[٥١٠]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

محترم احمد حمدی افندی حضرتلری،

بر حادثەء روحیەمی سزە بیان ایدییورم. چوق زمان اوّل، ذاتڭز و سزڭ مسلگڭزدەكی خواجەلرڭ، ضرورتە بناءً رخصتە تابع و عزیمت شرعیەیی بیراقان فكرلرینە، بنم فكرلرم موافق كلمییوردی. بن هم اونلرە، هم سڭا حدّت ایدردم. نەدن عزیمتی ترك ایدوب رخصتە تابع اولویورلر؟ دییە، رسالۀ نوری طوغریدن طوغری یە سزلرە كوندرمزدم. فقط اوچ درت سنە اوّل، یینە شدّتلی، قلبمە سزی تنقیدكارانە بر تأسّف كلدی. بردن اخطار ایدیلدیكە:

بو سنڭ اسكی مدرسە آرقداشلرڭ اولان، باشدە احمد حمدی اولان ذاتلر، دهشتلی و شدّتلی بر تخریباتە قارشو اهون الشّر دستوریلە ممكن اولدیغی قدر، بر درجە، بر قسم وظیفەء علمیەیی مقدّساتڭ محافظەسنە صرف ایدوب، تهلكەیی درتدن برە ایندیرمەلری، اونلرڭ مجبوریتلە بعض نقصانلرینە و قصورلرینە

ان شٓاء اللّٰه كفّارت اولور، دییە قلبمە شدّتلە اخطار ایدیلدی. بن دخی سزلری و سزڭ كبیلرینی، او وقتدنبری یینە اسكی مدرسە قرداشلرم و درس آرقداشلرم دییە حقیقی اخوّت نظریلە باقمەیە باشلادم. اونڭ ایچون بنم بو شدّتلی تسمّم خستەلغم وفاتملە نتیجەلنمەسی دوشونجەسیلە، سزی نورلرە، بنم بدلمە حقیقی صاحب و حامی و محافظ اولاجغڭزی دوشونەرك، اوچ سنە اوّل، مكمّل بر طاقیم رسالۀ نوری سزە ویرمك نیت ایتمشدم. فقط شیمدی هم مكمّل دگل، هم تمامی دگل، فقط اكثریت مطلقە اجزالری نور شاكردلرندن غایت مهم اوچ ذاتڭ اون-اون بش سنە اوّل یازدقلری بر طاقیمی، سزڭ ایچون شدّتلی خستەلغم ایچندە بر درجە تصحیح ایتدم. بو اوچ ذاتڭ قلمنڭ بنم یانمدە اون طاقیم قدر قیمتی وار. سندن باشقە بو طاقیمی كیمسەیە ویرمیەجكدم. بوڭا مقابل اونڭ معنوی فیئٓاتی دە اوچ شیدر:

[برنجیسی] سز ممكن اولدیغی قدر دیانت ریاستنڭ شعبەلرینە ویرمك ایچون.. ممكنسە اسكی حروف، دگلسە یڭی حرف ایلە و خاص آرقداشلرمدن تصحیحە یاردیم ایچون بریسی باشدە بولونمق شرطیلە، مملكتدەكی دیانت ریاستنڭ شعبەلرینە یگرمی اوتوز دانە تكثیر ایدیلمكدر. چونكە خارجی دینسزلك جریاننە قارشو بویلە اثرلری نشر ایتمك، دیانت ریاستنڭ وظیفەسیدر.

[ایكنجیسی] مادام نور رسالەلری مدرسە مالیدر. سز دە مدرسەلرڭ هم اساسی، هم باشلری، هم شاكردلریسڭز. اونلر سزڭ حقیقی مالڭزدر. مناسب كورمدیگڭز رسالەیی، شیمدیلك نشرینی كری بیراقیرسڭز.

[اوچنجیسی] توافقلی قرآنمز، ممكنسە فوطوغراف مطبعەسیلە طبع ایدیلسینكە، توافقدەكی لمعۀ اعجازیە كورونسون. هم باشدەكی توركجە تعریفاتی ایسە، او، قرآن ایلە برابر طبع ایدیلمەسین. بلكە آیریجە بر كوچك رسالەجك اولارق یا توركجە ویا عربی یە كوزلجە چویروب اویلەجە طبع ایدیلسین.

س * ع

[٥١١]

حضرت استادیمزڭ تصحیحاتدە علاوە ایتدیگی نكتەلر

[اوّلًا] یگرمی طقوزنجی مكتوبڭ ایكنجی مقامنڭ اڭ باش صحیفەسندەكی سؤٓال جوابدن صوڭرە شو نكتە یازیلاجق:

بو رسالەنڭ سبب تألیفی، قرآنڭ ترجمەسنی قرآن یرندە جامعلردە اوقوتمق اولان دهشتلی سٓوء قصدینە قارشو، بر نوع مقابلەدر. زیادە تفصیلات و لزومسز بحثلر كیرمش. فقط او مجاهدانە و هیجانلی مقابلەدە، قیمتدار بر غیبی آناختاری حسّ ایدوب مجذوبانە آراتدیرمق ایچندە، لزومسز تفصیلات و ضعیف و پك اینجە امارەلر دخی كیرمش.

قلبمە كلدیكە: یگرمی طقوزنجی مكتوبڭ غایت اهمّیتلی و لزوملی و پارلاق و ایجازلی اولان برنجی مقامی، بو ایكنجینڭ بتون قصوراتنی و اسرافاتنی عفو ایتدیرر. بن دە كمال سرورلە شكر ایتدم، او قصورلریمی اونوتدم.

[ثانیًا] یگرمی طقوزنجی مكتوبڭ ایكنجی مقامنڭ سكزنجی قسمڭ اوچنجی رمزڭ

برنجی قسمندەكی دردنجی لطافتندە بر صحیفە قدر صوڭرە، توافق سرّیلە شاهد كوستریلن اون یدی سورەدن ١٤ نجی سورەدەكی ٣٥٩ تاریخنڭ اوزرینە حاشیە قونولارق، حاشیەسنە شو نكتە یازیلاجق: 〚 اِذَا السَّمَٓاءُ انْفَطَرَتْ〛 اوچ یوز اللی طقوز حروفیلە، بشرڭ باشنە سمادن آطوم بومبەسنڭ اینمەسنە و قلبنە آنارشی میكروبی كیرمەسنە رمز ایدر.

[ثالثًا] یگرمی طقوزنجی مكتوبڭ ایكنجی مقامنڭ سكزنجی قسمڭ اوچنجی رمزینڭ ایكنجی قسمندەكی (مهم بر اخطار) دن بر صحیفە قدر صوڭرە، اوچ یوز اللی بر عددی بو سنەء عربیەیی كوستردیگندن، اوتوز بر دفعە جملەسندەكی (اوتوز بر دفعە) كلمەلرینڭ اوزرینە حاشیە قونولاجق و حاشیەسنە شو نكتە یازیلاجق: بو اشارتە اوتوز بیڭ دفعە بارك اللّٰه! چونكە ایكنجی حرب عمومی، بشرڭ شكرسزلك و كفران نعمتندن چیقدی.

ایكنجی مقامدە:

[خامسًا] یگرمی طقوزنجی مكتوبڭ سكزنجی قسمندە، برنجی رمزڭ بشنجی رمزندەكی خاتمەیە بر حاشیە یاپیلاجق. و شو نكتە یازیلاجق:

اهمّیتلی یتمشلر، یتمش یدی سنەدەكی سعیدڭ یاشنی كوستردیگی كبی، نور تألیفی او تاریخدە تمام اولور دییە رمز ایدر.

مدافعاتدەكی جزئی سهو:

[برنجیسی] مدافعاتڭ آلتمش دردنجی صحیفەسندە، اون و اون برنجی سطرلرندە

(جاذبۀ عمومیە ) كلمەلرندن صوڭرە (یی) حرفی و (محافظە) كلمەسی سهوًا كیرمش. قالدیریلسین.

[ایكنجیسی] سكسان آلتنجی صحیفەدە، اوننجی سطرڭ آخرینە یاقین (دیمەسی) كلمەسی قالدیریلاجق. بیڭ بارك اللّٰه خسروەكە، قوجە مدافعاتدە اوچ درت سهودن باشقە یوق.

سعید النّورسی

[٥١٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] هم مدرسة الزّهرا شاكردلرینی، خصوصًا مباركلر هیئتنی و اسپارطە ولایتنی، مرحوم حافظ مصطفینڭ وفاتیلە تعزیە ایلە، حافظ مصطفی یی تام وظیفەسنی یاپمەسیلە، یگرمی سنەدە ایكنجی بر حافظ علی اولارق، یگرمی سنەدنبری اوصانمدن، صارصیلمادن نورلرڭ نشرینە چالیشمەسنی بتون روح و جانمزلە تبریك، هم اونی، هم اسپارطە ولایتنی، هم مدرسة الزّهرایی تبریك ایدییورز. حقیقتًا بو مرحوم قهرمان قرداشمز، عینًا حافظ علی كبی وظیفەسنی بیتیردی.. عالم نورە و برزخە حافظ علی و حسن فیضی كبی قرداشلرینڭ یاننە كیتدی. جناب حق رسالۀ نورڭ حروفاتی عددنجە اونڭ دفتر حسناتنە خیرلر یازسین و روحنە رحمت أیلەسین.

[ثانیًا] اسكیشهرڭ دهشتلی مصیبتندن انتباهە كلمەین اسكیشهرلی معنّد مدّعیسنڭ افترالی دسیسەلریلە، مرور زمان و عفو قانونلرینی كچیرن، اون آلتی سنە اوّل غرضكارانە اتهامنامەلرینی طوپلاتدیروب، ایكی چووال قدر اوراقلری اسكیشهردن آفیونە جلب ایتدیروب، او بهانە ایلە رسالۀ نورڭ سربستیتنە و انتشارینە مانع اولمق ایچون بر وسیلە یاپمق غرضیلە، بتون بتون قانونسز و امثالسز بر صورتدە آفیون محكمەسی، بو دفعە دخی یینە اوتوز طقوز كون محكمەیی تأخیر ایتدیردی. فقط بونلرڭ اشدّ ظلمنە مقابل، عنایت الٰهیە برقاچ جهتدە بو تأخیردە نورلر و شاكردلرینە، خصوصًا حقیقت اخلاصلرینە منفعتە چویردیگنە قناعتمز وار. هر نە ایسە، اوزون سویلەیەجكدم، فقط راحتسزلق یتر دیدی.

[ثالثًا] سبیل الرّشادڭ حقّمزدە نشر ایتمك ایچون سزە لفًّا كوندردیگمز مقالەیی، سز مناسب كورسەڭز نشر ایتسین. بڭا او فكرلە كوندرمشدیلر. بن دە سزە حوالە ایدییورم. هم اونیورسیتەدەكی كوچك سعیدلرڭ و اونیورسیتەیی تنویر ایدن و نورلاندیران نور شاكردلرینڭ نامنە عبد المحسن امضاسیلە كلن و لفًّا سزە كوندریلن مكتوبلری كوسترییوركە، اونیورسیتە ایلریدە بر نور مدرسەسی اولاجغنە بر امارەدر.

اَلْبَاقٖی هُوَ الْبَاقٖی

قرداشڭز سعید نورسی

[٥١٣]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

سزە، شخصمە عائد برقاچ مسئلەیی بیان ایتمك قلبمە اخطار ایدیلدی.

[اوّلا] بعض خاص قرداشلرم شخصمە خدمتدە دقّتسزلك ایتدكلرندن، اونلرڭ بڭا قارشو آجیمەسنی نقصان كوردیگمدن، بعضًا حدّت و تكدیر ایتدیگم وقت، قلبمە كلدیكە: او بیچارەلر، زیادە حسن ظنلە تخمین ایدییورلركە، "استادیمز ایستەسە، بلكە بعض روحانیلر، جنّیلر دە خدمت ایدەجكلر، بلكە ایدییورلر. خدمت نوریەدە عنایتڭ آشكارە جلوەسی كوسترییوركە، اونڭ شخصنڭ پریشانیتنە میدان ویریلمییور و شفقتمزە محتاج دگل" دییە خدمتدە بعض قصورلری اولویور. حتّی بوكون دە بریسی آرابە كتیرەجكدی، دقّتسزلك یوزندن بن یایان چیقدم. بر ساعتدە اون ساعت قدر زحمت چكدم. بن دە برقاچ كون اوّل بویلە قصوری یاپانلرە دیمشدم، تكرار ایدەجگم، سز دە دیڭلەییڭز:

ناصلكە رسالۀ نوری و خدمت ایمانیەیی، دنیوی رتبەلرینە و شخصم ایچون اخروی مقاماتلرینە آلت یاپمقدن سرّ اخلاص شدّتلە بنی منع ایتدیگی كبی، اویلە دە، كندی شخصمڭ استراحتنە و دنیوی حیاتمڭ كوزلجە، زحمتسز كچمەسنە، او خدمت قدسیەیی آلت یاپمقدن جدًّا چكینییورم. چونكە اخروی حسناتڭ

باقی میوەلرینی فانی حیاتدە جزئی بر ذوق ایچون صرف ایتمك، سرّ اخلاصە مخالف اولمەسندن قطعیًّا خبر ویرییورمكە، تارك الدّنیا اهل ریاضتڭ آرزو و قبول ایتدكلری روحانی، جنّی خدّاملر، بڭا هر كون، هم آچ اولدیغم زماندە و یارەلی اولدیغم وقتدە، اڭ كوزل ییمك و اڭ كوزل علاج كتیرسەلر، حقیقی اخلاص ایچون قبول ایتمەمگە كندیمی مجبور بیلییورم. حتّی برزخدەكی اولیادن بر قسمی تمثّل ایدوب، بڭا حلوا باقلاوەلری خدمت ایمانیەیە حرمتًا ویرسەلر، یینە اونلرڭ ألنی أوپوب قبول ایتمەمك و اخروی، باقی میوەلرینی دنیادە، فانی بر صورتدە ییمەمك ایچون، نفسم دە قلبم كبی قبول ایتمەیە رضا كوسترییور. فقط قصد و نیّتمز اولمادن، عنایت جهتندە كلن بركت كبی اكرامات رحمانیە، خدمتڭ مقبولیتنە بر علامت اولدیغندن، نفس امّارە قاریشمامق شرطیلە، روحملە قبول ایدرم. هر نە ایسە.. بو مسئلە بو قدر كافی.

[ثانیًا] اسكی حرب عمومیدە، پاسینلر جبهەسندە، شهید مرحوم ملّا حبیب ایلە برابر روسە هجوم نیّتیلە كیدییوردق. اونلرڭ طوپچیلری، بر ایكی دقیقە فاصلە ایلە بزە اوچ طوپ كلّەسی آتییوردی. اوچ كُلّە، تام باشمزڭ ایكی مترە اوستندن كچوب، آرقەدە درە ایچنە صاقلانان عسكریمز، كورونمدكلری حالدە كری قاچدیلر. تجربە ایچون دیدم: "ملّا حبیب، نە دیرسڭ، بن بو كاوورڭ كلّەسنە قارشو كیزلنمیەجگم." او دە دیدی: "بن دە سنڭ آرقەڭدن چكیلمەیەجگم." ایكنجی

طوپ كلّەسی، پك یاقینمزدە دوشدی. حفظ الٰهی بزی محافظە ایتدیگنە قناعتلە ملّا حبیبە دیدم:

"هایدی ایلری! كاوورڭ طوپ كلّەسی بزی ئولدیرەمز. كری چكیلمەیە تنزّل ایتمەیەجگز" دیدم.

هم بتلیس محاصرەسندن روسڭ آوجی خطّندە اوچ كُلّە، ئولدیرەجك یریمە اصابت ایتدی. بری دە شالواریمی دلوب، ایكی آیاغمڭ آراسندن كچوب، او تهلكەلی وضعیتدە سپرە اوتورمەیە تنزّل ایتمەمك بر حالت روحیە طاشیدیغمدن، آرقەدن قوماندان كَلْ علی، والی ممدوح بگ ایشیتدیلر. "امان چكیلسین ویا سپرە اوتورسون!" دیدكلری حالدە، "بو كاوورڭ كُلَّەلری بزی ئولدیرمیەجك" دیدیگم و هیچ بر احتیاط و تدبیرە اهمّیت ویرمەیەرك او كنچلك زمانندە، او ذوقلی حیاتمڭ محافظەسنە چالیشمدیغم حالدە، شیمدی سكسان یاشنە كیردیگم حالدە، غایت درجەدە بر احتیاط و حیاتمی محافظە، حتّی وسوسە درجەسندە تهلكەلردن چكینمك حالتی عجیب بر تضاد كوروندیگندن، البتە او كنچلك حیاتنی پرواسزجە فدا ایتمك، بر ایكی سنە اختیارلق و ذوقسز حیاتنی بو درجە محافظە ایتمك، بیوك بر حكمت ایچوندر. و ایكی اوچ قدسی مقصد ایچندە واردر:

[برنجیسی] كیزلی، غیر رسمی و بر قسم رسمی، انصافسز دوشمانلریمزڭ دسیسەلریلە نور شاكردلرینڭ بدلنە، بتون هجوملری بنم شخصمە و بنملە مشغول اولمەسنە و بیلمەیەرك اهمّیتی بندن بیلمكلە، نور شاكردلرینڭ بر درجە دسیسەلردن و

هجوملردن قورتولمەلرینە، بو اختیار و پریشان حیاتم وسیلە اولدیغندن، اسكی سعیدڭ اون كنچلك حیاتی قدر قرداشلریمڭ خاطری ایچون شیمدیلك اوڭا موقّتًا اهمّیت ویرییورم. اگر بن اورتەدن چكیلسەم، بڭا ویردیگی زحمت، روحمدن زیادە سودیگم خاص قرداشلریمە ویریلەجكدی. او حالدە بر زحمت، یوز عدد زحمت اولوردی.

[ایكنجیسی] كرچە خاص قرداشلرم، هر بریسی مكمّل بر سعید حكمندە نورە صاحبدرلر. فقط اخلاصدن صوڭرە اڭ بیوك قوّتمز تسانددە بولوندیغندن و مشربلرڭ اختلافیلە -حپسدە اولدیغی كبی- بر درجە تساند قوّتی صارصیلمەسیلە، خدمت نوریەیە بیوك بر ضرر كلمەسی احتمالنە بناءً، بو بیچارە اختیار خستە حیاتم، تا لمعەلر، سوزلر مجموعەسی دە چیقنجەیە قدر.. و قورقاقلق و قیصقانچلق طماریلە خواجەلری نورلردن ئوركوتمك بلاسی دفع اولنجەیە قدر.. و تساند تام مُحْكملشنجەیە قدر، او حیاتمی محافظەیە بر مجبوریت حسّ ایدییورم. چونكە اوزون امتحانلردە محكمەلر، دوشمانلر، بنم كیزلی و موجود قصورلریمی كورەمدكلرندن، حفظ الٰهی ایلە بتون بتون بنی چوروتەمدكلرندن، رسالۀ نورە غلبە ایدەمییورلر. فقط حیات اجتماعیەدە چوق تجربەلرلە ماهیّتی بیلینمەین، بنم وارثلرم كنچ سعیدلرڭ بر قسمنی نورڭ ضررینە افترالرلە چوروتەبیلیرلر، دییە او تلاشدن بو اهمّیتسز حیاتمی اهمّیتلە محافظەیە چالیشییورم. حتّی یانمدە بر رُووَلْوَرْ واركن، ایكنجی و قوّتلی رُووَلْوَرْ داها تدارك ایتمەیە لزوم كوردم. دوشمانلرڭ زهرلری

قرداشلریمڭ دعاسیلە قیریلدقلری كبی، سائر سٓوء قصدلری دخی ان شٓاء اللّٰه عقیم قالاجقدر.

ازجملە: ایكی ساعت قمر تمامیلە طوتولدیغی عین كیجەدە، كیزلی دوشمانلرم، آنقرەدن بزدن نور مجموعەلری ایستەمەلری اوزرینە بورایە كلن ایكی آدم، بردن اوتوز آلتی مجموعە كوندردیگمزڭ عین ایكنجی كونندە، تخمینلرنجە داها كوندریلمەمش دییە، هم او كتابلر نرەدە اولدیغنی بیلمك و آفیوندەكی رسمی و مقام صاحبی بر ایكی ماصونە خبر ویرمك و تحرّی ایتدیرمك و كلیدلی اولان ایكی اوطەمدە ییمك و ایچمك قاپلریمە زهر آتمق ایچون، فوق العادە بر طرزدە طامە چیقمشلر. و ایكی اوطەنڭ هر برینڭ بر پنجرەسنی قیرمادن، عجیب بر طرزدە آچوب ایچری یە كیرمشلر. بنم یاتدیغم اوطە ایسە، آرقەسندن سوركولی اولمەسندن، بڭا سٓوء قصد ایدەمەمشلر. حفظ الٰهی و عنایت ربّانیە اونلرڭ النە بر اوچ ویرمدی. بن داها لزوملی شیلر یازاجقدم. فقط راحتسزلق "یتر" دیدی. هر وقت احتیاط، اخلاص، تساند، ثبات، صارصیلمامق و وظیفەمزی یاپمق و وظیفۀ الٰهیەیە قاریشمامق و سِرًّا تَنَوَّرَتْ دستورینە كورە حركت ایتمك و تلاش و مأیوس اولمامق لازم و الزمدر. هم تكرار دیرم: نور شاكردلری كبی، پك آز زحمتلە، پك چوق قیمتدار خدمت و پك چوق معنوی قزانچ الدە ایدنلر تاریخلردە كورولمییور. آغیر شرائط آلتندە، بعضًا بر ساعت نوبت، بر سنە عبادت حكمنە كچدیگی مثللو، ان شٓاء اللّٰه نورجیلرڭ خدمت ایمانیە و قرآنیەدەكی ساعتلری

یوزر ساعت حكمندە خیرلر قزاندیرر. عموم قرداشلرە و همشیرەلرە سلام و ایكی جهاندە سلامتلرینە دعا ایدن و دعالرینی ایستەین قرداشڭز

سعید النّورسی

حقیقی فداكار زبیر، اڭ لزوملی و خدمتە شدّت احتیاجم زمانندە بورایە امدادیمە كلدی. یوقسە اسپارطەدن او سیستمدە بریسنی ایستەیەجكدم.

[٥١٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] لیلۀ معراجڭزی تبریك و ایچندە ایتدیگڭز دعالرڭ مقبولیتنی رحمت الٰهیەدن نیاز ایدرز. و بو حوالیدە معراج كیجەسندن بر كون اوّل و بر كون صوڭرە، مستثنا بر صورتدە رحمتڭ یاغمەسی اشارتدركە، بو وطندە بر عمومی رحمت تجلّی ایدەجك، ان شٓاء اللّٰه.

[ثانیًا] واندەكی اسكی طلبەلرملە زیادە علاقەدار اولدیغم و مراق ایتدیگم و بوكونلردە قسطمونینڭ سلیمان رشدیسی اولان چایجی امین، واندە بولونوب او اسكی مبارك طلبەلریمڭ اللرینە نورلرڭ یتیشمەسنە چالیشمەسی و او مبارك اسكی قرداشلریمڭ حیاتدە اولدقلرینی بیلمدیگم كبی مراق دە ایتدیگمدن، اونلرڭ

حیاتدە و نورلرە مشتاق اولدقلرینی مكتوبلە خبر ویرمسی، بنی چوق زیادە ممنون أیلەدی. و چوق فرحلی بر حزن و چوق حزین بر اسكی خاطرەء سرور ویردی. بن بورادن اورایە مخابرە ایدەمدیگم ایچون، بنم بدلمە زغفرانبولی قهرمانلری مخابرە ایتسە أیی اولور.

[ثالثًا] اوتوز سنەدنبری سیاستی بیراقوب حوادثلرینی مراق ایتمدیگم حالدە، معجزاتلی قرآنمزی ایكی بوچوق سنە مصادرە ایدوب بزە ویرمەمك ایلە برابر، دنیادە امثالی وقوع بولمامش بر طرزدە آفیون محكمەسی بزی تعذیب و كتابلریمزڭ نشرینە مانع اولمق جهتیلە زیادە بنی اینجیتدی. بن دە بو بش اون كوندە، ایكی اوچ دفعە سیاست دنیاسنە باقدم، عجیب بر حال كوردم. مدافعاتمدە دیدیگم كبی، استبداد مطلق و رشوت مطلقە ایلە حركت ایدن بر جریان زندقە، ماصونلق، قومونیستلك حسابنە بزی بویلە اشكنجەلرلە ازمگە چالیشمش. شیمدی او قوّتی قیراجق باشقە بر جریان بو وطندە تظاهرە باشلادیغنی كوردم. فضلە باقمق، مسلگمجە اذنم اولمدیغندن داها باقمدم.

اَلْبَاقٖی هُوَ الْبَاقٖی

خستە قرداشڭز سعید النّورسی

[٥١٥]

جلال بایار، رئیس جمهور، آنقرە

ذاتڭزی تبریك ایدرز. جناب حق سزی اسلامیت، وطن و ملّت خدمتندە موفّق أیلەسین.

نور طلبەلرندن و اونلرڭ نامنە سعید النّورسی

[٥١٦]

رئیس جمهور جلال بایار و هیئت وكلاسنە، آنقرە

بز نور طلبەلری یگرمی سنەدر امثالسز بر تعذیب و اشكنجەلرە هدف اولمشز. صبر ایتدك. تا جناب حق سزی امدادیمزە كوندردی. او اشكنجەلرڭ سببنی اون بش سنەدر اوچ محكمە، حقیقی و قانونی اولارق یوز اوتوز كتاب و بیڭ مكتوباتدە بولامدقلرینە، محكمەء تمییزلە دڭزلی محكمەسنی شاهد كوسترییورز. اوتوز سنەدنبری بن سیاستی ترك ایتمش ایدم. بو دفعە برقاچ كون ظرفندە احرارلرڭ باشە كچوب ملّتڭ مقدّراتنە صاحب چیقمەسی سببیلە رئیس جمهوری و هیئت وكیلەیی تبریك ایلە برابر، حقیقتی افشا ایدییورم. شویلەكە:

بزە هجوم ایدن و محكمەلردە تعذیب ایدنلر دیمشلر: "بو نور طلبەلرینڭ دینی سیاستە آلت ایتمك احتماللری وار، بلكە دە ایدییورلر." بز دە او ظالملرە قارشو مدافعاتلریمزدەكی بیڭلر حجّت ایلە دیمشز و دییورزكە: بز، دینی سیاستە آلت دگل، بلكە رضای الٰهیدن باشقە هیچ بر شیئە، حتّی دنیایە و سلطنتە آلت ایتمەمك، بزم اساس مسلگمز اولدیغندن، دوشمانلریمزجە دە تحقّق ایتمشكە، اوچ سنەدر، اوچ چووالدن زیادە دوسیەلریمزی غرضكارانە تدقیق ایتدكلری حالدە، بزی محكوم ایدەمییورلر. ویردكلری كیفی و وجدانی حكملرینە دە بر بهانە بولامییورلركە، تمییز او حكمی بوزدی.