[٥١٨]

تلغراف

آنقرە تلغراف نومرەسی: ٢٣٥٤٦ / تاریخ: ٢٧/٥/١٩٥٠ / ساعت: ٩

(استادیمزڭ تبریك تلغرافنە، رئیس جمهور جلال بایارڭ تلغرافلە ویردیگی جوابدر)

بدیع الزّمان سعید النّورسی، امرطاغ

صمیمی تبریكلریڭزدن فوق العادە متحسّس اولدم، تشكّرلر ایدرم.

جلال بایار

[٥١٩]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] سكسان كسور سنە عبادتلی بر عمر باقی یی تأمین ایدن رمضان شریفڭزی بتون روح و جانمزلە تبریك و هر كیجەسی بر نوع لیلۀ قدر حكمندە حقّڭزدە منفعتدار اولمەسنی نیاز ایدرز. و تشریك مساعی سرّیلە و هر خاص نورجی، عموم نورجیلرڭ معنوی قزانجنە حصّەدار اولمەسیلە، معنًا بیڭلر دیل ایلە عبادت و دعا و استغفار و تسبیحات یاپمغە حقیقی اخوّت و اخلاص ایلە مظهریتڭزی رحمت الٰهیەدن نیاز ایدییورز و اویلە دە امید ایدییورز.

[ثانیًا] رسالۀ نورڭ معنًا غلبەء تامّەسی ایلە برابر، ماصون قسمنڭ دینسزلری و قومونیستلرڭ زندیقلر قسمی، حبّەیی قبّە یاپوب بهانەلرلە نورلرڭ سربستیتنە مانع اولمغە چالیشییورلركە، یینە بو دفعە دە معناسز، سببسز، اوتوز بش كون

محكمەمزی تأخیر ایتدیلر. حتّی قرآنمزی ویرمەمك ایچون آووقاتمزلە دە كورولتو ایتمشلر. فقط عنایت الٰهیە، اونلرڭ بتون پلانلرینی عقیم بیراقییور. نورلر كمال احتشام ایلە استانبول و آنقرە منوّر كنچلرندە بیوك بر اشتیاق ایلە كندی كندینە انتشار ایدوب شاكردلرینە درس ویرییور. بو معنوی غلبەسنڭ بر نتیجەسیدركە، اذان محمّدینڭؐ اوقونمەسنە چالیشان باش وكیلە، یوزر امضا ایلە كنچ منوّرلر تشكّر و تبریك یازییورلر.

[ثالثًا] بورادەكی طلبەلر دە رمضان شریفڭزی تبریكلە برابر، كندیلرنجە پك چوق نمونەلر ایچندە اسكی قومونیستلرڭ اشكنجەلرندن بر ایكی نمونە یازوب لفًّا سزە تقدیم ایدییورلر. بلكە بر وقت بو مأٓلدە غزتەلردە بر مقالەیی دە نشر ایدەجكلر.

اَلْبَاقٖی هُوَ الْبَاقٖی

عموم قرداشلرم و همشیرەلریمە سلام و دعا ایدن و خستەلق سببیلە وظیفۀ عبودیتی تام یرینە كتیرەمەین و نورجیلرڭ معنوی یاردیملرینە و اونڭ بدلنە دعا ایتمەلرینە و معنوی قزانچلرینە محتاج، خستە قرداشڭز سعید النّورسی

[٥٢٠]

[بِاسْمِهٖ سُبْحَانَهُ]

خلق فرقەسی اقتدار پارتیسی ایكن، استادیمزە یاپیلان اشدّ ظلم ایلە یوزر قانونسز اشكنجەلرندن برنجی نمونەسی:

زمین یوزندە بو عصردەكی قدر مثلی كورولمەین بر زندقە جریاننڭ پلانلریلە استادیمزە یگرمی بش سنەدر استبداد مطلق ایلە یاپیلان ظلمڭ بر نمونەسی شودركە: نفس آلمق اوزرە قپالی آرابە ایلە قیرلرە كیتمك ایچون طیشاری یە چیقدیغی زمان، بورانڭ بیوك بر مأموری قیافتنە ایلیشمك ایستەمش. بو بش جهتدن قانونسز و بش وجهلە وجدانسزلق اولان حدسز جرئتكارلغە قارشو دیرزكە:

پادشاهڭ كوچك بر تحكّمنە تحمّل ایدەمەین و مشروطیت اعلانندە و "دیوان حرب عرفیدە محكمە رئیسی خورشید پاشایە و محكمە اعضالرینە جوابًا: اگر مشروطیت بر فرقەنڭ كیفی استبدادندن عبارت ایسە، بتون انس و جن شاهد اولسونكە، بن مرتجعم. شریعتڭ بر تك مسئلەسی اوغرندە، بیڭ روحم اولسە هپسنی فدایە حاضرم!" دیین و مجلس مبعوثاندە مصطفی كمالە قارشو: "نماز قیلمایان خائندر، خائنڭ حكمی مردوددر!" سویلەین و اسلامی قیافتی قطعیًّا و اصلا تبدّل ایتمەین..

و قیافتنە ایلیشمك ایستەین و صوڭرە كندی كندینی ئولدیرمكلە طوقادینی ییین نوزاد اسمندە آنقرە والیسنە: "بو صاریق بو باشلە برابر چیقار!" طرزندە قونوشارق بویننی كوسترمسیلە طوقونولمایان بر ذاتە.. هم اسپارطە، هم اسكیشهر، هم دڭزلی محكمەلری دخی باشنی آچدیرمدقلری و -صوڭ آفیون محكمەسی مستثنا- بیڭلرجە خلق و یگرمی پولیسلرڭ بولوندیغی صیرەلردە بیلە باشنی آچمەسی اخطار

ایدیلمدیگی و منزوی اولدیغی حالدە.. او دوشونجەسز مأمورڭ معناسز اهانت ایچون مداخلە نیّتی، طوغریدن طوغری یە آنارشیلك حسابنە وطن و ملّتە تهلكە كتیرمگە چالیشمقدر. و بتون بتون قانونسز اولمقلە برابر، سنەلردنبری امثالنە راستلانمامش بر فراغت نفس و فداكارلقلە، اڭ آغیر شرائط آلتندە، یوز اوتوز پارچەدن متشكّل معظّم و خارقە اثر كلّیاتیلە وطن و ملّتڭ معنوی قورتولوشنی تأمین ایدن بویلە بر ذاتە بو طرزدە ایلیشمك، البتە ملّت و كنچلگڭ محو و پریشان اولمەسنە غیرت ایدن كیزلی وطن دوشمانلرینە یاردیم ایتمك و آلت اولمقدر. آفیوندە بر ایكی متمرّد، بر زندیق ماصونڭ اشتراك و تشویقیلە، او انسانڭ بو طرز اهانت ایتمك [حاشیە]فكرینە، هیچ بر اهانتی قبول ایتمەین استادیمزڭ تحمّل ایتمەسندن و اهمّیت ویرمدیگندن شو حقیقتی قطعیًّا آڭلادقكە، بو وطن و ملّتە كندی یوزندن بر ضرر كلمەمسی ایچون حیثیتنی، شرفنی، نفسنی، روحنی، راحتنی دخی فدا ایتمشدر.

قونیەلی زبیر

ایكنجی بر نمونەسی:

آفیون حپسندە استادیمزی تجرید مطلقدە بیراقدیلر. نە آرقداشلری، نە خدمتجیلری، نە دە حپسلرلە تماس ایتدیرمدیلر. تا اوندن اخلاق و تربیە درسی آلماسینلر. عین حپسدە یوز سنە جزا ایلە محكوم بر قومونیستی، حپسە كیرنلرڭ برنجی درسنی

آلدقلری بشنجی قوغوشە قویدیلر. هم او قومونیستی او قوغوشە چاووش یاپوب سربستیت ویرەرك، هركسلە تماس ایتدیردیلر. [حاشیە]و مستثنا اولارق او قومونیستڭ صاچی دە كسدیریلمدیگی حالدە، استادیمزڭ غایت صادق بر خدمتكارینی ییمگنی یاپمغە بیراقمدیلر. و نهایت استادی زهرلتدیردیلر. استادیمزڭ او خدمتكاری هوسات نفسانیەدن واز كچمك غایەسیلە صقالنی بیراقمشدی. حالبوكە او قومونیستڭ صاچنە ایلیشمدكلری حالدە، جبرًا او استادیمزڭ خدمتكارینڭ صقالنی تراش ایتدیرمكلە، سنّت سنیّەیە اهانت نوعندن معاملە یاپدیلر. و دیانت ریاستنڭ طبعنە سوز ویردیگی معجزاتلی قرآنمزی اوچ سنە مصادرە ایتمك كبی، زمین و سماواتی حدّتە كتیرن بر جرمی ایشلەدیلر. و رمضان شریفدە، چارشی ایچندە، كوندوزدە راقی ایچەرك شعائر اسلامیەیە حقارت ایتمك جنایت عظیمەسنی ایشلەین و روس مملكتندن كلن بر عدلیە مأمورینڭ بتون بتون دسیسەلرلە، یالانلرلە بو طرزدە استادیمزە اهانتلر یاپمەسی كوسترییوركە، بو آدم حكومت نامنە دگل، طوغریدن طوغری یە قومونیستلك حسابنە آنارشیلگی بو وطندە یتیشدیرمگە مأمور بر ماصوندر.

اَلْبَاقٖی هُوَ الْبَاقٖی

نور طلبەلرندن ابراهیم، ضیا، خلیل، صادق، زبیر

[٥٢١]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[اوّلا] هم سزڭ، هم بو مملكتڭ، هم عالم اسلامڭ مهم بایراملرینڭ مقدّمەسی اولان، بو مملكتدە شعائر اسلامیەنڭ یڭیدن پارلامەسنڭ بر مژدەجیسی اولان اذان محمّدینڭ (علیە الصّلاة والسّلام ) كمال فرحلە اون بیڭلر منارەلردە اوقونمەسنی تبریك ایدییورز. و سكسان كسور سنە بر عبادت عمرینی قزاندیران رمضان شریفدەكی عبادت و دعالریڭزڭ مقبولیتنە آمین دییەرك، رحمت الٰهیەدن هر بر كیجەء رمضان بر لیلۀ قدر حكمندە سزلرە ثواب قزاندیرمەسنی نیاز ایدییورز. بو رمضاندە شدّتلی ضعفیت و خستەلغمدن تام چالیشامدیغمدن، سزلردن معنوی یاردیم رجا ایدرم.

[ثانیًا] بنم صوڭ حیاتمی اسپارطە حوالیسندە كچیرمك بیوك بر آرزومدر. و نور أفەسنڭ دیدیگی كبی دیمشدم: اسپارطە، طاشیلە، طوپراغیلە بنم ایچون مباركدر. حتّی یگرمی بش سنەدنبری بنی اشكنجە ایلە تعذیب ایدن اسكی حكومتە قلبًا نە وقت حدّت ایتمشم، هیچ بر زمان اسپارطە حكومتنە حدّت ایتمەیوب، او مبارك وطندەكی حكومتڭ خاطری ایچون اوتەكیلری دە اونوتویوردم. خصوصًا اورادەكی اسكی تخریباتی تعمیراتە باشلایان حقیقی وطنپرورلر اولان دموقرات نامندە حمیّتلی احرارلر، یعنی حریتپرورلر، نور و نورجیلری تقدیر ایتمەلرینە

چوق منّتدارم. اونلرڭ موفّقیتنە چوق دعا ایدییورم. ان شٓاء اللّٰه او احرارلر، استبداد مطلقی قالدیروب، تام بر حرّیت شرعیەیە وسیلە اولاجقلر.

[ثالثًا] بایرامدن بر مقدار صوڭرەیە قدر بورادە قالمقلغمڭ بر سببە بناءً لزومی وار. بر ایكی آی صوڭرە مدرسة الزّهرا اركانلرینڭ قراریلە و استانبول و آنقرە أونیورسیتەلرندەكی كنچ سعیدلرڭ دە موافقتیلە، نرەیی بنم ایچون مناسب كورورسەڭز، اورایی قبول ایدەجگم. مادام حقیقی وارثلرم سزلرسڭز و شخصمدن بیڭ درجە زیادە دنیادە وظیفەمی دە كورویورسڭز، بو حیات فانیدەكی صوڭ منزلی سزڭ رأیڭزە بیراقییورم.

[رابعًا] هم تبریكلرینی، هم شدّتلی علاقەلرینی كوسترن احمد نظیف و احمد فیضی و خلیل ابراهیم و حسن عاطف و بوجاقدە و افلانی و استانبولدەكی نورجیلرڭ مكتوبلرینە بنم بدلمە سزلر جواب ویررسڭز، سزلری توكیل ایدییورم.

اَلْبَاقٖی هُوَ الْبَاقٖی

قرداشڭز سعید النّورسی

[٥٢٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] حدیث شریفڭ سرّیلە رمضان شریفڭ نصف اخیرندە، خصوصًا عشر اخیردە،

خصوصًا تك كیجەلردە، خصوصًا یگرمی یدیسندە، سكسان كسور سنە بر عبادت عمرینی قزاندیرابیلن لیلۀ قدرڭ احیاسنە و هر بریڭز عموم نور طلبەلریلە برابر، خصوصًا بو بیچارە، چوق قصورلی، خستە، ضعیف قرداشڭزی حصّەدار ایتمەڭزی و هر بریڭزڭ دعالریڭزڭ بیڭلر معنوی آمینلرڭ تأییدیلە درگاە الٰهیدە قبول اولمەسنی رحمت الٰهیەدن نیاز ایدییورز.

[ثانیًا] اونیورسیتەدەكی كنچ سعیدلرڭ حقیقتًا مدرسة الزّهرانڭ استانبول و آنقرەدەكی وظیفەسنی یاپدقلرینە و بو بیچارە، اختیار سعیدە احتیاج بیراقمدقلرینە و رسالۀ نورڭ هر جهتلە كافی اولمەسنڭ بر نمونەسی اولارق شیمدی سزە لفًّا كوندردیگمز، اونلرڭ مبعوثلرە خطابًا یازدقلری بیاننامەلرینی و یینە اونلرڭ بر اثری اولان تاریخچۀ حیاتڭ یتمش نسخەسنڭ باش طرفنە قویوب یتمش مبعوثە كوندرمەلری ایچون بزە كلن بیاننامەلرینی برای معلومات سزە كوندردك. سز مناسب كورسەڭز اونی و سزە اوّلجە كوندردیگمز صونغورڭ معارف وكالتنە مدافعەسی و مصطفی اوسمانڭ عدلیە وكیلنە استدعاسیلە برابر تاریخچەء حیاتە بر نوع ذیل اولارق ال یازیسیلە ویا ماكینە ایلە ویا اینەبولیدە یڭی حرفلە اللی آلتمش نسخە تكثیرینی رأیڭزە حوالە ایدییورز.

[ثالثًا] مدرسة الزّهرا اركانلری، بنم شخصمڭ دە حقیقی وكیلمدرلر. بڭا، شخصمە كلن مكتوبلرە اونلر، بنم بدلمە جواب ویرسینلر. خصوصًا خسروڭ مكتوبندەكی اسملری بولونان ذاتلرە قارشو مناسب جواب ویررسڭز. احمد فیضینڭ سزە

قارشو یازدیغی مكتوبڭ جوابنڭ پارچەسنی لفًّا سزە كوندرییورز. عموم قرداش و همشیرەلریمڭ مبارك رمضانلرینی و عموم كیجەلرینی، معنوی لیلۀ قدرلرینی تبریك ایلە سلام و دعا و دعالرینی رجا ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

[٥٢٣]

[بِاسْمِهٖ سُبْحَانَهُ]

(حق و حقیقتڭ ناشری اولان سبیل الرّشادە، حالاً خلق پارتیسی نامنە یاپیلان یوز جهتلە قانونسز بر معاملەیی عرض ایدییورز )

استادیمز بدیع الزّمان سعید النّورسی، شدّتلی زهرلرڭ نتیجەسی اولارق خستەلغی شدّتلنوب حیاتدن امیدینی كسدیگی ایچون، كندی نفقە پارەسیلە آلدیغی سكز عدد كتابنی محافظە ایتمك اوزرە مفتی قرداشنە كوندرمشدی. امرطاغ پوستەخانەسی كویا ضابطە مأموری وظیفەسی یاپییور كبی، كیزلی بر مقصدە بناءً بو كتابلری ضبط ایدرك همن بالذّات كندیسی كیدوب ژاندارمە دائرەسنە، قائممقامە، عدلیەیە و تلەفونلە آفیونە شایع ایدوب، ایشی شعشعەلاندیرارق كتابلرڭ هپسنی عدلیەیە ویردیرمشدر. حالبوكە كتابلرڭ ماهیّتی شودر: بش پارچەسی، محكمەدە بولونان مدافعات و ذیللرندن عبارتدر. دیگر اوچ كتاب دە، شیمدیكی عدلیە وكیلی خلیل اوز یوروكڭ اوچ دفعە برائتلرینە قرار ویردیگی اثرلردركە، دڭزلی محكمەسی عین اثرلرڭ اجزالرینی اعادە ایتمشدر. و آفیون محكمەسنڭ دە حكملرینی بوزمش و او اثرلرڭ برائتلرینە رأی ویرمشدر.

كرچە قومونیست اولان اسكی عدلیە وكیلی فؤاد سیرمن، اسكی هیئت وكیلەیە اخبار ایتمش و قرآنڭ غایت حق و منفعتلی بر تفسیری اولان ذوالفقار مجموعەسنڭ درت یوز صحیفەسی ایچندە، اوتوز سنە اوّل یازیلان ایكی آیتڭ تفسیرینە دائر ایكی صحیفەیی بهانە ایدرك، بو چوق مهم اثری یاساق ایتمەیە چالیشمشدر. حالبوكە شیمدی ملّت و وطنە غایت ضررلی اولان قومونیست و ماصونلرڭ اثرلرینە مساعدە ایدیلدیگی حالدە، یوز بیڭلر كیمسەلرڭ ایماننی قورتاران، قرآنڭ غایت حق و پك چوق منفعتلی بر تفسیری اولدیغنی بش یوز بیڭ آدمڭ شهادتیلە اثبات ایدەجگمز اثرلرە اوراق مضرّە كبی بویلە معاملە یاپمق و استادیمزە بو خستەلقلی نازك زمانندە ئوز قرداشنە قارشو بو حزین تأثّراتی ویرمك، یوز جهتلە قانونسزدر دییە سزە عرض ایدییورز.

[ثانیًا] بو مسئلەنڭ غایت سیڭسی و غایت كیزلی حقیقتی شودر: استادیمز معنًا و مادّةً دموقرات پارتی یە یاردیم ایچون طلبەلرینی خفیفجە تشویق ایتمشدی. بونی خلق پارتیسنڭ معنّد مستبدلری آڭلادقلری ایچون، معناسز بهانە ایلە حبّەیی قبّە یاپارق بو معاملەیی یاپدیلر. یوقسە هر طرفدە بو كتابلر پوستە ایلە آلینوب ویریلییور و بورایە دە استانبولدن و باشقە یرلردن كلییور و ایلیشیلمییوردی. بو وضعیت چوق دسّاسانە و امید ایدیلمەین بر پلاندر.

[ثالثًا] ذوالفقاردەكی موضوع بحث ایكی آیتڭ تفسیرندن بیڭ مثلی بر مخالفتلە حالاً مطبوعاتدە اسكی حكومتە هجوملر یاپیلییوركە، شیمدی او آیتلرڭ تفسیری،

ذرّە مقدار بر صوچ اولامییور. بوندن دە آڭلاشیلییوركە، بو معاملەلر خلق پارتیسی حسابنە یاپیلمقدە دوام ایدیلن كیفی ایشلردر و خلق پارتیلیلرڭ "سلطنت دموقراتلردە ایسە، حكم و اجراآت و اقتدار بزدەدر" ادّعا و وهملرینڭ بر نمونەسیدر.

امرطاغ نور طلبەلری نامنە محمد، ابراهیم، ضیا وسائرە

[٥٢٤]

(اهمّیتلی بر حقیقت و دموقراتلرلە اونیورسیتە نورجیلرینڭ بر حسب حالیدر. )

شیمدی ملّتڭ آرزوسیلە شعائر اسلامیەنڭ سربستیتنە وسیلە اولان دموقراتلر، هم موقعلرینی محافظە، هم وطن و ملّتنی ممنون ایتمك چارۀ یگانەسی، اتّحاد اسلام جریاننی كندینە نقطۀ استناد یاپمقدر. اسكی زماندە اینكیلیز، فرانسە، آمریقە سیاستلری و منفعتلری بوڭا معارض اولمقلە مانع اولویوردیلر. شیمدی منفعتلری و سیاستلری بوڭا معارض دگل، بلكە محتاجدرلر. چونكە قومونیستلك، ماصونلق، زندیقلق، دینسزلك، طوغریدن طوغری یە آنارشیستلگی انتاج ایدییور. بو دهشتلی تخریب ایدیجیلرە قارشو، آنجق و آنجق حقیقت قرآنیە اطرافندە اتّحاد اسلام طایانابیلیر. و بشری بو تهلكەدن قورتارمغە وسیلە اولدیغی كبی، بو وطنی استیلای اجانبدن و بو ملّتی آنارشیلكدن قورتاراجق یالڭز اودر.

بو حقیقتە بناءً دموقراتلر، بتون قوّتلریلە بو حقیقتە استناد ایدوب قومونیست و ماصونلق جریاننە قارشو وضعیت آلمەلری ضروریدر.

بر اذان محمّدینڭؐ سربستیتیلە، كندی قوّتلرندن یگرمی دفعە زیادە قوّت قازاندیلر. ملّتی كندیلرینە ایصیندیردیلر، منّتدار ایتدیلر. هم معنًا اسكی اتّحاد محمّدیدنؐ اولان یوز بیڭلر نورجیلرلە، اسكی زمان كبی فارماصون و اتّحادجیلرڭ ماصون قسمنە قارشو اتّفاقلری كبی، شیمدی دە عینًا اتّحاد اسلامدن اولان نورجیلر بیوك بر یكون تشكیل ایدر. دموقراتلرە بر نقطۀ استناددر. فقط دموقراتە قارشو اسكی پارتینڭ مفرط و ماصون ویا قومونیست معناسنی طاشییان قسمی، ایكی مدهش ضربەیی دموقراتلرە اورمەیە حاضرلانییورلر. اسكیدن ناصل احرارلر ایكی دفعە باشە كچدیگی حالدە، آز بر زماندە اونلری دویردیلر. اونلرڭ متّفقی اولان اتّحاد محمّدیؐ افرادینڭ چوقلرینی آصدیلر. و احرار دینیلن دموقراتلری، كندیلرندن داها دینسز كوسترمگە چالیشدیلر. عینًا اویلە دە، شیمدی بر قسمی دیندارلق پردەسنە كیروب دموقراتلری دین علیهندە سوق ایتمك ویا كندیلری كبی تخریباتە سوق ایتمك ایستەدكلری قطعیًّا تبیّن ایدییور. حتّی علمانڭ رسمی بر قسمنی كندیلرینە آلوب، دموقراتلرە قارشو سوق ایتمك و دموقراتڭ طرفندە، اونلرە مقابل كلەجك نورجیلری ازمك، تا نورجیلر واسطەسیلە علما، دموقراتە التجا ایتمەسینلر. چونكە نورجیلر هانكی طرفە میل ایتسەلر، علما دخی طرفدار اولور. چونكە اونلردن داها قوّتلی بر جریان یوقكە، اوڭا كیرسینلر.

ایشتە مادام حقیقت بودر، یگرمی بش سنەدنبری اهل علمی، اهل طریقتی یا أزن، یا كندیلرینە طالقاغوقلغە مجبور ایدن اسكی پارتینڭ مفرط و ماصون

و قومونیست قسمی، بو نقطەدن استفادە ایدوب دموقراتلری دویرمەمك ایچون دموقراتلر مجبوردرلركە، هم نورجیلری، هم علمایی، هم ملّتی ممنون و منّتدار ایتمك، هم آمریقە و متّفقلرینڭ یاردیملرینی غائب ایتمەمك ایچون، بتون قوّتلریلە اذان مسئلەسی كبی شعائر اسلامیەیی ممكن اولدقجە تعمیرە چالیشمەلری لازم و الزمدر.

مع التّأسّف بعض مفرط و ماصون و قومونیستلر، دموقرات علیهندە اولدیغی حالدە، كندینی دموقرات كوسترییورلركە، دموقراتلری تخریباتە سوق ایتسین. و دین علیهندە كوسترسین، اونلری دویرسین.

نور طلبەلری و نورجی اونیورسیتە كنچلگی نامنە

صادق، صونغور، ضیا

برای معلومات تقدیم ایدییورز.

[٥٢٥]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، فداكار قرداشمز حاجی علی،

كوندردیگڭز چوق قیمتدار و بالخاصّە حضرت استادی پك چوق سویندیرن مكتوبڭزی آلدق. استادیمز دییوركە: "رسالۀ نور، بو زماندە كافیدر. اون سنە مدرسەدە اوقویانلر، رسالۀ نورلە بر سنەدە عین استفادەیی ایتدكلرینە شاهد،

بیڭلر اهل علم وار. مادام حاجی قیلینچ علی، بر بوچوق سنە بتون رسالۀ نور اجزالرینە صاحب چیقمش، قسمًا اوقومش.. نظریمزدە یگرمی سنەلك بر نور طلبەسیدر. بن هر صباح خاصلر ایچندە اونڭ اسمیلە بتون معنوی قزانچلریمە، دفتر اعمالنە كچمك ایچون حصّەدار ایدییورم. اویلە ایسە، او دە بتون حیاتنی رسالۀ نورە ویرمگە مكلّفدر. دیمك شیمدی یە قدر جامع الازهرە كیتمگە موفّق اولمامسی اهمّیتلی بر حكمت ایچوندركە، نورلر اوڭا كافی ایمش. شیمدی شامە، حلبە یاقین اولان اورفەدە بر مدرسۀ نوریە ایلریدە تشكّل ایتمەسنی قوّتلی امید ایدییورز. قیلینچ علی ایلە برابر اسكی سعیدڭ غایت قیمتدار بر طلبەسی اولان شامدەكی ملّا عبد المجید، اورفەدەكی نورڭ طلبەلرندن سیّد صالح و اونڭ یاننە كیدن نورڭ فداكار بر طلبەسیلە مخابرە ایتسینلر. بن هم ملّا عبد المجیدە، هم حاجی علی یە، هم شامدەكی رسالۀ نورلە علاقەدار اولانلرە پك چوق سلام ایدییورم. و دعالرینی و او موقع مباركەدە بڭا دعا ایتمەلرینی رجا ایدییورم "دیدی.

اوت، قهرمان قرداشمز حاجی علی، حضرت استاد دائما سزڭ فداكارلغڭزی اظهار بویورویورلر. بز دە سزی تحسینلرلە تبریك ایدییورز.

او مركز اسلامیەدە نورلر ایچون بیوك غیرت و خدمتلریڭزی دیلەیورز، هم دە امید ایدییورز. حقیقتًا او بیوك و مبارك یرلردە نورلرە خدمتدە بولونوشڭز، سزڭ ایچون، هم بتون اهل ایمان ایچون پك قیمتدار اولدیغنە هیچ شبهە یوقدر.