رسالۀ نورڭ وطنە، ملّتە و اسلامیتە بیوك خدمتنی قبول و تقدیر ایدن باش وكیل عدنان مندرسە استادڭ یازدیغی بر مكتوب

[٦٥٩]

[بِاسْمِهٖ سُبْحَانَهُ]

بن چوق خستە اولدیغم و سیاستلە علاقەسز بولوندیغم حالدە، عدنان مندرس كبی بر اسلام قهرمانی ایلە بر صحبت ایتمك ایستردم. حال و وضعیتم كوروشمەیە مساعدە ایتمدیگی ایچون، او صوری قونوشمق یرینە، بو مكتوب بنم بدلمە قونوشسون دییە یازدم.

غایت قیصە برقاچ اساسی، اسلامیتڭ بر قهرمانی اولان عدنان مندرس كبی دیندارلرە بیان ایدییورم:

[برنجیسی] اسلامیتڭ پك چوق قانون اساسیسندن بریسی []وَلَا تَزِرُ وَازِرَةٌ وِزْرَ اُخْرٰی [] آیت كریمەسنڭ حقیقتیدركە، بریسنڭ جنایتیلە باشقەلری و اقربا و دوستلری مسئول اولاماز. حالبوكە شیمدیكی سیاست حاضرەدە پارتیجیلك طرفدارلغی ایلە، بر جانینڭ یوزندن پك چوق معصوملرڭ ضررینە رضا كوستریلییور. بر جانینڭ جنایتی یوزندن، طرفدارلری ویاخود اقربالری دخی شنیع غیبتلر و تزییفلر ایدیلوب، بر تك جنایت یوز جنایتە چوریلدیگندن، غایت دهشتلی بر كین و عداوتی طمارلرە طوقوندیروب، كین و غرضە و مقابلەء بالمثلە مجبور ایدیلییور. بو ایسە حیات اجتماعیەیی تمامًا زیر و زبر ایدن بر زهردر

و خارجدەكی دوشمانلرڭ پارماق قاریشدیرمەلرینە تام بر زمین حاضرلامقدر. ایران و مصردەكی حسّ ایدیلن حادثە و بحرانلر، بو اساسدن ایلری كلدیگی آڭلاشیلییور. فقط اونلر بوراسی كبی دگل. بزە نسبتًا پك خفیف، یوزدە بر نسبتندەدر. اللّٰه ایتمەسین، بو حال بزدە اولسە، پك دهشتلی اولور.

بو تهلكەیە قارشو چارەء یكانە، اخوّت اسلامیەیی و اساس اسلامیت ملّیتنی او قوّتڭ تمل طاشی یاپوب، معصوملری حمایە ایچون، جانیلرڭ جنایتلرینی كندیلرینە منحصر بیراقمق لازمدر.

هم امنیّتڭ و آسایشڭ تمل طاشی، یینە بو قانون اساسیدن كلییور. مثلا، بر خانەدە ویا بر كمیدە بر معصوملە اون جانی بولونسە، حقیقی عدالتلە و امنیت و آسایش دستور اساسیسیلە او معصومی قورتاروب تهلكەیە آتمامق ایچون، كمی یە و خانەیە ایلیشمەمك لازم. تاكە معصوم چیقنجەیە قدر.

ایشتە بو قانون اساسئ قرآنی حكمنجە، آسایش و امنیت داخلیەیە ایلیشمك و اون جانی یوزندن طقسان معصومی تهلكەیە آتمق، غضب الٰهینڭ جلبنە وسیلە اولور. مادام جناب حق، بو تهلكەلی زماندە بر قسم حقیقی دیندارلرڭ باشە كچمەسنە یول آچمش، قرآن حكیمڭ بو قانون اساسیسنی كندیلرینە بر نقطۀ استناد و اونلرە غرضكارلق ایدنلرە قارشو سپر یاپمق لازم كلدیگنی، زمان اخطار ایدییور.

اسلامیتڭ ایكنجی بر قانون اساسیسی شو حدیث شریفدر:

[سَیِّدُ الْقَوْمِ خَادِمُهُمْ] حقیقتیلە، مأموریت بر خدمتكارلقدر. بر حاكمیت و بنلك ایچون تحكّم آلتی دگل. بو زماندە تربیۀ اسلامیەنڭ نقصانیتیلە و عبودیتڭ ضعفیتیلە، بنلك، انانیت قوّت بولمش. مأموریتی خدمتكارلقدن چیقاروب، بر حاكمیت و مستبدانە بر تحكّم و متكبّرانە بر مرتبە طرزینە كتیردیگندن، آبدستسز، قبلەسز نماز قیلمق كبی، عدالت عدالت اولماز. اساسیلە دە بوزولور و حقوق عباد دە زیر و زبر اولور. حقوق عباد، حقوق اللّٰه حكمنە كچەمییوركە، حق اولابیلسین. بلكە نفسانی حقسزلقلرە وسیلە اولور.

شیمدی عدنان مندرس كبی، "اسلامیتڭ و دینڭ ایجابلرینی یرینە كتیرەجگز" دیینە و مذكور ایكی قانون اساسی یە قارشو مخالفت ایدوب تام ضدّینە اولارق ایكی دهشتلی جریانڭ، غایت بیوك رشوت ایلە خلقلری آلداتمق و اجنبیلرڭ مداخلەسنە یول آچمق وضعیتندە هجوم ایتمك احتمالی قوّتلیدر.

[بریسی] برنجی قانون اساسی یە مخالف اولارق، بر جانی یوزندن قرق معصومی كسمش، بر كویی دە یاقمش. بو درجەدە بر استبداد مطلق و هر نفسڭ ذوقنە كچەجك مأموریتە، بر حاكمیت صورتندە رشوت ویرەرك، دیندار حرّیتپرورلرە هجوم ایدیلییور.

[ایكنجی هجوم دە] اسلامیت ملّیت قدسیەسنی بیراقوب -اوّلكیسی كبی- بر جانی یوزندن یوز معصومڭ حقّنی چیگنەیەبیلن، ظاهرًا بر ملّیتجیلك و حقیقتدە

عرقجیلق طماریلە هم حرّیتپرور دیندار دموقراتلرە، هم بتون بو وطندەكی یوزدە یتمشی سائر عنصرلردن بولونانلرە، هم حكومت علیهنە، هم بیچارە توركلر علیهنە، هم دموقراتلرڭ تعقیب ایتدیگی سیاست علیهنە چالیشارق و سرسری و انانیتلی نفسلرە غایت ذوقلی بر رشوت اولارق بر عرقجیلق قرداشلغی ویرییور. او ذوقلی قرداشلغڭ ایچندە، او ذوقلی فائدەدن بیڭ دفعە داها زیادە حقیقی قرداشلری دوشمانلغە چویرمك كبی عجیب تهلكەیی، او سرخوشلغی ایلە حسّ ایدەمییور. مثلا، اسلامیت ملّیتی ایلە درت یوز میلیون حقیقی قرداشڭ هر كون (اَللّٰهُمَّ اغْفِرْ لِلْمُؤْمِنٖینَ وَالْمُؤْمِنَاتِ) دعای عمومیسیلە معنوی یاردیم كورمك یرینە، عرقجیلق ایلە او درت یوز میلیون مبارك قرداشلری، درت یوز سرسری یە و لاابالیلرە یالڭز دنیوی و پك جزئی بر منفعتی ایچون ترك ایتدیرییور.

بو تهلكە هم بو وطنە، هم حكومتە، هم دە دیندار دموقراتلرە و توركلرە بیوك بر تهلكەدر و اویلە یاپانلر دە حقیقی تورك دگللردر. نجیب توركلر بویلە خطادن چكینیرلر. بو ایكی طائفە هر شیدن استفادەیە چالیشوب، دیندار دموقراتلری دویرمەیە چالیشدقلری و چالیشدیریلدقلری، میداندەكی آثار ایلە تحقّق ایدییور. بو عجیب تخریباتە و بو ایكی قوّتلی معارضلرە قارشو، قرق صحابە ایلە دنیانڭ قرق دولتنە قارشو میدان معارضەیە چیقان و غلبە ایدن و بیڭ درت یوز سنە ظرفندە و هر عصردە اوچ یوز - درت یوز میلیون شاكردی بولونان

حقیقت قرآنیەنڭ صارصیلماز قوّتنە طایانمق و اونڭ ایچندەكی دنیوی و اخروی سعادت ابدیەنڭ ذوقلرینی او جاذبەدار حقیقتلە برابر نقطۀ استناد یاپمق، او مذكور معارضلریڭزە و هم داخل و خارجدەكی دوشمانلریڭزە قارشو اڭ لازم و الزم و ضروری بر چارەء یكانەدر. یوقسە او انصافسز داخلی و خارجی دوشمانلریڭز، سزڭ بر جنایتڭزی بیڭلر یاپوب و اسكیلرڭ دە جنایتلرینی علاوە ایدرك باشقەلرڭ باشنە یوكلەدكلری كبی، سزە دە یوكلەیەجكلر. هم سزە، هم وطنە، هم ملّتە تلافی ایدیلمەیەجك بر تهلكە اولور.

جناب حق، سزلری اسلامیت لهندەكی خدمتلریڭزدە موفّق و مذكور تهلكەلردن محافظە أیلەسین دییە، بن و نورجی قرداشلریمز، یاپاجغڭز خدمتە و مذكور حقیقتی قبول ایتمەڭزە مقابل دعا ایتمەیە قرار ویرەجگز.

[اوچنجیسی] اسلامیتڭ حیات اجتماعیەیە دائر بر قانون اساسیسی دخی بو حدیث شریفڭ [اَلْمُؤْمِنُ لِلْمُؤْمِنِ كَالْبُنْیَانِ الْمَرْصُوصِ یَشُدُّ بَعْضُهُمْ بَعْضًا] حقیقتیدر. یعنی، خارجدەكی دوشمانلرڭ تجاوزلرینە قارشو، داخلدەكی عداوتی اونوتمق و تام تساند ایتمكدر. حتّی اڭ بدوی طائفەلر دخی بو قانون اساسینڭ منفعتنی آڭلامشلركە، خارجدە بر دوشمان چیقدیغی وقت، او طائفە بربرینڭ باباسنی و قرداشنی ئولدیردكلری حالدە، او داخلدەكی دوشمانلغی اونوتوب، خارجدەكی دوشمان دفع اولنجەیە قدر تساند ایتدكلری حالدە، بیڭلر تأسّفلرلە دیرزكە، بنلكدن، خودفروشلقدن، غروردن و غدّار سیاستدن كلن داخلدەكی

طرفكیرانە فكریلە، كندی طرفنە شیطان یاردیم ایتسە رحمت اوقوتاجق، مخالفنە ملك یاردیم ایتسە لعنت ایدەجك كبی حادثاتلر كورونویور. حتّی بر صالح عالم، فكر سیاسیسنە مخالف بر بیوك صالح عالمی تكفیر درجەسندە غیبت ایتدیگی و اسلامیت علیهندە بر زندیقی، اونڭ فكرینە اویغون و طرفدار اولدیغی ایچون حرارتلە ثنا ایتدیگنی كوردم. و شیطاندن قاچار كبی اوتوز بش سنەدنبری سیاستی ترك ایتدم.

هم شیمدی بریسی، هم رمضان شریفە، هم شعائر اسلامیەیە، هم بو دیندار ملّتە بیوك بر جنایتی یاپدیغی وقت، مخالفلرینڭ اونڭ او وضعیتی خوشلرینە كیتدیگی كورولدی. حالبوكە كفرە رضا كفر اولدیغی كبی، ضلالتە و فسقە و ظلمە رضا دە فسقدر، ظلمدر، ضلالتدر. بو عجیب حالڭ سرّینی كوردمكە، كندیلرینی ملّت نظرندە ایتدكلری جنایتلرندن معذور كوسترمك طماریلە مخالفلرینی كندیلرندن داها دینسز، داها جانی كورمك و كوسترمك ایستەیورلر. ایشتە بو چشیت دهشتلی حقسزلقلرڭ نتیجەلری پك تهلكەلی اولدیغی كبی، اجتماعی اخلاقی دە زیر و زبر ایدوب بو وطن و ملّتە و حاكمیت اسلامیەیە بیوك بر سٓوء قصد حكمندەدر.

داها یازاجقدم، فقط بو اوچ نقطەء اساسیەیی شیمدیلك دیندار حرّیتپرورلرە بیان ایتمكلە اكتفا ایدییورم.

سعید النّورسی

[٦٦٠]

(عدنان مندرسە كوندریلمك نیّتیلە اوّلجە یازیلان اجتماعی حیاتمزە عائد بر حقیقتڭ حاشیەسنی تكرار تقدیم ایدییورز)

[حاشیە] اسكیلرڭ لزومسز و كیفی قانونلری و سٓوء استعماللری نتیجەسیلە، بلكە دە تحریكلریلە ظهور ایدن تیجانی مسئلەسنی و آغیر جزالرینی دیندار دموقراتلرە یوكلەمەمك و عالم اسلامڭ نظرندن دموقراتلری دوشورمەمەنڭ چارۀ یگانەسی، كندمجە بویلە دوشونویورم: اذان محمّدینڭؐ نشریلە دموقراتلر اون درجە قوّت بولدیغی كبی، آیاصوفیەیی دە، بش یوز سنە دوام ایدن وضعیت قدسیەسنە چویرمك و حالاً اسلامدە چوق حسن تأثیر یاپان و بو وطن اهالیسنە عالم اسلامڭ حسن توجّهنی قزاندیران، یگرمی سكز سنە محكمەلرڭ مضر جهتنی بولامدقلری و بش محكمە دە برائتنە قرار ویردكلری رسالۀ نورڭ رسمًا سربستیسنی دیندار دموقراتلر اعلان ایتملی و بو یارەیە بر نوع مرهم اورملیدرلر. او وقت عالم اسلامڭ توجّهنی قزاندقلری كبی، باشقەلرینڭ دە ظالمانە قباحتلری اونلرە یوكلنمز فكرندەیم. دیندار دموقراتلر، خصوصًا عدنان مندرس كبی ذاتلرڭ خاطرلری ایچون، اوتوز بش سنەدنبری ترك ایتدیگم سیاستە بر ایكی ساعت باقدم و بونی یازدم.

سعید النّورسی

استادیمز افندیمزدن یڭی آلدیغمز بو یڭی حقیقتی سزلرە برای معلومات عرض ایدییورز.

خسرو

[٦٦١]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، فداكار قرداشلرم،

چوق یرلردن تلغراف و مكتوبلرلە بایرام تبریكلری آلدیغم و چوق خستە بولوندیغم ایچون، وارثلرم اولان مدرسة الزّهرا اركانلری بنم بدلمە هم كندیلرینی، هم او خاص قرداشلریمزڭ بایراملرینی تبریك ایتمكلە برابر.. عالم اسلامڭ بیوك بایرامنڭ عرفەسی اولان و شیمدیلك آسیە و آفریقەدە انكشافە باشلایان و درت یوز میلیون مسلمانی بربرینە قرداش و مادّی و معنوی یاردیمجی یاپان اتّحاد اسلامڭ، یڭی تشكّل ایدن اسلامی دولتلردە تأسیسە باشلامەسنڭ.. و قرآن حكیمڭ قدسی قانونلرینڭ او یڭی اسلامی دولتلرڭ قانون اساسیسی اولمەسندن طولایی بیوك بایرام اسلامیەیی تبریك و دینلر ایچندە بتون احكام و حقیقتلرینی عقلە و حجّتلرە استناد ایتدیرن قرآن حكیمڭ، ظهورە كلن كفر مطلقی تك باشیلە قیرمەسنە چوق امارەلر كورولمسی.. و بشر استقبالنڭ دە بو كلن بایرامنی تبریك ایلە برابر، مدرسة الزّهرانڭ و بتون نور طلبەلرینڭ هم داخل، هم خارجدە، هم عربجە، هم توركجە نورلرڭ نشریاتنە چالیشمەلرینی.. و دیندار دموقراتلرڭ بر قسمِ مهمّی نورلرڭ سربستیتنە طرفدار چیقمەلرینی بتون روح و جانمزلە تبریك ایدییورز.

بو سنە حاجیلرڭ آز اولمەسنە چوق اسباب وار ایكن، یوز سكسان بیڭدن زیادە حاجیلرڭ او قدسی فریضەیی و دین اسلامڭ قدسی و سماوی قونغرەسی حكمندە اولان بو حجّ اكبری بیوك بر بایرامڭ عرفەسی نقطەسندە اولارق بتون روح و جانمزلە تبریك ایدییورز. [حاشیە]

اَلْبَاقٖی هُوَ الْبَاقٖی

خستە قرداشڭز سعید النّورسی

(٦٦٢)

[بِاسْمِهٖ سُبْحَانَهُ]

ایلولڭ سكزندە تكرار ایدیلن آفیون محكمەسی مناسبتیلە استادیمز چوق خستە اولدیغی و محكمەیە كیدەمیەجگی ایچون، او مسئلەیە دائر فكرینی صوردق. او دە "نورڭ مهم طلبەلری و آووقاتمز بنم بدلمە كافیدر" دیدی. و بو مسئلەیی یازدیردی:

یگرمی سكز سنە ظرفندە چكدیگم اشكنجەلردن بریسی شودر:

بر دفعە اسپارطە محكمەسنڭ رسالۀ نورڭ بتون اجزالرینی آلوب، بر ایكی آی اللرندە تدقیقدن صوڭرە تمامًا صاحبلرینە اعادە ایتدیگی و اسكیشهردە ایسە اون آلتی سنە اوّل بتون نور اجزالرینی اینجەدن اینجەیە تدقیق ایدوب، یالڭز كوچك بر رسالەسی اولان تستّرە ایلیشدیلر. فقط تستّرڭ رفعنە قانون اولمدیغی ایچون

قناعت وجدانیە ایلە آز بر جزا ویردیلر. فقط دڭزلی، او رسالە دە داخل، هپسنی برائت ایتدیردی. داها صوڭرە دڭزلی محكمەسی بتون رسالەلری تدقیقدن صوڭرە، آنقرە آغیر جزا محكمەسنڭ ایستەمسی اوزرینە بتون رسالەلر آنقرەیە سوق ایدیلدی. ایكی آی اونلر دە تدقیق ایدوب، هم اهل وقوفڭ اینجەلەمسی ایلە دڭزلی محكمەسی اتّفاقًا برائتنە، هم آنقرە آغیر جزا محكمەسی اهل وقوفڭ راپورینە بناءً اتّفاقًا برائتنە قرار ویردكلری و صوڭرە دە محكمۀ تمییز تصدیق ایدوب قضیۀ مُحكمە حالنە كتیردكلری حالدە، هم مرسیندە نورڭ اڭ مهم مجموعەلری والی طرفندن مصادرە ایتدیریلەرك آنقرەیە كوندریلمش. آنقرە ضررسز كوروب طرسوس امنیّتی واسطەسیلە صاحبلرینە اعادە ایدیلمشدر. هم آنقرە بر اوهامە بناءً، صونغوردەكی نورڭ اڭ مهم مجموعەلرینی امنیت واسطەسیلە مصادرە ایدرك تدقیقدن صوڭرە تمامًا صونغورە اعادە ایتمشدر.

هم استانبولدە رهبرڭ مصادرەسی مناسبتیلە، ذوالفقار و عصای موسی كبی چوق مهم نور رسالەلری مصادرە ایدیلدیگی حالدە، صوڭرە او استانبول محكمەسی عین كتابلری، یالڭز رهبر مستثنا اولارق كلّیًا اعادە ایتمسی و شیمدی رهبرڭ ویریلمسی ایچون وعد ایدیلمسی و بو مملكتدە هیچ بر كیمسەنڭ نورلردن ضرر كورمەمسی و ضرر كوردك دییە هیچ بر زمان دویولمامسی و محكمەلرڭ و صاوجیلرڭ اقراریلە آلتی یوز بیڭ نور طلبەسی تام استفادە ایتمسی و عالم اسلام هر طرفدە اونی اشتیاقلە آرامسی كوسترییوركە، اون كون ظرفندە محكمۀ تمییز برائت قراری

ویردیگی حالدە، درت بوچوق سنە آفیون محكمەسی اوراق مضرّە كبی چوروتمك ایچون رسالەلریمزی مخزنە آتمسی و درت كونلك ایشی كیفی بهانەلرلە درت بوچوق سنە اوزاتمسی، هم آفیونڭ پك حقسز اولارق، قضیۀ مُحكمە حالنی آلان دڭزلی برائتنی نظرە آلمادیغندن، محكمۀ تمییز آفیونڭ ویردیگی جزا قرارینی بوزدیغی، هم صاوجینڭ سعید حقّندەكی اون بش صحیفە ادّعانامەسندە سكسان بر یاڭلیشنی سعید اثبات ایتدیگی حالدە، آفیون محكمەسنڭ بو عجیب، كیفی، ظالمانە و غرضی معاملەسی، حكومتڭ عدلیەسنە بیوك بر سٓوء قصد اولدیغنی انصافی اولان تصدیق ایدر.

سعید النّورسی

[بِاسْمِهٖ سُبْحَانَهُ]

آفیون آغیر جزا هیئتنڭ تمامًا تبدیل ایدیلدیگنی و ٨ ایلول محكمەمزڭ تعلیق ایدیلەجگنی امرطاغ قرداشلریمز تلغرافلە بیلدیرییورلر.

خسرو

(٦٦٣)

آفیون محكمەسنڭ عادل رئیسیلە بر حسب حالدر.

آرتق یتر، تحمّل قالمدی.

یگرمی سكز سنەدە یوز سنەلك عذابی بڭا چكدیردیلر. بو اشكنجەلرە صوڭ ویریلمك ایچون، هم بو مملكتە، هم عالم اسلامە هیچ بر ضرری اولمدیغی كبی،

پك چوق منفعتی بولونان رسالۀ نورڭ تام سربستیتنی ویرمك، بو حكومت اسلامیەنڭ بیوك بر وظیفەسیدر.

قطعیًّا تحقّق ایتمشكە، آفیون محكمەسی مدهش بر قومیتەنڭ پارماغیلە، بش محكمەنڭ و درت امنیت دائرەسنڭ بزە اعادە ایتدكلری عین كتابلری و محكمۀ تمییزدە او كتابلر لهندە برائت ایلە حكم ایدرك اون بش یگرمی كون ظرفندە ضررسز اولدیغنە قرار ویردیگی حالدە، آفیون محكمەسنڭ سابق اعضالری درت بوچوق سنەدر غایت عادی بهانەلرلە، مثلا، اوزاق یرلردەكی علاقەلری آز اولان و مدار مسئولیت و بهانە اولاجق هیچ بر كتاب اونلردە بولونمایان و یالڭز حپسدە بزملە برابر یاتان بر ایكی نور طلبەسنە یاڭلیش آدرسلرلە، خبر ویریلمەمش دییە بوندن اوّل ایكی آی، شیمدی دە بر آی كری یە تأخیر ایدیلمسی و بو بیچارە نور طلبەلرینە كیدوب كلمە یول مصرفلری ایچون چوق ضرر ویرمەلری و حتّی آفیون محكمەسنڭ نور رسالەلرینی مصادرە قراری سببیلە و اخطاریلە استانبولدە مصادرە ایدیلن رهبر رسالەسی و محكمەسی ایچون، قیشدە بنم كبی غایت اقتصادجی بر فقیر، یوز بانقنوطی بر خصوصی اوطوموبیلە اجرت ویرمگە مجبور اولمسی و یگرمی سنەدە بعضًا یوز، بعضًا یتمش، بعضًا اللی آرقداشیلە چوق دفعە لزومسز محكمەلرە و حپسلرە سوق ایتمەلریلە، البتە یوز بیڭ لیرە ضرر و زیانمز اولمسی كوسترییوركە، مدهش غرضكارلرڭ پارماغی بو ایشە قاریشییور.

اوت، سابق محكمەلرڭ حقسز اولارق نور طلبەلرینە اون بش سنە ظرفندە

اللی بیڭ، بلكە یوز بیڭ بانقنوط ضرر ویرمەلری حقسز و قانونسزدر. بو یوز بیڭ لیرەیی تضمینات اولارق دعوا ایدییورز. یوز بیڭلرلە دعواجیلریمز بو دعوانڭ آرقەسندە وار.

شیمدی بو آفیون محكمەسنڭ سابق رئیسنڭ و صاوجیسیلە اعضالرینڭ پك قطعی بر غرضلە بو ظالمانە معاملەلرینڭ غایت قطعی بر حجّت و دلیلی، محكومیتمە دائر اولوب نشر ایتدیگمز قرارنامەلریدر. او قرارنامەیی محكمۀ تمییز اساسیلە بوزمش اولدیغی حالدە، او قرارنامەدە بنم محكومیتمڭ شدّتلی جزاسنە كوستردكلری سبب بودر: "سعیددە كردلك وار. هم ئولمش بر آدمە تجاوز ایدییور" دیمەلریدر.

عجبا هیچ بر محكمە دنیادە بویلە شیئی مدار مسئولیت یاپارمی؟ یتمش جنسدن و ملّتدن بو مملكتمزدە بولونان مسلمان قرداشلریمزدە بویلە عنصریّت و جنسیت فرقلرینی نظرە آلمدیغی حالدە.. هم سعید، كردلگنی دگل، بلكە مملكتنی و اقرباسنی بیراقوب، روحنی، حیاتنی بو ملّت اسلامیەیە و دیندار توركلرە فدا ایتدیگی حالدە.. و یگرمی سكز سنە اشكنجەلرلە عذاب كوردیگنە مقابل، او توركلرلە اولان صمیمی قرداشلغندە ذرّە قدر صارصیلمایان بر آدم حقّندە.. و دنیادە هیچ بر محكمەنڭ مدار مسئولیت یاپمدیغی عرقجیلق، هم حقیقتی اولمدیغی و اسلامیت قرداشلغنە ضرری اولدیغی ایچون بتون قوّتیلە عرقجیلغی اللی سنەدنبری بیراقارق، بتون حیاتی و اثرلریلە "اسلامیت ملّیتی هر شیئە مقابلدر"

دیمش. و او قدسی ملّیتی طوتمش. هم "عرقجیلغی بیراقیڭز، درت یوز میلیون قرداشی قزاندیران اسلامیت ملّیتنە كیریڭز." دیمش. دائما بو درسی ویرمش. شیمدی بویلە بر آدمە آفیون سابق محكمەسی جزا ویرركن، "اوندە كردلك طماری وار" دییە شدّت جزایە سبب كوسترمش. بویلە محكمە البتە محكومدر. بزلر بویلە قانون نامنە قانونسزلق ایدنلردن ضرر و زیانلریمزڭ تضمیناتنی محكمۀ كبرادە دعوا ایدییورز و ایدەجگز.

سعید النّورسی

(٦٦٤)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق سوكیلی، چوق مبارك نور قهرمانی آغابگم خسرو،

كوندردیگڭز خطبۀ شامیەنڭ صحیفەلرینی استادیمز غایت خستە وضعیتدە ایكن كوردی. بردن تریاق كبی اوڭا علاج اولوب فرحلاندی. دیدی: "خسرو و یاردیمجیلرینە یوز بیڭ بارك اللّٰه! نور قهرمانی خسرو عربی خطّی اولمدیغی حالدە، یگرمی بش سنە اوّل قرآن یازمەسندە، عربی خطّندە ممتاز ذاتلری كچدیگی كبی، شیمدی دە عربی لسانی ایلە عصای موسی یی او قدر صحّتلی و كوزل یازمسی و یاڭلیشنڭ پك آز اولمسی، خسروڭ اخلاصنڭ بر خارقەسیدر. اللّٰه دائما اونی و یاردیمجیلرینی موفّق أیلەسین، آمین." دیدی. هم عبد المجیدڭ عربی ترجمەسی