بافرە آلاچام جادّەسندە صامسونلی بقّال احسان بندەڭز، استقلال حربی مُلغا غرب جبهەسی و برنجی اوردودە مخابرە طاقیم صوبایلغی یاپان عاجز و ناچیز، فقیر، پر تقصیر، صامسونلی علی اوغلی احسان بندەڭز، تكرارًا عرض احترام ایلە او كوزل قهرمان مبارك اللریڭزدن أوپر.

احسان

صامسون مبعوثی حسن فهمی بگە یازیلان بر مكتوبدر.

(٥٩٠)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز و صدّیق قرداشمز، محترم خواجەمز حسن فهمی افندی حضرتلری،

[اوّلًا] بدیع الزّمان سعید النّورسی افندیمز حضرتلرینڭ مبارك دعای شریفلرینە داخل ایدیلدیگڭزدن، سزی تبریك ایدرم و مژدەلرم و مبارك اللریڭزدن حرمت و محبّتلرملە تقبیل أیلرم.

[ثانیًا] ملفوف مكتوبی قاین برادرم صامسون مبعوث محترمی چهارشنبە لی عالیشان زادە هاشم بگە لطفًا ویررسڭز. و دیگر مكتوبی علی احسان پاشا حضرتلرینە طرفمدن تقدیم ایدرسڭز. پاشا حضرتلری، قوای ملّیە حربندە بنم برنجی اوردو قوماندانم ایدی. بندەڭز برنجی اوردو مخابرە بولوگی، طاقیم صوبایی ایدم.

[ثالثًا] آنقرەدە بولونان رسالۀ نور شاكردلری، عزیز، صدّیق قرداشلریمزە سلامتِ دین و وطن نامنە اعظمی یاردیم و محبّتلریڭزی رجا و استرحام أیلرز.

[رابعًا] بافرەمزڭ سابق اوقاف مأموری حسن فهمی ارطوغان آغابگمز، قیمتلی عزیز و صدّیق قرداشمز آنقرەدەدر. صوفی و عالی جناب مخدومی، ریاست جمهور محافظەسی دوقتوری ادیب ارطوغان بگدر. لطفًا زحمت اولمازسە، دینی و ملّی وظیفەء مقدّسەمز حسابنە فهمی بگە زیارت ایدوب شو كوچوجك محبّتنامەمی تقدیم بویورمەڭزی استرحام أیلرم.

[خامسًا] علی احسان پاشا حضرتلریلە قاین برادرم هاشم بگڭ استاد حضرتلرینڭ زیارت عالیلرینە یوز سورمەلرینە دلالت بویورمەڭزی جاندن رجا و استرحام أیلرم. مبارك اللریڭزدن تكرار تكرار اوپرم، افندم حضرتلری. [رَبَّنَا لَا تُخْرِجْنَا مِنَ الدُّنْیَٓا اِلَّا مَعَ الشَّهَادَةِ وَالْاٖیمَانِ اٰمٖینَ] دعای شریفەلریلە مكتوبمە صوڭ ویریرم، عزیز و نجیب مبعوثمز، خواجەمز افندیمز.

حرمتكاریڭز، فقیر، پر تقصیر، علیل و ذلیل، دعاڭزڭ محتاجی صامسونلی احسان بندەڭز

آدرس: بافرە آلاچام جادّەسندە بقّال المعلوم قرداشڭز صامسونلی احسان. جوابڭە منتظرم افندم.

صامسون مبعوثی هاشم بگە یازیلمش بر مكتوبدر.

(٥٩١)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق برادرم، محترم صامسون مبعوثی هاشم بگ،

[اوّلًا] دین و وطنمزڭ اِعلاسنە صوڭ درجە غیرت و یاردیمدە بولونمەڭزی جاندن كلن رجالریمزلە عرض و استرحام أیلرز.

[ثانیًا] آنقرەدە بولونان و بو عزیز دینمز و وطنمز اوغرندە جان و ماللرینی فدا ایدرك، بر چوق ظلم و اشكنجەلرە كوگس كرەرك (بِاِذْنِ اللّٰهِ تَعَالٰی) چالیشمش و قیامتە قدر چالیشاجق اولان رسالۀ نور شاكردلرینە لازم كلن یاردیم و دلالتلریڭزی، مقدّس دینمز و سوكیلی وطنمزڭ سلامت و سعادتی نامنە پك چوق رجا و استرحام أیلرم. مبارك اللریڭزدن طویا طویا اوپرم. پك بیوك قصورلریمڭ عفوینی عالی جناب، شرفلی، قهرمان، صبرلی، جدّی، دین و وطن اوغرندە هیچ بر شیئی اسیركەمەین برادرمدن چوق رجا ایدرم. خستەلق، داها طوغریسی او عظیم كناهمڭ جزاسنی البتە چكملی ایدم. (اَلْحَمْدُ لِلّٰهِ هٰذَا مِنْ فَضْلِ رَبّٖی) فقط بو آرادە سزلری كوجندیردیگمی ظن ایدییورم. عفو ایتمك بیوكلرڭ شانندندر، دگلمی افندم؟

مصطفی بگ افندی ایلە آرا صیرە صامسوندە و بافرەدە كوروشمك نصیب

اولویور. اگر بوتچەم مساعد اولسە ایدی، استقلال حربی خاطرەسنی جانلاندیرمق و عزیز، صادق دموقرات مبعوثلریمزە وِجاهًا دە عرض حرمت ایتمك اوزرە آنقرەیە كلەجكدم. [مولا نصیب أیلەیە] آمین.

[ثالثًا] ذات عالیڭزە حقیقی و قطعی اولارق سویلەیورمكە: بوكونكی ظفرڭ و یارین كلەجك سطوتڭ، عظمتڭ، شوكتڭ، قدرتڭ، سلطنتڭ محقّق انكشافی دخی بدیع الزّمان سعید النّورسی افندیمز حضرتلرینڭ سایەسندە اولمش و اولاجقدر. صامسون مبعوثمز محترم اوستە زادە، مدرّس، عزیز خواجەمز، افندیمز داها أیی بیلیر و تقدیر ایدرلر. دین و وطنمزڭ و عالم اسلام قرداشلریمزڭ سلامت و سعادتی ایچون عالیشان زادە هاشم، حسن فهمی افندیمز، علی احسان پاشامز كبی عزیز و صادق دموقرات مبعوث افندیلریمزلە برلكدە بو ذات شریفڭ مبارك پایلرینە یوز سورمەڭزی پك چوق رجا و استرحام ایدركن مبارك اللریڭزدن تكرار تكرار اوپرم.

ای عظیم اللّٰه، سن اهل اسلامە نصرت ویر. ظالملری پریشان أیلە. آمین.

یا رب، بو عبد روی سیاه، ایتدمسە دە یوز بیڭ كناه،

درگاهڭی قیلدم پناه، عفوڭدر آنجق ملجأم یا الٰه.

حرمتكاریڭز

فقیر، غریب، عاجز، بندەڭز المعلوم انیشتەڭز

احسان

(٥٩٢)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز و صدّیق، عالی جناب آغابگمز،

معلوم عالیلریدركە،

آنقرەدە رسالۀ نور شاكردلری جدّی، صمیمی، فداكار، مجاهد قرداشلریمزلە كوروشورسڭز. مدرسۀ یوسفیە قهرمانلریمزلە تشرّف ایتدیگڭز زمان، بیچارە صامسونلی احسان قرداشڭزڭ دە سلام، حرمت، محبّتلرینی لطفًا و مرحمتًا سویلرسڭز. فقیری دە دعادن اونوتماسینلر.

رسالۀ نور مؤلّفی، بیوك متفكّر، استاد اعظم سعید النّورسی بدیع الزّمان افندیمز حضرتلرینی زیارتە كیدوب توجّە عالیلرینە مظهر بولوندیغڭز زمان -ان شٓاء اللّٰه نصیب اولور- احسان فقیر، غریب، بیچارەنڭ دە سلام، حرمت، تعظیمات و حسرتلرینی لطفًا سویلرسڭز. حسرتلە مبارك اللریڭزدن اوپرم عزیز آغابگجگم.

حرمتكاریڭز، قصورلی و دعاڭزە چوق محتاج المعلوم قرداشڭز صامسونلی احسان

(٥٩٣)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق سوكیلی، عزیز، صدّیق، مشفق استادم افندم حضرتلری،

[اوّلًا] جملە نورجی قرداشلریمزلە برابر استفسار خاطرلە، سلام مخصوص ایلە، حسرت و اشتیاقلە مبارك ال و آیاقلریڭزدن أوپر، صحّت و عافیتڭزە كیجە كوندوز دعالر ایدر و دعالریڭزی بكلرز.

[ثانیًا] رسالۀ نورڭ نورینە طایانامایان الحاد و استبدادڭ ان شٓاء اللّٰه تمامًا مغلوب و مُضْمَحِل اولمەسنە طوغری كورولن امارەلر میانندە مجموعەلریمزە قاووشمەمز و تاریخچۀ حیاتڭ اڭ مهم مسئلەسی اولان مدرسة الزّهرانڭ واندەكی تمللری اوزرینە رئیس جمهور طرفندن مجلسدە سویلنن و رادیودە یایینلانان نطقدن آڭلاشیلدیغنە كورە، سوكیلی استادیمزڭ دە تصدیقی ایلە تحقّق ایدن طوغو دار الفنونی و مكتبلرە دین درسلری مجبوری اوقومق و یڭی چیقان قانونلر ایلە جبّار و ظالملرڭ اوّلجە سوكیلی استادیمزی و رسالۀ نوری امحا ایچون او چوق لاستیكلی و دیندارلرە بر كوستك اولان ١٦٣ نجی مادّەیە أك اولارق [سعید كردینڭ فعّالیتنە مانع اولمق ایچون] قیدیلە مجلسدە علنًا اعلان ایدیلن فقرەسنە مقابل، [حرّیت فكر و قلم ایلە مؤلّفڭ قناعتلرینە حرمت و اونی صیانت] قانون آلتنە آلینوب رسمیلشمك و قطعیلشمك اوزرە اولوشی،

جناب حقّڭ لطف و احسانی ایلە آرتق مرحوم حسن فیضی قرداشمزڭ حقلی و حقیقتلی شهنامەلرندە اومدیغی و مژدەلەدیگی كونلر، سوكیلی استادیمزە نصیب و میسّر اولمەسنی قدیر ذوالجمالدن عاجلاً و جملەمز حقّندە قبول بویورمەسنی تمنّی و نیاز أیلەیورز.

چوق مشفق استادیمز، احمد قریشی قرداشمزلە كوندردیگڭز مژدەلی سلاملر و صحّت، عافیت خبرلریڭز بزلری صوڭ درجە ممنون و مسرور أیلەدی. جناب حقّە شكرلر اولسون، اینەبولیمز دعالریڭز بركاتیلە هر زمانكیندن داها غیرتلی اولمق عزمندەدر. ان شٓاء اللّٰه یاقین زماندە جوشن الكبیر مناجات پیغمبریؐ تكمّل ایدەجكدر.

[ثالثًا] رمضان شریفدن بو طرفە لطفكار اشارت و همّتلریڭزلە صامسوندە و بافرەدن توجّه ایدن وظیفەمزە لایق اولابیلمك ایچون قارینجە قدرتنجە عاجزانە چالیشمقدەیز. صوڭ هفتە ایچندە هم اورادن بر قرداشمز كلمش كیتمش، هم دە واسطەمزلە برقاچ ذاتلرە مكتوبلر یازوب كوندرمشلر. بونلری نە یاپمق لازم دییە نظیف و دیگر قرداشلریمزلە استشارە ایتدك. نهایت سز سوكیلی استادیمزە عرض ایتمەیی موافق بولدق. اوّلجە اولدیغی كبی خسرو آغابگمز واسطەسیلە كوندرمك غلبەلق اولدیغی ایچون كلفتلی اولور دییە، طوغری سز سوكیلی استادیمزە عفویڭزە صیغینوب تقدیم ایدییورز. ذات استادانەلری آرزو و مناسب كورورلرسە، مكتوبلری صاحبلرینە ارسال بویورورلر. بو میاندە

اورادەكی قرداشلریمزڭ دوروملرینی آیدینلاتمق باقیمندن اورادن كلمش صوڭ مكتوبلرینی دە لفًّا تقدیم ایدییورز. زیرا بافرە و صامسون بتون رسالۀ نور اجزالرینی و مكتوبلری پیدرپی كوندرمكدە اولدیغمزدن، ان شٓاء اللّٰه اوراسی یڭی بر كوچك اسپارطە اولمق دعالریڭز بركاتندندر.

آیریجە بربر عثمان قرداشمزڭ دە بر مكتوبی لفًادر. صامسون مدیری اولان امین بگە و دیگر یوكسك مهندس عثمان بگە مكتوبلر ایلە برقاچ مراجعتلرندن صوڭرە جواب و طاقیم مجموعەلر كوندریلدی. و بافرە قرداشلریمزە یڭیدن یازوب یگرمی طقوزنجی مكتوبڭ مهم درت پارچەسنی [رمضان، طرق و هجمات كبی] رسالەلری بوكون پوستە ایلە كوندرییورز. جناب حق رضای الٰهیسنە موافق تأثیرلر خلق بویورسون. آمین.

[رابعًا] چوق سوكیلی استادیمز، آننە و بابامزدن مشفق، هم اختیار، هم خستە، هم غریب و بیچارە كچن حیاتڭز بزلرە چوق هجران اولویور. سز سوكیلی استادیمزی هیچ بر آن اونوتامییورز. المزدن دعادن باشقە بر شی كلمییور. آنجق هر دردلرە درمان اولان رسالەلریڭزی توصیە ایدركن، شفا و معنوی قدرت و قوّتی نورلردە بولدیغڭزی عین الیقین اولارق بیلدیگمزدن، بز دە اویلە تسلّی اولمقدەیز. بو كرە اینەبولی مدرسۀ نوریەسی سوكیلی استادیمزە اوچ جلد ایچندە سوزلرڭ قسم كلّیسنی اهدا ایدر.

اینەبولی و آناطولی بتون اهل ایمان، أولریمزدەكی یاورولر، آننەلر، یتمشلك اختیارلر و علیللر، ای سوكیلی استاد و ای معظّم نور قرآن، بتون بونلر آنجق نورڭلە، رسالۀ نورڭلە دردلرینی دیڭدیرییور و دیڭدیرەجكلر.

هر آن شیمدی یە قدر شنیع و جبروت بر تجاوزلە سنەلردنبری طمارلریمزی میكروبلریلە طولدیروب دشن، اولریمزە قدر كیرن عادتلر، بدعتلر حالندە انسانلغی صاران دینسزلك و قومونیزم جریانلرینە قارشو، حیاتڭز بوینجە ییلمادن چارپیشمش عصرلق بر وجودڭ بتون قان و قوّتنی او یولدە خرجایوب آقیتدیڭز.

بوكون بو ایمانلی صاواش یولندە قومونیزم و او قیزیل اژدرلە یوز یوزە، ایچ ایچە بولوندیغمز حالدە، تا دنیانڭ اوبر اوجندە عین ایزی آرایان صاف و مطیع آناطولی یاورولرینڭ دنیایە نمونە بر شجاعت دینیە ایلە شهید دوشركن، آه سوكیلی استادیمز، سنڭ محكمەلردەكی آسلانلر كبی جوشان حیدری مثال نعرەلریڭزی و بو ملّتە شفقت و مرحمتڭزدن كلن چوق درین تأثیرلریڭزدن طاملایان قانلری وجودیمزڭ هر ذرّەسندن ایشیتیر و حسّ ایدر كبی اولویورز.

حتّی خیالمزدە رسالۀ نورلریڭی یازان قلمڭدن طاملایان هر طاملە عین شهیدڭ قانی، فقط بو شهادت طاملەلری طوپراغە دوشمش بر تخوم كبی، هر بر حرف و كلمە اولان او شهید قانلرندن بیڭلر غازیلر، فاتحلر سنبللری ویرمش و ویرییور.

ایشتە بو اوردو، وطنڭ حریم عصمتندە جدّی و نتیجەسی ظفر اولمسی مؤیّد اولارق دینڭ ازلی دوشمانلرینی بوغاجق، قوغاجق، اونلری نوریلە یاقاجق، بتون بشریتڭ حسرتنی چكدیگی و اونڭ ایچون چیرپینوب آغلاشدیغی سعادت دارینی بخش ایدوب آرماغان بیراقاجق. سوكیلی استادم، سنی او كونلرڭ باشندە كورمك بتون روح و جانمزلە تمنّی و نیاز ایدركن، حرمت و حسرت و اشتیاقلە ال و آیاقلریڭزدن اوپرز، سوكیلی استادیمز افندیمز حضرتلری.

اَلْبَاقٖی هُوَ الْبَاقٖی

دعاڭزە چوق محتاج اینەبولی نورجیلری نامنە قصورلی طلبەڭز ابراهیم

(٥٩٤)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق عزیز، چوق مشفق استادم افندم،

ذوالفقارڭ معجزات احمدیەؐ بحثنڭ، دعای پیغمبریؐ تمامًا قبول اولوندیغنە دائر متواتر حدیثلری اوقوركن بیلەمدیگم ١١ سنەلك رسالۀ نورە علاقەدارلغمدنبری كرك لاحقە مكتوبلرندە، كرك خصوصی دعالرندە و كركسە رسالۀ نورڭ دیگر رسالەلرندە رسالۀ نور، رسالة النّور ترجماننڭ دعالرینڭ قبولی، یوز بیڭلر

وقعە و شخصلرلە اثباتی ثابت اولمش. اوت، نور ترجمانی شخصی و نفسانی ارادەسیلە دیلەمزكە، دعاسی قبول اولماسین. او بزە اوزاق كورولن، اربابنە پك یاقین اولان [لوح] ی اوقور. او كندینی نە قدر دە كیزلی طوتسە، محض هدایت قایناغی اولان صدر شریفی حق آیینەسنە مظهردر.

اوت، [بن بر چكردك كبی چورودم]. اوت، داللاندق، میوەلندك، او قدر كنیشلەدككە و كنیشلەمەیە استعداد وار و كورولویور. هیچ بر وقت بونڭ اوڭنە كچەمیەجك.

چوق عزیز استادم، سن بر غایۀ خیالسڭ، یعنی تام بر رهبر حقسڭ. بو یازی بر تعریف قصدیلە دگل، بلكە [سوپاپدن هوا قاچییور]. شوڭا اینانمشزكە، بر نورجی رسالۀ نورە چالیشمق شرطیلە، حیاتنڭ هر دقیقەسی چوق بیوك جنّت ذوقلرینی طاتمقدەدر. یتركە بر پارچە اخلاص، الدن كلدیگی قدر چالیشیلسین. بز عاجزلر هر دعامزدە آنجق و آنجق استادیمزە دعا ایتمك و اونڭ دعاسنە آمین دیمكدن باشقە بر چیقار یول بولامییورز.

اَلْبَاقٖی هُوَ الْبَاقٖی

چوق قصورلی طلبەڭز بربر علی عثمان

اینەبولی

[٥٩٥]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق و مبارك قرداشلرم،

[اوّلا] خسروڭ امضاسیلە رئیس جمهورە ویریلن تلغراف، -بر احتمالی واركە، آنقرەدە كوچك خسرولر، خسروڭ قلمیلە یازیلان قرآنی فوطوغرافلە طبع ایتمك احتمالی خاطریمزە كلدی- سز اسپارطە پوستەخانەسندن آڭلاییڭزكە، نە ماهیتدە بر تلغرافدر؟ بڭا دە معلومات ویریڭز. مراق ایتدم.

[ثانیًا] قونیەدەكی رفعت فیلیز قرداشمزڭ مكتوبندە، بعض صوفیلرڭ بزە خفیف تنقیدلرینڭ هیچ اهمّیتی یوقدر. صاقین متأثّر اولماسینلر. هیچ بر وجهلە مقابلە ایتمەسینلر. شیمدی اهل ایمانڭ، خصوصًا اهل طریقتڭ و بالخاصّە شخصمە عائد تنقیدلرینی بر نوع نصیحت و بر نوع التفات تلقّی ایدرم. اونلرە حقّمی حلال ایدییورم. شیمدی اهل الحادڭ بزە دهشتلی ضررلرینە قارشو، قرداشلریمز اولان اهل ایمانڭ غایت خفیف، شخصمە قارشو تنقیدلری بر نوع ایقاظ و بزی احتیاطە سوق ایچون بر دوستلق تلقّی ایدییورم.

[ثالثًا] بو یاقیندە آفیوندە هفتەلق غزتەلر، كیزلی منافقلرڭ تحریكی ایلە بنی دە علاقەمز اولمدیغی بر شیئە مناسبتدار كوسترمش. بورادەكی نورجیلر دە اونی تكذیب ایتدیلر. مراق ایدیلەجك بر شی دگلدر.

مدرسة الزّهرا اركانلرینڭ خارقە و مؤثّر و عالم اسلامە منفعتلی خدمت نوریەلرینی

بتون روح و جانمزلە تبریك ایدییورز. عموم قرداشلریمزە و همشیرەلریمزە بیڭلر سلام ایدر، دعا ایدر و دعالریڭزی ایستەیورم.

اَلْبَاقٖی هُوَ الْبَاقٖی

قرداشڭز سعید النّورسی

[٥٩٦]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] مباركلر كویندن علی ایلە حاجی سلیمان و دینار طرفندن عبد الرحمن و همّت و داها اوّل كلن اهمّیتلی بر نورجی همشهریسی یانمە كلدیلر. جناب حقّە چوق شكرلر ایدییورمكە، مباركلر كویندە قولە أوڭی اسكیسی كبی نورلرە شدّتلی علاقەلرینی محافظە ایدییورلر. و اونلرڭ صداقت و اخلاصلرینڭ بر كرامتیدركە، كندیمە مخصوص اون مجموعە كتابلریمی لزومنە بناءً آنقرەیە كوندردیگم و چوق اهمّیتلی و اوزاق یرلردن بندن كتابلری ایستەدكلری عین زماندە، قولە أوڭی مباركلری كندیلرینە مخصوص نور مجموعەلرینی، كوندردیگم مقدارڭ عینی اولارق مدرسة الزّهرانڭ بر هدیەسی اولارق بڭا كتیردیلر. خصوصًا برنجی عبد الرحمن اولان بیوك مصطفینڭ كندی ال یازیسی اولان بتون مكتوبات و لاحقەیی ایچندە بولدم. جناب حق، او كتابلرڭ حرفلری عددنجە هر بریسنە مقابل بیڭ رحمت احسان ایتسین. آمین.

[ثانیًا] اون بر آی خسروڭ استراحتنە فوق العادە خالصانە حپسدە خدمت ایدن

و مدافعاتندە غایت كوزل مقابلە ایدن، نورڭ كوچك قهرمانلرندن مصطفی، دونكی كون بنم یانمە كلدی، دیدی: بن، آغابگم خسروڭ یاننە زیارتنە كیدەجگم. دیدم: كرچە هم سنڭ، هم اونڭ حقّڭزدر بو زیارت. فقط بوكون درت طلبە كلدیلر، اسپارطەیە كیتدیلر، او جهتدە احتیاج قالمدی. سن دە رسالۀ نور حسابنە مهم بر كویدە امام اولدیغڭ ایچون، او خدمت دە بنم شخصی خدمتمدن داها زیادە نورلرە فائدەسی اولدیغی كبی، خسروڭ زیارتندن شیمدیلك داها قیمتدار اولابیلیر. اگر او كویدە خدمت نوریە اولماسەیدی، مصطفی كبی خالص و فداكار خدمتكارە احتیاجم واردی. اویلە ایسە، شیمدیلك زیارتی تأخیر ایت.

[ثالثًا] قونیەلی حاجی صبری قرداشمز یانمە كلدی. بن، صادق، خیری، مصطفی حاضر ایكن، چوق اهمّیتلی صحبتمز حاجی صبری یە مهم بر درس اولدی. بالخاصّە مدرسة الزّهرا اركانلرینڭ، خصوصًا خسروڭ بو وطن و ملّت و عالم اسلامە خدمت ایمانیەلری و تخریبجی دینسزلرڭ دسیسەلرینە سد چكمەلری او قدر بیوك بر حسنەدركە، فرض محال بیڭلر سیّئە اولسە عفو ایتدیرر. اویلە ایسە، باشدە خسرو اولارق او اركانلرڭ هیچ بر حركتنی تنقید ایتمەمك و كمال اخلاص و صمیمیت ایلە اونلرە تساند و تام قرداش اولمق لازمدر دییە بو مأٓلدە بر درس اولدی. ان شٓاء اللّٰه حاجی صبری دە، خواجە صبری و رشدی و امثاللری كبی، روح و جان ایلە علاقەدار و خسروە تام قرداش اولاجق، مشرب اختلافی داها تأثیر ایتمەیەجك.

اَلْبَاقٖی هُوَ الْبَاقٖی

عموم نورجیلرە سلام. خستە قرداشڭز سعید النّورسی