[٦٨٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

عالم اسلامدە لیلۀ قدر تلقّی ایدیلن بو رمضان شریفڭ یگرمی یدنجی كیجەسندە، بر نوع تسمّم ایلە شدّتلی بر معدە خستەلغی ایچندە، سیڭیرلریمی و وجدان و قلبمی استیلا ایدر كبی بر دیگر دهشتلی خستەلق حسّ ایتدم. بو مادّی و معنوی ایكی دهشتلی خستەلق ایچریسندە، شفقت حسّی ایلە بتون ذی حیاتلرڭ ألملری خاطرە كلدی. شخصی خستەلغمدن داها زیادە الیم بر حالت روحیەیی حسّ ایتدم. بونڭلە برابر سكسان كسور سنەیە واران عمریمڭ صوڭندە، سكسان سنە معنوی بر عبادتی قزاندیران اڭ صوڭ لیلۀ قدرە لایق چالیشامایاجغم دییە، سابق ایكی دهشتلی خستەلقدن داها شدّتلی حزین بر مأیوسیّت ایچندە اعصابە كلن و نفس امّارەنڭ وظیفەسنی كورن بر الیم حسّ بنی ازدیگی عین زماندە، آیت حسبیەنڭ بر سرّی امدادیمە یتیشدی. بو اوچ خستەلغی ازالە ایدوب جناب حقّە حدسز شكر اولسونكە، خلاف مأمول بر طرزدە طایاندم. بو اوچ خستەلغمە دە بویلە اوچ مرهم سورولدی:

مادّی خستەلغڭ -خستەلر رسالەسندە اثبات ایدیلدیگی كبی- بر ساعت خستەلق، صابر و متوكّل انسانلرە، هیچ اولمازسە اون ساعت عبادت و لیلۀ قدردە ایسە

داها زیادە عبادت حكمنە كچدیگی كبی، بنم دە بو لیلۀ قدردەكی خستەلغم، اقتدارسزلغملە یاپامدیغم لیلۀ قدردەكی خدمتڭ یرینە كچمەسی ایلە، تام شفا ویریجی بر مرهم اولدی. و بتون ذی حیاتڭ خستەلق و ألملرندن شفقت سرّی ایلە بڭا كلن تألّم مرضنی، بردن رحیمیت الٰهیەنڭ تجلّیسی ایلە، یعنی مخلوقلری یاراتانڭ شفقت و رحیمیتی و رحمتی تام كافی اولمەسندن، اونلرڭ ألملرینی، اونلر ایچون بر نوع لذّتە ویا مكافاتە چویردیگندن، او رحمت الٰهیەدن داها ایلری شفقتی سورمك معناسز و حقسز اولدیغندن و شفقتدن كلن ألمی، بر معنوی سرورە و لذّتە چویردی. یالڭز مرهم دگل، بلكە شفا دە ویردی.

و اڭ صوڭ عمرمدە اڭ زیادە قیمتدار معنوی بر خزینەیی غائب ایتمكدەكی معنوی ألمە قارشو، نورڭ خاص شاكردلرینڭ هر بریسی، شركت معنویە سرّی ایلە عموم نامنە دخی دعا ایلە و عمل صالح ایلە چالیشدقلرندن، هم الحجّة الزّهرادە، هم نور آناختارندە ایضاح ایدیلن، تشهّددە و فاتحەدە بتون موجودات و ذی حیات جماعتنڭ دعالرینە و توحیددەكی دعوالرینە اشتراك صورتیلە، خصوصًا طوپراق، هوا، صو و نور عنصرلری برر دیل اولمەسیلە، طوپراقدن چیقان بتون حیات هدیەلری.. و صودن مباركات و تبریكات.. و هوادن شكر و عبادتڭ تمثّللری.. و نور عنصرندن مادّی و معنوی طیّباتلر، كوزللكلر طرزندە، تشهّددە و فاتحەدە كائناتدەكی بتون نعمتلردن كلن شكرلر و حمدلر و بتون مخلوقاتڭ خصوصًا ذی حیاتلرڭ كلّی عبادتلری و بتون استعانەلری و طوغری یولدە كیدن

بتون اهل حقیقتە و اهل ایمانڭ یولندن كیدنلرە معنوی رفاقت ایتمكلە، اونلرڭ دعالرینە و دعوالرینە تصدیق صورتندە آمینلرلە اشتراك ایدرك، آمین دیمكلە حصّەدار اولمەنڭ كلّی سرّی او كیجە امدادیمە كلدی. غایت خستە، ضعیف، مأیوس بر حالدە، جزئی بر خدمت ایدەمەمكدەكی معنوی الیم خستەلغمە اویلە بر تریاق اولدیكە، بن حقیقتًا اڭ صاغلام حاللرمدە و اڭ كنچ زمانلرمدە، اڭ ذوقلی و لذّتلی اورادمدە بولامدیغم بر معنوی سروری حسّ ایتدم. و حدسز شكر ایدوب، او دهشتلی خستەلغمە راضی اولدم. (اَلْحَمْدُ لِلّٰهِ بِعَدَدِ عَاشِرَاتِ دَقَٓائِقِ شَهْرِ رَمَضَانَ فٖی كُلِّ زَمَانٍ) دیدم.

اَلْبَاقٖی هُوَ الْبَاقٖی

قرداشڭز سعید النّورسی

[٦٩٠]

[بِاسْمِهٖ سُبْحَانَهُ]

استادیمز دیر:

"بنملە كوروشمك ایستەین عزیز قرداشلریمە بیان ایدییورمكە: انسانلرلە كوروشمەیە ضرورت اولمادقجە تحمّلم قالمدیغندن، هم شیمدی تسمّمدن، ضعفیّتدن، اختیارلقدن و خستە بولونمش اولمقدن طولایی فضلە قونوشامییورم. بوڭا مقابل، قطعیًّا سزە خبر ویرییورمكە، رسالۀ نورڭ هر بر كتابی بر سعیددر. سز هانكی كتابە باقسەڭز، بنملە قارشو قارشویە كوروشمكدن اون دفعە

زیادە هم فائدەلنیر، هم حقیقی بر صورتدە بنملە كوروشمش اولورسڭز. بن شوڭا قرار ویرمشدمكە، اللّٰه ایچون بنملە كوروشمك ایستەینلری، كوروشمدكلرینە بدل، هر صباح اوقودقلریمە، دعالریمە داخل ایدییورم و ایتمكدە دوام ایدەجگم. "

شیمدی بر ایكی آیدر استادیمز بر خدمتكاریلە دخی قونوشامییور. قونوشدیغی وقت بر حرارت باشلایور. بونڭ حكمتنی بر اخطارە بناءً سویلەدیكە: "رسالۀ نور بڭا هیچ احتیاج بیراقمییور. قونوشمەیە لزوم قالمدی. هم بن عاجز شخصملە بیڭلر دوستلرمدن یگرمی اوتوز دوستلە قونوشابیلیرم. یگرمی آدمڭ خاطری ایچون بیڭلر آدمڭ خاطرینی رنجیدە ایتمەمك ایچون قونوشمقدن منع ایدیلدم احتمالی قویدر. خصوصی كوروشمدیگم ایچون معذور كورسونلر." حتّی بایرامدە مصافحە ایتمك و اوڭا باقمەیە تحمّل ایدەمییور. اونڭ ایچون خاطرلری قیریلماسین. [حاشیە]

[٦٩١]

(درت سنە اوّل استادیمز، شدّتلی خستەلغی یوزندن بنی آنقرەدە رسالۀ نورڭ محكمە ایلە علاقەدار ایشلرینی تعقیب ایچون توكیل ایتدیگی زمان، بعض مبعوثلرە كوندردیگمز ایلیشیك مكتوبمزی یڭیدن سزلرە و محترم مبعوثلرڭ نظر عرفانلرینە تقدیم ایدییورز. بوڭا دە سبب، عین مسئلەنڭ دوام ایتمسی و بالخاصّە صوڭ آیلردە شرق ولایتلرندە قورولمسی ایچون تشبّثە كچیلن یڭی اونیورسیتەدر.)

رسالۀ نورڭ بو اوتوز سنەلك زماندە، داخلدە و خارجدە فوق العادە انتشاریلە هر طرفدە حسن تأثیری كوسترمسی و شرق ولایتلرندە اللی بش سنەدنبری بیوك بر دار الفنون قورولمەسنە چالیشیلمەسی، بربرینی تعقیب ایدن و بربرینی تماملایان، بو زماندە عالم اسلامی شدّتلی علاقەدار ایدن ایكی مهم مسئلەدر. بو ایكی نتیجۀ عظیمە، هم بو ملّتی، خصوصًا شرق ولایتلرینی، هم درت یوز میلیون اسلام ملّتلرینی، هم صلح عمومی یە محتاج خریستیانلق دنیاسنی علاقەدار ایدن و تأثیرینی كوسترن مدار افتخار ایكی اهمّیتلی حادثەدر. و اسلام دیننڭ و قرآن حقیقتلرینڭ كلّی و عمومی ایكی مهم ناشری و اعلانجیسیدر.

استادیمز اللی بش سنەدنبری، اعظمی غیرتلە و متعدّد وسیلەلرلە شرقی آناطولیدە جامع الازهرە موافق مدرسة الزّهرا نامیلە بر اسلام اونیورسیتەسنڭ قورولمسی ایچون چالیشمش و بونڭ قطعی لزومنی دائما ایلری سورمشدر. استادیمزڭ

رئیس جمهورە و باش وكیلە خطابًا یازدیغی و اونلری بو مسئلەدە تبریك ایدن یازیسندە دینیلدیگی كبی، شرق دار الفنونی، عالم اسلامڭ بر نوع مركزندە اولارق بین الاسلام مدار افتخار بر مقام قازاناجقدر. او ولایتلردە مدفون چوق عزیز و مبارك بیڭلرلە علما و عارفین، شهدا و محقّقین اجدادلریڭزڭ ماضیدەكی پك قیمتلی و قدسی خدمت دینیەلری و معنوی، باقی خصلتلری، بو دار الفنونلە دخی تجسّم ایدەجك و وظیفەء ایمانیەلرینی داها كنیش بر ساحەدە یاپاجقلردر.

شرق اونیورسیتەسنڭ پروغرامی و اسّ الاساس درسی، قرآن حكیمڭ حقائق ایمانیەسنی تفسیر ایدن و بتون مسئلەلرینی فنون عقلیە و دلائل منطقیە و مثبتە ایلە تثبیت ایتدیرن معقولاتلە درس ویرن رسالۀ نوردركە، یڭی عصرڭ اونیورسیتەلرندە و مكتبلرندە اوقوتولمەیە شایاندر.

رسالۀ نور، شرقی آناطولیدە یر یر قورولمش اولان و یوز ییللردنبری او حوالیدە معنوی آب حیات منبعلری وظیفەسنی كورمش بولونان مدرسەلرینڭ و استادلرینڭ بر طلبەسی واسطەسیلە ظهور ایتمشدركە، او محترم استادلر، بو صوڭ منوّر میوەلریلە، یڭیدن وظیفە باشنە كچوب وظیفەء تنویریەلرینی و خدمت قرآنیەلرینی بو صورتلە جهان شمول بر وسعتە انقلاب ایتدیرمەلرینی بتون روحمزلە امید ایدوب رحمت الٰهیەدن تمنّی و نیاز ایدییورز. بو دعامزە دە، زمان و زمینڭ شرائط حیاتیەسی و مسالمت عمومیەنڭ الزمیتی دە آمین دییور و دییەجكدر.

اوت، شرقدەكی علم و عرفان فعالیتنڭ بر ثمرەسی و نتیجەء كلّیەسی اولان رسالۀ نور، شرق دار الفنوننڭ اسلامیت نقطەسندە بر پروغرامی اولمسی حسبیلە، اسلامیتە، بو ملّتە و عالم اسلامە خدمت ایدنلری شدّتلە علاقەدار ایتمكدەدر. شیمدی آمریقەدن و آوروپەدن، نور رسالەلرینی ایستەمەلری و اونلردە دە نور رسالەلرینڭ انتشاری، بو مدّعامزڭ فوق العادە اهمّیتنی كوستریر.

مصطفی صونغور

[٦٩٢]

یازیلری بش وجهلە افترا و یالان اولان بر غزتەیی بڭا اوقودیلر. بویلە افترالرڭ هم اسپارطەیە، هم نشر ایدنلرە بیوك بر ضرری وار.

برنجی یالانی: نور رسالەلرینی اوقویانلرە، مرید و طریقت دییە بنی طریقت درسی ویرمكلە اتهام ایدییور. حالبوكە بنی طانییانلر بیلییورلركە، محكمەلردە دە ثابت اولدیغی كبی، بن طریقت درسی دگل، ایمانڭ، قرآنڭ حقیقتلرینی درس ویرییورم. درسمی دیڭلەینلرە نور طلبەسی دینیر. مسلگمز طریقت دگل، ایمانڭ حقیقتلریدر.

ایكنجی یالانی: افترا ایدن غزتە، باشقە بر غزتەیی كندیسنە تشریك ایتمكلە بعض یاڭلیش تعبیرلر قاریشدیرارق دییوركە: "اگیردیر كنچلری، سعید نورسی و مریدلریلە مجادلەیە باشلادیلر." قطعیًّا بونڭ اصلی اولمدیغنی بتون اسپارطە و اگیردیر كنچلری بیلییورلر. حتّی اسپارطە و اگیردیر كنچلری بونی

ایشیتدكلری وقت، حدّتلە پروتستو ایدییورلر. یالڭز آنقرەدە بولونان اگیردیرلی كنچ اولمایان بر آدم، اوتوز سنە اوّل بنملە كوروشمەلرینی آز تنقیدكارانە یازمش. بوڭا، "كنچلر مجادلەیە باشلادیلر" نامنی ویرمك، نە قدر ظاهر بر یالاندر. حالبوكە، كیم اولورسە اولسون بتون كنچلرە قارشو دائما قرداش نظریلە باقییورم. بڭا یاخود طلبەلریمە قارشو اسپارطە و اگیردیردە هیچ بر كنجڭ مجادلەسنی ایشیتمەمشم.

اوچنجی افتراسی: او افترا ایدن غزتە، باشقە بریسنڭ دیلیلە دییوركە: "سعید و مریدلری كیزلی سیاست چویرییورلر. امنیّتی بوزمق طرزندە نظاماتی دگیشدیرمەیە چالیشییورلر." بونڭ یالان اولدیغنە، یگرمی سكز سنەدە بش محكمە برائت ویرمسیلە كوسترییوركە، سیاستلە هیچ بر علاقەم یوق. و هیچ بر امارە بولونمامەسی، بونڭ نە قدر افترا اولدیغنی كوسترییور. حتّی اوتوز بش سنەدنبری سیاستدن چكیلدیگمی بتون دوستلرم بیلییورلر. بو حقیقت محكمەلر طرفندن دە ثابت اولمشدر.

دردنجی افتراسی: "سعید النّورسی بعض قادینلرە شیطاندر دیمش" دیمەسیدر. بو افترانڭ اصلی: "اسكیدن بیوك شهرلردە آچیق-صاچیق، چیپلاقلق درجەسندە، خصوصًا یاریم چیپلاق خریستیان قیزلری، شیطان قوماندەسندە اخلاق اسلامیەیە ضرر ویرییورلر." ایشتە بویلە برقاچ دانە آچیق كزنلر حقّندەكی بر سوزی، باشقە صورتە چویروب، مطلق قادینلرە تشمیل ایدرك تعبیری

چركینلشدیروب استعمال ایتمسی، پك چركین و ظاهر بر افترادر. "قادینلرلە محاورە" نامندەكی رسالەمدە، قادینلرە بیوك بر حرمت و اهمّیت و قیمت ویردیگمی، حتّی شفقت جهتندە قادینلر ارككلردن چوق ایلری اولدقلرندن و رسالۀ نورڭ مهم بر اساسی شفقت اولمەسندن، بو مبارك همشیرەلریمی "محترم همشیرەلرم" نامیلە یاد ایدییورم. اونلرڭ صمیمیت و اخلاصلرینی زیادە كورویورم.

بشنجی حقارتكارانە افتراسی: كریلەمك و ارتجاع، یعنی اسلامیت احكامنە، اخلاقنە دونمك معناسیلە "ملعون فكر" تعبیرینی قوللانمسی، كرۀ ارضی تیترتەجك، كافرانە بر افترا اولدیغی كبی، یالڭز اسپارطەلیلرە و نور طلبەلرینە دگل، بلكە عالم اسلامە قارشو بر اهانتدر.

چوق اختیار و چوق خستە

سعید النّورسی

[٦٩٣]

(استادیمز كویلردە طولاشدیغنە دائر چیقاریلان اویدیرمە خبرە قارشو بر جوابدر. موجب مراق هیچ بر شی یوقدر.)

استادیمز سعید النّورسینڭ ایكی سنەدنبری مسافر بولوندیغی اسپارطە امنیتنە بر معروضاتمزدر.

١- استادیمز سعید النّورسی، اوتوز سنەدنبری بو آناطولی مملكتندە كزدیگی بتون

ولایت و قضالردە، كندیسنی ضابطەنڭ بر مسافری اولارق تلقّی ایتمش و ضابطە افرادی دائما دوستانە و حمایتكارانە معاملە كوسترمشدر. قرآنڭ حقیقی و پارلاق بر تفسیری اولان رسالۀ نوری اسپارطەدە اوتوز سنە اوّل تألیفە باشلایان استادیمز، حقائق ایمانیەیە غایت تأثیرلی بر صورتدە خدمت ایتمكلە تمامًا آخرتە متوجّه اولان بو خدمتنڭ دنیوی بر فائدەسی اولارق، ایمان سببیلە قلبلردە فنالغە قارشو دائمی بر یاساقجی بیراقمشدر. اونڭ نتیجەسیدركە، آسایشڭ تأمیننە وسیلە اولمشدر.

اوت، استادیمز، عدالت حقیقیەیی افادە ایدن []وَلَا تَزِرُ وَازِرَةٌ وِزْرَ اُخْرٰی [] یعنی "بریسنڭ خطاسیلە باشقەسی مسئول اولاماز" آیت قرآنیەسی و "بر معصومڭ حقّی یوز شریر ایچون دخی فدا ایدیلەمز" كبی دستور قرآنی كرگنجە، یوزدە اون ظالملر یوزندن طقسان معصوملرە ضرر ویرمك، حقیقی عدالتە، اوامر قرآنیەیە تمامًا ضددر دییە هر طرفدە نشر ایتمش و كندیسنە ظلم یاپیلمەسنە قارشو، ملّت اسلامیەنڭ سلامتی ایچون "بن، دگل دنیا حیاتمی، بلكە آخرت حیاتمی دە فدا ایدییورم" دیمش و دیمكدەدر.

رسالۀ نورڭ حقائق ایمانیە درسلریلە و بتون محكمەلردە برائتی نتیجە ویرن مدافعەلرندەكی قرآنی حقیقتلرلە حیات اجتماعیەنڭ اخروی و دنیوی سعادتنە رهبر اولان حقائقی درس ویرن و طولاییسیلە آسایشڭ محافظەسنە و امنیت عمومیەنڭ تأمیننە اڭ بیوك بر وسیلە استادیمز اولدیغی، حیات اجتماعیەنڭ

سعادتیلە علاقەدار، حمیتپرور ذاتلرڭ تصدیقیلە ثابتدر. اوتوز سنەدنبری متعدّد تدقیقلر و محكمەلرڭ برائت قرارلری ویرمسیلە و شیمدی دە تمامًا سربست بولونمەسیلە و اثرلری بیوك بر وسعتلە هر طرفدە، آناطولیدە و عالم اسلامڭ مركزلرندە و غرب مملكتلرینڭ بعضیلرندە یاییلارق تقدیر و تبریكلرە مظهر اولمەسیلە، اڭ اینجە اسرارینە قدر بیوك بر دقّت و اهمّیتلە هر حالی تدقیق ایدیلن استادیمزڭ موجب مسئولیّت هیچ بر حالی كوستریلەمەمشدر. [حاشیە]

نور طلبەلری آسایشجیدرلر

آسایشی محافظە ایتدكلرینڭ دلیل قطعیسی شودر: آلتی ولایتڭ آلتی ضابطە دائرەسی، آلتی یوز بیڭ طلبەلرڭ یگرمی سكز سنە ظرفندە، حقسز معاملەلرە معروض قالدقلری حالدە، هیچ بر وقوعاتلرینی قید ایدەمەمەلری.. حتّی آفیون صاوجیسنڭ آسایش اتهامنە مقابل، استادیمز دیمش: "بو یگرمی سكز سنەدە بر تك وقوعاتی كوسترەبیلیرمیسڭز؟ مادام كوسترەمدیڭز، ناصل بو اتهامی ایلری سورویورسڭز؟ یالڭز كوچك بر طلبەنڭ، باشقە بر مسئلەدن كوچك بر وقوعاتندن باشقە و آلتی یوز بیڭ طلبەدن هیچ بر وقوعاتلری اولمدیغی قطعی اثبات ایدركە، آسایشی نور طلبەلری محافظە ایدییورلر" دییە آفیوندە صاوجی یە دیمش و صوصدیرمشدر.

بر طرفدە قومونیزم كبی دین، اخلاق و عنعنە علیهندە اولوب پك مدهش بر تخریباتلە یاری آوروپەیی، چینی استیلا ایدن، عموم دنیایە قارشو مفسد، ییرتیجی رژیم كفریسنە مقابل، ملّتلر دولتلر مابینندە تدبیر آلدیران و بونڭلە برابر خارجی، كیزلی افساد قومیتەلری دە بو وطن علیهندە مدهش بر هرج و مرجە چالیشدقلری بر زماندە، بز، اوتوز سنەلك پك خالص و تأثیرلی كنیش بر خدمتی ابراز ایدرك و استادیمز سعید النّورسینڭ اثرلری اولان رسالۀ نور نسخەلرندن یوز بیڭلرینڭ انتشاریلە و یوز بیڭلری كچن اوقویوجیلرینڭ حسن حالنی كوسترەرك و ضابطەجە نور طلبەلرندن آسایش علیهندە بر تكنڭ كوستریلمەمسنی شاهد طوتارق دیرز و قطعیًّا ثابتدركە، رسالۀ نور، او تخریباتجی جریانی طوردیران، قرآنی و ایمانی بر سددر. انصافلی ضابطە اهلی دە، بو تحقّق ایتمش حقیقتە شهادت ایدییورلر.

ایمان خدمتنڭ معنوی، اخروی فائدەلرندن قطع نظر، دنیوی، ملّتە عائد مهم بر فائدەسنی، وقتیلە استادیمز شو صورتلە افادە ایتمشدركە، زمان، بونڭ نە قدر طوغری اولدیغنی كوسترمشدر. او زمان دیمش: شیمدی بو مملكتڭ، بو وطن و ملّتڭ سعادت حیاتیە و ابدیەسی نقطەسندە ایكی مدهش جریان وار:

[بریسی] شمالدە چیقان دهشتلی دینسزلك جریاننڭ بو وطنی معنوی استیلاسنە قارشو، قرآنڭ حقیقتلری و ایمانڭ نورلریلە مقابلە ایتمكدر. چونكە او دینسزلك جریانی معنوی تخریبات نوعندن اولدیغندن، قارشوسندە بر معنوی مقابلە

اولملیدر. حقائق قرآنیەنڭ لمعاتی اولان رسالۀ نور، معنوی تعمیرجی بر آطوم بومبەسی اولارق، بو ضلالت جریاننە مقابلە ایدەبیلیر و ایتمشدر.

[ایكنجیسی] بیڭ سنەدنبری اسلامیتڭ قهرمان بر اوردوسی و بایراقداری اولان تورك ملّتنە عالم اسلامڭ عداوتنی ازالە ایتمك، توركلر، یینە اسكیسی كبی اسلامیتڭ قهرمانیدرلر قناعتنی ویردیرمكدر. بو صورتلە درت یوز میلیون حقیقی قرداشلری بو ملّتە قزاندیرمقلە، سعادت حیاتیەسنە اڭ اهمّیتلی بر خدمتی ایفا ایلەمكدركە، رسالۀ نور، ایمان حقیقتلرینی بو وطندە نشر ایدرك بو عظیم فائدەیی فعلاً كوسترمشدر.

رسالۀ نورڭ بر طلبەسی، اوّلجە ألندە نور رسالەلریلە و اورادن چیقاردیغی موعظەلرلە، شرق حدود بولكەسندە، روسلرڭ او زماندە او حوالیدەكی پروپاغاندەلرینی طوردیرمشدی. بو صورتلە بر تك طلبە، بر اوردو قدر وطنە، ملّتە و آسایشە خدمت ایتمشدر. رسالۀ نورڭ غایە و مقصدی، تمامًا اخروی و رضای الٰهی دائرەسندە ایمانە خدمت ایتمك اولدیغندن، نتیجە ویردیگی سائر دنیوی اییلكلر، طولاییسیلە حیات اجتماعیەیە عائد بر فائدەسیدر.

٢-اوتوز قرق سنەدنبری انزوادە، تجرید، خستەلق و حپس كبی سببلرلە، ضرورت اولمادقجە انسانلرلە كوروشمەیە تحمّلی اولمدیغی ایچون خارجدن كلن دوستلرینی دائما خاطرلرینی قیرارق اونلری كری چویرمەسی و آقشامدن ایرتەسی كوننڭ صباحنە قدر خدمتجیلری دخی یاننە قبول ایتمەمسی اویلە بر حقیقتدركە، بو قدر

ظاهر و كوزلە كورونن بو حقیقت قارشوسندە باشقە بر سوز سویلەمەیە لزوم یوقدر.

استادیمز سعید النّورسینڭ اسكیدنبری بر فطری سجیەسیدركە، انزوا و انسانلرلە ضرورت اولمادقجە كوروشمەمك، بر دستور حیاتی اولمشدر. حتّی حیاتدە قالان تك بر قرداشنی دخی، یاقین بر شهردە ایكن، اوتوز سنەدنبری كورمدیگی حالدە كوروشمك ایچون یاننە چاغیرمامشدر. هم خدمتجیلری دە، آقشامدن ایرتەسی كون صباحە قدر شدّتلی بر ضرورت اولمادقجە اوطەسنە كیرەمەمكدەدرلر. شدّتلی خستەلغی و كوروشمەیە تحمّلی اولمامسی سببیلە، خارجدن كلن چوق دوستلرینڭ خاطرلرینی اینجیتوب كوروشمدن كری چویرییور. استادیمزلە اوتوز سنەدنبری علاقەدار اولوب دوستانە وضعیت كوسترن ضابطەیە آسایش نقطەسندە رسالۀ نورلە پك اهمّیتلی خارقە خدمتی ثابت اولان استادیمزڭ بتون حالی محكمەلرجە مدار تدقیق اولمقلە هیچ بر حالی ضابطەجە كیزلی قالمدیغندن، بعض كیزلی دین دوشمانلرینڭ اونڭ حقّندەكی اویدیرمەلریلە، اوتوز سنەلك بر مشاهدەیە طایانان مثبت قناعتی بوزمامق، حقوق عمومیەیی تأمینە چالیشانلرڭ وظیفەلری اقتضاسیدر.

٣- استادیمز خستەدر، حتّی جمعەیە دخی چیقامامقدەدر. آرا صیرە هوا آلمەیە پك زیادە محتاج اولویور. بو سببدن پك نادر اولارق كندینە مخصوص بر اوطەسی