت، یازدیغنڭ تمامًا عكسنە اولارق، معنویاتی سونمش، دیندن خبری یوق، اسلامیتی نشر ایدن باشقە ملّت، او قوماندانلر باشقە بر ملّتڭ تاریخندە، تاریخ یالان سویلەیور، توركلر اسلامیتڭ قهرمانی اولارق قرآنڭ بایراقدارلغنی بتون ملّتلر اوستندە بر شرف تاجی اولارق طاشیدقلری یالاندر، اویلەمی؟ ویاخود بو ملّت،

حقیقت اسلامیەدن آلدیغی بر درس ایلە، قادینلرینی و قیزلرینی آداب قرآنیە زینتیلە زینتلندیروب قادینلغڭ حیثیت و شرفنی محافظە ایدرك، اونلرڭ عادی و قیمتسز اولمەلرینە مانع اولدیغی، یالان! اوزون عصرلردە اسلام تورك- قهرمانلری نامیلە معروف اولمش و اخلاق و ناموسڭ، حیثیت و شرفڭ كمالنە یتیشمش بیلدیگمز و افتخار ایتدیگمز اجدادیمز، آننەلریمز، بزم افتخاریمزڭ عكسنە اولارق امر قرآنە اتّباع ایتمەمشلر، كوزللگڭ حقیقتنی تربیۀ اسلامیە دائرەسندە آداب قرآنیە زینتیلە زینتلنمك دگل، وجودلرینی چیپلاق اولارق تشهیر ایتمكدە بیلمشلر، اویلەمی؟

ای اهل انصاف و ای تاریخیلە، مقدّساتیلە، قهرمان و مبارك اجدادیلە افتخار ایدن نسل حاضر! كلیڭز، كوریڭز. تاریخڭزی و اسلامیتڭزی تحقیر ایدن بر سٓوء قصد وثیقەسنی یازان و امضا ایدنلرە، حیاتڭزڭ حیاتی، روحڭزڭ روحی بیلدیگڭز اسلامیتڭز نامنە.. و كائناتی اون درت عصر ایشیقلاندیران و قدسی و الٰهی دستورلریلە بیڭ سنەدنبری میلیونلر اجدادیڭزی نورلاندیران و ابدی سعادتە سوق ایدن قرآنڭز نامنە.. و دستور قرآنە اتّباع ایدن یوز میلیون اجدادیڭزڭ نامنە.. اخلاق حسنە و ناموس محافظەسی یولندە اسلامی تربیەنڭ ضیاسیلە نورلانان و تربیە آلان و قادینلغڭ حقیقی معناسنی و حقیقی كوزللگنی یاشاییشلریلە و كییینیشلریلە و حیاتلریلە كوسترن آننەلریڭزڭ و ننەلریڭزڭ و همشیرەلریڭزڭ نامنە.. او مفتریلرە،

او تزییف و تحقیر صاوورانلرە تأسّفڭزی و تكدیریڭزی و ردّیڭزی بیلدیریڭز.

ایشتە او مفتریلر، یاشی سكسانی بولمش، زهرلردن شدّتلی خستە، دینی خدمتندن طولایی عمری حپسخانەلردە چوروتولمش بر اسلام قهرمانڭز.. شیمدی بتون منوّرلرڭ و چوق ادیبلرڭ و تربیەجیلرڭ، وطن و ملّتپرورلرڭ شكایت ایتدكلری اخلاقسزلغڭ و فحش تهلكەسندن محافظە ایچون كنچلرە أیی اخلاق و یوكسك ناموس، ایمان و فضیلت درسی ویرن، وطنە و ملّتە بر عضو نافع حالنە كلمەلرینی تأمین ایدن، عدالت و آسایش لهندە اڭ برنجی قوّت اولارق، مملكت و ملّتڭ سعادتنە خدمت ایدن كنچلك رهبری آدلی اثرینڭ مصادرەسنە و مؤلّف محترمنڭ محكومیتنە سبب اولمق ایچون دییورلر:

"بدیع الزّمان تستّر طرفداریدر. قادینلرڭ یاری چیپلاق، آچیق طولاشمەلرینە، اسلامیتە قارشو محاربەدە شیطان قوماندەسنە ویریلن فرقەلر اولارق تصویر ایتمكدە.. قادینلرڭ بوكونكی اجتماعی حیاتدە آچیق باجاق و یاریم چیپلاق كییینمەلرینی كناه صایمقدەدر. بدیع الزّمان، حال حاضر بو آچیق، یاریم چیپلاق كییینیشلری أولنمەلرە مانع اولوب، فحشە تشویق ایدیجی ماهیتندە كورمكدەدر. و یینە بدیع الزّمانە كورە، قادینی كوزللشدیرن شی و قادینڭ حقیقی و دائمی كوزللگی اجتماعی حیاتدە یر آلان سوسلنمك، وجودلرینی تشهیر ایتمك اولمایوب،

تربیۀ اسلامیە دائرەسندە آداب قرآنیە زینتیدر. بدیع الزّمان دینی تدریسات طرفداریدر. رسالۀ نور آدینی ویردیگی دینی تدریسات سایەسندە محكوملرڭ اون بش هفتەدە اصلاح اولاجقلرینی كە (، بو حقیقت دڭزلی و آفیون حپسخانەلری.. و عدلیەنڭ، غاردییان و مدیرلرینڭ شهادتیلە ثابتدر) سویلەمكدەدر. بدیع الزّمان، جاذبەدار بر فتنەیە اسیر اولان كنچلرڭ دین حقیقتلریلە و نورڭ ایمانی درسلریلە قورتولاجقلرینە قانعدر. ایشتە بو فكرلریلە صوچلیدر. قانونًا محكوم ایدیلمسی لازمدر "دییورلر. ایشتە بونلر، كویا اهل وقوف نامندە، مملكت كنچلگنە عدالت و حق و حرّیت درسلرینی ویرەجك پروفەسورلر ویا حقوق دوچنتلریدر.

ایشتە ای عدالت حقیقیەنڭ ممثّللری صفتیلە حقوق عمومیەیی و حیثیت ملّیەیی محافظە ایدن حاكملر! كنچلك رهبرینڭ ایمانی درسلری و اخلاقی تلقینلری، اهل وقوف راپورندەكی كبی بر صوچ موضوعی اولارق قبول ایدیلییورسە و مؤلّفی بو بیوك خدمتندن طولایی مسئول طوتولویور ایسە، اگر اویلە ایسە، او زمان یوقاریدە عرض ایتدیگمز بو ملّت، بیڭ ییللق تاریخنە، عنعنەسنە، اداری و عرفی قانونلرینە، بو ملّتڭ ابدی مدار افتخاری اولمش مقدّس دیننە، مقدّس اسلامیت حقیقتلرینە، قدسی قرآن درسلرینە و قدسی حقیقتلرە صاریلارق اسلامی مدنیّتی كمال شعشعە ایلە دنیایە اعلان ایدن بر عزیز اجدادە و اونلرڭ حیثیتنە، حقوقنە، معنویاتنە صاورولان تحقیر و تزییفلری