بولونان و اوتوز سنە اوّل، اون سنە اقامت ایتدیگی بارلە كوینە كیدر، بر مدّت قالیر، كلیر. بعضًا دە بورادە یاز موسمندە انسانلرڭ بولونمدیغی، شهرڭ خارجندەكی محلّلرە كیدەرك، ایكی اوچ ساعت تنفّس ایدر، كلیر. اختیارلغی، خستەلغی طولاییسیلە یایان یورویەمەمكدە اولدیغندن و خلقڭ حرمتكار وضعیتیلە راحتسز ایتمەمسی ایچون، بو بسیط كیدوب - كلمەیی اوطوموبیل ایلە یاپار. بونڭ خارجندە هیچ بر كویە، مسكون هیچ بر محلّە، حتّی اوتوز سنەلك دوستلری بولونان یرلرە دخی مذكور سببلرلە كیتمییور. ایشتە حال و وضعیت بوندن عبارتدر. حقیقت حال دە بودر.

خدمتندە بولونان طاهری، زبیر

[٦٩٤]

[بِاسْمِهٖ سُبْحَانَهُ]

عزیز قرداشلرم،

بو دفعە موتورلی قاییق ایچندە اگیردیردن بارلەیە كیدركن، دڭزڭ دهشتلی امثالسز فیرطینەسی، لیلۀ قدردەكی دهشتلی خستەلق كبی، زحمت نقطەسنی قالدیروب بیوك بر رحمتە وسیلە اولدیغنی سزلرە مژدە ویرییورم. آلتی آرقداش ایلە برابر شهید اولمق، یدی احتمالدن آلتی احتمال ایلە دڭز بزە كنیش بر قبر اولمق ایچون زمین حاضرلاندی. فقط او حال آلتندە، مكرّر تجربەلرلە یاغمورڭ رسالۀ نورلە علاقەدارلغی و شیمدی چوق زماندر یاغمورە شدّتلی احتیاج اولدیغی بو زماندە،

رسالۀ نورڭ كیزلی دوشمانلرینڭ تهلكەسندن و كنیش پلانندن قورتولمەسنە بر اشارت اولارق او دهشتلی حالتمز، بر صدقۀ مقبولە حكمنە كچدیگی رمزیلە، او رحمت الٰهیەدن كلن امر رحمانی یی امتثالندەكی اشتیاق ایلە، یاغمورڭ بر آننەسی اولان بو دڭز، او رحمتە دائر امر الٰهی یی غایت هیجانلە و اشتیاق ایلە عجلەلك ایلە كتیرمك ایچون، بر شفقت طوقادی نوعندن، نور طلبەلری اولان بزم باشمزی طوقات ایلە، یوزیمزی و كوزیمزی یاغمورلە اوخشادی. بز بو حالتی ظاهرًا حدّت، معنًا شفقتكارانە اوخشامق نوعندە كوردك.

بن داها فیرطینە و یاغمور باشلامادن اوّل، حسّ قبل الوقوع ایلە خزینۀ رحمتە بر آناختار اولاجق، دهشتلی و هیجانلی بر مصیبت حسّ ایتدیگمدن، متمادیًا جوشنی و شاە نقشبندڭ وردینی اوقویوردم. دڭزڭ او دهشتی ایچندە، كمال شوق ایلە او مبارك دڭزی قبر اولارق قبول ایدییوردم. بویلە قضا ایلە وفات ایدن شهید حكمندە اولدیغی كبی، شهید دە ولی حكمندە اولمەسندن آلتی آرقداشمە آجیمدم. یالڭز ایچندە بولونان چوجغە بر پارچە آجیدم. او قاییغڭ ماكینەسی بوزولدیغی و یلكنی دە روزگار اونڭ عكسیلە كلدیگی ایچون فائدە ویرمدیگنی و دڭزڭ موجلری دە پك بیوك، اوّلا قاییغە و ظاهرًا بزە هجوم ایتمەسیلە برابر قاییغڭ ایچنە كیرمدیگی ایچون، كمال صبر و شكرلە قارشیلادق و سالمًا ساحلە چیقدق. [اَلْحَمْدُ لِلّٰهِ عَلٰی كُلِّ حَالٍ] دیدك.

سعید النّورسی

[٦٩٥]

استادیمز دییوركە:

"بن اللی آلتمش سنەدر، كفر مطلقە قارشو ایمانە خدمت ایتمك و كفر مطلقڭ نتیجەسی اولان آنارشیلكدن ملّتی قورتارمق ایچون بتون قوّتملە ایمان خدمتندەكی اخلاصڭ نتیجەسی اولان آسایشی محافظە ایلە، بر جانی یوزندن اون معصومی ظلمدن قورتارمق ایچون راحتمی، شرفمی، حیثیتمی، حتّی لزوم اولسە حیاتمی فدا ایتمكلە، هر بر تضییقاتە، معناسز، لزومسز شیلرە قارشو صبر و تحمّل ایتدم. ایشتە بنم اوتوز قرق سنەدر بو خدمت ایمانیە ایچون، بنم حقّمدە حبّەیی قبّە یاپوب بر بارداق صودە فیرطینە چیقاروب بنی تعجیز ایتدكلری حالدە، صرف خدمت ایمانیەنڭ بر نتیجەسی اولان آسایش ایچون صبر و تحمّل ایتدم. بر مثالی:

بش محكمە حضورندە هیچ بنم قیافتمە ایلیشیلمدیگی حالدە و متمادیًا كزدیگم حالدە و حتّی استانبولدە محكمەمدە یوز یگرمی پولیس بولوندیغی حالدە، عین قیافتمە ایلیشمدیلر. و ایكی آی استانبولدە یایا كزدیگم حالدە، ممانعت ایتمدیلر و ایلیشمەیە هیچ كیمسەنڭ حقّی یوق. چونكە هم منزوی، هم دە جامعە كیتمییور و چارشیدە غلبەلق یرلردە كزمییور، یالڭز اوطوموبیلی ایلە چیقییور. انسانلرلە ضرورت اولمادن قونوشمییور، یالڭز تنفّس ایچون طاغلر باشندە و خالی یرلردە كزییور. شیمدی اهل دنیانڭ هیچ بر حقّی یوقدركە، وضعیتمە، حالمە ایلیشسینلر. "

بر سیاحت مناسبتیلە و اوطوموبیلی ایچندە استانبولە اڭ مهم بر مسئلۀ ایمانیە

ایچون كیتمەسندن، شیمدی استانبولڭ بعض رسمی آدملری، یگرمی جهتدە قانونسز بر طرزدە، قانون نامنە استادیمزی بر بارداق صودە فیرطینە قوپارمق نوعندن میلیونلر فداكار طلبەلری بولونان بر ذاتە، سینك قنادی قدر بر اهمّیتی اولمایان بر مسئلە ایچون رسمی آدملری یاننە كوندرمك اولان یوز جهتدە اهمّیتسز، معناسز و بر حبّەیی یوز قبّە یاپمق كبی بو شیئە قارشو استادیمز دییور: "مادام ایمان خدمتندە اخلاص اتملە، آنارشیلگی طوردیرمقلە، آسایشی محافظە ایتمكلە صبر و تحمّل كركدر. بن دە بونڭ ایچون راحتمی، حیثیتمی فدا ایدییورم. اونلری دە حلال ایدییورم."

استادیمزڭ بو دفعە استانبولە كیتمەسی مناسبتیلە استانبول مدّعی عمومیلگنجە افادەسنڭ آلینمەسی ایچون یاننە كلن ایكی مأمورە استادیمز دیدی: "بن داها اوّل بو مسئلە ایچون محكمەدە افادە ویرمشدم و محكمە تحقیقات یاپمش، نتیجەدە برائت ویرمش. باشقە دییەجگم یوق" دییەرك، صامسون محكمەسنە كیدن و استانبول محكمەسندە اوقودیغی افاداتنی تكرار سویلەدی. هم اسكیدن آلدیغی برقاچ راپور واركە، خستەلغی طولاییسیلە باشنی صارمەیە مجبوردر و شدّتلی نزلەدن و خستەلقلردن طولایی استراحتە و تبدیل هوایە احتیاجی واردر. دائمی بر یردە قالمسی صحّتنە منافیدر. داها اوّل لزوم دە اولمدیغی ایچون، بو راپورلری كوسترمگە تنزّل ایتمییوردی، لزوم كورمییوردی.

خدمتندە بولونان نور طلبەلری

طاهری، زبیر، صونغور، حسنی، بایرام

[٦٩٦]

مندرسڭ قونیە نطقنە دائر آچیقلامسی

باش وكیل، سوزلرینڭ مقصدلی اولارق تفسیرلرە تابع طوتولدیغنی سویلەیور. (خصوصی مخابریمزدن) [حاشیە]

آنقرە،

باش وكیل عدنان مندرس قونیەدە سویلەمش اولدیغی نطق طولاییسیلە

یاپیلان نشریات اوزرینە ظفر غزتەسنڭ صوردیغی بر سؤآلی شو شكلدە جوابلاندیرمشدر:

قونیەدە، حكومت میدانندە، بیوك بر كتلە حالندە طوپلانمش بولونان چوق محترم قونیەلی وطنداشلریمە قارشو سویلەدیگم نطقڭ لائیكلك تلقّیمز حقّندەكی قسمنی سٓوء نیت صاحبی قلملردە ناصل تفسیرە تابع طوتولدیغنی، بن دە اسفلە مشاهدە ایتدم. بونلردن بر قسم سوزلریمڭ، قرداشی قرداشە قیردیراجق بر ماهیتدە اولدیغنی، بر قسمی صاغ پولیتیقەجیلرە میدان آچدیغنی و مقدّساتجیلق یاساغنی اورتەدن قالدیردیغنی و نتیجە اعتباریلە تورك انقلابلرینڭ بیوك اساسلرندن برینی زدەلەدیگنی افادە ایتمشلردر.

بتون بو یازیلردە دقّتمە چارپان جهت، قونیەدەكی سوزلریمڭ تعقیب اولونان مقصدلرە و الدە ایدیلمك ایستەنیلن نتیجەلرە كورە تحریف ایدیلمش اولمسیدر. مسئلەنڭ اییجە آڭلاشیلمەسی ایچون، اوّلا قونیەدەكی سوزلریمی بر كرە داها و او كونكی آناطولی آژانسندە نشر ایدیلدیگی كبی تكرار ایتمك ایسترم. او كون عینًا شویلە دیمشدم:

شیمدی سزە لائیكلك تلقّیمزدن دە بحث ایتمك ایستەیورم. لائیكلك، بر طرفدن دین ایلە سیاستڭ بربرندن آیریلمەسی، دیگر طرفدن ایسە وجدان حرّیتی معناسنە كلیر. دین ایلە سیاستڭ قطعی صورتدە بربرندن آیریلمەسی اساسندە اڭ كوچك تردّدە دخی تحمّلمز یوقدر. وجدان حرّیتی بحثنە كلنجە، تورك ملّتی مسلماندر و

مسلمان اولارق قالاجقدر. اوّلا كندینە و كلەجك نسللرە دیننی تلقین ایتمسی، اونڭ اساسنی و قاعدەلرینی اوگرتمسی، ابدیًا مسلمان قالمەسنڭ مناقشە كوتورمز بر شرطیدر. حالبوكە مكتبلردە دین درسی اولماینجە، اولادینە كندی دیننی تلقین ایتمك و اوگرتمك ایستەین وطنداشلر، بو امكانلردن محروم ایدیلمش اولورلر. مسلمان چوجغی دیننی اوگرنمك كبی پك طبیعی بر حقدن محروم ایدیلمەمك ایجاب ایدر. بویلە محرومیت و امكانسزلق، وجدان حرّیتنە اویغوندر دینیلمز. بو اعتبارلە اورتە مكتبلریمزە دین درسلری قویمق، یرندە بر تدبیر اولاجقدر.

دینسز بر جمعیتڭ، بر ملّتڭ پایدار اولابیلەجگنە اینانمییورز. اڭ ایلری ملّتلرڭ دخی دین ایلە سیاست و دنیا ایشلرینی بربرندن آییردقدن صوڭرە، نە درجە دینلرینە باغلی قالدقلرینی بیلییورز. بوكونكی سویە ایلە اصیل ملّتمزە تعصّب اسنادی روا كورولەمز. ملّتمز دیننە صیم صیقی باغلی اولدیغی قدر، عمومیتلە دینی اڭ تمیز دویغولرلە بنمسەمكدەدر. اسلاملق، ملّتمزڭ وجدانندە اڭ مصفّا سویەسنی بولمشدر. مسلمانلغی و اونڭ اساسلرینی، فریضەلرینی و قاعدەلرینی كفایتلە تلقین ایدوب اوگرتەجك اوگرتمنلریمزڭ یتیشدیریلمەسنە آیریجە غیرت صرف ایدیلەجكدر. كلەجك سنە لیسە درجەسندە ایلك مأذونلرینی ویرەجك اولان قونیە امام-خطیب مكتبنڭ ایلری سویّەدە دین تحصیلی ویرن بر تدریس مؤسّسەسی حالنە كتیریلمسی و بو مؤسّسەلرڭ بڭزرلرینڭ یورتدە فضلەلاشدیریلمەسی اویغون اولاجقدر، دیمشدر.

قونیە نطقنڭ بو قسمنی محترم تورك افكاری قارشوسندە اویلەجە تكرار ایتدكدن صوڭرە، شونی اهمّیتلە تبارز ایتدیرمك ایسترمكە:، بیاناتم، هر هانكی بر التباسە محل ویرمەیەجك قدر آچیقدر. یاپیلاجق تفسیرلردە، ایلری سورولەجك مطالعەلردە، بو آچیق متنە صادق قالمق اساسدر. هیچ كیمسە بنم سویلەدیگم سوزلری تحریف حقّنە صاحب اولمدیغی كبی، هیچ بر زمان عقلمدن كچمەین مقصدی و نیّتلری بڭا عطف ایتمەیە، كیمسەنڭ حقّی اولمامق لازم كلیر.

[٦٩٧]

[بِاسْمِهٖ سُبْحَانَهُ]

استادیمز سعید نورسی دییوركە:

مادام اسپارطە بنم حقیقی بر مملكتمدر. بن روح و جانملە بو حقیقی مملكتمە و انسانلرینە خیر قزاندیرمق ایستەیورم. شیمدی چوق مهم اولان خیر دە شودر:

آفیون، ناصلكە بتون رسالۀ نور كلّیاتنی اعادە ایتمكلە عالم اسلام و حتّی عالم انسانیتدە چوق بیوك بر خیرە وسیلە اولدی و سكز سنەدنبری اولان خطایی هیچە ایندیروب عفو ایتدیردی. بو مبارك اسپارطەدە، عالم اسلام نظرندە مصر جامع الازهری و اسكی شام شریف مباركیتنە مظهر اولدیغندن، البتە رسالۀ نوری صاحبلرینە اعادە ایتمكلە حاصل اولاجق چوق بیوك شرف نقطەسندە آفیوندن كری قالمایاجق. بلكە یگرمی درجە یوكسلەجكدر.

اسپارطەنڭ عادل عدلیەسی، وطنپرور دموقراتی و دیندار خلقی بو خیر عظیمی مملكتنە قزاندیراجق و آفیونڭ مظهر اولدیغی شرفدن یوز درجە زیادە بر شرفی كندیلرینە تأمین ایتمك ایچون، بو مبارك اسپارطەنڭ محصولی اولان نور رسالەلرینڭ اعادەسنە چالیشسینلر. [حاشیە]

خدمتندە بولونان

نور طلبەلری

[٦٩٨]

استادیمز عزّت علمیەیی محافظە ایچون اسكی زماندنبری اڭ بیوك رئیسلرە تذلّل ایتمدی. هم خلقلرڭ هدیەسنی قبول ایتمییوردی. شیمدی ایسە استادیمز هم ضعیف اولدیغی حالدە، اهل علمە بر محذوری اولمایان هدیەیی ایسە خستەلقلە آلامییور. حتّی بز خدمتكارلرندن دخی اڭ كوچك بر شیئی مقابلەسز

یییەمییور، ییسە خستە اولویور. بو حالتی، هیچ بر شیئە آلت اولمایان رسالۀ نوردەكی اعظمی اخلاصڭ محافظەسی ایچون، بر خستەلق صورتنی آلدی و خستەلقلە بو قاعدەسنی بوزمقدن منع ایدیلییور اعتقادندەیز. حتّی رسالۀ نورڭ هر طرفدە نشر و انتشارینڭ بیوك بر بایرامی مناسبتیلە، اهل علمە لازم اولان مصافحە و صحبت ایتمكدن و بو مبارك بایرامدە دە اڭ خاص طلبەلری و قرداشلریلە مصافحە و صحبتدن و اوڭا باقمقدن دە شدّتلە صیقیلوب، اعظمی اخلاصڭ محافظەسی ایچون بر خستەلق حالتی آلارق منع ایدیلدیگی اوڭا اخطار ایدیلدی. حتّی بزلر كوردككە، بو مبارك بایرامدە شدّتلی خستەلغی ایچون طلبەلرینە دیدی: "بنم قبریمی غایت كیزلی بر یردە، بر ایكی طلبەمدن باشقە هیچ كیمسە بیلمەمك لازم كلییور. بونی وصیت ایدییورم. چونكە دنیادە صحبتدن بنی منع ایدن بر حقیقت، البتە وفاتمدن صوڭرە دە او حقیقت بو صورتدە بنی مجبور ایدییور."

بز دە استادیمزدن صوردق:

قبری زیارتە كلنلر فاتحە اوقور، خیر قزانیر. عجبا سز نە حكمتە بناءً قبریڭزی زیارت ایتمەیی منع ایدییورسڭز؟

جوابًا استادیمز دیدیكە: "بو دهشتلی زماندە، اسكی زماندەكی فرعونلرڭ دنیوی شان و شرف آرزوسیلە هیكللر و رسملر و مومیالرلە نظر بشری كندیلرینە چویرمەلری كبی، انانیت و بنلك ویردیگی غفلتلە، هیكللر و رسملر و غزتەلرلە نظرلری، معنای حرفیدن معنای اسمیلە تمامًا كندیلرینە چویرتمەلری و اخروی

استقبالدن زیادە، دنیوی استقبالی خیال ایدینمش اولمەلری ایلە، اسكی زماندەكی للّٰه ایچون زیارتە مقابل، اهل دنیا قسمًا بو حقیقتە مخالف اولارق موتانڭ دنیوی شان و شرفنە زیادە اهمّیت ویرر، اویلە زیارت ایدییورلر. بن دە رسالۀ نوردەكی اعظمی اخلاصی قیرمامق ایچون و او اخلاصڭ سرّیلە، قبریمی بیلدیرمەمەیی وصیت ایدییورم. هم شرقدە، هم غربدە، هم كیم اولورسە اولسون اوقودقلری فاتحەلر او روحە كیدر.

دنیادە بنی صحبتدن منع ایدن بر حقیقت، البتە وفاتمدن صوڭرە دە او حقیقت بو صورتلە بنی ثواب جهتیلە دگل، دنیا جهتیلە منع ایتمەیە مجبور ایدەجك "دیدی.

خدمتندە بولونان طلبەلری

[٦٩٩]

[استادیمزڭ آفیون محكمە هیئتنە كوندردیگی یازینڭ صورتیدر]

بوكون سزی تبریك و سزە تشكّر ایچون آفیونە كلدم. چوقدنبری كتابلریمزڭ ضایع اولمامسی ایچون زیادە محافظە ایتدیگڭزە تشكّر ایدرم. و شیمدی آنقرەیە كوندرەجگڭزدن سزی تبریك ایدرم. اون سنە اوّل خصوصی اولارق بریسنڭ بریسنە یازدیغی و بعضًا دە بنم نامملە یازیلوب امضام بولونمایان و نشر اولمایان خصوصی مكتوبلر، اوّلجە محكمەڭزجە تدقیق ایدیلوب مدار مسئولیت بر شی بولونمدیغندن نظر اعتبارە آلینمدی. هم مرور زمانە اوغرامش و

نشر ایدیلمەمش و عفو قانونلری كورمش، معلوماتم اولمامش و رسالۀ نور كتابلریلە علاقەسی اولمایان مكتوبلری، یڭیدن نظر دقّتە آلمق، هم اهل عدالتی، هم اهل وقوفی لزومسز مشغول ایدەجگندن، بویلە اشغال ایتمەمسی و ایشمزڭ تأخیرە اوغرامامسی ایچون مذكور خصوصی مكتوبلرم، او مبارك كتابلرە طاقیلمامسی عدالتڭزدن تمنّی ایدییورز.

بو مبارك عدلیە ایكی دفعە او كتابلرڭ برائتلە اعادەسنە قرار ویردیگی حالدە، بعض اسبابە بناءً محبوس قالمش عین كتابلری بعضًا تمامنی، بعضًا الە كچیریلن قسمنی بش محكمەنڭ اعادە ایتدكلرینی و بش امنیت دائرەسی دە صاحبلرینە تسلیم ایتدكلرینی سزە خبر ویرییورز. ان شٓاء اللّٰه عدالتڭز و حسن نیتڭز بو دفعە دە اعادەسنە وسیلە اولاجق.

خستە سعید النّورسی

[٧٠٠]

دموقراتلرە بیوك بر حقیقتی اخطار

شیمدی قرآن، اسلامیت و بو وطن ضررینە اوچ جریان وار:

[برنجیسی] قومونیست، دینسزلك جریانی. بو جریان یوزدە اوتوز-قرق آدمە ضرر ویرەبیلیر.

[ایكنجیسی] اسكیدنبری مستملكاتلرڭ، توركلرلە علاقەلرینی كسمك ایچون، توركیە

دائرەسندە دینسزلگی نشر ایتمك ایچون، افساد قومیتەسی نامندە بر قومیتە. بو دە یوزدە اون-یگرمی آدمی بوزابیلیر.

[اوچنجیسی] غربلیلاشمق و خریستیانلرە بڭزەمك و بر نوع پروتلق مذهبنی اسلاملر ایچندە یرلشدیرمەیە چالیشان و دیندە حصّەسی اولمایان بر قسم سیاسیلر هیئتیدر. بو جریان یوزدە، بلكە بیڭدە بریسنی، قرآن و اسلامیت علیهنە چویرەبیلیر.

بز قرآن خدمتكارلری و نورجیلر، اوّلكی ایكی جریانە قارشو، دائما قرآن حقیقتلرینی محافظەیە چالیشمشز. ممكن اولدیغی قدر دنیایە و سیاستە باقمامەیە مسلگمز بزی مجبور ایدییورمش. شیمدی مجبوریتلە باقمەیە لزوم اولدی، كوردككە:

دموقراتلر، اوّلكی ایكی مدهش جریانە قارشو، بزە (نورجیلرە) یاردیمجی حكمندە اولابیلیرلر. هم اونلرڭ دیندار قسمی، دائما او ایكی دهشتلی جریانە مسلكلرنجە معارضدرلر. یالڭز دیندە حصّەسی آز اولان بر قسم، غربلیلاشمق و غربلیلرە تام بڭزەمك مسلگنی تعقیب ایدنلر ایسە، اوچنجی جریانە بر یاردیم ایدییورلر. مادام او جریانڭ یوزدە آنجق بریسنی، بلكە بیڭدن بریسنی پروتلر و خریستیان كبی یاپمغە چویرەبیلیرلر. چونكە اینكیلیز، ایكی یوز سنە ظرفندە تحكّم ایتدیگی ایكی یوز میلیون اسلامدن ایكی یوز آدمی پروتلغە چویرەمەمش و چویرەمز. هم هیچ بر تاریخدە بر اسلام، خریستیان اولدیغنی و قناعتلە باشقە بر دینی اسلامیتە ترجیح ایتمش اولدیغی ایشیتیلمدیگندن، اقتدار پارتیسندە بولونان

آز بر قسم، دینڭ ضررینە سیاست نامیلە اوچنجی جریانە یاردیم ایتسە دە، مادام او دموقرات پارتیسی، مسلك اعتباریلە اوتەكی ایكی جریان عظیمەنڭ طورمەسندە و دفع ایتمەسندە مجبوری وظیفەلری اولمەسندن، بو وطنە و اسلامیتە بیوك بر فائدەسی طوقونابیلیر.

بو جهتدن بز، دموقراتلری اقتدار یرندە محافظە ایتمەیە، قرآن منفعتنە كندیمزی مجبور بیلییورز. اونلردن خیر بكلەمك دگل، بلكە دهشتلی، باشدەكی ایكی جریانە سیاستلرنجە معارض اولدقلری ایچون، اونلرڭ آز بر قسمی دینە ویردكلری ضرری، وجودڭ پارچەلانمەسنە بدل، یالڭز بر پارماغی كسمك كبی پك جزئی بر ضررلە پك كلّی بر ضرردن قورتولمەمزە سبب اولویورلر بیلدیگمزدن، او اقتدار پارتیسنڭ لهندە اهل دینی یاردیمە دعوت ایدییورز. و دیندە لاابالی قسمنی دخی جدًّا ایقاظ ایدوب، امان چابوق حقیقت اسلامیەیە یاپیشیڭز اخطار ایدییورزكە، وطن و ملّت و اونلرڭ حیاتی و سعادتی، حقائق قرآنیەیە طایانمق و بتون عالم اسلامی آرقەسندە احتیاط قوّتی یاپمق و اخوّت اسلامیە ایلە درت یوز میلیون قرداشی بولمق و آمریقە كبی دین لهندە جدّی چالیشان معظّم بر دولتی كندینە حقیقی دوست یاپمق، ایمان و اسلامیتلە اولابیلیر.

بز بتون نورجیلر و قرآن خدمتكارلری، اونلرە هم خبر ویرییورز، هم اسلامیتە خدمتدە موفّقیتلرینە دعا ایدییورز. هم دە رجا ایدییورزكە، بو مملكتڭ بر اهمّیتلی محصولی و وطندە و شیمدی عالم اسلامدە پك بیوك فائدەسی و خدمتی بولونان