طولاییسیلە، چكینكن، قورقاق یاخود چوق تدبیرلە حركت ایدن بر قسم مسلمان قرداشلریمزە و دوستلریمزە بیوك بر جسارت و اشتیاق كلدی. نشر كنیشلەمكدە اولدیغی ایچون تبریك ایدرز.

هم محكمەلر طولاییسیلە رسالۀ نورە خدمت و هر جهتدە استادیمزە یاردیم ایدن كیمسەلرڭ اخروی پك بیوك خارقە حسنات قزاندقلرندن طولایی تبریك ایدرز.

عاجزلگمزلە هر آن دعاجی یز. بز دە سزڭ دعاڭزە هر زمان محتاجز. سلام و حرمتلریمزی صونار، اللریڭزدن كمال حرمتلە اوپرز.

آسیە، شاهدە، عبد الرحمن

[٦٤٧]

نور عالمنڭ بر آناختارینڭ بر حاشیەسی

بو نور آناختارینڭ رادیو بحثنە دائردر. بر كون ایكی اونیورسیتەلی ایلە، حركت ایتمكدە اولان و هیچ بر تل ایلە باغلی بولونمایان، بر اوطوموبیلدەكی رادیو ایلە، اوزاقدە اوقونان بر مولد شریفی دیڭلەیوردق. او ایكی نورجی اونیورسیتەلیلرە دیدم:

نوردە دخی، حیات و وجود كبی طوغریدن طوغری یە قدرت الٰهیّەنڭ پردەسز تجلّیسی بداهتلە كوروندیگنە بر دلیل بودركە، شیمدی بو ماكینەجكدەكی طیرناق قدر بر هوا و معنوی آز بر نور، یالڭز بو مولددن كلن كلمەلری دیڭلر،

سویلر دگل، بلكە بیڭلر، میلیونلر كلمەلری عین آندە دیڭلر، سویلركە، بیڭلر ایستاسیوندەكی آیری آیری كلمەلری شیمدیكی ایشیتدیگمز كلمەلر كبی ایشیتیر و ایشیتدیرەبیلیر، بزە سویلەیەبیلیر. دیمك اڭ جزئی، اڭ كلّی اولور.

هم او كوچوجك، بر پارچەجق هوا، كرۀ هوا قدر وظیفە كورور. اڭ كوچك هوا، اڭ بیوك كرۀ هوا قدر بویور. بو حال اگر جلوۀ قدرت ازلیەیە ویریلمزسە، اویلە عجیب، خرافەلی بر تضاد اولوركە، هیچ بر خیالە كلمز. و بر شیئڭ ضدّینە انقلابی محال اولدیغندن، بویلە بیڭلر درجە اڭ جزئی، ضدّی اولان اڭ كلّی اولمق.. اڭ كوچك، اڭ بیوك اولمق.. اڭ جامد، جاهل، شعورسز، عاجز اڭ مقتدر، اڭ درایتلی و ارادتلی و شعورلی اولمق لازم كلیركە، یوزر تضاد و محاللر و خرافەلر ایچندە، امثالی بولونماز بر خرافەدر. دیمك بالبداهە قدرت ازلیەنڭ بر جلوەسیدر. و او جلوەیی كرۀ هوادە عمومًا تمثیل ایدن بو كلن حدیث شریفڭ مأٓلی كوسترییور. شویلەكە:

بر ملائكە وار، قرق بیڭ باشی وار. هر باشندە، قرق بیڭ دیل وار. هر بر دیل ایلە، قرق بیڭ تسبیحات یاپییور. آلتمش درت تریلیون تسبیحاتی عین آندە سویلەیور. دیمك كرۀ هوا، بو ملائكە كبیدر. یعنی.. بو ملائكەنڭ تسبیحاتی عددنجە هر كلمۀ طیّبە، هوا صحیفەسندە یازیلییور.

كرۀ هوا دییوركە: "بو حدیث، بندن ویا بڭا نظارتە مأمور ملكدن خبر ویرییور. چونكە انساندەكی بتون قونوشمەلر و سائر بتون حدسز سسلر،

بربرینە قاریشدقلری حالدە، هیچ قاریشدیریلمدن تام حروفاتیلە و سویلەینلرڭ شیوەلریلە و ممتاز سسلریلە سویلەمسی كوستریركە، كلّی بر شعورلە یاپیلان بو ایشی، یعنی یالڭز تك بر ذرّەنڭ وظیفەسنی، نە بڭا، یعنی نە كرۀ هوایە و نە دە بتون اسبابە ویرمك هیچ بر جهت امكانی یوق. دیمك بو خارقە حال، هر یردە حاضر، ناظر احدیت جلوەسیلە و ایچندە احاطەلی بر ارادە و محیط بر علم بولونان بر قدرت ازلیەنڭ جلوەسیدر. بوڭا میلیونلر شاهدلرندن بریسی رادیودر. "

اون اوچنجی سوزدە، حكمت قرآنیە ایلە حكمت فلسفەیی موازنە بحثندە دینیلمش اولان مسئلەنڭ مأٓلی بودركە: فلسفۀ انسانیە، غایت خارق العادە اولان معجزات قدرت الٰهیەنڭ و معجزات رحمتڭ اوستنە عادیات پردەسی چكییور. او عادیات آلتندەكی وحدانیت دلیللرینی و او خارقە نعمتلرینی كورمییور، كوسترمییور. فقط عادتدن خروج ایتمش خصوصی بعض جزئیّاتی كورور، اهمّیت ویرر.

مثلا، خلقت انسانیەدەكی قدرت معجزەلرینی كورمییور، اهمّیت ویرمییور. فقط قاعدەدن چیقمش ایكی باشلی، اوچ آیاقلی بر انسانی كوروب، استغراب ایدر و ولولۀ حیرت ایلە نظر دقّتی اوڭا جلب ایدر. كلّی، عمومی معجزاتی عادت پردەسندە صاقلار. جزئی و قانوندن چیقمش و طائفەسندن آیریلمش مادّەلری مدار عبرت یاپار.

هم مثلا، حیوانلرڭ و انسانلرڭ یاورولرینڭ پك خارقە، پك معجزاتلی اعاشەلرینی عادی كوروب اهمّیت ویرمییور. فقط بر وقت آمریقەدە بر غزتەنڭ نشر ایتدیگی كبی، طائفەسندن چیقمش، ملّتندن آیریلمش، دڭزڭ دیبنە كیرمش بر بوجگڭ، بر یشیل یاپراق رزق اولارق آغزینە ویریلمەسنی كورن بالیقجیلر آغلامشلر، شعشعە ایلە اعلان ایتمشلر.

حالبوكە اڭ جزئی بر یاورونڭ، ممەدەكی آب كوثر كبی رزقندە، اونڭ كبی بیڭلر معجزات رحمت و احسان وار. فلسفۀ بشریە بونلری كورمییوركە شكر ایتسین، او رحمن رحیمی طانیسین، شكر ایلە مقابلە ایتسین.

ایشتە حكمت قرآنیە، او عادیات پردەسنی ییرتار. او كلّی، عمومی، خارقە معجزەلری و فوق العادە حكمتلری بشرە درس ویرر، اللّٰهی طانیتدیرر. كلّی شكر نامنە عبودیتە سوق ایدر.

ایشتە فلسفۀ بشریەنڭ اڭ عجیب، اڭ آنتیقە خطاسندن بریسی دە شودركە: جزء اختیاریسی و ارادەسی، اڭ ظاهر و كوچك فعلی اولان سویلەمەیە كافی كلمییور، ایجاد ایدەمییور. یالڭز هوایی حرفلرڭ مخرجنە صونویور. بو جزئی كسب ایلە جناب حق، اونڭ او كسبنە بناءً او كلماتی خلق ایدر. هوایە دە بیڭلر نسخە یازار. ایشتە ایجاددن انسانڭ ألی بو قدر قیصە اولدیغی حالدە، بتون اسباب كائناتڭ عاجز قالدقلری بر خارقە كلّی معجزات قدرتە، بشر ایجادی نامنی ویرمك، نە قدر بیوك بر خطا اولدیغنی ذرّە قدر شعوری بولونان آڭلار.

ایشتە بونڭ بر مثالی، یوز بیڭ خارقەلری تضمّن ایدن و بر قانون الٰهی اولان و بشرڭ استفادەسنە وسیلە اولمق ایچون بشرڭ النە ویریلن بر كشفیات، یعنی بشرڭ فعلی دعالرینە بر نوع قبول حكمندە بر الهام الٰهی ایلە كشف اولونان رادیو ایلە، بشرڭ استفادەسنە وسیلە اولان بر بیچارە، عاجز مطلق انسانە، "هاه! رادیویی فلان كشّاف ایجاد ایتدی و الكتریك قوّتنی بولدی. و بعض كشافلر دە، بشرڭ قفاسنی اوقومق ایچون بر مادّە ایجاد ایتمەیە چالیشییورلر."

اوت، جناب حق بو كائناتی، انسانە لازم و لایق و هر شیئی ایچندە خلق ایتمش بر مسافرخانە یاپمشدر. ضیافتلر نوعندن بعض زمانلردە و بعض عصرلردە كیزلی قالمش نعمتلرینی، دعای فعلی اولان و تلاحق افكاردن ایلری كلن تحرّیات نتیجەسندە انسانلرڭ اللرینە احسان ایدر. بوڭا قارشو شكر ایتمك لازم كلیر ایكن، بر كفران نعمت نوعندن، عادی، عاجز بر انسانڭ ایجادی و هنری نظریلە باقوب، صوڭرە او كلّی بر شعور و علم و ارادە و رحمت و احسانڭ نتیجەسی اولان خارقەلری اونوتدیرارق، یالڭز اینجە بر پردەسنی كوستروب، شعورسز تصادفە و طبیعتە و جامد مادّەلرە حوالە ایدوب، احسن تقویمدە اولان انسانیتڭ ماهیّتنە ضد بر جهل مطلق قاپوسنی آچمقدر.

اویلە ایسە (وَفٖی كُلِّ شَیْءٍ لَهُٓ اٰیَةٌ تَدُلُّ عَلٰٓی اَنَّهُ وَاحِدٌ) دستوریلە، مخلوقاتە معنای حرفیلە باقمق الزمدركە انسان، انسان اولسون.

[] سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖیمُ الْحَكٖیمُ []

بو مكتوب، سابق مكتوبلر كبی مدرسة الزّهرا اركانلرینە عین زماندە ویردیگی درسلرندن اولمق مناسبتیلە آرقەسنە الحاق ایدیلسین.

س * ع

(٦٤٨)

[] بِسْمِ اللّٰهِ الرَّحْمٰنِ الرَّحٖیمِ٭

شَهْرُ رَمَضَانَ الَّذٖٓی اُنْزِلَ فٖیهِ الْقُرْاٰنُ []

اولسون سڭا صلاة و سلام، ای پیغمبر عظام

كلمەسە ایدڭ جهانە، كلیرمی ایدی بزە قرآن؟

ای ایچی طیشی نورلر طولی فرقان،

خوش كلدڭ مبارك رمضان.

امر رسولؐ ایلە كلدڭ، شاهد اولدڭ، ای ایوب سلطان!

چوق قوماندانلر كلدی، فتحنە اولمدی فرمان

نهایت بختیار تام اولدی، فاتح سلطان محمد خان

ایشتە سزە اش اولدی بوكون بدیع الزّمان

خوش كلدڭ مبارك رمضان.

بر دور ضلالت، ادارۀ سفیان

افقلر قراردی، چاغیرییور ملّت ألأمان

بكلەیور دنیا یپ یڭی بر نور ایمان

ایشتە رسالۀ نور فاتح جهان

خوش كلدڭ مبارك رمضان.

ظلم ایلە ظلمت كوگلرە آغدی

بو كوزل وطنە چوق مصیبتلر یاغدی

بو قوجە قبّەلر قاپ قرە قراردی

تنویر ایتدی استاد اعظم بدیع الزّمان

خوش كلدڭ مبارك رمضان.

یدیدن یتمشە دك نورلی قرداشلری وار

دنیا ایچون نە غوغا، نە بر صاواشلری وار

نە بر قاینایان قازان، نە بر مطبخ، نە بر لذیذ آشلری وار

ایچلری طیشلری نورلر طاشییان

خوش كلدڭ مبارك رمضان.

طلبەڭزڭ قاپو قولی دە اولاماز بو عبد عاجز

عشقڭزلە طولی قانی و جانی، ایدیلییور قلبی تعجیز

استاد أیلەیور نیاز، لیل و نهار یازسین دە بر مكتوب ناچیز

بلكە بویلەدر قبولە نشان، ای استاد عالیشان!

خوش كلدڭ مبارك رمضان.

دییە هم مبارك رمضان شریفڭزی تبریك، هم قلبمزڭ سرورندن كلن سروری بیان، بو شكلدە قلمە آلمق خاطرە كلدی. عجزیمزە، جهلمزە، یاری قیریق قلممزە باقمادن، عفویڭزە مغرورًا تحریر و تقدیمنە جرئت ایدیلدی. قبولنی رجا ایدركن، مبارك ال و آیاقلریڭزی كمال حرمتلە أوپر، عمر و عافیتڭزە دعالر ایدرك، سز مبارك استادیمزڭ مبارك دعالرینی روح و جانمزلە یالواریرز افندم حضرتلری.

اَلْبَاقٖی هُوَ الْبَاقٖی

چوق قصورلی و كناهكار

بیچارە طلبەڭز صبری

پك محترم (خسرو) آغابگم،

بو مكتوبی و شعری، سوكیلی استادیمز سزە كوندریلمەسنی امر بویوردی. بر دە اسكیشهر پوستەسیلە بر عدد خطبۀ شامیە كوندریلدی. یڭیدن عربجە غایت كوزلجە یازیلاجغنی و خطاسز یازیسنە دقّت ایدیلەجگنی، كندیسی براز راحتسز اولدیغندن تام تصحیح یاپامدیغنی بیلدیردی. و امر بویوردیلر. پك چوق سلاملە مبارك اللریڭزدن اوپویورز.

عاجز قصورلی قرداشڭز

محمد

(٦٤٩)

[بِاسْمِهٖ سُبْحَانَهُ]

٣٠ مایس ٩٥٢ تاریخندە آفیوندەكی محكمەسندن صوڭرە تكرار امرطاغنە تشریف بویوران استادیمز بدیع الزّمان حضرتلرینڭ [بیوك طوغو غزتەسنڭ ٣١ مایس ٩٥٢ تاریخلی نسخەسندە نشر ایدیلن ] محكمەدەكی بیاناتلریدر.

خسرو

بدیع الزّمان محكمەدە:

عبد الرّحمن شرف لاچڭ كیزلیلگە اعتراضی اوزرینە طوروشمە علنی یاپیلدی. سعید النّورسی حضرتلری "بو دوردن اوّل، كیزلی دوشمانلرم مطلق بر استبدادلە جمهوریتی سپر آلارق بنی تعذیب ایتدیلر." دیدی.

بوكون آفیون آغیر جزا محكمەسندە، بدیع الزّمان سعید النّورسی حضرتلریلە ٣٤ نور طلبەسنڭ محاكمەلرینە باقیلمشدر. اسكیشهردن، اسپارطەدن، امرطاغندن و دیگر شهر و قصبەلردن یوزلرجە مراقلی بر دیڭلەییجی كتلەسنڭ حاضر بولوندیغی بو دعوادە، سكسانلك اختیار سعید النّورسی حضرتلری بالذّات حاضر بولونویوردی. آیریجە كندیسنی استانبولدن كلن آووقاتی عبد الرحمن شرف لاچ دە تمثیل ایدییوردی. دعوانڭ ماهیّتی شو ایدی: استادڭ [رسالۀ نور كلّیاتنڭ نشرندن طولایی] آفیون صاوجیلغی جزا قانوننڭ ١٦٣ نجی مادّەسنە كورە دعوا آچمشدر.

آنقرە پروفسورلرندن مرتَّب بر بیلیر كیشی هیئتی "بو رسالەلرڭ ١٦٣ نجی مادّەیە كورە، لائیكلگە آیقیری بر حركتی تضمّن ایتمدیگنی تثبیت ایدرك" راپور ویرمش. و عفو قانونی ایلە جزائی تعقیباتە دوام ایدیلەمیەجگی آڭلاشیلمش و دعوا طوردیریلمشدی.

بوڭا رغمًا آفیون آغیر جزا محكمەسی، یوزلرجە رسالۀ نور كلّیاتنڭ مصادرەسنە قرار ویرمشدی.

یاپیلان اعتراض اوزرینە تمییز محكمەسی، بیلیر كیشی هیئتی مواجهەسندە نور رسالەلرینڭ مصادرەسنە ناصل قرار ویرەبیلدیگی نقطەسندن حكمی بوزمش. یڭیدن طوروشمەیە باشلانمشدر.

جلسە آچیلدیغی زمان، محكمە هیئتی صاوجینڭ طلبی ایلە طوروشمەنڭ كیزلی اولارق جریان ایدەجگنی بیلدیرمش و صالونی طولدیران یوزلرجە دیڭلەییجی طیشاری یە چیقاریلمشدی. بونڭ اوزرینە آووقات عبد الرّحمن شرف لاچ بوڭا اعتراض ایتمش، طوروشمەنڭ كیزلی یاپیلمەسی ایچون قانونی سبب اولمدیغنی ایضاح ایتمشدر.

محكمە هیئتی بو جهتی تكرار مذاكرە ایتدكدن صوڭرە، طوروشمەنڭ علنًا اجراسنە یڭیدن قرار ویرمش و قاپولر آچیلارق دیڭلەییجیلر تكرار صالونە آلینمشلردر.

طوروشمە بو صورتلە باشلادقدن صوڭرە، عبد الرّحمن شرف لاچ دعوادەكی قانونی وضعیتی ایضاح ایتدی. بوندن صوڭرە محكمە رئیسنڭ "محكومیتی اولوب اولمدیغی" سؤٓالنە سعید النّورسی جواب ویردی و شویلە دیدی:

"محكمە قراریلە هیچ بر محكومیتم یوقدر. فقط یگرمی سكز سنە فعلاً ظلمڭ محكومی یم." و سوزلرینە شویلە دوام ایتدی: "دموقراسیدن اوّل كیزلی دوشمانلرم، جمهوریتی سپر آلارق بر استبداد مطلقلە، رژیمی سپر آلارق بر ارتداد مطلقلە، مدنیّتی سپر آلارق بر سفاهت مطلقلە و قانونی سپر آلارق جبر كیفئ كفری یی تطبیق ایتمكلە بنی تعذیب ایتدیلر. شیمدی حضوریڭزدە مظنون اولارق بولونان و مختلف ولایتلردن جلب ایدیلن نور طلبەلری عین اثرلردن طولایی محاكمە ایدیلمكدە و بیڭلرجە لیرە مصرفە معروض قالمقدەدرلر.

بو ایش درت سنە اوزامشدر. قانون هر یردە و هر محكمە ایچون بردر. قضیۀ مُحكمە موجوددر. بو ایش بورادە آرتق اوزامامەلیدر. رسالۀ نور، اسلامیت، ملّت و وطن ایچون خارقە فائدەلری و حسن تأثیرلری حائز اولوب، رمضان شریف حرمتنە جناب حقدن نیاز ایدرزكە، بو ایش آرتق بیتسین. داها فضلە اوزاماسین. "بونڭ اوزرینە محكمە بعض معاملەلرڭ اكمالی ایچون طوروشمەیی باشقە بر كونە بیراقمشدر.

بیوك طوغو

[٦٥٠]

[بِاسْمِهٖ سُبْحَانَهُ]

استادیمز شدّتلی خستە اولمەسندن، یالڭز بو مسئلەیە قارشو نوطلر حكمندە سویلەدی. بز دە قلمە آلدق. سز اصلاح ایدەبیلیرسڭز.

اوچ سنە اوّل صامسون محكمەسی مناسبتیلە، استادیمزڭ استانبولدە استنابە صورتیلە آلینان و برائتی نتیجە ویرن بر مدافعەسیدر.

(استادیمز بدیع الزّمان سعید النّورسی، صامسوندە منتشر بیوك جهاد غزتەسندە نشر اولوب، اورادە محاكمەسی كورولن بو مدافعەیی استانبول محكمەسندە اوقومش و محكمە برائتلە نهایت بولمشدر.)

كیزلی دوشمانلریمز بو رمضان شریفدە، تكرار عدلیەیی بنم علیهمە سوق ایتدیلر. مسئلە، بر كیزلی قومونیست قومیتەسی ایلە علاقەداردر.

بتون بتون قانون خلافنە اولارق، بنی تك باشملە، یالڭز اولارق قیردە و طاغدە اوتوروركن، اوچ مسلَّح ژاندارمە ایلە بر باش چاوش یانمە كوندردیلر. "سن باشڭە بَرَە كیییورسڭ" دییە، زورلە بنی قرەقولە كتیردیلر. بن دە، عدالتی هدف طوتان بتون عدلیەلرە سویلەیورمكە:

بویلە بش وجهلە قانونسزلق ایدوب، قانون نامنە بش وجهلە اسلامی قانونلرینی قیران آدم، حقیقی قانونسزلقلە اتهام ایدیلمك لازم كلیركن، اونلرڭ او عجیب قانونسزلغی بر سنەدنبری او عجیب بهانە ایلە وجدانی عذاب

ویردیگی ایچون، البتە محكمۀ كبرای حشردە بونڭ جزاسنی چكەجكلردر. اوت، اوتوز بش سنەدر منزوی اولدیغی حالدە، هیچ بر چارشی و قهوەلردە كزمەین بر آدمە، "سن فرنك سرپوشنی كییمییورسڭ" دییە اتهام ایتمەیی، دنیادە هانكی قانون مساعدە ایدر؟ یگرمی سكز سنەدنبری بش ولایت و بش محكمە و بش ولایتڭ ضابطەلری اونڭ باشنە كییدیگنە ایلیشمدكلری حالدە، خصوصًا بو دفعە استانبول محكمۀ عادلەسندە یوزدن زیادە پولیسلرڭ كوزلری اوڭندە، هم ایكی آیدە یایا اولارق هر یری كزدیگی و هیچ بر پولیس ایلیشمدیگی حالدە، هم محكمۀ تمییز "بَرَە یاساق دگل، برەیی كیینلر دە مسئول اولمازلر" دیدیگی حالدە، خصوصًا منزوی و انسانلر آراسنە كیرمەین و رمضان شریفڭ ایچندە بویلە خلاف قانون اڭ چركین بر شی ایلە روحنی مشغول ایتمەمك و دنیایی خاطرینە كتیرمەمك ایچون خاص دوستلریلە دخی كوروشمەین، حتّی شدّتلە خستە اولدیغی حالدە، روحی و قلبی و وجودیلە مشغول اولمامق ایچون علاجلری آلمایان و حكیملری چاغیرمایان بر آدمی، شاپقە كییدیرمك و اجنبیلرە و پاپاسلرە بڭزتمك ایچون شاپقەیی اوڭا تكلیف ایتمك و عدلیە ایلە تهدید ایتمك، البتە ذرّە قدر وجدانی اولان بو حالدن نفرت ایدر.

مثلا، اوڭا تكلیف ایدن دیمش: "بن امر قولی یم." جبر كیفئ كفری قانونلە امر اولورمیكە، "امر قولی یم" دیسین؟ اوت، قرآن حكیمدە، یهودی و نصرانیلرە

باشدە بڭزەمەمك ایچون آیت اولدیغی كبی، []اَطٖیعُوا اللّٰهَ وَاَطٖیعُوا الرَّسُولَ وَاُولِی الْاَمْرِ مِنْكُمْ [] آیتی دە، اولو الامرە اطاعتی امر ایدر. اللّٰه و رسولنڭ اطاعتنە ضد اولمامق شرطیلە، او اطاعتڭ "امر قولی یم" دییە حركت ایدەبیلیر. حالبوكە بو مسئلەدە، عنعنۀ اسلامیە قانونلری، خستەلری شفقتلە اینجیتمەمك، اختیارلری حرمتلە تحقیر ایتمەمك، غریبلرە شفقت ایدوب اینجیتمەمك، للّٰه ایچون قرآن و علم ایمانی یە خدمت ایدنلرە زحمت ویرمەمك و اونلری اینجیتمەمك لازم كلیركن، خصوصًا منزوی و دنیایی ترك ایتمش بر آدمە، اجنبی پاپاسلرڭ سرپوشنی تكلیف ایتمك، اون وجهلە دگل، یوز وجهلە قانونە مخالف اولمقلە برابر، اسلامڭ عنعنوی قانونلرینە قارشو بر قانونسزلق و كیفی بر امر حسابنە او قدسی قانونلری قیرمقدر. بنم كبی قبر قاپوسندە، غایت خستە، اختیار، غریب، فقیر، منزوی و سنّت سنیّەیە مخالفت ایتمەمك ایچون اوتوز بش سنەدنبری دنیایی ترك ایدن بر آدمە بو طرز معاملەلر، قطعیًّا شك و شبهە بیراقمدیكە، قومونیست پردەسی آلتندە، آنارشیلك حسابنە، وطن و ملّت و اسلامیت و دین علیهندە مدهش بر سٓوء قصد اثری اولدیغی كبی، اسلامیتە و وطنە خدمتە نیت ایدن و مدهش خارجی تخریباتە قارشو جبهە آلان دیندار دموقراتلرە دخی بیوك بر سٓوء قصددر. دیندار دموقراتلر دقّت ایتسینلر. بو دهشتلی سٓوء قصدە قارشو مدافعەدە بنی یالڭز بیراقماسینلر. [حاشیە]

سعید النّورسی