[٦٧٦]

اَلدِّفاع جریدەسی صاحبی عیسی عبد القادرڭ نور طلبەلری حقّندەكی عربی مقالەسنڭ بر قسمنڭ خلاصە ترجمەسیدر. دییوركە:

جمهوریت غزتەسندە، "درت نورجیلر تحرّی ایدیلدی. سببی دە، نور طلبەلری توركیەدە بر دولت متدیّنە و شریعتلە عمل ایدەجك بر حكومت ایستەدكلرینە و دائما خلقلری اییلكلرە و اسلامیت آدابنە دعوت ایتمەلری ایچون حكومت اونلرە ایلیشییور." غایت غریب و عجیب بر حالتدركە، توركیە حكومتی، اویلە آدملرە ایلیشییوركە، اخلاصلریلە و تام دیانتلریلە توركیە حكومتنی یهودیلرڭ و ماصونلرڭ و قومونیستلرڭ شرّندن محافظە ایتمك ایچون توركیەدە چوجقلردن غایت اختیار اولانلرە قدر هر طائفەیە حقائق اسلامیە و ایمانیەیی درس ویرییورلر. و معنوی عسكرلر و ضابطلر كبی، او وطنی محافظەیە چالیشدقلری حالدە، هانكی بهانە ایلە حكومت اونلرە ایلیشییور؟ مادام عدنان مندرس، اسلام حكومتلریلە ال الە ویرمك ایستەیور، بویلە نور طلبەلری بتون قوّتیلە عالم اسلامڭ قوّتنە، اتّفاقنە چالیشانلرە یاردیم و حمایت و تشویق ایتمك لازم كلیر. اونلرڭ استادی اولان سعید النّورسی، دنیادن زهد و استغناسنڭ بر دلیلی شودر:

پاكستان حكومتنڭ نُوّاب مجلسنڭ معارف وكیلی اولان علی اكبر شاه، اوچ سنە اوّل سعید النّورسی یی زیارت ایتمش. عودتندە هم آنقرە دار الفنون

طلبەلرینە مهم بر قونفرانس ویرمش و دیمشكە: بن قرق سنەدنبری آرادیغمی شیمدی توركیەدە بولدم. بو سعید النّورسی، یالڭز تورك ملّتنڭ دگل، بلكە بتون عالم اسلامڭدر. بنم چوق زماندە، چوق سؤآللرم و مقدّرات عالم اسلام حقّندە چوق مشكللرم وار ایدی. سعید النّورسی ایلە كوروشدیگم بر ساعت ایچندە، یگرمی سنەلك مشكلاتم حلّ ایدیلدی. بن شیمدی بیوك مژدەلرلە مملكتمە دونویورم. عالم اسلام چوق بیوك عالملر كورمش. فقط، او بیوك عالملر راحت یاشامشلر. حالبوكە هركسدن زیادە زحمت چكن سعید النّورسینڭ منزلندە بر لامبەسی یوق درجەسندە دنیایی ترك ایتمش. عجبا توركیە حكومتی، نورجیلرڭ و استادلرینڭ شریعت اسلامیە ایلە عمل ایتمەلری و تشویق ایتمەلری و هیچ بر سیاستە قاریشمدقلری و حكومتە تحكّم ایتمدكلری حالدە، بالعكس آسایش و امنیّتی محافظە ایتدكلری حالدە، حكومت هانكی ضرر توهّم ایتمشكە، بونلرە ایلیشییور، حیرت ایدییورز.

عیسی عبد القادر

[٦٧٧]

بغداددە چیقان، اهمّیتلی، سیاسی بر جریدە اولان اَلدِّفاع غزتەسنڭ محرّری عیسی عبد القادر دییوركە:

نور طلبەلرینڭ مرشدی اولان بدیع الزّمان سعید النّورسی حقّندە اَلدِّفاع غزتەسنی اوقویانلر بندن صورویورلر. "توركیەدەكی نور طلبەلرندن و استادلری

اولان سعید النّورسیدن بزە معلومات ویر "دییورلر. بن دە بونلر حقّندە قیصە بر جواب ویرەجگم. چونكە استادڭ، نورڭ و نور طلبەلرینڭ عربلردە حقّی اولدیغی ایچون، عربلر اونلردن جدّی بحث ایتسینلر. زیرا اسلامیتڭ مادّۀ اساسیەسی اولان عربلر، رسالۀ نوردن زیادەسیلە فائدە كورمگە باشلامشلر.

بو نور طلبەلری رسالۀ نورلە، هم توركیەدە، هم بلاد عربدە قومونیستلگە قارشو محكم بر سد تشكیل ایدییورلر.

بو یازی، دموقراتلر چیقمادن اوّلكی زمانە باقار. اونڭ ایچون، نور طلبەلرینڭ عددی حقّندە مدّعئ عمومینڭ دیدیگی كبی، یالڭز بش یوز بیڭ دگل، بلكە شیمدی توركیەدە میلیونلری آشمش بولونویور و هر كون دە زیادەلشییور.

رسالۀ نور ایسە، اویلە كنیش بر مقیاس ایلە انتشار ایدییوركە، دگل یالڭز توركیەدە و بلاد اسلامیەدە، حتّی اجنبیلردە دە اشتیاقلە ایستەنیلیر اولویور. و نورڭ طلبەلرینڭ شوقلرینی هیچ بر شی قیرامییور. ایشتە نور طلبەلریلە نور رسالەلری و اونلرڭ بو بیوك خدمت قرآنیەلری، دموقرات حكومتنڭ بر بیوك حسنەسیدركە، مبارك عالم اسلامدەكی حركت اسلامیە، بو حكومت دموقراسیە یی تقدیر و تحسینلە قارشیلایور. بتون عراق اهالئ مسلمەسیكە، عرب، تورك، كورد، ایران بو اسلامی خدمتی و قدسی مجاهدەیی كمال فرح ایلە قارشولایورلر. و توركیەدەكی تورك قرداشلریمز، غربڭ یاڭلیش تأثیراتلرینە قارشو، بونلرلە مقاومت كوسترییورلر، قناعتندەدرلر.

عیسی عبد القادر

[٦٧٨]

[بِاسْمِهٖ سُبْحَانَهُ]

صامسون محكمەسندن صورغو و صاوجینڭ، "بیوك جهاد دە" انتشار ایدن بر شكوامە دائر بنی صامسون آغیر جزا محكمەسنە ویرمەلرینە دائر بر دعوتیە كلدی. بڭا اوقودیلر. ایچندە یالڭز درت نقطە، نظر اهمّیتە آلینابیلیر كوردم:

[برنجیسی] بیوك جهادڭ مدیر مسئولی، محكمەدە مدّعی عمومی یە دیمشكە: "سعید النّورسی او مقالەیی بڭا كوندرمش. بن دە نشر ایتدم."

بو مسئلەنڭ حقیقتی شودر: بن خستە ایكن امرطاغندەكی قرداشلرم یانمە كلدیلر. امرطاغندە باشمە كلن ظالمانە حادثەیە دائر قونوشدق. هم خستەلقلی، هم حدّتلی، هم آنقرەیە شكوا صورتندە بر شیلر سویلەمشدم. یانمدەكی خدمتجیم قلمە آلدی. نور طلبەلرینڭ تنسیبیلە آنقرەدەكی بر ایكی نور طلبەسنە كوندروب، تا بعض دیندار مبعوثلرە كوسترسینلر. بو خستەلغمدە بڭا صیقینتی ویریلمەسین. هم كوندریلمش، بعض مبعوثلر دە كورمش. و بیلمدیگمز بر ذاتڭ خوشنە كیدەرك، بیوك جهاد مدیرینە كوندرمش. بن قسم ایدرمكە، او زماندن شیمدی یە قدر بیلمییورمكە كیم كوندرمش؟ فقط نشر اولدقدن صوڭرە بر نسخە بورایە كلمش. یڭی حرفلری بیلمدیگم ایچون بڭا بریسی اوقودی. بن ممنون اولدم. اللّٰه راضی اولسون نشر ایدنلرە دیدم.

كرچە اوتوز بش سنەدنبری سیاستی ترك ایتمشم. فقط بیوك جهاد كبی، خالصانە دینە خدمت ایدن او جریدەیە و اونڭ صاحب و محرّرلرینە، دین نامنە منّتدار

اولدم و اللّٰه راضی اولسون دیدم. خبرم اولمادن و پارە دە ویرمدن دائما بڭا او مبارك غزتە كوندریلییوردی.

[ایكنجی نقطە] بنم صامسوندەكی آغیر جزا محكمەسنە سوق ایدیلمكلگمە دائردر. بو نقطەدە بونی قطعیًّا بیان ایدییورمكە، صامسون حوالیسندە، خصوصًا بیوك جهاد دائرەسنە منسوب مبارك آخرت قرداشلرم و نور طلبەلرینی زیارتلە كورمك ایچون اورایە كیتمك ایستردم. فقط دوقتورلرڭ راپورلریلە قطعی اقتدارسزلغم او درجەیە كلمشكە، بش دقیقەلق قارشومدەكی، بو مسئلەنڭ باشلانغیجی و اساسی اولان محكمەیە، بر بوچوق سنەدر بڭا خبر ویردكلری حالدە كیدەمییورم. مجبوریتلە مدّعئ عمومی و حاكم وظیفەسنی كورن صورغو حاكمی یانمە كلدیلر. مدار سؤآل و جواب بیوك جهاد غزتەسنی دە كتیردیلر. غزتەنڭ بعض سوزلری، بنم سوزلرم ایچنە قاریشدیریلمش. بن دە اونلرە جوابلرینی ویرمشدم. اگر فرضا آغیر جزا، بو اهمّیتسز مسئلەیە اهمّیت ویرسە، بنم محكمەمی اسكیشهرە نقلنە مساعدە ایتسینكە، اورادە صحّیە هیئتندن ایكی آیلق راپورلی زهر خستەلغی ایلە شدّتلی خستە بولوندیغمدن بالذّات بولونابیلیرم. یوقسە امكانی یوقدر.

[اوچنجی نقطە] صاوجی و صورغو حاكمی، ١٦٣ نجی مادّەیە طایانوب، سعید النّورسی یی دینی سیاستە آلت و آسایشە ضررلی پروپاغاندە دییە اتهام ایدییورلر. بو نقطەنڭ حقیقتنی یگرمی طوقوز سنەدر، بش آلتی محكمە و بش آلتی ولایتڭ ضابطەلری

و ١٣٣ پارچە كتابلریمی و بیڭلرجە عموم مكتوبلریمی الدە ایتدكلری حالدە و دینسز قومیتەلرڭ تحریكی ایلە صاف دل بعض مأمورلری آلداتمەلریلە قطعیًّا ایكی مسئلەدن باشقە مدار مسئولیت بولمدقلرینە دلیل، ایكی سنە بتون مكتوبلرم و كتابلرم دڭزلی آغیر جزا محكمەسیلە آنقرە آغیر جزا محكمەسی و محكمەء تمییزدە متّفقًا هم بنم برائتمە، هم بتون كتابلرڭ اعادەسنە قرار ویرمەلری و بش آلتی ولایتدە یالڭز تستّرە دائر بر آیتڭ تفسیری بهانەسیلە بر تك محكمە خفیفجە جزا ویرمك ایستەدی. قطعی و قوّتلی جوابمە قارشو مجبوریتلە مسئلەیی قناعت وجدانیەیە چویردیلر. دیمك اونلر دە مدار مسئولیت بولامدیلر. بو نقطەیی ایضاح ایچون آفیون محكمە رئیسنە كوندردیگم استدعایی، سزە دە برای معلومات كوندرییورم.

[الحاصل] عین نقرات بش آلتی محكمەدە تكرار ایدیلمش و مدار مسئولیت بولامامشلر. شیمدی صامسون صاوجیسی و صورغوسی، یگرمی سكز سنەكی نقراتی عینًا تكرار ایدییورلر: "شخصی نفوذ تأمین ایچون پروپاغاندە یاپوب دینی سیاستە آلت ایدییور." بش محكمەدە درت یوز صحیفە قدر اولان جرح ایدیلمەمش مدافعاتمە، بنم بدلمە حوالە ایدییورم. بنی قونوشدیرمقدن ایسە، اوڭا باقسینلر.

سعید النّورسی

[٦٧٩]

صامسوندن كلن تبلیغنامەیە قارشو، قیصەجە جوابمی صامسون هیئت حاكمەسنە تقدیم ایدییورم:

[برنجیسی] بن مقالەمی كندم كوندرمەمشم. بتون بورادەكی دوستلرم بیلییورلر. [حاشیە]

[ایكنجیسی] بنم كیزلی دوشمانلریمڭ سٓوء قصدیلە زهر تسمّمی ایلە شدّتلی خستەلغمدن، یانمدەكی جامعە اون دفعەدە آنجق بر دفعە كیدەبیلییورم. بو صامسون محكمەسنی یاقینمزدەكی اسكیشهرە نقلنی قانونًا طلب ایدییورم.

[اوچنجیسی] دینی سیاستە آلت ایتمك اتهامی ایسە، سكسان سنە حیاتم و بتون دوستلرم و دیوان حرب عرفیدەكی مدافعاتمڭ تصدیقیلە، بتون دنیا سیاستنی دینڭ بر حقیقتنە فدا ایتدیگم اولان بو دعوایی، یگرمی سكز سنە اسكی حكومت شدّتلی علیهمدە اولدیغی حالدە جرح ایدەمدیلر. هم بش محكمە مدار مسئولیت بولامدی، برائت ویردی.

[دردنجیسی] آسایشی اخلالدر. یگرمی سكز سنە اشكنجەلر ویریلدیگی و یوز بیڭلر فداكار آرقداشلری اولدیغی حالدە، هیچ بر ضابطە، مدار مسئولیت بر صوچ بولامدیلر.

چونكە قرآنڭ [وَلَا تَزِرُ وَازِرَةٌ وِزْرَ اُخْرٰی] آیت كریمەدەكی قرآنڭ بر قانون اساسی حكمنجە آسایشە ایلیشمك دگل، بلكە بتون قوّتمزلە آسایشی محافظەیە كندیمزی مجبور بیلییورز. و اویلە دە هر طرفدەكی ضابطەلرڭ شهادتیلە محافظەیە چالیشییورز. تا بر جانی یوزندن چوق معصوملرە ضرر كلمەسین. داخلدەكی آسایشە ایلیشمك، نورڭ مسلگنە تمامیلە ضددر. هیچ بر نور طلبەسی اوڭا یاناشاماز.

سعید النّورسی

امرطاغندە استادیمز افندیمزدن برای معلومات بزە كوندریلن بو مكتوبی و بو مكتوبڭ ظاهرندە یازیلی ایكی مهم وكیلڭ رسالۀ نورڭ سربستیتنە طرفدار اولدقلرینڭ مژدەسنی، برای معلومات سزلرە عرض ایدییورز.

خسرو

[٦٨٠]

(بر رسالەنڭ نشری مناسبتیلە بر استدعا ایكن، شیمدی بش-آلتی سنە اوّل برائت كورمش كتابلریمزڭ نشرینە مانع اولمق ایچون آنقرەیە كوندریلمەسی مناسبتیلە تكرار یازییورز.)

غایت اهمّیتلی بر حادثە، بر استدعا و بر شكوادر.

پاكستاندە چیقان "الصّدّیق" نامندەكی مهم بر مجموعە المزە كچدی. باقدقكە، اللی صحیفەلك او مجموعەنڭ یاریسنە یاقین قسمی، رسالۀ نورڭ بعض مقالەلریدر.

و بالخاصّە باشندە رسالۀ نوردن یگرمی ایكنجی مكتوبڭ برنجی مبحثنی، غایت اهمّیتلە و تقدیر ایلە عالم اسلامە []اِنَّمَا الْمُؤْمِنُونَ اِخْوَةٌ []آیتنە بر دعوتنامە حكمندە یازدیغنی كوردك. شیمدی او عربی مجموعەنڭ ترجمە ایتدیگی رسالەنڭ اصلی اولان توركچەسنی افكار عامّەیە، خصوصًا بو حكومت اسلامیەنڭ رئیسلرینە و مبعوثلرینە بر سنە اوّل ویریلدیگی كبی، یینە برای معلومات تقدیم ایتمك ایچون ایكی اوچ سبب وار:

[برنجیسی] رسالۀ نوردن سكّۀ تصدیق غیبی مجموعەسندە یازیلان قطعی یوزر اشاراتڭ و اماراتڭ دلالتیلە و چوق حادثەلرڭ او دلالتی تصدیقی ایلە ثابت اولمشكە، رسالۀ نور، معنوی تخریباتە و آنارشیلك و بولشویزم، طبیعیّون و مادّیونلغە و شكوك و شبهاتە و كفر مطلقە قارشو بر سدّ قرآنی خدمتنی بحقٍّ ایفا ایتمەسیلە، بو وطنی بو تهلكەلی دنیا فیرطینەسی ایچندە محافظەیە بر وسیلە اولدیغی و بر صدقۀ مقبولە حكمنە كچوب، ایكنجی حرب عمومینڭ بلاسنە و باشقە مملكتلردە وقوع بولان بلالرڭ بو مملكتە كیرمەسنە ممانعاتلە معنوی بر سپر تشكیل ایتدیگی بداهتلە آشكار اولمشدر. بو مدّعایی رسالۀ نورە نظر ایدن اڭ معنّد فیلسوفلر دە تصدیق ایتمەیە مجبور قالمشلردر. ایشتە او رسالۀ نور، بش یوز بیڭ طلبەسیلە و آلتی یوز بیڭ نسخەسیلە هركسڭ قلبندە ایمان درسیلە بر یاساقجی بیراقوب آسایشی تأمین ایتمكلە، []وَلَا تَزِرُ وَازِرَةٌ وِزْرَ اُخْرٰی [] یعنی "برینڭ كناهیلە باشقەسی مسئول اولاماز" دییە اولان قرآنڭ

بر قانون اساسیسنی تطبیقە چالیشمەسیلە و میلیونلرلە اوقویانلر ایچندە هیچ بریسی اونی اوقومقدن ضرر كورمەمسیلە، بو زماندە بر معجزۀ قرآنیە و بو وطن و ملّت ایچون بر وسیلۀ دفع بلا اولدیغی اثبات ایدیلدیگی حالدە.. و یگرمی بش سنەدنبری كیزلی، افسادجی، آنارشی حسابنە چالیشان قومیتەلر.. دسیسەلریلە محكمەلری علیهنە سوق ایدوب چالیشدقلری.. و بش ولایتدە بش بیوك محكمە رسالۀ نورڭ اجزالرینی اینجەدن اینجەیە تدقیق ایدوب مدار مسئولیت بر تك نقطە بولامایوب برائت ویردكلری.. و صوڭرە دە یگرمی یردە یگرمی عدلیە آیریجە علاقەدار اولوب، موجب مسئولیّت بر جهت اولمدیغندن، صوچ یوق دییە قرار ویردكلری.. و آفیون محكمەسی دە ایكی دفعە اعادەسنە قرار ویردیگی حالدە.. رسالەلرڭ اعادەسنی و تمام انتشارینی اقتضا ایدن قانونی، حقوقی اسباب موجبە موجود ایكن، بش سنەدنبری كیزلی قومیتەلرڭ آلداتمەلری و دسیسەلریلە و بهانەلرلە، آفیون محكمەسندە بش سنەدر او مبارك رسالەلرڭ صاحبلرینە تسلیمی تأخیر ایدیلمكدەدر.

حالبوكە بیوك امنیت دائرەلرنجە، ضابطەجە ثابت اولدیغی كبی، یوز بیڭلر نور طلبەلرندە و یوز بیڭلر نور نسخەلرندە هیچ بر ضرر، بر وقوعات كورولمەمسی، قید ایدیلمەمەسی كوسترییوركە، رسالۀ نور آسایشڭ تمل طاشنە خدمت ایدن بر صدقۀ مقبولە حكمندەدر. مادّی و معنوی تهلكەلردن بو مملكتی محافظەیە وسیلە اولدیغی تحقّق ایدن بر حقیقت قرآنیەدر.

رسالۀ نورڭ اهمّیتلی بر پارچەسی اولان و بیڭلر كنچلری وطن، ملّت و آسایشڭ منفعتنە تربیە ایدن كنچلك رهبرینڭ محكمەسی طولاییسیلە، استادیمز خستە حالندە ایكی دفعە استانبولە محكمەیە كیدوب، یوز یگرمی پولیسڭ غلبەلغی طاغیتمەیە چالیشدیغی او محكمەدە، كنچلك رهبرینڭ هم مؤلّفنە، هم ناشرینە اتّفاقلە برائت و آیریجە رهبرڭ دە ایچندە بولوندیغی عموم رسالەلرە بش محكمە برائت ویرمشكن،

اون بش كوندە تسلیمی لازم كلن كنچلك رهبرینڭ اون بش آیدنبری تسلیم ایدیلمەمسی ایلە.. دڭزلی و آنقرە آغیر جزا محكمەلری بش آیدە برائت و اعادەسنە قرار ویردكلری حالدە، آفیون محكمەسی یوزر رسالۀ نوری بش سنە تسلیمی تأخیر ایتمەسیلە.. و دیار بكر حوالیسنە، ولایات شرقیّەیە ایمان، دین و آسایش نقطەسندە یوز واعظ قدر منفعتی بولونان بر ذاتڭ كندی پارەسیلە آلدیغی خصوصی نور نسخەلرینی، حقلرندە بش محكمەنڭ برائت قراری اولمەسنە رغمًا مصادرە ایدوب، وطنە، ملّتە فائدەلی خدمتنە مانع اولمەسیلە او صدقۀ مقبولە حكمندەكی وسیلۀ دفع بلا بو صورتلە كیزلندیگندن، بر بوچوق میلیار لیرە ضررە وسیلە اولان بو بلا، استانبول یدی ایلول حادثەسی، فرصت بولدی، كلدی دینیلەبیلیر. اگر بش محكمەنڭ و استانبولڭ ویردیگی برائت نتیجەسیلە او كنچلك رهبری انتشار ایتسەیدی، اونڭ درسیلە انتباهە كلن و كلەجك اولان مسلمان كنچلر، البتە باشقەلرینڭ ویاخود اختلالجیلرڭ افسادینە میدان ویرمەیەرك،

بر بوچوق میلیار لیرە ضرردن بو ملّتی قورتارمغە سعی و غیرت ایدەجك ایدیلر. بر بوچوق میلیار لیرەلق بو لكەنڭ ظهورینە میدان ویرمەیەجكدیلر.

اوت، استادیمز اسكی حرب عمومیدە روسیەدەكی اسارتندە آڭلامشكە، معنوی تخریبات ایلە كنچلری افساد ایدن تهلكە مملكتمزە دە كلەجك دییە تلاش ایدوب، بتون قوّتیلە او وقتدنبری تخریبات معنویەیە بر سپر اولمق ایچون، كنچلك رهبری كبی چوق اثرلر یازدی. قرآن حكیمڭ درسلرینی نشر ایتدی. للّٰە الحمد پك چوق كنچلری قورتارمغە وسیلە اولدی. شیمدی اهل سیاست، مادام مسالمت عمومیەیی و اتّحاد ملّتی ایستەیور، چابوق، پاكستانڭ دخی اهمّیتلە نظرە آلوب و "الصّدّیق" مجموعەسندە نشر ایتدیگی رسالەنڭ و امثالی اولان رسالۀ نور رسالەلرینڭ انتشارینە مساعدە ایتسین.

نور طلبەلری

[٦٨١]

استادیمزڭ اوتوز سنەدنبری رسالۀ نورلە یاپدیغی خدمت ایمانیەسی طوغریدن طوغری یە آخرتە متوجّه اولوب، رضای الٰهی قدسی مقصد اساسیسنە طایاندیغنە دلیل اولمق ایچون، یگرمی سنە اوّل اسكیشهر محكمەسندە هیئت حاكمەیە قارشو سویلەدیگی و حقیقتی اوتوز سنەلك حادثەلرڭ شهادتیلە آشكار میدانە چیقان مدافعەسندن بر پارچەیی عینًا یازییورز.

یگرمی سنە اوڭجە سویلنمش اسكیشهر مدافعەسندن بر پارچە:

"ای هیئت حاكمە! بزی درت-بش مادّە ایلە اتهام ایدوب، توقیف ایتدیلر.

برنجی مادّە: ارتجاع فكریلە، دینی سیاستە آلت ایدوب، امنیت عمومیەیی اخلال ایدەبیلەجك بر تشبّث وار اولدیغی اخبار ایدیلمش.

الجواب: اوّلا، امكانات باشقەدر، وقوعات باشقەدر. هر بر فرد، چوق آدملری ئولدیرەبیلمەسی ممكندر. بو امكانِ قتل جهتیلە محكمەیە ویریلیرمی؟ هر بر كبریت، بر خانەیی یاقمسی ممكندر. بو یانغین امكانی ایلە كبریتلر امحا ایدیلیرمی؟ "

نور طلبەلری

[٦٨٢]

[بِاسْمِهٖ سُبْحَانَهُ]

قرآن حكیمڭ بر قانون اساسیسی اولان []وَلَا تَزِرُ وَازِرَةٌ وِزْرَ اُخْرٰی [] سرّیلە، بریسنڭ خطاسیلە باشقەسی، حتّی قرداشی دە اولسە مسئول اولاماز. شیمدی یوز اوتوز رسالەدە، بر تك رسالەنڭ یوز صحیفەسندە بر صحیفە، معنّد انصافسزلرڭ نظرندە خطا بیلە اولسە، او یوز بیڭ صحیفە اولان یوز اوتوز كتابی مسئول ایدەجك دنیادە بر قانون وارمی؟ حالبوكە بو اوتوز سنە ظرفندە، بش محكمە عین كتابلرە برائت ویرمشلر. هم ملاطیە مسئلەسی مناسبتیلە یگرمی محكمە دە علاقەدار اولمشدیلر. او یگرمی محكمە "بر صوچ بولامییورز" دیدكلری حالدە و آلتی یوز بیڭ نسخەسی داخلدە و خارجدە انتشار ایتدیگی حالدە، هیچ كیمسەیە ضرر ویرمەمسی و آوروپەدە اڭ یوكسك مكتب ایچندە نورڭ درسخانەسی دییە

آییردقلری یردە، خریستیانلر دخی اونلری اوقومسی و عالم اسلامدە غایت تقدیر ایلە انتشار ایتمسی، حتّی پاكستاندە چیقان "الصّدّیق" مجموعەسنڭ رسالۀ نورڭ بر رسالەسنی نشر ایدوب دیانت ریاستنە كوندرمسی و بو قدر انتشاریلە برابر، هیچ بر عالم اوڭا اعتراض ایتمەمسی كبی حقیقتلر كوسترییوركە، البتە دیانت دائرەسی نورلری حمایە ایتمك حقیقی بر وظیفەسیدر.

دیانت دائرەسی، مشیخت اسلامیّە كبی، یالڭز توركیەنڭ دین معلّمی دگل، بلكە عموم عالم اسلامە مشیخت اسلامیّە یرینە علاقەسی، نظارتی، مناسبتی وار. عالم اسلام او دیانت دائرەسنە قارشو تام حسن ظن ایتمك، سٓوء توهّم ایتمەمك، خصوصًا بو زماندە زیادە لزومی وار. هم دە توركیە ایلە اتّفاق ایتمەین اسلامی حكومتلردە، او مبارك دائرەیە قارشو سٓوء توهّم كلمەمسنە بیوك بر وسیلەسی اولان و عالم اسلامڭ هر طرفندە، بلكە آوروپەدە تقدیرە مظهر اولمش رسالۀ نور، او دیانت دائرەسنی هم شرفنی محافظە ایدییور، هم عالم اسلامە قارشو او دائرەنڭ بر اثری اولارق انتشاری غایت لازم و ضروری اولدیغنی، بو نقطەیی اهل وقوف تام نظرە آلسینلر. اونڭ ایچون بیچارە سعید النّورسی و نور طلبەلرندن یوز درجە زیادە دیانت ریاستی اعضالری، خواجەلری علاقەدار اولمق لازم. تاكە، رسالۀ نور دینسزلرڭ تعرّضلرینە قارشو محافظە و حمایە ایدیلسین. مكرّر برائتلر ویریلدیگی حالدە، انتشارینە مانع اولان دسیسەجیلری صوصدیرمق لازم.

سعید النّورسی