و قومونیست قسمی، بو نقطەدن استفادە ایدوب دموقراتلری دویرمەمك ایچون دموقراتلر مجبوردرلركە، هم نورجیلری، هم علمایی، هم ملّتی ممنون و منّتدار ایتمك، هم آمریقە و متّفقلرینڭ یاردیملرینی غائب ایتمەمك ایچون، بتون قوّتلریلە اذان مسئلەسی كبی شعائر اسلامیەیی ممكن اولدقجە تعمیرە چالیشمەلری لازم و الزمدر.

مع التّأسّف بعض مفرط و ماصون و قومونیستلر، دموقرات علیهندە اولدیغی حالدە، كندینی دموقرات كوسترییورلركە، دموقراتلری تخریباتە سوق ایتسین. و دین علیهندە كوسترسین، اونلری دویرسین.

نور طلبەلری و نورجی اونیورسیتە كنچلگی نامنە

صادق، صونغور، ضیا

برای معلومات تقدیم ایدییورز.

[٥٢٥]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، فداكار قرداشمز حاجی علی،

كوندردیگڭز چوق قیمتدار و بالخاصّە حضرت استادی پك چوق سویندیرن مكتوبڭزی آلدق. استادیمز دییوركە: "رسالۀ نور، بو زماندە كافیدر. اون سنە مدرسەدە اوقویانلر، رسالۀ نورلە بر سنەدە عین استفادەیی ایتدكلرینە شاهد،

بیڭلر اهل علم وار. مادام حاجی قیلینچ علی، بر بوچوق سنە بتون رسالۀ نور اجزالرینە صاحب چیقمش، قسمًا اوقومش.. نظریمزدە یگرمی سنەلك بر نور طلبەسیدر. بن هر صباح خاصلر ایچندە اونڭ اسمیلە بتون معنوی قزانچلریمە، دفتر اعمالنە كچمك ایچون حصّەدار ایدییورم. اویلە ایسە، او دە بتون حیاتنی رسالۀ نورە ویرمگە مكلّفدر. دیمك شیمدی یە قدر جامع الازهرە كیتمگە موفّق اولمامسی اهمّیتلی بر حكمت ایچوندركە، نورلر اوڭا كافی ایمش. شیمدی شامە، حلبە یاقین اولان اورفەدە بر مدرسۀ نوریە ایلریدە تشكّل ایتمەسنی قوّتلی امید ایدییورز. قیلینچ علی ایلە برابر اسكی سعیدڭ غایت قیمتدار بر طلبەسی اولان شامدەكی ملّا عبد المجید، اورفەدەكی نورڭ طلبەلرندن سیّد صالح و اونڭ یاننە كیدن نورڭ فداكار بر طلبەسیلە مخابرە ایتسینلر. بن هم ملّا عبد المجیدە، هم حاجی علی یە، هم شامدەكی رسالۀ نورلە علاقەدار اولانلرە پك چوق سلام ایدییورم. و دعالرینی و او موقع مباركەدە بڭا دعا ایتمەلرینی رجا ایدییورم "دیدی.

اوت، قهرمان قرداشمز حاجی علی، حضرت استاد دائما سزڭ فداكارلغڭزی اظهار بویورویورلر. بز دە سزی تحسینلرلە تبریك ایدییورز.

او مركز اسلامیەدە نورلر ایچون بیوك غیرت و خدمتلریڭزی دیلەیورز، هم دە امید ایدییورز. حقیقتًا او بیوك و مبارك یرلردە نورلرە خدمتدە بولونوشڭز، سزڭ ایچون، هم بتون اهل ایمان ایچون پك قیمتدار اولدیغنە هیچ شبهە یوقدر.

جناب حق موفّق أیلەسین. اورادە بولونان سوكیلی استادیمزڭ اسكی و قیمتلی طلبەلرندن ملّا عبد المجیدە و سز فداكار عزیز قرداشمزە پك چوق سلام و حرمت ایدر، اللریڭزدن اوپرز.

اَلْبَاقٖی هُوَ الْبَاقٖی

استادڭ خدمتندە بولونان چوق قصورلی قرداشڭز صونغور، زبیر، ضیا

(٥٢٦)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

سوكیلی، قهرمان نور (خسرو) آغابگمز،

[اوّلًا] پك بیوك و قدسی خدمت نور ایچون چوق خیرلی، چوق فعال غیرتلریڭز و خدمتلریڭزلە، سوكیلی استادیمز حضرتلرینی چوق ممنون ایدن قیمتلی مكتوبڭزی آلدق.

[ثانیًا] اینەبولی قهرمانلرینڭ یڭی حرفلە رجا ایتدكلری تاریخچۀ حیاتڭ نشرینی، حضرت استادیمز سزلرە حوالە ایدییورلر. سز ناصل مناسب كورسەڭز یاپارسڭز. هم كوچك سوزلردن حضرت استادیمزە آیریلان قسمنە سزلر صاحب اولمەڭزی و مناسب مقدارینی دە استادیمزە كوندرمەڭزی سوكیلی استادیمز امر ایتدیلر.

[ثالثًا] حضرت استادیمز نفقەسنی صاتمقلە تأمین ایتدیگی كندینە عائد مجموعەلری و كندیلرینە عائد رسالەلرینڭ قسم اعظمنی اورفەیە كوندرمشدر.

[رابعًا] بو كونلردە استادیمز حضرتلرینی، واندە بولوندقلری زماندە خدمت ایدن وانلی ملّا حمید زیارتە كلدی. و حضرت استادیمزڭ مجموعەلرندن بعضیسنی هدیە اولارق وانە كوتورمشدر. حضرت استادیمز سزە و مدرسة الزّهرا اركانلرینە سلام ایدییورلر. بزلر دە حرمت و سلام ایدر، اللریڭزدن اوپرز. بتون هجمات ستّەلرە علاوەسی امر بویورولان هجمات ستّەنڭ دردنجی مبحثنە عائد یازیلان پارچەیی و امرطاغنڭ معنیدار بر خاطرەسی یازی یی و سبیل الرّشاددن كلن، رسالە ایستەینلرڭ آدرسلرینی برای معلومات عرض ایدییورز، قهرمان سوكیلی آغابگمز.

اَلْبَاقٖی هُوَ الْبَاقٖی

دعاڭزە محتاج چوق قصورلی ضیا، زبیر، صونغور

[٥٢٧]

[امرطاغنڭ معنیدار بر خاطرەسی]

بش سنەدنبری تنفّس ایچون امرطاغنڭ اطرافندە فایطونلە كزدیگم زمان غریب بر طرزدە، بر یاشندن یدی یاشنە قدر كوچوجك چوجقلر، والدە و پدرلرینە قارشو كوستردكلری علاقەدن زیادە بر اشتیاق ایلە فایطونمە

قوشوب ألمە صاریلییورلردی. حتّی ایكی دفعە فایطون آلتنە دوشوب خارقە بر طرزدە ضرر كورمدن قورتولدیلر.

حتّی هیچ بنی كورمەین، بیلمەین بر و ایكی و اوچ یاشندە چوجقلر، یالین آیاق، دیكنلر ایچندە قوشا قوشا فایطونە یتیشییورلر. بیوك آدملر كبی تمنّا ایدوب الڭزی أوپەلم دیرلردی. بو حالە هم بن، هم قرداشلرم و كورنلر حیرت ایدییوردق. بو حال بر محلّەیە مخصوص دگل، هر طرفدە، حتّی كویلرندە عین حال دوام ایدییوردی.

بنی آلداتمایان بر خاطرۀ حقیقتلە بنم و آرقداشلریمڭ قناعتمز كلدیكە، بو معصوم طائفەنڭ معصومیتلری جهتیلە، سوق فطری دینیلن بر حسّ قبل الوقوع ایلە، رسالۀ نورڭ بو مملكتدە معصوم چوجقلرە و كندیلرینە چوق منفعتی اولاجق دییە، عقل و فكرلری درك ایتمدیگی حالدە، او معصومانە حسّ ایلە رسالۀ نورڭ معناسی اعتباریلە ترجماننە، آننەسنە یالوارمەسندن زیادە بر اشتیاق ایلە قوشویورلردی.

بز دە بر حسّ قبل الوقوع ایلە حسّ ایدییورزكە، ایلریدە بو معصوم كوچوجك مخلوقلردە بیوك نورجیلر چیقاجق. و ایلریدە نورڭ خاص شاكردلری اولاجقكە، بو وضعیتی كوسترییورلر. بن دە بو نوع كوچوجك معصوملری، اولادم اولمدیغندن اولاد معنویە اولارق دعالریمە عمومًا داخل ایتدم. هر صباح بونلری دە نور طلبەلریلە برابر دعالرمدە یاد ایدییورم.

هم اونلردن بر یاشندەكی معصومی، قرق یاشندەكی لاقید بر آدمە ترجیح ایتمەیە سبب، بونلر كناهسز و صمیمی بر علاقە كوسترمەسندن، البتە اونلری سوق ایدن بر حقیقت وار. بن دە او جهتدە اونلری بیوكلرە تمنّا ایتدیگم كبی، اونلرڭ تمنّالرینە جدّی مقابلە ایدییورم.

هم معصومیتلری، هم ایلریدە نورجی اولمەلرینە بناءً، دعالرینی كندی حقّمدە مقبول اولاجق دییە اونلرە دیردم: "مادام سز بنم اولاد معنویەم اولدیڭز. بن سزە دعا ایدییورم. سز دە كناهڭز اولمدیغی ایچون، دعاڭز بنم حقّمدە ان شٓاء اللّٰه مقبولدر. سز دە بڭا دعا ایدیڭز. چونكە زیادە خستەیم" دیردم. بن و بنم یانمدەكی قرداشلریمڭ قوّتلی بر احتمال ایلە قناعتمز كلییوركە، ماصون و زندیقلرڭ پلانیلە بولشویزم طرزندە كنچلری تربیە ایتمك ایچون بر وقت بعض مكتبلر آچیلدیغی و صوڭرە دگیشن بو مكتبلرلە كنچلری افسادە چالیشدقلرینە مقابل، اسلامیتڭ قهرمان بایراقداری اولان تورك ملّتنڭ معصوم كوچوجك یاورولری، نورانی بر انتباه و بر حسّ قبل الوقوع ایلە نورلردن درس آلمەلری، كنچلرڭ باشنە كلن او بلایە قارشو بر مقابلەدركە، ان شٓاء اللّٰه او یاورولرڭ هم كندیلری، هم كنچلر، ماصون و زندیقلرڭ شرلرندن قورتولمەسنە بر اشارتدركە، بو عجیب وضعیتی كوسترییورلر.

سعید النّورسی

صونغور، ضیا، زبیر

[حاشیە] هجمات ستّەنڭ دردنجی دسیسە بحثنە بر حاشیەدر. چونكە هركس بردن او مقامدەكی مقصدی آڭلامییور.

هجمات ستّەنڭ دردنجی دسیسە مبحثندە بڭا هجوم ایدن ملحدلر، قرداشلریمڭ عصبیت ملّیەلرینی تحریك ایچون، "سعید كرددر. سز نەدن اونڭ پشنە دوشویورسڭز؟" دیمەلرینە مقابل ویردیگم جوابڭ قیصەجە مأٓلی بودر:

ای بدبخت ملحدلر! بن فللّٰە الحمد مسلمانم. اسلامیت ملّتیلە اوچ یوز اللی میلیون قرداشلریمڭ و كرددن یوزدە طقسان اولان اهل ایمان و اهل سنّت ملّتمڭ اخوّتنی و دعالرینی قزاندیغم حالدە، او قدسی ملّیت یرینە عنصریت كردلك ملّیتنی اساس ایدوب، كردجیلك حسابنە كردڭ اون قسمندن بر قسمی بدعەلرە ویاخود آیری مذهبە كیرمش محدود آدملرڭ فائدەسز قرداشلغنی قزانمقدن قاچییورم و جناب حقّە صیغینییورم. سزڭ كبی ملحدلر، اوچ یوز اللی میلیونڭ قرداشلغنی ترك ایدوب توركجیلك حسابیلە یالڭز مجار، بولغاردن اسلامیتە كیرمەین محدود بر قسم فرنكلشمش توركلری قرداش قازاندیغڭزدن، بنی دە كندیڭزە قیاس ایدییورسڭز.

بدیع الزّمان سعید نور اثرلری

عدد: ١-اشارات الاعجاز فی مظان الایجاز، قرآن كریمڭ تفسیری

٢-ذوالفقار

٣-عصای موسی

٤-سراج النّور

٥-سكّۀ غیبیە

بدیع الزّمان سعید نور یوقاردەكی اثرلری، اسكی حرف اولارق پوستەیە تأدیەلی اولارق ویریلمسی، شاید ممكن اولمدیغی، فیئٓاتلرڭ بیلدیریلمسی صایغی ایلە رجا اولونور.

١٧-٧-٩٥٠ ناظمە مفتیسی م.

ادرنە، اوچ شرفەلی جامعی امامی سالم آریجی دخی رسالۀ نور ایستەیور.

جیحاندە تجّار حقّی چاموردن رسالۀ نور ایستەیور.

شارقیشلەدە بایع علی قرەبلوط ١٥ عدد نور رسالەسی ایستەیور.

باغچوان صوقاق نومرە ٢١ أمكلی أوگرتمن قدیر قیا آلپ آطەپازاری، رسالۀ نور ایستەیور.

(٥٢٨)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] امرطاغندە، درە ایچندە، یاریم بر طاغ باشندە، ایكی بوچوق سنە آرا صیرە بر معنوی مدرسە طرزندە مدرسة الزّهرانڭ تكثیر ایتدیگی مجموعەلرڭ تصحیحیلە وقت كچیردیگمدن، هم او خاطرەیی، هم قرق اللی سنە اوّل واندە

طلبەلرملە قیمتدار خاطرەیی تازەلەمك ایچون، او طاغجغڭ باشندەكی طاشلرڭ ایچندە اسكی طرز درسیلە درین و قیمتدار و بتون جملەلری وجیزەلر نوعندن اولان مطبوع لمعاتی درس ویردم. صوڭرە طاش اوستندە آبدست آلیركن خاطرە كلدیكە، یگرمی كوندە، هر كون بر ایكی ساعت چالیشمەسیلە بو خارقە لمعاتی یازان بر آدم، یتمش یدی سنە دائما یازی یە چالیشدیغی حالدە، یدی یاشندە بر چوجغڭ یدی هفتە ایچندە، بعض خارقە یدی كوندە اوگرندكلری یازی یە، او آدم یتیشمدیگی و یتیشەمدیگی سببی نەدر دییە قلبمە شدّتلە طوقوندی.

بردن خاطرە كلدی. و یانمدە حاضر اوچ قرداشم دە كمال تصدیق قطعی قناعتمز كلدیكە، اگر او قابلیتە كورە حسن خطّم دە اولسە ایدی، خسرولر، علیلر، فیضیلر، نظیفلر، صبریلر، احمدلر، محمدلر، مصطفیلر كبی الماس قلملی یوزر معاونلری آرامایاجقدی. مستغنیانە باقوب اونلرە یالوارمایاجقدی. او وقت خدمت نوریەیە بیوك بر ضرر كلمەمك ایچون، خارقە نوعندە بو یاریم امّیلك رسالۀ نورڭ بر كرامتی، هم امّیلك شرف قدسیەنڭ كونشندن بر لمعەجق، تفسیر قرآنڭ ترجماننە احسان ایدیلمش. چوقدنبری حیرت و تأسّف ایتدیگم عجیب حالڭ حكمتنی بیلدك.

[ثانیًا] تاریخچۀ حیاتی یڭی حرفلە سز مناسب كورسەڭز نظیف تكثیر ایتسین. فقط آخرلرندە محكمۀ كبرایە شكوا و اسكیشهر مدافعاتندەكی: "ای اهل حلّ و عقد!"

سرلوحەسیلە باشلایان، لفًّا سزە كوندردیگمز فقرە و سزڭ مناسب كوردیگڭز بعض فقرەلر الحاق اولسون. دار الفنون طلبەلرینڭ مبعوثانە یازدیغی اویغون فقرەلرڭ علاوەسی سزە حوالەدر.

[ثالثًا] نور طلبەلری نامنە "حسب حال" نامندە نظیفڭ نشر ایتدیگی پارچەدن اون دانەسنی دە سزە كوندرییورزكە، مناسب كوردیگڭز مبعوثلرە ویریلسین.

اَلْبَاقٖی هُوَ الْبَاقٖی

سعید النّورسی

[٥٢٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم، مدرسة الزّهرا اركانلری، نور ناشرلری،

[اوّلا] بر مسئلەیی بز مناسب كوردك. سزە، اصل نور حقّندە سوز صاحبی اولان مدرسة الزّهرا اركانلرینڭ تنسیبنە حوالە ایتمك ایچون قلبە كلدی. شویلەكە:

بوكونلردە بڭا خدمت ایدن اوچ آرقداشمزڭ موقّتًا برقاچ كون بندن درس آلمق اشتیاقلرینە بناءً و اسكی زماندە طلبەلریمە درس ویردیگم قیمتدار بر خاطرەیی حیاتلاندیرمق اشتیاقنە بناءً، مطبوع لمعاتی هر كون

بر صحیفەسنی درس ویرییوردم. هم بن، هم اونلر چوق حیرتلە و تقدیرلە قارشیلادق.

فكریمزە كلدیكە، بو مطبوع رسالەنڭ، سائر مطبوع رسالەلر كبی نسخەلرینڭ قالمدیغنڭ سببی، بونڭ چوق قیمتدار اولدیغنی بیلن دوشمان قسمی، انتشارینە مانع اولدقلرینە.. و دوست قسمی، قیمتی ایچون ألندن چیقارمادیغنە قناعتمز كلدی.

هم كوردككە، بو لمعات، رسالۀ نورڭ مهم بر قسمنڭ چكردكلری، تخوملری حكمندە غایت كوزل وجیزەلر و هیچ بر ادیبڭ و متفكّرڭ موفّق اولامدیغی بر طرزلە، سهل ممتنع كبی تقلید ایدیلمز، بیوك بر حقیقت اجتماعیەیی كوچك بر وجیزەدە و منظوم بر كتابی منثور كبی، عین نثرلی بر كتاب كبی، هیچ نظمی خاطرە كتیرمدن قولایجە اوقوناجق بر طرزدە بولونمسی، اوتوز یدی سنە اوّل رمضان شریفڭ یگرمی كونندە، هر كون بر ایكی ساعت اشتغال ایلە بو طرزدە قوجە بر كتاب قدر اوزون، بر نوع اجتماعی مثنوی یازیلمەسی و ایچندە یگرمی یردە، بر اخطار غیبی نوعندە خبر ویردكلرینڭ اوتوز قرق سنە صوڭرە عینًا مأٓلی چیقمەسی كبی -او نقطەلرە المزە كچن بر نسخەدە اشارت قویدق- كوسترییوركە:

بو لمعات، رسالۀ نورڭ بر مژدەجیسی و فهرستەسی و بر فیدانلق نمونەسیدر، قناعتمز كلدی.

[ثانیًا] بو لمعاتڭ اشارت ایتدیگمز قسملری، اوتوز اوچنجی سوز نامندە سوزلرڭ آخرندە یازیلمەسنی، نور قهرمانی خسروڭ و مدرسة الزّهرا اركانلرینڭ رأینە حوالە ایدییورز. [حاشیە]

عموم قرداش و همشیرەلریمە سلام و دعا و دعالرینی ایستەیورم.

اَلْبَاقٖی هُوَ الْبَاقٖی

سعید النّورسی

(٥٣٠)

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

نورڭ اهمّیتلی و فداكار بر شاكردی اولان صونغوری و تصحیح اولان لمعات ایلە بڭا لزومی قالمایان، صاتیلمق ایچون بعض اشیامی برابر سزە كوندردم. اونلرڭ فیئٓاتیلە بڭا كوندرەجگڭز، استانبولە نظیف طرفندن جلدلنمك ایچون كوندریلن رسالەلرڭ فیئٓاتنە حساب ایدیلسین. هم اون بش سنەدنبری اوستمدە استعمال ایتدیگم مبارك بر كلیم و بش سنەدنبری یانمدە بولونان بر اوستورەمی دە برابر كوندرییورم.

سعید

(٥٣١)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق، قهرمان (خسرو) آغابگمز،

[اوّلًا] بیڭلر سلام ایدر، اللریڭزدن اوپرز.

[ثانیًا] اینەبولیدە یڭی حرفلە تكثیر ایدیلەجك تاریخچەء حیاتە "ای اهل حلّ [حاشیە]و عقد!" سر لوحەلی فقرەنڭ دە علاوەسی بیلدیریلمشدی. حالبوكە بو فقرەیی استادیمز كورمەمش، یاڭلیش اولمش. بو فقرە علاوە ایدیلمەیەجكدر. صونغور قرداشمزڭ طوغو مجموعەسنە كوندرمك اوزرە یازدیغی شو فقرە، تاریخچۀ حیاتڭ آخرندە مناسب كوردیگڭز بر یرینە علاوە ایدیلەجكدر. او دە شودر:

اهل ایماندن بتون كلنلر، ماضی یە كیدنلرە مغفرت دعالریلە و حسناتلرینی اونلرڭ روحلرینە باغیشلامەلریلە یاردیملرینە بناءً، دڭزلی محكمەسندە دیمشدم: "محكمۀ كبرادە، میلیارلر اهل ایماندن دعواجیلر طرفندن، قرآن حقیقتلرینە خدمت ایدن نور طلبەلرینی محكوم و پریشان ایتمك ایستەینلردن و سزلردن صورولسەكە، سربستیت قانونیلە دینسزلرڭ، قومونیستلرڭ نشریاتلرینە و آنارشیلگی یتیشدیرن

جمعیتلرینە مسامحەكارانە باقوب ایلیشمدیگڭز حالدە، وطن و ملّتی آنارشیلكدن و دینسزلك و اخلاقسزلقدن و وطنداشلرینی ئولومڭ اعدام ابدیسندن قورتارمغە چالیشان رسالۀ نوری و طلبەلرینی حپسلرلە، تضییقلرلە پریشان ایتمك ایستەدیڭز "دییە سزلردن صورولسە، نە جواب ویرەجكسڭز؟ بز دە سزلردن صورییورز. اونلرە دیمشدم. او زمان انصافلی، عدالتلی ذاتلر بزی برائت ایتدیردیلر.

سابق محكمەلردە دعوا ایتدیگمز و حجّتلرینی كوستردیگمز كبی، بزم دوشمانلریمز و حكومتی اغفال و بر قسم اركاننی اوهاملاندیران و عدلیەلری علیهمزە سوق ایدن رسمی و غیر رسمی معارضلریمز، یا غایت فنا بر صورتدە آلدانمش ویا آلداتیلمش ویا آنارشیلك حسابنە غایت غدّار بر اختلالجیدر. ویا اسلامیتە و حقیقت قرآنە قارشو مرتدانە مجادلە ایدن بر دسّاس زندیقدركە، بزە هجوم ایتمك ایچون استبداد مطلقە جمهوریت نامنی ویرمكلە، ارتداد مطلقی رژیم آلتنە آلمقلە، سفاهت مطلقە مدنیّت نامنی طاقمقلە، جبر كیفئ كفری یە قانون نامنی ویرمكلە، هم بزی پریشان، هم حكومتی اغفال، هم عدلیەیی بزملە ظالمانە مشغول أیلەدیلر.

دعاڭزە محتاج ضیا، زبیر