اسپارطەنڭ كچن ییللردە تشكّل ایتمش بولونان اوچنجی اگیتیم تومنی ایچون یاپدیریلمەسنە قرار ویریلن جامعڭ تملی، ترتیب ایدیلن معظّم بر مراسملە آتیلمش و بو تورنە اسپارطەدە بولونان رسالۀ نور مؤلّفی استاد بدیع الزّمان سعید النّورسی حضرتلری دە دعوت اولونمشلردر. بیوك بر علاقە ایلە قارشیلانان استاد، تورندن صوڭرە اوغورلی اللریلە تملە ایلك خرجی قویمشلر و دعالردە بولونمشلردر.

[٧٠٥]

[عجیب بر حادثە]

استادیمز سعید النّورسیدە، بالخاصّە صوڭ زمانلردە بر حال واقع اولمشكە، قطعیًّا كیمسە ایلە قونوشمییور. حتّی بز خدمتجیلری ایلە دخی ایكی دقیقەدن فضلە قونوشسە بر حرارت باشلایور. بو عجیب حالتڭ سكونت بولمسی ایچون، آرا صیرە، بعض كونلر تبدیل هوا نیّتیلە قیرلرە چیقییور. هیچ بر غلبەلق یرە كیدەمییور. حتّی جامعە دە كیدەمییور. اوطەسندن چیقدیغی وقت، همن خصوصی اوطوموبیلنە [حاشیە]بر ویا ایكی خدمتجیسیلە بینر. بعضًا دە هفتەدە بر ویا ایكی دفعە كرا ایلە طوتدیغی اگیردیردەكی اوینە كیدییور. برقاچ ساعت قالدقدن صوڭرە یینە اسپارطەدەكی اقامتكاهنە دونویور.

بوكون دە یینە اگیردیرە كیتمشدی. تام اوینڭ اوڭندە بریسی راست كلدی و بزە خطابًا "درحال اسپارطەیە دونمەڭزی امر ایدییورم" دیدی. بز اوڭجە كیم اولدیغنی بیلەمدك. صوڭرە آڭلادقكە، اگیردیرە برقاچ كون اوّل وان ولایتنڭ بر قضاسندن كلن یڭی قائممقام ایمش. بز، "هانكی قانون ویا هانكی تعلیمات و نظامنامەیە استنادًا آرابەمزڭ اوڭنە كچوب شهرە كیرمەیی منع ایدییورسڭز؟" دییە بو كیفی و قانونسز حركتە مقاومت ایدەجگمز آندە، استادیمز سعید النّورسی بزی بوندن منع ایتدی. هم دە سعید النّورسی یە صارصیلماز بر باغلیلق و بیوك بر حرمتلری اولان شهرلی و كویلی اهالینڭ، خصوصًا پازار مناسبتیلە بوكون غلبەلق اولمەسیلە، قانون خلافنە حركت ایتدیریلن بر كیمسەنڭ یوزندن چیقاجق هر هانكی بر حادثەیی اوڭلەمك ایچون كری یە دونولمشدر.

شویلە قناعتمز كلدیكە: استادیمز سعید النّورسی سیاستە قطعیًّا قاریشمدیغی و انسانلرلە كوروشمدیگی حالدە، رسالۀ نورڭ آناطولی و شرق ولایتلرندە و حتّی عالم اسلامدە فوق العادە بر حسن قبول كورمسی و آنقرەدە حكومتڭ مساعدە و تأییدیلە بیوك مجموعەلرڭ رسمًا طبع ایدیلمسی و بتون محكمەلرندن برائت قزانمەسی سببیلە، رسالۀ نورلە علاقەدار اولان چوق بیوك بر كتلە دموقرات لهندە اولارق حركت ایتدكلرندن و بالخاصّە بو وضعیت شرق ولایتلرندە پك ظاهر مشاهدە ایدیلدیگندن، نور طلبەلریلە حكومتڭ مابیننی بوزمق ایچون بعض كیزلی زندیقلر و اسكی پارتی طرفدارلرینڭ پلانیلە

بو یڭی قائممقامی، آسایش و دین علیهندە اولان بویلە معاملەیە وسیلە یاپمشلر.

استادیمز اڭ جبّار فرعونلرە قارشو بیلە عزّت اسلامیەیی محافظە ایدوب باش اگمدیگی و حتّی اسارتی وقتندە روسڭ باش قومانداننە قیام ایتمەیەرك و اعدامی قبول ایدەجك درجەدە بر عزّت دینیەیی طاشیدیغی حالدە، بو مبارك وطندە آسایشە ضرر كلمەمك ایچون، اڭ كوچك بر ژاندارمەنڭ دخی حرمتسز و عصمتسز معاملەسنە سس چیقارمییور، صبرلە قارشیلایور. سببی دە قرآنڭ بر قانون اساسیسی اولان [وَلَا تَزِرُ وَازِرَةٌ وِزْرَ اُخْرٰی] سرّیلە، "بر آدمڭ جنایتیلە باشقەسی مسئول اولاماز" قرداشی دە اولسە.

سعید النّورسی رسالۀ نوری اوقویانلرە، خصوصًا بتون ولایات شرقیەدەكیلرە نور درسلریلە دیمشكە: "داخلی آسایشە ایلیشمك، یوزدە اون جانی یوزندن طقسان معصومە ظلم و ضرر ایتمكدر. اونڭ ایچون، رسالۀ نوری اوقویانلرە ایلیشمك دگل، محافظە ایتسینلر." ایشتە بو سرّ ایچون سیاستە ایلیشمییور. آسایشی بتون قوّتیلە محافظەیە چالیشییور.

یینە بوكون دە، بو مؤسّف حادثەدن طولایی قائممقامە حدّت ایتمەمش، بالعكس سلام كوندرەرك حقّنی حلال ایتدیگنی بیلدیرمشدر. آسایش لهندە عزّتنی و ملّتڭ آخرتی ایچون دنیاسنی و حتّی لزوم اولسە آخرتنی فدا ایدن بویلە بر اسلام قهرمانی محترم بر اختیار مسافرڭ حقوقنی مدافعە قدرشناسلغی،

هركسدن اوّل مسافر بولوندیغی اسپارطە ولایتنڭ حكومتنە و دموقراتنە دوشمكدەدر.

١٥/٤/١٩٥٧ دموقرات نور طلبەلری نامنە

رشدی چاقین، محمد سوزر، محمد باباجان، طاهری موتلی، زبیر كوندوز آلپ

دوشونجەلرینڭ خالصانە اولدیغنی بن دە بیلمكدەیم. دموقرات ملّت وكیلی كمال دمیر آلای

[٧٠٦]

حسین عونی و تحسین طولە ایلە بر حسب حالدر.

بز نور شاكردلری استادیمزڭ خدمتندە و مسلگندە بولوندیغمزدن، سیاستلرلە علاقەمز یوقدر. فقط دموقراتلر، نورلرڭ نشرینە مساعدەكار اولمەلری و اسكیدنبری نورڭ منعنە دائر ظلملری یاپمدقلرندن، دموقراتڭ خاطری ایچون سچیملرلە علاقەدار اولدق. اوّلكی دفعە كبی بو دفعە دە نورجیلرڭ أپی فائدەسی، دموقرات لهنە اولدی. استادیمزە و نورلرە اڭ زیادە فائدەسی طوقونان اسكی عدلیە وكیلی حسین عونی و سڭیركند مبعوثی تحسین طولە، هركسدن زیادە قزانمەلری لازم ایكن قازانمامەلری، بزی چوق متأثّر ایتدی دییە استادیمزە سویلەدك. بزە دیدیكە:

متأثّر اولماییڭز. بن دە سزڭلە برابر اولارق اونلری تبریك ایتملی ییز. چونكە

ایكی سنە ظرفندە اللی سنە قدر حكومتە، وطنە، ملّتە، دینە، آسایشە خدمت ایتدكلرینە دلیل قطعی، كرامتكارانە استادیمزڭ اوڭا مراجعتی اولمادن "رهبرڭ" قورتولمەسنی آرزو ایتدیگی عین دقیقەدە، مصادرە ایدیلن ایكی یوز رهبرڭ بزە اعادەسنە امر ویرمسیلە، ایكی یوز بیڭ آدم رهبردن استفادە ایتمەسیلە اوڭا دعاجی اولمسی.. و تحسین طولەنڭ اهمّیتلی چالیشمەسیلە سوزلر مجموعەسی رسمًا آنقرەدە طبع ایدیلمەسیلە هم آسایشە، هم دموقراتە، هم بو وطن و ملّتە یوز سنە مبعوثلق ایتمك قدر فائدەسی اولدی. شیمدی بو قدر معنوی، حقیقی، خصوصًا باقی و اخروی كار اونلرە یتر. بر ایكی سنە مأموریت و مبعوثلغە چالیشمقلە او باقی الماس كبی خدمتلرینی، قیریلاجق فانی شیشەیە آلت یاپمامق كركدر. اونڭ ایچون بن اونلری تبریك ایدییورم. سز دە اونلری تبریك ایدیڭز، دعا ایدیڭز. حتّی بن تحسین طولەنڭ تكرار مبعوث اولمەسنی ایستەدم، [حاشیە]تا نورلرە خدمت ایتسین. فقط اونڭ اوّلكی خدمتی كافی كلییور. قاپویی آچمش، داها احتیاج قالمدی.

نور طلبەلرندن

محمد قیالر، خسرو، طاهری، صونغور،

زبیر، جیلان، بایرام

[٧٠٧]

[بِاسْمِهٖ سُبْحَانَهُ]

[وصیتنامەنڭ بر ذیلی]

اشرف ادیبڭ نشر ایتدیگی تاریخچۀ حیاتڭ اوتوزنجی صحیفەسندەكی سعیدڭ خصوصیتلرندن آلتی نمونەسندن یدنجی نمونەسیكە، مقابلەسز هدیەیی عمرندە قبول ایتمەمك، قناعت و اقتصادە استنادًا، شدّت فقریلە برابر آلتمش یتمش سنە اوّلكی كندی طلبەلرینڭ تعییناتنی دە كندیسی ویردیگی عجیب وضعیتڭ شیمدیكی بر مثالی و بر سرّی قاچ سنەدر آڭلاشیلدی دییە وصیتنامەنڭ آخرندە بونی یازمەنڭ زمانی كلدی.

اوت، شدّت فقر و استغنا ایلە هدیە آلمامقلە برابر، جناب حقّە حدسز شكر اولسونكە، یاساق اولمایان داقتیلو ماكینەسی ایلە انتشار ایدن رسالۀ نورڭ ویردیگی سرمایە ایلە، شیمدی معنوی مدرسة الزّهرانڭ درت بش ولایتندە حیاتنی رسالۀ نورە وقف ایدن و نفقەسنە چالیشمەیە زمان بولامایان فداكار نور طلبەلرینڭ تعییناتنە عجیب بر بركتلە كافی كلن و نور نسخەلرینڭ

فیئٓاتی اولان او مبارك سرمایەیی بن ئولدكدن صوڭرە دە او خالص، فداكار قرداشلریمە وصیت ایدییورمكە، آلتمش یتمش سنە اوّلكی قاعدەمی یتمش سنە صوڭرەكی شیمدیكی دستورلریمە عینًا تطبیق ایتسینلر. ان شٓاء اللّٰه رسالۀ نورڭ طبع سربستیتی اولسە، او دستور داها فضلە انكشاف ایدر.

مدار حیرتدركە، او اسكی زماندە اوقافدن بش طلبەنڭ تعییناتنی واندە اسكی سعید قبول ایتمش. او آز پارە ایلە بعضًا طلبەسی یگرمی یە، اوتوزە، آلتمشە قدر چیقدیغی حالدە، كندی طلبەلرینڭ تعییناتنی كندیسی ویرییوردی. او قناعت و اقتصادڭ بركتیلە و كندی بش آلتی ماوزر تفنكنی صاتمقلە استغنا قاعدەسنی بوزمدی. او زمان مرحوم طاهر پاشا كبی چوق یاردیمجیلر واركن قاعدەسنی بوزمدی. او آلتمش یتمش سنەلك دستور حیاتنڭ بر اشارت غیبیە ایلە آلتمش یتمش سنە صوڭرە او قناعت و استغنانڭ بر میوەسی عنایت الٰهیە ایلە احسان ایدیلدیكە، او قدر محكمەلر و یاساقلر و مصادرەلر و اسكی حروفلە اذن ویرمەمكلە برابر، قاچ سنەدر درت بش ولایت وسعتندەكی معنوی مدرسة الزّهرانڭ فداكار طلبەلرینڭ تعییناتنی رسالۀ نور كندیسی هدیە ایتدی.

حالبوكە او نسخەلرڭ بر قسم مهمّنی هدیە اولارق مقابلەسز اطرافە و عالم اسلام و آوروپەیە كوندردیگی و الندەكی نفقەسنی نورڭ تكثیرینە صرف ایتدیگی حالدە، یینە نورڭ نسخەلری عجیب بر طرزدە هم كندینە، هم او خالص

فداكارلرینە كافی كلمەسی، اسكی زماندەكی اشارت غیبیەسنڭ بر كوزل میوەسی و بر حكمتی اولدیغنە قطعیًّا قناعتم كلدیگندن، وصیتنامەمڭ آخرندە بیان ایدییورم.

بو وصیتنامە، بندن صوڭرە باقی قالان تعیینات ایچندە دە قونولسون، تاكە بعض انصافسز انسانلر، "بو سعید كوندە بش اون غروشلە یاشادیغی و كیمسەدن پارە آلمدیغی حالدە، شیمدیكی میراثی یوزر لیرە كورونویور، نرەدە بولدی؟" دیمەمك ایچون بو حقیقتی اظهار ایتمك مناسب اولور.

شیمدی معنوی اولادلرم، فداكار خدمتكارلرم اولان زبیر، جیلان، صونغور، بایرام، حسنی، عبد اللّٰه، مصطفی كبی و خاص و خالص نورڭ قهرمانلری اولان خسرو و نظیف، طاهری، مصطفی كُل كبی ذاتلرڭ نظارتندە او دستوریمڭ محافظە ایدیلمەسنی وصیت ایدییورم.

سعید النّورسی

[٧٠٨]

[بعض غزتەلردە چیقان یالانلر حقّندەكی بر تكذیبی برای معلومات كوندرییورز.]

بعض مخالف غزتەلر، رسالۀ نور طلبەلرینە تكرار "طریقت قورمشلر" اتهامنی یاپدقلرینی كوردك. بونڭ حقیقتلە هیچ بر علاقەسی یوقدر. بو خصوص رسالۀ نور دعواسنی كورن اونە یاقین آغیر جزا محكمەسنڭ قطعیت كسب ایتمش

قرارلریلە ثابتدر. هم طریقتە دائر اڭ كوچك بر امارەیە، وقتیلە مصادرە ایدیلوب صوڭرە بلا قید و شرط صاحبلرینە اعادە ایدیلن رسالۀ نور كتابلری و مكتوبلری آراسندە تصادف ایدیلمەمشدر. بالعكس استادیمز سعید النّورسینڭ مكتوبلرندە و مدافعەلرندە قطعی بر لسانلە بیان ایتدیگی: "زمان، طریقت زمانی دگل، ایمانی قورتارمق زمانیدر. طریقتسز جنّتە كیدن پك چوق، فقط ایمانسز جنّتە كیدن یوقدر" افادەسی موجوددر. بو صراحتە و بتون محكمە و مدّعی عمومیلرڭ اوتوز سنەدنبری طریقت خصوصندە اڭ كوچك بر دلیلە تصادف ایدەمەمەلرینە مقابل، دینی اورتەدن قالدیرمق ایستەین و بوكونكی اسلامی انكشافی بر تورلی هضم ایدەمەین، دینە لاقید، حتّی علیهندەكی بر كروه، حقیقت اسلامیتە طریقت نامنی ویروب كندی افكارلری لهنە بو وطندە بر زمین احضار ایتمك پشندەدرلر. البتە هر دفعەسندە اولدیغی كبی، كیزلی دینسزلرڭ انتریقەلری ایلە، پلانلری ایلە احداث ایدیلن بو واقعە، بو وطن و ملّتڭ لهنە اولارق تجلّی ایدەجكدر. و آیدین و نازللی محكمەلری دە، عدالتلی سلفلرینە اتّباعًا نور شاكردلرینی تبرئە ایدەجكلردر.

رسالۀ نورڭ بتون وطن سطحندە و حتّی عالم اسلام و آوروپەنڭ پك چوق یرلرندە حسن قبولە مظهر اولمسی و توركلری عالم اسلاملە اسكی اتّحادە موفّق ایدەجك بر دنیوی ثمرەسی نور شاكردلرینڭ نیتلرندە اولمادن نتیجە ویرمسی و حكومتڭ بالذّات اسلامیتە، دینە، وجدان حرّیتنە تام قیمت ویروب اسكی

حكومتڭ تخریباتلرینی تعمیرە چالیشمەسی و مقدّساتە تجاوز ایدنلرڭ تنكیلی حقّندە بر قانون چیقارمغە تشبّثی كبی مثبت و فرحلاتیجی پك چوق حادثاتڭ عین آنندە او اصلسز مسئلەنڭ احداثی، حكومتڭ و اسلامیتڭ علیهندە اولانلرڭ محصولی اولدیغندە اصلا شبهە ایتمییورز.

یالانلرینڭ برقاچ دلیلی دە شونلردر:

استادیمز سعید النّورسی ایچون "بر شاه و بر پادشاه كبی یاشامقدە و كلن یاردیملرلە كچینمكدەدر" دییە او وجدانسزلر آپ آچیق بر افترادە بولونمشلردر. سعید النّورسی، عمجەسنڭ چوربەسنی دخی ایچمەمش اولوب، حیاتندە كیمسەنڭ منّتی آلتندە قالمایوب، بش بیڭ لیرە هدیەیە بش پارە دگر ویرمدن رد و اعادە ایدن، حیاتندەكی استغنا دستورینی اڭ ظالمانە معاملەلر و محرومیتلر ایچندە قالدیغی زمانلردە دخی بوزمایان و بویلەجە عزّت اسلامیە و شرف دینیەیی محافظە ایتمش اولان بر ذاتدر.

اوت، استادیمزڭ خلقلرڭ هدیەسنی قبول ایتمەمك دستوری، سكسان سنەلك حیاتی ایلە ثابت اولدیغی و اوتوز سنەلك متعدّد محكمەلردە دخی وثیقەلرلە تحقّق ایتمش، دوست و دوشمانڭ كوزلری اوڭندە ظاهر اولمشدر. بو بدیهی حقیقتڭ هركسجە بیلیندیگی بر زماندە، بویلە اتهامدە بولونانلرڭ نە قدر دهشتلی غرضكار اولدقلرینی اهل وجدانڭ تقدیرلرینە بیراقییورز.

آنقرە حكومتنڭ عدالتیلە استادیمز سعید النّورسینڭ رسالۀ نور اثرلری

باصیلمقدەدر. حصّەسنە دوشن بر مقدار كتاب فیئٓاتلرینی، استادیمز، حیاتنی نورلرە وقف ایدوب نفقەسنی چیقارامایان نور طلبەلرینە تعیین اولارق ویرمكدەدر. كندیسی دە، بوكون آرتق هركسڭ معلومی اولمش اولان اعظمی بر اقتصاد و قناعتلە یاشامقدەدر. و بتون عمری بوینجە فوق العادە بر اقتصاد دائرەسندە كندینی ادارە ایتدیگنە، سكسان سنەلك حیاتنی بر شاهد صادق اولارق كوسترییورز.

خلقی دموقرات حكومت علیهنە كچیرمك پلانلرینی تعقیب ایدن مختلف غزتەلرڭ دیگر بر ظاهر یالانلری ایسە، نازللیدە ایكی مبارك آدمڭ رمضان شریف حقّندەكی حسب حالنی، اسلامی بر دولت قورمق كبی سیاستواری بر طرزدە تبدیل ایدیویرمەلری، او ساختە سیاست بزركانلرینڭ، چوجقلری دخی قاندیرامایاجقلری عجمیجە بر افترا و بر اویدیرمەلرندن عبارتدر. بویلە یالانلری یاپمقلە هانكی مقصدلرینڭ استحصالنە چابەلادقلری، كیمسەنڭ مجهولی دگلدر.

نازللی یە هیچ كیتمەمش اولان، اورادە بر كیمسەیی طانیمایان، قرق سنەدنبری (اَعُوذُ بِاللّٰهِ مِنَ الشَّیْطَانِ وَمِنَ السِّیَاسَةِ)دییوب، سیاستلە علاقەسنی كسن، یالڭز و یالڭز قرآن و ایمان حقیقتلریلە ایمانی قورتارمق دعواسنە عمرینی حصر ایدن، بونڭ خارجندە دنیوی شیلرلە علاقەدار اولمایان، سكسان یدی یاشندە، دائما یاتاقدە اولان، زهرلی خستەلقلرڭ تأثیراتیلە ئولوم نوبتلری كچیروب "قبر قاپیسندەیم" دیین و سكونت و استراحتە پك محتاج اولان سعید النّورسی كبی بر اسلام مؤلّفنی،

بویلە سیاسی افترالرلە موضوع بحث ایتمك، چوق وجهلرلە وجدانسزلقدر، مدهش بر غدّارلقدر، عادی بر یالانجیلق دركەسنە سقوطدر.

هر هانكی بر دین عالمنە، بر بهانە ایلە پیغمبرلك اسنادینی یاپمق، طوغریدن طوغری یە اسلامیتە بر تعرّض و قرآنە بر اهانتدر.

استادیمز سعید النّورسی، بتون عمری مدّتنجە سنّت سنیّەیە اتّباع ایتمش و بر سنّت سنیّەیە مخالف حركت ایتمەمك ایچون اعدام جزالرینی هیچە صایمش و سنّت سنیّەیی احیا و ایمانی محافظە اوغرندە یوز اوتوز پارچە اثر تألیف ایتمشدر. خونخوار دین دوشمانلرینە قارشو حیاتنی استحقار ایدرك مجاهدە ایتمش و نهایت موفّق و مظفّر اولمشدر. اوت، اتّباع سنّت احمدیەیەؐ دائر یازدیغی بر اثری، اوتوز سنەدنبری بیڭلرجە نسخە نشر اولمشدر. فخر كائنات رسول اكرم (علیە الصّلاة والسّلام ) افندیمزڭ صوڭ و حق پیغمبر اولدیغنە دائر معظّم بر اثری اولان معجزات احمدیەؐ كتابی دە میداندەدر. حقیقت حال بویلە اولدیغی حالدە، سعید النّورسی یە بویلە بر اتهامی یاپانلرڭ، حق و حقیقتدن، انصاف و وجداندن نە قدر اوزاق اولدقلری قیاس ایدیلسین. بو اتهامی یاپمق، شیطانلرڭ بیلە خاطرندن كچمز.

بو حادثەنڭ بر سببی شو اولمق قویدركە، رسالۀ نور، عائلە حیاتنە بیوك بر فائدە ویروب خانملرڭ عفّت و ناموس و عصمتلە و سعادتلە حیات كچیرمەلرینی تأمین ایتدیگندن، قادینلر رسالۀ نورە چوقلقلە رغبت كوسترمكدەدرلر.

بوڭا بر حسن مثال اولارق، خانملرڭ نشر اولونان برقاچ مقالەسنی دین دوشمانلری كورمشلر و بولشویكلك حسابنە بر طاقیم اویدیرمە بهانەلرلە هجومە كچمشلردر. فقط اصلا موفّق اولامایاجقلردر. اونلرڭ مقصدلرینڭ تام عكسنە اولارق، رسالۀ نورڭ نشریاتی اركك و قادینلر آراسندە خارقە بر طرزدە انكشاف ایتمكدەدر و ایدەجكدر.

خستەلغی مناسبتیلە خدمتندە بولونان

طاهری، زبیر، جیلان، بایرام، صونغور، رشدی

[٧٠٩]

[بِاسْمِهٖ سُبْحَانَهُ]

اڭ مهم بر محكمەدە صوڭ سوزم اولارق "محكمۀ كبرایە شكوا" نامیلە یازیلان و تاریخچۀ حیاتدە برقاچ دفعە نشر اولونان و محكمەدە ایكن آنقرە مقاماتنە، تمییز محكمەسنە و محكمە رئیسلرینە كوندریلن شكوانڭ سببی او حادثەنڭ عجیب، غریب، كوچك بر نمونەسی، بو دفعە عینًا باشمە كلدیگی ایچون، او "محكمۀ كبرایە شكوایە" بر حاشیەجك اولارق بیان ایدییورم:

ایكی كون اوّل چوق مشتاق اولدیغم و اسكی زماندە آناطولی مدرسەء علمیەسی حكمندە اولان قونیەیە اوچ سبب بهانەسیلە..

[بری] ایكی حقیقتلی نور قرداشم، فقیر حاللریلە برابر بیوك بر مصرفە كیروب ازمیر محكمەسنە كیتمشلر. دونوشلرندە یانمە اوغرادیلر. بن دە اونلری قسمًا مصرفدن قورتارمق ایچون، خصوصی اوطوموبیلم ایلە قونیەیە قدر برابر آلمق.

[ایكنجیسی] اون بش سنە بنم یانمدە اوقومش و یگرمی سنەیە یاقین مفتیلك ایتمش و قرق سنەدنبری بر تك دفعەدن باشقە كورمدیگم و بتون قرداشلرم، اقربالرم ایچندە حیاتدە بر او قالمش اولان قرداشمی و چوجقلرینی زیارت ایتمك و اونلرلە كوروشمك.

[اوچنجیسی] اسكی سعیدڭ و یڭی سعیدڭ مهم استادلرندن اولان و اونڭ مریدلری اولان مولویلرڭ هر یردە رسالۀ نورلە علاقەدارلقلری جهتیلە چوق علاقەدار اولدیغم و امام ربّانی، امام غزالی كبی مهم بر استادم اولان مولانا جلال الدّینی زیارت ایچون كیتمشدم. هم تاریخچۀ حیاتدە، انسانلرلە كوروشەمدیگمە دائر نشر ایدیلن یازیكە، زیارتجیلرلە كوروشەمییورم. ناصلكە، هدیەلردن منع ایتمك ایچون جناب حق خستەلق ویردیگی كبی، بو حرمتكارانە زیارت دە بر نوع هدیەء معنویە اولدیغندن، سسم كسیلوب بر اثر عنایت اولارق قونوشمقدن منع اولوندیغمدن قرداشمڭ اوینە دخی كیدەمدمكە، قونوشمایایم.

هیچ اولمازسە قونیەدە ایكی اوچ كون قالمق ضروری ایكن، مجبوری اولارق بر ساعت ایچندە نمازیمی قیلوب دونمشم. فقط اورادە بڭا بردنبرە اویلە بر وضعیت ویریلدیكە، بتون غزتەلردە نشر ایتدیلر. قرق سنەدر بر دفعەدن باشقە كوروشمدیگم قرداشمڭ اوینە دخی كیدوب كوروشەمدیگم و قونوشامدیغم حالدە، صانكە بیڭلر آدملرلە كوروشمشم كبی معاملە كوردم.