چركینلشدیروب استعمال ایتمسی، پك چركین و ظاهر بر افترادر. "قادینلرلە محاورە" نامندەكی رسالەمدە، قادینلرە بیوك بر حرمت و اهمّیت و قیمت ویردیگمی، حتّی شفقت جهتندە قادینلر ارككلردن چوق ایلری اولدقلرندن و رسالۀ نورڭ مهم بر اساسی شفقت اولمەسندن، بو مبارك همشیرەلریمی "محترم همشیرەلرم" نامیلە یاد ایدییورم. اونلرڭ صمیمیت و اخلاصلرینی زیادە كورویورم.

بشنجی حقارتكارانە افتراسی: كریلەمك و ارتجاع، یعنی اسلامیت احكامنە، اخلاقنە دونمك معناسیلە "ملعون فكر" تعبیرینی قوللانمسی، كرۀ ارضی تیترتەجك، كافرانە بر افترا اولدیغی كبی، یالڭز اسپارطەلیلرە و نور طلبەلرینە دگل، بلكە عالم اسلامە قارشو بر اهانتدر.

چوق اختیار و چوق خستە

سعید النّورسی

[٦٩٣]

(استادیمز كویلردە طولاشدیغنە دائر چیقاریلان اویدیرمە خبرە قارشو بر جوابدر. موجب مراق هیچ بر شی یوقدر.)

استادیمز سعید النّورسینڭ ایكی سنەدنبری مسافر بولوندیغی اسپارطە امنیتنە بر معروضاتمزدر.

١- استادیمز سعید النّورسی، اوتوز سنەدنبری بو آناطولی مملكتندە كزدیگی بتون

ولایت و قضالردە، كندیسنی ضابطەنڭ بر مسافری اولارق تلقّی ایتمش و ضابطە افرادی دائما دوستانە و حمایتكارانە معاملە كوسترمشدر. قرآنڭ حقیقی و پارلاق بر تفسیری اولان رسالۀ نوری اسپارطەدە اوتوز سنە اوّل تألیفە باشلایان استادیمز، حقائق ایمانیەیە غایت تأثیرلی بر صورتدە خدمت ایتمكلە تمامًا آخرتە متوجّه اولان بو خدمتنڭ دنیوی بر فائدەسی اولارق، ایمان سببیلە قلبلردە فنالغە قارشو دائمی بر یاساقجی بیراقمشدر. اونڭ نتیجەسیدركە، آسایشڭ تأمیننە وسیلە اولمشدر.

اوت، استادیمز، عدالت حقیقیەیی افادە ایدن []وَلَا تَزِرُ وَازِرَةٌ وِزْرَ اُخْرٰی [] یعنی "بریسنڭ خطاسیلە باشقەسی مسئول اولاماز" آیت قرآنیەسی و "بر معصومڭ حقّی یوز شریر ایچون دخی فدا ایدیلەمز" كبی دستور قرآنی كرگنجە، یوزدە اون ظالملر یوزندن طقسان معصوملرە ضرر ویرمك، حقیقی عدالتە، اوامر قرآنیەیە تمامًا ضددر دییە هر طرفدە نشر ایتمش و كندیسنە ظلم یاپیلمەسنە قارشو، ملّت اسلامیەنڭ سلامتی ایچون "بن، دگل دنیا حیاتمی، بلكە آخرت حیاتمی دە فدا ایدییورم" دیمش و دیمكدەدر.

رسالۀ نورڭ حقائق ایمانیە درسلریلە و بتون محكمەلردە برائتی نتیجە ویرن مدافعەلرندەكی قرآنی حقیقتلرلە حیات اجتماعیەنڭ اخروی و دنیوی سعادتنە رهبر اولان حقائقی درس ویرن و طولاییسیلە آسایشڭ محافظەسنە و امنیت عمومیەنڭ تأمیننە اڭ بیوك بر وسیلە استادیمز اولدیغی، حیات اجتماعیەنڭ

سعادتیلە علاقەدار، حمیتپرور ذاتلرڭ تصدیقیلە ثابتدر. اوتوز سنەدنبری متعدّد تدقیقلر و محكمەلرڭ برائت قرارلری ویرمسیلە و شیمدی دە تمامًا سربست بولونمەسیلە و اثرلری بیوك بر وسعتلە هر طرفدە، آناطولیدە و عالم اسلامڭ مركزلرندە و غرب مملكتلرینڭ بعضیلرندە یاییلارق تقدیر و تبریكلرە مظهر اولمەسیلە، اڭ اینجە اسرارینە قدر بیوك بر دقّت و اهمّیتلە هر حالی تدقیق ایدیلن استادیمزڭ موجب مسئولیّت هیچ بر حالی كوستریلەمەمشدر. [حاشیە]

نور طلبەلری آسایشجیدرلر

آسایشی محافظە ایتدكلرینڭ دلیل قطعیسی شودر: آلتی ولایتڭ آلتی ضابطە دائرەسی، آلتی یوز بیڭ طلبەلرڭ یگرمی سكز سنە ظرفندە، حقسز معاملەلرە معروض قالدقلری حالدە، هیچ بر وقوعاتلرینی قید ایدەمەمەلری.. حتّی آفیون صاوجیسنڭ آسایش اتهامنە مقابل، استادیمز دیمش: "بو یگرمی سكز سنەدە بر تك وقوعاتی كوسترەبیلیرمیسڭز؟ مادام كوسترەمدیڭز، ناصل بو اتهامی ایلری سورویورسڭز؟ یالڭز كوچك بر طلبەنڭ، باشقە بر مسئلەدن كوچك بر وقوعاتندن باشقە و آلتی یوز بیڭ طلبەدن هیچ بر وقوعاتلری اولمدیغی قطعی اثبات ایدركە، آسایشی نور طلبەلری محافظە ایدییورلر" دییە آفیوندە صاوجی یە دیمش و صوصدیرمشدر.

بر طرفدە قومونیزم كبی دین، اخلاق و عنعنە علیهندە اولوب پك مدهش بر تخریباتلە یاری آوروپەیی، چینی استیلا ایدن، عموم دنیایە قارشو مفسد، ییرتیجی رژیم كفریسنە مقابل، ملّتلر دولتلر مابینندە تدبیر آلدیران و بونڭلە برابر خارجی، كیزلی افساد قومیتەلری دە بو وطن علیهندە مدهش بر هرج و مرجە چالیشدقلری بر زماندە، بز، اوتوز سنەلك پك خالص و تأثیرلی كنیش بر خدمتی ابراز ایدرك و استادیمز سعید النّورسینڭ اثرلری اولان رسالۀ نور نسخەلرندن یوز بیڭلرینڭ انتشاریلە و یوز بیڭلری كچن اوقویوجیلرینڭ حسن حالنی كوسترەرك و ضابطەجە نور طلبەلرندن آسایش علیهندە بر تكنڭ كوستریلمەمسنی شاهد طوتارق دیرز و قطعیًّا ثابتدركە، رسالۀ نور، او تخریباتجی جریانی طوردیران، قرآنی و ایمانی بر سددر. انصافلی ضابطە اهلی دە، بو تحقّق ایتمش حقیقتە شهادت ایدییورلر.

ایمان خدمتنڭ معنوی، اخروی فائدەلرندن قطع نظر، دنیوی، ملّتە عائد مهم بر فائدەسنی، وقتیلە استادیمز شو صورتلە افادە ایتمشدركە، زمان، بونڭ نە قدر طوغری اولدیغنی كوسترمشدر. او زمان دیمش: شیمدی بو مملكتڭ، بو وطن و ملّتڭ سعادت حیاتیە و ابدیەسی نقطەسندە ایكی مدهش جریان وار:

[بریسی] شمالدە چیقان دهشتلی دینسزلك جریاننڭ بو وطنی معنوی استیلاسنە قارشو، قرآنڭ حقیقتلری و ایمانڭ نورلریلە مقابلە ایتمكدر. چونكە او دینسزلك جریانی معنوی تخریبات نوعندن اولدیغندن، قارشوسندە بر معنوی مقابلە

اولملیدر. حقائق قرآنیەنڭ لمعاتی اولان رسالۀ نور، معنوی تعمیرجی بر آطوم بومبەسی اولارق، بو ضلالت جریاننە مقابلە ایدەبیلیر و ایتمشدر.

[ایكنجیسی] بیڭ سنەدنبری اسلامیتڭ قهرمان بر اوردوسی و بایراقداری اولان تورك ملّتنە عالم اسلامڭ عداوتنی ازالە ایتمك، توركلر، یینە اسكیسی كبی اسلامیتڭ قهرمانیدرلر قناعتنی ویردیرمكدر. بو صورتلە درت یوز میلیون حقیقی قرداشلری بو ملّتە قزاندیرمقلە، سعادت حیاتیەسنە اڭ اهمّیتلی بر خدمتی ایفا ایلەمكدركە، رسالۀ نور، ایمان حقیقتلرینی بو وطندە نشر ایدرك بو عظیم فائدەیی فعلاً كوسترمشدر.

رسالۀ نورڭ بر طلبەسی، اوّلجە ألندە نور رسالەلریلە و اورادن چیقاردیغی موعظەلرلە، شرق حدود بولكەسندە، روسلرڭ او زماندە او حوالیدەكی پروپاغاندەلرینی طوردیرمشدی. بو صورتلە بر تك طلبە، بر اوردو قدر وطنە، ملّتە و آسایشە خدمت ایتمشدر. رسالۀ نورڭ غایە و مقصدی، تمامًا اخروی و رضای الٰهی دائرەسندە ایمانە خدمت ایتمك اولدیغندن، نتیجە ویردیگی سائر دنیوی اییلكلر، طولاییسیلە حیات اجتماعیەیە عائد بر فائدەسیدر.

٢-اوتوز قرق سنەدنبری انزوادە، تجرید، خستەلق و حپس كبی سببلرلە، ضرورت اولمادقجە انسانلرلە كوروشمەیە تحمّلی اولمدیغی ایچون خارجدن كلن دوستلرینی دائما خاطرلرینی قیرارق اونلری كری چویرمەسی و آقشامدن ایرتەسی كوننڭ صباحنە قدر خدمتجیلری دخی یاننە قبول ایتمەمسی اویلە بر حقیقتدركە، بو قدر

ظاهر و كوزلە كورونن بو حقیقت قارشوسندە باشقە بر سوز سویلەمەیە لزوم یوقدر.

استادیمز سعید النّورسینڭ اسكیدنبری بر فطری سجیەسیدركە، انزوا و انسانلرلە ضرورت اولمادقجە كوروشمەمك، بر دستور حیاتی اولمشدر. حتّی حیاتدە قالان تك بر قرداشنی دخی، یاقین بر شهردە ایكن، اوتوز سنەدنبری كورمدیگی حالدە كوروشمك ایچون یاننە چاغیرمامشدر. هم خدمتجیلری دە، آقشامدن ایرتەسی كون صباحە قدر شدّتلی بر ضرورت اولمادقجە اوطەسنە كیرەمەمكدەدرلر. شدّتلی خستەلغی و كوروشمەیە تحمّلی اولمامسی سببیلە، خارجدن كلن چوق دوستلرینڭ خاطرلرینی اینجیتوب كوروشمدن كری چویرییور. استادیمزلە اوتوز سنەدنبری علاقەدار اولوب دوستانە وضعیت كوسترن ضابطەیە آسایش نقطەسندە رسالۀ نورلە پك اهمّیتلی خارقە خدمتی ثابت اولان استادیمزڭ بتون حالی محكمەلرجە مدار تدقیق اولمقلە هیچ بر حالی ضابطەجە كیزلی قالمدیغندن، بعض كیزلی دین دوشمانلرینڭ اونڭ حقّندەكی اویدیرمەلریلە، اوتوز سنەلك بر مشاهدەیە طایانان مثبت قناعتی بوزمامق، حقوق عمومیەیی تأمینە چالیشانلرڭ وظیفەلری اقتضاسیدر.

٣- استادیمز خستەدر، حتّی جمعەیە دخی چیقامامقدەدر. آرا صیرە هوا آلمەیە پك زیادە محتاج اولویور. بو سببدن پك نادر اولارق كندینە مخصوص بر اوطەسی

بولونان و اوتوز سنە اوّل، اون سنە اقامت ایتدیگی بارلە كوینە كیدر، بر مدّت قالیر، كلیر. بعضًا دە بورادە یاز موسمندە انسانلرڭ بولونمدیغی، شهرڭ خارجندەكی محلّلرە كیدەرك، ایكی اوچ ساعت تنفّس ایدر، كلیر. اختیارلغی، خستەلغی طولاییسیلە یایان یورویەمەمكدە اولدیغندن و خلقڭ حرمتكار وضعیتیلە راحتسز ایتمەمسی ایچون، بو بسیط كیدوب - كلمەیی اوطوموبیل ایلە یاپار. بونڭ خارجندە هیچ بر كویە، مسكون هیچ بر محلّە، حتّی اوتوز سنەلك دوستلری بولونان یرلرە دخی مذكور سببلرلە كیتمییور. ایشتە حال و وضعیت بوندن عبارتدر. حقیقت حال دە بودر.

خدمتندە بولونان طاهری، زبیر

[٦٩٤]

[بِاسْمِهٖ سُبْحَانَهُ]

عزیز قرداشلرم،

بو دفعە موتورلی قاییق ایچندە اگیردیردن بارلەیە كیدركن، دڭزڭ دهشتلی امثالسز فیرطینەسی، لیلۀ قدردەكی دهشتلی خستەلق كبی، زحمت نقطەسنی قالدیروب بیوك بر رحمتە وسیلە اولدیغنی سزلرە مژدە ویرییورم. آلتی آرقداش ایلە برابر شهید اولمق، یدی احتمالدن آلتی احتمال ایلە دڭز بزە كنیش بر قبر اولمق ایچون زمین حاضرلاندی. فقط او حال آلتندە، مكرّر تجربەلرلە یاغمورڭ رسالۀ نورلە علاقەدارلغی و شیمدی چوق زماندر یاغمورە شدّتلی احتیاج اولدیغی بو زماندە،

رسالۀ نورڭ كیزلی دوشمانلرینڭ تهلكەسندن و كنیش پلانندن قورتولمەسنە بر اشارت اولارق او دهشتلی حالتمز، بر صدقۀ مقبولە حكمنە كچدیگی رمزیلە، او رحمت الٰهیەدن كلن امر رحمانی یی امتثالندەكی اشتیاق ایلە، یاغمورڭ بر آننەسی اولان بو دڭز، او رحمتە دائر امر الٰهی یی غایت هیجانلە و اشتیاق ایلە عجلەلك ایلە كتیرمك ایچون، بر شفقت طوقادی نوعندن، نور طلبەلری اولان بزم باشمزی طوقات ایلە، یوزیمزی و كوزیمزی یاغمورلە اوخشادی. بز بو حالتی ظاهرًا حدّت، معنًا شفقتكارانە اوخشامق نوعندە كوردك.

بن داها فیرطینە و یاغمور باشلامادن اوّل، حسّ قبل الوقوع ایلە خزینۀ رحمتە بر آناختار اولاجق، دهشتلی و هیجانلی بر مصیبت حسّ ایتدیگمدن، متمادیًا جوشنی و شاە نقشبندڭ وردینی اوقویوردم. دڭزڭ او دهشتی ایچندە، كمال شوق ایلە او مبارك دڭزی قبر اولارق قبول ایدییوردم. بویلە قضا ایلە وفات ایدن شهید حكمندە اولدیغی كبی، شهید دە ولی حكمندە اولمەسندن آلتی آرقداشمە آجیمدم. یالڭز ایچندە بولونان چوجغە بر پارچە آجیدم. او قاییغڭ ماكینەسی بوزولدیغی و یلكنی دە روزگار اونڭ عكسیلە كلدیگی ایچون فائدە ویرمدیگنی و دڭزڭ موجلری دە پك بیوك، اوّلا قاییغە و ظاهرًا بزە هجوم ایتمەسیلە برابر قاییغڭ ایچنە كیرمدیگی ایچون، كمال صبر و شكرلە قارشیلادق و سالمًا ساحلە چیقدق. [اَلْحَمْدُ لِلّٰهِ عَلٰی كُلِّ حَالٍ] دیدك.

سعید النّورسی

[٦٩٥]

استادیمز دییوركە:

"بن اللی آلتمش سنەدر، كفر مطلقە قارشو ایمانە خدمت ایتمك و كفر مطلقڭ نتیجەسی اولان آنارشیلكدن ملّتی قورتارمق ایچون بتون قوّتملە ایمان خدمتندەكی اخلاصڭ نتیجەسی اولان آسایشی محافظە ایلە، بر جانی یوزندن اون معصومی ظلمدن قورتارمق ایچون راحتمی، شرفمی، حیثیتمی، حتّی لزوم اولسە حیاتمی فدا ایتمكلە، هر بر تضییقاتە، معناسز، لزومسز شیلرە قارشو صبر و تحمّل ایتدم. ایشتە بنم اوتوز قرق سنەدر بو خدمت ایمانیە ایچون، بنم حقّمدە حبّەیی قبّە یاپوب بر بارداق صودە فیرطینە چیقاروب بنی تعجیز ایتدكلری حالدە، صرف خدمت ایمانیەنڭ بر نتیجەسی اولان آسایش ایچون صبر و تحمّل ایتدم. بر مثالی:

بش محكمە حضورندە هیچ بنم قیافتمە ایلیشیلمدیگی حالدە و متمادیًا كزدیگم حالدە و حتّی استانبولدە محكمەمدە یوز یگرمی پولیس بولوندیغی حالدە، عین قیافتمە ایلیشمدیلر. و ایكی آی استانبولدە یایا كزدیگم حالدە، ممانعت ایتمدیلر و ایلیشمەیە هیچ كیمسەنڭ حقّی یوق. چونكە هم منزوی، هم دە جامعە كیتمییور و چارشیدە غلبەلق یرلردە كزمییور، یالڭز اوطوموبیلی ایلە چیقییور. انسانلرلە ضرورت اولمادن قونوشمییور، یالڭز تنفّس ایچون طاغلر باشندە و خالی یرلردە كزییور. شیمدی اهل دنیانڭ هیچ بر حقّی یوقدركە، وضعیتمە، حالمە ایلیشسینلر. "

بر سیاحت مناسبتیلە و اوطوموبیلی ایچندە استانبولە اڭ مهم بر مسئلۀ ایمانیە

ایچون كیتمەسندن، شیمدی استانبولڭ بعض رسمی آدملری، یگرمی جهتدە قانونسز بر طرزدە، قانون نامنە استادیمزی بر بارداق صودە فیرطینە قوپارمق نوعندن میلیونلر فداكار طلبەلری بولونان بر ذاتە، سینك قنادی قدر بر اهمّیتی اولمایان بر مسئلە ایچون رسمی آدملری یاننە كوندرمك اولان یوز جهتدە اهمّیتسز، معناسز و بر حبّەیی یوز قبّە یاپمق كبی بو شیئە قارشو استادیمز دییور: "مادام ایمان خدمتندە اخلاص اتملە، آنارشیلگی طوردیرمقلە، آسایشی محافظە ایتمكلە صبر و تحمّل كركدر. بن دە بونڭ ایچون راحتمی، حیثیتمی فدا ایدییورم. اونلری دە حلال ایدییورم."

استادیمزڭ بو دفعە استانبولە كیتمەسی مناسبتیلە استانبول مدّعی عمومیلگنجە افادەسنڭ آلینمەسی ایچون یاننە كلن ایكی مأمورە استادیمز دیدی: "بن داها اوّل بو مسئلە ایچون محكمەدە افادە ویرمشدم و محكمە تحقیقات یاپمش، نتیجەدە برائت ویرمش. باشقە دییەجگم یوق" دییەرك، صامسون محكمەسنە كیدن و استانبول محكمەسندە اوقودیغی افاداتنی تكرار سویلەدی. هم اسكیدن آلدیغی برقاچ راپور واركە، خستەلغی طولاییسیلە باشنی صارمەیە مجبوردر و شدّتلی نزلەدن و خستەلقلردن طولایی استراحتە و تبدیل هوایە احتیاجی واردر. دائمی بر یردە قالمسی صحّتنە منافیدر. داها اوّل لزوم دە اولمدیغی ایچون، بو راپورلری كوسترمگە تنزّل ایتمییوردی، لزوم كورمییوردی.

خدمتندە بولونان نور طلبەلری

طاهری، زبیر، صونغور، حسنی، بایرام

[٦٩٦]

مندرسڭ قونیە نطقنە دائر آچیقلامسی

باش وكیل، سوزلرینڭ مقصدلی اولارق تفسیرلرە تابع طوتولدیغنی سویلەیور. (خصوصی مخابریمزدن) [حاشیە]

آنقرە،

باش وكیل عدنان مندرس قونیەدە سویلەمش اولدیغی نطق طولاییسیلە

یاپیلان نشریات اوزرینە ظفر غزتەسنڭ صوردیغی بر سؤآلی شو شكلدە جوابلاندیرمشدر:

قونیەدە، حكومت میدانندە، بیوك بر كتلە حالندە طوپلانمش بولونان چوق محترم قونیەلی وطنداشلریمە قارشو سویلەدیگم نطقڭ لائیكلك تلقّیمز حقّندەكی قسمنی سٓوء نیت صاحبی قلملردە ناصل تفسیرە تابع طوتولدیغنی، بن دە اسفلە مشاهدە ایتدم. بونلردن بر قسم سوزلریمڭ، قرداشی قرداشە قیردیراجق بر ماهیتدە اولدیغنی، بر قسمی صاغ پولیتیقەجیلرە میدان آچدیغنی و مقدّساتجیلق یاساغنی اورتەدن قالدیردیغنی و نتیجە اعتباریلە تورك انقلابلرینڭ بیوك اساسلرندن برینی زدەلەدیگنی افادە ایتمشلردر.

بتون بو یازیلردە دقّتمە چارپان جهت، قونیەدەكی سوزلریمڭ تعقیب اولونان مقصدلرە و الدە ایدیلمك ایستەنیلن نتیجەلرە كورە تحریف ایدیلمش اولمسیدر. مسئلەنڭ اییجە آڭلاشیلمەسی ایچون، اوّلا قونیەدەكی سوزلریمی بر كرە داها و او كونكی آناطولی آژانسندە نشر ایدیلدیگی كبی تكرار ایتمك ایسترم. او كون عینًا شویلە دیمشدم:

شیمدی سزە لائیكلك تلقّیمزدن دە بحث ایتمك ایستەیورم. لائیكلك، بر طرفدن دین ایلە سیاستڭ بربرندن آیریلمەسی، دیگر طرفدن ایسە وجدان حرّیتی معناسنە كلیر. دین ایلە سیاستڭ قطعی صورتدە بربرندن آیریلمەسی اساسندە اڭ كوچك تردّدە دخی تحمّلمز یوقدر. وجدان حرّیتی بحثنە كلنجە، تورك ملّتی مسلماندر و

مسلمان اولارق قالاجقدر. اوّلا كندینە و كلەجك نسللرە دیننی تلقین ایتمسی، اونڭ اساسنی و قاعدەلرینی اوگرتمسی، ابدیًا مسلمان قالمەسنڭ مناقشە كوتورمز بر شرطیدر. حالبوكە مكتبلردە دین درسی اولماینجە، اولادینە كندی دیننی تلقین ایتمك و اوگرتمك ایستەین وطنداشلر، بو امكانلردن محروم ایدیلمش اولورلر. مسلمان چوجغی دیننی اوگرنمك كبی پك طبیعی بر حقدن محروم ایدیلمەمك ایجاب ایدر. بویلە محرومیت و امكانسزلق، وجدان حرّیتنە اویغوندر دینیلمز. بو اعتبارلە اورتە مكتبلریمزە دین درسلری قویمق، یرندە بر تدبیر اولاجقدر.

دینسز بر جمعیتڭ، بر ملّتڭ پایدار اولابیلەجگنە اینانمییورز. اڭ ایلری ملّتلرڭ دخی دین ایلە سیاست و دنیا ایشلرینی بربرندن آییردقدن صوڭرە، نە درجە دینلرینە باغلی قالدقلرینی بیلییورز. بوكونكی سویە ایلە اصیل ملّتمزە تعصّب اسنادی روا كورولەمز. ملّتمز دیننە صیم صیقی باغلی اولدیغی قدر، عمومیتلە دینی اڭ تمیز دویغولرلە بنمسەمكدەدر. اسلاملق، ملّتمزڭ وجدانندە اڭ مصفّا سویەسنی بولمشدر. مسلمانلغی و اونڭ اساسلرینی، فریضەلرینی و قاعدەلرینی كفایتلە تلقین ایدوب اوگرتەجك اوگرتمنلریمزڭ یتیشدیریلمەسنە آیریجە غیرت صرف ایدیلەجكدر. كلەجك سنە لیسە درجەسندە ایلك مأذونلرینی ویرەجك اولان قونیە امام-خطیب مكتبنڭ ایلری سویّەدە دین تحصیلی ویرن بر تدریس مؤسّسەسی حالنە كتیریلمسی و بو مؤسّسەلرڭ بڭزرلرینڭ یورتدە فضلەلاشدیریلمەسی اویغون اولاجقدر، دیمشدر.

قونیە نطقنڭ بو قسمنی محترم تورك افكاری قارشوسندە اویلەجە تكرار ایتدكدن صوڭرە، شونی اهمّیتلە تبارز ایتدیرمك ایسترمكە:، بیاناتم، هر هانكی بر التباسە محل ویرمەیەجك قدر آچیقدر. یاپیلاجق تفسیرلردە، ایلری سورولەجك مطالعەلردە، بو آچیق متنە صادق قالمق اساسدر. هیچ كیمسە بنم سویلەدیگم سوزلری تحریف حقّنە صاحب اولمدیغی كبی، هیچ بر زمان عقلمدن كچمەین مقصدی و نیّتلری بڭا عطف ایتمەیە، كیمسەنڭ حقّی اولمامق لازم كلیر.

[٦٩٧]

[بِاسْمِهٖ سُبْحَانَهُ]

استادیمز سعید نورسی دییوركە:

مادام اسپارطە بنم حقیقی بر مملكتمدر. بن روح و جانملە بو حقیقی مملكتمە و انسانلرینە خیر قزاندیرمق ایستەیورم. شیمدی چوق مهم اولان خیر دە شودر:

آفیون، ناصلكە بتون رسالۀ نور كلّیاتنی اعادە ایتمكلە عالم اسلام و حتّی عالم انسانیتدە چوق بیوك بر خیرە وسیلە اولدی و سكز سنەدنبری اولان خطایی هیچە ایندیروب عفو ایتدیردی. بو مبارك اسپارطەدە، عالم اسلام نظرندە مصر جامع الازهری و اسكی شام شریف مباركیتنە مظهر اولدیغندن، البتە رسالۀ نوری صاحبلرینە اعادە ایتمكلە حاصل اولاجق چوق بیوك شرف نقطەسندە آفیوندن كری قالمایاجق. بلكە یگرمی درجە یوكسلەجكدر.