[٦٧٠]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز قرداشلرم،

[اوّلا] تكرارًا رمضانڭزی روح و جانملە تبریك و معنًا یاردیمڭزی بو ضعیف و خستە قرداشڭزە رجا ایدرم.

[ثانیًا] اسكی سعیدڭ مطبوع اسكی اثرلرندن بریسی ألمە كچدی. مراق و دقّتلە باقدم. بو كلن فقرە قلبە كلدی. مناسب ایسە مكتوبات آخرندە یازیلسین.

[ثالثًا] حریتڭ اوچنجی سنەسندە مشروطیت مشروعەیی عشائرە تام بیلدیرمك و قبول ایتدیرمك ایچون ارطوش عشائری ایچندە، خصوصًا كودان و مامخورانە ویردیگی درس و ١٣٢٩‘دە مطبعەء ابو الضّیادە قرق بر سنە اوّل طبع ایدیلمش. فقط مع التّأسّف یگرمی اوتوز سنەدنبری آرایوردم، بولامامشدم. بو دفعە بریسی بر نسخە بولوب بڭا كوندرمش. بن دە اسكی سعید قفاسنی آلوب و یڭی سعیدڭ سنوحاتیلە دقّتلە مطالعە ایتدم. آڭلادمكە، اسكی سعید، عجیب بر حسّ قبل الوقوع ایلە اوتوز قرق سنە صوڭرە، یعنی شیمدی وقوعە كلن وقوعات مادّیە و معنویەیی حسّ ایتمش. و بدوی اكراد عشائری پردەسی آرقەسندە، بو زمانڭ مدنی پردەسنی كندیلرینە ماسكە یاپان و وطنپرورلك پردەسی آلتندە دینسز و حقیقی بدوی و حقیقی مرتجع، یعنی بو ملّتی، اسلامیتدن اوّلكی عادتلرینە سوق ایدن خائنلری كورمش كبی اونلرلە قونوشوب باشلرینە اورویور.

[رابعًا] او مطبوع اثرڭ یوز بشنجی صحیفەدن تا یوز طوقوزنجی صحیفەسنە قدر اولان پارچەیە دقّتلە باقدم. او زماندە عشائرە درس ویردیگم او سؤٓال و جوابلر وقتندە، مهم بر ولی ایچلرندە بولونویورمش. بنم دە خبرم یوق. او مقامدە شدّتلی اعتراض ایتدی. دیدی:

"سن افراط ایدییورسڭ، خیالی حقیقت كورییورسڭ، بزی دە تحقیر ایدییورسڭ. آخر زماندر، كیتدكجە داها فنالاشاجق!" او وقت، اوڭا قارشو مطبوع كتابدە بویلە جواب ویرمش:

"هركسە دنیا، ترقّی دنیاسی اولسون، یالڭز بزم ایچونمی تدنّی دنیاسیدر؟ اویلەمی؟ ایشتە بن دە سزڭلە قونوشمایاجغم، شو طرفە دونویورم. مستقبلدەكی انسانلرلە قونوشاجغم.

ای یوزدن، تا اوچ یوز سنەدن صوڭرەكی یوكسك عصرڭ آرقەسندە كیزلنمش، ساكتانە بنم سوزیمی دیڭلەین و بر نظر خفئ غیبی ایلە بنی تماشا ایدن سعیدلر، حمزەلر، عمرلر، عثمانلر، یوسفلر، احمدلر و سائرەلر، سزلرە خطاب ایدییورم.

تاریخ دینیلن ماضی درەلرندن سزڭ یوكسك استقبالڭزە اوزانان تلسز تلغراف ایلە سزڭ ایلە قونوشویورم. نە یاپایم، عجلە ایتدم، قیشدە كلدم. سزلر ان شٓاء اللّٰه جنّت آسا بر بهاردە كلیرسڭز. شیمدی اكیلن نور تخوملر، زمینڭزدە چیچك آچاجقلر. سزدن شونی رجا ایدرمكە، ماضی قطعەسنە كچمك ایچون كلدیگڭز وقت، مزاریمە اوغراییڭز. او چیچكلرڭ برقاچ دانەسنی، مزار طاشی دینیلن و كمیكلریمی

مسافر ایدن طوپراغڭ قاپوجیسنڭ باشنە طاقیڭز. "یعنی اختیار رسالەسنڭ اون اوچنجی رجاسندە بیان ایتدیگی كبی، مدرسة الزّهرانڭ مكتب ابتدائیسی و وان شهرینڭ او یكپارە طاشی اولان قلعەسنڭ آلتندە بولونان خورخور مدرسەمڭ وفات ایتمسی و آناطولیدە بتون مدرسەلرڭ قپاتیلمەسی ایلە وفات ایتمەلرینە اشارت ایدرك، مدرسەء ابتدائیە عمومنڭ بر مزار اكبری حكمندە اولمەسنە بر علامت اولارق، او عظمتلی مزارە عظمتلی وان قلعەسی مزار طاشی اولمش. ای یوز سنە صوڭرە كلنلر! شو قلعەنڭ باشندە بر مدرسۀ نوریە چیچگنی طاقیڭز. جسمًا دیریلمەمش، فقط روحًا باقی و كنیش بر هیئتدە یاشایان مدرسة الزّهرایی، جسمانی بر صورتدە بنا ایدیڭز، دیمكدر. ذاتًا اسكی سعیدڭ اكثر حیاتی، او مدرسەنڭ خیالیلە كیتمش و او مطبوع رسالەنڭ یوز قرق یدنجی صحیفەدن، تا یوز اللی یدنجی صحیفەیە قدر مدرسة الزّهرانڭ تأسیسنە و فائدەلرینە دائر اهمّیتلی حقیقتلری یازمش.

بر فال خیردركە، یگرمی بش سنەلك دهشتلی و مدرسەلری ئولدیرن استبدادڭ قیریلمەسی ایلە، معارف وكیلی توفیق، واندە شرق اونیورسیتەسی نامندە مدرسة الزّهرایی انشا ایتمەسنە قرار ویرمسی و امیدڭ خارجندە رئیس جلال دخی مهم مسئلەلر ایچندە توفیقڭ فكرینە اشتراك ایتمسی، اسكی سعیدڭ قرق سنە اوّلكی سوزی و رجاسی طوغری چیقاجغنی كوسترییور.

شیمدی قرق بش سنە اوّلكی جوابنڭ ایضاحندە، اوچ حقیقت بیان ایدیلەجك.

[برنجیسی] اسكی سعید، بر حسّ قبل الوقوع ایلە ایكی عجیب حادثەیی حسّ ایتمش، فقط رؤیای صادقە كبی تعبیرە محتاج ایمش. ناصل بر قیرمیزی پردە ایلە بیاض ویا سیاه بر شیئە باقیلیرسە، قیرمیزی كورونور. او دە سیاست اسلامیە پردەسی ایلە او حقیقتە باقمش. حقیقتڭ صورتی بر درجە شكلنی دگیشدیرمش. او زماندە حاضر بیوك بر ولی دخی، او یاڭلیشنی كوروب، او جهتدە شدّتلە اعتراض ایتمش. ایشتە او حقیقت دە ایكی قسمدر:

برنجیسی: بو عثمانلی ئولكەسندە بیوك بر پارلاق نور چیقاجق! حتّی حرّیتدن اوّل پك چوق دفعە طلبەلرە تسلّی ویرمك ایچون "بر نور چیقاجق، كوردیگمز بتون فنالقلرە قارشو، بو وطنە سعادت تأمین ایدەجك" دییوردی. ایشتە قرق سنە صوڭرە رسالۀ نور، او حقیقتی كور كوزلرە دخی كوستردی.

ایشتە نورڭ ظاهرًا، كمیتًا طار جهتندە باقمایارق، حقیقت جهتندە، كیفیتًا، كنیش و فوق العادە منفعتنی حسّ ایتمسی صورتیلە، هم دە سیاست نظریلە بتون مملكت عثمانیەدە اولاجق كبی افادە ایتمش. او بیوك ولی، اونڭ طار دائرەیی كنیش تصوّرندە، اوڭا اعتراض ایتمش. هم او ذات حقلی، هم دە اسكی سعید بر درجە حقلیدر. چونكە رسالۀ نور ایمانی قورتارمسی جهتیلە او طار دائرەسی، مادام حیات باقیە و ابدیەیی ایمانلە قورتارییور. بر میلیون طلبەسی، بر میلیار حكمندەدر. هم دگل بر میلیون، بلكە بیڭ انسانڭ حیات ابدیەسنی تأمینە چالیشمق، بر میلیار انسانڭ حیات فانیۀ دنیویە و مدنیەسنە چالیشمقدن

داها قیمتدار و معنًا داها كنیش اولمسی، اسكی سعیدڭ او رؤیای صادقە كبی اولان حسّ قبل الوقوعلە، او طار دائرەیی بتون عثمانلی مملكتنی احاطە ایدەجگنی كورمش. بلكە ان شٓاء اللّٰه او كوروش، یوز سنە صوڭرە نورلرڭ اكدیگی تخوملرڭ سنبللنمەسی ایلە، عینًا او كنیش دائرە نور دائرەسی اولاجق، اونڭ یاڭلیش تعبیرینی صحیح كوسترەجك.

ایكنجی حقیقت: قرق سنە اوّل اسكی مطبوع كتابلرندە و اشارات الاعجازڭ باشدەكی افادەء مرامندە و سائر اثرلرندە، مصرّانە مكرّر، طلبەلرینە دییوردیكە: "هم مادّی، هم معنوی بیوك بر زلزلەء اجتماعیە و بشریە اولاجق. بنم دنیا تركی ایلە انزوامی و مجرّد قالمەمی غبطە ایدەجكلر" دییوردی. حتّی حرّیتڭ برنجی سنەسندە استانبولدە، جامع الازهرڭ رئیس علماسی اولان شیخ بخیت؇ حضرتلری، استانبولدە اسكی سعیددن صوردی: (مَا تَقُولُ فٖی حَقِّ هٰذِهِ الْحُرِّیَّةِ الْعُثْمَانِیَّةِ وَالْمَدَنِیَّةِ الْاَوْرُوبَائِیَّةِ) سعید جوابًا دیمش: (اِنَّ الْعُثْمَانِیَّةَ حَامِلَةٌ بِدَوْلَةٍ اَوْرُوبَائِیَّةٍ فَسَتَلِدُهَا یَوْمًا مَا وَالْاَوْرُوبَا حَامِلَةٌ بِالْاِسْلَامِیَّةِ فَسَتَلِدُهَا یَوْمًا مَا) یعنی، عثمانلی حكومتندەكی حرّیتە نە دییورسڭ و آوروپە حقّندە فكرڭ نەدر؟ او وقت اسكی سعید دیمش: "عثمانلی حكومتی آوروپە ایلە حاملەدر، آوروپە كبی بر حكومتی طوغوراجق. و آوروپە دە اسلامیتلە حاملەدر، او دە بر اسلام دولتی طوغوراجق" دییە شیخ بخیتە جواب ویرمش. او علّامە ذات دیمش: "بن دە تصدیق ایدییورم." برابرندە كلن خواجەلرە دیدی: "بن بونڭلە مناظرە ایدوب غلبە ایدەمم."

برنجی تولّدی كوزیمزلە كوردك. بر چار یك عصر آوروپەدن داها زیادە دیندن اوزاق، آوروپە سیستمندە دهشتلی بر استبداد.

ایكنجی تولّد دە، ان شٓاء اللّٰه یگرمی اوتوز سنە صوڭرە چیقاجق. هم شرقدە، هم غربدە ظهورە كلن چوق امارەلرلە، آوروپە ایچندە بر اسلام دولتی چیقاجق.

اوچنجی حقیقت: اسكی سعید، هم یڭی سعید، "هم مادّی، هم معنوی بیوك بر حادثە عثمانلی مملكتندە بیوك و دهشتلی و تخریباتجی بر زلزلەء بشریە اولاجق" دییە حسّ قبل الوقوع ایلە، اسكی سعید مكرّر و مصرّانە خبر ویرییوردی. حالبوكە او حسّ ایلە، نور مسئلەسنڭ عكسی ایلە غایت كنیش دائرەیی طار كورمش. زمان، اونی ایكنجی حرب عمومی ایلە تام تصدیق ایتدیگی حالدە، اونڭ او چوق كنیش دائرەیی عثمانلی مملكتندە كوردیگنی شویلە تعبیر ایدییوركە:

ایكنجی حرب عمومی، بشرە ایتدیگی تخریبات عظیمە كرچە چوق كنیشدر. فقط حیات دنیویەیە و بقاسز مدنیتە باقدیغی جهتندە، عثمانلیدەكی بر چیرك عصردە تخریباتە مقابل، نسبتًا طاردر. عثمانلیدەكی معنوی زلزلەء معنویەء اسلامیە، معنًا او ایكنجی حرب عمومیدن داها دهشتلی اولمەسندن، اسكی سعیدڭ او سهوینی تصحیح ایدییور و رؤیای صادقەسنی تام تعبیر ایدییور و او حسّ قبل الوقوعنی كوزلرە دخی كوسترییور. و او معترض اهل ولایت، ظاهرًا حقلی، فقط حقیقتًا اسكی سعیدڭ او حسّی داها حقلی اولدیغنی اثباتلە، او ولی ذاتڭ اعتراضنی تام رد ایدییور.

[خامسًا] مدرسة الزّهرانڭ او مطبوع اثرندن كلن پارچە، عینًا درج ایدیلدی. تا اسلامیت معارفنڭ شیمدی بر قهرمانی توفیق ایلری كورسون، بر سنە اوّلكی فكری نە قدر قیمتدار اولدیغنی آڭلاسین، بالفعل تطبیقنە كیرسین.

سعید النّورسی

[٦٧١]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] چوق امارەلرلە و بعض حادثەلرلە قطعیًّا تحقّق ایتمشكە، نورڭ خاص طلبەلرندن بعضیلرینڭ بر ضعیف طمارینی بولوب، خدمت نوریەدن واز كچیرمك ویا ضعیفلاشدیرمق ایچون نورڭ و نور طلبەلرینڭ دوشمانلرینڭ چوق پلانلری وار. مدار عبرت بر ایكی نمونەیی بیان ایدییورز.

برنجی نمونەسی: نورلرلە شدّتلی علاقەسی بولونان برقاچ خاص قرداشمزڭ نظرینی، فكرینی باشقە طرفە چویرمك ویا ذوقلی و روحانی بر مشرب ایلە مشغول ایدوب، خدمت ایمانیەیە قارشو ضعیفلاشدیرمق ایچون، بعض شخصلر ایسپیرتیزمە دینیلن ئولولرلە مخابرە نامی آلتندە جنّیلرلە مخابرە ایتمك كبی، حتّی بعض بیوك اولیالرلە، حتّی پیغمبرلرلە كویا بر نوع قونوشمق كبی، اسكی زماندە كاهنلك

دینیلن، شیمدی دە مدیوملق نامی ویریلن بو مسئلە ایلە بعض قرداشلریمزی مشغول ایدییورلر. حالبوكە:

بو مسئلە، فلسفەدن و اجنبیدن كلدیگی ایچون، اهل ایمانە چوق ضررلری اولابیلیر. و چوق سٓوء استعمالاتە منشأ اولمقلە برابر، ایچندە بر طوغری اولسە، اون یالان قاریشییور. چونكە طوغری یی و یالانی تفریق ایدەجك بر مهنك، بر مقیاس اولمدیغندن، ارواح خبیثە و شیطانە یاردیم ایدن جنّیلرڭ بو وسیلە ایلە، هم اونڭ ایلە مشغول اولانڭ قلبنە و هم دە اسلامیتە ضرر ویرمك احتمالی وار. چونكە معنویات نامنە حقائق اسلامیەیە و عقیدەء عمومیەیە مخالف اخبارات اولویور. ارواح خبیثە ایكن، كندیلرینی ارواح طیّبە ظنّ ایتدیروب، بلكە كندیلرینە بعض بیوك ولیلر نامنی ویروب، اسلامیتڭ اساساتنە مخالف سوزلرلە ضرر ویرمگە چالیشابیلیرلر. حقیقتی تغییر ایدوب، صاف دللری تام آلداتابیلیرلر.

مثلا، ناصلكە كونش، بر كوچك جام پارچەسندە، ضیاسیلە، حرارتیلە، شكلیلە كورونویور. فقط او كوچوجك جامڭ ایچندەكی كونشڭ او كوچوجك تمثالی، كندی نامنە اگر قونوشسە و دیسە: "بنم ضیام دنیایی استیلا ایدییور، بنم حرارتم هر شیئی ایصیتییور و كرۀ ارضدن بر میلیون دفعەدن داها بیوگم" دیسە، نە درجە خلاف حقیقت اولدیغی آڭلاشیلیر. عینًا بو مثال كبی، بر پیغمبر، كونش كبی حقیقی مقامندە ایكن، او ایسپیرتیزمەنڭ ویاخود مدیوملغڭ جام پارچەسی حكمندەكی

استعدادینە كورە بر جلوەسنڭ تظاهری، او حقیقت نامنە قونوشاماز. اگر قونوشسە، یوز درجە مخالف اولور. ایسپیرتیزمەنڭ ویا مدیوملغڭ او مظهردەكی جزئی جلوەسی، وحیڭ مظهری اولان او معنوی كونشڭ قدسی ماهیّتنە، هیچ بر جهتلە قیاس اولاماز. چونكە اسفل سافلیندەكی بر جام پارچەسی، معنًا اعلای علّییندە اولان او معنوی كونشڭ حقیقتنی یاننە كتیرەمز. كتیرمگە چالیشمق دە، حرمتسزلكدن باشقە بر شی دگلدر. آنجق اونڭ مقامنە قریب اولمق ایچون، جَلَالَ الدّٖینِ سُیُوطٖی و بر قسم اولیالر كبی، سیر و سلوك ایلە ترقّی ایدرك، او معنوی كونشڭ صحبتنە مظهر اولونور. فقط بویلە ترقّی، رسالۀ نورڭ اثبات ایتدیگی كبی، پیغمبرڭ ولایتیلە بر نوع صحبتی، كندی درجەلرینە كورە و كندی استعدادلری درجەسندە اولور.

فقط نبوّت حقیقتی، ولایتدن نە درجە یوكسك ایسە، ایسپیرتیزمە واسطەسیلە ویاخود ترقّیات روحیە جهتیلە مظهر اولونان صحبت و مخابرە دخی، هیچ بر جهتدە حقیقی پیغمبرلە مخابرەیە یتیشەمیەجگندن، یڭی احكام شرعیەیە مدار احكام اولاماز.

اوت، دیندن كلمەین، بلكە فلسفەنڭ حسّاسیتندن كلن جلب ارواح دە، هم خلاف حقیقت، هم خلاف ادب بر حركتدر. چونكە اعلای علّییندە و قدسی مقاملردە اولانلری اسفل سافلین حكمندەكی ماصەسنە و یالانلرڭ یری اولان اویونجاق تختەسنە كتیرمك، تام بر اهانتدر و بر حرمتسزلكدر. عادتا بر پادشاهی،

قولوبەجگنە چاغیروب كتیرمك كبیدر. بلكە عین حقیقت و ادب و حرمت و استفادە اودركە، جَلَالَ الدّٖینِ سُیُوطٖی، جلال الدّین رومی و امام ربّانی كبی ذاتلرڭ سیر و سلوك روحانیلری كبی، سیر و سلوك ایلە یوكسلەرك، او قدسی ذاتلرە یاناشمق و استفادە ایتمكدر.

رؤیای صادقەدە ارواح خبیثە و شیطان، پیغمبر صورتندە تمثّل ایدەمز. فقط جلب ارواحدە، ارواح خبیثە، بلكە پیغمبرڭ لسانًا اسمنی كندینە طاقوب، سنّت سنیّەیە و احكام شرعیەیە مخالف اولارق قونوشابیلیر. اگر بو قونوشمەسی شریعتڭ احكامنە و سنّت سنیّەیە مخالف ایسە، تام دلیلدركە، او قونوشان ارواح طیّبە دگلدر، مؤمن و مسلمان جنّی دە دگلدر، ارواح خبیثەدر. بو شكلدە تقلید ایدییور.

[ثانیًا] شیمدی نور طلبەلری بویلە مسئلەلردە درسە محتاج دگلدرلر. رسالۀ نور، هر شیئڭ حقیقتنی بیان ایتمش. باشقە ایضاحاتە احتیاج بیراقمامش. رسالۀ نور اونلرە كافیدر. فقط نور طلبەسی اولمایانلرڭ عین مخابرەدە، احكام شریعت و سنّت سنیە اساساتنە مخالف تلقیناتی دیڭلەمەمەلری لازم و الزمدر. یوقسە بیوك خطا اولور.

[بر اخطار] بو مكتوبدەكی روحلرلە مخابرە مسئلەسنە قارشو ایدیلن شدّتلی تنقید، اجنبیدن، فن و فلسفەدن و مانیەتیزمە و ایسپیرتیزمەدن كلن

و معنوی بر شكلی كیین بر مشربە قارشیدر. یوقسە اسلامیتدن و تصوّف و اهل طریقتدن كلن و بر درجە روحلرلە مخابرەیە بڭزەین و نا اهللرڭ كیرمسیلە بر درجە سٓوء استعمال ایدیلن و پك آز اولان بر قسم صوفیلرڭ صوفیلگنە قارشو دگلدر. كرچە اونلردە دە بر جهتدە بعضیلرە ضرر اولابیلیر. فقط اوتەكی كبی، هیچ بر جهتدە آلداتیجی دگل و اسلامیتە هیچ بر جهتدە ضرر نیّتی یوق. هم او اجنبیدن كلن مشرب ایسە، هم طریقت و هم اسلامیت علیهندە اولدیغی كبی، او صوفیلرڭ مسلگنی دە سقوط ایتدیرمەیە چالیشییور و عادیلشدیرییور. اهل تصوّفڭ ضعیف و تام سنّتی یرینە كتیرمەین قسمی، دقّت ایتسینلر، كندیلرینی اونلرە بڭزتمەسینلر.

سعید النّورسی

[٦٧٢]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلریمز،

[اوّلا] قرآنڭ نقش حروفندەكی بر نوع معجزەسنی كوزلرە دخی كوسترەجك بر طرزدە یازدیریلان و بو زماندە اظهار ایدیلن معجزەلی و یالدیزلی قرآنمز، اوّلجە طبع ایچون آلمانیەیە كوندریلمش و استانبولدە دە غیرت ایدیلمشسە دە، اوچ رنك اوزرینە طبع ایدیلمسی فضلە بر مصرفە احتیاج كوسترمسی كبی مانعلردن

كری قالمشدی. بو دفعە مطبعە ایشلرندە فضلە ایلرلەمش اولان ایتالیەیە نمونە ایچون بر جزئی كوندریلدی. استانبولدە ممكن اولورسە طبعی ایچون، تكرار تشبّثە كچیلدی. و شیمدیلك بر رنك مركّبلە، عین توافقی محافظە ایلە طبع ایدیلمەسنە باشقە یردە باشلاناجق. اوندن صوڭرە ان شٓاء اللّٰه تام یالدیزلی اولارق و اوچ رنك ایلە مصر و آلمانیە ویا ایتالیە كبی بر یردە طبع ایدیلەجك.

[ثانیًا] قرآنڭ عربی بر تفسیری و رسالۀ نورڭ عربی مثنوئ شریفی اولان و ذوالفقار بیوكلگندە و آلتونلە یازیلمغە لایق بر مجموعە دخی ان شٓاء اللّٰه تكثیر ایدیلەجك. بو چوق خارقە و پك اهمّیتلی و غایت مهم و هر بر بحثی برر كتاب و برر رسالە اولاجق درجەدە غایت ایجازكار اولان و قرق سنە اوّل تألیف ایدیلن بو اثرلری، او زمانڭ حقیقی و مشهور و بیوك علما و مشایخی دە تام تقدیر و تحسین ایتمشلر. و او رسالەلردن بر تك رسالە حقّندە "بو بر قطرە دگل، بر بحردر" دییەرك فوق العادەلگنی اظهار ایتمكلە برابر، تام آڭلامقدن دە عاجز اولدقلرینی ادراك ایتمشلر.

رسالۀ نورڭ بو غایت مهم ایكی ایشنی مژدە ایدرم. موفّق اولونمسی ایچون دعالریڭزی بكلرز. عمومڭزە پك چوق سلام ایدر، موفّقیتلر دیلرز.

اَلْبَاقٖی هُوَ الْبَاقٖی

قرداشلریڭز جیلان، زبیر

[٦٧٣]

(بو مكتوب صامسوندە منتشر بیوك جهاد غزتەسندە انتشار ایتمشدر. مفتریلرڭ تحریكاتیلە صامسوندە محاكمە آچیلمەسنە سبب اولمشدر. محاكمە برائتلە نتیجەلنمشدر.)

عالم اسلامڭ خلاصكاری، اهل ایمانڭ سرتاجی، رسالۀ نورڭ ترجمانی استادیمز بدیع الزّمان سعید النّورسی حضرتلرینە،

بو دفعە دیندار دموقراتلرڭ دلالتیلە آفیون محكمەسنجە رسالۀ نورڭ سربستیتنە، بتون رسالە، مكتوب و مجموعەلرینڭ صوچ موضوعی تشكیل ایتمدیگندن اعادەلرینە قرار ویریلمەسنی، سنەلرجە اوّل اعلان ایتدیگڭز "رسالۀ نور بنم دگل، قرآنڭ مالیدر.. قرآنڭ فیضندن كلمشدر. هیچ بر قوّت اونی آناطولینڭ سینەسندن قوپاروب آتامایاجقدر. رسالۀ نور قرآنە باغلیدر. قرآن ایسە عرش اعظملە باغلانمشدر. كیمڭ حدّی واركە، اونی اورادن سوكوب آتسین؟" دییە اولان حقیقتلی بیاناتڭزڭ آچیق بر تظاهری و بو علوی خدمتڭزڭ الٰهی و قرآنی اولدیغنڭ پارلاق بر دلیلی بیلەرك، بو برائت قرارینڭ عالم اسلامڭ و باخصوص بو ملّت اسلامیەنڭ سعادتلرینڭ باشلانغیجی اولمسی اعتباریلە، باشدە بتون وارلغیلە بو ظفرلری بكلەین و نور عائلەسنە رئیس و حقیقتلر دریاسنە قاپدان تعیین ایدیلن و ظلمت كفرلە طغیان ایتمش انسانلغە هادی احسان اولونان عزیز، سوكیلی استادیمز و بوڭا وسیلە اولمقلە اهل ایمانی كندیلرینە

دوست و طرفدار أیلەین دیندار دموقراتلری و عادل هیئت حاكمەیی صوڭسز منّتلرلە تبریك ایدر و عرض ایدرزكە:

اوزون سنەلردنبری ترقّی و تعالیسی ایچون چالیشدیغڭز و اوغرندە فدای نفس و جان أیلەدیگڭز حقیقت قرآنیەنڭ، بوكون بتون بر مملكت، بر ملّت چاپندە اهل ایمانڭ قلبلرینە سرورلر كتیرەرك فوق العادە انكشافی، خدمتنە مأمور قیلیندیغڭز و بالفعل موفّق اولدیغڭز قدسی دعوا و خدمتڭزڭ نە قدر یوكسك و پارلاق اولدیغنی كونش كبی اثبات ایدییور.

یگرمی بش - اوتوز سنەدنبری بتون مانعلرە و صیقینتیلرە رغمًا، بو قدر صبر و متانتڭز و قرآندن قلب منوّریڭزە كلن رسالۀ نورڭ نشری جهتندە بو قدر خدمت و مجاهدەلریڭز، استقبالڭ نسللرینە و اسلامڭ قهرمان مجاهدلرینە بر نمونۀ اقتدا و امتثال اولویور. قرآن كونشنڭ سونمەین نورلری و ابدی لمعەلری اولان نور شعاعلریلە، جهل و ضلالت قراڭلقلرینی ازالە ایدرك، میلیونلر قلبلری او نورلە نورلاندیروب، اهل ایمانی كندیڭزە منّتدار ایتدیڭز. بو وطن و بو ملّت، بو تاریخ و بو طوپراق، سزڭ بو خدمتڭزی، بو فداكارلغڭزی هیچ بر زمان اونوتمایاجقدر. ابدیّت عالمنە كوچ ایلەدیگڭزدە دخی، سزڭ بو خدمتڭز بر چكردك اولوب، اوندن فیشقیران بر شجرۀ عالیە هر طرفی قاپلایاجق و او نور آغاجنڭ اطرافنە طوپلانان بیوك جماعتلر و رسالۀ نورڭ یوكسلن ابدی شعاعلری، او خدمتڭزی الی الابد و داها پارلاق و داها شعشعەلی ادامە ایدەجكلر.