[٥٢١]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[اوّلا] هم سزڭ، هم بو مملكتڭ، هم عالم اسلامڭ مهم بایراملرینڭ مقدّمەسی اولان، بو مملكتدە شعائر اسلامیەنڭ یڭیدن پارلامەسنڭ بر مژدەجیسی اولان اذان محمّدینڭ (علیە الصّلاة والسّلام ) كمال فرحلە اون بیڭلر منارەلردە اوقونمەسنی تبریك ایدییورز. و سكسان كسور سنە بر عبادت عمرینی قزاندیران رمضان شریفدەكی عبادت و دعالریڭزڭ مقبولیتنە آمین دییەرك، رحمت الٰهیەدن هر بر كیجەء رمضان بر لیلۀ قدر حكمندە سزلرە ثواب قزاندیرمەسنی نیاز ایدییورز. بو رمضاندە شدّتلی ضعفیت و خستەلغمدن تام چالیشامدیغمدن، سزلردن معنوی یاردیم رجا ایدرم.

[ثانیًا] بنم صوڭ حیاتمی اسپارطە حوالیسندە كچیرمك بیوك بر آرزومدر. و نور أفەسنڭ دیدیگی كبی دیمشدم: اسپارطە، طاشیلە، طوپراغیلە بنم ایچون مباركدر. حتّی یگرمی بش سنەدنبری بنی اشكنجە ایلە تعذیب ایدن اسكی حكومتە قلبًا نە وقت حدّت ایتمشم، هیچ بر زمان اسپارطە حكومتنە حدّت ایتمەیوب، او مبارك وطندەكی حكومتڭ خاطری ایچون اوتەكیلری دە اونوتویوردم. خصوصًا اورادەكی اسكی تخریباتی تعمیراتە باشلایان حقیقی وطنپرورلر اولان دموقرات نامندە حمیّتلی احرارلر، یعنی حریتپرورلر، نور و نورجیلری تقدیر ایتمەلرینە

چوق منّتدارم. اونلرڭ موفّقیتنە چوق دعا ایدییورم. ان شٓاء اللّٰه او احرارلر، استبداد مطلقی قالدیروب، تام بر حرّیت شرعیەیە وسیلە اولاجقلر.

[ثالثًا] بایرامدن بر مقدار صوڭرەیە قدر بورادە قالمقلغمڭ بر سببە بناءً لزومی وار. بر ایكی آی صوڭرە مدرسة الزّهرا اركانلرینڭ قراریلە و استانبول و آنقرە أونیورسیتەلرندەكی كنچ سعیدلرڭ دە موافقتیلە، نرەیی بنم ایچون مناسب كورورسەڭز، اورایی قبول ایدەجگم. مادام حقیقی وارثلرم سزلرسڭز و شخصمدن بیڭ درجە زیادە دنیادە وظیفەمی دە كورویورسڭز، بو حیات فانیدەكی صوڭ منزلی سزڭ رأیڭزە بیراقییورم.

[رابعًا] هم تبریكلرینی، هم شدّتلی علاقەلرینی كوسترن احمد نظیف و احمد فیضی و خلیل ابراهیم و حسن عاطف و بوجاقدە و افلانی و استانبولدەكی نورجیلرڭ مكتوبلرینە بنم بدلمە سزلر جواب ویررسڭز، سزلری توكیل ایدییورم.

اَلْبَاقٖی هُوَ الْبَاقٖی

قرداشڭز سعید النّورسی

[٥٢٢]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] حدیث شریفڭ سرّیلە رمضان شریفڭ نصف اخیرندە، خصوصًا عشر اخیردە،

خصوصًا تك كیجەلردە، خصوصًا یگرمی یدیسندە، سكسان كسور سنە بر عبادت عمرینی قزاندیرابیلن لیلۀ قدرڭ احیاسنە و هر بریڭز عموم نور طلبەلریلە برابر، خصوصًا بو بیچارە، چوق قصورلی، خستە، ضعیف قرداشڭزی حصّەدار ایتمەڭزی و هر بریڭزڭ دعالریڭزڭ بیڭلر معنوی آمینلرڭ تأییدیلە درگاە الٰهیدە قبول اولمەسنی رحمت الٰهیەدن نیاز ایدییورز.

[ثانیًا] اونیورسیتەدەكی كنچ سعیدلرڭ حقیقتًا مدرسة الزّهرانڭ استانبول و آنقرەدەكی وظیفەسنی یاپدقلرینە و بو بیچارە، اختیار سعیدە احتیاج بیراقمدقلرینە و رسالۀ نورڭ هر جهتلە كافی اولمەسنڭ بر نمونەسی اولارق شیمدی سزە لفًّا كوندردیگمز، اونلرڭ مبعوثلرە خطابًا یازدقلری بیاننامەلرینی و یینە اونلرڭ بر اثری اولان تاریخچۀ حیاتڭ یتمش نسخەسنڭ باش طرفنە قویوب یتمش مبعوثە كوندرمەلری ایچون بزە كلن بیاننامەلرینی برای معلومات سزە كوندردك. سز مناسب كورسەڭز اونی و سزە اوّلجە كوندردیگمز صونغورڭ معارف وكالتنە مدافعەسی و مصطفی اوسمانڭ عدلیە وكیلنە استدعاسیلە برابر تاریخچەء حیاتە بر نوع ذیل اولارق ال یازیسیلە ویا ماكینە ایلە ویا اینەبولیدە یڭی حرفلە اللی آلتمش نسخە تكثیرینی رأیڭزە حوالە ایدییورز.

[ثالثًا] مدرسة الزّهرا اركانلری، بنم شخصمڭ دە حقیقی وكیلمدرلر. بڭا، شخصمە كلن مكتوبلرە اونلر، بنم بدلمە جواب ویرسینلر. خصوصًا خسروڭ مكتوبندەكی اسملری بولونان ذاتلرە قارشو مناسب جواب ویررسڭز. احمد فیضینڭ سزە

قارشو یازدیغی مكتوبڭ جوابنڭ پارچەسنی لفًّا سزە كوندرییورز. عموم قرداش و همشیرەلریمڭ مبارك رمضانلرینی و عموم كیجەلرینی، معنوی لیلۀ قدرلرینی تبریك ایلە سلام و دعا و دعالرینی رجا ایدییورز.

اَلْبَاقٖی هُوَ الْبَاقٖی

قرداشڭز سعید النّورسی

[٥٢٣]

[بِاسْمِهٖ سُبْحَانَهُ]

(حق و حقیقتڭ ناشری اولان سبیل الرّشادە، حالاً خلق پارتیسی نامنە یاپیلان یوز جهتلە قانونسز بر معاملەیی عرض ایدییورز )

استادیمز بدیع الزّمان سعید النّورسی، شدّتلی زهرلرڭ نتیجەسی اولارق خستەلغی شدّتلنوب حیاتدن امیدینی كسدیگی ایچون، كندی نفقە پارەسیلە آلدیغی سكز عدد كتابنی محافظە ایتمك اوزرە مفتی قرداشنە كوندرمشدی. امرطاغ پوستەخانەسی كویا ضابطە مأموری وظیفەسی یاپییور كبی، كیزلی بر مقصدە بناءً بو كتابلری ضبط ایدرك همن بالذّات كندیسی كیدوب ژاندارمە دائرەسنە، قائممقامە، عدلیەیە و تلەفونلە آفیونە شایع ایدوب، ایشی شعشعەلاندیرارق كتابلرڭ هپسنی عدلیەیە ویردیرمشدر. حالبوكە كتابلرڭ ماهیّتی شودر: بش پارچەسی، محكمەدە بولونان مدافعات و ذیللرندن عبارتدر. دیگر اوچ كتاب دە، شیمدیكی عدلیە وكیلی خلیل اوز یوروكڭ اوچ دفعە برائتلرینە قرار ویردیگی اثرلردركە، دڭزلی محكمەسی عین اثرلرڭ اجزالرینی اعادە ایتمشدر. و آفیون محكمەسنڭ دە حكملرینی بوزمش و او اثرلرڭ برائتلرینە رأی ویرمشدر.

كرچە قومونیست اولان اسكی عدلیە وكیلی فؤاد سیرمن، اسكی هیئت وكیلەیە اخبار ایتمش و قرآنڭ غایت حق و منفعتلی بر تفسیری اولان ذوالفقار مجموعەسنڭ درت یوز صحیفەسی ایچندە، اوتوز سنە اوّل یازیلان ایكی آیتڭ تفسیرینە دائر ایكی صحیفەیی بهانە ایدرك، بو چوق مهم اثری یاساق ایتمەیە چالیشمشدر. حالبوكە شیمدی ملّت و وطنە غایت ضررلی اولان قومونیست و ماصونلرڭ اثرلرینە مساعدە ایدیلدیگی حالدە، یوز بیڭلر كیمسەلرڭ ایماننی قورتاران، قرآنڭ غایت حق و پك چوق منفعتلی بر تفسیری اولدیغنی بش یوز بیڭ آدمڭ شهادتیلە اثبات ایدەجگمز اثرلرە اوراق مضرّە كبی بویلە معاملە یاپمق و استادیمزە بو خستەلقلی نازك زمانندە ئوز قرداشنە قارشو بو حزین تأثّراتی ویرمك، یوز جهتلە قانونسزدر دییە سزە عرض ایدییورز.

[ثانیًا] بو مسئلەنڭ غایت سیڭسی و غایت كیزلی حقیقتی شودر: استادیمز معنًا و مادّةً دموقرات پارتی یە یاردیم ایچون طلبەلرینی خفیفجە تشویق ایتمشدی. بونی خلق پارتیسنڭ معنّد مستبدلری آڭلادقلری ایچون، معناسز بهانە ایلە حبّەیی قبّە یاپارق بو معاملەیی یاپدیلر. یوقسە هر طرفدە بو كتابلر پوستە ایلە آلینوب ویریلییور و بورایە دە استانبولدن و باشقە یرلردن كلییور و ایلیشیلمییوردی. بو وضعیت چوق دسّاسانە و امید ایدیلمەین بر پلاندر.

[ثالثًا] ذوالفقاردەكی موضوع بحث ایكی آیتڭ تفسیرندن بیڭ مثلی بر مخالفتلە حالاً مطبوعاتدە اسكی حكومتە هجوملر یاپیلییوركە، شیمدی او آیتلرڭ تفسیری،

ذرّە مقدار بر صوچ اولامییور. بوندن دە آڭلاشیلییوركە، بو معاملەلر خلق پارتیسی حسابنە یاپیلمقدە دوام ایدیلن كیفی ایشلردر و خلق پارتیلیلرڭ "سلطنت دموقراتلردە ایسە، حكم و اجراآت و اقتدار بزدەدر" ادّعا و وهملرینڭ بر نمونەسیدر.

امرطاغ نور طلبەلری نامنە محمد، ابراهیم، ضیا وسائرە

[٥٢٤]

(اهمّیتلی بر حقیقت و دموقراتلرلە اونیورسیتە نورجیلرینڭ بر حسب حالیدر. )

شیمدی ملّتڭ آرزوسیلە شعائر اسلامیەنڭ سربستیتنە وسیلە اولان دموقراتلر، هم موقعلرینی محافظە، هم وطن و ملّتنی ممنون ایتمك چارۀ یگانەسی، اتّحاد اسلام جریاننی كندینە نقطۀ استناد یاپمقدر. اسكی زماندە اینكیلیز، فرانسە، آمریقە سیاستلری و منفعتلری بوڭا معارض اولمقلە مانع اولویوردیلر. شیمدی منفعتلری و سیاستلری بوڭا معارض دگل، بلكە محتاجدرلر. چونكە قومونیستلك، ماصونلق، زندیقلق، دینسزلك، طوغریدن طوغری یە آنارشیستلگی انتاج ایدییور. بو دهشتلی تخریب ایدیجیلرە قارشو، آنجق و آنجق حقیقت قرآنیە اطرافندە اتّحاد اسلام طایانابیلیر. و بشری بو تهلكەدن قورتارمغە وسیلە اولدیغی كبی، بو وطنی استیلای اجانبدن و بو ملّتی آنارشیلكدن قورتاراجق یالڭز اودر.

بو حقیقتە بناءً دموقراتلر، بتون قوّتلریلە بو حقیقتە استناد ایدوب قومونیست و ماصونلق جریاننە قارشو وضعیت آلمەلری ضروریدر.

بر اذان محمّدینڭؐ سربستیتیلە، كندی قوّتلرندن یگرمی دفعە زیادە قوّت قازاندیلر. ملّتی كندیلرینە ایصیندیردیلر، منّتدار ایتدیلر. هم معنًا اسكی اتّحاد محمّدیدنؐ اولان یوز بیڭلر نورجیلرلە، اسكی زمان كبی فارماصون و اتّحادجیلرڭ ماصون قسمنە قارشو اتّفاقلری كبی، شیمدی دە عینًا اتّحاد اسلامدن اولان نورجیلر بیوك بر یكون تشكیل ایدر. دموقراتلرە بر نقطۀ استناددر. فقط دموقراتە قارشو اسكی پارتینڭ مفرط و ماصون ویا قومونیست معناسنی طاشییان قسمی، ایكی مدهش ضربەیی دموقراتلرە اورمەیە حاضرلانییورلر. اسكیدن ناصل احرارلر ایكی دفعە باشە كچدیگی حالدە، آز بر زماندە اونلری دویردیلر. اونلرڭ متّفقی اولان اتّحاد محمّدیؐ افرادینڭ چوقلرینی آصدیلر. و احرار دینیلن دموقراتلری، كندیلرندن داها دینسز كوسترمگە چالیشدیلر. عینًا اویلە دە، شیمدی بر قسمی دیندارلق پردەسنە كیروب دموقراتلری دین علیهندە سوق ایتمك ویا كندیلری كبی تخریباتە سوق ایتمك ایستەدكلری قطعیًّا تبیّن ایدییور. حتّی علمانڭ رسمی بر قسمنی كندیلرینە آلوب، دموقراتلرە قارشو سوق ایتمك و دموقراتڭ طرفندە، اونلرە مقابل كلەجك نورجیلری ازمك، تا نورجیلر واسطەسیلە علما، دموقراتە التجا ایتمەسینلر. چونكە نورجیلر هانكی طرفە میل ایتسەلر، علما دخی طرفدار اولور. چونكە اونلردن داها قوّتلی بر جریان یوقكە، اوڭا كیرسینلر.

ایشتە مادام حقیقت بودر، یگرمی بش سنەدنبری اهل علمی، اهل طریقتی یا أزن، یا كندیلرینە طالقاغوقلغە مجبور ایدن اسكی پارتینڭ مفرط و ماصون

و قومونیست قسمی، بو نقطەدن استفادە ایدوب دموقراتلری دویرمەمك ایچون دموقراتلر مجبوردرلركە، هم نورجیلری، هم علمایی، هم ملّتی ممنون و منّتدار ایتمك، هم آمریقە و متّفقلرینڭ یاردیملرینی غائب ایتمەمك ایچون، بتون قوّتلریلە اذان مسئلەسی كبی شعائر اسلامیەیی ممكن اولدقجە تعمیرە چالیشمەلری لازم و الزمدر.

مع التّأسّف بعض مفرط و ماصون و قومونیستلر، دموقرات علیهندە اولدیغی حالدە، كندینی دموقرات كوسترییورلركە، دموقراتلری تخریباتە سوق ایتسین. و دین علیهندە كوسترسین، اونلری دویرسین.

نور طلبەلری و نورجی اونیورسیتە كنچلگی نامنە

صادق، صونغور، ضیا

برای معلومات تقدیم ایدییورز.

[٥٢٥]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، فداكار قرداشمز حاجی علی،

كوندردیگڭز چوق قیمتدار و بالخاصّە حضرت استادی پك چوق سویندیرن مكتوبڭزی آلدق. استادیمز دییوركە: "رسالۀ نور، بو زماندە كافیدر. اون سنە مدرسەدە اوقویانلر، رسالۀ نورلە بر سنەدە عین استفادەیی ایتدكلرینە شاهد،

بیڭلر اهل علم وار. مادام حاجی قیلینچ علی، بر بوچوق سنە بتون رسالۀ نور اجزالرینە صاحب چیقمش، قسمًا اوقومش.. نظریمزدە یگرمی سنەلك بر نور طلبەسیدر. بن هر صباح خاصلر ایچندە اونڭ اسمیلە بتون معنوی قزانچلریمە، دفتر اعمالنە كچمك ایچون حصّەدار ایدییورم. اویلە ایسە، او دە بتون حیاتنی رسالۀ نورە ویرمگە مكلّفدر. دیمك شیمدی یە قدر جامع الازهرە كیتمگە موفّق اولمامسی اهمّیتلی بر حكمت ایچوندركە، نورلر اوڭا كافی ایمش. شیمدی شامە، حلبە یاقین اولان اورفەدە بر مدرسۀ نوریە ایلریدە تشكّل ایتمەسنی قوّتلی امید ایدییورز. قیلینچ علی ایلە برابر اسكی سعیدڭ غایت قیمتدار بر طلبەسی اولان شامدەكی ملّا عبد المجید، اورفەدەكی نورڭ طلبەلرندن سیّد صالح و اونڭ یاننە كیدن نورڭ فداكار بر طلبەسیلە مخابرە ایتسینلر. بن هم ملّا عبد المجیدە، هم حاجی علی یە، هم شامدەكی رسالۀ نورلە علاقەدار اولانلرە پك چوق سلام ایدییورم. و دعالرینی و او موقع مباركەدە بڭا دعا ایتمەلرینی رجا ایدییورم "دیدی.

اوت، قهرمان قرداشمز حاجی علی، حضرت استاد دائما سزڭ فداكارلغڭزی اظهار بویورویورلر. بز دە سزی تحسینلرلە تبریك ایدییورز.

او مركز اسلامیەدە نورلر ایچون بیوك غیرت و خدمتلریڭزی دیلەیورز، هم دە امید ایدییورز. حقیقتًا او بیوك و مبارك یرلردە نورلرە خدمتدە بولونوشڭز، سزڭ ایچون، هم بتون اهل ایمان ایچون پك قیمتدار اولدیغنە هیچ شبهە یوقدر.

جناب حق موفّق أیلەسین. اورادە بولونان سوكیلی استادیمزڭ اسكی و قیمتلی طلبەلرندن ملّا عبد المجیدە و سز فداكار عزیز قرداشمزە پك چوق سلام و حرمت ایدر، اللریڭزدن اوپرز.

اَلْبَاقٖی هُوَ الْبَاقٖی

استادڭ خدمتندە بولونان چوق قصورلی قرداشڭز صونغور، زبیر، ضیا

(٥٢٦)

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

سوكیلی، قهرمان نور (خسرو) آغابگمز،

[اوّلًا] پك بیوك و قدسی خدمت نور ایچون چوق خیرلی، چوق فعال غیرتلریڭز و خدمتلریڭزلە، سوكیلی استادیمز حضرتلرینی چوق ممنون ایدن قیمتلی مكتوبڭزی آلدق.

[ثانیًا] اینەبولی قهرمانلرینڭ یڭی حرفلە رجا ایتدكلری تاریخچۀ حیاتڭ نشرینی، حضرت استادیمز سزلرە حوالە ایدییورلر. سز ناصل مناسب كورسەڭز یاپارسڭز. هم كوچك سوزلردن حضرت استادیمزە آیریلان قسمنە سزلر صاحب اولمەڭزی و مناسب مقدارینی دە استادیمزە كوندرمەڭزی سوكیلی استادیمز امر ایتدیلر.

[ثالثًا] حضرت استادیمز نفقەسنی صاتمقلە تأمین ایتدیگی كندینە عائد مجموعەلری و كندیلرینە عائد رسالەلرینڭ قسم اعظمنی اورفەیە كوندرمشدر.

[رابعًا] بو كونلردە استادیمز حضرتلرینی، واندە بولوندقلری زماندە خدمت ایدن وانلی ملّا حمید زیارتە كلدی. و حضرت استادیمزڭ مجموعەلرندن بعضیسنی هدیە اولارق وانە كوتورمشدر. حضرت استادیمز سزە و مدرسة الزّهرا اركانلرینە سلام ایدییورلر. بزلر دە حرمت و سلام ایدر، اللریڭزدن اوپرز. بتون هجمات ستّەلرە علاوەسی امر بویورولان هجمات ستّەنڭ دردنجی مبحثنە عائد یازیلان پارچەیی و امرطاغنڭ معنیدار بر خاطرەسی یازی یی و سبیل الرّشاددن كلن، رسالە ایستەینلرڭ آدرسلرینی برای معلومات عرض ایدییورز، قهرمان سوكیلی آغابگمز.

اَلْبَاقٖی هُوَ الْبَاقٖی

دعاڭزە محتاج چوق قصورلی ضیا، زبیر، صونغور

[٥٢٧]

[امرطاغنڭ معنیدار بر خاطرەسی]

بش سنەدنبری تنفّس ایچون امرطاغنڭ اطرافندە فایطونلە كزدیگم زمان غریب بر طرزدە، بر یاشندن یدی یاشنە قدر كوچوجك چوجقلر، والدە و پدرلرینە قارشو كوستردكلری علاقەدن زیادە بر اشتیاق ایلە فایطونمە

قوشوب ألمە صاریلییورلردی. حتّی ایكی دفعە فایطون آلتنە دوشوب خارقە بر طرزدە ضرر كورمدن قورتولدیلر.

حتّی هیچ بنی كورمەین، بیلمەین بر و ایكی و اوچ یاشندە چوجقلر، یالین آیاق، دیكنلر ایچندە قوشا قوشا فایطونە یتیشییورلر. بیوك آدملر كبی تمنّا ایدوب الڭزی أوپەلم دیرلردی. بو حالە هم بن، هم قرداشلرم و كورنلر حیرت ایدییوردق. بو حال بر محلّەیە مخصوص دگل، هر طرفدە، حتّی كویلرندە عین حال دوام ایدییوردی.

بنی آلداتمایان بر خاطرۀ حقیقتلە بنم و آرقداشلریمڭ قناعتمز كلدیكە، بو معصوم طائفەنڭ معصومیتلری جهتیلە، سوق فطری دینیلن بر حسّ قبل الوقوع ایلە، رسالۀ نورڭ بو مملكتدە معصوم چوجقلرە و كندیلرینە چوق منفعتی اولاجق دییە، عقل و فكرلری درك ایتمدیگی حالدە، او معصومانە حسّ ایلە رسالۀ نورڭ معناسی اعتباریلە ترجماننە، آننەسنە یالوارمەسندن زیادە بر اشتیاق ایلە قوشویورلردی.

بز دە بر حسّ قبل الوقوع ایلە حسّ ایدییورزكە، ایلریدە بو معصوم كوچوجك مخلوقلردە بیوك نورجیلر چیقاجق. و ایلریدە نورڭ خاص شاكردلری اولاجقكە، بو وضعیتی كوسترییورلر. بن دە بو نوع كوچوجك معصوملری، اولادم اولمدیغندن اولاد معنویە اولارق دعالریمە عمومًا داخل ایتدم. هر صباح بونلری دە نور طلبەلریلە برابر دعالرمدە یاد ایدییورم.

هم اونلردن بر یاشندەكی معصومی، قرق یاشندەكی لاقید بر آدمە ترجیح ایتمەیە سبب، بونلر كناهسز و صمیمی بر علاقە كوسترمەسندن، البتە اونلری سوق ایدن بر حقیقت وار. بن دە او جهتدە اونلری بیوكلرە تمنّا ایتدیگم كبی، اونلرڭ تمنّالرینە جدّی مقابلە ایدییورم.

هم معصومیتلری، هم ایلریدە نورجی اولمەلرینە بناءً، دعالرینی كندی حقّمدە مقبول اولاجق دییە اونلرە دیردم: "مادام سز بنم اولاد معنویەم اولدیڭز. بن سزە دعا ایدییورم. سز دە كناهڭز اولمدیغی ایچون، دعاڭز بنم حقّمدە ان شٓاء اللّٰه مقبولدر. سز دە بڭا دعا ایدیڭز. چونكە زیادە خستەیم" دیردم. بن و بنم یانمدەكی قرداشلریمڭ قوّتلی بر احتمال ایلە قناعتمز كلییوركە، ماصون و زندیقلرڭ پلانیلە بولشویزم طرزندە كنچلری تربیە ایتمك ایچون بر وقت بعض مكتبلر آچیلدیغی و صوڭرە دگیشن بو مكتبلرلە كنچلری افسادە چالیشدقلرینە مقابل، اسلامیتڭ قهرمان بایراقداری اولان تورك ملّتنڭ معصوم كوچوجك یاورولری، نورانی بر انتباه و بر حسّ قبل الوقوع ایلە نورلردن درس آلمەلری، كنچلرڭ باشنە كلن او بلایە قارشو بر مقابلەدركە، ان شٓاء اللّٰه او یاورولرڭ هم كندیلری، هم كنچلر، ماصون و زندیقلرڭ شرلرندن قورتولمەسنە بر اشارتدركە، بو عجیب وضعیتی كوسترییورلر.

سعید النّورسی

صونغور، ضیا، زبیر

[حاشیە] هجمات ستّەنڭ دردنجی دسیسە بحثنە بر حاشیەدر. چونكە هركس بردن او مقامدەكی مقصدی آڭلامییور.

هجمات ستّەنڭ دردنجی دسیسە مبحثندە بڭا هجوم ایدن ملحدلر، قرداشلریمڭ عصبیت ملّیەلرینی تحریك ایچون، "سعید كرددر. سز نەدن اونڭ پشنە دوشویورسڭز؟" دیمەلرینە مقابل ویردیگم جوابڭ قیصەجە مأٓلی بودر:

ای بدبخت ملحدلر! بن فللّٰە الحمد مسلمانم. اسلامیت ملّتیلە اوچ یوز اللی میلیون قرداشلریمڭ و كرددن یوزدە طقسان اولان اهل ایمان و اهل سنّت ملّتمڭ اخوّتنی و دعالرینی قزاندیغم حالدە، او قدسی ملّیت یرینە عنصریت كردلك ملّیتنی اساس ایدوب، كردجیلك حسابنە كردڭ اون قسمندن بر قسمی بدعەلرە ویاخود آیری مذهبە كیرمش محدود آدملرڭ فائدەسز قرداشلغنی قزانمقدن قاچییورم و جناب حقّە صیغینییورم. سزڭ كبی ملحدلر، اوچ یوز اللی میلیونڭ قرداشلغنی ترك ایدوب توركجیلك حسابیلە یالڭز مجار، بولغاردن اسلامیتە كیرمەین محدود بر قسم فرنكلشمش توركلری قرداش قازاندیغڭزدن، بنی دە كندیڭزە قیاس ایدییورسڭز.

بدیع الزّمان سعید نور اثرلری

عدد: ١-اشارات الاعجاز فی مظان الایجاز، قرآن كریمڭ تفسیری

٢-ذوالفقار

٣-عصای موسی

٤-سراج النّور

٥-سكّۀ غیبیە