افندم، قصورلریمزڭ عفوینی تكرار رجا ایدر، حرمتلە ال و آیاقلریڭزدن اوپەرك دعا و همّتلریڭزی بكلرز، رجا ایدرز افندیمز.

بتون قرداشلر، خصوصًا رمضان و محمد یازیجی اللریڭزدن اوپرلر. دیگرلری آیری آیری عرض حرمت ایلە اللریڭزی و آیاقلریڭزی اوپرلر، افندیمز حضرتلری.

كوننلی حافظ محمد و نعمت خانم چوق سلام و حرمت ایدوب اللریڭزی آیریجە أوپویورلر.

استانبول نورجیلری و اونیورسیتە نورجیلری نامنە

عبد المحسن و ضیا و امین

صلاح الدّین چلبینڭ مكتوبنڭ بو پارچەسی مژدەلیدر. برای معلومات كوندریلدی.

(٥٨٣)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

بیوك منجی، بیوك داهی، بیوك مرشد، استاد مكرّممز افندیمز بدیع الزّمان حضرتلرینە،

دنیا ظلمتی طاغیلیر كبی، اللّٰە ذوالجلال حضرتلرینڭ مقدّر قیلدیغی سماوی آیتلردن ترشّح ایدن رسالۀ نورڭ او مقدّس وظیفەیی بحقٍّ یاپمەسندن طولایی ایماننی نورلاندیرانلرڭ شكرانلرینی تقدیم ایتمكلە، بیوك قصورلریمزڭ عفوینی رجا ایدرم.

١-عالم اسلامە و خریستیانیتە حقیقت قرآنیەیی و شرعیەیی اعلان ایتمەیە لایق اولان آیاصوفیەنڭ تكرار جامع اولمسی ایچون حاجی نظیف چلبی كبی ذاتلر، فاتحڭ استانبولی ضبطنڭ بش یوزنجی ییل دونومندە نماز قیلمەیە آچیلمەسنە چالیشمقدەدرلر. ان شٓاء اللّٰه موفّق اولاجغز.

٢-نجیب فاضل رسالۀ نورڭ سوزلر، مكتوبلر، لمعەلر، شعاعلر كبی سنوحاتلە یازیلمش آثاریڭزی عینًا و مكتوب و سائرە لاحقەلرە عائد قسملرینی دە بوكونكی ادبیاتلە یازابیلەجگنی سویلەدی. بو خصوصدە ضیا بگ قرداشمز دە یازاجقدر. نجیب بگ دییوركە: "استاد حضرتلری بنی قبول ایتسەیدی، بو مساعدەیی ویرردی" دییور. بو كرەكی استدعالرڭ صورتلرندەكی برقاچ كلمەیی دگیشدیرمكلە ضیا بگڭ عینًا یازیلمەسندەكی اصرارینە جانی صیقیلان نجیب فاضلە، "رسالۀ نورڭ اجزالرندە كلمە دگیشیكلگی اولماز، فقط استدعادە معنا دگیشمەمك شرطیلە قونابیلیر." یینە دییور:

"استادڭ اسلوبی بزجە خارقەدر. فقط بوكونكی منوّر دییە كچینن آدملر بو یارەیی بدیع الزّمانڭ اولمەسنە حیرت ایدەجك" دییە بر مثاللە بیان ایتدی. پادشاه كوزل بر البسە كییر و بر مجلسە كیدر. اورادە اجنبی، فرنك و سائرە سفیرلر، وكلالر وار. پادشاهڭ ایسقارپیننڭ اوزرینە بر ایپلك، بر توز اولسە، یاوری درحال اونی آلیر. ایشتە بو مثاللە نە دیمك ایستەدیگنی آڭلاتدی. بنجە دە سزە صورولمەسنە قرار ویریلدی.

٣- اسپارطەدن یگرمی قدر سوزلر كلدی. جلدلنوب سزە تقدیم ایدیلەجك.

٤-بزم جوشن الكبیر یازیلمشدر. یالڭز طبع ایدیلەجكدر. شیمدی كاغد آلاجغم. اون بش كون ظرفندە جلدە كلیر. همن سزە تقدیم ایدیلەجكدر.

٥- ضیا، محسن، امین بگ قرداشلریمز كنچلك رهبرینڭ كاغدلرینڭ تأمینی ایلە مشغولدرلر.

٦- جامع الازهرە، پاكستان سفیرینە، روما واتیقان پاپایە برر ذوالفقار هدیە ایدیلەجكدر.

٧-آلمانیەدە مسلمان رئیسی بَرْلین جامع امامنە بر ذوالفقار هدیە ایدیلمشدی. واسطە اولان حاجی بگ سویلەدی. برلین غزتەلرندە "غایت قیمتدار اولان بدیع الزّمان حضرتلرینڭ ذوالفقاری طیّارە آجنتەسی حاجی بگ طرفندن هدیە ایدیلمشدر" دییە یازیلمشدر.

٨- (سبیل الرّشاد ) و (بیوك طوغو) نڭ رسالۀ نورڭ نشرندەكی بیوك وظیفەلرینی تقدیر و تبریك ایدییورز. شیمدی دە اسلام نوری اسمندەكی بر مجموعە چیقارتیلاجق. ضیا و محسن بگلر دە علاقەداردرلر.

بورادەكی بتون قرداشلریمز مبارك ال و آیاقلریڭزدن أوپر. دعاڭزە محتاجز افندم حضرتلری. جناب حق ابدیًا راضی اولسون، سزدن و رسالۀ نور طلبەلرندن.

قصورلی و كناهكار طلبەڭز

عبد الرّحمن صلاح الدّین چلبی

استاد فاضلانەمز افندیمز حضرتلرینە،

افندم، بو یازیدن صوڭرە جامع الازهرە كتابلر حركت ایتمشدر. و شونلری كوندردك: ذوالفقار، یڭی كلن سوزلر مجموعەسی، تاریخچۀ حیات، یڭی حروف كوچك سوزلر.

عبد المحسن، ضیا، امین

(٥٨٤)

[بِاسْمِهٖ سُبْحَانَهُ]

مجموعەلرە كیرمەین مكتوباتی دخی ماكینە ایلە تكثیر ایتمك، اركانلرڭ مناسب كوردیگی قسملر تكثیر كاغدندە، خسروڭ پك پك قیمتدار تصحیحیلە یازیلمەسی بوكون خاطریمە كلدی. بردن عین زماندە نور أفەسی حاجی سامی كلدی. سامی مكتوبمدر.

س * ع

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق سوكیلی استادم افندم،

جانب والالرینە صوڭسز حرمتلریمی تقدیمدن صوڭرە، مبارك ید سعادتڭزی تقبیل ایدرم. عمر عافیتڭزی جناب حق و ربّ الفلق و فیّاض مطلق و تقدَّس حضرتلرندن استرجا و استرحام و استدعا ایدرم.

افندم، بندەڭز خادم قضاسنڭ كزر كویندن اولوب، اَلْیَوْمْ قونیەنڭ قرە آرسلان كویندە اقامت ایتمكدەیم. مذكور كویدە اماملق وظیفەسندە استخدام ایدیلمكدەیم. بوندن ایكی ماه مقدّم قونیەدە حافظ مصطفی افندینڭ پدری یورغانجی حاجی

محمد افندی دكّانندە قونوشمقدە ایكن، عصای موسیؑ اسملی نور منبعندن جریان ایدن بر كتاب مبارك ید عاجزانەمە واصل اولدی. بو محترم كتابی مطالعە ایتدم. عین زماندە آچیلان تازە بر كل كبی بتون لطائفم و روحانیتم آچیلدی. و بو كتاب مباركی بیتیردكدن صوڭرە ذوالفقار، سراج النّور، سكّۀ تصدیق غیبی، طلسملردن بر رسالە، اسكیشهر محكمە مدافعەسی كبی كتاب شریفلریڭزی اوقوینجە، كندی نفسمە خطابًا دیدم: "ای نفس، سن دنیا سكری ایلە مسكور اولدیغڭی بیل. محترم نورلری نورلر داهیسی اوتوز سنەدنبری تقسیمات نوردن طولایی محكمەلردە انفلاق ایدن بومبەلرڭ مثل رعد صدالرینی ایشیتمدڭمی؟" دییە نفسمی الزام و اتهام ایدرجەسنە بر زمان متأثّر اولدم. بو طرفدن دە الحمد للّٰە تعالی نور كمیسنڭ مَلّاحنە (یعنی قاپداننە) بر خدمتجیلك ویاخود بر كولە اولاجغمی فرض ایدرك فرحناك اولدم. لطفًا قبولنی و قبول بویورولمسنی ذات سامیلریڭزدن بكلرم.

رسالۀ نور ألمە كچدیگی كوندنبری هر آن طرفڭزە واروب ذات سامیلریڭزی زیارت ایتمك شرفیلە مشرّف اولمق آرزوسیلە یولە چیقاجغم زمان بر قبض، بر ثقلت، بر فتور، بر مسامحە حصولە كلییور. بونڭ سببنی آڭلایامدم. كندی كندیمە شویلە بر تفكّر ایتدم. هر حالدە بنم بو نفسم غایت كیرلی اولدیغندن، او عالی بحر أنوردە تطهیرە مستعد اولمادیغم ایچون جریان كلمییور دییە دوشونەبیلدم. معلوم عالیڭز افندم، الكتریك ماكینەلری چالیشدیغی حالدە لامبە بوزوق

اولنجە یانماز. دیگر طرفدن دە یعنی رسالۀ نور ماكینەلرندن سوزولمش عصای موسیؑ تزگاهندە نسج اولونان تازە لامبەلردن آلوب، ماسوا كیری ایلە كیرلنن لامبە جاملرینی دگیشدیرمەیە موفّق ایدن رحیم ذوالجلال، كریم ذوالكمال اولان ربّمزە مخلوقات عددنجە شكرلر اولسون.

بو تاریخدن یدی سنە مقدّم، مرحوم اولان پدرم محمد افندی رحمت اللّٰە علیە دن آلدیغم بر علم فطری ایلە، نفسمی جادّەء شریعت و طریقتنە دعوتە مجاهدە ایلە چالیشیركن و شریعت كتابلرینی مطالعە ایدوب اهل ایمانە سنّت احمدیەییؐ قارینجە قدرنجە عَلٰی قَدَرِ الامكان بیانە چالیشیركن، كفر مطلق و زندقە طوپی پاتلادی. مذكور طوپڭ غایت سملی دخاننی یاشاتان، امّتمڭ دجّالی بویوردیغی شخص، علمایی مسموم ایتدی.

معلوم عالیڭز، منظور فاضلانەڭز، امام غزالی؈ احیاسندە حدیث شریفلر یازمشدر. بندەڭز ٣٢٦ طوغوملی یم. پدرمدن آلدیغم تصوّف سیفی ایلە مذكور دجّاللر ایلە چوق حرب ایتدم. فقط كندی نفسمی مذكور سیفلە قتل ایدەمدیگمدن، بر ثمرە حاصل اولمدی. الحمد للّٰە تعالی، كفر مطلق و زندقە طوپندن ظهور ایدن زهرلی دومانی و آجی صداسنی نورلر صاعقەلرندن چیقان شِهابُ الرَّصد حقیقتلری منكرلری اسكات ایتدی. الحمد للّٰە تعالی، مؤمن موحّدینی دە و علمای عاملینی دە جادّەء اَظلَمدن جادّەء انوارە وضع ایتدی. اوتوز سنەدنبری چركین چهرەلی و غایت ناطقەلری آجی 〚اِنَّ اَنْكَرَ الْاَصْوَاتِ لَصَوْتُ الْحَمٖیرِ〛 صدالرینی توركیەدن آق دڭز و قرە دڭزڭ شمالندە صوصدیردی.

اولو تاڭریمزە حسابسز حمد اولسون، رسالۀ نوردن آلدیغمز پارلاق بر نورلە بتون مسلمانلر متنوّر اولمقدەدر. ان شٓاء اللّٰە الرّحمن نور رسالەلرینی نسج ایدن فابریقەنڭ مدیری و مأمورلری داها چوق نورلر صاچاجقلر. كندی نفسمە خطابًا دیرمكە: ای نفسم! اوتوز سنەدنبری قرآن عظیم الشّانڭ نداسنی یایان منادینڭ مثل رعد اولان نداسنی نەدن ایشیتمدڭ؟ بوندن ایكی ماه مقدّم عشقدن جناب كبریا و تقدَّس حضرتلرینە چوق شكر ایت. بو یوكسك استادیمزە حقدن عمر ایستە، طلبە اول، حتّی كولە اول، حتّی یولندە جانڭی فدا ایت، دیدم.

اَلْبَاقٖی هُوَ الْبَاقٖی

چوق كناهكار، عاجز، عبد حقیر، طلبە اولمق ایستەین و نور طلبەسی دفترینە كچدیگنی قطعیًّا بیلن طلبەڭز، قونیەنڭ قرە آرسلان كویندە اصلاً خادملی خطیب احمد

قصورلریمڭ عفوینی دیلرم، مبارك اللریڭزدن اوپرم. ١٢ كانون اوّل ١٣٦٩

برنجی مشكلم: معلوم منظور فاضلانەڭز باشقە كتابلردە، بالخاصّە علمای متكلّمین رحمت اللّٰە علیهم اجمعین، "اجتهاد قاپوسی قاپاندی" بویورویور. بوڭا دائر داها چوق مسئلەلردە مخالفت كورونویور.

ایكنجی مشكلم: بر حافظ، قرآن تلاوت ایدركن قرآنە متوجّه اولمقمی افضل، قبلەیە متوجّه اولمقمی؟

اوچنجیسی: ایسپیرتو ایلە قهوە، چای قایناتمق. دردنجی: قاضی خان روایتلە دورِ شرعی مسئلەسی اَبُو سَعٖیدْ اَلْخَادِمٖی بر كتابندە و علی افندی فتواسندە داها بر چوق كتابلردە معلومڭز تحریر ایدیلییور. بشنجی: بریسی بانقەلردن آلینان پارەلر. آلتنجیسی: بر زوج، زوجنی طلاق ثلاثە ایلە تطلیق ایتدكدن صوڭرە زوجی آخَرە وارمادن ناصل حلال اولور؟

یدنجی: زمانمزدە اَلْیَوْمْ موجود اولان مفتیلرڭ، واعظلرڭ حرمتی، قرآن عظیم الشان حرمتی ایلە ثابت اولان انحصارلر و سائرەدن كلن پارەلردن و شو حكومتدن آلدقلری پارە ناصل حلال اولور؟

افندم، عفو ایدیڭز، زمانمزدە بو مذكورات پك چوق لازم اولویور. لطفًا بو خصوصدە بر كتابڭزە محتاجم.

اَلْبَاقٖی هُوَ الْبَاقٖی

اللریڭزدن اوپرم.

(٥٨٥)

اسكی اصول مدرسە درسی ویرن وان طرفندن اورفەیە كلن و اورادە اسكان اولان ملّا حمیدڭ مكتوبیدر.

بِسْمِ اللّٰهِ الرَّحْمٰنِ الرَّحٖیمِ

مرشدیمز بدیع الزّمانڭ جانب عالیسنە،

هر شیئڭ جناب حقّە قارشو بر تسبیح شكرانەسی اولمقلە، تسبیح و شكرانەمی ایفا ایدییورم. بهاسنە قیمت تقدیری ممكن اولمایان بسملەء شریفكە، كتاب

و دفترلر باشنە قونویور. بناءً علیه شو مكتوبمڭ باشنی یشیل و پارلاق مركّبلە نقش و مزیَّن ایتدم. مودّتلی مخابرات آغیزلرندن قلملر دیللریلە عرض و محبّت ایدییورم. شول اللّٰە ذوالجلال حضرتلرینە مدح و ثنا جهتیلە صعوبات و كدوراتمز سرورە مبدَّل اولمەسندن طولایی حمد و ثنالر أیلرم.

خلقڭ اڭ شرفلیسی اولان ذات علوّ جنابە دە صلات و سلام ایلە انشراح حال و فرَحْیاب اولدیغمدن، صلات و سلاممی دائما اوزرلرینە و آل و اصحاب اوزرلرینە، كیجەلر قراردقجە، كوندوزلر آیدینلادقجە، دائما و مستمرًّا صلات و سلاملر أیلرم. بوندن صوڭرە، كوزل قوقولی تعظیمات فائقەملە دعا و ثنامی ذات عالی قدرلرینە اهدا و صباحلین عالمە نورینی اشراق ایدن كونش مثللو غایت دە منفعتلی حصّەلری ذات علوّ مئابڭزە لایق و مناسب كورەرك شو سطرلە افهام و تفهیمدن عاجز اولویورم. مع القصور قبولنی استرحام أیلرم.

زیرا نیجە ربّانی سرلر معدنی و نیجە صمدانی معرفتلر مخزنیسڭزكە، آنجق حدیث شریفدەكی (تَخَلَّقُوا بِاَخْلَاقِ اللّٰهِ وَبِاَخْلَاقِ رَسُولِ اللّٰهِ) سرّینە مظهر دوشن معرفت دریاسی و الطاف عنایت مئابی، امید و آرزوكشلرڭ ملجأ پناهی ذات ولیّ الاكرمیلرینە مخصوص و منتهی اولدیغندن، همای خدای متعال حضرتلری عمر و عافیتلرینی مُزداد و حَیَاتْبَخْشَایِ امید وصال و بو سایەدە بز عاجزلرینە ترحُّم بویورسون. مرسللر اولوسی حرمتی ایچون دعالریمز قبول بویورولسون. حضرتڭزدن دعای خیریەڭزی رجا و دائما نظریڭزدن غائب اولمایوب

مقدّس قلبڭزدە حاضر بولونمەمی نیاز ایلە اللریڭزی و آیاقلریڭزی أوپر، اللّٰە تعالی نڭ سلامنی سزلرە، طلبەلریڭزە، علماڭزە، اقرباڭزە، احبابلریڭزە تحیّە ایدییورم.

اگر آیاغڭز ترابنە یوز سورن فقیر بندەلرندن سؤٓال بویورولورسە، سزلرە اولان شوق و دینی بورجمی ایفا ایلە مكلّف و شكایتم ایسە ذات عالیڭزدن اومویورمكە، [بِقاعی] قَوْلنڭ قبولنڭ معناسنی اَسْتَعٖیذُ بِاللّٰهِ []وَلَقَدْ مَكَّنَّاهُمْ فٖیمَٓا اِنْ مَكَّنَّاكُمْ فٖیهِ [] قَوْلِ كریمندە خطیب شِیرْبٖینٖی تفسیرندەكی مشكلاتمڭ حلّنی و حال و احوالڭزە دائر خبرلرلە سریعًا جوابڭزی رجا ایدییورم. عبد القادر القدری و جمیع طلبەلرملە اللریڭزی و آیاقلریڭزی أوپر، خیر دعاڭزی دریغ ایتمەمەڭزی تمنّی و استرحام ایدییورز. آرتق سز دە ایفا بویوریڭز، (هٰذَا قَوْلُ الْبِقَاعٖی.. اِلٰی اٰخِرِهٖ) حلّ و تفسیری استاد اكرمیلرندن مخصوص و معطوفدر.

بو عربجە مكتوبی توركجەیە ترجمە ایدن طلبەڭز، عین درجە حرمتلرلە خاك پایە یوز سورر و صوڭندە (وَاِنّٖی وَاَسْطَارٍ سُطِرْنَ سَطْرًا مُنْلَا عَبْدِ الْحَمٖیدِ لَقَائِلٌ یاَ نَصْرُ نَصْرٌ نَصْرًا) رَجَزیلە كلامنە نهایت.

چوق قصورلی طلبەڭزدن آتابگلی حسن وهبی

[٥٨٦]

[بِاسْمِهٖ سُبْحَانَهُ]

عزیز قرداشلریمز،

آووقاتمز تمییزە بر استدعا یاپمش و آفیوندەكی كتابلریمزڭ تمامنی مصادرە ایدن قرارنامە ایلە بڭا كوندردی. بن دە استدعا و قرارنامەیی آنقرەدەكی نورجیلرە بو خلاصە ایلە برای معلومات كوندردم. بو خلاصە دە سزە كوندریلدی.

س * ع

محكمۀ كبرایە شكوا و مدافعاتڭ بر حاشیەسی اولان پارچەنڭ خلاصەسیدر.

[سزە بو دفعە محكمۀ تمییزە كوندردیگمز -آووقاتڭ تمییز محكمەسنە كوندردیگی- استدعانڭ صورتیدر. و دهشتلی قرارنامەیە قارشو خلاصەسی، سزڭ طرفڭزدن بو مأٓلدە، مصادرە قرارنامەسنە مقابل دیندار مبعوثلرە ویررسڭز.]

بو طرزدە مصادرە، نە درجە قانونە مخالف و دموقرات حكومتنی طانیمامق و عدلیە باقاننڭ ویردیگی امری نە درجە دیڭلەمدكلرینی و اهمّیت ویرمدكلرینی كوسترییور. و عدلیە عدالتی خارجندە دهشتلی بر غرض حكم ایدییور.

اوت، الم و اضطرابلر یوكلی بولونان و كتابلریمزڭ اللرندەكی تمامنی، بیڭلر كلمەدن بر ایكی كلمەیی صوچ موضوعی بهانەسیلە ویرمك ایستەمدكلرینی و بو صورتلە نورلرڭ نشرینە مانع اولمق ایستەدكلرینی و صوچ دییە كوستردكلری

نقطەلردە، بزم طرفمزدن مدافعاتمزدە، اونلرڭ سكسان بر خطالری خطا صواب- جدولندە اثبات ایدیلمكلە آچیق غرضكارلقلرینڭ كوستریلدیگنی..

هم اَلْیَوْمْ یاساق اولمایان یوز بیڭلر تفسیرلردە یازیلی بولونان تستّر و ارثیت حقّندەكی ایكی آیتڭ برقاچ سطرلق تفسیری یوزندن، دنیادە هیچ بر قانونڭ مساعدە ایتمدیگی عجیب بر ظلم ایلە، درت یوز صحیفەلك ذوالفقار مجموعەسنی مصادرە ایدوب بزە ویرمەمك صورتیلە بر ظلم ارتكاب ایتدكلرینی..

هم آفیوندە ایكی سنە اللرندە قالان بتون رسالۀ نورڭ پارچەلری، داها اوّلدن هم دڭزلی، هم آنقرە، هم اسپارطە محكمەلرندە برائت ایتدیریلوب صاحبلرینە اعادە ایدیلدیگنی و بلآخرە ذوالفقار و عصای موسی یی رخصتسز نشر بهانەسیلە اسپارطە حكومتی مصادرە ایدوب درت سنە ضبط ایتدكدن صوڭرە، هیچ بری نقصان اولمادن یوز یتمش مجموعەیی بزە اعادە ایتدكلرینی..

و بزم اڭ مهم صوچمز، رسالۀ نورڭ محرم بر پارچەسندە -اللی سنە اوّل- بر حدیثڭ تفسیرندە، جبری قانونلرلە شاپقەیی كییدیرن و دین اسلامی بو مبارك تورك ملّتندن قالدیرمق ایچون لوزان معاهدەسندە سوز ویرن و پك شدّتلی و دهشتلی هجوملرینە رغمًا هیچ بر حقیقی مسلمان توركی پروتستان یاپامایان و ملّت اسلام ایچون پك چوق ضررلی اولدیغنی، افعالیلە اثبات ایدن و حدیث شریفڭ خبر ویردیگی او مدهش شخص كندیسی اولدیغنی، حیات و مماتیلە كوسترن م. ك.‘ لە،

بر محرم اثردە دین ییقیجی، سفیان دیدیگمزی و قلبلردەكی سوكیسنی بوزمەیە چالیشدیغمزی اسناد ایدوب، قرارنامەدە محكومیتمزە سبب اولدیغنی و محكمۀ تمییزڭ آفیون محكمەسنڭ بو حقسز قرارینی بوزمسیلە یڭیدن كورولمگە باشلانان دعوا، عفو قانونی چیقمەسیلە، دوسیەلریلە و بتون نور اثرلریلە چوروتولمك ایچون مخزنە آتیلدیغنی و بلآخرە عدلیە باقانلغنجە، صونغورڭ كشیدە ایتدیگی تلغرافی اوزرینە بتون اثرلرڭ ویریلمەسنە امر ویریلدیگی حالدە، هیچ بری اعادە ایدیلمەیەرك، یڭیدن صوچ موضوعی اولانلرینی تفریق ایتمك، بلكە تمامنی صوچ موضوعی یاپمق ایستەمەلریلە رسالۀ نورڭ تام سربستیسنە مانع اولمق ایستەدكلرینی بیلدیرن و اوچ سنەدنبری بزی آلداتان بویلە اشخاصە، نورڭ ایشلرینی بیراقمامق ایچون باش باقان و عدلیە باقاننڭ نظر دقّتلرینە عرض ایدیلمك اوزرە بو مأٓلدە عدالتپرور دموقراتلرە استدعا یازیلمەسی، وطن و ملّت منفعتنە لزومی وار.

لفظۀ جلال اوزرندە اعجازی كوزلە كورولن قرآنمزی آلمق ایچون استدعا ایلە دیانت ریاستنە مراجعت ایدیلمسی كبی، صرف غرضلە و اجنبی پارماغیلە علیهمزە دونن ایشلردن و اشكنجەلردن بزی و عالم اسلامی پك چوق سویندیرن دموقراتلرڭ دقّت ایدوب نورجیلری قورتارمەلرینی، حرّیتپرور حكومتدن رجا ایدرز.

س * ع

(٥٨٧)

[بِاسْمِهٖ سُبْحَانَهُ]

عجلە و طار وقتدە یازیلدی، قصورە باقماییڭز.

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[اوّلا] ولادت فخر عالمڭؐ، كائناتی تنویر كیجەسی و اونڭلە عالم اسلامڭ معنوی بیوك بر بایرامنڭ فجری اولارق سزلری بتون روح و جانمزلە تبریك ایدییورز.

[ثانیًا] حاجی سامی نڭ سزە خبر ویردیگی مكتوبات تكثیر ایدیلسین. یالڭز مكتوباتدن باشقە رسالەلردە تكثیر اولونان پارچەلر یازیلماسین. هم یگرمی طوقوزنجی مكتوبڭ توافقاتە دائر قسملری، هم یگرمی سكزنجی مكتوبڭ یینە توافقاتە دائر قسمی هركسە فائدەسی اولمدیغندن شیمدیلك یازیلماسین. كوچك مكتوبلردن اوننجی مكتوب سوزلر مجموعەسنە كیردیگندن یازیلماسین. و اون برنجی مكتوبڭ ایكنجی مسئلەسی، بارلە یایلەسی ایلە باشلایان قسم، او دە سوزلر مجموعەسنە كیردیگی ایچون یازیلماسین.

یگرمنجی مكتوبڭ باشدەكی صحیفەسی یازیلدقدن صوڭرە، برنجی مقام تا ایكنجی مقامە قدر عصای موسی یە كیردیگی ایچون یازیلماسین. داها مناسب كوردیگڭز طرزدە یاپارسڭز. بعض جملەلر ویا فقرەلری دە چیقارابیلیرسڭز. ویا علاوە ایدەبیلیرسڭز.