طریقت عصری دگل، حقیقت عصریدر. "دییە بر چوق اثرلرینە یازمش و حقیقتڭ نە اولدیغنی آچیقلامشلردر. برقاچ دینسز و سزڭ كبی موقع حرصی كوزلرینی بورومش برقاچ زواللی مستثنا، بدیع الزّمان، بو نجیب و اصیل ملّتڭ قلبندە لایق اولدیغی یری اشغال ایتمشدر. چونكە او، یاقینلرینە اییلك، طوغریلق، اخلاق و فضیلتدن باشقە بر شی ویرمەمشدر.

استانبول

ع. شرف اینانیر

(٦٥٨)

١٧ تمّوز پنجشنبە ٩٥٢ تاریخلی قدرت غزتەسنڭ باش مقالەسندە نشر ایدیلن بویەجیكیللرڭ افترالرینە حرّ آدم غزتەسنڭ جوابیدر.

عبد الرّحمن بویەجیكیللر دین حرّیتنی، خلقجیلر كبی طریقت قانالندن كیرەرك بالطەلامق ایستەیور. اسلام عالمی بدیع الزّمانی دە طریقتجیلق اسنادیلە ژورنال ایدییور.

١٧ تمّوز ٩٥٢ تاریخلی قدرت غزتەسندە بویەجیكیللر "طریقتلری دموقرات پارتی ادارە ایدییور" باشلقلی یالان و یاڭلیشلرلە طولی بر باش مقالە نشر ایتمشدر. بو باش مقالەیی، آنقە آژانسندە مال بولمش مغربی كبی نشر ایدییور.

١-مملكتدە طریقتلر ممنوع اولدیغی ایچون، خلوتی طریقتنڭ ماهیّتی اوزرندە طورمەمزدە بر فائدە یوقدر. فقط چیوریللی بر قولونیەجی احمدڭ سوزی ایلە

باش مقالەلر یازان بویەجیكیللرڭ سیاسی احتراصنی و منطق ضعیفلغنی بلیرتەلم.

٢- بدیع الزّمان سعید النّورسی مبارك بر اسلام عالمیدر، معلّمدر. هركسە اللّٰه رضاسی ایچون درس ویرر. شاكردلرینە نور طلبەلری دینیر. صاییسی یوز بیڭلری بولدیغی سویلنییور. بونلر اصلا سیاستە قاریشمازلر. خلق پارتیسی دورندە محكمەدن محكمەیە سوروكلنن محترم بدیع الزّمانە، هپ كتابلرندن و قرآن تفسیرلرندن دعوا آچیلمشدر. كچنلردە دە استانبول برنجی آغیر جزادە بر كتابندن أوتوری برائت ایتمشدی.

بدیع الزّمان طریقتی دییە بر طریقت یوقدر، افترادر. بدیع الزّمان هیچ بر زمان شیخلك طاسلامامشدر. ایچكیلی آیینلرلە بونی قارشیلاشدیرمق و بربرینە قاریشدیرمق انصافسزلقدر.

٣- دموقرات ملّت وكیللرندن شیخلر وارمش. اولابیلیر. فقط خلق و ملّت پارتیلردن اولمدیغی نە ایلە ثابتدر؟ طریقتلر لغو ایدیلدی. فقط "وقتیلە شیخ اولانلر مبعوث اولاماز" دییە بر قید، بر قانون وارمیدر؟ اونلرڭ مدنی حقلرینی ناصل اسقاط ایدەبیلیرسڭز؟ بویەجیكیللرڭ ملّت پارتیسی كنل یوروتمە قورولندە اهل طریق اولان ایكی اوچ محترم ذاتی بیلمییورمیسڭز؟

٤- ماصون درنگی، خلق پارتیسی زمانندە تكرار فعّالیتە كچدی. شمس الدّین كون آلطای باش وكیل و امین ایریشیركیل داخلیە وكیلی ایدی. بونی داها دون

اخراج ایدیلدیگڭ دموقرات پارتی یی كوتولەمك ایچون یاڭلیش كوسترییورسڭ، عیبدر. یوق "دموقرات پارتی اقتدارە كلنجە ماصونلغی یڭیدن قوردی" كبی باطل بر ظندە ایسەڭ، ناصل ملّت وكیلیسڭكە، داها ایكی ییللق تشریعی فعالیتی بیلمییورسڭ؟

صاقین شیمدیدن احتراص و چكەمەمزلكدن اختیارلق علامتلری كوسترمە دییەجگز.

٥- داها دون ملّت پارتیسنە دموقرات پارتیدن اخراج ایدیلەرك كیردڭ. ناصل اولور دە حكمت بایوری تنقید ایدنلری "صیزمش آژان" دییە كوسترەبیلییورسڭ؟ بیوك قونغرەدە اونی تنقید ایدن و اوڭا رأی ویرمەین یوزلرجە پارتی منسوبنی تهمت آلتندە بیراقییورسڭ.

٦- كلەلم اساسە: "اسكیدن پولیس و عدلیەدن قورقارلردی. شیمدی آچیقجە آیین یاپییورلر" دییە ژورنالدە بولونویورسڭ. بویەجیكیللرڭ بو ژورنالجیلگنی، ملّت پارتیسندەكی وجدان حرّیتنە طرفدار ملّیتجیلر دە محقّق بگنمەمشلردر. اونلر ذاتًا قدرت غزتەسنی دە بگنمییورلر.

نە دیمك ایستەیورسڭ بویەجیكیللر؟ یینە أولر باصیلسین، قرآن كریملر طوپلانسین، حپسخانەلر آدم آلسین، یعنی دین و وجدان حرّیتی بالطەلانسین، اللّٰە اكبر دیینلر اوچ آی حپس ایدیلسین. بونیمی ایستەیورسڭ؟

طریقتجیلغی بر طوتامق یاپوب، اندیرَكْت اولارق وجدان حرّیتنەمی تجاوز ایدییورسڭ؟ آچیق قونوش بویەجیكیللر! داها دون اسكی باشقانڭز كندلی "لائیك دولت مدرسە آچماز، تكیە آچماز. فقط تكیە و مدرسە دە قپایاماز" دییوردی. یینە كندلی "شرقدە لائیكلك دییە بر دوقترین یوقدر. لادینی معناسنە كلیر. اونڭ ایچون پروغراممزە لائیكلك كلمەسنی آلمدق." مأٓلندە قونوشویوردی. سز لائیك اولدیغڭزیمی بحث ایدییورسڭز؟ بو تناقضی و تضادی آراڭزدە حل ایدڭ. عكس تقدیردە ایكی یوزلی بر سیاستدە كورولدیگڭزی دوشونەجگز.

چونكە ملّت پارتیسنە كیرنلرڭ یوزدە طقسانی، وجدان حرّیتی طلسمی ایچون كیرمشلردی.

اوت، آچیق قونوشڭ و مملكتی آلداتمایڭ.

چوق سوكیلی (خسرو) آغابگم! بیوك طوغونڭ و حرّ آدمڭ بویەجیكیللرە ویردكلری جوابلری، سز آغابگمزە برای معلومات یازمەمزی استادیمز امر ایتمشدر. مناسب كورورسەڭز تكثیر ایدرسڭز. صوڭسز سلاملریمزی صونار، اللریڭزدن أوپر، وظیفەڭزدە موفّقیتلر دیلر، مبارك دعالریڭزە ال آچارز.

اَلْبَاقٖی هُوَ الْبَاقٖی

چوق قصورلی، بیچارە طلبەڭز مصطفی آجت

رسالۀ نورڭ وطنە، ملّتە و اسلامیتە بیوك خدمتنی قبول و تقدیر ایدن باش وكیل عدنان مندرسە استادڭ یازدیغی بر مكتوب

[٦٥٩]

[بِاسْمِهٖ سُبْحَانَهُ]

بن چوق خستە اولدیغم و سیاستلە علاقەسز بولوندیغم حالدە، عدنان مندرس كبی بر اسلام قهرمانی ایلە بر صحبت ایتمك ایستردم. حال و وضعیتم كوروشمەیە مساعدە ایتمدیگی ایچون، او صوری قونوشمق یرینە، بو مكتوب بنم بدلمە قونوشسون دییە یازدم.

غایت قیصە برقاچ اساسی، اسلامیتڭ بر قهرمانی اولان عدنان مندرس كبی دیندارلرە بیان ایدییورم:

[برنجیسی] اسلامیتڭ پك چوق قانون اساسیسندن بریسی []وَلَا تَزِرُ وَازِرَةٌ وِزْرَ اُخْرٰی [] آیت كریمەسنڭ حقیقتیدركە، بریسنڭ جنایتیلە باشقەلری و اقربا و دوستلری مسئول اولاماز. حالبوكە شیمدیكی سیاست حاضرەدە پارتیجیلك طرفدارلغی ایلە، بر جانینڭ یوزندن پك چوق معصوملرڭ ضررینە رضا كوستریلییور. بر جانینڭ جنایتی یوزندن، طرفدارلری ویاخود اقربالری دخی شنیع غیبتلر و تزییفلر ایدیلوب، بر تك جنایت یوز جنایتە چوریلدیگندن، غایت دهشتلی بر كین و عداوتی طمارلرە طوقوندیروب، كین و غرضە و مقابلەء بالمثلە مجبور ایدیلییور. بو ایسە حیات اجتماعیەیی تمامًا زیر و زبر ایدن بر زهردر

و خارجدەكی دوشمانلرڭ پارماق قاریشدیرمەلرینە تام بر زمین حاضرلامقدر. ایران و مصردەكی حسّ ایدیلن حادثە و بحرانلر، بو اساسدن ایلری كلدیگی آڭلاشیلییور. فقط اونلر بوراسی كبی دگل. بزە نسبتًا پك خفیف، یوزدە بر نسبتندەدر. اللّٰه ایتمەسین، بو حال بزدە اولسە، پك دهشتلی اولور.

بو تهلكەیە قارشو چارەء یكانە، اخوّت اسلامیەیی و اساس اسلامیت ملّیتنی او قوّتڭ تمل طاشی یاپوب، معصوملری حمایە ایچون، جانیلرڭ جنایتلرینی كندیلرینە منحصر بیراقمق لازمدر.

هم امنیّتڭ و آسایشڭ تمل طاشی، یینە بو قانون اساسیدن كلییور. مثلا، بر خانەدە ویا بر كمیدە بر معصوملە اون جانی بولونسە، حقیقی عدالتلە و امنیت و آسایش دستور اساسیسیلە او معصومی قورتاروب تهلكەیە آتمامق ایچون، كمی یە و خانەیە ایلیشمەمك لازم. تاكە معصوم چیقنجەیە قدر.

ایشتە بو قانون اساسئ قرآنی حكمنجە، آسایش و امنیت داخلیەیە ایلیشمك و اون جانی یوزندن طقسان معصومی تهلكەیە آتمق، غضب الٰهینڭ جلبنە وسیلە اولور. مادام جناب حق، بو تهلكەلی زماندە بر قسم حقیقی دیندارلرڭ باشە كچمەسنە یول آچمش، قرآن حكیمڭ بو قانون اساسیسنی كندیلرینە بر نقطۀ استناد و اونلرە غرضكارلق ایدنلرە قارشو سپر یاپمق لازم كلدیگنی، زمان اخطار ایدییور.

اسلامیتڭ ایكنجی بر قانون اساسیسی شو حدیث شریفدر:

[سَیِّدُ الْقَوْمِ خَادِمُهُمْ] حقیقتیلە، مأموریت بر خدمتكارلقدر. بر حاكمیت و بنلك ایچون تحكّم آلتی دگل. بو زماندە تربیۀ اسلامیەنڭ نقصانیتیلە و عبودیتڭ ضعفیتیلە، بنلك، انانیت قوّت بولمش. مأموریتی خدمتكارلقدن چیقاروب، بر حاكمیت و مستبدانە بر تحكّم و متكبّرانە بر مرتبە طرزینە كتیردیگندن، آبدستسز، قبلەسز نماز قیلمق كبی، عدالت عدالت اولماز. اساسیلە دە بوزولور و حقوق عباد دە زیر و زبر اولور. حقوق عباد، حقوق اللّٰه حكمنە كچەمییوركە، حق اولابیلسین. بلكە نفسانی حقسزلقلرە وسیلە اولور.

شیمدی عدنان مندرس كبی، "اسلامیتڭ و دینڭ ایجابلرینی یرینە كتیرەجگز" دیینە و مذكور ایكی قانون اساسی یە قارشو مخالفت ایدوب تام ضدّینە اولارق ایكی دهشتلی جریانڭ، غایت بیوك رشوت ایلە خلقلری آلداتمق و اجنبیلرڭ مداخلەسنە یول آچمق وضعیتندە هجوم ایتمك احتمالی قوّتلیدر.

[بریسی] برنجی قانون اساسی یە مخالف اولارق، بر جانی یوزندن قرق معصومی كسمش، بر كویی دە یاقمش. بو درجەدە بر استبداد مطلق و هر نفسڭ ذوقنە كچەجك مأموریتە، بر حاكمیت صورتندە رشوت ویرەرك، دیندار حرّیتپرورلرە هجوم ایدیلییور.

[ایكنجی هجوم دە] اسلامیت ملّیت قدسیەسنی بیراقوب -اوّلكیسی كبی- بر جانی یوزندن یوز معصومڭ حقّنی چیگنەیەبیلن، ظاهرًا بر ملّیتجیلك و حقیقتدە

عرقجیلق طماریلە هم حرّیتپرور دیندار دموقراتلرە، هم بتون بو وطندەكی یوزدە یتمشی سائر عنصرلردن بولونانلرە، هم حكومت علیهنە، هم بیچارە توركلر علیهنە، هم دموقراتلرڭ تعقیب ایتدیگی سیاست علیهنە چالیشارق و سرسری و انانیتلی نفسلرە غایت ذوقلی بر رشوت اولارق بر عرقجیلق قرداشلغی ویرییور. او ذوقلی قرداشلغڭ ایچندە، او ذوقلی فائدەدن بیڭ دفعە داها زیادە حقیقی قرداشلری دوشمانلغە چویرمك كبی عجیب تهلكەیی، او سرخوشلغی ایلە حسّ ایدەمییور. مثلا، اسلامیت ملّیتی ایلە درت یوز میلیون حقیقی قرداشڭ هر كون (اَللّٰهُمَّ اغْفِرْ لِلْمُؤْمِنٖینَ وَالْمُؤْمِنَاتِ) دعای عمومیسیلە معنوی یاردیم كورمك یرینە، عرقجیلق ایلە او درت یوز میلیون مبارك قرداشلری، درت یوز سرسری یە و لاابالیلرە یالڭز دنیوی و پك جزئی بر منفعتی ایچون ترك ایتدیرییور.

بو تهلكە هم بو وطنە، هم حكومتە، هم دە دیندار دموقراتلرە و توركلرە بیوك بر تهلكەدر و اویلە یاپانلر دە حقیقی تورك دگللردر. نجیب توركلر بویلە خطادن چكینیرلر. بو ایكی طائفە هر شیدن استفادەیە چالیشوب، دیندار دموقراتلری دویرمەیە چالیشدقلری و چالیشدیریلدقلری، میداندەكی آثار ایلە تحقّق ایدییور. بو عجیب تخریباتە و بو ایكی قوّتلی معارضلرە قارشو، قرق صحابە ایلە دنیانڭ قرق دولتنە قارشو میدان معارضەیە چیقان و غلبە ایدن و بیڭ درت یوز سنە ظرفندە و هر عصردە اوچ یوز - درت یوز میلیون شاكردی بولونان

حقیقت قرآنیەنڭ صارصیلماز قوّتنە طایانمق و اونڭ ایچندەكی دنیوی و اخروی سعادت ابدیەنڭ ذوقلرینی او جاذبەدار حقیقتلە برابر نقطۀ استناد یاپمق، او مذكور معارضلریڭزە و هم داخل و خارجدەكی دوشمانلریڭزە قارشو اڭ لازم و الزم و ضروری بر چارەء یكانەدر. یوقسە او انصافسز داخلی و خارجی دوشمانلریڭز، سزڭ بر جنایتڭزی بیڭلر یاپوب و اسكیلرڭ دە جنایتلرینی علاوە ایدرك باشقەلرڭ باشنە یوكلەدكلری كبی، سزە دە یوكلەیەجكلر. هم سزە، هم وطنە، هم ملّتە تلافی ایدیلمەیەجك بر تهلكە اولور.

جناب حق، سزلری اسلامیت لهندەكی خدمتلریڭزدە موفّق و مذكور تهلكەلردن محافظە أیلەسین دییە، بن و نورجی قرداشلریمز، یاپاجغڭز خدمتە و مذكور حقیقتی قبول ایتمەڭزە مقابل دعا ایتمەیە قرار ویرەجگز.

[اوچنجیسی] اسلامیتڭ حیات اجتماعیەیە دائر بر قانون اساسیسی دخی بو حدیث شریفڭ [اَلْمُؤْمِنُ لِلْمُؤْمِنِ كَالْبُنْیَانِ الْمَرْصُوصِ یَشُدُّ بَعْضُهُمْ بَعْضًا] حقیقتیدر. یعنی، خارجدەكی دوشمانلرڭ تجاوزلرینە قارشو، داخلدەكی عداوتی اونوتمق و تام تساند ایتمكدر. حتّی اڭ بدوی طائفەلر دخی بو قانون اساسینڭ منفعتنی آڭلامشلركە، خارجدە بر دوشمان چیقدیغی وقت، او طائفە بربرینڭ باباسنی و قرداشنی ئولدیردكلری حالدە، او داخلدەكی دوشمانلغی اونوتوب، خارجدەكی دوشمان دفع اولنجەیە قدر تساند ایتدكلری حالدە، بیڭلر تأسّفلرلە دیرزكە، بنلكدن، خودفروشلقدن، غروردن و غدّار سیاستدن كلن داخلدەكی

طرفكیرانە فكریلە، كندی طرفنە شیطان یاردیم ایتسە رحمت اوقوتاجق، مخالفنە ملك یاردیم ایتسە لعنت ایدەجك كبی حادثاتلر كورونویور. حتّی بر صالح عالم، فكر سیاسیسنە مخالف بر بیوك صالح عالمی تكفیر درجەسندە غیبت ایتدیگی و اسلامیت علیهندە بر زندیقی، اونڭ فكرینە اویغون و طرفدار اولدیغی ایچون حرارتلە ثنا ایتدیگنی كوردم. و شیطاندن قاچار كبی اوتوز بش سنەدنبری سیاستی ترك ایتدم.

هم شیمدی بریسی، هم رمضان شریفە، هم شعائر اسلامیەیە، هم بو دیندار ملّتە بیوك بر جنایتی یاپدیغی وقت، مخالفلرینڭ اونڭ او وضعیتی خوشلرینە كیتدیگی كورولدی. حالبوكە كفرە رضا كفر اولدیغی كبی، ضلالتە و فسقە و ظلمە رضا دە فسقدر، ظلمدر، ضلالتدر. بو عجیب حالڭ سرّینی كوردمكە، كندیلرینی ملّت نظرندە ایتدكلری جنایتلرندن معذور كوسترمك طماریلە مخالفلرینی كندیلرندن داها دینسز، داها جانی كورمك و كوسترمك ایستەیورلر. ایشتە بو چشیت دهشتلی حقسزلقلرڭ نتیجەلری پك تهلكەلی اولدیغی كبی، اجتماعی اخلاقی دە زیر و زبر ایدوب بو وطن و ملّتە و حاكمیت اسلامیەیە بیوك بر سٓوء قصد حكمندەدر.

داها یازاجقدم، فقط بو اوچ نقطەء اساسیەیی شیمدیلك دیندار حرّیتپرورلرە بیان ایتمكلە اكتفا ایدییورم.

سعید النّورسی

[٦٦٠]

(عدنان مندرسە كوندریلمك نیّتیلە اوّلجە یازیلان اجتماعی حیاتمزە عائد بر حقیقتڭ حاشیەسنی تكرار تقدیم ایدییورز)

[حاشیە] اسكیلرڭ لزومسز و كیفی قانونلری و سٓوء استعماللری نتیجەسیلە، بلكە دە تحریكلریلە ظهور ایدن تیجانی مسئلەسنی و آغیر جزالرینی دیندار دموقراتلرە یوكلەمەمك و عالم اسلامڭ نظرندن دموقراتلری دوشورمەمەنڭ چارۀ یگانەسی، كندمجە بویلە دوشونویورم: اذان محمّدینڭؐ نشریلە دموقراتلر اون درجە قوّت بولدیغی كبی، آیاصوفیەیی دە، بش یوز سنە دوام ایدن وضعیت قدسیەسنە چویرمك و حالاً اسلامدە چوق حسن تأثیر یاپان و بو وطن اهالیسنە عالم اسلامڭ حسن توجّهنی قزاندیران، یگرمی سكز سنە محكمەلرڭ مضر جهتنی بولامدقلری و بش محكمە دە برائتنە قرار ویردكلری رسالۀ نورڭ رسمًا سربستیسنی دیندار دموقراتلر اعلان ایتملی و بو یارەیە بر نوع مرهم اورملیدرلر. او وقت عالم اسلامڭ توجّهنی قزاندقلری كبی، باشقەلرینڭ دە ظالمانە قباحتلری اونلرە یوكلنمز فكرندەیم. دیندار دموقراتلر، خصوصًا عدنان مندرس كبی ذاتلرڭ خاطرلری ایچون، اوتوز بش سنەدنبری ترك ایتدیگم سیاستە بر ایكی ساعت باقدم و بونی یازدم.

سعید النّورسی

استادیمز افندیمزدن یڭی آلدیغمز بو یڭی حقیقتی سزلرە برای معلومات عرض ایدییورز.

خسرو

[٦٦١]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، فداكار قرداشلرم،

چوق یرلردن تلغراف و مكتوبلرلە بایرام تبریكلری آلدیغم و چوق خستە بولوندیغم ایچون، وارثلرم اولان مدرسة الزّهرا اركانلری بنم بدلمە هم كندیلرینی، هم او خاص قرداشلریمزڭ بایراملرینی تبریك ایتمكلە برابر.. عالم اسلامڭ بیوك بایرامنڭ عرفەسی اولان و شیمدیلك آسیە و آفریقەدە انكشافە باشلایان و درت یوز میلیون مسلمانی بربرینە قرداش و مادّی و معنوی یاردیمجی یاپان اتّحاد اسلامڭ، یڭی تشكّل ایدن اسلامی دولتلردە تأسیسە باشلامەسنڭ.. و قرآن حكیمڭ قدسی قانونلرینڭ او یڭی اسلامی دولتلرڭ قانون اساسیسی اولمەسندن طولایی بیوك بایرام اسلامیەیی تبریك و دینلر ایچندە بتون احكام و حقیقتلرینی عقلە و حجّتلرە استناد ایتدیرن قرآن حكیمڭ، ظهورە كلن كفر مطلقی تك باشیلە قیرمەسنە چوق امارەلر كورولمسی.. و بشر استقبالنڭ دە بو كلن بایرامنی تبریك ایلە برابر، مدرسة الزّهرانڭ و بتون نور طلبەلرینڭ هم داخل، هم خارجدە، هم عربجە، هم توركجە نورلرڭ نشریاتنە چالیشمەلرینی.. و دیندار دموقراتلرڭ بر قسمِ مهمّی نورلرڭ سربستیتنە طرفدار چیقمەلرینی بتون روح و جانمزلە تبریك ایدییورز.

بو سنە حاجیلرڭ آز اولمەسنە چوق اسباب وار ایكن، یوز سكسان بیڭدن زیادە حاجیلرڭ او قدسی فریضەیی و دین اسلامڭ قدسی و سماوی قونغرەسی حكمندە اولان بو حجّ اكبری بیوك بر بایرامڭ عرفەسی نقطەسندە اولارق بتون روح و جانمزلە تبریك ایدییورز. [حاشیە]

اَلْبَاقٖی هُوَ الْبَاقٖی

خستە قرداشڭز سعید النّورسی

(٦٦٢)

[بِاسْمِهٖ سُبْحَانَهُ]

ایلولڭ سكزندە تكرار ایدیلن آفیون محكمەسی مناسبتیلە استادیمز چوق خستە اولدیغی و محكمەیە كیدەمیەجگی ایچون، او مسئلەیە دائر فكرینی صوردق. او دە "نورڭ مهم طلبەلری و آووقاتمز بنم بدلمە كافیدر" دیدی. و بو مسئلەیی یازدیردی:

یگرمی سكز سنە ظرفندە چكدیگم اشكنجەلردن بریسی شودر:

بر دفعە اسپارطە محكمەسنڭ رسالۀ نورڭ بتون اجزالرینی آلوب، بر ایكی آی اللرندە تدقیقدن صوڭرە تمامًا صاحبلرینە اعادە ایتدیگی و اسكیشهردە ایسە اون آلتی سنە اوّل بتون نور اجزالرینی اینجەدن اینجەیە تدقیق ایدوب، یالڭز كوچك بر رسالەسی اولان تستّرە ایلیشدیلر. فقط تستّرڭ رفعنە قانون اولمدیغی ایچون

قناعت وجدانیە ایلە آز بر جزا ویردیلر. فقط دڭزلی، او رسالە دە داخل، هپسنی برائت ایتدیردی. داها صوڭرە دڭزلی محكمەسی بتون رسالەلری تدقیقدن صوڭرە، آنقرە آغیر جزا محكمەسنڭ ایستەمسی اوزرینە بتون رسالەلر آنقرەیە سوق ایدیلدی. ایكی آی اونلر دە تدقیق ایدوب، هم اهل وقوفڭ اینجەلەمسی ایلە دڭزلی محكمەسی اتّفاقًا برائتنە، هم آنقرە آغیر جزا محكمەسی اهل وقوفڭ راپورینە بناءً اتّفاقًا برائتنە قرار ویردكلری و صوڭرە دە محكمۀ تمییز تصدیق ایدوب قضیۀ مُحكمە حالنە كتیردكلری حالدە، هم مرسیندە نورڭ اڭ مهم مجموعەلری والی طرفندن مصادرە ایتدیریلەرك آنقرەیە كوندریلمش. آنقرە ضررسز كوروب طرسوس امنیّتی واسطەسیلە صاحبلرینە اعادە ایدیلمشدر. هم آنقرە بر اوهامە بناءً، صونغوردەكی نورڭ اڭ مهم مجموعەلرینی امنیت واسطەسیلە مصادرە ایدرك تدقیقدن صوڭرە تمامًا صونغورە اعادە ایتمشدر.

هم استانبولدە رهبرڭ مصادرەسی مناسبتیلە، ذوالفقار و عصای موسی كبی چوق مهم نور رسالەلری مصادرە ایدیلدیگی حالدە، صوڭرە او استانبول محكمەسی عین كتابلری، یالڭز رهبر مستثنا اولارق كلّیًا اعادە ایتمسی و شیمدی رهبرڭ ویریلمسی ایچون وعد ایدیلمسی و بو مملكتدە هیچ بر كیمسەنڭ نورلردن ضرر كورمەمسی و ضرر كوردك دییە هیچ بر زمان دویولمامسی و محكمەلرڭ و صاوجیلرڭ اقراریلە آلتی یوز بیڭ نور طلبەسی تام استفادە ایتمسی و عالم اسلام هر طرفدە اونی اشتیاقلە آرامسی كوسترییوركە، اون كون ظرفندە محكمۀ تمییز برائت قراری