جملە قرداشلریمز، سلام و حرمتلە ایكی اللریڭزدن أوپر، خیرلی دعالریڭزی بكلرز افندیمز.

اسكیشهر نور طلبەلری نامنە پك عاجز و دعالریڭزە محتاج

عثمان طوپراق و شكری و حافظ عثمان

[٦١٩]

[بِاسْمِهٖ سُبْحَانَهُ]

بِسْمِ اللّٰهِ الرَّحْمٰنِ الرَّحٖیمِ

اهل ایمان آخرت همشیرەلرم اولان قادینلر طائفەسیلە بر محاورەدر.

بعض ولایتلردە، طائفۀ نسادن صمیمی و حرارتلی بر صورتدە نورلرە قارشو علاقەلرینی كوردیگم.. و حدّمدن پك زیادە، اونلرڭ نورلرە عائد درسلریمە اعتمادلرینی بیلدیگم صیرەلردە، مبارك اسپارطەیە و معنوی مدرسة الزّهرایە اوچنجی دفعە كلدیگم زمان ایشیتدمكە، او مبارك آخرت همشیرەلرم اولان طائفۀ نسا، بندن بر درس بكلەیورلرمش. كویا وعظ صورتندە جامعلردە اونلرە بر درسم اولاجق. حالبوكە بن درت بش وجهلە خستەیم. و هم ذهنم پریشان. حتّی قونوشمەیە و دوشونمەیە اقتدارسز بولوندیغم حالدە، بو كیجە شدّتلی بر اخطار ایلە قلبمە كلدیكە:

مادام اون بش سنە اوّل كنچلرڭ ایستەمەلریلە كنچلك رهبرینی اونلر ایچون یازدق. و پك چوق استفادە ایدیلدی. حالبوكە خانملر طائفەسی، كنچلردن داها زیادە

بو زماندە اویلە بر رهبرە محتاجدرلر. بن دە بو اخطارە قارشو، غایت پریشان و ضعف و عجزملە برابر [ اوچ نكتە] ایلە غایت مختصر بعض لزوملی مادّەلری، او مبارك همشیرەلریمە و معنوی كنچ اولادلریمە بیان ایدییورم.

[برنجی نكتە] رسالۀ نورڭ اڭ مهم بر اساسی شفقت اولمەسندن، نسا طائفەسی شفقت قهرمانلری بولونمەلری جهتیلە، داها زیادە رسالۀ نورلە فطرتًا علاقەداردرلر. و للّٰە الحمد بو فطری علاقەدارلق چوق یرلردە حسّ ایدیلییور. بو شفقتدەكی فداكارلق، حقیقی بر اخلاص و مقابلەسز بر فداكارلق معناسنی افادە ایتدیگندن، شیمدی بو زماندە پك چوق اهمّیتی وار.

اوت، بر والدە ولدینی تهلكەدن قورتارمق ایچون هیچ بر اجرت ایستەمدن روحنی فدا ایتمسی و حقیقی بر اخلاص ایلە وظیفۀ فطریەسی اعتباریلە كندینی اولادینە قربان ایتمسی كوسترییوركە، خانملردە غایت یوكسك بر قهرمانلق وار. بو قهرمانلغڭ انكشافیلە حیات دنیویەسنی، هم دە حیات ابدیەسنی اونڭلە قورتارابیلیر. فقط بعض فنا جریانلرلە، او قوّتلی و قیمتدار سجیە انكشاف ایتمز. ویاخود سٓوء استعمال ایدیلیر. یوزر نمونەلرندن بر كوچك نمونەسی شودر: او شفقتلی والدە، چوجغنڭ حیات دنیویەدە تهلكەیە كیرمەمسی و استفادە و فائدە كورمسی ایچون هر فداكارلغی نظرە آلیر، اویلە تربیە ایدر. "اوغلم پاشا اولسون!" دییە، بتون مالنی ویرر. حافظ مكتبندن آلیر، آوروپەیە كوندریر. فقط او چوجغڭ حیات ابدیەسی تهلكەیە كیردیگنی دوشونەمییور. و دنیا حپسندن قورتارمغە

چالیشییور، جهنّم حپسنە دوشمەسنی نظرە آلمییور. فطری شفقتڭ تام ضدّی اولارق او معصوم چوجغنی، آخرتدە شفاعتجی اولمق لازم كلیركن، دعواجی ایدییور. او چوجق، "نە ایچون بنم ایمانمی تقویە ایتمدڭ؟ بو هلاكتمە سببیت ویردڭ؟" دییە شكوا ایدەجك. دنیادە دە تربیۀ اسلامیّەیی تام آلمدیغی ایچون والدەسنڭ خارقە شفقتنڭ حقّنە قارشو لایقیلە مقابلە ایدەمز. بلكە دە چوق قصور ایدر.

اگر حقیقی شفقت سٓوء استعمال ایدیلمەیەرك، بیچارە ولدینی حپس ابدی اولان جهنّمدن و اعدام ابدی اولان ضلالت ایچندە ئولمكدن قورتارمغە او شفقت سرّیلە چالیشسە، او ولدڭ بتون ایتدیگی حسناتنڭ بر مثلی، والدەسنڭ دفتر اعمالنە كچەجگندن، والدەسنڭ وفاتندن صوڭرە هر وقت حسناتلریلە روحنە نورلر یتیشدیردیگی كبی، آخرتدە دە، دگل دعواجی اولمق، بتون روح و جانیلە شفاعتجی اولوب ابدی حیاتدە اوڭا مبارك بر اولاد اولور.

اوت، انسانڭ اڭ برنجی استادی و تأثیرلی معلّمی، اونڭ والدەسیدر. بو مناسبتلە بن كندی شخصمدە قطعی و دائما حسّ ایتدیگم بو معنایی بیان ایدییورم:

بن بو سكسان سنە عمرمدە، سكسان بیڭ ذاتلردن درس آلدیغم حالدە، قسم ایدییورمكە، اڭ اساسلی و صارصیلماز و هر وقت بڭا درسنی تازەلر كبی مرحوم والدەمدن آلدیغم تلقینات و معنوی درسلردركە، او درسلر فطرتمدە، عادتا مادّی وجودمدە چكردكلر حكمندە یرلشمش. سائر درسلرم، او چكردكلر

اوزرینە بنا ایدیلدیگنی عینًا كورویورم. دیمك بر یاشمدەكی فطرتمە و روحمە مرحوم والدەمڭ درس و تلقیناتنی، شیمدی بو سكسان یاشمدەكی كوردیگم بیوك حقیقتلر ایچندە برر چكردك اساسیە مشاهدە ایدییورم.

[ازجملە] مسلك و مشربمڭ درت اساسندن اڭ مهمّی اولان شفقت ایتمك.. و رسالۀ نورڭ دە اڭ بیوك حقیقتی اولان آجیمق و مرحمت ایتمەیی، او والدەمڭ شفقتلی فعل و حالندن و معنوی درسلرندن آلدیغمی یقینًا كورویورم. اوت، بو حقیقی اخلاص ایلە حقیقی بر فداكارلق طاشییان والدەلك شفقتی، سٓوء استعمال ایدیلوب، معصوم چوجغنڭ الماس خزینەسی حكمندە اولان آخرتنی دوشونمەیەرك، موقّت، فانی شیشەلر حكمندە اولان دنیایە، او چوجغڭ معصوم یوزینی چویرمك و بو شكلدە اوڭا شفقت كوسترمك، او شفقتی سٓوء استعمال ایتمكدر.

اوت، قادینلرڭ شفقت جهتیلە بو قهرمانلقلرینی هیچ بر اجرت و هیچ بر مقابلە ایستەمەیەرك، هیچ بر فائدۀ شخصیە، هیچ بر كوستریش معناسی اولمایارق روحنی فدا ایتدكلرینە، او شفقتڭ كوچوجك بر نمونەسنی طاشییان بر طاووغڭ، یاوروسنی قورتارمق ایچون آسلانە صالدیرمسی و روحنی فدا ایتمسی اثبات ایدییور.

شیمدی تربیۀ اسلامیەدن و اعمال اخرویەدن اڭ قیمتلی و اڭ لزوملی اساس، اخلاصدر. بو چشیت شفقتدەكی قهرمانلقدە او حقیقی اخلاص بولونویور.

اگر بو ایكی نقطە او مبارك طائفەدە انكشافە باشلاسە، دائرۀ اسلامیّەدە پك بیوك بر سعادتە مدار اولور. حالبوكە ارككلرڭ قهرمانلقلری مقابلەسز اولامییور. بلكە، یوز جهتدە مقابلە ایستەیورلر. هیچ اولمازسە، شان و شرف ایستەیورلر. فقط مع التّأسّف بیچارە مبارك طائفۀ نسائیّە، ظالم ارككلرینڭ شرلرندن و تحكّملرندن قورتولمق ایچون، باشقە بر طرزدە، ضعفیّتدن و عجزدن كلن باشقە بر نوعدە ریاكارلغە كیرییورلر.

[ایكنجی نكتە] بو سنە انزوادە ایكن و حیات اجتماعیەدن چكیلدیگم حالدە، بعض نورجی قرداشلریمڭ و همشیرەلریمڭ خاطرلری ایچون دنیایە باقدم. بنملە كوروشن اكثر دوستلردن، كندی عائلوی حیاتلرندن شكوالر ایشیتدم، "ایواه!" دیدم. "انسانڭ، خصوصًا مسلمانڭ تحصّنگاهی و بر نوع جنّتی و كوچك بر دنیاسی عائلە حیاتیدر. بو دەمی بوزولمەیە باشلامش؟" دیدم. سببنی آرادم، بیلدمكە:

ناصل، اسلامیتڭ حیات اجتماعیەسنە و طولاییسیلە دین اسلامە ضرر ویرمك ایچون كنچلری یولدن چیقارمق و كنچلك هوساتیلە سفاهتە سوق ایتمك ایچون بر ایكی قومیتە چالیشییورمش. عینًا اویلە دە، بیچارە نسا طائفەسنڭ غافل قسمنی دخی یاڭلیش یوللرە سوق ایتمك ایچون بر ایكی قومیتەنڭ تأثیرلی بر صورتدە پردە آلتندە چالیشدیغنی حسّ ایتدم و بیلدمكە، بو ملّت اسلامە بر دهشتلی ضربە، او جهتدن كلییور. بن دە سز همشیرەلریمە و كنچلریڭز

اولان معنوی اولادلریمە قطعیًّا بیان ایدییورمكە: قادینلرڭ سعادت اخرویەسی كبی، سعادت دنیویەلری دە و فطرتلرندەكی علوی سجیەلری دە بوزولمقدن قورتولمەنڭ چارۀ یگانەسی، دائرۀ اسلامیەدەكی تربیۀ دینیّەدن باشقە یوقدر!

روسیەدە او بیچارە طائفەنڭ نە حالە كیردیگنی ایشیتییورسڭز. رسالۀ نورڭ بر پارچەسندە دینیلمشكە: عقلی باشندە اولان بر آدم، رفیقەسنە محبّتنی و سوكیسنی، بش اون سنەلك فانی و ظاهری حسن جمالنە بنا ایتمز. بلكە قادینلرڭ حسن جمالنڭ اڭ كوزلی و دائمیسی، اونڭ شفقتنە و قادینلغە مخصوص حسن سیرتنە سوكیسنی بنا ایتملی. تاكە، او بیچارە اختیارلاندقجە، قوجەسنڭ محبّتی اوڭا دوام ایتسین. چونكە اونڭ رفیقەسی، یالڭز دنیا حیاتندەكی موقّت بر یاردیمجی رفیقە دگل، بلكە حیات ابدیەسندە ابدی و سویملی بر رفیقۀ حیات اولدیغندن، اختیارلاندقجە داها زیادە حرمت و مرحمت ایلە بربرینە محبّت ایتمك لازم كلییور. شیمدیكی تربیۀ مدنیە پردەسی آلتندەكی حیوانجەسنە موقّت بر رفاقتدن صوڭرە، ابدی بر مفارقتە معروض قالان او عائلە حیاتی، اساسیلە بوزولویور.

هم رسالۀ نورڭ بر جزئندە دینیلمشكە: بختیاردر او آدمكە، رفیقۀ ابدیەسنی غائب ایتمەمك ایچون، صالحە زوجەسنی تقلید ایدر، او دە صالح اولور. هم بختیاردر او قادینكە، قوجەسنی متدیّن كورور، ابدی دوستنی و آرقداشنی غائب ایتمەمك ایچون، او دە تام متدیّن اولور، سعادت دنیویەسی ایچندە سعادت اخرویەسنی قزانیر.

بدبختدر او آدمكە، سفاهتە كیرمش زوجەسنە اتّباع ایدر، واز كچیرمەیە چالیشماز، كندیسی دە اشتراك ایدر. بدبختدر او قادینكە، زوجنڭ فسقنە باقار، اونی باشقە بر صورتدە تقلید ایدر. ویل او زوج و زوجەیەكە، بربرینی آتشە آتیلمقدە یاردیم ایدرلر. یعنی مدنیّت فانتازیەلرینە بربرینی تشویق ایدرلر.

ایشتە، رسالۀ نورڭ بو مأٓلدەكی جملەلرینڭ معناسی بودركە: بو زماندە عائلە حیاتنڭ و دنیوی و اخروی سعادتنڭ و قادینلرڭ دە علوی سجیّەلرینڭ انكشافنڭ مسبّبی، یالڭز دائرۀ شریعتدەكی آداب اسلامیتلە اولابیلیر.

شیمدی عائلە حیاتندە اڭ مهم نقطە بودركە، قادین، قوجەسندە فنالق و صداقتسزلك كورسە، قوجەسنڭ عنادینە عائلە دوستلغی اولان صداقت و امنیّتی بوزسە، عینًا عسكریەدەكی اطاعتڭ بوزولمەسی كبی، او عائلە حیاتنڭ فابریقەسی دە زیر و زبر اولور. بلكە او قادین، ألندن كلدیگی قدر قوجەسنڭ اصلاحنە چالیشملیدركە، ابدی آرقداشنی قورتارسین. یوقسە او دە، كندینی آچیقلق و صاچیقلقلە باشقەلرە كندینی كوسترمگە و سودیرمگە چالیشسە، هر جهتلە ضرر ایدر.

چونكە حقیقی صداقتی بیراقان، دنیادە جزاسنی كورور. چونكە نامحرملرڭ نظرندن فطرتی قورقار، صیقیلیر، چكینیر. نامحرم یگرمی اركگڭ اون سكزینڭ نظرندن استثقال ایدر. كندینە باقمەلرندن صیقیلیر. اركك ایسە، نامحرم یوز قادیندن، آنجق بریسندن استثقال ایدر، باقمەسندن صیقیلیر. قادین

او جهتدە عذاب چكدیگی كبی، صداقتسزلك اتهامی آلتنە كیرر. ضعفیتیلە برابر، حقوقنی محافظە ایدەمز.

[الحاصل] ناصلكە قادینلر قهرمانلقدە، اخلاصدە، شفقت اعتباریلە ارككلرە بڭزەمدكلری كبی، ارككلر دە او قهرمانلقدە، اونلرە یتیشەمییورلر. اویلە دە او معصوم خانملر دخی، سفاهتدە هیچ بر وجهلە ارككلرە یتیشەمزلر. اونڭ ایچون فطرتلریلە و ضعیف خلقتلریلە نامحرملردن شدّتلی قورقارلر و چارشاف آلتندە صاقلانمەیە كندیلرینی مجبور بیلیرلر. چونكە اركك، سكز دقیقە ذوق و لذّت ایچون سفاهتە كیرسە، آنجق سكز لیرە قدر بر شی ضرر ایدر. فقط قادین، سكز دقیقە سفاهتدەكی ذوقڭ جزاسی اولارق، دنیادە دخی سكز آی آغیر بر یوكی قارنندە طاشیر. و سكز سنە دە او حامیسز چوجغڭ تربیەسنڭ مشقّتنە كیردیگی ایچون، سفاهتدە ارككلرە یتیشەمز. یوز درجە فضلە جزاسنی چكر.

آز اولمایان بو نوع وقوعات كوسترییوركە، مبارك طائفۀ نسائیّە، فطرتًا یوكسك اخلاقە منشأ اولدیغی كبی، فسق و سفاهتدە دنیا ذوقی ایچون قابلیتلری یوق حكمندەدر. دیمك اونلر، دائرۀ تربیۀ اسلامیە ایچندە مسعود بر عائلە حیاتنی كچیرمگە مخصوص بر نوع مبارك مخلوقلردر. بو مباركلری افساد ایدن قومیتەلر قهر اولسونلر! اللّٰه بو همشیرەلریمی دە بو سرسریلرڭ شرلرندن محافظە أیلەسین. آمین.

همشیرەلرم! محرمجە بو سوزیمی سزە سویلەیورم: معیشت دردی ایچون، سرسری، اخلاقسز، فرنك مشرب بر قوجەنڭ تحكّمی آلتنە كیرمكدن ایسە، فطرتڭزدەكی اقتصاد و قناعتلە، كویلی معصوم قادینلرڭ، نفقەلرینی كندیلری چیقارمق ایچون چالیشمەلری نوعندن، كندیڭزی ادارەیە چالیشیڭز، صاتمغە چالیشماییڭز. شاید سزە مناسب اولمایان بر اركك قسمت اولسە، سز قسمتڭزە راضی اولیڭز و قناعت ایدیڭز. ان شٓاء اللّٰه رضاڭز و قناعتڭزلە او دە اصلاح اولور. یوقسە شیمدی ایشیتدیگم كبی، محكمەلرە بوشانمق ایچون مراجعت ایدەجكسڭز. بو دە، حیثیت اسلامیەیە و شرف ملّیەمزە یاقیشماز.

[اوچنجی نكتە] عزیز همشیرەلرم! قطعیًّا بیلیڭزكە: دائرۀ مشروعەنڭ خارجندەكی ذوقلردە، لذّتلردە، اون درجە اونلردن زیادە ألملر و زحمتلر بولوندیغنی، رسالۀ نور یوزر قوّتلی دلیللرلە، حادثاتلرلە اثبات ایتمشدر. اوزون تفصیلاتی رسالۀ نوردە بولابیلیرسڭز.

[ازجملە] كوچك سوزلردن آلتنجی، یدنجی، سكزنجی سوزلر و كنچلك رهبری، بنم بدلمە سزلرە تام بو حقیقتی كوسترەجك. اونڭ ایچون دائرۀ مشروعەدەكی كیفە اكتفا ایدیڭز و قناعت كتیریڭز. سزڭ خانەڭزدەكی معصوم اولادلریڭزلە معصومانە صحبت، یوزر سینامەدن داها زیادە ذوقلیدر.

هم قطعیًّا بیلیڭزكە، بو حیات دنیویەدە حقیقی لذّت، ایمان دائرەسندەدر و ایماندەدر. و اعمال صالحەنڭ هر بریسندە بر معنوی لذّت وار. و ضلالت

و سفاهتدە، بو دنیادە دخی غایت آجی و چركین ألملر بولوندیغنی، رسالۀ نور یوزر قطعی دلیللرلە اثبات ایتمشدر. عادتا ایماندە بر جنّت چكردگی و ضلالتدە و سفاهتدە بر جهنّم چكردگی بولوندیغنی، بن كندم چوق تجربەلرلە و حادثەلرلە عین الیقین كورمشم. و رسالۀ نوردە بو حقیقت تكرار ایلە یازیلمش. اڭ شدید معنّد و معترضلرڭ النە كیروب، هم رسمی اهل وقوفلر و محكمەلر او حقیقتی جرح ایدەمەمشلر. شیمدی سزڭ كبی مبارك و معصوم همشیرەلریمە و اولادلرم حكمندە كوچكلریڭزە، باشدە تستّر رسالەسی و كنچلك رهبری و كوچك سوزلر بنم بدلمە سزلرە درس ویرسین.

بن ایشیتدمكە، بنم سزە جامعدە درس ویرمكلگمی آرزو ایدییورسڭز. فقط بنم پریشانیتملە برابر خستەلغم و چوق اسباب، بو وضعیتە مساعدە ایتمییور. بن دە سزڭ ایچون یازدیغم بو درسمی اوقویان و قبول ایدن بتون همشیرەلریمی، بتون معنوی قزانچلریمە و دعالریمە نورڭ شاكردلری كبی داخل ایتمەیە قرار ویردم. اگر سز بنم بدلمە رسالۀ نوری قسمًا الدە ایدوب اوقوسەڭز ویا دیڭلەسەڭز، او وقت قاعدەمز موجبنجە بتون قرداشلریڭز اولان نور شاكردلرینڭ معنوی قزانچلرینە و دعالرینە دە حصّەدار اولورسڭز. بن شیمدی داها زیادە یازاجقدم، فقط چوق خستە و چوق ضعیف و چوق اختیار و تصحیحات كبی چوق وظیفەلرم بولوندیغندن، شیمدیلك بو قدرلە اكتفا ایتدم.

اَلْبَاقٖی هُوَ الْبَاقٖی

دعاڭزە محتاج قرداشڭز سعید النّورسی

[٦٢٠]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم و معنوی مدرسة الزّهرانڭ نور شاكردلری،

بن اسپارطەیە كلدیگم وقت، اسپارطەدە امام خطیب و واعظ مكتبنڭ آچیلاجغنی خبر آلدم. او مكتبە قید اولاجق طلبەلرڭ اكثریسی نورجی اولمەلری مناسبتیلە، او مكتبڭ جوارندە غیر رسمی بر صورتدە بر نور مدرسەسی آچیلوب، او مكتبی بر نوع مدرسۀ نوریە یاپمق فكریلە بر خاطرە قلبمە كلدی. بر ایكی كون صوڭرە، كویا بر درس ویرەجگم دییە اطرافدە شایع اولمەسیلە، او درسمی دیڭلەمك ایچون رجال و نسا قافلەلرینڭ اطرافدن كلمەلریلە آڭلاشیلدیكە، بویلە نیم رسمی و عمومی بر مدرسۀ نوریە آچیلسە، او درجە غلبەلق و تهاجم اولاجقكە، قابل اولمایاجق. آفیوندە محكمەیە كیتدیگمز وقتكی كبی، پك چوق لزومسز اجتماعلر اولمق احتمالی بولوندیغندن، او خاطرە ترك ایدیلدی. قلبە بو ایكنجی حقیقت اخطار ایدیلدی. حقیقت دە شودر:

هر بر آدم، اگر خانەسندە درت بش چولوق چوجغی بولونسە، كندی خانەسنی بر كوچك مدرسۀ نوریەیە چویرسین. اگر یوقسە، یالڭز ایسە، چوق علاقەدار قومشولرندن اوچ درت ذات برلشسین و بو هیئت، بولوندقلری خانەیی كوچك بر مدرسۀ نوریە اتّخاذ ایتسین. هیچ اولمازسە ایشلری و وظیفەلری اولمدیغی وقتلردە، بش اون دقیقە دخی اولسە، رسالۀ نوری اوقومق ویا دیڭلەمك

ویا یازمق جهتیلە بر مقدار مشغول اولسەلر، حقیقی طلبۀ علومڭ ثوابلرینە و شرفلرینە مظهر اولدقلری كبی، اخلاص رسالەسندە یازیلان بش نوع عبادتە مظهر اولورلر. حقیقی علم طلبەلری كبی، اونلرڭ معیشتلرینی تأمین خصوصندەكی عادی معاملاتلری دە بر نوع عبادت حكمنە كچەبیلیر دییە قلبە اخطار ایدیلدی. بن دە قرداشلریمە بیان ایدییورم.

اَلْبَاقٖی هُوَ الْبَاقٖی

خستە و دعاڭزی طلب ایدن قرداشڭز

سعید النّورسی

(٦٢١)

صوڭ زماندە دینی جریدەلردە نشر ایدیلمش، غایت اهمّیتلی بر ذاتڭ بدیع الزّمان سعید النّورسی حقّندە بر مقالەسیدر.

بدیع الزّمان سعید النّورسی

بیوك و داهی آدملرڭ بشیگی اولان توركیە، شیمدی یە قدر نە قدر مبذول مجاهدلر، مجدّدلر و بتون معناسیلە بیوك انسانلر كورمشدر. اونلرڭ ادراك ایتدكلری حیات شرطلری و كوردكلری اعتبار و بولدقلری و مظهر اولدقلری حرمت، قدِر و قیمتلرینە اصلا نقیصە ویرمەمكلە برابر، یورودكلری حق یولندە محقّقكە كندیلرینە بیوك قولایلقلر تأمین ایتمشلردر. بو شرطلرڭ معكوس تجلّیسنە و ظلملرڭ اڭ آغیرینە معروض قالدیغمز شو كچمش یگرمی سكز ییل بزە

آغیر مجادلە و مجاهدەلر ایچندە یوغرولمش، دعواسنڭ و ایماننڭ عظمتندن الهام آلمش و بیوكلگنی دنیانڭ اڭ اوجرا كوشەلرینە یایمش بر داهی، بر نور و فضیلت تمثالی اولان سعید النّورسی یی هدیە ایتمشدر.

نوری، پك چوق مظلَم وجدانلری آیدینلاتمش، قدرتی، پك چوق ضعیف ایمانلی انسانلرە جسارت ویرمش، دهاسی، پك چوق نصیبسز انسانلرڭ روحنە الهام سرپمش اولان بیوك داهی، هیچ شبهە یوقدركە، سعید النّورسی حضرتلریدر. اوندن فضیلت و فداكارلق درسی آلان، پك چوق یولنی شاشیرمش انسانلر، كندیلرینی مسعود و آیدینلق بر شاهراهڭ اورتەسندە بولمشلردر. دهاسی و جلادتی قدر، ایمانی دە قوّتلی و یوكسك اولان بو محترم انسان، یگرمی سكز ییللق استبداد و ظلمە كوزلرینی قیرپمادن كوگس كرمش و اونڭ قورقونچ اشكنجە و عدالتسزلكلرینە ایماندن طوغان بر جرئتلە قارشو قویان تك بر شخصیتدر.

بو داهینڭ عصرندە بتون مسلمان دنیاسی، بو قطبڭ جاذبەسندن كندیسنی قورتارامامشدر. توركیەنڭ ایصسز و تنها بر كوشەسندە طوغان بو نور ضیاسنی پاكستانلرە، اندونزیەلرە قدر یایمش، آوروپە و آمریقەیە قدر كوندرمشدر. و كندیسیلە برابر ملّتمزڭ دە شان و شرفنە هالەلر اكلەمشدر. نە یازیقدركە، باغریمزدن فیشقیرمش، بزە شرف قزاندیرمش، قرارمش كوڭللریمزی آیدینلاتمش، ضلالت یولنە صاپمش انسانلری حق یولنە كتیرمش

اولان بو محتشم و مبارك داهی انسان، بزدن حرمت یرینە، سادەجە تضییق و ظلم كورمشدر. فقط او، بوندن نە ییلمش، نە دە یولنی دگیشدیرمش. بالعكس او داهی أیی بیلییوركە، مجادلەسز، فداكارلقسز، اضطرابسز هیچ بر دعوا تام كوكلشەمز.

نە دە اولسە، نە قدر ظالملر بو كونشڭ ایشیغنی سوندیرمگە چالیشسەلر، اونڭ نوری قراڭلق كوڭللردە برر مشعلە كبی یانییور و آیدینلاتییور. بو، بیوك داهینڭ حقّی و دعواسنڭ میوەسیدر. نە موتلی كندیسنە!

جواد رفعت عاتلخان

(٦٢٢)

[بِاسْمِهٖ سُبْحَانَهُ]

عزیز ملّت وكیللری، محترم آغابگلریمز قاسم كفروی و صلاح الدین بگلر،

سزڭ بو ملّتڭ معنوی تاریخندە و حیاتندە اڭ عزیز استادلری و مدار افتخارلری بولونان مبارك اجدادلریڭزڭ نامنە و اونلرڭ یوكسك شرفلری حسابنە بر اهمّیتلی وظیفەڭزی سزلرە عرض ایدییورز.

استادیمز بدیع الزّمان حضرتلرینڭ سزلرە پك چوق سلاملری وار. قرق سنەدنبری حیاتنی اوڭا صرف ایتدیگی و اوچ دفعە حپسلرە و دائما تجرید مطلقدە اشكنجەلرە معروض قالدیغی و اون بش دفعە زهرلندیگی و حیاتنڭ غایەسی و محصولی و میوەسی بولونان ١٣٣ پارچە رسالۀ نور اثرلرینڭ بوكونلردە