و ملّتڭ استقبالنڭ فداكار كنچ اونیورسیتە طلبەلرینە و معارف دائرەسنە عرض ایدوب، بو مسئلەدە موفّقیتە مظهر اولان توفیق ایلرینڭ بو بیچارە سعیدە بدل، رسالۀ نورە حمایتكارانە صاحب چیقمەسنی رحمت الٰهیەدن نیاز ایدییورم.

اَلْبَاقٖی هُوَ الْبَاقٖی

چوق خستە، چوق اختیار، غریب، تجرید ایچندە

سعید النّورسی

[٦٨٥]

طوغو اونیورسیتەسی حقّندە، تحریفجی بر غزتەیە جوابدر.

مخالف بر پارتینڭ شدّتلی و تنقیدجی طرفندن بر منسوبی، یعنی اولوسڭ ١-٤-١٩٥٤ تاریخلی نسخەسندە یازیلان آتاترك اونیورسیتەسی حقّندەكی مقالەیە جواب حكمندە، او اونیورسیتەنڭ حقیقتنی بیان ایدییورز. شویلەكە:

شیمدی آتاترك اونیورسیتەسی نامی ویریلن بو دار الفنونڭ كشادینە، استادیمز سعید النّورسی ٥٠ سنەدنبری بیوك بر غیرتلە چالیشمشدر. استادیمز اتّحادجیلرە مخالف اولدیغی حالدە، اونلر و سلطان رشاد، بو دار الفنونڭ انشاسی ایچون ١٩ بیڭ آلتون تخصیص ایتمش، واندە استادیمز تمللرینی آتمشدی. فقط حرب عمومینڭ وقوعیلە كری قالمشدی. صوڭرە دوْرِ جمهوریتڭ ابتداسندە استادیمز سعید النّورسینڭ آنقرەدە مجلس مبعوثانە ایستنیلمسیلە استادیمز تكرار تشبّثە

كچمشدی. اورادە استادیمز، او زمانڭ ادارەسنە تام مخالف و سیاستی بتون بتون ترك ایتدیگی و بعض جهتلە دە مخالف اولدیغنی و "دنیاڭزە قاریشمایاجغم" دیدیگی و حتّی مصطف كمالە "نماز قیلمایان خائندر" دیدیگی و اونڭ تكلیف ایتدیگی بیوك ثروت، معاش، شرق واعظ عمومیلگی كبی بیوك تكلیفلرینی قبول ایتمدیگی حالدە، شرق دار الفنوننڭ تأسیسی ایچون ١٥٠ بیڭ بانقنوطڭ ٢٠٠ مبعوثدن ١٦٣ مبعوثڭ امضاسی و مصطف كمالڭ تصدیقیلە ویریلمەسنە قرار ویریلمشدی. دیمككە شرقڭ اڭ مهم مسئلەسی، او زمان او اونیورسیتەیدی. شیمدی یگرمی درجە داها زیادە احتیاج وار. نهایت یینە استادیمزڭ مادّی و معنوی غیرت و تشویقلری نتیجەسیلە یاپیلمەسنە بو حكومت اسلامیە زمانندە قرار ویریلدی.

بو شرق اونیورسیتەسنڭ او جهان شمول قیمت و اهمّیتنی، بر بحر عمّاندن بر قطرە تقدیم ایدر مثللو، ایكی اوچ نقطە اولارق عرض ایدرز:

[برنجیسی] بو دار الفنون هم ایران، هم عربستان، هم مصر و افغانستان، هم پاكستان و توركستان و آناطولینڭ مركزندە بر قلب حكمندەدر. و هم بر جامع الازهر، بر مدرسة الزّهرادر.

[ایكنجیسی] شیمدی عموم بشردە صلح عمومی ایچون، یعنی بشرڭ افساد ایدیلمەمسی ایچون چارەلر آرانییور، پَاقْتْلر قورولویور. و مادام بو حكومت اسلامیە،

مصالحات عمومیە و حكومتڭ سلامتی ایچون یوغوسلاویەیە، تا اسپانیەیە قدر اونلری اوخشایارق دوستلق قورمەیە چالیشییور. ایشتە بونلرڭ چارەء یكانەسنڭ بر دلیلی اولارق كوسترییورزكە، تأسیس ایدیلەجك شرق دار الفنوننڭ ایلك متشبّثنڭ بر درس كتابی اولان و علوم مثبتە و فنّیە ایلە علوم ایمانیەیی باریشدیران و بو اوتوز سنەدنبری بتون فیلسوفلرە میدان اوقویان و رسمی علمایە طوقوندیغی و اسكی حكومتلە رسمًا مبارزە ایتدیگی حالدە، بتون بونلر طرفندن تقدیر و تحسینە مظهر اولان و محكمەلردە برائت قزانان رسالۀ نورڭ بو وطن و ملّتە تأمین ایتدیگی آسایش و امنیتدركە، اسلام مملكتلرندە، خصوصًا فاسدە، مصر و سوریە و ایران كبی یرلردە وقوع بولان داخلی قاریشیقلقلرڭ بو وطندە كورولمەمسیدر.

ایشتە ناصلكە بو وطن و ملّتدە رسالۀ نور، امنیت و آسایشڭ اخلالنە سائر مملكتلردن داها زیادە اسباب بولونمسنە رغمًا آسایشی تأمین ایتمسی كوسترییوركە، او طوغو اونیورسیتەسنڭ تأسیسی، بشری مسالمت عمومیەیە مظهر قیلاجقدر. چونكە شیمدی تخریبات معنوی اولدیغی ایچون، اوڭا مقابل تعمیرجی معنوی بر آطوم بومبەسی لازمدر. ایشتە بو زماندە تخریباتڭ معنوی اولدیغنە و اوڭا قارشو مقابلەنڭ دە آنجق تعمیرجی معنوی آطوم بومبەسیلە ممكن اولابیلەجگنە قطعی بر دلیل اولارق اونیورسیتەنڭ مبدأ و چكردگی اولان رسالۀ نورڭ، بو اوتوز سنە ایچریسندە آوروپەدن كلن دهشتلی ضلالت و

فلسفە و دینسزلك هجوملرینە بر سد تشكیل ایتمەسیدر. او معنوی تخریباتە قارشو رسالۀ نور، تعمیرجی و معنوی بر آطوم بومبەسی اولمش.

[اوچنجیسی] اوت، شرق اونیورسیتەسی، بر مركز اولارق عالم اسلامی و تا بتون آسیەیی علاقەدار ایدەجك بر ماهیت و اهمّیتدە اولدیغندن، آلتمش میلیون دگل، آلتمش میلیار دە مصرف یاپیلسە الیقدر.

یڭی اولوس غزتەسی مخالف اولدیغی ایچون، بو مسئلەیی پردە ایدرك یڭی اقتدارڭ بعض بیوك مأمورلرندن بو مسئلەیە چالیشانلرە، بر نوع ارتجاع سوسنی ویرمك ایستەیور. حالبوكە بو مسئلە اڭ یوكسك ترقّی و صلح عمومینڭ مداریدر. بو مؤسّسە بو حكومت اسلامیەیە، بعض شعائر اسلامیەدن عربی اذان محمّدیؐ و دین درسلری كبی پك چوق قوّت ویرەجك. بلكە بو حكومتڭ استقبالندە تاریخلردە كمال تقدیر و تحسینلە یاد ایدیلمەسنە اڭ پارلاق بر وسیلە اولاجقدر.

بو مسئلەنڭ احیاسیلە حاصل اولان نور و فیض، دموقرات حكومتڭ اڭ بیوك و جهان دگر بر خدمتی اولارق ابدە قدر مثلی كورولمەمش بر پارلاقلقلە لمعان ایدەجكدر. و بین الملل بر اعتباری تأمین ایدەجكدر.

استادیمزڭ خستەلغی مناسبتیلە خدمتندە بولونان

نور طلبەلری

[٦٨٦]

محكمەمزڭ تأخیریلە، ایشلرڭ آنقرە محكمەسنە حوالە ایدیلمەسندە چوق خیر وار. شیمدی هم اسپارطە محكمەسی، هم واندە ملّا حمیدڭ و دیاربكردە محمد قیالرڭ كتابلرینڭ اعادەسی و آفیون، هپسی آنقرەیە باقییور. آنقرەدە اولاجق خیرلی بر نتیجە ایلە، ان شٓاء اللّٰه هر طرفدە بردن ایشلریمز حلّ ایدیلمش اولاجق. هم بویلە بر وقتدە نورلردەكی حقائق ایمانیەیە، خصوصًا آنقرەدە نظرلرڭ چوریلمەسی لازممش. ان شٓاء اللّٰه بو مسئلەمزڭ اورایە كوندریلمەسی، مهم بر انتباهە وسیلە اولاجق.

قرداشڭز زبیر

[٦٨٧]

استادڭ زیارتجیلرە دائر بر مكتوبی

عموم دوستلریمە، خصوصًا زیارتجیلرە دائر بر عذریمی بیان ایتمەیە مجبور اولدم. اكثر حیاتم انزوادە كچدیگی كبی، اوتوز قرق سنەدر ترصّد و تعرّضە معروض قالدیغمدن، ضرورتسز صحبت ایتمكدن چكینوب توحّش ایدییورم. هم اسكیدنبری مادّی و معنوی هدیەلر بڭا آغیر كلییوردی. هم شیمدی زیارتجیلر، دوستلر چوغالمش، هم معنوی مقابلە لازم كلمش. شیمدی مادّی بر لقمە هدیە، بنی خستە ایتدیگی كبی، معنوی بر هدیە اولان زیارت ایتمك، كوروشمك، خصوصًا باشقە یرلردن مصافحە ایچون زحمت ایدوب كلمك زیارتی دخی، اهمّیتلی بر

هدیەء معنویەدر. اوڭا مقابلە ایدەمییورم. هم دە اوجوز دگل، معنًا بهالیدر. بن كندیمی او حرمتە لایق كورمییورم. معنًا مقابلە دە ایدەمییورم. اونڭ ایچون شیمدیلك عینًا مادّی هدیە كبی بر احسان اولارق، بڭا معنوی هدیە كبی اولان صحبتدن ضرورت اولمادن منع ایدیلدم. بعضی بنی خستە ایدر. مادّی هدیەنڭ تام مقابلنی ویرمدیگم وقت بنی خستە ایتدیگی كبی. اونڭ ایچون خاطریڭز قیریلماسین، كوجنمەییڭز.

رسالۀ نوری اوقومق، اون دفعە بنملە كوروشمكدن داها كارلیدر. ذاتًا بنملە كوروشمك، آخرت، ایمان، قرآن حسابنەدر. دنیا ایلە علاقەمی كسدیگم ایچون، دنیا حسابنە كوروشمك معناسزدر. آخرت، ایمان، قرآن ایچون ایسە، رسالۀ نور داها بڭا احتیاج بیراقمامش. خصوصًا تاریخچەء حیاتدەكی مكتوبلر. حتّی خدمتمدەكی خاص قرداشلرملە دە ضرورت اولمادن كوروشەمییورم. یالڭز بعض رسالۀ نورڭ فتوحاتنە و نشریاتنە عائد بعض كیمسەلر ایچون كوروشمك ایستەسەم، او زمان كوروشمك جائز اولابیلیر و بڭا صیقینتی ویرمز. بو نقطەیی بیلمەین زیارتە كلنلرە خبر ویرییورمكە، برقاچ سنەدر جریدەلرلە اعلان ایتمشمكە، بنملە كوروشمك ایستەینلری، خصوصًا اوزاق یردن كلەرك كوروشمدن كیدنلری، خصوصی دعالریمە داخل ایدییورم. هر صباح دە دعا ایدییورم. اونڭ ایچون دە كوجنمەسینلر.

سعید النّورسی

[٦٨٨]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا

چوق محترم قرداشمز صالح،

استادیمز سڭا و ایكی دیندار و حقیقی ملّت وكیللرینە پك چوق سلام و دعا ایدر، سڭا و اونلرە بیڭ بارك اللّٰه دیر.

استادیمز بویورویوركە:

بن چوق زمان اوّل بكلەیوردمكە، اورفە طرفندن نورلرە قارشو قوّتلی اللر صاحب چیقسین. چونكە اوراسی هم آناطولینڭ، هم عربستانڭ، هم كردستانڭ بر نوع مركزی حكمندەدر. نورلر اورادە یرلشسە، او اوچ مملكتدە انتشارینە وسیلە اولور. جناب حقّە حدسز شكر ایدییورمكە، سیّد صالح كبی كنچلگڭ بر قهرمانی و او حوالینڭ چوق قیمتدار و حمایتكار و دیندار ایكی ملّت وكیلی نورلرە صاحب چیقمەیە باشلادیلر. بن دە كندی پارەملە آلدیغم و زهر خستەلغنڭ فضلە راحتسزلغی ایچندە تصحیح ایتدیگم بڭا مخصوص بر قسم مجموعەلریمی اونلرە كوندرییورم. چوق یرلردن و چوق مهم ذاتلر طرفندن ایستەدكلری حالدە، بن اورفەیی هر یرە ترجیح ایدییورم. اورفە مدرسۀ نوریەسنە ویرییورم.

ان شٓاء اللّٰه بر قسم داها اونلرە كوندرەجگم. سیّد صالح و حمایتكار ملّت وكیللری، اورادە ان شٓاء اللّٰه قرآن و ایمانە تام خدمت ایدەجك. و اورایی اسپارطەدەكی مدرسة الزّهرا و مصردەكی جامع الازهرڭ كوچك بر نمونەسی حالنە كتیرمگە وسیلە اولمغە و شام و بغداددەكی مدرسەء اسلامیەنڭ بر نمونەسنی آچمەیە یول آچمەلرینی رحمت الٰهیەدن امید ایدییورز.

هم مادام رسالۀ نورڭ مسلگی خلّتدر. و اورفە ایسە، ابراهیم خلیل اللّٰهڭؑ بر منزلیدر. ان شٓاء اللّٰه بو مسلكِ خلّتِ ابراهیمیە اورادە پارلایاجقدر.

هم احتمال قویدركە، بو دهشتلی سملی خستەلقدن قورتولسەم، كلەجك قیشدە اورفەیە كیتمەیی جدًّا آرزو ایدییورم.

بتون اورفە خلقنە، چولوق و چوجغنە و مزاردە یاتانلرینە هر صباح دعا ایدییورم. و بتون اورفەلیلرە سلام ایدییورم. اورفە طاشیلە، طوپراغیلە مباركدر. بن چوق خستەیم. اونلر دە بڭا دعا ایتسینلر.

اَلْبَاقٖی هُوَ الْبَاقٖی

سعید النّورسی

استادیمزڭ سوزی بیتدی. بز دە تكرار سلام و عرض حرمتلر ایدرز. رسالۀ نور خدمتندە بولونان ضیا و محمد

[٦٨٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

عالم اسلامدە لیلۀ قدر تلقّی ایدیلن بو رمضان شریفڭ یگرمی یدنجی كیجەسندە، بر نوع تسمّم ایلە شدّتلی بر معدە خستەلغی ایچندە، سیڭیرلریمی و وجدان و قلبمی استیلا ایدر كبی بر دیگر دهشتلی خستەلق حسّ ایتدم. بو مادّی و معنوی ایكی دهشتلی خستەلق ایچریسندە، شفقت حسّی ایلە بتون ذی حیاتلرڭ ألملری خاطرە كلدی. شخصی خستەلغمدن داها زیادە الیم بر حالت روحیەیی حسّ ایتدم. بونڭلە برابر سكسان كسور سنەیە واران عمریمڭ صوڭندە، سكسان سنە معنوی بر عبادتی قزاندیران اڭ صوڭ لیلۀ قدرە لایق چالیشامایاجغم دییە، سابق ایكی دهشتلی خستەلقدن داها شدّتلی حزین بر مأیوسیّت ایچندە اعصابە كلن و نفس امّارەنڭ وظیفەسنی كورن بر الیم حسّ بنی ازدیگی عین زماندە، آیت حسبیەنڭ بر سرّی امدادیمە یتیشدی. بو اوچ خستەلغی ازالە ایدوب جناب حقّە حدسز شكر اولسونكە، خلاف مأمول بر طرزدە طایاندم. بو اوچ خستەلغمە دە بویلە اوچ مرهم سورولدی:

مادّی خستەلغڭ -خستەلر رسالەسندە اثبات ایدیلدیگی كبی- بر ساعت خستەلق، صابر و متوكّل انسانلرە، هیچ اولمازسە اون ساعت عبادت و لیلۀ قدردە ایسە

داها زیادە عبادت حكمنە كچدیگی كبی، بنم دە بو لیلۀ قدردەكی خستەلغم، اقتدارسزلغملە یاپامدیغم لیلۀ قدردەكی خدمتڭ یرینە كچمەسی ایلە، تام شفا ویریجی بر مرهم اولدی. و بتون ذی حیاتڭ خستەلق و ألملرندن شفقت سرّی ایلە بڭا كلن تألّم مرضنی، بردن رحیمیت الٰهیەنڭ تجلّیسی ایلە، یعنی مخلوقلری یاراتانڭ شفقت و رحیمیتی و رحمتی تام كافی اولمەسندن، اونلرڭ ألملرینی، اونلر ایچون بر نوع لذّتە ویا مكافاتە چویردیگندن، او رحمت الٰهیەدن داها ایلری شفقتی سورمك معناسز و حقسز اولدیغندن و شفقتدن كلن ألمی، بر معنوی سرورە و لذّتە چویردی. یالڭز مرهم دگل، بلكە شفا دە ویردی.

و اڭ صوڭ عمرمدە اڭ زیادە قیمتدار معنوی بر خزینەیی غائب ایتمكدەكی معنوی ألمە قارشو، نورڭ خاص شاكردلرینڭ هر بریسی، شركت معنویە سرّی ایلە عموم نامنە دخی دعا ایلە و عمل صالح ایلە چالیشدقلرندن، هم الحجّة الزّهرادە، هم نور آناختارندە ایضاح ایدیلن، تشهّددە و فاتحەدە بتون موجودات و ذی حیات جماعتنڭ دعالرینە و توحیددەكی دعوالرینە اشتراك صورتیلە، خصوصًا طوپراق، هوا، صو و نور عنصرلری برر دیل اولمەسیلە، طوپراقدن چیقان بتون حیات هدیەلری.. و صودن مباركات و تبریكات.. و هوادن شكر و عبادتڭ تمثّللری.. و نور عنصرندن مادّی و معنوی طیّباتلر، كوزللكلر طرزندە، تشهّددە و فاتحەدە كائناتدەكی بتون نعمتلردن كلن شكرلر و حمدلر و بتون مخلوقاتڭ خصوصًا ذی حیاتلرڭ كلّی عبادتلری و بتون استعانەلری و طوغری یولدە كیدن

بتون اهل حقیقتە و اهل ایمانڭ یولندن كیدنلرە معنوی رفاقت ایتمكلە، اونلرڭ دعالرینە و دعوالرینە تصدیق صورتندە آمینلرلە اشتراك ایدرك، آمین دیمكلە حصّەدار اولمەنڭ كلّی سرّی او كیجە امدادیمە كلدی. غایت خستە، ضعیف، مأیوس بر حالدە، جزئی بر خدمت ایدەمەمكدەكی معنوی الیم خستەلغمە اویلە بر تریاق اولدیكە، بن حقیقتًا اڭ صاغلام حاللرمدە و اڭ كنچ زمانلرمدە، اڭ ذوقلی و لذّتلی اورادمدە بولامدیغم بر معنوی سروری حسّ ایتدم. و حدسز شكر ایدوب، او دهشتلی خستەلغمە راضی اولدم. (اَلْحَمْدُ لِلّٰهِ بِعَدَدِ عَاشِرَاتِ دَقَٓائِقِ شَهْرِ رَمَضَانَ فٖی كُلِّ زَمَانٍ) دیدم.

اَلْبَاقٖی هُوَ الْبَاقٖی

قرداشڭز سعید النّورسی

[٦٩٠]

[بِاسْمِهٖ سُبْحَانَهُ]

استادیمز دیر:

"بنملە كوروشمك ایستەین عزیز قرداشلریمە بیان ایدییورمكە: انسانلرلە كوروشمەیە ضرورت اولمادقجە تحمّلم قالمدیغندن، هم شیمدی تسمّمدن، ضعفیّتدن، اختیارلقدن و خستە بولونمش اولمقدن طولایی فضلە قونوشامییورم. بوڭا مقابل، قطعیًّا سزە خبر ویرییورمكە، رسالۀ نورڭ هر بر كتابی بر سعیددر. سز هانكی كتابە باقسەڭز، بنملە قارشو قارشویە كوروشمكدن اون دفعە

زیادە هم فائدەلنیر، هم حقیقی بر صورتدە بنملە كوروشمش اولورسڭز. بن شوڭا قرار ویرمشدمكە، اللّٰه ایچون بنملە كوروشمك ایستەینلری، كوروشمدكلرینە بدل، هر صباح اوقودقلریمە، دعالریمە داخل ایدییورم و ایتمكدە دوام ایدەجگم. "

شیمدی بر ایكی آیدر استادیمز بر خدمتكاریلە دخی قونوشامییور. قونوشدیغی وقت بر حرارت باشلایور. بونڭ حكمتنی بر اخطارە بناءً سویلەدیكە: "رسالۀ نور بڭا هیچ احتیاج بیراقمییور. قونوشمەیە لزوم قالمدی. هم بن عاجز شخصملە بیڭلر دوستلرمدن یگرمی اوتوز دوستلە قونوشابیلیرم. یگرمی آدمڭ خاطری ایچون بیڭلر آدمڭ خاطرینی رنجیدە ایتمەمك ایچون قونوشمقدن منع ایدیلدم احتمالی قویدر. خصوصی كوروشمدیگم ایچون معذور كورسونلر." حتّی بایرامدە مصافحە ایتمك و اوڭا باقمەیە تحمّل ایدەمییور. اونڭ ایچون خاطرلری قیریلماسین. [حاشیە]

[٦٩١]

(درت سنە اوّل استادیمز، شدّتلی خستەلغی یوزندن بنی آنقرەدە رسالۀ نورڭ محكمە ایلە علاقەدار ایشلرینی تعقیب ایچون توكیل ایتدیگی زمان، بعض مبعوثلرە كوندردیگمز ایلیشیك مكتوبمزی یڭیدن سزلرە و محترم مبعوثلرڭ نظر عرفانلرینە تقدیم ایدییورز. بوڭا دە سبب، عین مسئلەنڭ دوام ایتمسی و بالخاصّە صوڭ آیلردە شرق ولایتلرندە قورولمسی ایچون تشبّثە كچیلن یڭی اونیورسیتەدر.)

رسالۀ نورڭ بو اوتوز سنەلك زماندە، داخلدە و خارجدە فوق العادە انتشاریلە هر طرفدە حسن تأثیری كوسترمسی و شرق ولایتلرندە اللی بش سنەدنبری بیوك بر دار الفنون قورولمەسنە چالیشیلمەسی، بربرینی تعقیب ایدن و بربرینی تماملایان، بو زماندە عالم اسلامی شدّتلی علاقەدار ایدن ایكی مهم مسئلەدر. بو ایكی نتیجۀ عظیمە، هم بو ملّتی، خصوصًا شرق ولایتلرینی، هم درت یوز میلیون اسلام ملّتلرینی، هم صلح عمومی یە محتاج خریستیانلق دنیاسنی علاقەدار ایدن و تأثیرینی كوسترن مدار افتخار ایكی اهمّیتلی حادثەدر. و اسلام دیننڭ و قرآن حقیقتلرینڭ كلّی و عمومی ایكی مهم ناشری و اعلانجیسیدر.

استادیمز اللی بش سنەدنبری، اعظمی غیرتلە و متعدّد وسیلەلرلە شرقی آناطولیدە جامع الازهرە موافق مدرسة الزّهرا نامیلە بر اسلام اونیورسیتەسنڭ قورولمسی ایچون چالیشمش و بونڭ قطعی لزومنی دائما ایلری سورمشدر. استادیمزڭ

رئیس جمهورە و باش وكیلە خطابًا یازدیغی و اونلری بو مسئلەدە تبریك ایدن یازیسندە دینیلدیگی كبی، شرق دار الفنونی، عالم اسلامڭ بر نوع مركزندە اولارق بین الاسلام مدار افتخار بر مقام قازاناجقدر. او ولایتلردە مدفون چوق عزیز و مبارك بیڭلرلە علما و عارفین، شهدا و محقّقین اجدادلریڭزڭ ماضیدەكی پك قیمتلی و قدسی خدمت دینیەلری و معنوی، باقی خصلتلری، بو دار الفنونلە دخی تجسّم ایدەجك و وظیفەء ایمانیەلرینی داها كنیش بر ساحەدە یاپاجقلردر.

شرق اونیورسیتەسنڭ پروغرامی و اسّ الاساس درسی، قرآن حكیمڭ حقائق ایمانیەسنی تفسیر ایدن و بتون مسئلەلرینی فنون عقلیە و دلائل منطقیە و مثبتە ایلە تثبیت ایتدیرن معقولاتلە درس ویرن رسالۀ نوردركە، یڭی عصرڭ اونیورسیتەلرندە و مكتبلرندە اوقوتولمەیە شایاندر.

رسالۀ نور، شرقی آناطولیدە یر یر قورولمش اولان و یوز ییللردنبری او حوالیدە معنوی آب حیات منبعلری وظیفەسنی كورمش بولونان مدرسەلرینڭ و استادلرینڭ بر طلبەسی واسطەسیلە ظهور ایتمشدركە، او محترم استادلر، بو صوڭ منوّر میوەلریلە، یڭیدن وظیفە باشنە كچوب وظیفەء تنویریەلرینی و خدمت قرآنیەلرینی بو صورتلە جهان شمول بر وسعتە انقلاب ایتدیرمەلرینی بتون روحمزلە امید ایدوب رحمت الٰهیەدن تمنّی و نیاز ایدییورز. بو دعامزە دە، زمان و زمینڭ شرائط حیاتیەسی و مسالمت عمومیەنڭ الزمیتی دە آمین دییور و دییەجكدر.