او تعرّضڭ یوز مثلندن داها زیادە بر خطادر، بر جنایتدر و بو وطنە دە بر سٓوء قصددر.

سعید النّورسی

[٦٦٦]

[بِاسْمِهٖ سُبْحَانَهُ]

عزیز، صدّیق قرداشلرم،

بر ذات، اوزونجە بر مكتوب یڭی حرفلە بڭا یازمش، كندیسنڭ كیم اولدیغنی بیلدیرمەمش. اوچ نقطەدە شبهە ایدوب بر نوع اعتراض كبی یاڭلیش معنا ویردیگی ایچون، كویا بزی ایقاظ ایدییور. مشربمز مناقشە و مناظرە اولمدیغندن و قصوریمزی حقیقی اولارق كوسترنلردن ممنون اولدیغمزدن، بو مجهول ذاتڭ مكتوبندە اوچ اساسڭ حقیقتنی كوستروب یاڭلیشنی تصحیح ایتمك ایستەدم.

[برنجی اساس] رسالۀ نورڭ استادی و مأخذی و سعیدڭ دە چوق زماندنبری بر وردی اولان بعض آیتلر، بر حزب قرآنی صورتندە بر قسم طلبەلرڭ آرزولریلە قلمە آلینمش. صوڭرە دە طبع ایدیلمش. و درت بش محكمەنڭ دە كوستردیگی اهل وقوف علمالری و حتّی دیانت ریاستی دائرەسی و استانبولڭ فتوا دائرەسندەكی تدقیق كتب دینیە هیئتندن هیچ بر عالم و اهل وقوف علمالری اعتراض ایتمەمشلر. بلكە تقدیر ایدوب تحسین ایتمشلر. چونكە باشدە صحابەلر و مطبوع مجموعة الاحزابدە بولونان حضرت اسامە رضی اللّٰه عنه حزب قرآنیسیكە،

هر بر كوندە بر قسمنی اوقومقلە تقسیم ایدیلمشدر. و عین كتابدە و مجموعة الاحزابڭ عین جلدندە امام غزالی رضی اللّٰە عنهڭ بر حزب قرآنیسی وار. و چوق اهل ولایتڭ كندی مشربلرینە موافق بعض سورەلری و آیتلری بر حزبِ مخصوص قرآنی یاپدقلری میداندەدر.

اون سنە اوّل شهیدًا وفات ایدن مرحوم حافظ علی كبی نورڭ قهرمانلرندن، بنم خصوصی وردیمی و رسالۀ نورڭ استادلری و منبعلری اولان اڭ مهم آیتلری جمع ایتمك ایستەدیلر. صوڭرە اونلرە كوندردم. اونلر دە طبع ایتدیردیلر. چونكە هركس هر وقت بتون قرآنی اوقومغە وقت بولامییور. فقط بویلە بر حزب قرآنی النە كچسە، هر وقت استفادە ایدەبیلیر فكریلە، هم ثوابلری چوق زیادە اولان آیتلر و سورەلر، ایچندە یازیلمش. ذاتًا قرآن حكیمڭ بر معجزەسی شودركە، اهل حقیقتدن و كمالاتدن هر بر مسلك صاحبی، مشربنە موافق، قرآندە بر قرآننی، بر حزب مخصوصنی، بر استادینی بولور. كویا تك بر قرآندە بیڭلر قرآن وار.

بو معجزەنڭ دە سرّی شودركە: قرآن حكیمڭ آیتلرینڭ و كلاملرینڭ مناسبتلری یالڭز برابر اولانلرە دگل، بلكە پك چوق آیتلرە و كلاملرە و كلمەلرە مناسبتی وار، باقییور. اشارات الاعجاز تفسیر نوریەدە بو سرّ بر درجە كوستریلمش. دیمك باشقە كلاملرە بڭزەمز. هر بر آیت، بیڭلر آیتلرە باقار برر یوزی و كوزی وار. بو وضعیت قرآنیە چوق حقائقە مداردرلر. اهل طریقت

و اهل حقیقتڭ هر بر قسمی كندی مسلگنە كورە، او كلّی قرآن ایچندە بر مخصوص حزبلری وار.

ایشتە رسالۀ نورڭ حزب قرآنیسی دە او نوعدن بریسیدر. بونی بویلە نشر ایتمك ایچون، اولیادن اولان مرحوم حافظ علی بونڭ طبعنی عجلە ایتمك ایستەدی. چونكە تمام قرآنڭ، رسالۀ نورڭ كشفیاتیلە، خطّندە بر نوع معجزەء توافقیە بولونمەسندن، اونی طبع ایدوب باصدیرمق ایچون بو حزب قرآنی یی بر مقدّمەسی، بر مژدەجیسی اولارق باصدیردیلر. اوت، شیمدیكی، خسروڭ قلمیلە یازیلان و پك خارقە اولان و توافق جهتندە معجزاتلی اولان قرآنمزڭ اون بش سنەدنبری طبعنە چالیشییورز. و فقط اكثر نورجیلر فقیر الحال اولدیغندن و فوطوغرافلە طبعی لازم كلدیگندن و یگرمی بش بیڭ بانقنوط مصرف لازم اولمەسندن، حزب قرآنمز مقدِّمە اولارق داها اوّل، بو معجزەلی قرآنمزڭ بر مژدەجیسی اولارق طبع ایدیلدی. ایشتە بو معجزەلی قرآنمزی، هم دیانت ریاستی تدقیق ایتمش، چوق بگنمش.. هم استانبولدەكی فتوا دائرەسندەكی تدقیقِ مَصاحف علماسی غایت كوزل كورمش. غایت كوزلجە تدقیق ایدوب مصحَّح اولارق بزە اعادە ایتمش. ان شٓاء اللّٰه یاقیندە بو قرآنمز باصیلارق، بر هدیۀ نوریە اولارق عالم اسلامە نشر ایدیلەجكدر.

او كندینی بیلدیرمەین ذاتڭ شبهە ایتدیگی [ایكنجی مسئلە] پك چوق نورجیلرڭ حدّمدن یوز درجە زیادە حسن ظنلریلە بندن ظن ایتدیگی مدار افتخار صفتلری،

یوز دفعە اونلرڭ خاطرلرینی قیروب ردّ ایتمشم. فقط یگرمی سكز سنە سیاستجیلر، رسالۀ نورڭ صرف ایمانی و اخروی مسلگنی شیمدیكی مدنیلشمك فكرلرینە مساعد كورمدكلرندن، یگرمی سكز سنەدر حپسلرلە، محكمەلرلە، ترصّدلرلە، اصلسز اسنادلرلە نورجیلری ئوركوتمكلە و بنی چوروتمك جهتیلە رسالۀ نوری نشر ایتدیرمەمك ایچون امثالسز بر وضعیتە دوشمشدم.

یاریم امّی و اتهام آلتندە و نور شاكردلرینی بتون بتون قاچیرمامق ایچون بڭا قارشو مدحی، شخصمدن رد ایدوب "مدحڭز نورلرە عائد اولابیلیر. و كوردیگڭز مزیّتلر بنم دگل، رسالۀ نورڭدر. او دە قرآن حكیمڭ بر حقیقتنڭ بر تفسیریدر. و هر عصردە دینە و ایمانە تام خدمت ایدن مجدّدلر كلدكلری كبی، بو عجیب و قومیتەجیلك و شخص معنوئ ضلالتڭ تجاوزی زمانندە بر شخص معنوی مجدّد اولمق لازم كلیر. بو زمان اسكی زمانە بڭزەمز. شخص نە قدر دە خارقە اولسە، شخص معنوی یە قارشو مغلوب اولمق قابلدر. رسالۀ نورڭ او جهتدە بر نوع مجدّد اولمسی قویًا محتمل اولدیغندن، او صفتلر، حاشا بنم حدّم دگل، بلكە مكرّر یازدیغم كبی، بنم حیاتم رسالۀ نورە بر نوع چكردك اولابیلیر. قرآنڭ فیضیلە، جناب حقّڭ احسانیلە او چكردكدن رسالۀ نورڭ میوەدار، قیمتدار بر آغاچ حكمنە ایجاد الٰهی ایلە كچمسیدر. بن بر چكردكدم، چورودم كیتدم. بتون قیمت، قرآن حكیمڭ معناسی و حقیقتلی تفسیری اولان رسالۀ نورە عائددر."

كندینی بیلدیرمەین ذاتڭ [اوچنجی شبهەسی] بیوك جهادڭ و سبیل الرّشادڭ نشر ایتدیگی كبی، بن اعلان ایتمشمكە: دینە، ایمانە خدمتی و رسالۀ نوری، دگل دنیا سیاستنە، بلكە كمالات معنویەیە و مقامات عالیەیە آلت ایدەمدیگم كبی، هركسڭ خوش كوردیگی سعادت اخرویە و جهنّمدن قورتولمغە وسیلە ایتمەمك و یالڭز امر الٰهی و رضای الٰهیدن باشقە هیچ بر شیئە آلت ایتمەمك، بو زماندە نورڭ حقیقی قوّتی اولان سرّ اخلاص حقیقی یی محافظە ایتمەیە بنی مجبور ایتمشكە، صدّیق اكبرڭؓ دیدیگی اولان "مؤمنلر جهنّمە كیتمەمك ایچون اللّٰهدن ایسترم، بنم وجودم جهنّمدە بویوسونكە، اونلرڭ یرینە عذاب چكسین" دییە سویلەدیگی قدسی فداكارلغنڭ بر ذرّەسنی، بن دە كندیمە قزاندیرمق ایچون، "ایمان ایلە جهنّمدن برقاچ آدمڭ قورتولمەلری ایچون جهنّمە كیرمەیی قبول ایدرم" دیمشم.

ذاتًا عبادت، جنّتە كیرمك و جهنّمدن قورتولمق ایچون قیلینماز، بوزولور. بلكە رضای الٰهی و امر ربّانی ایچون یاپیلیر.

یینە حزب قرآنمزڭ بحثنە دونرز:

رسول اكرم علیە الصّلاة والسّلامڭ بیوك بر قوماندانی اولان حضرت اسامە رضی اللّٰه عنه، بر كون حمدە عائد، بر كون استغفارە عائد آیتلر، بر كون تسبیحە عائد، بر كون توكّلە، بر كون دە سلام لفظنە، بر كون دە توحید و 〚لَٓا اِلٰهَ اِلَّاهُو〛 یە عائد، بر كون دە (ربّ) كلمەسنە عائد بتون قرآندن متفرّق سورەلردن بر حزب قرآنی

چیقارمش، كندینە بر ورد أیلەمش. دیمك بویلە حزبلرە اذن پیغمبری علیە الصّلاة والسّلام وار.

هم بزم حزب قرآنمز ایمان حقیقتلرینە دائر آیتلری، خصوصًا سورەلر باشلرندەكی آیتلری جمع ایتدیگندن، باشلرندە []بِسْمِ اللّٰهِ الرَّحْمٰنِ الرَّحٖیمِ [] یازیلمش. بو حزب، تمام قرآنی اوقومغە بیوك بر شوق ویرر، نقصانیت ویرمز. هم یگرمی كوندە اوقوناجق آرزو ایدیلن بعض ایمانی آیتلر، بر ایكی كوندە بو حزبدە اوقوندیغندن، بر زمان بتون سورەلرڭ باشندە بر قسم آیتلریلە برابر، رسالۀ نورڭ اساسلری اولان بعض آیات ایمانیەیی كندیمە ورد أیلەمشدم. صوڭرە بر حزب صورتنە كیردی.

او مجهول ذات، عزّت علمیەیی فرعونجقلرە قارشو محافظەمی، بر انانیت توهّم ایتمش. نور طلبەلرینڭ حقّمدە حسن ظنلرینی بتون بتون قیرمدیغمی، بر بنلك تخیّل ایتمش. و ایمان حقیقتلرینە دائر بیاناتمە، طلبەلرڭ تام اعتماد و قناعتلرینی تأمین ایتمك فكریلە اهل ولایتڭ و بعض آیاتڭ قطعی قناعت ایتدیگم بیڭە یاقین امارات و اشارتلرینڭ اظهارینە مجبور اولدیغم ایچون بر قسمنی خاص قرداشلریمە بیان ایتمەمی، بر نوع خودفروشلق ظن ایتمش.

اوت، بو زماندە دینسزلك حسابنە، بنلكلری فرعونلاشمش درجەدە و ایمانە و رسالۀ نورە هجوملری زمانندە اونلرە قارشو تدافع وضعیّتمزدە تواضع و محویّت كوسترمك، بیوك بر جنایت و خیانتدر. و او تواضع، تذلّل حكمندە بر

اخلاق رذیلە اولور. اونلرە قارشو عزّت دینیەیی و شرافت علمیەیی محافظە ایتمك ایچون قهرمانجەسنە بر ثبات، بر قوّۀ معنویەیی كوسترمك، عجبا هیچ بر وجهلە خودفروشلق اولورمی؟ هیچ بر شهرتپرستلك و انانیت اولورمیكە، او ذات اویلە توهّم ایتمش.

هم رسالۀ نورە محتاج و ایماننی قوّتلندیرمك و قورتارمق ایچون نورلری آرایانلرە قارشیكە، اوندە اوچی ویا دردی شخصمە باقمایوب نوردەكی قطعی حجّتلرلە اكتفا ایتدیگی كبی، بش آلتی دانە حجّتلرڭ قیمتنی بیلمدیگی ایچون بنم شخصمە باقار. "عجبا بزی قاندیردیمی، یوقسە حقیقتمی سویلەیور؟" دییە شخصمە قارشو حسن ظنلرینی قیرمامەیە مجبور اولدیغمدن، شخصمڭ كیزلی فنالقلرینە پردە چكمك بر انانیت اولابیلیرمی؟ []وَمَٓا اُبَرِّئُ نَفْسٖی ج اِنَّ النَّفْسَ لَاَمَّارَةٌ بِالسُّٓوءِ اِلَّا مَا رَحِمَ رَبّٖی [] آیت كریمەسنڭ سرّیلە نفس امّارەمە اعتماد ایدەمم. نفس قصورسز اولماز. فقط شیمدی بو زماندە، اژدرهالر، عفریتلر حكمندە دینسزلك قومیتەلرینڭ هجوملری و تخریباتلری زمانندە، مدافعەمدە، بندە كورونن او سینك قنادی قدر قصورلری كورمك، او هجوم ایدنلرە بر یاردیم حكمنە كچمكدر. و اون عدد محتاجلردن بش آلتی بیچارەیی نورڭ علاجلرندن محروم ایتمكدر.

بو نقطە ایچون بن كندی قوتمە، مزیتمە هیچ اعتماد ایتمەیەرك، یالڭز حقیقت قرآنیە و اونڭ تفسیری اولان حقائق ایمانیەدەكی قوّتە استنادًا دنیایە اعلان ایدییورمكە،

بتون دینسزلر طوپلانسەلر، بن اونلرە قارشو چكینمەیەرك میدان اوقویورم. و باشمی اگمییورم و عزّت علمیەیی قیرمییورم. اگر بو بر بنلكسە، او هیچ بر جهتلە بڭا عائد دگل و بنلك اولاماز، صلابت ایمانیە اولور. ذاتًا بن ناصل طبیعتی، ایجاد اعتباریلە انكار ایدییورم و رسالۀ نور بونی قطعی اثبات ایتمش. اویلە دە، بشری غرورە، انانیتە، فرعونلغە سوق ایدن اقتداری دە طبیعت كبی انكار ایدییورم. یالڭز بشرڭ دعاسی، بر فعلی دعا نوعندن صمیمی بر احتیاج ایلە جزئی كسبی، بر مقبول دعا حكمنە كچر. اونی دە جناب حق قبول ایدر، كشفیات نامندەكی بشرە لازم اولان خارقەلری احسان ایدر دییە قطعی دلیللرلە علم اصول الدّینڭ علماسی، قدر و جزء اختیاری بحثندە اثبات ایتدكلری كبی، بن دە عین الیقین درجەسندە قطعی قناعتلە، فیض قرآنی ایلە، رسالۀ نورڭ حجّتلریلە اوّلا كندی نفسمدە، صوڭرە هركسدەكی بنلك و اقتدارڭ، ایجاد و احسان و توفیق الٰهینڭ یالڭز بر پردەسی اولدقلرینی قطعی بیلدیگم ایچون نورلرە و قرداشلریمە اعلان ایتمشمكە: بن بر چكردكدم، چورودم. عجز و احتیاج و صمیمی ایستەمك و فعلی دعا ایتمك نتیجەسندە جناب ارحم الرّاحمین، رسالۀ نوری او چكردكدن خلق ایدوب احسان ایتمش. نورڭ مكتوباتندەكی بتون مدار مدح فقرەلر، او نورانی آغاجە عائددر. بنم حصّەم، قطعیًّا، هیچ بر جهتدە فخر اولاماز. بلكە، یالڭز و یالڭز شكردر. اویلە ایسە كائنات عددنجە الشكر للّٰه، الحمد للّٰه.

اَلْبَاقٖی هُوَ الْبَاقٖی

سعید النّورسی

(٦٦٧)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

[اوّلًا] قرداشمز قهرمان رشدینڭ كوندردیگی مكتوب ایلە غزتەیی بڭا اوقودیلر. دونكی كون عین غزتەیی كورمش كبی حدّت ایدییوردم. فقط دموقرات، بتون قوّتیلە بنی مدافعە ایتمك لازم كلیركن، عجبا دموقرات دیندارلری دە آلدانمشلركە، بنی و رسالۀ نوری حمایە ایتمییورلر؟ و علیهمە دونمك احتمالی وارمیكە دییە بو آقشام تلاش ایتدم. فقط بردن بو صباح مكتوبڭزی آلدیغم وقت او تلاشم كیتدی. و آڭلادمكە، دموقراتلر آڭلامشلركە، اونلرڭ بیوك بر قوّتی نورجیلر اولدیغندن، دموقرات قونغرەسندە ملّت وكیلی بنی مدافعە ایتمش.

او خلق پارتیلیلرڭ مفرط قسمندن او غزتەجی ایكی عجیب یالان و افتراسی، بو نقطەیی یازمغە بنی مجبور ایتدیكە، بریسی: "جلدلرلە كتابلری انقلاب علیهندەدر" دیمەسی كوسترییوركە، او، حقائق ایمانیە و قرآنیەنڭ خارجندە صرف بر دینسزلك معناسنی انقلابە ویرمش، انقلابی اویلە قبول ایدییور. بو مسلمان ملّتە بو افترایی ایدن بلاسنی بولاجق.

ایكنجی افتراسی: دییوركە: "سعید النّورسی كرد ملّیتنی دین نامنە آناطولی اولادلرینە نشر ایدییور."

عجبا بو بدبخت، اسلامیت ملّیتنی كرد ملّیتی دیمكلە دیوانەجە معنا ویرییور. اللی بش سنەدنبری، "عرقجیلق فرنگی بر خستەلقدركە، فرنكلر اسلامیتی پارچەلامق ایچون ایچلرینە صوقمشلر" دییوب اللی بش سنەدنبری "ملّیتمز یالڭز اسلامیتدر" دیر. بتون اثرلرندە بو اساسی تعقیب ایتمش كیتمش بر آدم حقّندە، بویلە بر اسناد، یگرمی درجە بر افترادر. كردلك اسنادیلە ایلیشنلرە قارشو هجمات الستّەنڭ بر دسیسەسندە و یگرمی آلتنجی مكتوبڭ بر قسمندە قطعی جوابی وار اولمقلە برابر، اللی بش سنەدنبری، حتّی مارت حادثەسندە و عرقجیلرڭ قولوپلری آچیلدیغی زمان اونلرڭ عمومنە، "ملّیتمز اسلامیتدر. بتون بز قرداشز، عرقجیلقلە تفرقە ویرمەییڭز. تورك ملّیتی اسلامیت ملّیتی ایچندە مزج اولمشدر. تورك ملّیتی اسلامیت ملّیتیدر" دییە او دهشتلی حادثەلردە بلایی اوندە بریسنە ایندیرن و بتون مملكتنی، اقربالرینی و عشیرتلرینی بیراقوب، صرف تورك ملّتی اولادینە حقیقت ایمانیەیی درس ویرن و یگرمی سكز سنە اشكنجەلرلە عذابی چكدیردكلری حالدە، او خدمت ایمانیەدن واز كچمەین بر آدمە بو عرقجیلق نامنە حركت اسناد ایتمك، یوز درجە بر حقسزلق و انصافسزلقدر.

هم "مدنیّت نكاحی ایچندە شرعی نكاحی دە یاپیلسین" دیمەسنی عائلە حیاتی علیهندە صایمسی، او غزتەجینڭ بو دینڭ قیمتنی تقدیر ایتمدیگنی و دین علیهندە اولدیغنی ایما ایدییور.

[ثانیًا] بوندن اون كون اوّل، العزیز طرفندن بڭا كلن امضاسز، یڭی حرف ایلە، تمییزە كورە سكسان بر یاڭلیشنی اثبات ایتدیگمز خلقجی بر رسمی مأمورڭ اوچ نقطەدە تنقیدلرینە اهمّیتلی بر جوابمزە دائر بر مكتوبی سزە كوندرمشدك. حتّی بر صورتی دە چابوق خلوصی بگە كوندریڭز، دیمشدك. عجبا او مكتوب سزڭ الڭزە كچدیمی؟ سزلر ناصل بولدیڭز، تكثیر ایتدیڭزمی؟ یوقسە الڭزە كچمدیمی؟

[ثالثًا] مدرسة الزّهرا اركانلرینڭ غایت مبارك و قیمتلی و عالم اسلامە چوق فائدەلی خدمتلری نە وضعیتدەدر؟ حقیقتًا اون بر كوندر بن مراق ایدییورم. عجبا تعطیل ایلە بر استراحت و احتیاط وارمیكە، هیچ بر خبر آلامدم؟ حقیقتًا اون بر كوندر جدًّا مراق ایدییورم. [حاشیە]

اَلْبَاقٖی هُوَ الْبَاقٖی

قرداشڭز سعید النّورسی

(٦٦٨)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلریمز،

بز امرطاغندەكی نور طلبەلری، بو صوڭ زلزلەنڭ یینە رسالۀ نورە بر تعرّضە مناسبتی وارمی دییە استادیمزە صوردق. خصوصًا خسروڭ حپس مدافعاتندە اثبات ایتدیگی كبی، زلزلەلری چوق دفعە رسالۀ نورە تعرّضە قارشو زمینڭ بر حدّتی و اعتراضی كبی تلقّی ایدییورز. استاد دە دیدی: بن دە بر جهتدە تلقّیڭزە اشتراك ایدییورم. چونكە بو صوڭ زلزلەنڭ عین زمانندە، رسالۀ نورڭ بش مهم مركزندە اولان بش ولایتدە هم شخصمە، هم رسالۀ نورە پك انصافسزجەسنە ایلیشیلمش. و افترالرلە تعرّض ایتدكلرینی مكتوبلرلە خبر آلدق.

[برنجیسی] اسپارطەدە بوتونی افترا اسكی پارتینڭ بر غزتەسی، یینە عین زماندە اینەبولیدە یینە افترالرلە نورلرە و شخصمە تعرّض، یینە عین زماندە العزیز طرفندە امضاسز بر مكتوب ایلە نورلرە تعرّض، یینە عین زماندە یگرمی بش سنە سعیدە ظلم ایدن اسكی پارتی شفی ازمیردە نطقندە هجوم ایتمش. هم عین زماندە اسكیشهر نور طلبەلرینە تعرّض، فقط عقیم قالمش. هم عین وقتدە بر بوچوق ساعتلك ایكی محكمەنڭ بر بوچوق آی تأخّر ایلە، محكمە ایلە علاقەدار بیچارە نور طلبەلرینە بر صیقینتی ویریلمش. البتە بو حاللر خصوصی دگل،

عمومی بر پروغرام تحتندە بر تعرّض اولمەسندن، زمینڭ زلزلە ایلە اعتراض و حدّتی، تصادفە بڭزەمییور، دیدی. بز دە استادڭ بو احتمالنە قربتلە اینانییورز. سز قرداشلریمزە دە بیان ایدییورزكە، مادام جناب حق، عنایتیلە نوری و طلبەلرینی حمایە ایدییور. بتون دنیا دە بزە و نورلرە هجوم ایتسە، تلاش ایتمەمك لازم كلییور.

اَلْبَاقٖی هُوَ الْبَاقٖی

امرطاغ نور طلبەلری نامنە طاهر، نوری، محمد، مصطفی، خلیل، حلیم

(٦٦٩)

طوغو اونیورسیتەسی حقّندە رئیس جمهورڭ

مجلس مبعوثاندەكی نطقنڭ بر پارچەسیدر.

بوكونكی اقتدارڭ سیاسی پروغرامندە طوغودە یوكسك بر كولتور مركزی تأسیسنڭ یر آلدیغی معلومدر. كچن سنەلردە معروضاتم آراسندە، طوغودە بر اونیورسیتەنڭ تأسیسی لزومنە بن دە تماس ایتمشدم. یوكسك مجلسڭزجە قبول بویورولان أودەنك ایلە، متخصّص بر علم هیئتنە ایجاب ایدن تدقیقلر یاپدیریلمش و نتیجەدە طوغودە بر اونیورسیتە قورولمسی ایچون لازم كلن شرطلرڭ موجود اولدیغی و بویلە بر مؤسّسەنڭ طوغونڭ اجتماعی سویەسنڭ یوكسلمەسنە، مادّی و معنوی باقیمدن قالقینمەسنە خدمت ایدەجگی قناعتی تأیید ایدیلمشدر.

مستقل طوغو اونیورسیتەسنڭ قورولوش قانونی طاساریسی حاضرلانارق یوكسك تصویبڭزە عرض اولونمشدر.

رئیس جمهورڭ بر بوچوق ساعت دوام ایدن نطقندە، دولتڭ بیوك و كلّی امورلری ایچندە بو خصوصی مسئلەیی كلّی بر وظیفەء حكومت شكلندە كوسترمسی و بر ایكی سنە اوّل معارف وكیلی ایلە برابر وانە كیدوب، یالڭز بو مسئلەیە بیوك بر اهمّیت ویروب، هر شیدن اوّل بو اونیورسیتەیی آچاجغز دییە وعد ایتمەسی، بو، شرقڭ جامع الازهری حكمندە اولان مدرسة الزّهرا معناسیلە طوغو اونیورسیتەسی نامندەكی دار الفنونە استادیمز اللی سنەدنبری چالیشمەسی و اوتوز سنە اوّل موجود ایكی یوز مبعوثدن ١٦٣ مبعوثڭ امضاسیلە ١٥٠ بیڭ لیرە تخصیصاتنی امضا ایلە قبول ایتمەلری و سلطان رشاد دە عین دار الفنونە یگرمی بیڭ آلتون لیرە تخصیصات ویرمسی كوسترییوركە، شرقڭ و عالم اسلامڭ شیمدی اڭ بیوك بر وظیفەسی بو دار الفنونی آچوب، ایران، هندستان، توركستان ایلە معنوی بر مجلس شوراسی و كلّی و عمومی بر مدرسەء عالیسی و ایكنجی بر جامع الازهری یاپمقدر.

امرطاغ نور طلبەلرندن

محمد، نوری، طاهر، مصطفی،

احمد، صادق، حلیم