[٦١٢]

هیئت صحّیەیە

اون بش سنە اوّل رهبرڭ باشندە یازیلدیغی كبی، بعض كنچلر كندیلرینڭ حیات دنیویە و اخرویەسنی محافظە ایچون یانمە كلدیلر. بن دە اونلرە للّٰه ایچون او رهبر درسنی ویردم.

او رسالە، بر ایكی حاشیە مستثنا، هم اسپارطە حكومتی، هم دڭزلی محكمەسندە، هم آنقرەنڭ آغیر جزا محكمەسنڭ ایكی سنە اللرندە قالمسی نتیجەسندە برائت قزانمەسی و تمامًا رسالۀ نور كلّیاتی، رهبر دە ایچندە اولدیغی حالدە اعادە ایدیلمسی، صاحبلرینە ویریلمسی، هم اسپارطە و اسكیشهردە و استانبولدە اوچ دفعە تكثیر ایدیلمسی و بر نسخەسی آنقرە امنیت مدیرینڭ النە كچمەسیلە، (رهبرڭ باشندە یازیلدیغی كبی) بر تك كلمەسنە ایلیشمسیلە، آخرندە كلن جملەیی اوقوینجە حقیقتی آڭلامسی و انتشارینە مانع اولمامسی، هم بیڭلرجە نسخە انتشار ایتدیگی حالدە هیچ بر یردە بر ضرر، بر اعتراض كورولمەمسی، حتّی مرسینڭ طرسوس قضاسندە برقاچ نور كتابلرینی مصادرە ایدرك، كنچلك رهبری دە ایچندە اولدیغی حالدە آنقرەیە كوندریلوب، تدقیق ایتدیریلدكدن صوڭرە، ولایتڭ امریلە تمامًا سربستدر دییە، رسمی وثیقە ویرمەلری و استانبولدە طبع ایدیلدیگی زماندە قانونًا بش آلتی مقامە كوندریلدیگی و اللرندە بش آلتی آی قالدیغی حالدە ایلیشمەمەلری، رهبرڭ اهمّیتنی و قانونًا دخی سربست اولدیغنی اثبات ایدییور.

صوڭرە بیڭدن فضلە كنچلر آنقرە و سائر ولایتلرڭ مكتبلرندە اوندن وطن، ملّت، اخلاق جهتندە استفادە ایتدكلری و هیچ كیمسە ضرر كورمدیگی حالدە، بردن هیچ بر مدار مسئولیت اولمایان بر ایكی كلمەیە یاڭلیش معنا ویرمك، مثلا "كنچلك رهبری" نامنی ویرمكلە بر صوچ موضوعی یاپمشلر.

بری دە، مؤلّفی طبع ایتمەمش، كندی بیچارە خستە یاتاغندە ایكن، كنچلر طبع ایتدكلری حالدە، شخصی نفوذ تأمینی ایچون یازیلمش دییە، صوچ موضوعی یاپوب طبع ایدنی دگل دە، مؤلّفنی آغیر جزایە ویرمك، هم دە زورلە اورایە جلب ایتمك، حالبوكە اون بش سنە اوّل یازیلمش و عفو قانونی و مرور زمانی، هم برائتی كورمش.. اویلە ایسە بتون بتون قانونسز اولارق بر غرضە بناءً مؤلّفنە بو قدر مصرّانە ایلیشییورلر.

بن دە دییورمكە: اون وجهلە قانونسز، بو قدر مصرّانە، خستەلغم زمانندە اقتدارم خارجی بنی محكمەیە ویرمەنڭ سببی، رهبرڭ وطنە، ملّتە، آسایشە پك بیوك فائدەسی اولدیغی ایچون، آنارشیلك و دینسزلك حسابنە ایلیشییورلر دییە احتمال ویرییورم.

شیمدی بو قانون نامنە، غرضكارانە، قانونسزلق حسابنە بنی جبرًا، زورلە استانبولە محكمەیە سوق ایتمكدە، بنم چوق اختیارلق ضعفیّتم و زهرلی، شدّتلی خستەلغم طبًّا، فنًّا معذرت قطعی اولدیغی كبی، درت دفعە او نقطەدن راپور آلوب، اونلرە كوندردیگمز حالدە، یینە اصرار ایلە بنی زورلامقدە

اولدقلرندن، پك شدّتلی روحمە طوقونمش. داها بنم محكمە و ادارە حضورندە قونوشمق اقتدارم خارجندەدر. قونوشسەم دە وطن، ملّت و آسایشە ضرر ویرمك فكریلە چالیشان و بنی خلاف قانون محاكمە ایدنلرڭ یوزینە اورمەیە مجبور اولاجغم. داها بو قدر ظلمە تحمّل ایدەمەیەجگم. بو ایسە اهمّیتلی باشقە بر نوع خستەلقدر. هم وطنە بو معنوی خستەلق، ضرر ویرمك احتمالی وار.

شیمدی هیئت صحّیەدن رجام، بنی طانییانلر و بنملە یاقیندن علاقەدار اولانلر و خدمت ایدنلر بیلییورلركە، كیزلی دوشمانلرم متعدّد دفعەدر بنی زهرلەیورلر. تغدّی ایدەمییورم. حتّی خدمتجیملە بش دقیقەدن فضلە قونوشامییورم. هم باشمدە شدّتلی و دواملی نزلە و بر كوزم او نزلەدن آغرییور و آقییور. مزمن قولونج و شدّتلی صانجی ایلە خستەیم.

هم یگرمی سكز سنە غربتدە قالدیغمدن و باشقەلرینڭ معاونتنی قبول ایتمدیگمدن، پك ضرورتدە یاشادیغم ایچون ضعفیت فضلەدر. حتّی زورلە مردیوندن چیقییورم. ضرورت قطعیە اولمازسە بش دقیقە قونوشامییورم، یورولویورم. بن سابق محكمەلردە هم رسالۀ نور، هم رسالۀ نور طلبەلری ایچون تحمّل ایدییوردم. و تام حقیقتنی اظهار ایتمییوردم. بر درجە ظلملرینە تحمّل ایدوب حقسزلقلرینی یوزلرینە اورمییوردم. تا معصوملرە، آسایشە ضرر كلمەسین دییە صبر و هر نوع ظلم و اشكنجەلرە تحمّل ایدییوردم.

شیمدی ایسە رسالۀ نورە عالم اسلام صاحب چیقدی. نور طلبەلری دە بنم مسامحەمە و دوشمانلریمە ایلیشمەمكلگمە و ظلملرینە سكوت ایتمەمە احتیاجلری قالمدی. اونڭ ایچون بنم دە طماریمە پك شدّتلی طوقونولدیغندە، ارادە و اختیارم خارجندە، قارشومە چیقان كیزلی دوشمانلریمڭ بڭا ضربەلرینە وسیلە اولان، بنی جزالاندیرمەیە چالیشانلرە حقیقتی چیپلاق اولارق بویلە سویلەیەجگم. سكوت...! شیمدی اظهار ایدیلمەیەجك.

مادام حقیقت بویلەدر، هیئت صحّیە، بنم هم مادّی، هم معنوی، هم سیڭیر، هم قلب، هم نزلەلی باش خستەلقلرم، هم قولونج و صانجی و محكمەلردە قونوشمە اقتدارسزلغی و هم مادام رسمًا وكیللرم اورادەدرلر، هم طبع ایدنلر دە اورادەدرلر.. "استنابە صورتیلە افادەمڭ آلینمەسی ایچون فنّی و تهلكەلی خستەلغی وار" شكلندە راپور ویریلمەسنی رجا ایدرم. [حاشیە]

امرطاغندە

سعید النّورسی

(٦١٣)

امرطاغ صایین جمهوریت صاوجیلغنە دیلك:

اوّلجە طبع و نشر ایدیلن و نشرندە هیچ بر محذور بولونمایوب، رسمی مقاملر و صاوجیلق طرفندن نشرینە مساعدە ایدیلن [كنچلك رهبری] نامندەكی اثریمڭ شخصِ آخَرْ طرفندن نشر ایدیلدیگی و اساسًا بو اثرلرم حقّندە محاكمە جریان ایدوب، حقّمدە برائت قراری ویریلدیگی و بر هیئت علمیە طرفندن دخی بو اثرلر تدقیق ایدیلەرك نشرلرندە هیچ بر محذور بولونمدیغنە دائر راپور ویریلدیگی حالدە، ذُهُولْ اثری اولارق و بیلیر كیشی هیئتنڭ مادّی و فكری خطاسی طولاییسیلە حقّمدە آچیلمش اولان قامو دعواسنڭ بالنّتیجە استانبول

آغیر جزا محكمەسندە [٩٥١/١٣٧] نومرە ایلە كورولمكدە اولوب، خستەلغم طولاییسیلە محكمەدە اثبات وجود ایتمدیگمدن، احضارًا جلبمە قرار ویریلدیگی و خستەلقلە برابر استانبولە كیتمەم امكان خارجی اولمقلە برابر، بو تكلیف، عدالتلە قابل تألیف بولونمدیغندن، حادثەنڭ استانبول آغیر جزا محكمەسنڭ حضورندە تظاهر ایدەبیلمەسی ایچون صلاحیّتدار دوقتور طرفندن معاینەمڭ اجراسیلە ویریلەجك راپورە كورە معاملە یاپیلمەسنی و شاید استانبولە سوقم امكان خارجی ایسە، محكمەنڭ قرارینە حرمتًا، اسكیشهر آغیر جزا محكمەسندە افادەمڭ آلینمەسی و استجوابڭ یاپیلمەسی ایچون لازم كلن قانونی یوللرە توسّل بویورولمسنی دیلرم.

امرطاغندە چیللی محلّەسندە مقیم

سعید النّورسی

[٦١٤]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] جناب حقّە یوز بیڭ شكر ایدییورزكە، اللی بش سنە بر غایۀ خیالم و حیاتمڭ بر نتیجەسی اولان مدرسة الزّهرانڭ معنوی حقیقتنی، سز مدرسة الزّهرا اركانلری تمامیلە كوسترییورسڭز.

[ثانیًا] شدّتلی خستەلق و سائر سببلرڭ تأثیریلە، بن نورجی قرداشلرملە قونوشامدیغمدن و او مصاحبەدن محروم قالدیغمدن، بنم بدلمە سزلر و رسالۀ نورڭ قرآن مدرسەسندە یڭی سعیدە ویردیگی درس و اسكی سعیدڭ دە خطبۀ شامیە و ذیللری كبی حیات اجتماعیە مدرسەسندە آلدیغی درسلری و قونوشمەلری، بو بیچارە قرداشڭز بدلنە، مشتاق اولدیغم قرداشلرملە بنم یرمدە قونوشمەلرینی توكیل ایدییورم.

[ثالثًا] بر كوچك مدرسۀ نوریەیی كندی خانەسندە تأسیس ایدوب، قهرمان طاهری كبی بر خاص، خالص نور ناشرینی دائرۀ نوریەیە ویرن طاهرینڭ مرحوم پدرینڭ وفاتنی، هم اونڭ اقرباسنی، هم اسپارطەیی، هم نور دائرەسنی تعزیە ایدییورم. جناب حق نورڭ حرفلری عددنجە روحنە رحمت أیلەسین. آمین.

[رابعًا] اینەبولی، زهرة النّوردن اوچ یوزی بنم حسابمە تخصیص ایتمش. بن دە دیدم: یوز اللی اسپارطەیە، یوز اللی بڭا كلسین. بڭا كلمش. سزە كلن ایسە، ایلریدە بڭا ویرەجگڭز مكتوبات مجموعەسنە مقابل و سزە بورجم وار ایسە حساب ایدرسڭز.

[خامسًا] عراق طرفندە، خصوصًا بغداددەكی استاد اعظمڭ تربەدارینە و قرداشلریمە سلاممی تبلیغ و حیاتم مساعدە ایدرسە، بتون روح و جانملە او حوالی یە كیتمك اشتیاقمی بیلدیررسڭز. [حاشیە]

اَلْبَاقٖی هُوَ الْبَاقٖی

خستە قرداشڭز سعید النّورسی

(٦١٥)

[بِاسْمِهٖ سُبْحَانَهُ]

زیارت ایتمك و كوروشمك ایستەینلر، بو مكتوبی كورسون، كوروشمدیگمدن كوجنمەسین.

كوروشمدیگمڭ آلتی سببی وار:

[برنجیسی] محكمەلرە كیتمەمك ایچون دوقتورلر راپور ویرمشلركە، بونڭ (سعیدڭ) انسانلرلە كوروشمەیە تحمّلی یوقدر. راپوری تكذیب ایتمەمك ایچون شیمدیلك صبر ایتمك لازم.

[ایكنجیسی] یگرمی یدی سنەدر، اهل سیاست بنی تضییق ایدییور. بر بهانەلری دە "انسانلری باشنە طوپلایور" دییورلر. بن دە بو یڭی، مبارك شهرە كلدم. رسمی آدملری او اسكی اصلسز وهمە، بهانەیە دوشورتمەمك ایچون شیمدیلك ضرورتسز كوروشمییورم.

[اوچنجیسی] یگرمی سكز سنەدر، متمادیًا ترصّد و تجسّس ایلە خلقلری بندن

ئوركوتمك، حتّی حپسلردە تجرید مطلقدە بیراقدقلری ایچون انسانلرلە كوروشمكدن بڭا صیقینتی كلدی.

[دردنجیسی] اوتوز بش سنەدر (اَعُوذُ بِاللّٰهِ مِنَ الشَّیْطَانِ وَالسِّیَاسَةِ) دییە حیات اجتماعیەیە، خصوصًا حیات سیاسیەیە ممكن اولدیغی قدر قاریشمامق و باقمامق بر دستور حیاتم اولدیغندن، انسانلرلە دنیوی صحبتلردن صیقیلییورم. یالڭز ایمانە و حقیقتە عائد بر صحبت علمیە ایدەبیلیردم. یوقسە بڭا صیقینتی ویرییور.

[بشنجیسی] بنملە كوروشنلر، بنم حدّمدن زیادە حسن ظن ایتسە بڭا آغیر كلییور. جناب حقّە شكر، كندیمی بگنمییورم. بنم شخصمی بگننلری دە بگنمییورم. چونكە، بنی یا تصنّعە، یا ریایە سوق ایتمك ایچون، قوّتمدن فضلە معنوی بر یوك یوكلەیورلر.

[آلتنجیسی] متعدّد دفعە زهرلندیگم ایچون، خصوصًا بو صوڭ زهر پك زیادە سیڭیرلریمە، اعصابمە تأثیر ایتمش. آز بر شی ایلە متأثّر اولویورم. غایت اخلاص، صمیمیت، اخروی بر نیّتلە یاخود ضروری بر خدمت ایچون اولمازسە، روحم استثقال ایدییور. اونڭ ایچون، بنملە كوروشمك ایستەین قرداشلرم صیقیلماسینلر، كوجنمەسینلر. شیمدیلك كوروشمدیگمە بدل، رسالۀ نورلە كوروشسونلر. بنم خاص طلبەلرمكە -اونلرە برر كنچ سعید نامنی ویرمشم- بنم بدلمە اونلرلە كوروشسونلر.

سعید النّورسی

[٦١٦]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، وفادار، فداكار قرداشلرم،

[اوّلًا] بتون روح و جانملە فوق العادە نورانی خدمت ایمانیەڭزی تبریك ایدرم.

[ثانیًا] آنقرەدە دیندار احرارلرڭ قونغرەسندە، بنی دیانت ریاستی دائرەسندە بر وظیفە ایلە توظیف ایتمەیی حرارتلە ایستەمەلرینە و مدرسة الزّهرانڭ نور طلبەلرینی، بو مسئلەدە بڭا قبول ایتدیرمكدە واسطە یاپمەلرینە قارشو دیرم:

او طوپلانتیدە بو تكلیفی یاپان مبعوثلرە و دیندار آرقداشلرینە چوق تشكّر و چوق سلام و موفّقیتلرینە چوق دعا ایدرز. فقط بن زیادە ضعیف و شدّتلی خستە و اختیار و قبر قاپوسندە و پریشان اولدیغمدن، او قدسی وظیفەیی یاپمغە اقتدارم اولمامسندن، بنم یرمدە رسالۀ نورڭ شخص معنویسی و بنم بدلمە نور شاكردلرینڭ خاص و خالص و اسلامیتڭ حقیقی فداكارلرینڭ شخصیت معنویەسی، او قدسی وظیفەیی شیمدی یە قدر غیر رسمی پردە آلتندە یاپدقلری كبی، ان شٓاء اللّٰه رسمی بر صورتدە دخی یاپابیلەجكلر. اونلرە حوالە ایدرز. [حاشیە]

اَلْبَاقٖی هُوَ الْبَاقٖی دعاڭزە محتاج قرداشڭز سعید النّورسی

[٦١٧]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] بتون روح و جانملە خدمت قرآنیە و ایمانیەڭزی تبریك ایدییورم. بو مكتوبدەكی بر اینجە مسئلەیی مشورت صورتیلە رأیڭزی آلمق ایچون كوندردك. مناسبمیدر؟ دگلسە اصلاح ایدرسڭز.

[ثانیًا] رسالۀ نوردە اثبات ایدیلمشكە، انسانلرڭ عین ظلملری ایچندە قدر الٰهی عدالت ایدر. یعنی، انسانلر بعض سببلە حقسز ظلم ایدر، بریسنی حپسە آتار. فقط قدر الٰهی، عین حپسدە باشقە سببە بناءً عدالت ایدییوركە، حقیقی بر صوچە بناءً او حپسلە اونی محكوم ایدییور. ایشتە شیمدی بو حقیقتی كوسترن، باشمە كلن عجیب بر مثالی شودر: یگرمی سكز سنەدر متعدّد ولایتلردە و محكمەلردە بنم مسئولیتمە و محكومیتمە و محبوسیتم كبی ظالمانە اشكنجە و جزالرینە كوستردكلری سبب و هیچ بر امارەسنی بولمدقلری موهوم بر صوچم شودر. دییورلركە:

"سعید، دینی سیاستە آلت یاپمق ایستر و یاپییور." حالبوكە بو دعوالرینە اوتوز سنەلك مصیبتلی یڭی حیاتمدە و اوتوز بیوك مجموعەلرمدە بو صوچە مثبت بر دلیل بولامدیلر. حالبوكە بویلە مسئلەلردە بر محكمە مادام بولمدی و مسئول ایدەمدی.. باشقە محكمەلرڭ مصرّانە عین مسئلەیی اساس طوتمەلری،

بتون بتون قانونە و عقلە و عادتە مخالف بر حالتدر. بلكە سیاستی دینسزلگە آلت ایدنلر قسمی، كندیلرینە بر پردە اولارق بو اتهامی بزلرە ایدییورلر. بونڭلە برابر دینە خدمت اعتباریلە تعلّق ایدن اسكی آلتمش سنەلك حیات علمیەم، قطعی بر حجّت و یقینی بر دلیلدركە، بتون حیاتمدە تماس ایتدیگم سیاستی و دنیایی و بتون اجتماعی جریانلری، دینە خدمتكار و آلت و تابع یاپمق دستوریلە حركت ایتمشم. محكمەلردە دە هم دعوا، هم اثبات ایتمشمكە، دگل دینی سیاستە آلت یاپمق، بلكە بر تك حقیقت ایمانیەیی دنیا سلطنتنە دگیشدیرمدیگمی قطعی دلیللرلە اثبات ایتدیگم حالدە، بویلە یگرمی وجهلە حقیقتە مخالف و دیوانەجەسنە، بیوك مقاملری اشغال ایدن بر قسم عدلیە مأمورلری و سیاسی آدملر، بو عجیب خرافە كبی مسئلەیی حقیقت ظن ایدوب یگرمی سكز سنە بڭا ظلم ایتدكلرینڭ حقیقی سببنی بوكونلردە بیلدم. سببی بوكە:

بو انانیتلی زماندەكی خدمت ایمانیەدە اڭ بیوك تهلكەم و معنوی اڭ بیوك صوچم و جنایتم، بو زماندە خدمت قرآنیەمی شخصمە عائد مادّی و معنوی ترقّیاتمە و كمالاتمە آلت یاپمق ایمش. جناب حقّە حدسز شكر ایدییورمكە، بو اوزون زمانلردە، اختیارم خارجندە خدمت ایمانیەمی، دگل مادّی و معنوی ترقّیاتمە و كمالاتمە و عذابدن و جهنّمدن قورتولمەمە و حتّی سعادت ابدیەمە وسیلە یاپمەمە، بلكە هیچ بر مقصدە قطعیًّا آلت ایتمەمكلگمە غایت قوّتلی، معنوی بر مانع كورییوردم. حیرت، حیرت ایچندە قالییوردم.

عجبا هركسڭ خوشلاندیغی معنوی مقاماتی و اخروی سعادتلری، اعمال صالحە ایلە اونلری قزانمق و متوجّه اولمق، هم مشروع، هم هیچ بر جهت ضرری اولمدیغی حالدە، نە ایچون بویلە روحًا منع ایدیلییورم؟ رضای الٰهیدن باشقە وظیفەء فطریەء علمیەنڭ سوقیلە، یالڭز و یالڭز ایمانە خدمتڭ كندیسی عین اجرت بڭا كوستریلمش. چونكە شیمدی بو زماندە هیچ بر شیئە آلت و تابع اولمایان و هر غایەنڭ فوقندە اولان حقائق ایمانیەیی، فطری عبودیت ایلە محتاجلرە تأثیرلی بر صورتدە بیلدیرمەنڭ بو دهشتلی زماندە چارۀ یگانەسی و ایمانی قورتاراجق و قناعت قطعیە ویرەجك بو طرزدە، یعنی هیچ بر شیئە آلت اولمایان بر درس قرآنی لازمدركە، كفر مطلقی و متمرّد و عنادجی ضلالتی قیرسین و هركسە قناعت قطعیە ویرەبیلسین.

بویلە بر درسە بو زماندە، بو شرائط داخلندە، هیچ بر شخصی و اخروی و دنیوی، مادّی و معنوی بر شیئە آلت ایدیلمدیگنی بیلمكلە قطعی قناعت كلەبیلیر. یوقسە قومیتەجیلكدن و جمعیتجیلكدن تولّد ایدن دهشتلی دینسزلك شخصیت معنویەسنە قارشو مقابل چیقان بر شخصڭ اڭ بیوك بر مرتبەء معنویەسی دە بولونسە، یینە وسوسەلری بتون بتون ازالە ایدەمز. چونكە ایمانە كیرمك ایستەین معنّدڭ نفسی و أَنَاسی دییەبیلیركە: "او قدسی شخص، دهاسیلە و خارقە مقامیلە بزی قاندیردی" دییە بر شبهەسی قالیر.

جناب حقّە شكركە، یگرمی سكز سنە، دینی سیاستە آلت اتهامی آلتندە قدر الٰهی بو ظلم بشریدە بنم روحمی اختیارم خارجندە، دینی هیچ بر شخصی شیدە آلت ایتمەمك ایچون، بنی بشرڭ ظالمانە ألیلە عین عدالت اولارق طوقاتلایور، یعنی "صاقین صاقین!" دییە ایقاظ ایدییور. "ایمان حقیقتنی كندی شخصڭە آلت یاپما! تا ایمانە محتاج اولانلر آڭلاسینلركە، یالڭز حقیقت قونوشویور. نفسڭ اوهاملری، شیطانڭ دسیسەلری قالماسین، صوصسون."

حقیقتًا رسالۀ نورڭ بحث ایتدیگی حقیقتلرڭ عین مأٓلندە میلیونلر كتاب او حقیقتلری بلیغانە نشر ایتدكلری حالدە و بیڭلر حقیقی عالملر درس ویرمەلریلە بو مملكتدە دهشتلی كفر مطلقی تام طوردیرامدقلری حالدە، نورلر مذكور سرّە بناءً بر جهتدە غلبە ایتدیگنی دوشمانلری دخی تصدیق ایدرلر. اوت، كفر مطلقە قارشو بو آغیر شرائط ایچندە، نورلر بو ایشی كورمش، میداندەدر. دیمك نورلرڭ قوّتی بو سرّ عظیمدن ایلری كلییور. بن دە بتون روح و جانملە، یگرمی سكز سنە بو اشكنجەلی مصیبتلریمە راضی اولدم. حقّمی حلال ایتدم. عادل قدرە دە دیرمكە:

مستحق ایدم سنڭ بو شفقتلی طوقاتلریڭە. یوقسە غایت مشروع، ضررسز، هركسڭ للّٰه ایچون تعقیب ایتدیگی مبارك مسلگە كیرسەیدم، یعنی مادّی و معنوی حسلریمی بتون فدا ایتمەسە ایدم، خدمت ایمانیەدە بو عجیب معنوی قوّتی غائب ایدەجكدم. ایشتە بو قوّتڭ بر نمونەسی بعض ذاتلرڭكە، بن اونلرڭ