بونڭ كیم اولدیغنی بیلدیرمەمكدەدر. اتّفاقلە واریلان بو نتیجەیی صایغیلریمزلە عرض ایدرز.

بیلیر كیشی جزا حقوقی و جزا صلح حقوقی دوچنتی ساهر ارمان

بیلیر كیشی عمومی عامّە حقوق دوچنتی طارق ظفر طونایا

بیلیر كیشی جزا حقوق و جزا اصول حقوقی دوچنتی نور اللّٰه قونتر

(٦١٠)

امین أوڭی اوچنجی صلح جزا یارغیچلغنە استانبول

اهل وقوف طرفندن كنچلك رهبری آدلی اثر حقّندە ویریلن راپورە اعتراضمزدر. راپوردە، كنچلك رهبری بر پروپاغاندە اثری اولارق كوستریلمشدر.

كنچلك رهبری، رسالۀ نور پارچەلرندندر. رسالۀ نور ١٣٣ پارچەدر. بونلرڭ هپسی قرآن حكیمڭ بر تفسیریدر. كنچلك رهبری مادّی نظرلری براز معنایە چویرمك، بو حیاتدن صوڭرە دیگر بر حقیقی حیاتڭ موجودیتنی اونلرە آڭلاتمق و اونلری صرف مادّیلكدن عبارت اولمقدن قورتارمقدر. هر اثرڭ طبیعی اولارق بر غایەسی بولوناجقدر. بو اثرلرڭ دە غایەسی، دینڭ یوكسك حقیقتلرینی آنا لسانمزلە و هركسڭ آڭلایاجغی شكلدە آڭلاتمقدر. راپوردە "رسالۀ نور آدینی ویردیگی دینی دوشونجەسنی یایمق ایچون پروپاغاندە یاپمقدەدر" دینیلییور. رسالۀ نور،

قرآنڭ توركجە بر تفسیری ماهیتندە بولوندیغنە و بدیع الزّمان سعید نورسی دە بر دین عالمی اولدیغنە كورە، طبیعی دینی اثرلر وجودە كتیرەجكدر. یالڭز، بو دینی اثرلرندە اللّٰهڭ رضاسنی قزانمق غایەسی واردر، حسبیدر. و بو فكرلرڭ اساسی قرآن كریمڭ احكامیدر. شخصنی و شخصی فكرلرینی پروپاغاندە یاپمق دگلدر. قرآن كریمڭ اساسلرینی تعلّم ایتمكدر. اوتوز سنەدنبری دنیایە باقمامقدەدر. سیاستلە تمامًا علاقەسنی كسمش بولونمقدەدر. حتّی "خطبۀ شامیە" نام اثرینڭ ترجمەسنڭ بر حاشیەسندە، مؤلّف استادیمز شویلە دیمكدە: "اسكی سعید (اَعُوذُ بِاللّٰهِ مِنَ الشَّیْطَانِ وَالسِّیَاسَةِ) دیدی. و اوتوز بش سنەدنبری سیاستی ترك ایتدی." جملەسندن صوڭرەكی حاشیەدە،

"استادیمزڭ یگرمی یدی سنەلك حیاتنی، یوز اوتوز پارچە كتابنی و مكتوبلرینی، اوچ محكمە و حكومت مأمورلری تام تدقیق ایتدكلری و علیهندە چالیشان ظالم، مرتد منافقلرە قارشو مجبور اولدیغی حالدە، دینی سیاستە آلت ایتدیگنە دائر اڭ اوفاق بر امارە بولامامەلری، دینی سیاستە آلت ایتمدیگنی قطعی اثبات ایدییور. و حیاتنی یاقیندن طانییان بز نور شاكردلری ایسە، بو فوق العادە حالە قارشو حیرانلق دویمقدەیز. و رسالۀ نورڭ دائرەسندە حقیقی اخلاصە بر دلیل صایییورز." دینمكدەدر.

بو حاشیەدن آڭلاشیلدیغنە كورە، مؤلّفڭ غایەسی صرف اخرویدر. "شخصی نفوذ تأمین ایتمك مقصدلری واردر" دینیلییور. شخصی نفوذ تأمین ایتمك

مقصدی اولسە ایدی، آنقرەدن و استانبولدن شخصنە أو تخصیص ایدوب دعوت ایتدكلری و بر چوق ولایتلردن دە چاغریلدقلری حالدە، امرطاغی كبی اوجرا بر كوشەیە چكیلوب، كیمسەدن هدیە آلمایارق، صدقە قبول ایتمەیەرك، غایت بسیط بر حیات كچیرمزدی. خلاصە، بورادەكی قناعت انطباق ایتمكدەدر. یوقاریدە سویلەدیگمز كبی، ١٣٣ پارچەدن عبارت اولان رسالۀ نور پارچەلری، شیمدی یە قدر اوچ بیوك محكمە كورمش، اثرلرڭ ماهیّتنی حقّیلە تدقیق ایدن اهل وقوفلر طرفندن تدقیق ایدیلمش و برائت قزانمشدر. كنچلك رهبری دە بونلرڭ ایچریسندە داخلدر.

بناءً علیه یڭی بر اثر كبی و محكمە صفحاتی كچیرمەمش كبی نظر اعتبارە آلمق طوغری دگلدر. اثرلرڭ دینی اولدیغی، شخصی نفوذ تأمین ایتمك ایچون یازیلمدیغی و مملكتە ضررلی بولونمدقلری، محكمەلر طرفندن قبول ایدیلمش. و طوپلاتدیریلان اثرلر صاحبلرینە اعادە ایدیلمش. یاقیندە، مرسین ولایتنڭ طرسوس قضاسندە، ضابطە بر چوق رسالۀ نور پارچەلرینی الە كچیرمش، آنقرەیە كوندرمش. آنقرەدن اعادە امری كلمش و صاحبلرینە اعادە ایتمكلە برابر اللرینە "بو اثرلر سربستدر. هر یردە اوقونابیلیر" دییە وثیقە ویرمشلر. یعنی حكومتڭ بر ولایتی "بو اثرلر سربستدر" دییور. دیگر بر ولایتی "یاساقدر، لائیكلگە آیقیریدر" دییە محكمەیە ویرییور. بو ایشتە مدهش بر تضاد واردر. بناءً علیه، محكمەنڭ اوّلجە برائت ایتمش بر اثری شیمدی یڭیدن الە آلمسی و بو ایشدن آڭلامایان

اهل وقوفلرە تدقیق ایتدیریلمەسی یولسزدر. اهل وقوف، رسالۀ نوری بر دوقترین اولارق قبول ایدییور. رسالۀ نور مؤلّفڭ اثریدر. و قرآن كریمڭ حقیقتلرینی ایضاح ایتمكدەدر. شخصی بر دوقترین دگلدر. داها بویلە مسئلەنڭ اساسنی قاورامایان بر اهل وقوفە راپور تنظیم ایتدیرمك، بزم حقوقمزڭ ضَیاعە اوغرامەسنە سببیت ویرمكدر. اوّلكی محكمەلرڭ بر تمییز لایحەسندە و تستّر رسالەسنڭ بر حاشیەسندە استادیمز دییوركە:

"بیڭ اوچ یوز اللی سنەدە و هر عصردە اوچ یوز اللی میلیون انسانلرڭ حیات اجتماعیەسندە اڭ قدسی و حقیقی و حقیقتلی بر دستور الٰهی یی، اوچ یوز اللی بیڭ تفسیرڭ تصدیقلرینە و اتّفاقلرینە استنادًا و او بیڭ اوچ یوز اللی سنە ظرفندە كچمش اجدادیمزڭ اعتقادلرینە اقتداءً تفسیر ایدن بر آدمی محكوم ایدن حقسز بر قراری، البتە روی زمیندە عدالت وارسە، او قراری رد و بو حكمی نقض ایدەجكدر!" دیمكدەدر.

خلاصە، اوچ محكمەدەكی اهل وقوف راپورلرینڭ تدقیق ایتدیریلمەسی و بو اثرلر دفعەلرجە محكمەدن كچدیگنە و برائت قزاندیغنە كورە، یڭیدن حقّندە بر حكم ویرمەنڭ قانونسز اولدیغنی و اساسًا بو محكمەنڭ ردّینە قرار ویریلمسی لازم كلدیگنی عرض ایدرز.

امرطاغ نور طلبەلرندن

سلیمان حمزە احمد عبد اللّٰه محمد صادق طاهر

[٦١١]

(١٩٥٢‘دە استانبولدە كورولن كنچلك رهبری محكمەسنە، اهل وقوفە جوابًا ویریلن اعتراضنامەدر.)

استانبول امین أوڭی برنجی آغیر جزا محكمەسنە،

رسالۀ نور اجزالرندن كنچلك رهبرینڭ طبعی و انتشاری مناسبتیلە، مؤلّفی بدیع الزّمان سعید النّورسینڭ محكمەیە ویریلدیگنی و كنچلك رهبرینڭ ماهیّتی ایچون بیلیر كیشی نامیلە، حقیقتلری تمامًا دینسز و اسلامیت دوشمانلری ماهیتندە مطالعە ایدوب، صوچ موضوعی چیقاران اهل وقوفڭ راپورینی اوقودق.

١٣٠ پارچەدن متشكّل، ایمان، علم و فضیلت خزینەسی حكمندەكی رسالۀ نور كلّیاتندن بو كنچلك رهبری بر جزئی اولمسی و رسالۀ نوردەكی یوكسك حقیقتلرە روح و جانلریلە باغلانارق، او اثرلر خزینەسنی بو ملّتڭ مادّی معنوی- حیاتندە بر سعادت رهبری اولدیغنی اثبات ایدوب بیلدیگمزدن، رهبرڭ علیهندەكی او بیلیر كیشی اسنادلرینی رد و اهل وقوفڭ وقوفسزلقلرینی بتون قوّتمزلە یوزلرینە چارپارق اعلان و اثبات ایدییورز. و محكمە هیئتنە عرض ایدییورزكە:

ویریلن اهل وقوف راپوری، وطن و ملّتڭ حیاتنە، تاریخنە، عنعنەسنە، مقدّساتنە، قانوننە تمامًا یبانجی، حال حاضر قانونلرە افترا ایدن، حكومتی تحقیر ایدن، بیڭ ییللق بو ملّتڭ تاریخنی تزییف ایلە بتون بر ملّتڭ اجدادینی

تحقیر ایدن و بوكون بو وطندە یاشایان یگرمی میلیون قرداشلریمزڭ معنویاتنە تعرّض ایدن بر سٓوء قصدڭ اورنگیدر. محكمەء عدالت، بو راپوری نظر اعتبارە آلمسی غیر ممكندر.

ایشتە بز دە، بیلیر كیشی اسمنی آلوب بو سٓوء قصد وثیقەسنی امضا ایدنلرە صورییورز: بو ملّت، حاشا، دینسزمیدر؟ بو ملّت، یوز ییللر بوینجە دیندن و ایماندن، حاشا، محروم بر وضعیتدە یاشامش اڭ سفیه بر ملّتمیدر؟ بو ملّت و بو ملّتڭ پارلاق تاریخنی آلتونلە یالدیزلایان بر اجداد، بتون حیاتلرینی دنیایە سفاهت و ضلالت طاغیتان كفر یولی اوزرندەمی یورومشلر؟

استانبولی فتح ایلە دنیا حیاتندە یڭی بر دور آچان و شرقە-غربە قرآنڭ بایراقدارلغی وظیفەسیلە نور هدایت، علم و فضیلت صاچان، آوروپەیە حقیقی مدنیّتی درس ویرن و اسلامی مدنیتڭ ضیاسیلە بشریتی آیدینلاتان و قوس قوجە بر تاریخ، اونلرڭ قهرمانلغیلە طولی اولان ییلدیریملر، فاتحلر، سلیملر و سلیمانلر و اونلرڭ منسوب اولدیغی بر ملّت، یازدیغنڭ تمامًا عكسنە اولارق، معنویاتی سونمش، دیندن خبری یوق، اسلامیتی نشر ایدن باشقە ملّت، او قوماندانلر باشقە بر ملّتڭ تاریخندە، تاریخ یالان سویلەیور، توركلر اسلامیتڭ قهرمانی اولارق قرآنڭ بایراقدارلغنی بتون ملّتلر اوستندە بر شرف تاجی اولارق طاشیدقلری یالاندر، اویلەمی؟ ویاخود بو ملّت،

حقیقت اسلامیەدن آلدیغی بر درس ایلە، قادینلرینی و قیزلرینی آداب قرآنیە زینتیلە زینتلندیروب قادینلغڭ حیثیت و شرفنی محافظە ایدرك، اونلرڭ عادی و قیمتسز اولمەلرینە مانع اولدیغی، یالان! اوزون عصرلردە اسلام تورك- قهرمانلری نامیلە معروف اولمش و اخلاق و ناموسڭ، حیثیت و شرفڭ كمالنە یتیشمش بیلدیگمز و افتخار ایتدیگمز اجدادیمز، آننەلریمز، بزم افتخاریمزڭ عكسنە اولارق امر قرآنە اتّباع ایتمەمشلر، كوزللگڭ حقیقتنی تربیۀ اسلامیە دائرەسندە آداب قرآنیە زینتیلە زینتلنمك دگل، وجودلرینی چیپلاق اولارق تشهیر ایتمكدە بیلمشلر، اویلەمی؟

ای اهل انصاف و ای تاریخیلە، مقدّساتیلە، قهرمان و مبارك اجدادیلە افتخار ایدن نسل حاضر! كلیڭز، كوریڭز. تاریخڭزی و اسلامیتڭزی تحقیر ایدن بر سٓوء قصد وثیقەسنی یازان و امضا ایدنلرە، حیاتڭزڭ حیاتی، روحڭزڭ روحی بیلدیگڭز اسلامیتڭز نامنە.. و كائناتی اون درت عصر ایشیقلاندیران و قدسی و الٰهی دستورلریلە بیڭ سنەدنبری میلیونلر اجدادیڭزی نورلاندیران و ابدی سعادتە سوق ایدن قرآنڭز نامنە.. و دستور قرآنە اتّباع ایدن یوز میلیون اجدادیڭزڭ نامنە.. اخلاق حسنە و ناموس محافظەسی یولندە اسلامی تربیەنڭ ضیاسیلە نورلانان و تربیە آلان و قادینلغڭ حقیقی معناسنی و حقیقی كوزللگنی یاشاییشلریلە و كییینیشلریلە و حیاتلریلە كوسترن آننەلریڭزڭ و ننەلریڭزڭ و همشیرەلریڭزڭ نامنە.. او مفتریلرە،

او تزییف و تحقیر صاوورانلرە تأسّفڭزی و تكدیریڭزی و ردّیڭزی بیلدیریڭز.

ایشتە او مفتریلر، یاشی سكسانی بولمش، زهرلردن شدّتلی خستە، دینی خدمتندن طولایی عمری حپسخانەلردە چوروتولمش بر اسلام قهرمانڭز.. شیمدی بتون منوّرلرڭ و چوق ادیبلرڭ و تربیەجیلرڭ، وطن و ملّتپرورلرڭ شكایت ایتدكلری اخلاقسزلغڭ و فحش تهلكەسندن محافظە ایچون كنچلرە أیی اخلاق و یوكسك ناموس، ایمان و فضیلت درسی ویرن، وطنە و ملّتە بر عضو نافع حالنە كلمەلرینی تأمین ایدن، عدالت و آسایش لهندە اڭ برنجی قوّت اولارق، مملكت و ملّتڭ سعادتنە خدمت ایدن كنچلك رهبری آدلی اثرینڭ مصادرەسنە و مؤلّف محترمنڭ محكومیتنە سبب اولمق ایچون دییورلر:

"بدیع الزّمان تستّر طرفداریدر. قادینلرڭ یاری چیپلاق، آچیق طولاشمەلرینە، اسلامیتە قارشو محاربەدە شیطان قوماندەسنە ویریلن فرقەلر اولارق تصویر ایتمكدە.. قادینلرڭ بوكونكی اجتماعی حیاتدە آچیق باجاق و یاریم چیپلاق كییینمەلرینی كناه صایمقدەدر. بدیع الزّمان، حال حاضر بو آچیق، یاریم چیپلاق كییینیشلری أولنمەلرە مانع اولوب، فحشە تشویق ایدیجی ماهیتندە كورمكدەدر. و یینە بدیع الزّمانە كورە، قادینی كوزللشدیرن شی و قادینڭ حقیقی و دائمی كوزللگی اجتماعی حیاتدە یر آلان سوسلنمك، وجودلرینی تشهیر ایتمك اولمایوب،

تربیۀ اسلامیە دائرەسندە آداب قرآنیە زینتیدر. بدیع الزّمان دینی تدریسات طرفداریدر. رسالۀ نور آدینی ویردیگی دینی تدریسات سایەسندە محكوملرڭ اون بش هفتەدە اصلاح اولاجقلرینی كە (، بو حقیقت دڭزلی و آفیون حپسخانەلری.. و عدلیەنڭ، غاردییان و مدیرلرینڭ شهادتیلە ثابتدر) سویلەمكدەدر. بدیع الزّمان، جاذبەدار بر فتنەیە اسیر اولان كنچلرڭ دین حقیقتلریلە و نورڭ ایمانی درسلریلە قورتولاجقلرینە قانعدر. ایشتە بو فكرلریلە صوچلیدر. قانونًا محكوم ایدیلمسی لازمدر "دییورلر. ایشتە بونلر، كویا اهل وقوف نامندە، مملكت كنچلگنە عدالت و حق و حرّیت درسلرینی ویرەجك پروفەسورلر ویا حقوق دوچنتلریدر.

ایشتە ای عدالت حقیقیەنڭ ممثّللری صفتیلە حقوق عمومیەیی و حیثیت ملّیەیی محافظە ایدن حاكملر! كنچلك رهبرینڭ ایمانی درسلری و اخلاقی تلقینلری، اهل وقوف راپورندەكی كبی بر صوچ موضوعی اولارق قبول ایدیلییورسە و مؤلّفی بو بیوك خدمتندن طولایی مسئول طوتولویور ایسە، اگر اویلە ایسە، او زمان یوقاریدە عرض ایتدیگمز بو ملّت، بیڭ ییللق تاریخنە، عنعنەسنە، اداری و عرفی قانونلرینە، بو ملّتڭ ابدی مدار افتخاری اولمش مقدّس دیننە، مقدّس اسلامیت حقیقتلرینە، قدسی قرآن درسلرینە و قدسی حقیقتلرە صاریلارق اسلامی مدنیّتی كمال شعشعە ایلە دنیایە اعلان ایدن بر عزیز اجدادە و اونلرڭ حیثیتنە، حقوقنە، معنویاتنە صاورولان تحقیر و تزییفلری

و ایندیریلن ضربەلری و سویلنن ایگرنچ افترالری قبول ایتمەڭز لازمدر. بو بیوك معنوی جنایتلری خوش كوروب قبول ایتمكلە، اسمی اهل وقوفلرڭ، صوچ اسناد ایتدكلری كنچلك رهبری صوچ صاییلابیلیر. و آنجق او جهتلە مؤلّفی محكوم و رهبری نشر ایدن طلبەلری مؤاخذە اولونابیلیر. یوقسە عدالت قانون و حرّیت فكر و وجدان دستوریلە محكومیتی و محاكمەسی ممكن دگلدر. حرّیت فكر و حرّیت وجدان دستورینی اڭ كنیش معناسیلە تطبیق ایدن جمهوریت ادارەسنڭ دموقراسی قانونلریلە اصلا قابل تألیف دگلدر.

اگر كنچلك رهبرینڭ انتشاریلە، دینی تربیە درس ویریلییور، بو ایسە لائیكلگە آیقیریدر دییە اتهام اولونورسە، او حالدە لائیكلگڭ معناسی نەدر؟ بز دە صورییورز. لائیكلك، اسلامیت دوشمانلغیمیدر؟ لائیكلك، دینسزلكمیدر؟ لائیكلك، دینسزلگی كندیلرینە بر دین اتّخاذ ایدنلرڭ دینە تعرّض حرّیتیمیدر؟ لائیكلك، دین حقیقتلرینی بیان ایدنلرڭ و ایمانی درسلری نشر ایدنلرڭ آغیزلرینە كلید و اللرینە كلبچە اوران استبداد مطلق دستوریمیدر؟

لائیكلك، حقیقی معناسیلە تام بر وجدان و فكر حرّیتی اولدیغنە كورە، دینسزلر و دین دوشمانلری، اسلامیت علیهندە هر چشیت هجوملری و تعرّضلری یاپار، آنارشیك فكرلرینی او حرّیت وجدان و فكر بهانەسیلە نشر ایدر دە، فقط بر اسلام عالمی، او حرّیت فكر دستورینە استنادًا، بیڭ ییلدنبری اسلامیتڭ سرداری اولمش بر ملّت ایچندە و او ملّتڭ بیڭ ییللق عنعنەسنە، قانوننە

اتّباع ایدرك و یینە او ملّتڭ سعادتی اوغرندە، اخلاق و ناموسڭ محافظەسی یولندە دینی بر درس بیان ایتمسی لائیكلگە آیقیریدر دییە صوچلی كوستریلیر، دولتڭ نظاملرینی دینی اینانچلرە اویدیرمق ایستەیور دییە محقور كوستریلیر. بز بویلە بر غیر ممكنڭ، ممكن اولمەسنە احتمال ویرمییورز. عدالتڭ بوڭا مساعدە ایتمەیەجگنی شبهەسز بیلییورز.

حقیقت حال، كچن محكمەلرڭ برائتلر ویرەرك تمامًا اعادە ایتدكلری رسالۀ نورڭ ١٣٠ پارچەسندن بر پارچەسی اولان كنچلك رهبری، وطن و ملّتڭ سعادتندە اڭ برنجی وسیلەلردن بریسیدر. او اثرلری اوقویوب، اونلرڭ درسلریلە سفاهت و ضلالتڭ كردابلرندن قورتولدقلرینی محكمەلردە سویلەین یوزلر نور طلبەلری و شیمدی بالذّات او اثرلرلە وطن و ملّتە نافع بر عضو حالنە كلدكلرینی حیاتلریلە و خدمتلریلە اثبات ایدن بیڭلر تورك كنچلری، بز، او اصلسز اسنادلری، او مفتریلرڭ یوزلرینە چارپییورز.

حقیقتًا نە قدر آجیدركە، آسایشڭ تأمیننە، اخلاقڭ محافظەسنە وسیلە اولمش، عدلیەیە و ضابطەیە بیڭلر فائدەسی بولونمش بر اثر، بوكون حقیقتڭ تمامًا عكسنە اولارق صوچلی كوستریلوب ضررلی توهّم ایدیلییور. آرتق بو قدر بدیهی بر ضدّیت قارشوسندە انصاف و وجدان صاحبلرینڭ وجدانلرینە و انصافلرینە حوالە ایدوب، استادیمز حقّندە او اهل وقوفڭ "دینی سیاستە آلت ایدییور" دیمەلرینە مقابل، بز دە دییورز: او اهل وقوف، عدلیەیی دینسزلگە آلت ایدییور.

بیلیر كیشی راپورندە بر اسناددە، "مؤلّف، رسالۀ نور شخص معنویسی نامنە قونوشمقدەدر. قلبە اخطار ایدیلدی، لیلۀ قدردە قلبە كلن بر مسئلۀ مهمّە كبی، بعض جملەلری الە آلارق بونڭلە شخصی نفوذ تأمین ایتمك مقصدینڭ مؤلّفدە بولوندیغیدر."

بو قدر اصلسز و معناسز بر اسناد قارشوسندە انسان، او بیلیر كیشی نامنی آلانلرڭ بیلیر كیشی ماهیّتندن تمامًا اوزاق اولدقلرینە حكم ایدوب، او جهالتلری و او وقوفسزلقلری قارشوسندە حیرتدە قالییورز. هیچ اولمازسە، اهل وقوف، حرمتًا بو جهتی دقّتلە مطالعە ایتسە ایدیلر، كندیلری بو درجە جهالت درەسنە آتیلمقدن بلكە بر درجە قورتولورلردی. بو اصلسز اسنادە قارشو، اوّلًا: بتون رسالۀ نور اثرلری و مكتوبلری و استادیمزڭ بتون حیاتی اڭ قطعی دلیلدركە، او عزیز ذات بتون غیرتنی، بتون خدمتنی حق اوغرندە و یالڭز حق ایچون یاپمش و یالڭز حقّڭ خاطری ایچون قونوشمش. او صورتا اهل وقوف، نور كلّیاتندن یالڭز كوچك بر جزئنی اوقومقلە و دینسزلكدە تعصّب كوسترەرك الّاكە بر صوچ اسناد ایدەبیلمك ایچون بو افترایی صاوورمشلر. حالبوكە او عزیز ذات، رسالۀ نور دائرەسنی ایضاح ایدركن دییور: "اڭ بیوك درسمز، عجز و فقر و شفقت و تفكّردر."

حقیقت حالدە او عزیز ذات، بیوك و كلّی خدمتلریلە، اڭ جانیانە اشكنجەلرە صبر و تحمّل ایدرك، مجاهدەء معنویەسندە دوام ایدوب، كفر و ضلالتڭ

بی امان هجوملرینی، مادّیون و طبیعیّونڭ كفری مسلكلرینی، قرآن حكیمڭ حقائق ایمانیەسندن آلدیغی نور حقیقتلریلە پارچەلایارق و او نورڭ ١٣٠ رسالەسنڭ یوز بیڭلر نسخەلرینی، ایمان درسلریلە اوڭا منّتدار قالان یوز بیڭلر مشتاق طلبەلریلە هر طرفە نشر ایدن.. دینسزلگڭ، بالخاصّە قومونیستلگڭ بو وطندەكی هجومنە مانع اولان ایمان حقیقتلرینی اڭ قطعی دلیل و برهانلرلە اثبات ایدرك كفر و ضلالتڭ باطل مسلكلرینی، قرآنڭ الماس قیلیجی حكمندەكی ایمان باللّٰه و وحدانیت الٰهیە حجّتلریلە پارچە پارچە ایدن.. و او نور اثرلری، شیمدی عالم اسلامڭ بیوك مركزلرندە كمال تقدیر و استحسانلە نشر ایدیلن و كچن سنە توركیەیی زیارتە كلن پاكستانلی بر وكیل، قرق اللی اونیورسیتە طلبەسنە:

"قرداشلرم، بن عالم اسلامدە آرادیغمی توركیەدە بولدم. بدیع الزّمان یالڭز سزڭ دگل، او بتون عالم اسلامڭدر. و یاقین بر زماندە بتون اسلام عالمی اونی آڭلایاجقدر. سز بو نور اثرلرینە دقّتلە باقڭ. بن بونی طقسان میلیون اسلاملر ایچندە نشر ایدەجگم. بنم عالم اسلام حقّندە پك چوق اندیشەلرم و استادە پك چوق صوراجقلرم واردی. بر ساعت قدر یانندە اونی دیڭلەمكلە بتون اندیشەلرم زائل اولوب، بتون سؤآللریمە جواب آلدقدن صوڭرە، شیمدی پاكستانە عالم اسلامڭ مقدّراتی حقّندە بیوك مژدەلرلە كیدییورم. بن تورك و اسلام تاریخنی تدقیق ایتدم. اوت، چوق قهرمانلر، چوق اسلام

فدائیلری و چوق وطنپرورلر كلمشلر. هپسی بیوك فداكارلق و قهرمانلقلە ملّتە، وطنە خدمت ایتمشلر. فقط او خدمتلرینڭ نتیجەسندە لایق اولدقلری مكافات اونلرە ویریلمش. هر بریسی برر مكافاتە مظهر اولمشلر. فقط بوكون استاد، یگرمی كسور سنەدنبری بو ملّتڭ سعادت دنیویەسی و اخرویەسی ایچون تعریفە امكان اولمایان ظلم و اشكنجەلر ایچریسندە، ایشتە بو اثرلری تألیف و نشر ایدرك، بو ملّت ایچریسندە دین علیهندەكی جریانلرڭ انتشارینە مانع اولان بدیع الزّمانڭ أوندە بوكون بر لامبەسی بیلە یوق. ایشتە او هر شیئی ترك ایدرك، یالڭز و یالڭز دینە خدمت ایچون چالیشمشدر. البتە عالم اسلام یاقیندە بویلە بر ذاتی اثرلریلە طانییاجقدر. "دییە علی اكبر شاه كبی بر اسلام عالمی و متفكّرینڭ تقدیر و تحسیننە مظهر اولان..

و شیمدی دموقرات ملّت وكیللرندن بعضیلری: "بدیع الزّمانڭ نور رسالەلرینی اوقویان و درس آلان و او اثرلری نشر ایدن نور طلبەلری، بو خدمتلریلە بو مملكتدە قومونیستلگڭ یاییلمەسنە سد اولدیلر. مادام حكومتمز قومونیزمڭ علیهندەدر. اویلە ایسە، نورجیلرە او خدمتلرندن طولایی منّتدارز" دییە ملّت وكیللرنجە دخی خدمتی تقدیر ایدیلن..

و سراپا بتون رسالۀ نور اجزالری هر بر نسخەسی، بیڭلر كلمە و جملەلریلە او ذاتڭ ماهیّتنە، خدمتنە، یگرمی بش ییللق فعّالیتنە و نشریاتڭ كلّی فائدەلرینە شهادت و اشارت ایتدكلری بر ذات..