[ثالثًا] هر یردە رسالۀ نورڭ انتشاری و اوقونمسی و پك فضلە مشتاقلری بولونمسی طولاییسیلە بنملە كوروشمك و قونوشمق و دعوت ایتمك آرزو ایدییورلردی. بو وضعیتدە، یگرمی ولایتە كیتمەمڭ ضرورتی واردی. آنجق رسالۀ نورڭ طبع ایدیلدیگی یرلر اولان آنقرە، استانبول و قونیەیە كیتدم.

بنی امرطاغنە چویرن دوستلرە شونی دیرمكە: حقّمدەكی بو معاملە بر عنایت و رحمت الٰهیەیە وسیلە اولدی، صیقیلمییورم. یالڭز بنم یگرمی سنە قالدیغم اسپارطە ولایتندە ایكی سنەلك كرا ایتدیگم بر أوم و اورادە بعض اشیالرم وار. اورانڭ هواسی دە بر پارچە خستەلغمە یارایور. حكومتڭ مساعدەلریلە بر آی امرطاغندە، بر آی دە كرالادیغم اسپارطەدەكی أومدە بولونمق آرزو ایدییورم.

بدیع الزّمان سعید النّورسی

[٧١٨]

(عموم نور طلبەلرینە استاد بدیع الزّمانڭ وفاتندن اوڭجە ویرمش اولدیغی اڭ صوڭ درسدر.)

عزیز قرداشلرم،

بزم وظیفەمز مثبت حركت ایتمكدر، منفی حركت دگلدر. رضای الٰهی یە كورە صرف خدمت ایمانیەیی یاپمقدر، وظیفۀ الٰهیەیە قاریشمامقدر. بزلر آسایشی محافظەیی نتیجە ویرن مثبت ایمان خدمتی ایچندە هر بر صیقینتی یە قارشو صبرلە، شكرلە مكلّفز. مثلا:

كندیمی مثال آلارق دیرم: بن اسكیدنبری تحكّمە و ترذیلە قارشو بویون اگمەمشم. حیاتمدە تحكّمی قالدیرمدیغم، بر چوق حادثەلرلە ثابت اولمش. مثلا، روسیەدە قوماندانە آیاغە قالقمامق، دیوان حرب عرفیدە اعدام تهدیدینە قارشو محكمەدەكی پاشالرڭ سؤٓاللرینە بش پارە اهمّیت ویرمدیگم كبی، درت قوماندانلرە قارشو بو طورم، تحكّملرە بویون اگمدیگمی كوسترییور. فقط بو اوتوز سنەدر مثبت حركت ایتمك، منفی حركت ایتمەمك و وظیفۀ الٰهیەیە قاریشمامق حقیقتی ایچون، بڭا قارشو یاپیلان معاملەلرە صبرلە، رضا ایلە مقابلە ایتدم. جرجیسؑ كبی و بَدِرْ، احد محاربەلرندە چوق جفا چكنلر كبی صبر و رضا ایلە قارشیلادم.

اوت مثلا، سكسان بر خطاسنی محكمەدە اثبات ایتدیگم بر مدّعئ عمومینڭ یاڭلیش ادّعالری ایلە علیهمزدەكی قرارینە قارشو، بد دعا دخی ایتمدم. چونكە اصل مسئلە بو زمانڭ جهاد معنویسیدر. معنوی تخریباتنە قارشو سد چكمكدر. بونڭلە داخلی آسایشە بتون قوّتمزلە یاردیم ایتمكدر.

اوت، مسلگمزدە قوّت وار. فقط بو قوّت، آسایشی محافظە ایتمك ایچوندر. []وَلَا تَزِرُ وَازِرَةٌ وِزْرَ اُخْرٰی [] دستوری ایلەكە، بر جانی یوزندن، اونڭ قرداشی، خاندانی، چولوق چوجغی مسئول اولاماز. ایشتە بونڭ ایچوندركە، بتون حیاتمدە، بتون قوّتملە آسایشی محافظەیە چالیشمشم. بو قوّت داخلە قارشو دگل، آنجق خارجی تجاوزە قارشو استعمال ایدیلەبیلیر. مذكور آیتڭ دستوری ایلە وظیفەمز، داخلدەكی آسایشە بتون قوّتمزلە یاردیم ایتمكدر. اونڭ ایچوندركە، عالم اسلامدە

آسایشی اخلال ایدیجی داخلی محاربات، آنجق بیڭدە بر اولمشدر. او دە، آرادەكی بر اجتهاد فرقندن ایلری كلمشدر. و جهاد معنوینڭ اڭ بیوك شرطی دە، وظیفۀ الٰهیەیە قاریشمامقدركە، بزم وظیفەمز خدمتدر، نتیجە جناب حقّە عائددر. بز وظیفەمزی یاپمقلە مجبور و مكلّفز.

بن دە جَلَالَ الدّٖینِ خَوارْزَمْ شَاهْ كبی، "بنم وظیفەم خدمت ایمانیەدر. موفّق ایتمك ویا ایتمەمك جناب حقّڭ وظیفەسیدر" دییوب، اخلاص ایلە حركت ایتمەیی قرآندن درس آلمشم.

خارجی تجاوزە قارشو قوّتلە مقابلە ایدیلیر. چونكە دوشمانڭ مالی، چولوق چوجغی غنیمت حكمنە كچر. داخلدە ایسە اویلە دگلدر. داخلدەكی حركت، مثبت بر شكلدە، معنوی تخریباتە قارشو معنوی، اخلاص سرّی ایلە حركت ایتمكدر. خارجدەكی جهاد باشقە، داخلدەكی جهاد باشقەدر. شیمدی میلیونلر حقیقی طلبەلری جناب حق بڭا ویرمش. بز بتون قوّتمزلە داخلدە آنجق آسایشی محافظە ایچون مثبت حركت ایدەجگز. بو زماندە داخل و خارجدەكی جهاد معنویدەكی فرق، پك عظیمدر.

بر مسئلە داها وار. او دە چوق اهمّیتلیدر. حكم قرآنە كورە، بو زماندە میمسز مدنیتڭ ایجاباتندن اولارق حاجات ضروریە درتدن یگرمی یە چیقمش. تریاكیلكلە، كورەنكلە و اعتیادلە حاجات غیر ضروریە، حاجات ضروریە حكمنە كچمش. آخرتە ایمان ایتدیگی حالدە، ضرورت وار دییە و ضرورت ظنّیلە دنیا منفعتی و معیشت دردی ایچون دنیایی آخرتە ترجیح ایدییور.

قرق سنە اوّل بر باش قوماندان، بنی بر پارچە دنیایە آلیشدیرمق ایچون بعض قوماندانلری، حتّی خواجەلری بنم یانمە كوندردی. اونلر دیدیلر: "بز شیمدی مجبورز. (اِنَّ الضَّرُورَاتِ تُبٖیحُ الْمَحْظُورَاتِ) قاعدەسیلە، آوروپەنڭ بعض اصوللرینی، مدنیتڭ ایجابلرینی تقلیدە مجبورز" دیدیلر. بن دە دیدم: "چوق آلدانمشسڭز. ضرورت، سٓوء اختیاردن كلسە قطعیًّا طوغری دگلدر، حرامی حلال ایتمز. سٓوء اختیاردن كلمزسە، یعنی ضرورت حرام یولیلە اولمامش ایسە، ضرری یوق. مثلا، بر آدم سٓوء اختیاری ایلە حرام بر طرزدە كندینی سرخوش ایتسە و سرخوشلقلە بر جنایت یاپسە، حكم علیهنە جاری اولور، معذور صاییلماز، جزا كورور. چونكە سٓوء اختیاری ایلە بو ضرورت میدانە كلمشدر. فقط بر مجذوب چوجق جذبە حالندە بریسنی اورسە معذوردر، جزا كورمز. چونكە اختیاری داخلندە دگلدر. ایشتە، بن او قوماندانە و خواجەلرە دیدم: اكمك ییمك، یاشامق كبی ضروری احتیاجلر خارجندە باشقە هانكی ضرورت وار؟ سٓوء اختیاردن، غیر مشروع میللردن و حرام معاملەلردن تولّد ایدن حركتلر، حرامی حلال ایتمەیە مدار اولامازلر. سینامە، تیاترو، دانس كبی شیلردە تریاكی اولمش ایسە، مطلق ضرورت اولمدیغی و سٓوء اختیاردن كلدیگی ایچون، حرامی حلال ایتمەیە سبب اولاماز. قانون بشری دە بو نقطەلری نظرە آلمشكە، اختیار خارجندە ضرورت قطعیە ایلە، سٓوء اختیاردن نشئت ایدن حكملری آییرمشدر. قانون الٰهیدە ایسە، داها اساسلی و محكم بر شكلدە بو اساسلر تفریق ایدیلمش."

بونڭلە برابر زمانڭ الجاآتی ایلە ضرورتلر اورتەلقدە ظن ایدرك بعض خواجەلرڭ بدعەلرە طرفدارلغندن طولایی اونلرە هجوم ایتمەییڭز. بیلمەیەرك، ضرورت وار ظنّیلە حركت ایدن او بیچارەلرە اورماییڭز. اونڭ ایچون قوّتمزی داخلدە صرف ایتمییورز. بیچارە، ضرورت درجەسنە كیرمش، بزە مخالف اولانلردن خواجە دە اولسە، اونلرە ایلیشمەییڭز. بن تك باشملە داها اوّل علیهمدەكی او قدر معارضلرە قارشو طایاندیغم، ذرّە قدر فتور كتیرمدیگم او خدمت ایمانیەدە موفّق اولدیغم حالدە، شیمدی میلیونلر نور طلبەسی اولدیغی حالدە، یینە مثبت حركت ایتمكلە اونلرڭ بتون تحقیراتلرینە، ظلملرینە تحمّل ایدییورم.

بز دنیایە باقمییورز. باقدیغمز وقت دە، اونلرە یاردیمجی اولارق چالیشییورز. آسایشی محافظەیە مثبت بر شكلدە یاردیم ایدییورز. ایشتە بو كبی حقیقتلر اعتباریلە، بزە ظلم دە ایتسەلر خوش كورملی ییز.

رسالۀ نورڭ نشری هر طرفدە قناعت تامّە ویردیكە، دموقراتلر دینە طرفداردرلر. شیمدی بر رسالەیە ایلیشمك، وطن، ملّت مصلحتنە تمامًا ضددر.

بر محرم رسالە واردیكە، او محرم رسالەنڭ نشرینی منع ایتمشدم. ئولدكدن صوڭرە نشر اولونسون، دیمشدم. صوڭرە محكمەلر آلوب اوقودیلر، تدقیق ایتدیلر، صوڭرە برائت ویردیلر. محكمۀ تمییز، او برائتی تصدیق ایتدی. بن دە بونی داخلدە آسایشی تأمین ایچون و یوزدە طقسان بش معصومە ضرر كلمەمسی ایچون نشر ایدنلرە اذن ویردم. سعید، مشورتلە نشر ایدەبیلیر، دیدم.

اوچنجی مسئلە: شیمدی كفر مطلق، اویلە جهنّم معنوی نشرینە چالیشییوركە، كائناتدە هیچ بر كافر اوڭا یاناشمامق لازم كلییور. قرآنڭ رحمةً للعالمین اولدیغنڭ بر سرّی بودركە: ناصل مسلمانلرە رحمتدر.. آخرتە ایمان، اللّٰهە ایمان احتمالنی ویرمسیلە دە، بتون دینسزلرە و بتون عالمە و نوع بشرە رحمت اولمەسنە بر نكتە، بر اشارتدركە، او معنوی جهنّمدن دنیادە دە اونلری بر درجە قورتارمش. حالبوكە شیمدی فن و فلسفەنڭ ضلالت قسمی، یعنی قرآنلە باریشمایان، یولدن چیقمش، قرآنە مخالفت ایدن قسمی، كفر مطلقی قومونیستلر طرزندە نشرە باشلادیلر. قومونیستلك پردەسندە آنارشیستلگی نتیجە ویرەجك بر صورتدە منافقلر، زندیقلر واسطەسیلە و بعض مفرط دینسز سیاستجیلر واسطەسیلە نشر ایلە آشیلانمغە باشلاندیغی ایچون، شیمدیكی حیات، دینسز اولارق قابل دگلدر، یاشاماز. "دینسز بر ملّت یاشاماز" حكمی بو نقطەیە اشارتدر. كفر مطلق اولدیغی زمان، حقیقت حالدە یاشانماز. اونڭ ایچون قرآن حكیم، بو عصردە بر معجزۀ معنویەسی اولارق رسالۀ نور شاكردلرینە بو درسی ویرمشكە، كفر مطلقە، آنارشیستلگە قارشو سد چكسین. هم چكمش. اوت، چینی، هم یاری آوروپەیی و بالقانلری استیلا ایدن بو جریانە قارشو بزی محافظە ایدن قرآن حكیمڭ بو درسیدركە، او هجومە قارشو سد چكمش، بو صورتلە او تهلكەیە قارشو چارە بولمشدر.

دیمك بر مسلمان ممكن دگل، باشقە بر دینە كیروب، یا خریستیان و یهودی،

خصوصًا بولشویك كبی اولمق. چونكە بر عیسوی مسلمان اولسە، عیسی علیە السّلامی داها زیادە سَور. بر موسوی مسلمان اولسە، موسی علیە السّلامی داها زیادە سَور. فقط بر مسلمان، محمّد علیە الصّلاة والسّلامڭ زنجیرندن چیقسە، دیننی بیراقسە، داها هیچ بر دینە كیرمز، آنارشیست اولور. روحندە كمالاتە مدار هیچ بر حالت قالماز. وجدانی تفسّخ ایدر، حیات اجتماعیەیە بر زهر اولور.

اونڭ ایچون جناب حقّە شكر، قرآن حكیمڭ اشارات غیبیەسی ایلە قهرمان تورك و عرب ملّتلری ایچندە لسان توركی و عربی ایلە بو عصری قورتاراجق بر معجزۀ قرآنیەنڭ رسالۀ نور نامیلە بر درسی انتشارە باشلامش. و اون آلتی سنە اوّل آلتی یوز بیڭ آدمڭ ایماننی قورتاردیغی كبی، شیمدی میلیونلردن كچدیگی ثابت اولمش. دیمك رسالۀ نور، بشری آنارشیستلكدن قورتارمغە بر درجە وسیلە اولدیغی كبی، اسلامڭ ایكی قهرمان قرداشی اولان تورك و عربی برلشدیرمەیە، بو قرآنڭ قانون اساسیلرینی نشر ایتمگە وسیلە اولدیغنی دوشمانلر دە تصدیق ایدییورلر.

مادام بو زماندە كفر مطلق قرآنە قارشو چیقییور. كفر مطلقدە جهنّمدن زیادە، دنیادە دە داها بیوك بر جهنّم وار. چونكە ئولوم مادام ئولدیریلمییور. هر كون بشردە اوتوز بیڭ جنازە ئولومڭ دوامنە شهادت ایدییور. بو ئولوم كفر مطلقە دوشنلرە، یاخود طرفدار اولانلرە، هم شخصڭ اعدام ابدیسی و بتون كچمش،

كلەجك اقربالرینڭ دە اعدام ابدیسی اولارق دوشوندیگی ایچون، جهنّمدن اون دفعە داها فضلە دهشتلی جهنّم عذابی چكر. دیمك او جهنّم عذابنی كفر مطلقلە قلبندە دویویور. چونكە هر بر انسان، اقرباسنڭ سعادتیلە مسعود، عذابیلە معذَّب اولدیغی كبی.. اللّٰهی انكار ایدنلرڭ اعتقادلرنجە بتون او سعادتلری محو اولویور، یرینە عذابلر كلییور. ایشتە بو زماندە، بو دنیادە بو معنوی جهنّمی انسانلرڭ قلبندن ازالە ایدن تك بر چارەسی وار: او دە قرآن حكیمدر. و بو زمانڭ فهمنە كورە اونڭ بر معجزۀ معنویەسی اولان رسالۀ نور اجزالریدر.

شیمدی اللّٰهە شكر ایدییورزكە، سیاسی پارتیلر ایچندە بر پارتی، بر پارچە بونی حسّ ایتدیكە، او اثرلرڭ نشرینە مانع اولمدی. حقائق ایمانیەنڭ دنیادە بر جنّت معنویەیی اهل ایمانە قزاندیردیغنی اثبات ایدن رسالۀ نورە ممانعت ایتمدی، نشرینە مساعدەكار طاوراندی. ناشرلرینە دە تضییقاتدن واز كچدی.

قرداشلرم، خستەلغم پك شدّتلی، بلكە پك یاقیندە ئولەجگم. ویاخود بتون بتون قونوشمقدن -بعضًا منع اولدیغم كبی- منع ایدیلەجگم. اونڭ ایچون بنم نور آخرت قرداشلرم، اهون الشّر دییوب بعض بیچارە یاڭلیشجیلرڭ خطالرینە هجوم ایتمەسینلر. دائما مثبت حركت ایتسینلر. منفی حركت وظیفەمز دگل. چونكە داخلدە حركت منفیجە اولماز. مادام سیاستجیلرڭ بر قسمی رسالۀ نورە ضرر ویرمییور، آز مساعدەكاردر.. اهون الشّر اولارق باقیڭز. داها اعظم الشردن قورتولمق ایچون، اونلرە ضرریڭز طوقونماسین، اونلرە فائدەڭز طوقونسون.

هم داخلدەكی جهاد معنوی، معنوی تخریباتە قارشو چالیشمقدركە، مادّی دگل، معنوی خدمتلر لازمدر. اونڭ ایچون اهل سیاستە قاریشمدیغمز كبی، اهل سیاست دە بزملە مشغول اولمغە هیچ بر حقلری یوق.

مثلا، بر پارتی، بڭا بیڭلر وجهلە صیقینتی ویردیگی حالدە، حتّی اوتوز سنەدە حپسلر دە، تضییقلر دە اولدیغی حالدە، حقّمی حلال ایتدم. و عذابلرینە مقابل، او بیچارەلرڭ یوزدە طقسان بشنی تزییف و اعتراضلرە، ظلملرە معروض قالمقدن قورتولمغە وسیلە اولدمكە، []وَلَا تَزِرُ وَازِرَةٌ وِزْرَ اُخْرٰی [] آیتی حكمنجە، قباحت آنجق یوزدە بشە ویریلدی. او علیهمزدەكی پارتینڭ شیمدی هیچ بر جهتلە علیهمزدە شكوایە حقلری یوقدر.

حتّی بر محكمەدە، یاڭلیش مخبرلرڭ و جاسوسلرڭ اوهاملری ایلە، بزی، یتمش كیشی یی، محكوم ایتمك ایچون سٓوء فهمیلە، دقّتسزلگی ایلە، رسالۀ نورڭ بعض قسملرینە یاڭلیش معنا ویرەرك سكسان یاڭلیشلە بنی محكوم ایتمەیە چالیشدیغی حالدە، محكمەلردە اثبات ایدیلدیگی كبی، اڭ زیادە هجومە معروض بر قرداشڭز، محبوس ایكن پنجرەدن او مدّعئ عمومینڭ اوچ یاشندەكی چوجغنی كوردی، صوردی، دیدیلر: "بو مدّعئ عمومینڭ قیزیدر." او معصومڭ خاطری ایچون او مدّعی یە بد دعا ایتمدی. بلكە اونڭ ویردیگی زحمتلر، او رسالۀ نورڭ، او معجزۀ معنویەنڭ انتشارینە، اعلاننە بر وسیلە اولدیغی ایچون رحمتلرە انقلاب ایتدی.

قرداشلرم، بلكە بن ئولەجگم. بو زمانڭ بر خستەلغی داها وار: او دە بنلك، انانیت، خودفروشلق، حیاتنی كوزلجە مدنیّت فانتازیەسیلە كچیرمك اشتهاسی، تریاكیلك كبی خستەلقلردر.

رسالۀ نورڭ قرآندن آلدیغی درسڭ اڭ برنجی اساسی، بنلك، انانیت، خودفروشلغی ترك ایتمك لزومیدر. تا اخلاص حقیقی ایلە ایمانڭ قورتاریلمەسنە خدمت ایدیلسین. جناب حقّە شكر، او اعظمی اخلاصی قزانانلرڭ پك چوق افرادی میدانە چیقمش. بنلگنی، شان و شرفنی اڭ كوچك بر مسئلۀ ایمانیەیە فدا ایدن چوقدر. حتّی نورڭ بیچارە بر شاكردینڭ دوشمانلری دوست اولدیغی وقت، اونڭلە صحبت ایتمك چوغالدیغی ایچون، رحمت الٰهیە جهتندە سسی كسیلمش. هم دە اوڭا تقدیرلە باقانلر، اصابت نظر حكمنە كچوب اونی اینجیتییور. حتّی مصافحە ایتمك دە طوقات اورمق كبی صیقینتی ویرییور. "سنڭ بو وضعیتڭ نەدر؟" دییە صورولدی. "مادام میلیونلر قدر آرقداشلرڭ وار، نەدن بونلرڭ خاطرلرینی محافظە ایتمییورسڭ؟"

جوابًا دیدی:

مادام مسلگمز اعظمی اخلاصدر، دگل بنلك، انانیت، دنیا سلطنتی دە ویریلسە، باقی بر مسئلۀ ایمانیەیی او سلطنتە ترجیح ایتمك، اعظمی اخلاصڭ اقتضاسیدر. مثلا، حرب ایچندە، آوجی خطّندە، دوشمانڭ طوپ كُلَّەلری آراسندە قرآن حكیمڭ تك بر آیتنڭ، تك بر حرفنڭ، تك بر نكتەسنی ترجیح ایدرك، او كُلّەلر ایچندە

حبیب كاتبنە "دفتری چیقار!" دییەرك آت اوستندە او نكتەیی یازدیرمش. دیمك قرآنڭ بر حرفنڭ بر نكتەسنی، دوشمانڭ كلّەلرینە قارشو ترك ایتمەمش، روحنڭ قورتولمەسنە ترجیح ایتمش.

او قرداشمزە صوردق: "بو عجیب اخلاصی نرەدن درس آلمشسڭ؟"

دیمش: "ایكی نقطەدن:

بریسی: عالم اسلامیتڭ اڭ عجیب حربی اولان بَدِرْ حربندە، نماز وقتندە جماعتدن حصّەسز قالمامق ایچون، دوشمانڭ هجومی ایلە برابر، مجاهدلرڭ یاریسی سلاحنی بیراقوب جماعت خیرینە شریك اولمق، ایكی ركعت صوڭرە اونلر دە حصّەدار اولسون دییە فخر عالم علیە الصّلاة والسّلام بر حدیث شریفیلە امر ایتمش اولمسیدر. مادام حربدە بو رخصت وار. و مادام جماعت خیری دە سنّت اولدیغی حالدە، او سنّتە رعایت ایتمك، اڭ بیوك بر حادثۀ دنیویەیە ترجیح ایدیلمش. استاد مطلقڭ بویلە بر اشارتندن بر نكتەجك آلارق، بز دە روح و جانمزلە اتّباع ایدییورز.

ایكنجیسی: قهرمان اسلام امام علی رضی اللّٰه عنه، جلجلوتیەنڭ چوق یرلرندە و آخرندە بر حمایتجی ایستەمشكە، نماز ایچندە حضورینە غفلت كلمەسین. دوشمانلری طرفندن اوڭا بر هجوم معناسی خاطرینە كلمەمك، صرف نمازدەكی حضورینە پك چوق اولان دوشمانلری طرفندن بر هجوم تصوّری ایلە نمازدەكی حضورینە مانع اولونمامق ایچون بر محافظ عفریتی دركاە الٰهیدن نیاز ایتمش. "

ایشتە بو بیچارە، عمری بو زماندە خودفروشلق ایچندە یووارلانان بیچارە قرداشڭز دە، هم سبب خلقت عالمدن، هم قهرمان اسلامدن بو ایكی كوچك نكتەیی درس آلدم. و بو زماندە چوق لازم اولان قرآنڭ اسرارینە اهمّیت ویرمكلە، حرب ایچندە روحنڭ محافظەسنی دیڭلەمیەرك، قرآنڭ بر حرفنڭ بر نكتەسنی بیان ایتمش.

سعید النّورسی

بِسْمِ اللّٰهِ الرَّحْمٰنِ الرَّحٖیمِ

یَٓا اَللّٰهُ یَا رَحْمٰنُ یَا رَحٖیمُ یَا فَرْدُ یَا حَیُّ یَا قَیُّومُ یَا حَكَمُ یَا عَدْلُ یَا قُدُّوسُ

اسم اعظمڭ حقّنە و قرآن معجز البیانڭ حرمتنە و رسول اكرم علیە الصّلاة والسّلامڭ شرفنە، بر قلم ایلە بیڭلر نسخە یازان خسروی و مبارك یاردیمجیلرینی و نورجی آرقداشلرینی جنّت الفردوسدە سعادت ابدیەیە مظهر أیلە. آمین! و خدمت ایمانیە و قرآنیەدە دائما موفّق أیلە. آمین! و دفتر حسناتلرینە بو مجموعەنڭ هر بر حرفنە مقابل بیڭ حسنە یازدیر. آمین! و نورلرڭ نشرندە ثبات و دوام و اخلاص احسان أیلە. آمین! آمین! آمین!

یا ارحم الرّاحمین! عموم رسالۀ نور شاكردلرینی ایكی جهاندە مسعود أیلە. آمین! انسی و جنّی شیطانلرڭ شرلرندن محافظە أیلە. آمین! و بو عاجز و بیچارە سعیدڭ قصوراتنی عفو أیلە. آمین! آمین! آمین!

عموم نور شاكردلری نامنە

سعید النّورسی