[٦٥٣]

صایین عدنان مندرس،

اوتوز بش سنەدنبری سیاستی ترك ایدن استادیمز بدیع الزّمان حضرتلری، شیمدی قرآن و اسلامیت و وطن حسابنە بتون قوّتی ایلە و طلبەلری ایلە، درسلریلە دموقرات پارتینڭ اقتداردە قالمەسنی محافظەیە چالیشدیغنە، بز دموقرات پارتی منسوبلری و نور طلبەلری قطعی قناعتمز كلمشدر.

استادیمزدن، نە ایچون دموقرات پارتی یی محافظەیە چالیشدیغنی صوردق، دیدی:

"اگر دموقرات پارتی دوشسە، یا خلق پارتیسی ویا ملّت پارتیسی اقتدارە كلەجك. حالبوكە خلق پارتیسی، اتّحادجیلرڭ بوزوق قسمنڭ جنایتلری و هم جمهوریتڭ برنجی رئیسنڭ سَوْرْ معاهدەسیلە و چوق سیاسی دسیسەلرڭ اجباریلە، اون بش سنەدە یاپدیغی اجراآتنڭ فنا قسمی تمامیلە اسكی پارتی یە یوكلندیگی ایچون، بو اصیل تورك ملّتی اختیاریلە او پارتی یی قطعیًّا اقتدارە كتیرمیەجك. چونكە خلق پارتیسی اقتدارە كلەجك اولورسە، قومونیست قوّتی عین پارتینڭ پردەسی آلتندە بو وطنە حاكم اولاجقدر. حالبوكە بر مسلمان قطعیًّا قومونیست اولاماز، او زمان آنارشیست اولور. بر مسلمان، هیچ بر زمان اجنبیلرلە مقایسە ایدیلەمز. ایشتە بونڭ ایچون حیات اجتماعیە و وطنمزە دهشتلی بر تهلكە تشكیل ایدن بو پارتینڭ اقتدارە كلمەمسی ایچون، دموقرات پارتی یی، قرآن و وطن و اسلامیت نامنە محافظەیە چالیشییورم" دیدی.

"ملّتجیلرە كلنجە:

اگر بو پارتیدە صرف اسلامیت [حاشیە]ملّیتی اساس اولسە، دموقرات پارتی یە یاردیم ایتدیگی كبی، مخالف و معارض اولمایارق اقتدارە كلمەسنە چالیشماز. اگر بو پارتیدە، عرقجیلق و تورانجیلق فكری اساس ایسە، بردن حقیقی تورك اولمایان كە، بو وطندەكی اكثریتڭ آنجق اوندە اوچی توركدر، قالان قسمی باشقە ملّتلرلە قاریشمشدر. او زمان حرّیتڭ باشندە اولدیغی كبی، بو اصیل و معصوم تورك ملّتی علیهنە بر ملّیتجیلك و طرفكیرلك میدانە كلەجك. او وقت حقیقی توركلری اجنبیلرڭ بویوندوروغی آلتنە كیرمگە مجبور ایدەجك. ویا توركلشمش سائر عنصرلردن اولان و بو وطندە موجود عرقجیلق و عنصرجیلق طماریلە بر اجنبی یە استناد ایلە معصوم تورك ملّتنی تحكّملری آلتنە آلاجقلر. بو طوروم ایسە، دهشتلی، تهلكەلی اولدیغندن، قرآن و وطن و ملّت حسابنە، دیندار و دینە حرمتكار دموقرات پارتینڭ اقتداردە قالمەسنی تأمین ایتمەلری ایچون درس ویرییورم "دیدی.

صایین عدنان مندرس،

بتون غایەسی وطن و ملّتڭ سلامتی اوغرینە چالیشان و درس ویرن استادیمز بدیع الزّمان كبی مبارك و محترم بر ذاتڭ دموقرات پارتی یە یاپدیغی بو یاردیمی قیصقانان خلق پارتیسی و ملّت پارتیسی الەمانلری، اقتدار پارتیسی یاپییورمشجەسنە،

چشیت چشیت بهانە و اذیتلر یاپارق، استادیمزی دموقرات پارتیدن صوغوتمق ایچون وار قوّتلریلە چالیشدقلرینە قطعی قناعتمز كلدی.

سزڭ كبی "دینڭ ایجابلرینی یرینە كتیرەجگز. دین، بو مملكت ایچون هیچ بر تهلكە تشكیل ایتمز" دیین بر باش وكیلدن وطن، ملّت و اسلامیت آدینە پارتیمزە مادّی و معنوی بیوك یاردیملری طوقونان بو مبارك استادیمزڭ كتابلرینڭ و كندیسنڭ تمامًا سربست بیراقیلارق بر داها راحتسز ایدیلمەمسنڭ تأمیننی صایغی و حرمتلریمزلە رجا ایدییورز.

دموقرات اعضالرندن نور طلبەلری

حمزە امك، سلیمان كولر، حسن چالیشقان، سیدا قوچ أر،

رجب آطای، ابراهیم، مظفّر، طاهر، صادق، محمد، احمد،

احمد، مصطفی، مصطفی، نوری، نوری، محمد، راشد، طاهر،

حسین، جیلان، عبد اللّٰه، صفوت، شكری، فاروق

[بِاسْمِهٖ سُبْحَانَهُ]

چوق سوكیلی قهرمان (خسرو) آغابگم،

بو استدعا، امرطاغ نورجیلری و دموقراتلرڭ، باش باقان عدنان مندرسە تمّوزڭ اوچندە كوندردكلری استدعانڭ صورتیدر. مناسب كورورسەڭز تكثیر ایدیڭز. استادیمز سزڭ رأیڭزە حوالە ایدییور.

چوق سلام، چوق حرمت ایدر، اللریڭزدن أوپر، خیرلی دعالریڭزە ال آچار، جناب حقدن موفّقیتلر دیلرز.

دعاڭزە چوق محتاج امرطاغ نور طلبەلری نامنە

چوق قصورلی حمزە، مصطفی، ابراهیم

(٦٥٤)

افكار عامّەنڭ آلدانمامسی ایچون مهم بر اخبار

اون سنە اوّل، یتمش نور طلبەسی دڭزلی حپسخانەسنە آلینارق، نتیجۀ محاكمەدە هم دڭزلی، هم آنقرە آغیر جزا محكمەلرینڭ برائتنە قرار ویردكلری و محكمەء تمییزڭ دە عین برائتی تصدیق ایتدیگی بر حادثەیی، افكاری بولاندیرمق ایچون شیمدی اولمش كبی ٢٤-٧-٩٥٢ تاریخلی قدرت غزتەسی نورجیلر و خلوتیلر حقّندە یالان و افترالر نشر ایدییور. نورجیلر حقّندەكی بویلە اون وجهلە یالانلری كبی، خلوتیلر حقّندەكی شنیع اسنادلری دخی بر افترادر.

نورجی دیندار قرداشلریمزڭ تلاش ایتمەمەلری ایچون، بو یالانجی محرّرڭ یازیلرینڭ اصلسز اولدیغنی غزتەڭز واسطەسیلە اعلان ایدییورز.

نور طلبەلرندن

خسرو، صونغور، طاهر،

نوری، مصطفی، حمزە، محمد

محترم (خسرو) آغابگمز،

بو تلغراف بیوك طوغویە و دیگر غزتەلرە چكیلمش. برای معلومات سزلرە دە خبر ایدییورز. و سلام، حرمتلرلە مبارك اللریڭزدن اوپویورز.

قصورلی قرداشڭز محمد

(٦٥٥)

١٧ تمّوز ٩٥٢ تاریخلی قدرت غزتەسندە، زونغولداق ملّت وكیلی بویەجیكیللر امضاسیلە انتشار ایدن باش مقالە و ١٨ تمّوز تاریخلی "حرّ سَسْ دە" عین مقالەنڭ اقتباسًا انتشار ایتدیگی و بو یازیلردە بر طاقیم طریقتلرڭ یانندە، موهوم بر بدیع الزّمان طریقتنڭ ایجاد ایدیلەرك بوندن دە بحث ایدیلدیگی كورولمشدر.

دور سابقدە استادیمز بدیع الزّمان علیهنە جمعیتجیلك و طریقتجیلق ادّعاسی ایلە بش محكمە آچیلمشدر. بو محكمەلر نتیجە اولارق بدیع الزّمانڭ طریقتلە علاقەلی هیچ بر نقطەسنی كورەمەمشدر. مسلگنڭ طریقت اولمایوب، حقیقت اسلامیە اولدیغی بالنّتیجە آڭلاشیلمشدر. بو سببدن بدیع الزّمانڭ طریقتجیلقلە ایلكیسی اولمدیغی قضیۀ مُحكمە حالنی آلمشدر.

فقط مع الاسف بعض كیزلی اسلامیت دوشمانلری، اسلامیتە طریقت نامنی ویروب، حقیقی مسلمانلری بو یولدە ازمگە چالیشدقلری كورولمكدەدر. بدیع الزّمان و طلبەلرینە "نورجی" دینیلمكدەدركە، مسلكلری سنّت سنیّەیە تمامًا اویارق، فرائضی یرینە كتیروب، كبائردن صاقینمقدر. حتّی استادیمز بدیع الزّمان بر تك سنّت سنیّەیە مخالفت ایتمەمك ایچون، بدعت طرفدارلریلە یگرمی سكز سنەدر معارضە ایدرك انزوایی اختیار ایتمش و متمادیًا عذاب چكدیگی

حالدە، سنّت سنیّەیە مخالفت ایتمەمك مقصدیلە هیچ بر بدعەیە كیرمەمش و طلبەلرینە دە "كیرمەییڭز" دییە درس ویرمشدر.

شیمدی بویلە قرآن حكیمڭ نورجیلر كبی حقیقی فداكار طلبەلرینی طریقتجیلقلە اتهام ایتمك و عین زماندە حق طریقت اولان یوكسك خلوتی طریقتنە افترا ایتمك، اونلری دە نورجیلر كبی حقسز اولارق تشهیر ایتمك و دینی قناعتلری -دموقرات پارتی یە هجوم ایتمك ایچون- سیاستە آلت ایدن آدمڭ، یا قلبی ویا انصاف و انسانیّتی بولونمامەسی كركدر. شیمدی یە قدر بز نورجیلر خلوتیلردن بویلە شنیع بر بدعەكارلق ایشیتمدك. قول قصورسز اولماز. بویلە زندقە، ضلالت، قومونیستلك انتشاری زمانندە، آخرتنی دوشونن و ایماننی قورتارمق ایچون بیلمەیەرك بیڭدە برقاچ كیشینڭ -مقالەیی یازانڭ فرضا دیدیگی كبی- بعض بدعەلرە كیرمش اولسە دە، دیگر یوز بیڭلرجە معصوم، صاف و تمیز او طریقت اربابنی تشهیر و اونلرە هجوم ایتمەیە بر وسیلە اولابیلیرمی؟ اسلامیت و انسانیتە بو اسنادلر یاقیشیرمی؟ بر باش یازارڭ تدقیق و تعمیق ایتمدن، بر چوق انسانلری خلاف حقیقت اولارق اتهام ایتمسی انسانیتە یاقیشیرمی؟

عین زماندە مقالەدە "خلوتیلرڭ او حوالیدە انتشاری كبی بدیع الزّمان طریقتی دە موجود ایمش. تحقیقاتمە كورە اسكیدن بونلر ضابطەدن قورقارق كیزلیجە آیین یاپارلركن، بوكون دولت اوتوریتەسندن قورقمدقلری، ضابطە، ادارە و عدلیە

جهازینڭ بو ایشە قاریشمدیغنی كورەرك ایشی علنیتە دوكمشلر. و بو طریقتە منسوب اولانلرڭ یوزدە طقسان طوقوزی دموقرات پارتیلی ایمش. و بوندن أوتوری دە قورقمادن آیین یاپمغە جسارت ایدییورلرمش "دینیلییور.

ای بیچارە معترض! سنڭ بدیع الزّمان طریقتی دیدیگڭ، اسلام عالمندە یوز بیڭلرجە نسخەلری پك فائدەلی بر شكلدە انتشار ایدن و اسلامیتلە علاقەلی هر مملكتدە تقدیرە مظهر اولان رسالۀ نوردركە، حقیقی بر قرآن تفسیری بولوندیغی، داخلدە و خارجدە اسلام عالملری طرفندن تحسین و تقدیر ایلە قبول ایدیلمشدر.

یگرمی بش سنە نسبتًا كیزلی قالمەسنڭ سببی، استبداد مطلقڭ تضییقندن، دینسز منافقلرڭ، ماصون و قومونیستلرڭ و اسكی پارتی مفردلرینڭ رسمی بر قسم مأمورلری آلداتوب، ضابطە و عدلیەیی پك حقسز اولارق علیهنە سوق ایتدكلرندن طولایی نورلر كیزلی اولارق انتشار ایتمشدی. جناب حقّە چوق شكركە، شیمدی نورلرڭ قیمتی حكومتجە و اقتدار پارتیسنجە دە آڭلاشیلمەیە باشلانمش اولوب، سربست اولارق اللردە طولاشییور. و هركس طرفندن بو درسلردن استفادە كورولویور.

ایشتە بو معترضڭ بو قدر آشكار بر حقیقتی، نە قدر عجیب و غریب بر صورتدە تحریف ایتدیگنی كوسترن بو سطحی تدقیقنڭ و تحریفنڭ نتیجەسنی افكار عمومیەیە آچیقلایورز.

خسرو، طاهر، نوری، صونغور، حمزە

[٦٥٦]

[بِاسْمِهٖ سُبْحَانَهُ]

قلبە اخطار ایدیلن اجتماعی حیاتمزە عائد بر حقیقت

بو وطندە شیمدیلك درت پارتی وار. بری خلق پارتیسی، بری دموقرات، بری ملّت، دیگری دە اتّحاد اسلامدر.

[اتّحاد اسلام پارتیسی] یوزدە آلتمش یتمشی تام متدیّن اولمق شرطیلە، شیمدیكی سیاست باشنە كچەبیلیر. دینی، سیاستە آلت ایتمەمگە، بلكە سیاستی دینە آلت ایتمەیە چالیشابیلیر. فقط چوق زماندنبری تربیۀ اسلامیە زدەلنمەسیلە و شیمدیكی سیاستڭ جنایتنە قارشو دینی سیاستە آلت ایتمەیە مجبور اولاجغندن، شیمدیلك او پارتی باشە كچمەمك لازمدر.

[خلق پارتیسی ایسە] حقیقتًا عجیب و ذوقلی بر رشوت عمومیەیی قانونلر پردەسندە بعض مأمورلرە ویردكلری ایچون، یگرمی سكز سنەلك بتون جنایتیلە و باشقەلرڭ دە جنایاتی و اتّحادجیلرڭ ماصون قسمنڭ سیّئٓاتلری دە او پارتی یە یوكلنیلدیگی حالدە، دموقراتلرە بر جهتدە غالب حكمندەدرلر. چونكە عبودیتڭ نقصانیتیلە انانیت قوّت بولور، نمرودجیلقلر چوغالیر. بو بنلك زمانندە، مأموریت حقیقتدە بر خدمتكارلق اولدیغی حالدە، بر حاكمیت، بر آغالق، بر نمرودجیلق ایلە نفسە غایت ذوقلی بر حاكمیت مرتبەسنی بر قسم مأمورلرە رشوت اولارق ویردیگی ایچون، بتون او عجیب جنایتلرلە و كندندن اولمایان جریدەلرڭ

نشریاتیلە برابر بڭا یاپیلان معاملەلرندن حسّ ایتدمكە، بر جهتدە معنًا دموقراتلرە غالب كلییورلر. حالبوكە اسلامیتڭ بر قانون اساسیسی اولان، حدیث شریفدە [سَیِّدُ الْقَوْمِ خَادِمُهُمْ] یعنی مأموریت و امیرلك ایسە رئیسلك دگل، ملّتە بر خدمتكارلقدر. دموقراتلق، حرّیت وجدان، اسلامیتڭ بو قانون اساسیسنە طایانابیلیر. چونكە قوّت، قانوندە اولمازسە شخصە كچر. استبداد، مطلق كیفی اولور.

[ملّت پارتیسی ایسە] اگر اتّحاد اسلامدەكی اساس اولان اسلامیت ملّیتیكە، توركجیلك اونڭ ایچندە مزج اولمش بر ملّت اولسە، او دموقراتڭ معناسندەدر. دیندار دموقراتلرە التحاق ایتمەیە مجبور اولور. فرنك علّتی تعبیر ایتدیگمز عرقجیلق، عنصرجیلق فكریلە آوروپە، عالم اسلامی پارچەلامق ایچون ایچمزە بو فرنك علّتنی آشیلامش. فقط بو خستەلق و فكر، غایت ذوقلی و جاذبەدار بر حالت روحیە ویردیگی ایچون پك چوق ضررلری و تهلكەلریلە برابر، بو ذوق خاطری ایچون هر ملّت جزئی كلّی- بو فكرە اشتیاق كوسترییورلر.

شیمدیكی تربیۀ اسلامیەنڭ ضعفیتیلە و تربیۀ مدنیەنڭ غلبەسیلە اكثریت قزانارق باشە كچرسە، اكثریت تشكیل ایتمەین و آنجق یوزدە اوتوزی حقیقی تورك اولان و یوزدە یتمشی باشقە عنصرلردن اولانلر، هم حقیقی توركلرڭ، هم حاكمیت اسلامیەنڭ علیهنە جبهە آلمەیە مجبور اولاجقلر. چونكە اسلامیتڭ بر قانون اساسیسی اولان بو آیت كریمە: []وَلَا تَزِرُ وَازِرَةٌ وِزْرَ اُخْرٰی [] در. یعنی، بریسنڭ كناهیلە باشقەسی مؤاخذە و مسئول اولاماز. حالبوكە عرقجیلق طماریلە،

بر آدمڭ جنایتیلە معصوم بر قرداشنی، بلكە دە اقرباسنی، بلكە دە عشیرتنڭ افرادینی ئولدیرمگە كندینی حقلی ظن ایدر. او وقت حقیقی عدالت یاپیلمدیغی كبی، شدّتلی بر ظلم دە یول بولور. چونكە "بر معصومڭ حقّی، یوز جانی یە فدا ایدیلمز" دییە اسلامیتڭ بر قانون اساسیسیدر. بو ایسە چوق اهمّیتلی بر مسئلەء وطنیەدر و حاكمیت اسلامیەیە بیوك بر تهلكەدر.

مادام حقیقت بودر، ای دیندار و دینە حرمتكار دموقراتلر! سز بو ایكی پارتینڭ غایت قوّتلی و ذوقلی و جاذبەدار نقطەء استنادلرینە مقابل، داها زیادە مادّی و معنوی جاذبەدار نقطۀ استناد اولان حقائق اسلامیەیی نقطۀ استناد یاپمغە مجبورسڭز. یوقسە سزڭ یاپمدیغڭز، اسكیدنبری یاپیلان جنایتلری، ناصل اسكی پارتی یە یوكلەیورلرسە، سزە دە یوكلەیوب، خلقجیلر عرقجیلغی الدە ایدوب، تام سزی مغلوب ایتمەیە بر احتمال قوی ایلە حسّ ایتدم و اسلامیت نامنە تلاش ایدییورم.

اسكیلرڭ [حاشیە]لزومسز كیفی قانونلری و سٓوء استعماللری نتیجەسیلە، بلكە دە

تحریكلریلە ظهور ایدن تیجانی مسئلەسنی و آغیر جزالرینی دیندار دموقراتلرە یوكلەمەمەنڭ و عالم اسلامڭ نظرندە دموقراتلری دوشورمەمەنڭ چارەء یكانەسنی كندمجە بویلە دوشونویورم:

ناصلكە اذان محمّدینڭ علیە الصّلاة والسّلام نشریلە دموقراتلر اون درجە قوّت بولدیغی كبی، اویلە دە آیاصوفیەیی دە بش یوز سنە دوام ایدن وضعیت قدسیەسنە چویرمكدر. و عالم اسلامدە چوق حسن تأثیر یاپان و بو وطن اهالیسنە عالم اسلامڭ حسن توجّهنی قزاندیران و بو یگرمی سكز سنە محكمەلر، بر مضر جهتنی بولامدقلری و بش محكمە دە برائتنە قرار ویردكلری رسالۀ نورڭ رسمًا سربستیتنی دیندار دموقراتلر اعلان ایتملیدر. تا، بو یارەیە بر نوع مرهم اورملی. او وقت عالم اسلامڭ توجّهنی قزاندقلری كبی، باشقەلرینڭ ظالمانە قباحتلری دە اونلرە یوكلنمز، فكرندەیم.

دیندار دموقراتلر، خصوصًا عدنان مندرس كبی ذاتلرڭ خاطرلری ایچون، اوتوز بش سنەدنبری ترك ایتدیگم سیاستە بر ایكی كون باقدم و بونی یازدم.

سعید النّورسی

و بو حقیقتە یقینًا شاهد اولوب تصدیق ایدن رسالۀ نور طلبەلرندن

محمد چالیشقان، مصطفی آجت، حمزە، صادق، حلیم، راشد،

احمد خسرو و طاهری، طاهر، نوری، صونغور وسائرە

(٦٥٧)

قدرت غزتەسنڭ ١٧ تمّوز ٩٥٢ پنجشنبە كونی بویەجیكیللر امضاسیلە چیقان باش مقالەسندە [طریقتلری دموقراتلر ادارە ایدییورلر] دییە اولان یازیسنە بیوك طوغونڭ جوابی

[اوّلًا] روحًا بویلە بر یازیدن حجاب دویدم. طریقتلرلە علاقەم یوق. بو زماندە ایمانی قورتارمەنڭ و محافظە ایتمەنڭ، ممكن مرتبە اللّٰهڭ امرلرینی یرینە كتیرمەنڭ و رسولنڭؐ یولندن كیتمەنڭ كافی اولدیغنە اینانانلردنم. خلوتی طریقتنی بیلمم. فقط هر حالدە محرّرڭ یازدیغی كبی دگلدر.

[ثانیًا] بدیع الزّمان طریقتنە كلنجە، بویلە بر طریقتی ایلك دفعە بو ذاتڭ یازیسندە اوقودم. بن بدیع الزّمان سعید النّورسی حضرتلرینی پك یاقیندن طانییان بر كیمسەیم. دفعەلرجە خصوصی صحبتلرندە بولوندم. بو نجیب مسلمانلە و ملّتمزڭ اییلگنە خدمت ایدن مبارك طلبەلریلە ایچدن تماس ایتدم. بویلە بر طریقت نشر ایتدكلرینی نە آغیزلرندن ایشیتدم، نە دە طلبەلرندە كوردم، نە اثرلرندە اوقودم. بویلە بر طریقت وارسە، اولو اورتە شخص ویا منسوب اولدیغی پارتی منفعتنە یازمق اولماز، دلیل كوسترمسی لازم. بالعكس بدیع الزّمان بتون بو افترالردن منزّهدر. او، بوكونڭ پك محتاج اولدیغی دنیا چاپندە بر علّامەدر. بیوك بر دین آدمیدر.

اگر بو زواللی محرّر، بو مبارك وطنمزە اللّٰهڭ بر هدیەسی اولان بو ذات ایلە

یاقیندن تماس ایتسە ایدی و یوز اوتوز اوچ پارچە رسالۀ نور آدلی اثرلرندن بر تكنی اوقومش اولسە ایدی، بو افترادە بولونمش اولمازدی. و بو اصیل مؤلّفڭ نە كبی بر خدمت پشندە قوشدیغنی، هیچ بر منفعت كوزتمدن ناصل اِفنای وجود أیلەدیگنی آڭلار، بو ذاتە حیرتلە، حرمتلە و منّتلە باقاردی.

آرتق بزە قطعی قناعت كلدیكە، اساسًا تضادلر ایچریسندە یووارلانان ملّت پارتیسی، بو كبی تظاهرلرلە كندیسنی داها أیی كوسترییور. بوكون داخلدە و خارجدە میلیونلرجە مسلمانڭ روحلرندە یپ یڭی بر ایمان و اخلاق درسی ویرن بو مبارك ذاتە قارشو یالان سویلەین بر زواللی یی، اڭ ایلری بر كیمسە كبی باغرینە باصان بر پارتیدن یارین ایچون نە بكلەیەبیلیرز؟ اللّٰه محافظە ایتسین، بنی دە بو پارتیلە بوكونە قدر قونوشدیغم ایچون عفو ایتسین. بر باشە كچسەلر، مسلمانلری كندی افترا و شناعتلرینە بویایوب چشیتلی اتهاملرلە محو ایدەجكلرینی شیمدیدن كوسترییورلر.

یگرمی یدی ییلدر بدیع الزّمان و اثرلری، چشیتلی محكمەلردن كچمش، طریقتجیلق، بوزغونجیلق، عفّتسزلك حقّندە تك امارە دخی بولونامامشدر. زواللی، زعمنجە دموقرات پارتی یی قرەلامق ایستەیور. بدیع الزّمان طریقتی دییە بر شی وارسە، لطفًا ایضاح ایتسین. مادام تحقیقات ایتمشلر، مملكتڭ نبضنی یوقلامشلر، میدانە واضح بر شكلدە چیقارسینلر. بز دە اوڭا قارشو شونی ادّعا ایدرزكە، دنیانڭ اندر یتیشدیردیگی بو علم و فضیلت آبدەسی محترم ذات، "عصریمز

طریقت عصری دگل، حقیقت عصریدر. "دییە بر چوق اثرلرینە یازمش و حقیقتڭ نە اولدیغنی آچیقلامشلردر. برقاچ دینسز و سزڭ كبی موقع حرصی كوزلرینی بورومش برقاچ زواللی مستثنا، بدیع الزّمان، بو نجیب و اصیل ملّتڭ قلبندە لایق اولدیغی یری اشغال ایتمشدر. چونكە او، یاقینلرینە اییلك، طوغریلق، اخلاق و فضیلتدن باشقە بر شی ویرمەمشدر.

استانبول

ع. شرف اینانیر

(٦٥٨)

١٧ تمّوز پنجشنبە ٩٥٢ تاریخلی قدرت غزتەسنڭ باش مقالەسندە نشر ایدیلن بویەجیكیللرڭ افترالرینە حرّ آدم غزتەسنڭ جوابیدر.

عبد الرّحمن بویەجیكیللر دین حرّیتنی، خلقجیلر كبی طریقت قانالندن كیرەرك بالطەلامق ایستەیور. اسلام عالمی بدیع الزّمانی دە طریقتجیلق اسنادیلە ژورنال ایدییور.

١٧ تمّوز ٩٥٢ تاریخلی قدرت غزتەسندە بویەجیكیللر "طریقتلری دموقرات پارتی ادارە ایدییور" باشلقلی یالان و یاڭلیشلرلە طولی بر باش مقالە نشر ایتمشدر. بو باش مقالەیی، آنقە آژانسندە مال بولمش مغربی كبی نشر ایدییور.

١-مملكتدە طریقتلر ممنوع اولدیغی ایچون، خلوتی طریقتنڭ ماهیّتی اوزرندە طورمەمزدە بر فائدە یوقدر. فقط چیوریللی بر قولونیەجی احمدڭ سوزی ایلە