ویردیگی حالدە، درت بوچوق سنە آفیون محكمەسی اوراق مضرّە كبی چوروتمك ایچون رسالەلریمزی مخزنە آتمسی و درت كونلك ایشی كیفی بهانەلرلە درت بوچوق سنە اوزاتمسی، هم آفیونڭ پك حقسز اولارق، قضیۀ مُحكمە حالنی آلان دڭزلی برائتنی نظرە آلمادیغندن، محكمۀ تمییز آفیونڭ ویردیگی جزا قرارینی بوزدیغی، هم صاوجینڭ سعید حقّندەكی اون بش صحیفە ادّعانامەسندە سكسان بر یاڭلیشنی سعید اثبات ایتدیگی حالدە، آفیون محكمەسنڭ بو عجیب، كیفی، ظالمانە و غرضی معاملەسی، حكومتڭ عدلیەسنە بیوك بر سٓوء قصد اولدیغنی انصافی اولان تصدیق ایدر.

سعید النّورسی

[بِاسْمِهٖ سُبْحَانَهُ]

آفیون آغیر جزا هیئتنڭ تمامًا تبدیل ایدیلدیگنی و ٨ ایلول محكمەمزڭ تعلیق ایدیلەجگنی امرطاغ قرداشلریمز تلغرافلە بیلدیرییورلر.

خسرو

(٦٦٣)

آفیون محكمەسنڭ عادل رئیسیلە بر حسب حالدر.

آرتق یتر، تحمّل قالمدی.

یگرمی سكز سنەدە یوز سنەلك عذابی بڭا چكدیردیلر. بو اشكنجەلرە صوڭ ویریلمك ایچون، هم بو مملكتە، هم عالم اسلامە هیچ بر ضرری اولمدیغی كبی،

پك چوق منفعتی بولونان رسالۀ نورڭ تام سربستیتنی ویرمك، بو حكومت اسلامیەنڭ بیوك بر وظیفەسیدر.

قطعیًّا تحقّق ایتمشكە، آفیون محكمەسی مدهش بر قومیتەنڭ پارماغیلە، بش محكمەنڭ و درت امنیت دائرەسنڭ بزە اعادە ایتدكلری عین كتابلری و محكمۀ تمییزدە او كتابلر لهندە برائت ایلە حكم ایدرك اون بش یگرمی كون ظرفندە ضررسز اولدیغنە قرار ویردیگی حالدە، آفیون محكمەسنڭ سابق اعضالری درت بوچوق سنەدر غایت عادی بهانەلرلە، مثلا، اوزاق یرلردەكی علاقەلری آز اولان و مدار مسئولیت و بهانە اولاجق هیچ بر كتاب اونلردە بولونمایان و یالڭز حپسدە بزملە برابر یاتان بر ایكی نور طلبەسنە یاڭلیش آدرسلرلە، خبر ویریلمەمش دییە بوندن اوّل ایكی آی، شیمدی دە بر آی كری یە تأخیر ایدیلمسی و بو بیچارە نور طلبەلرینە كیدوب كلمە یول مصرفلری ایچون چوق ضرر ویرمەلری و حتّی آفیون محكمەسنڭ نور رسالەلرینی مصادرە قراری سببیلە و اخطاریلە استانبولدە مصادرە ایدیلن رهبر رسالەسی و محكمەسی ایچون، قیشدە بنم كبی غایت اقتصادجی بر فقیر، یوز بانقنوطی بر خصوصی اوطوموبیلە اجرت ویرمگە مجبور اولمسی و یگرمی سنەدە بعضًا یوز، بعضًا یتمش، بعضًا اللی آرقداشیلە چوق دفعە لزومسز محكمەلرە و حپسلرە سوق ایتمەلریلە، البتە یوز بیڭ لیرە ضرر و زیانمز اولمسی كوسترییوركە، مدهش غرضكارلرڭ پارماغی بو ایشە قاریشییور.

اوت، سابق محكمەلرڭ حقسز اولارق نور طلبەلرینە اون بش سنە ظرفندە

اللی بیڭ، بلكە یوز بیڭ بانقنوط ضرر ویرمەلری حقسز و قانونسزدر. بو یوز بیڭ لیرەیی تضمینات اولارق دعوا ایدییورز. یوز بیڭلرلە دعواجیلریمز بو دعوانڭ آرقەسندە وار.

شیمدی بو آفیون محكمەسنڭ سابق رئیسنڭ و صاوجیسیلە اعضالرینڭ پك قطعی بر غرضلە بو ظالمانە معاملەلرینڭ غایت قطعی بر حجّت و دلیلی، محكومیتمە دائر اولوب نشر ایتدیگمز قرارنامەلریدر. او قرارنامەیی محكمۀ تمییز اساسیلە بوزمش اولدیغی حالدە، او قرارنامەدە بنم محكومیتمڭ شدّتلی جزاسنە كوستردكلری سبب بودر: "سعیددە كردلك وار. هم ئولمش بر آدمە تجاوز ایدییور" دیمەلریدر.

عجبا هیچ بر محكمە دنیادە بویلە شیئی مدار مسئولیت یاپارمی؟ یتمش جنسدن و ملّتدن بو مملكتمزدە بولونان مسلمان قرداشلریمزدە بویلە عنصریّت و جنسیت فرقلرینی نظرە آلمدیغی حالدە.. هم سعید، كردلگنی دگل، بلكە مملكتنی و اقرباسنی بیراقوب، روحنی، حیاتنی بو ملّت اسلامیەیە و دیندار توركلرە فدا ایتدیگی حالدە.. و یگرمی سكز سنە اشكنجەلرلە عذاب كوردیگنە مقابل، او توركلرلە اولان صمیمی قرداشلغندە ذرّە قدر صارصیلمایان بر آدم حقّندە.. و دنیادە هیچ بر محكمەنڭ مدار مسئولیت یاپمدیغی عرقجیلق، هم حقیقتی اولمدیغی و اسلامیت قرداشلغنە ضرری اولدیغی ایچون بتون قوّتیلە عرقجیلغی اللی سنەدنبری بیراقارق، بتون حیاتی و اثرلریلە "اسلامیت ملّیتی هر شیئە مقابلدر"

دیمش. و او قدسی ملّیتی طوتمش. هم "عرقجیلغی بیراقیڭز، درت یوز میلیون قرداشی قزاندیران اسلامیت ملّیتنە كیریڭز." دیمش. دائما بو درسی ویرمش. شیمدی بویلە بر آدمە آفیون سابق محكمەسی جزا ویرركن، "اوندە كردلك طماری وار" دییە شدّت جزایە سبب كوسترمش. بویلە محكمە البتە محكومدر. بزلر بویلە قانون نامنە قانونسزلق ایدنلردن ضرر و زیانلریمزڭ تضمیناتنی محكمۀ كبرادە دعوا ایدییورز و ایدەجگز.

سعید النّورسی

(٦٦٤)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق سوكیلی، چوق مبارك نور قهرمانی آغابگم خسرو،

كوندردیگڭز خطبۀ شامیەنڭ صحیفەلرینی استادیمز غایت خستە وضعیتدە ایكن كوردی. بردن تریاق كبی اوڭا علاج اولوب فرحلاندی. دیدی: "خسرو و یاردیمجیلرینە یوز بیڭ بارك اللّٰه! نور قهرمانی خسرو عربی خطّی اولمدیغی حالدە، یگرمی بش سنە اوّل قرآن یازمەسندە، عربی خطّندە ممتاز ذاتلری كچدیگی كبی، شیمدی دە عربی لسانی ایلە عصای موسی یی او قدر صحّتلی و كوزل یازمسی و یاڭلیشنڭ پك آز اولمسی، خسروڭ اخلاصنڭ بر خارقەسیدر. اللّٰه دائما اونی و یاردیمجیلرینی موفّق أیلەسین، آمین." دیدی. هم عبد المجیدڭ عربی ترجمەسی

ایكنجی شعاعی بگندی و دیدی: "آفیون محكمەسنڭ میوەسی اولان حجّت الزّهرایی مدرسة الزّهرا اركانلرینە كوندرییورم. اونی دە چابوق عبد المجیدە كوندرسینلر. یانمدە اڭ اوّل خسروڭ چیقاردیغی نسخەمی بر واسطە ایلە اسپارطەیە كوندرەجگم. اوڭا او نسخەمی كوندرسینلر." دیدی.

[ثانیًا] عربی عصای موسی نڭ استادە كلن یگرمی نسخەسنی، استاد، سیّد صالح ایلە عربستان طرفلرینە كوندرەجگی ایچون تكرار دقّتلە باقدی. معنایی بوزمایان، فقط عربی نحو و صرف علمنڭ خواجەلرینڭ تنقیدینە مدار اولابیلەجك بعض نقطەلر، بعض كلمەلر، بعض حرفلر یاڭلیش اولدیغی ایچون، یڭیدن بر خطا صواب- جدولی یاپیلدی. سزە كوندرییورز. استاد دییوركە: "اگر مناسب كورسەڭز، او جدولی تكثیر ایدوب عربی عصای موسی نسخەلرینڭ آخرینە الحاق ایدرسڭز. یوقسە دیگرلری كبی برر برر تصحیحە لزوم یوق."

[ثالثًا] خطبۀ شامیەنڭ خطا صواب- جدولنی دخی كوندرییورز. هم "آرتق یتر، تحمّلم قالمدی" سر لوحەسیلە اولان مكتوبی، آز بر تعدیل ایلە آفیون محكمە رئیسنە ویرمەیی استاد نیت ایتمش. بر صورتنی دە سزە برای معلومات كوندرییورز. اوّلجە سزە كلن عین صورتڭ بعض كلمەلری، بلكە بعضیلرە طوقونور دییە استانبولە كوندرمشدی. نشر ایچون اذن ویرمدی. سز مناسب كورسەڭز، تكثیر ایدرسڭز. و اصلاح و تعدیل ایتمەیی استاد سزە بیراقییور. اللریڭزدن أوپویور، دعاڭزی یالوارییورز افندم.

عسكردن یڭی ترخیص اولان دعاڭزە محتاج قرداشڭز خلیل، مصطفی

[٦٦٥]

[مقدِّمە]

استادیمز دییوركە: محكمەلرڭ تأخیرندە خیر وار.

شیمدی یە قدر نورە و نورجیلرە ویریلن زحمتلر، رحمتلرە دونمسی كوسترییوركە، بو تأخیردە دە خیرلر واركە، بریسی بو اولمق احتمالی وار:

خارج عالم اسلامدە نورڭ اهمّیتلی تأثیرە باشلامسی و انكشاف و انتشاری و بورانڭ سیاسیلری آوروپەیە بر رشوت اولارق بر درجە آوروپەلاشمق میلنی كوسترمسی، خارجدە ظن ایدیلمكلە محكمەلرجە نورڭ سربستیت تامّەسی ایچون قرار ویرمك، خارج عالم اسلامدە نورلرڭ حقیقی اخلاصنە بویلە بر شبهە كلەجكدیكە، یا نورجیلر ریاكارلغە مجبور اولمشلر ویاخود بویلە مدنیلشمك فكرندە اولانلرە ایلیشمییورلر، ضعف كوسترییورلر دییە، نورڭ قیمتنە بیوك ضرر اولدیغی ایچون بو تأخیر او اوهاملری ازالە ایدر. و اثبات ایدییوركە، اوتوز سنەدنبری اسلامیتڭ شعارینە مخالف شیلرە باش اگمییورلر.

[بِاسْمِهٖ سُبْحَانَهُ]

استادیمز نوطەلر حكمندە سویلەدی، بز دە قلمە آلدق.

بو سنە بو ایكی محكمەنڭ ماهیّتنی بیان ایتمك لازم كلدی. بورادەكی محكمە ایسە،

اللی سنە اوّل سفیان و شاپقە حقّندە بر حدیثە معنا ویرمشم. صوڭرە محكمەلر بونی "بر قوماندانە تجاوزدر" دییە مدار بحث ایتدیلر. آفیون محكمەسی بنم جزامڭ شدّتنە بر سبب، او تجاوزی، او معنایی كوسترمش. حالبوكە فرضا یڭی یازمشم و او قوماندان دە صاغدر فرض ایدیلمش.

دینندە و رژیمندە متعصّب اینكیلیزڭ حكمی آلتندە یوز میلیون مسلمان، یوز سنەدە اینكیلیزڭ هم رژیمنی، هم دیننی انكار ایتمشلركن، قانونًا عدلیەلری اونلرە او جهتی مدار مسئولیت یاپمدیغی حالدە، هم شیمدی اسكی پارتی لیدرلری، فرضا او قوماندانڭ اوچدە بری دە اولسەلر (بلكە اونڭ كبی برر قوماندان ایدیلر) بنم او قوماندانە حدیثلە اوردیغم طوقاتڭ یگرمی مثلنی، شیمدیكی جریدەلر داها شدّتلی اولارق او لیدرلرە، او اسكی قوماندانلرە اورمقدەدرلر. مدار مسئولیت طوتولمییورلر، سربست اولویورلر. حالبوكە اللی سنە اوّل بر حدیثڭ طاشنی آتمشم، یگرمی سنە صوڭرە بر قوماندان باشنی قارشو طوتمش، باشی قیریلمش. ئولمش كیتمش، علاقەسی حكومتدن و دنیادن كسیلمش. حالبوكە اسكی پارتینڭ لیدرلری مبعوث ایكن ویا مأمور ایكن، حكومتلە علاقەلری اولدیغی حالدە اونلرە كلن تجاوز، رسالۀ نورڭ اوردیغی طوقاتڭ اون، بلكە یوز درجە زیادە ایكن، سربست جریدەلر انتشار ایدییور.

امّا كتابلر حقّندە مصادرەنڭ ماهیّتی: رسالۀ نورڭ یوز اوتوز اوچ كتابندن بر تك كتابڭ بر ایكی صحیفەسی او طوقاتی بحث ایتمش. بونڭ، طولاییسیلە

یوز اوتوز كتابی مصادرە ایتمك، بر آدمڭ خطاسیلە یوز اوتوز آدمی جزالاندیرمق كبی بر عجیب غدّارانە ظلم اولمسی.. و شیمدی كتبخانەلردە، كتابجیلردە و اللردە كزن و خصوصًا وطن و دین علیهندە دینسزلرڭ، ملحدلرڭ، زندیقلرڭ، قومونیستلرڭ كتابلری، حتّی باشدن آشاغی یە قدر اسلامیت علیهندەكی دوقتور دُوزیٖنڭ كتابی بعض اللردە كزمەسی كوسترییوركە، رسالۀ نورە قارشو مصادرە، یردن كوگە قدر حقسز بر ظلمدر، بر غدردر.

چونكە رسالۀ نور، اكثر عالم اسلامڭ مهم مركزلرندە، بو یگرمی سكز سنەدە بو وطندە علمالرڭ ألندە كزدیگی حالدە، هیچ بر عالم، هیچ بر فیلسوف اعتراض ایتمەمش. محكمەلر و سیاسیونلر، یالڭز بر تستّرە، دیگری دە "آخر زماندە بر قوماندان باشنە شاپقە قویاجق و جبرًا كییدیرەجك" كبی ایكی مسئلەیە ایلیشمشلر. صوڭرە دە بو مسئلەلر ایچون درت بش محكمە، او مسئلەلر دخی داخل اولدیغی و برائت ویریلدیگی حالدە، او بر ایكی صحیفە ایچون یگرمی بیڭ صحیفەیی مسئول و محكوم ایتمك حكمندە رسالۀ نوری مصادرە ایتمك، عین بو مثالە بڭزەیور:

بر آدمڭ بر آدمە حقسز دگل، بلكە حقلی تعرّضی یوزندن كە -، باشقەلری دە اونی مدار مسئولیت كورمدیگی و بش محكمە دە جنایت صایمدیغی حالدە- او موهوم صوچ ایلە یگرمی بیڭ آدمی صوچلی یاپمق كبی، یگرمی بیڭ نور صحیفەلرینی او بر ایكی صحیفە یوزندن مصادرە و درت بوچوق سنە آفیوندە حپس ایتمك،

او تعرّضڭ یوز مثلندن داها زیادە بر خطادر، بر جنایتدر و بو وطنە دە بر سٓوء قصددر.

سعید النّورسی

[٦٦٦]

[بِاسْمِهٖ سُبْحَانَهُ]

عزیز، صدّیق قرداشلرم،

بر ذات، اوزونجە بر مكتوب یڭی حرفلە بڭا یازمش، كندیسنڭ كیم اولدیغنی بیلدیرمەمش. اوچ نقطەدە شبهە ایدوب بر نوع اعتراض كبی یاڭلیش معنا ویردیگی ایچون، كویا بزی ایقاظ ایدییور. مشربمز مناقشە و مناظرە اولمدیغندن و قصوریمزی حقیقی اولارق كوسترنلردن ممنون اولدیغمزدن، بو مجهول ذاتڭ مكتوبندە اوچ اساسڭ حقیقتنی كوستروب یاڭلیشنی تصحیح ایتمك ایستەدم.

[برنجی اساس] رسالۀ نورڭ استادی و مأخذی و سعیدڭ دە چوق زماندنبری بر وردی اولان بعض آیتلر، بر حزب قرآنی صورتندە بر قسم طلبەلرڭ آرزولریلە قلمە آلینمش. صوڭرە دە طبع ایدیلمش. و درت بش محكمەنڭ دە كوستردیگی اهل وقوف علمالری و حتّی دیانت ریاستی دائرەسی و استانبولڭ فتوا دائرەسندەكی تدقیق كتب دینیە هیئتندن هیچ بر عالم و اهل وقوف علمالری اعتراض ایتمەمشلر. بلكە تقدیر ایدوب تحسین ایتمشلر. چونكە باشدە صحابەلر و مطبوع مجموعة الاحزابدە بولونان حضرت اسامە رضی اللّٰه عنه حزب قرآنیسیكە،

هر بر كوندە بر قسمنی اوقومقلە تقسیم ایدیلمشدر. و عین كتابدە و مجموعة الاحزابڭ عین جلدندە امام غزالی رضی اللّٰە عنهڭ بر حزب قرآنیسی وار. و چوق اهل ولایتڭ كندی مشربلرینە موافق بعض سورەلری و آیتلری بر حزبِ مخصوص قرآنی یاپدقلری میداندەدر.

اون سنە اوّل شهیدًا وفات ایدن مرحوم حافظ علی كبی نورڭ قهرمانلرندن، بنم خصوصی وردیمی و رسالۀ نورڭ استادلری و منبعلری اولان اڭ مهم آیتلری جمع ایتمك ایستەدیلر. صوڭرە اونلرە كوندردم. اونلر دە طبع ایتدیردیلر. چونكە هركس هر وقت بتون قرآنی اوقومغە وقت بولامییور. فقط بویلە بر حزب قرآنی النە كچسە، هر وقت استفادە ایدەبیلیر فكریلە، هم ثوابلری چوق زیادە اولان آیتلر و سورەلر، ایچندە یازیلمش. ذاتًا قرآن حكیمڭ بر معجزەسی شودركە، اهل حقیقتدن و كمالاتدن هر بر مسلك صاحبی، مشربنە موافق، قرآندە بر قرآننی، بر حزب مخصوصنی، بر استادینی بولور. كویا تك بر قرآندە بیڭلر قرآن وار.

بو معجزەنڭ دە سرّی شودركە: قرآن حكیمڭ آیتلرینڭ و كلاملرینڭ مناسبتلری یالڭز برابر اولانلرە دگل، بلكە پك چوق آیتلرە و كلاملرە و كلمەلرە مناسبتی وار، باقییور. اشارات الاعجاز تفسیر نوریەدە بو سرّ بر درجە كوستریلمش. دیمك باشقە كلاملرە بڭزەمز. هر بر آیت، بیڭلر آیتلرە باقار برر یوزی و كوزی وار. بو وضعیت قرآنیە چوق حقائقە مداردرلر. اهل طریقت

و اهل حقیقتڭ هر بر قسمی كندی مسلگنە كورە، او كلّی قرآن ایچندە بر مخصوص حزبلری وار.

ایشتە رسالۀ نورڭ حزب قرآنیسی دە او نوعدن بریسیدر. بونی بویلە نشر ایتمك ایچون، اولیادن اولان مرحوم حافظ علی بونڭ طبعنی عجلە ایتمك ایستەدی. چونكە تمام قرآنڭ، رسالۀ نورڭ كشفیاتیلە، خطّندە بر نوع معجزەء توافقیە بولونمەسندن، اونی طبع ایدوب باصدیرمق ایچون بو حزب قرآنی یی بر مقدّمەسی، بر مژدەجیسی اولارق باصدیردیلر. اوت، شیمدیكی، خسروڭ قلمیلە یازیلان و پك خارقە اولان و توافق جهتندە معجزاتلی اولان قرآنمزڭ اون بش سنەدنبری طبعنە چالیشییورز. و فقط اكثر نورجیلر فقیر الحال اولدیغندن و فوطوغرافلە طبعی لازم كلدیگندن و یگرمی بش بیڭ بانقنوط مصرف لازم اولمەسندن، حزب قرآنمز مقدِّمە اولارق داها اوّل، بو معجزەلی قرآنمزڭ بر مژدەجیسی اولارق طبع ایدیلدی. ایشتە بو معجزەلی قرآنمزی، هم دیانت ریاستی تدقیق ایتمش، چوق بگنمش.. هم استانبولدەكی فتوا دائرەسندەكی تدقیقِ مَصاحف علماسی غایت كوزل كورمش. غایت كوزلجە تدقیق ایدوب مصحَّح اولارق بزە اعادە ایتمش. ان شٓاء اللّٰه یاقیندە بو قرآنمز باصیلارق، بر هدیۀ نوریە اولارق عالم اسلامە نشر ایدیلەجكدر.

او كندینی بیلدیرمەین ذاتڭ شبهە ایتدیگی [ایكنجی مسئلە] پك چوق نورجیلرڭ حدّمدن یوز درجە زیادە حسن ظنلریلە بندن ظن ایتدیگی مدار افتخار صفتلری،

یوز دفعە اونلرڭ خاطرلرینی قیروب ردّ ایتمشم. فقط یگرمی سكز سنە سیاستجیلر، رسالۀ نورڭ صرف ایمانی و اخروی مسلگنی شیمدیكی مدنیلشمك فكرلرینە مساعد كورمدكلرندن، یگرمی سكز سنەدر حپسلرلە، محكمەلرلە، ترصّدلرلە، اصلسز اسنادلرلە نورجیلری ئوركوتمكلە و بنی چوروتمك جهتیلە رسالۀ نوری نشر ایتدیرمەمك ایچون امثالسز بر وضعیتە دوشمشدم.

یاریم امّی و اتهام آلتندە و نور شاكردلرینی بتون بتون قاچیرمامق ایچون بڭا قارشو مدحی، شخصمدن رد ایدوب "مدحڭز نورلرە عائد اولابیلیر. و كوردیگڭز مزیّتلر بنم دگل، رسالۀ نورڭدر. او دە قرآن حكیمڭ بر حقیقتنڭ بر تفسیریدر. و هر عصردە دینە و ایمانە تام خدمت ایدن مجدّدلر كلدكلری كبی، بو عجیب و قومیتەجیلك و شخص معنوئ ضلالتڭ تجاوزی زمانندە بر شخص معنوی مجدّد اولمق لازم كلیر. بو زمان اسكی زمانە بڭزەمز. شخص نە قدر دە خارقە اولسە، شخص معنوی یە قارشو مغلوب اولمق قابلدر. رسالۀ نورڭ او جهتدە بر نوع مجدّد اولمسی قویًا محتمل اولدیغندن، او صفتلر، حاشا بنم حدّم دگل، بلكە مكرّر یازدیغم كبی، بنم حیاتم رسالۀ نورە بر نوع چكردك اولابیلیر. قرآنڭ فیضیلە، جناب حقّڭ احسانیلە او چكردكدن رسالۀ نورڭ میوەدار، قیمتدار بر آغاچ حكمنە ایجاد الٰهی ایلە كچمسیدر. بن بر چكردكدم، چورودم كیتدم. بتون قیمت، قرآن حكیمڭ معناسی و حقیقتلی تفسیری اولان رسالۀ نورە عائددر."

كندینی بیلدیرمەین ذاتڭ [اوچنجی شبهەسی] بیوك جهادڭ و سبیل الرّشادڭ نشر ایتدیگی كبی، بن اعلان ایتمشمكە: دینە، ایمانە خدمتی و رسالۀ نوری، دگل دنیا سیاستنە، بلكە كمالات معنویەیە و مقامات عالیەیە آلت ایدەمدیگم كبی، هركسڭ خوش كوردیگی سعادت اخرویە و جهنّمدن قورتولمغە وسیلە ایتمەمك و یالڭز امر الٰهی و رضای الٰهیدن باشقە هیچ بر شیئە آلت ایتمەمك، بو زماندە نورڭ حقیقی قوّتی اولان سرّ اخلاص حقیقی یی محافظە ایتمەیە بنی مجبور ایتمشكە، صدّیق اكبرڭؓ دیدیگی اولان "مؤمنلر جهنّمە كیتمەمك ایچون اللّٰهدن ایسترم، بنم وجودم جهنّمدە بویوسونكە، اونلرڭ یرینە عذاب چكسین" دییە سویلەدیگی قدسی فداكارلغنڭ بر ذرّەسنی، بن دە كندیمە قزاندیرمق ایچون، "ایمان ایلە جهنّمدن برقاچ آدمڭ قورتولمەلری ایچون جهنّمە كیرمەیی قبول ایدرم" دیمشم.

ذاتًا عبادت، جنّتە كیرمك و جهنّمدن قورتولمق ایچون قیلینماز، بوزولور. بلكە رضای الٰهی و امر ربّانی ایچون یاپیلیر.

یینە حزب قرآنمزڭ بحثنە دونرز:

رسول اكرم علیە الصّلاة والسّلامڭ بیوك بر قوماندانی اولان حضرت اسامە رضی اللّٰه عنه، بر كون حمدە عائد، بر كون استغفارە عائد آیتلر، بر كون تسبیحە عائد، بر كون توكّلە، بر كون دە سلام لفظنە، بر كون دە توحید و 〚لَٓا اِلٰهَ اِلَّاهُو〛 یە عائد، بر كون دە (ربّ) كلمەسنە عائد بتون قرآندن متفرّق سورەلردن بر حزب قرآنی

چیقارمش، كندینە بر ورد أیلەمش. دیمك بویلە حزبلرە اذن پیغمبری علیە الصّلاة والسّلام وار.

هم بزم حزب قرآنمز ایمان حقیقتلرینە دائر آیتلری، خصوصًا سورەلر باشلرندەكی آیتلری جمع ایتدیگندن، باشلرندە []بِسْمِ اللّٰهِ الرَّحْمٰنِ الرَّحٖیمِ [] یازیلمش. بو حزب، تمام قرآنی اوقومغە بیوك بر شوق ویرر، نقصانیت ویرمز. هم یگرمی كوندە اوقوناجق آرزو ایدیلن بعض ایمانی آیتلر، بر ایكی كوندە بو حزبدە اوقوندیغندن، بر زمان بتون سورەلرڭ باشندە بر قسم آیتلریلە برابر، رسالۀ نورڭ اساسلری اولان بعض آیات ایمانیەیی كندیمە ورد أیلەمشدم. صوڭرە بر حزب صورتنە كیردی.

او مجهول ذات، عزّت علمیەیی فرعونجقلرە قارشو محافظەمی، بر انانیت توهّم ایتمش. نور طلبەلرینڭ حقّمدە حسن ظنلرینی بتون بتون قیرمدیغمی، بر بنلك تخیّل ایتمش. و ایمان حقیقتلرینە دائر بیاناتمە، طلبەلرڭ تام اعتماد و قناعتلرینی تأمین ایتمك فكریلە اهل ولایتڭ و بعض آیاتڭ قطعی قناعت ایتدیگم بیڭە یاقین امارات و اشارتلرینڭ اظهارینە مجبور اولدیغم ایچون بر قسمنی خاص قرداشلریمە بیان ایتمەمی، بر نوع خودفروشلق ظن ایتمش.

اوت، بو زماندە دینسزلك حسابنە، بنلكلری فرعونلاشمش درجەدە و ایمانە و رسالۀ نورە هجوملری زمانندە اونلرە قارشو تدافع وضعیّتمزدە تواضع و محویّت كوسترمك، بیوك بر جنایت و خیانتدر. و او تواضع، تذلّل حكمندە بر