كرچە پولیسلرڭ آلدقلری امرە بناءً او وضعیتلری جدًّا بیوك بر سهو ایدی. فقط بو شدّتلی خستەلقلی حالمە موافق كلدیگی ایچون اونلردن صیقیلمدم. بالعكس حلال ایتدم. اللّٰه راضی اولسون دیدم، تشكّر ایتدم. بن تبدیل هوایە چوق محتاج اولدیغم ایچون یازین طاغلردە، قیشین دە كرا ایتدیگم آیری آیری منزللردە كزمگە مجبور اولویورم. بر یردە طورامییورم. خستەلغم شدّتلنییور. نیت ایتدم، تكرار آرا صیرە قونیە كبی یرلرە كیدەجگم. حتّی كراسنی ویردیگم امرطاغندە ایكی منزلم، اسكیشهردە بر منزلم واركن، او معناسز وضعیت بنی او تبدیل هوادن، او منزللری زیارت ایتمكدن منع ایدیلمەمە سبب اولدیغنی قونیەدەكی وضعیتدن حسّ ایتمشدم. بن قطعیًّا كیمسە ایلە كوروشەمییورم.

بونڭ كبی، عادتم خلافنە بڭا یاپیلان چوق غیر قانونی معاملەلر وار. ایشتە بو دفعەكی مذكور وضعیتی بیان ایدن شو افاداتم، اوّلجە یازیلان "محكمۀ كبرایە شكوایە" بر ذیل اولارق نشر ایدیلەبیلیر.

سعید النّورسی

[٧١٠]

[رئیس جمهورە و باش وكیلە ]

قبر قاپوسندە و سكسان كسور یاشندە، برقاچ نوع خستەلقلە خستە بولونان و ئولومە كندینی یاقین كورن بیچارە، غریب بر اختیار، سزە ایكی حقیقتی بیان ایدییور:

[اوّلا] سزلرڭ پاكستان و عراقلە غایت موفّقیتكارانە اتّفاقڭزی، كمال صمیمیتلە، سرور و فرحلە بو ملّتە قازانمەڭزی بتون روح و جانمزلە تبریك ایدییورز. بو اتّفاقڭزڭ، ان شٓاء اللّٰه درت یوز میلیون اسلامڭ صلح عمومیسنە و سلامت عامّەنڭ تأمیننە قطعی بر مقدِّمە اولدیغنی روحمدە حسّ ایتدم. و نماز تسبیحاتندەكی قوّتلی بر اخطار ایلە بونی سزە یازمغە مجبور قالدم. اوتوز قرق سنەدنبری دنیایی و سیاستی ترك ایتدیگم حالدە، شدّتلی بر علاقە ایلە قلبە كلن بو اخطارِ قلبٖینڭ سببی، اللی سنەدنبری ایمانی قورتارمق ایچون غایت قیصە بر یولی بولمش اولان و قرآنڭ بو زماندە بر معجزۀ معنویەسی اولان رسالۀ نورڭ عراق و پاكستاندە هر یردن داها زیادە تأثیراتی اولدیغی كبی مقبول اولمسی، حتّی آلدیغمز خبرە كورە، بورادە محكمەجە تثبیت ایدیلن رسالۀ نورلرڭ مقدارینڭ اوچ مثلی او حوالیدە بولونمەسیدر. بو سرّ ایچون، آخر حیاتمدە، قبر قاپوسندە بولوندیغم بو زماندە، بو نتیجەء عظیمەیی كوروب بیان ایتمەیە روحًا مجبور اولدم.

[ثانیًا] عرقجیلق فكری، امویلر زمانندە بیوك بر تهلكەیی نتیجە ویردیگی كبی، حرّیتڭ باشندە دە "قلوپلر" صورتندە بیوك بر ضرری كورولدی. هم برنجی حرب عمومیدە، یینە عرقجیلق فكرینڭ استعمالی ایلە مبارك قرداش اولان عربلرڭ مجاهد توركلرە قارشو ضررلری كورولدیگی كبی، شیمدی دە استراحت عمومیە دوشمانلری كیزلی دینسزلر، یینە او عرقجیلغی اخوّت اسلامیەیە قارشو استعمال

ایدوب بیوك ضررلر ویرمگە چالیشدقلرینە امارەلر كورونویور. حالبوكە منفی حركتلە باشقەسنڭ ضرریلە بسلنمك، عرقجیلغڭ اوچ سجیەء فطریەسی اولدیغی حالدە، اوّلا تورك ملّتی دنیانڭ هر طرفندە مسلمان اولدیغندن، اونلرڭ عرقجیلقلری اسلامیتلە مزج اولمش، قابل تفریق دگلدر. تورك دیمك، مسلمان دیمكدر. حتّی توركلرڭ مسلمان اولمایان قسمی، توركلكدن دە چیقمشلردر. هم تورك ملّتی كبی، عربلردە دە عربجیلق و عرب ملّیتی اسلامیتلە مزج اولمش و اولمسی لازمدر. عرقجیلغە احتیاج قالمامش. اسلامیت ملّیتی كافیدر. عرقجیلق، بتون بتون بر تهلكۀ عظیمەدر. سزڭ بو دفعەكی عراق و پاكستانلە پك قیمتدار اتّفاقڭز، ان شٓاء اللّٰه بو تهلكەلی عرقجیلغڭ ضررینی دفع ایدەجك. درت بش میلیون عرقجیلرڭ یرینە، درت یوز میلیون قرداش مسلمانلری و سكز یوز میلیون صلح و مسالمت عمومیەیە شدّتلە محتاج خریستیانلری و سائر دینلرڭ صاحبلرینڭ دوستلقلرینی بو وطن و بو ملّتە قزاندیرمەیە تام بر وسیلە اولاجغی، روحمە قناعت كلدیگندن سزە بیان ایدییورم.

[ثالثًا] آلتمش بش سنە اوّل بر والی، بڭا بر غزتە اوقودی. دینسز بر مستملكات ناظری، قرآنی ألندە طوتوب قونفرانس ویرمش. دیمشكە: "بو قرآن، اسلاملرڭ ألندە قالدقجە، بز اونلرە حقیقی حاكم اولاماییز، مسلمانلری تحكّممز آلتندە طوتامایز. یا بو قرآنی سقوط ایتدیرملی یز ویاخود مسلمانلری قرآندن صوغوتملی یز" دیمش.

ایشتە بو ایكی امحا فكریلە، ایكی دهشتلی افساد قومیتەسی بو بیچارە، فداكار، معصوم، حمیتكار ملّتە ضرر ویرمگە چالیشمشلر. بن دە آلتمش بش سنە اوّل بو جریانە قارشو، قرآن حكیمدن استمداد أیلەدم. حقیقتە قارشو قیصە بر یولی و بر دە پك بیوك بر دار الفنون اسلامیە وجودە كتیرمك تصوّریلە، آلتمش بش سنەدر، آخرتمزی قورتاراجق و اونڭ بر فائدەسی اولارق حیات دنیویەمزی دە استبداد مطلقدن و ضلالتڭ هلاكتندن قورتاراجق و اقوام اسلامیەنڭ مابینندەكی اخوّتنی انكشاف ایتدیرەجك ایكی وسیلەیی بولدق:

[برنجی وسیلە] رسالۀ نوردركە، رسالۀ نورڭ قوّت ایمانیە ایلە اخوّت ایمانیەنڭ انكشافنە خدمت ایتدیگنڭ قطعی دلیلی، امثالسز بر مظلومیّت ایچندە و عاجزلك حالتندە تألیف ایدیلمسی و شیمدی دە عالم اسلامڭ اكثر یرلرندە و آوروپە و آمریقەدە تأثیرینی كوسترمسی، هم اختلالجیلرە و دینسز فلسفەیە، هم اوتوز سنەدنبری دهشتلی بر صورتدە مادّیونلق و طبیعیّونلق كبی دینسزلك فكرلرینە قارشو غلبە چالمەسی و هیچ بر محكمە و اهل وقوفلر دخی اونلری جرح ایدەمەمش اولمسیدر. ان شٓاء اللّٰه بر زمان دە، سزڭ كبی اخوت اسلامیّەنڭ آناختارینی بولان ذاتلر، بو معجزۀ قرآنیەنڭ شعاعنی عالم اسلامە ایشیتدیرەجكسڭز.

[ایكنجی وسیلە] بن آلتمش بش سنە اوّل جامع الازهرە كیتمك ایستەیوردم. و دییوردم: مادام جامع الازهر، عالم اسلامڭ مدرسەسیدر. اویلە ایسە، بن دە او مبارك مدرسەدە بر درس آلملی یم دییە نیت ایتمشدم. فقط قسمت اولمدی.

جناب حق رحمتیلە بر فكر روحمە ویردیكە، جامع الازهر، آفریقەدە بر مدرسۀ عمومیە اولدیغی كبی، آسیە، آفریقەدن نە قدر بیوك ایسە، داها بیوك بر دار الفنون دە و بر اسلام اونیورسیتەسی دە آسیەدە لازمدر دیدم. تاكە اسلام قوملرینی، مثلا عربستان، هندستان، ایران، قفقاس، توركستان، كردستاندەكی آیری آیری ملّتلری، منفی عرقجیلق افساد ایتمەسین. حقیقی، مثبت و قدسی و عمومی ملّیت حقیقیە اولان اسلامیت ملّیتی ایلە []اِنَّمَا الْمُؤْمِنُونَ اِخْوَةٌ [] قرآنڭ بر قانون اساسیسنڭ تام انكشافنە بو ملّتلر مظهر اولسون. و فلسفە فنونی ایلە علوم دینیە بربریلە باریشسین و آوروپە مدنیّتی، اسلامیت حقائقیلە تام مصالحە ایتسین. و آناطولیدەكی اهل مكتب و اهل مدرسە تام بربرینە یاردیمجی اولارق اتّفاق ایتسین دییە ولایات شرقیەنڭ مركزندە هم هندستانڭ، هم عربستانڭ، هم ایرانڭ، هم قفقاسیەنڭ، هم توركستانڭ اورتەسندە مدرسة الزّهرا معناسندە، جامع الازهر اسلوبندە بر دار الفنون، هم مكتب، هم مدرسە اولارق بر اونیورسیتەنڭ وجودە كلمەسی ایچون، تام اللی بش سنەدر رسالۀ نورڭ حقائقنە چالیشدیغم كبی، اوڭا دە چالیشمشم. اڭ اوّل بونڭ قیمتنی (اللّٰه رحمت ایتسین) سلطان رشاد تقدیر ایتمشدی و یالڭز بناسنی یاپمق ایچون یگرمی بیڭ آلتون لیرە ویرمشدی، صوڭرە بن اسكی حرب عمومیدەكی اسارتمدن دوندیگم وقت، آنقرەدە موجود ٢٠٠ مبعوثدن ١٦٣ مبعوثڭ امضاسیلە ١٥٠ بیڭ لیرە، او زمان پارەنڭ قیمتلی وقتندە،

عین او اونیورسیتە ایچون ویرمەیی قبول و امضا ایتدیلر. مصطف كمال دە ایچندە ایدی. دیمك، شیمدیكی پارە ایلە بش میلیونە یاقین بر تخصیصاتلە، تا او زماندە او مبعوثلر، بویلە قیمتدار بر اونیورسیتەنڭ تأسیسنە هر شیدن زیادە اهمّیت ویردیلر. حتّی دیندە چوق لاقید اولان و غربلیلاشمق و عنعناتدن تجرّد ایتمك طرفداری بولونان بر قسم مبعوثلر دخی اونی امضا ایتدیلر. یالڭز اونلردن بر ایكیسی دیدیلركە: "بز شیمدی علوم عنعنەدن و علوم دینیەدن زیادە، غربلیلاشمەیە و مدنیتە محتاجز." بن دە جوابًا دیدم:

فرض محال اولارق، هیچ بر جهتدە احتیاج اولماسە دە، اكثر انبیانڭ آسیەدە، شرقدە ظهوری و اكثر حكمانڭ و فیلسوفلرڭ غربدە كلمەلرینڭ قطعی دلالتیلە، آسیەیی حقیقی اولارق ترقّی ایتدیرەجك، فن و فلسفەنڭ تأثیراتندن زیادە، حسّ دینی اولدیغی حالدە، سز بو فطری قانونی نظرە آلمایارق، غربلیلاشمق نامیلە عنعنۀ اسلامیەیی بیراقسەڭز و لادینی بر اساس یاپسەڭز دخی، درت بش بیوك ملّتلرڭ مركزندە اولان ولایات شرقیەدە وطن و ملّت سلامتی ایچون دینە و اسلامیتڭ حقائقنە قطعیًّا طرفدار اولمەڭز لازمدر دیدم. و بیڭلر مثاللرندن بر كوچك مثال سزە سویلەیەجگم دیدم و شو كلەجك حقیقتی سویلەدم:

بن واندە ایكن، حمیّتلی بر كورد طلبەمە دیدمكە: توركلر اسلامیتە چوق خدمت ایتمشلر. سن اونلرە نە نظرلە باقییورسڭ؟ دیدی: "بن مسلمان بر توركی،

فاسق بر قرداشمە ترجیح ایدرم. بلكە بابامدن زیادە مسلمان توركلرە علاقەدارم. چونكە تام ایمانە خدمت ایدییورلر "دیدی. صوڭرە آرادن بر زمان كچدی، (اللّٰه رحمت أیلەسین) او طلبەم، بن اسارتدە ایكن، استانبولدە مكتبە كیرمش. اسارتدن كلدكدن صوڭرە او طلبەمی كوردم. بعض عرقجی معلّملردن عكس العمل نتیجە ویرن آلدیغی بر فكرلە، او دە كردجیلك طماریلە باشقە بر مسلگە كیرمش. بڭا دیدی:" بن شیمدی غایت فاسق، حتّی دینسز دە اولسە بر كردی، صالح بر توركە ترجیح ایدییورم. "صوڭرە بن اونی برقاچ صحبتدە، برقاچ حقیقی درسلە قورتاردم. اونڭ دە تام قناعتی كلدیكە، توركلر، بو ملّت اسلامیەنڭ قهرمان بر اوردوسیدر.

ای سؤٓال صوران مبعوثلر! شرقدە بش میلیونە یاقین كورد وار. یوز میلیونە یاقین ایرانلی و هندلیلر وار. یتمش میلیون عرب وار. قرق میلیون قفقاس وار. عجبا بربرینە قومشو، قرداش و بربرینە محتاج اولان بو قرداشلرە، بو طلبەنڭ واندەكی مدرسەدن آلدیغی درس دینیمی داها لازمدر؟ یوقسە او ملّتلری قاچیراجق و عرقداشلرندن باشقەلرینی دوشونمەین و اخوّت اسلامیەیی طانیمایان و صرف علوم فلسفەیی اوقویوب اسلامی علملری نظرە آلمامەنڭ نتیجەسی اولان او مرحوم طلبەنڭ ایكنجی حالیمی داها اییدر؟ سزدن صورییورم!

ایشتە بو جوابمدن صوڭرە، او مبعوثلردن عنعنە علیهندە اولانلر و هر جهتلە

غربلیلاشمق فكرینی طاشییانلر، قالقدیلر امضا ایتدیلر. اسملرینی سویلەمەیەجگم، اللّٰه قصورلرینی عفو ایتسین، شیمدی وفات ایتمشلر.

[رابعًا] مادام رئیس جمهور، غایت مهم مسائل سیاسیە ایچندە شرق اونیورسیتەسنی اڭ اهمّیتلی بر مسئلە یاپوب، حتّی خارقە بر طرزدە آلتمش میلیون لیرەنڭ او اونیورسیتەیە صرفی ایچون بر قانون چیقارمق تصوّریلە و فوق العادە بر خدمت ایلە مدرسەنڭ مدار افتخاری و كندیسنە بیوك بر شرف ویردیرن بو مدرسەء اسلامیەیە، اسكی خواجەلق حسّیاتیلە باشلامسی بتون شرق خواجەلرینی منّتدار ایتمش. و شیمدی ایسە، اورتە شرقدە صلح عمومینڭ تمل طاشی و برنجی قلعەسی اولارق بو اونیورسیتەیی او قدر مسائل عظیمۀ سیاسیە ایچندە یڭیدن نظرە آلمش.. البتە بو وطنە، بو دولتە، بو ملّتە بو عظیم فائدەلی خدمتی نتیجە ویرەجك علوم دینیە، او أونیورسیتەدە اساس اولاجق. چونكە خارجدەكی قوّت، تخریباتی معنویدر، ایمانسزلقلەدر. او معنوی تخریباتە قارشو یگانە آطوم بومبەسی، آنجق معنوی جهتدە اولان و معنویاتدن كلن قوّت او تخریباتی طوردیرابیلیر.

ایشتە اللی بش سنەدر بو مسئلەیە بتون حیاتنی صرف ایدرك، بتون دقائقی ایلە و نتیجەلری ایلە تدقیق ایتمش بر آدمڭ بو مسئلەدە رأینی آلمق و فكرینی صورمق لازم كلیركن، آمریقەدن و آوروپەدن بو مسئلەیە دائر استشارەیە كندیڭزی مجبور بیلدیگڭزدن، البتە بنم دە سالف الذّكر خصوصاتی

بو مسئلەدە سوز سویلەمەیە حقّم وار. حمیتكار اولان بتون بو ملّت نامنە سزدن بكلەیورز.

خستە حالمدە قونوشدیغمدن، سوزلرمدەكی تعبیراتدن قصورە باقماییڭز.

سعید النّورسی

[٧١١]

[برای معلومات هم رسمی ذاتلرە، هم دوستلرە مهم بر حقیقتی بیان ایدییورز.]

استادیمز، كنچلگندە و حتّی چوجقلغندن اعتبارًا عزّت علمیەیی محافظە ایچون شدّتلە خلقدن استغنا ایدییوردی. زكات و صدقەیی قطعیًّا آلمدیغی كبی، ایكنجی مكتوبدە دە بیان ایدیلدیگی اوزرە، هدیەیی قبول ایتمییوردی. بو حالڭ، شیمدیكی اختیارلق و ضعیفلق زمانندە دوام ایدەبیلمەسی ایچون، جناب حقّڭ رحمتیلە او استغنا دستوری خستەلغە انقلاب ایتدی. یعنی مقابلسز بر لقمە آلسە، درحال خستە اولور. او لقمەیی یییەمییور. استادیمز كنچلگندە بو قدر محتاج دگلدی. تك باشنە یاشادیغی زمانلر، پك آز بر مصرف كندیسنە كافی ایدی. شیمدی پك چوق طلبەلرینە تعیین ویردیگی و برقاچ خستەلقلە خستە بولوندیغی بر زماندە، او استغنا دستورینڭ محافظەسی ایچون، رحمت الٰهیە اونی مقابلسز هدیەلردن خستە ایدییور.

عینًا اویلە دە، استادیمزە حرمت دخی معنوی بر هدیە كبی اولدیغندن، شدّتلە ناسڭ حرمتندن و ألنی اوپمەسندن قاچییوردی. تاریخچۀ حیاتنڭ و اختیارلر لمعەسنڭ شهادتیلە، كنچلگندە امثاللرینڭ فوقندە اولارق سعردڭ تیللو قصبەسندە انزوایە كیرمشدی. آغری ولایتندە، شیخ احمد خانی حضرتلرینڭ تربەسنە قاپاندی. روسیەیە اسیر دوشدیگندە، طقسان قدر اسیر ضابط كندیسنڭ دینی درسلرینی شوقلە دیڭلەدكلری حالدە، اُسرا قامپندە تاتارلرڭ كوچك خالی بر جامعندە بر یر بولارق اورادە یالڭزلغە چكیلدی. استانبولدە دار الحكمة الاسلامیە اعضالغی كبی جاذب و شعشعەلی بر حیات ایچندە ایكن، یوشع تپەسندە كیمسەسزلگی ترجیح ایتدی. وانە دوندیگندە پك چوق اسكی و یڭی طلبەلری آراسندە سرورلی بر عمری ایستەمەیەرك، اَرَك طاغندەكی بر مغارەیە قاپاندی. اڭ صوڭ دفعە، اوتوز سنەدە كوردیگی امثالسز ظلملرڭ نتیجەسی اولارق حپسخانەلرە كوندریلدیگی زمان، قانونًا تجرید مدّتی اون بش كون اولمەسنە رغمًا، یگرمی آی و حتّی بتون حپس مدّتنجە تجرید مطلقدە طوتولدیغی حالدە كیمسەیە شكوا ایتمدی.

بتون بو حاللر كوسترییوركە، استادیمزڭ فطرتندە انزوا دائما حكم سورمشدر. فقط اختیارلغندە پك چوق یاردیمە، خدمتە، صحبتە محتاج اولدیغی بر وقتدە بونڭ دوام ایتمسی ایچون، بر نوع خستەلق حالتی ویریلمش. بش دقیقە قونوشسە، شدّتلی بر حرارت باشلایور، سسی چیقمایور. حتّی شافعی مذهبندە

اولدیغی ایچون، نمازدە فاتحەیی كندیسی ایشیتەجك درجەدە اوقومسی لازم كلیركن، خستەلق سببیلە سسی چیقمادیغندن، مذهب حنفی یی تقلیدًا نمازلرینی ادا ایدییور. بو خستەلغنە دائر، ایكی مهم دوقتورڭ ایكی راپوری وار. ایستەنیلیرسە كوستریلەجكدر.

شیمدی رسالۀ نورڭ فوق العادە فتوحاتی و عالم اسلامدە دخی فوق العادە بر حسن قبولە مظهر اولمسی هنگامندە، دوشمانلر دخی دوستلرە انقلاب ایتدیگی بر زماندە، رسالۀ نورڭ اعظمی اخلاصنی كە (، رضای الٰهیدن باشقە، دنیوی، اخروی هیچ بر رتبەیە، مقامە آلت ایتمەمك) محافظە ایچون دهشتلی بر مَرْدُمْكِریز، یعنی انسانلردن توحّش و سسی چیقمامق و قونوشمامق خستەلغی و ألنی اوپمك، اوڭا عادتا بر طوقات اورمق كبی طوقونمق وضعیتی، قطعیًّا بزە قناعت ویردیكە، بو بر استخدام ربّانیدر. [حاشیە]

حتّی بو حقیقتلرڭ اظهارینە وسیلە اولان بر شخصی دە استادیمز حلال ایتدی.

بڭا قطعیًّا احتیاج بیراقمامش. كوروشمك ایستەین معارض اولسە، بو اوتوز سنە ظرفندە پك چوق محكمەلر و اهل وقوفلر تدقیق ایتدكلری حالدە، نە نور رسالەلرندە و نە دە نور طلبەلرندە هیچ بر صوچ بولامامشلر. یگرمی درت محكمە "رسالۀ نوردە صوچ بولامییورز" دیدكلری.. درت محكمە دە، قطعیًّا عموم نور رسالەلرینە برائت ویرەرك قضیۀ مُحكمە حالنە كلن قرارلریلە بتون كتابلری، مكتوبلری صاحبلرینە اعادە ایتمسی، بنم بدلمە معارضلرە تام جواب ویرییور. بڭا احتیاج قالمامش. اگر شخصی كوروشمك ایستەنیلسە، بتون نور طلبەلری بر جهتدە بو بیچارە سعیدڭ دعوا وكیللری اولدیغی كبی، استانبولدە و آنقرەدە آووقاتلری بولوندیغندن، ایستەینلر اونلرلە كوروشەبیلیر.

شدّتلی خستەلغی و چوق اختیارلغی ایچون ضروری ایشلرینی كورن خدمتكارلری

[٧١٢]

[بِاسْمِهٖ سُبْحَانَهُ]

استادیمز افادە بویوردیلركە:

علیهمزدە اولان جمهوریت غزتەسی، مدافعەمی چوق یاڭلیش و غایت فنا بر طرزدە تغییر ایتمش. حتّی "بر جانی یوزندن اون معصومە ضرر كلمەمسی ایچون جملەسنڭ یرینە" بر جانی یوزندن اون معصومی ظلمتدن قورتارمق ایچون "كبی هذیانلر قاریشدیرمش. هم دە او یازدیغم جواب، بش آلتی سنە اوّل

استانبول ٢ نجی صلح جزا محكمەسندە عینًا سویلنمش، اڭ مهم مسئلەمدە برائت ویریلمش بر مدافعە ایكن، بر ایكی آی اوّل، بر بارداق صودە بر فیرطینە قوپارمق نوعندن، استانبول سیاحتمدە غایت معناسز، غرضكارانە، بر صاوجی اسپارطە مدّعئ عمومیسنە حوالە ایدوب، معناسز بنم افادەمی آلمەیە ایكی رسمی پولیس مأموری كوندردی. اونلرە دیدم: او مسئلەیە بش سنە اوّل جواب ویریلمشدر. ایشتە او زمانكی جوابم دە بودر، دیدم. اونلر دە قبول ایتدیلر. هم دە ماكینە ایلە چیقاردیلر، هم او حریفە دە كوندرمشلر.

شیمدی اوزاق بر یردە تكرار معناسز اولارق بزدن اوزاق بر قائممقامە باشقەسی اونی ویرمش. افتراجی غزتە دە "اونی قائممقام، صاوجی یە ویرمش" دیمەسیلە رسالۀ نورڭ بر قسم ضعیف شاكردلرینە وسوسە و بر اوهام ویرمك ایستەمشدر. بو یازی یە نورڭ چوق آووقاتلری تكذیب یازسینلر. او مسئلەنڭ موضوعنە دائر استانبول صحّی هیئتندن درت راپور وار. فقط لزومسز اولدیغی ایچون، كیمسەیە كوسترمگە تنزّل ایتمدم. هم دە لزوم اولمامش.

سعید النّورسی

آنقرەدەكی ایكی امنیت مدیرینە چوق سلام ایدییورم. بویلە شیلرە اهمّیت ویرمەسینلر.

[٧١٣]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلریمز،

[اوّلًا] استادیمز لیلۀ براتڭزی تبریك ایدییور. هم سلام و دعا ایدییور. [حاشیە]

[ثانیًا] دیار بكردن دون آلدیغمز مكتوبدە افادە ایدیلدیگنە كورە، دیار بكر حوالیسیلە برابر شرقدە شیمدی ایكی یوز قدر نور درسخانەلری آچیلمش. آیریجە دیاربكردە قادینلرە مخصوص درت بش درسخانۀ نوریە وارمش. ان شٓاء اللّٰه بو بیوك بر خیرڭ علامتیدر.

استادیمز اون سنە اوّل اشارت و بیوك منفعتنی بیان ایتدیگی نور مدرسەلرینڭ شیمدی بو زماندە آچیلمە ایشی، تام تحقّق صفحەسنە كیرمش بولونویور. او زمان دیمشدی: "شیمدی رسمًا دین تدریساتی ایچون خصوصی درسخانەلر آچیلمەسنە اذن ویریلمەسنە بناءً، نور شاكردلری ممكن اولدیغی قدر هر یردە كوچوجك بر درسخانۀ نوریە آچمق لازمدر. كرچە هركس كندی كندینە بر درجە استفادە ایدر، فقط هركس هر بر مسئلەسنی تام آڭلاماز. ایمان حقیقتلرینڭ ایضاحی اولدیغی ایچون، هم علم، هم معرفت اللّٰه، هم حضور، هم عبادتدر. اسكی مدرسەلردە