[٦١١]

(١٩٥٢‘دە استانبولدە كورولن كنچلك رهبری محكمەسنە، اهل وقوفە جوابًا ویریلن اعتراضنامەدر.)

استانبول امین أوڭی برنجی آغیر جزا محكمەسنە،

رسالۀ نور اجزالرندن كنچلك رهبرینڭ طبعی و انتشاری مناسبتیلە، مؤلّفی بدیع الزّمان سعید النّورسینڭ محكمەیە ویریلدیگنی و كنچلك رهبرینڭ ماهیّتی ایچون بیلیر كیشی نامیلە، حقیقتلری تمامًا دینسز و اسلامیت دوشمانلری ماهیتندە مطالعە ایدوب، صوچ موضوعی چیقاران اهل وقوفڭ راپورینی اوقودق.

١٣٠ پارچەدن متشكّل، ایمان، علم و فضیلت خزینەسی حكمندەكی رسالۀ نور كلّیاتندن بو كنچلك رهبری بر جزئی اولمسی و رسالۀ نوردەكی یوكسك حقیقتلرە روح و جانلریلە باغلانارق، او اثرلر خزینەسنی بو ملّتڭ مادّی معنوی- حیاتندە بر سعادت رهبری اولدیغنی اثبات ایدوب بیلدیگمزدن، رهبرڭ علیهندەكی او بیلیر كیشی اسنادلرینی رد و اهل وقوفڭ وقوفسزلقلرینی بتون قوّتمزلە یوزلرینە چارپارق اعلان و اثبات ایدییورز. و محكمە هیئتنە عرض ایدییورزكە:

ویریلن اهل وقوف راپوری، وطن و ملّتڭ حیاتنە، تاریخنە، عنعنەسنە، مقدّساتنە، قانوننە تمامًا یبانجی، حال حاضر قانونلرە افترا ایدن، حكومتی تحقیر ایدن، بیڭ ییللق بو ملّتڭ تاریخنی تزییف ایلە بتون بر ملّتڭ اجدادینی

تحقیر ایدن و بوكون بو وطندە یاشایان یگرمی میلیون قرداشلریمزڭ معنویاتنە تعرّض ایدن بر سٓوء قصدڭ اورنگیدر. محكمەء عدالت، بو راپوری نظر اعتبارە آلمسی غیر ممكندر.

ایشتە بز دە، بیلیر كیشی اسمنی آلوب بو سٓوء قصد وثیقەسنی امضا ایدنلرە صورییورز: بو ملّت، حاشا، دینسزمیدر؟ بو ملّت، یوز ییللر بوینجە دیندن و ایماندن، حاشا، محروم بر وضعیتدە یاشامش اڭ سفیه بر ملّتمیدر؟ بو ملّت و بو ملّتڭ پارلاق تاریخنی آلتونلە یالدیزلایان بر اجداد، بتون حیاتلرینی دنیایە سفاهت و ضلالت طاغیتان كفر یولی اوزرندەمی یورومشلر؟

استانبولی فتح ایلە دنیا حیاتندە یڭی بر دور آچان و شرقە-غربە قرآنڭ بایراقدارلغی وظیفەسیلە نور هدایت، علم و فضیلت صاچان، آوروپەیە حقیقی مدنیّتی درس ویرن و اسلامی مدنیتڭ ضیاسیلە بشریتی آیدینلاتان و قوس قوجە بر تاریخ، اونلرڭ قهرمانلغیلە طولی اولان ییلدیریملر، فاتحلر، سلیملر و سلیمانلر و اونلرڭ منسوب اولدیغی بر ملّت، یازدیغنڭ تمامًا عكسنە اولارق، معنویاتی سونمش، دیندن خبری یوق، اسلامیتی نشر ایدن باشقە ملّت، او قوماندانلر باشقە بر ملّتڭ تاریخندە، تاریخ یالان سویلەیور، توركلر اسلامیتڭ قهرمانی اولارق قرآنڭ بایراقدارلغنی بتون ملّتلر اوستندە بر شرف تاجی اولارق طاشیدقلری یالاندر، اویلەمی؟ ویاخود بو ملّت،

حقیقت اسلامیەدن آلدیغی بر درس ایلە، قادینلرینی و قیزلرینی آداب قرآنیە زینتیلە زینتلندیروب قادینلغڭ حیثیت و شرفنی محافظە ایدرك، اونلرڭ عادی و قیمتسز اولمەلرینە مانع اولدیغی، یالان! اوزون عصرلردە اسلام تورك- قهرمانلری نامیلە معروف اولمش و اخلاق و ناموسڭ، حیثیت و شرفڭ كمالنە یتیشمش بیلدیگمز و افتخار ایتدیگمز اجدادیمز، آننەلریمز، بزم افتخاریمزڭ عكسنە اولارق امر قرآنە اتّباع ایتمەمشلر، كوزللگڭ حقیقتنی تربیۀ اسلامیە دائرەسندە آداب قرآنیە زینتیلە زینتلنمك دگل، وجودلرینی چیپلاق اولارق تشهیر ایتمكدە بیلمشلر، اویلەمی؟

ای اهل انصاف و ای تاریخیلە، مقدّساتیلە، قهرمان و مبارك اجدادیلە افتخار ایدن نسل حاضر! كلیڭز، كوریڭز. تاریخڭزی و اسلامیتڭزی تحقیر ایدن بر سٓوء قصد وثیقەسنی یازان و امضا ایدنلرە، حیاتڭزڭ حیاتی، روحڭزڭ روحی بیلدیگڭز اسلامیتڭز نامنە.. و كائناتی اون درت عصر ایشیقلاندیران و قدسی و الٰهی دستورلریلە بیڭ سنەدنبری میلیونلر اجدادیڭزی نورلاندیران و ابدی سعادتە سوق ایدن قرآنڭز نامنە.. و دستور قرآنە اتّباع ایدن یوز میلیون اجدادیڭزڭ نامنە.. اخلاق حسنە و ناموس محافظەسی یولندە اسلامی تربیەنڭ ضیاسیلە نورلانان و تربیە آلان و قادینلغڭ حقیقی معناسنی و حقیقی كوزللگنی یاشاییشلریلە و كییینیشلریلە و حیاتلریلە كوسترن آننەلریڭزڭ و ننەلریڭزڭ و همشیرەلریڭزڭ نامنە.. او مفتریلرە،

او تزییف و تحقیر صاوورانلرە تأسّفڭزی و تكدیریڭزی و ردّیڭزی بیلدیریڭز.

ایشتە او مفتریلر، یاشی سكسانی بولمش، زهرلردن شدّتلی خستە، دینی خدمتندن طولایی عمری حپسخانەلردە چوروتولمش بر اسلام قهرمانڭز.. شیمدی بتون منوّرلرڭ و چوق ادیبلرڭ و تربیەجیلرڭ، وطن و ملّتپرورلرڭ شكایت ایتدكلری اخلاقسزلغڭ و فحش تهلكەسندن محافظە ایچون كنچلرە أیی اخلاق و یوكسك ناموس، ایمان و فضیلت درسی ویرن، وطنە و ملّتە بر عضو نافع حالنە كلمەلرینی تأمین ایدن، عدالت و آسایش لهندە اڭ برنجی قوّت اولارق، مملكت و ملّتڭ سعادتنە خدمت ایدن كنچلك رهبری آدلی اثرینڭ مصادرەسنە و مؤلّف محترمنڭ محكومیتنە سبب اولمق ایچون دییورلر:

"بدیع الزّمان تستّر طرفداریدر. قادینلرڭ یاری چیپلاق، آچیق طولاشمەلرینە، اسلامیتە قارشو محاربەدە شیطان قوماندەسنە ویریلن فرقەلر اولارق تصویر ایتمكدە.. قادینلرڭ بوكونكی اجتماعی حیاتدە آچیق باجاق و یاریم چیپلاق كییینمەلرینی كناه صایمقدەدر. بدیع الزّمان، حال حاضر بو آچیق، یاریم چیپلاق كییینیشلری أولنمەلرە مانع اولوب، فحشە تشویق ایدیجی ماهیتندە كورمكدەدر. و یینە بدیع الزّمانە كورە، قادینی كوزللشدیرن شی و قادینڭ حقیقی و دائمی كوزللگی اجتماعی حیاتدە یر آلان سوسلنمك، وجودلرینی تشهیر ایتمك اولمایوب،

تربیۀ اسلامیە دائرەسندە آداب قرآنیە زینتیدر. بدیع الزّمان دینی تدریسات طرفداریدر. رسالۀ نور آدینی ویردیگی دینی تدریسات سایەسندە محكوملرڭ اون بش هفتەدە اصلاح اولاجقلرینی كە (، بو حقیقت دڭزلی و آفیون حپسخانەلری.. و عدلیەنڭ، غاردییان و مدیرلرینڭ شهادتیلە ثابتدر) سویلەمكدەدر. بدیع الزّمان، جاذبەدار بر فتنەیە اسیر اولان كنچلرڭ دین حقیقتلریلە و نورڭ ایمانی درسلریلە قورتولاجقلرینە قانعدر. ایشتە بو فكرلریلە صوچلیدر. قانونًا محكوم ایدیلمسی لازمدر "دییورلر. ایشتە بونلر، كویا اهل وقوف نامندە، مملكت كنچلگنە عدالت و حق و حرّیت درسلرینی ویرەجك پروفەسورلر ویا حقوق دوچنتلریدر.

ایشتە ای عدالت حقیقیەنڭ ممثّللری صفتیلە حقوق عمومیەیی و حیثیت ملّیەیی محافظە ایدن حاكملر! كنچلك رهبرینڭ ایمانی درسلری و اخلاقی تلقینلری، اهل وقوف راپورندەكی كبی بر صوچ موضوعی اولارق قبول ایدیلییورسە و مؤلّفی بو بیوك خدمتندن طولایی مسئول طوتولویور ایسە، اگر اویلە ایسە، او زمان یوقاریدە عرض ایتدیگمز بو ملّت، بیڭ ییللق تاریخنە، عنعنەسنە، اداری و عرفی قانونلرینە، بو ملّتڭ ابدی مدار افتخاری اولمش مقدّس دیننە، مقدّس اسلامیت حقیقتلرینە، قدسی قرآن درسلرینە و قدسی حقیقتلرە صاریلارق اسلامی مدنیّتی كمال شعشعە ایلە دنیایە اعلان ایدن بر عزیز اجدادە و اونلرڭ حیثیتنە، حقوقنە، معنویاتنە صاورولان تحقیر و تزییفلری

و ایندیریلن ضربەلری و سویلنن ایگرنچ افترالری قبول ایتمەڭز لازمدر. بو بیوك معنوی جنایتلری خوش كوروب قبول ایتمكلە، اسمی اهل وقوفلرڭ، صوچ اسناد ایتدكلری كنچلك رهبری صوچ صاییلابیلیر. و آنجق او جهتلە مؤلّفی محكوم و رهبری نشر ایدن طلبەلری مؤاخذە اولونابیلیر. یوقسە عدالت قانون و حرّیت فكر و وجدان دستوریلە محكومیتی و محاكمەسی ممكن دگلدر. حرّیت فكر و حرّیت وجدان دستورینی اڭ كنیش معناسیلە تطبیق ایدن جمهوریت ادارەسنڭ دموقراسی قانونلریلە اصلا قابل تألیف دگلدر.

اگر كنچلك رهبرینڭ انتشاریلە، دینی تربیە درس ویریلییور، بو ایسە لائیكلگە آیقیریدر دییە اتهام اولونورسە، او حالدە لائیكلگڭ معناسی نەدر؟ بز دە صورییورز. لائیكلك، اسلامیت دوشمانلغیمیدر؟ لائیكلك، دینسزلكمیدر؟ لائیكلك، دینسزلگی كندیلرینە بر دین اتّخاذ ایدنلرڭ دینە تعرّض حرّیتیمیدر؟ لائیكلك، دین حقیقتلرینی بیان ایدنلرڭ و ایمانی درسلری نشر ایدنلرڭ آغیزلرینە كلید و اللرینە كلبچە اوران استبداد مطلق دستوریمیدر؟

لائیكلك، حقیقی معناسیلە تام بر وجدان و فكر حرّیتی اولدیغنە كورە، دینسزلر و دین دوشمانلری، اسلامیت علیهندە هر چشیت هجوملری و تعرّضلری یاپار، آنارشیك فكرلرینی او حرّیت وجدان و فكر بهانەسیلە نشر ایدر دە، فقط بر اسلام عالمی، او حرّیت فكر دستورینە استنادًا، بیڭ ییلدنبری اسلامیتڭ سرداری اولمش بر ملّت ایچندە و او ملّتڭ بیڭ ییللق عنعنەسنە، قانوننە

اتّباع ایدرك و یینە او ملّتڭ سعادتی اوغرندە، اخلاق و ناموسڭ محافظەسی یولندە دینی بر درس بیان ایتمسی لائیكلگە آیقیریدر دییە صوچلی كوستریلیر، دولتڭ نظاملرینی دینی اینانچلرە اویدیرمق ایستەیور دییە محقور كوستریلیر. بز بویلە بر غیر ممكنڭ، ممكن اولمەسنە احتمال ویرمییورز. عدالتڭ بوڭا مساعدە ایتمەیەجگنی شبهەسز بیلییورز.

حقیقت حال، كچن محكمەلرڭ برائتلر ویرەرك تمامًا اعادە ایتدكلری رسالۀ نورڭ ١٣٠ پارچەسندن بر پارچەسی اولان كنچلك رهبری، وطن و ملّتڭ سعادتندە اڭ برنجی وسیلەلردن بریسیدر. او اثرلری اوقویوب، اونلرڭ درسلریلە سفاهت و ضلالتڭ كردابلرندن قورتولدقلرینی محكمەلردە سویلەین یوزلر نور طلبەلری و شیمدی بالذّات او اثرلرلە وطن و ملّتە نافع بر عضو حالنە كلدكلرینی حیاتلریلە و خدمتلریلە اثبات ایدن بیڭلر تورك كنچلری، بز، او اصلسز اسنادلری، او مفتریلرڭ یوزلرینە چارپییورز.

حقیقتًا نە قدر آجیدركە، آسایشڭ تأمیننە، اخلاقڭ محافظەسنە وسیلە اولمش، عدلیەیە و ضابطەیە بیڭلر فائدەسی بولونمش بر اثر، بوكون حقیقتڭ تمامًا عكسنە اولارق صوچلی كوستریلوب ضررلی توهّم ایدیلییور. آرتق بو قدر بدیهی بر ضدّیت قارشوسندە انصاف و وجدان صاحبلرینڭ وجدانلرینە و انصافلرینە حوالە ایدوب، استادیمز حقّندە او اهل وقوفڭ "دینی سیاستە آلت ایدییور" دیمەلرینە مقابل، بز دە دییورز: او اهل وقوف، عدلیەیی دینسزلگە آلت ایدییور.

بیلیر كیشی راپورندە بر اسناددە، "مؤلّف، رسالۀ نور شخص معنویسی نامنە قونوشمقدەدر. قلبە اخطار ایدیلدی، لیلۀ قدردە قلبە كلن بر مسئلۀ مهمّە كبی، بعض جملەلری الە آلارق بونڭلە شخصی نفوذ تأمین ایتمك مقصدینڭ مؤلّفدە بولوندیغیدر."

بو قدر اصلسز و معناسز بر اسناد قارشوسندە انسان، او بیلیر كیشی نامنی آلانلرڭ بیلیر كیشی ماهیّتندن تمامًا اوزاق اولدقلرینە حكم ایدوب، او جهالتلری و او وقوفسزلقلری قارشوسندە حیرتدە قالییورز. هیچ اولمازسە، اهل وقوف، حرمتًا بو جهتی دقّتلە مطالعە ایتسە ایدیلر، كندیلری بو درجە جهالت درەسنە آتیلمقدن بلكە بر درجە قورتولورلردی. بو اصلسز اسنادە قارشو، اوّلًا: بتون رسالۀ نور اثرلری و مكتوبلری و استادیمزڭ بتون حیاتی اڭ قطعی دلیلدركە، او عزیز ذات بتون غیرتنی، بتون خدمتنی حق اوغرندە و یالڭز حق ایچون یاپمش و یالڭز حقّڭ خاطری ایچون قونوشمش. او صورتا اهل وقوف، نور كلّیاتندن یالڭز كوچك بر جزئنی اوقومقلە و دینسزلكدە تعصّب كوسترەرك الّاكە بر صوچ اسناد ایدەبیلمك ایچون بو افترایی صاوورمشلر. حالبوكە او عزیز ذات، رسالۀ نور دائرەسنی ایضاح ایدركن دییور: "اڭ بیوك درسمز، عجز و فقر و شفقت و تفكّردر."

حقیقت حالدە او عزیز ذات، بیوك و كلّی خدمتلریلە، اڭ جانیانە اشكنجەلرە صبر و تحمّل ایدرك، مجاهدەء معنویەسندە دوام ایدوب، كفر و ضلالتڭ

بی امان هجوملرینی، مادّیون و طبیعیّونڭ كفری مسلكلرینی، قرآن حكیمڭ حقائق ایمانیەسندن آلدیغی نور حقیقتلریلە پارچەلایارق و او نورڭ ١٣٠ رسالەسنڭ یوز بیڭلر نسخەلرینی، ایمان درسلریلە اوڭا منّتدار قالان یوز بیڭلر مشتاق طلبەلریلە هر طرفە نشر ایدن.. دینسزلگڭ، بالخاصّە قومونیستلگڭ بو وطندەكی هجومنە مانع اولان ایمان حقیقتلرینی اڭ قطعی دلیل و برهانلرلە اثبات ایدرك كفر و ضلالتڭ باطل مسلكلرینی، قرآنڭ الماس قیلیجی حكمندەكی ایمان باللّٰه و وحدانیت الٰهیە حجّتلریلە پارچە پارچە ایدن.. و او نور اثرلری، شیمدی عالم اسلامڭ بیوك مركزلرندە كمال تقدیر و استحسانلە نشر ایدیلن و كچن سنە توركیەیی زیارتە كلن پاكستانلی بر وكیل، قرق اللی اونیورسیتە طلبەسنە:

"قرداشلرم، بن عالم اسلامدە آرادیغمی توركیەدە بولدم. بدیع الزّمان یالڭز سزڭ دگل، او بتون عالم اسلامڭدر. و یاقین بر زماندە بتون اسلام عالمی اونی آڭلایاجقدر. سز بو نور اثرلرینە دقّتلە باقڭ. بن بونی طقسان میلیون اسلاملر ایچندە نشر ایدەجگم. بنم عالم اسلام حقّندە پك چوق اندیشەلرم و استادە پك چوق صوراجقلرم واردی. بر ساعت قدر یانندە اونی دیڭلەمكلە بتون اندیشەلرم زائل اولوب، بتون سؤآللریمە جواب آلدقدن صوڭرە، شیمدی پاكستانە عالم اسلامڭ مقدّراتی حقّندە بیوك مژدەلرلە كیدییورم. بن تورك و اسلام تاریخنی تدقیق ایتدم. اوت، چوق قهرمانلر، چوق اسلام

فدائیلری و چوق وطنپرورلر كلمشلر. هپسی بیوك فداكارلق و قهرمانلقلە ملّتە، وطنە خدمت ایتمشلر. فقط او خدمتلرینڭ نتیجەسندە لایق اولدقلری مكافات اونلرە ویریلمش. هر بریسی برر مكافاتە مظهر اولمشلر. فقط بوكون استاد، یگرمی كسور سنەدنبری بو ملّتڭ سعادت دنیویەسی و اخرویەسی ایچون تعریفە امكان اولمایان ظلم و اشكنجەلر ایچریسندە، ایشتە بو اثرلری تألیف و نشر ایدرك، بو ملّت ایچریسندە دین علیهندەكی جریانلرڭ انتشارینە مانع اولان بدیع الزّمانڭ أوندە بوكون بر لامبەسی بیلە یوق. ایشتە او هر شیئی ترك ایدرك، یالڭز و یالڭز دینە خدمت ایچون چالیشمشدر. البتە عالم اسلام یاقیندە بویلە بر ذاتی اثرلریلە طانییاجقدر. "دییە علی اكبر شاه كبی بر اسلام عالمی و متفكّرینڭ تقدیر و تحسیننە مظهر اولان..

و شیمدی دموقرات ملّت وكیللرندن بعضیلری: "بدیع الزّمانڭ نور رسالەلرینی اوقویان و درس آلان و او اثرلری نشر ایدن نور طلبەلری، بو خدمتلریلە بو مملكتدە قومونیستلگڭ یاییلمەسنە سد اولدیلر. مادام حكومتمز قومونیزمڭ علیهندەدر. اویلە ایسە، نورجیلرە او خدمتلرندن طولایی منّتدارز" دییە ملّت وكیللرنجە دخی خدمتی تقدیر ایدیلن..

و سراپا بتون رسالۀ نور اجزالری هر بر نسخەسی، بیڭلر كلمە و جملەلریلە او ذاتڭ ماهیّتنە، خدمتنە، یگرمی بش ییللق فعّالیتنە و نشریاتڭ كلّی فائدەلرینە شهادت و اشارت ایتدكلری بر ذات..

اوت، ایشتە او عجز و فقر درسنی كندیسنە مسلك ایدینن و طلبەلرینە درس ویرن بر ذات، حقیقت حالدە یوقاریدە بر درجە عرض ایتدیگمز او كلّی خدمتلرینڭ نتیجەسندە طلبەلرینڭ و بتون اهل ایمانڭ اڭ بیوك مدح و ثنالرینە، حرمت و محبّتلرینە اڭ لایق، اڭ الیق و قبول ایتمسی حقّی ایكن، بالعكس او عزیز ذات، كندیسنی زیارتە كلنلرە و رسالۀ نور اثرلرینی اوقویوب او اثرلری علم و ایمان حقیقتلری درسندە، عصرڭ علم و اثباتلری اوستندە كورەرك حیران قالانلرڭ اڭ صمیمی حرمت و ثنالرندن متمادیًا قاچینمش و متعدّد مكتوبلرندە:

"بن دە سزڭ بو دروس قرآنیەدە بر درس آرقداشڭزم. بن اڭ زیادە محتاج و فقیر اولدیغمدن، بو قدسی حقیقتلر اڭ اوّل بڭا احسان ایدیلمشدر. بن مقام صاحبی دگلم. بن كندیمی بگنمییورم. بنی بگننلری دە بگنمییورم. قرداشلرم، سزی بتون بتون قاچیرمامق ایچون نفسمڭ كیزلی، چوق فنالقلرینی سویلەمییورم" دییە كندیسنە یاپیلان مدحلری و حرمتلری ردّ ایتمش. و غایەء حیاتنی یالڭز حقائق ایمانیەنڭ نشرینە خدمت بیلمش. دنیوی بتون منفعتلری، او خدمت اوغرندە فدا ایتمش.

و ایشتە بتون حیاتی بلا استثنا بو فراغتە و بو حقیقتە شهادت ایدن بر ذاتە، اڭ حقسزلرڭ دخی یاپامایاجقلری بر اسنادی، بو اهل وقوف اسملی كیمسەلر یاپمشلر. حتّی "لیلۀ قدردە اخطار ایدیلن بر مسئلۀ مهمّە" دییە

رهبردەكی چوق مهم بر حقیقتە نظر ایتمەیەرك، بو اخطار كلمەسندن دە شخصی نفوذ تأمین ایتدیگنە بر دلیل كوسترمشلر. حالبوكە بو اخطار كلمەسی، او یوكسك حقیقتلرڭ اهمّیتنە اویلە بر شمولی واركە، آنجق او حقیقتی اوقومق لازمدر. ایشتە او پارچە:

"ایكنجی حرب عمومینڭ صوڭندە، نوع بشرڭ دهشتلی ظلملری و تخریباتلری نتیجەسندەكی دهشتلی مأیوسیتلریلە دهشتلی وجدان عذابلرینی و دنیا حیاتنڭ بتون بتون فانی و موقّت اولمسی و مدنیّت فانتازیەلرینڭ اویوتوجی و آلداتیجی اولدیغنڭ عمومە كورونمسیلە، فطرت بشریەدەكی یوكسك استعداداتڭ دهشتلی یارەلانمەسنی و قرآنڭ الماس قیلیجی آلتندە غفلت و ضلالتڭ پارچەلاندیغنی و بو سببلە دنیا حیاتنڭ كچیجی و موقّت اولمەسندن، بشریت حیات باقیەیی آرایاجغنی و ابدی حیاتی و دائمی سعادتی آنجق قرآنڭ مژدە ویردیگنی اثبات ایلە پك پارلاق ایضاحدن صوڭرە دییور: البتە نوع بشر، بتون بتون عقلنی غائب ایتمزسە، مادّی ویا معنوی بر قیامت باشلرینە قوپمازسە، ایسوچ، نوروچ، فینلاندیە و اینكیلترەنڭ قرآنی قبول ایتمەیە چالیشان مشهور خطیبلری و آمریقەنڭ دین حقّی آرایان اهمّیتلی جمعیتی كبی، روی زمینڭ كنیش قطعەلری و بیوك حكومتلری، قرآن معجز البیانی آرایاجقلر. و حقیقتلرینی آڭلادقدن صوڭرە بتون روح و جانلریلە صاریلاجقلر. چونكە بو حقیقت نقطەسندە قطعیًّا قرآنڭ مثلی یوقدر و اولاماز. و هیچ بر شی بو معجزۀ اكبرڭ یرینی طوتاماز."

ای محترم حاكملر! یالڭز صوڭ جملەسنی نمونە اولارق سزە عرض ایتدیگمز بو اهمّیتلی فقرەنڭ باشندە یازیلان اخطار كلمەسی، بر صوچە مَسند اولابیلیرمی؟ بو یازی، شخصی بر نفوذ تأمینی ایچونمی یازیلمش؟ یوقسە نوع بشرڭ، قرآن حقیقتلرینی آرامەیە باشلادیغنی بیان ایلە، استقبالدە قرآنڭ بشریتە حاكم اولاجغنیمی خبر ویرییور و اثبات ایدییور؟ بو خصوصی یوكسك تقدیریڭزە حوالە ایدییورز.

اوت، رسالۀ نور مؤلّفی، قرآنڭ درسندن آلدیغی و عین حقیقت اولان بو اخطارلری بیان ایتمسی، بیان و اثبات ایتدیگی درسلرڭ و موضوعلرڭ حقّانیتنە بر حجّت ایچوندر. كە اوت، عین حق و حقیقت اولدیغنی دقّتلە باقانلر كورەبیلیر. و بر دریای ایمان و بر خزینەء توحید و بر عمّان حكمت حالندە جوشان بر خارقەنڭ، استقبالڭ نسللرندە و میلیونلر قلب و كوڭللردە ناصل كمال شعشعە ایلە یاشایاجغنی و آلقیشلاناجغنی حسّ ایدەبیلیرلر. و تورك ملّتنڭ بیڭ ییللق قدسی مفاخر ملّیەسنە مماثل، یینە تورك ملّتنڭ دنیایە اورنك اولمش قهرمان اجدادینڭ یرندە اسلامیت حقیقتلرینە صاریلارق، یینە قرآنڭ بایراقدارلغی وظیفەسیلە استقبالڭ قطعەلرندە حاكم معنوی اولاجغنی حسّ ایدەبیلیرلر. بو چوق یوكسك و چوق اهمّیتلی حقیقتلری تام آڭلایابیلمك ایچون، بدیع الزّمانڭ بوندن قرق سنە اوّل ١٣٢٧‘دە شامدە، جامع الامویدە، ایچندە یوز اهل علم بولونان اون بیڭ كیشیلك جماعتە خطابًا ایراد

بویوردقلری خطبۀ شامیە اثرینی اوقومق لازمدر. شیمدی او اثرڭ ترجمەسنی یاپمق لطفندە بولونان او عزیز ذات، او زماندە پریشان و اسارت آلتندە بولونان اسلام عالمنە پك عظیم مژدەلرلە مدنیتڭ سیّئٓاتی حسنەسنە غالب كلمەسنە مقابل، استقبالدە اسلامیتڭ قوّتیلە مدنیتڭ محاسنی غلبە ایدرك، شمس اسلامیتڭ بیوك ملّتلر و قطعەلر اوزرندە حاكم اولاجغنی بیان و اثبات ایدرك خبر ویرییور.

مادام او اهل وقوف اسمنی آلانلر، "قلبە اخطار ایدیلن بر مسئلە" جملەسندە حقیقتە نفوذ ایدەمەیەرك یاڭلیش معنا چیقارمشلر. ١٣٢٧‘دن تا ١٣٧١ سنەسندن صوڭرەكی عالم اسلامڭ مقدّراتنە نظر ایدن خطبەء شامیەدەكی حقیقتلر دخی -بیلیر كیشیلرڭ یاڭلیش آڭلادقلری ویا یاڭلیش معنا ویردكلری- بو "اخطار" كلمەسنڭ حقیقتنی و كنیش معناسنی چوق یوكسك بر حقیقت حالندە كوستردیگندن، خطبۀ شامیە اثرینڭ ترجمەسنی محكمەیە عرض ایدییورز. و یالڭز بورادە، اثردە اثبات ایدیلن مسئلەلرڭ آخرندە ذكر ایدیلن برقاچ جملەیی یازارق تقدیم ایدییورز:

"اوت، بن كندی حسابمە آلدیغم درسمە بناءً، ای اسلام جماعتی، مژدە ویرییورمكە، شیمدیكی عالم اسلامڭ سعادت دنیویەسی، باخصوص عثمانلیلرڭ سعادتی و بالخاصّە اسلامڭ ترقّیسی و اونلرڭ اویانمسی و انتباهی ایلە اولان