[٦٧٣]

(بو مكتوب صامسوندە منتشر بیوك جهاد غزتەسندە انتشار ایتمشدر. مفتریلرڭ تحریكاتیلە صامسوندە محاكمە آچیلمەسنە سبب اولمشدر. محاكمە برائتلە نتیجەلنمشدر.)

عالم اسلامڭ خلاصكاری، اهل ایمانڭ سرتاجی، رسالۀ نورڭ ترجمانی استادیمز بدیع الزّمان سعید النّورسی حضرتلرینە،

بو دفعە دیندار دموقراتلرڭ دلالتیلە آفیون محكمەسنجە رسالۀ نورڭ سربستیتنە، بتون رسالە، مكتوب و مجموعەلرینڭ صوچ موضوعی تشكیل ایتمدیگندن اعادەلرینە قرار ویریلمەسنی، سنەلرجە اوّل اعلان ایتدیگڭز "رسالۀ نور بنم دگل، قرآنڭ مالیدر.. قرآنڭ فیضندن كلمشدر. هیچ بر قوّت اونی آناطولینڭ سینەسندن قوپاروب آتامایاجقدر. رسالۀ نور قرآنە باغلیدر. قرآن ایسە عرش اعظملە باغلانمشدر. كیمڭ حدّی واركە، اونی اورادن سوكوب آتسین؟" دییە اولان حقیقتلی بیاناتڭزڭ آچیق بر تظاهری و بو علوی خدمتڭزڭ الٰهی و قرآنی اولدیغنڭ پارلاق بر دلیلی بیلەرك، بو برائت قرارینڭ عالم اسلامڭ و باخصوص بو ملّت اسلامیەنڭ سعادتلرینڭ باشلانغیجی اولمسی اعتباریلە، باشدە بتون وارلغیلە بو ظفرلری بكلەین و نور عائلەسنە رئیس و حقیقتلر دریاسنە قاپدان تعیین ایدیلن و ظلمت كفرلە طغیان ایتمش انسانلغە هادی احسان اولونان عزیز، سوكیلی استادیمز و بوڭا وسیلە اولمقلە اهل ایمانی كندیلرینە

دوست و طرفدار أیلەین دیندار دموقراتلری و عادل هیئت حاكمەیی صوڭسز منّتلرلە تبریك ایدر و عرض ایدرزكە:

اوزون سنەلردنبری ترقّی و تعالیسی ایچون چالیشدیغڭز و اوغرندە فدای نفس و جان أیلەدیگڭز حقیقت قرآنیەنڭ، بوكون بتون بر مملكت، بر ملّت چاپندە اهل ایمانڭ قلبلرینە سرورلر كتیرەرك فوق العادە انكشافی، خدمتنە مأمور قیلیندیغڭز و بالفعل موفّق اولدیغڭز قدسی دعوا و خدمتڭزڭ نە قدر یوكسك و پارلاق اولدیغنی كونش كبی اثبات ایدییور.

یگرمی بش - اوتوز سنەدنبری بتون مانعلرە و صیقینتیلرە رغمًا، بو قدر صبر و متانتڭز و قرآندن قلب منوّریڭزە كلن رسالۀ نورڭ نشری جهتندە بو قدر خدمت و مجاهدەلریڭز، استقبالڭ نسللرینە و اسلامڭ قهرمان مجاهدلرینە بر نمونۀ اقتدا و امتثال اولویور. قرآن كونشنڭ سونمەین نورلری و ابدی لمعەلری اولان نور شعاعلریلە، جهل و ضلالت قراڭلقلرینی ازالە ایدرك، میلیونلر قلبلری او نورلە نورلاندیروب، اهل ایمانی كندیڭزە منّتدار ایتدیڭز. بو وطن و بو ملّت، بو تاریخ و بو طوپراق، سزڭ بو خدمتڭزی، بو فداكارلغڭزی هیچ بر زمان اونوتمایاجقدر. ابدیّت عالمنە كوچ ایلەدیگڭزدە دخی، سزڭ بو خدمتڭز بر چكردك اولوب، اوندن فیشقیران بر شجرۀ عالیە هر طرفی قاپلایاجق و او نور آغاجنڭ اطرافنە طوپلانان بیوك جماعتلر و رسالۀ نورڭ یوكسلن ابدی شعاعلری، او خدمتڭزی الی الابد و داها پارلاق و داها شعشعەلی ادامە ایدەجكلر.

سز، رسالۀ نورڭ ترجمانی حیثیتیلە و بو ایمان خدمتڭزڭ اسلام افقلرندە پارلامسی جهتیلە، بو عصرڭ بر هدایت سرداریسڭز.

قرآن كریمڭ اون دردنجی عصر محمّدیدەكیؐ عزیز دلّالی و او مدهش زمانڭ مدهش ظلماتنە قارشو نور قرآنلە مقابلە ایدن بیوك فداكاری و رسالۀ نوری، یوز بیڭلر نسخەلرینی یوز بیڭلر طلبەلرینڭ قلملریلە هر طرفدە نشر ایدوب دینسزلگە و كفر مطلقە قارشو بر سدّ قرآنی تأسیس ایدن محتشم قهرمان سوكیلی استادیمز!

عالملرە رحمتلر و سعادتلر كتیرن و انسانلغە سلامت و تسلّیلر بخش ایدن بو مقدّس خدمتڭزدە، اهل ایمانە ظهورینی مژدە ویروب اثبات ایتدیگڭز و امارەلری كوزوكمەیە باشلایان و بتون قطعەلرە شامل حاكمیت اسلامیەنڭ نورلی و بیوك بایرامنی بتون روحمزلە تبریك ایدر، جناب حقدن اوزون عمرلریڭزە دعالر ایدر، اللریڭزدن تعظیملە اوپرز.

آنقرە اونیورسیتەسی نور طلبەلری

[٦٧٤]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ دَٓائِمًا اَبَدًا

عزیز، صدّیق قرداشلرم،

[اوّلًا] آنقرە اونیورسیتەسنڭ نور طلبەلری، رسالۀ نورڭ سربستیتنڭ قرارینە دائر پارلاق تبریكلری، هر طرفدەكی نور طلبەلرینی چوق سویندیردی.

كرچە رسالۀ نورڭ شخص معنویسنڭ بر ممثّلی معناسندە، بو بیچارە سعیدڭ حقّندە یوز درجە زیادە حسن ظنّڭز، وصفلریڭز خوشمە كیتمدی. فقط اخلاص و صداقتڭزڭ خاطری ایچون شخصمە عائد قسمنی دگیشدیردم. رسالۀ نورڭ قیمتی حسابنە و معناسنە قبول ایتدم.

[ثانیًا] آفیونە محكمەنڭ قرار مسئلەسنی آڭلامق ایچون قرداشمزی كوندردك و كلدی. هیئت حاكمە قراری، متّفقًا برائتنە قرار ویرمشلر. فقط مدّعئ عمومی اعتراض ایدرك تمییز ایتمش. محكمە هیئتی اعتراضنی قبول ایتمەمش. او دە رسمًا تمییز ایتمش. كیدن آرقداش قرارنامەنڭ صورتنی ایستەمش. هیئت دیمش: "اون كون صوڭرە ویرەجگز." دیمك محكمۀ تمییز باقنجەیە قدر اون بش كون تأخّر ایدەجك. شیمدی اڭ بیوك وظیفەمز و دیندار، دوست مبعوثلرڭ و حمیتپرور دموقراتلرڭ وظیفەسی، محكمۀ تمییز یگرمی سنەدر مستثنا اولارق دائما نورلرە عدالتكارانە باقمش. اوچ دفعە نورلرڭ برائتنی تصدیق ایتمش. و صوڭ اولارق آفیونڭ نورلر حقّندە مصادرە و حقّمزدەكی جزاسنی، محكمۀ تمییزڭ ایتمسی قوّتلی امید ایدییورزكە: محكمۀ تمییز كندی تصدیقلرینی تكذیب ایدەجك و آفیونە قارشو ردّینی تصدیق ایدەجك، یڭی آفیون محكمە هیئتنڭ قرارینی قبول ایدەجك.

بو نقطەنڭ بر تتمّەسی شودركە: رسالۀ نورڭ سربستیتیلە ملّتڭ اكثریت مطلقەسی اولان دیندارلری كندینە طرفدار ایدەجك. اذان محمّدیؐ، امام-خطیب مكتبلری

و مكتبلردە دین درسلری كبی، رسالۀ نورڭ سربستیتی دخی، دموقراتە پك بیوك و معنوی قوّت و نقطۀ استناد تأمین ایدوب، معارضلرڭ قومیتەجیلك قوّتلرینی هیچە ایندیرەجك.

[ثالثًا] سن عربی عصای موسی ایستەمشسڭ. نسخەلری پك آز قالمش. یالڭز ایكی نسخە عصای موسی دن و اوچ نسخە دە عربی خطبۀ شامیەدن سزە كوندریلدی. ایكی مكتب مصیبت شهادتنامەسی و نور عالمنڭ آناختارینڭ برر نسخەسنی بز كوندردك. اونلردن سزە نە قدر لازم ایسە بڭا عائد قسمندن، عبد المحسندن ایستەییڭز. اورادەكی بتون دوستلرە، خصوصًا خاصلرە دعا ایدییورم، دعالرینی ایستەیورم.

اَلْبَاقٖی هُوَ الْبَاقٖی

شدّتلی خستە قرداشڭز سعید النّورسی

[٦٧٥]

(بغداددە چیقان اَلدِّفاع غزتەسنڭ محرّری عیسی عبد القادرڭ عربی مقالەسنڭ ترجمەسی)

بغداددە چیقان اَلدِّفاع غزتەسی رسالۀ نور طلبەلرندن بحثلە دییوركە:

توركیەدەكی نور طلبەلرینڭ اخوان مسلمین جمعیتی ایلە علاقەلری نەدر، نە مناسبتی وار؟ هم فرقلری نەدر؟ توركیەدەكی نور طلبەلری، مصردە و بلاد عربدە اخوان مسلمین نامندە اتّحاد اسلامە چالیشان جمعیتلر كبی مستقل جمعیتمیدرلر؟ و اونلر دە اونلردنمیدر؟ بن دە جواب ویرییورمكە:

نور طلبەلرینڭ و اخوان مسلمین جمعیتنڭ كرچە مقصدلری، حقائق قرآنیە و ایمانیەیە خدمت و اتّحاد اسلام دائرەسندە مسلمانلرڭ سعادت دنیویە و اخرویەلرینە خدمت ایتمكدر. فقط نور طلبەلرینڭ، بش آلتی جهتلە فرقلری وار:

[برنجی فرق] نور طلبەلری، سیاستلە اشتغال ایتمز، سیاستدن قاچییورلر. اگر سیاستە مجبور اولسەلر، سیاستی دینە آلت یاپییورلر. تاكە سیاستی دینسزلگە آلت ایدنلرە قارشو، دینڭ قدسیتنی كوسترسینلر. سیاسی بر جمعیتلری اصلا موجود دگل.

اخوان مسلمین ایسە، مملكت و وضعیت سببیلە سیاستلە، دین لهندە اشتغال ایدییورلر و سیاسی جمعیت دە تشكیل ایدییورلر.

[ایكنجی فرق] نورجیلر، استادلریلە اجتماع ایتمییورلر و ایتمەیە دە مجبور دگللر. كندیلرینی استادلریلە اجتماعە مجبوریت حسّ ایتمییورلر. درس آلمق ایچون برابر بولونمەیە لزوم كورمییورلر، بلكە قوجە بر مملكت، بر درسخانە حكمندە. رسالۀ نور كتابلری اونلرڭ النە كچمكلە، استاد یرینە، اونلرە بر درس ویرر. هر بر رسالە، بر سعید حكمنە كچر.

هم اللرندن كلدیگی قدر اجرتسز استنساخ ایدرلر. محتاجلرە مقابلەسز [حاشیە]ویرییورلركە،

اوقوسونلر و دیڭلەسینلر. بو صورتلە بیوك بر مملكت، بیوك بر درسخانە حكمندە اولویور.

اخوان مسلمین ایسە، عمومی مركزلردە، مرشد و رئیسلریلە كوروشمك و امرلر و درسلر آلمق ایچون زیارتنە كیدرلر. و او عمومی جمعیتڭ شعبەلرندە دە او بیوك استادلە و نائبلریلە و وكیللری حكمندەكی ذاتلرلە یینە كوروشورلر، درس آلیرلر، امر آلیرلر.

هم عمومی مركزلردە چیقان جریدە و مجلّەلرڭ فیئٓاتنی ویروب آلوب، اونلردن درس آلییورلر.

[اوچنجی فرق] نور طلبەلری، عینًا عالی بر مدرسەنڭ و بر اونیورسیتە دار الفنوننڭ طلبەلری كبی، علمی مخابرە واسطەسیلە درس آلییورلر. بیوك بر ولایت بر مدرسە حكمنە كچر. بربرینی كورمدكلری، طانیمادقلری و اوزاق اولدقلری حالدە، بربرینە درس ویرییورلر و برابر درس اوقویورلر.

امّا اخوان مسلمین ایسە، مملكتلری و وضعیتلری اقتضاسیلە، مجلّەلری و كتابلری چیقارییورلر، اقطار عالمە نشر ایدییورلر. اونڭلە بربرینی طانییوب درس آلییورلر.

[دردنجی فرق] نور طلبەلری، بو زماندە و بوكوندە اكثر بلاد اسلامیەدە انتشار ایتمشلر و چوقلقلە واردرلر. بو انتشارلرندە آیری آیری حكومتلردە بولوندقلری حالدە، حكومتلردن اذن آلمەیە محتاج اولمییورلركە، تجمّع ایدوب طوپلانسینلر

و چالیشسینلر. چونكە مسلكلری سیاست و جمعیّت اولمدیغندن، حكومتلردن اذن آلمەیە كندیلرینی مجبور بیلمییورلر.

امّا اخوان مسلمین ایسە، وضعیتلری اعتباریلە سیاستە تماس ایتمەیە و جمعیّت تشكیلنە و شعبەلر و مركزلر آچمەیە محتاج بولوندقلرندن، بولوندقلری یرلردەكی حكومتدن اجازت و رخصت آلمەیە محتاجدرلر. و نورجیلر كبی بیلینمییور دگللر. و بو اساس اوزرینە، كندیلرینە عمومی مركزلری اولان مصردە، سوریەدە، لبناندە، فلسطیندە، اُرْدُندە، سوداندە، مغربدە و بغداددە چوق شعبەلر آچمشلر.

[بشنجی فرق] نور طلبەلری ایچندە چوق مختلف طبقەلر وار. یدی سكز یاشندەكی، جامعلردە قرآن اوقومق ایچون الفبایی درس آلمقدە اولان چوجقلردن طوت، تا سكسان طقسان یاشندەكی اختیارلرە وارنجەیە قدر، قادین اركك، هم بر كویلی، حمّال آدمدن طوت، تا بیوك بر وكیلە قدر و بر نفردن، بیوك بر قوماندانە قدر طائفەلر نورجیلردە وار. بتون نورجیلرڭ بو چوق طائفەلرینڭ عمومًا بتون مقصدلری، قرآن مجیدڭ هدایتندن و حقائق ایمانیە ایلە نورلانمقدن عبارتدر. بتون چالیشمەلری، علم و عرفان و حقائق ایمانیەیی نشر ایتمكدر. بوندن باشقە بر شیلە اشتغال ایتدكلری بیلینمییور. یگرمی سكز سنەدنبری دهشتلی محكمەلر دسّاس و قیصقانچ معارضلر، بو قدسی خدمتدن باشقە اونلردە بر مقصد بولامدقلری ایچون، اونلری محكوم ایدەمییورلر و طاغیتامییورلر. و نورجیلر،

مشتریلری و كندیلرینە طرفدارلری آرامەیە كندیلرینی مجبور بیلمییورلر. "وظیفەمز خدمتدر، مشتریلری آرامایز، اونلر كلسینلر، بزی آراسینلر، بولسونلر" دییورلر. كمّیتە اهمّیت ویرمییورلر. حقیقی اخلاصی طاشییان بر آدمی، یوز آدمە ترجیح ایدییورلر.

امّا اخوان مسلمین ایسە، كرچە اونلر دە نورجیلر كبی علوم اسلامیە و معرفت اسلامیە و حقائق ایمانیەیە تمسّك ایتمك ایچون انسانلری تشویق و سوق ایدییورلر.. فقط وضعیتِ مملكت و سیاستە تماس اقتضاسیلە، زیادەلشمەیە و كمّیتە اهمّیت ویرییورلر، طرفدارلری آرایورلر.

[آلتنجی فرق] حقیقی اخلاصلی نورجیلر، منفعت مادّیەیە اهمّیت ویرمدكلری كبی، بر قسمی، اعظمی اقتصاد و قناعتلە و فقیر الحال اولمەلریلە برابر، صبر و انسانلردن استغنا ایلە و خدمت قرآنیەدە حقیقی بر اخلاص و فداكارلقلە و چوق كثرتلی و شدّتلی اهل ضلالتە قارشو مغلوب اولمامق ایچون و محتاجلری حقیقتە و اخلاصە دعوت ایتمكدە بر شبهە بیراقمامق ایچون و رضای الٰهیدن باشقە او خدمت قدسیەیی هیچ بر شیئە آلت ایتمەمك ایچون، بر جهتدە حیات اجتماعیە فائدەلرندن چكینییورلر.

امّا اخوان مسلمین ایسە، اونلر دە حقیقتًا مقصد اعتباریلە عین ماهیتدە اولدقلری حالدە، مكان و موضوع و بعض اسباب سببیلە نور طلبەلری كبی دنیایی ترك ایدەمییورلر. اعظمی فداكارلغە كندیلرینی مجبور بیلمییورلر.

عیسی عبد القادر

[٦٧٦]

اَلدِّفاع جریدەسی صاحبی عیسی عبد القادرڭ نور طلبەلری حقّندەكی عربی مقالەسنڭ بر قسمنڭ خلاصە ترجمەسیدر. دییوركە:

جمهوریت غزتەسندە، "درت نورجیلر تحرّی ایدیلدی. سببی دە، نور طلبەلری توركیەدە بر دولت متدیّنە و شریعتلە عمل ایدەجك بر حكومت ایستەدكلرینە و دائما خلقلری اییلكلرە و اسلامیت آدابنە دعوت ایتمەلری ایچون حكومت اونلرە ایلیشییور." غایت غریب و عجیب بر حالتدركە، توركیە حكومتی، اویلە آدملرە ایلیشییوركە، اخلاصلریلە و تام دیانتلریلە توركیە حكومتنی یهودیلرڭ و ماصونلرڭ و قومونیستلرڭ شرّندن محافظە ایتمك ایچون توركیەدە چوجقلردن غایت اختیار اولانلرە قدر هر طائفەیە حقائق اسلامیە و ایمانیەیی درس ویرییورلر. و معنوی عسكرلر و ضابطلر كبی، او وطنی محافظەیە چالیشدقلری حالدە، هانكی بهانە ایلە حكومت اونلرە ایلیشییور؟ مادام عدنان مندرس، اسلام حكومتلریلە ال الە ویرمك ایستەیور، بویلە نور طلبەلری بتون قوّتیلە عالم اسلامڭ قوّتنە، اتّفاقنە چالیشانلرە یاردیم و حمایت و تشویق ایتمك لازم كلیر. اونلرڭ استادی اولان سعید النّورسی، دنیادن زهد و استغناسنڭ بر دلیلی شودر:

پاكستان حكومتنڭ نُوّاب مجلسنڭ معارف وكیلی اولان علی اكبر شاه، اوچ سنە اوّل سعید النّورسی یی زیارت ایتمش. عودتندە هم آنقرە دار الفنون

طلبەلرینە مهم بر قونفرانس ویرمش و دیمشكە: بن قرق سنەدنبری آرادیغمی شیمدی توركیەدە بولدم. بو سعید النّورسی، یالڭز تورك ملّتنڭ دگل، بلكە بتون عالم اسلامڭدر. بنم چوق زماندە، چوق سؤآللرم و مقدّرات عالم اسلام حقّندە چوق مشكللرم وار ایدی. سعید النّورسی ایلە كوروشدیگم بر ساعت ایچندە، یگرمی سنەلك مشكلاتم حلّ ایدیلدی. بن شیمدی بیوك مژدەلرلە مملكتمە دونویورم. عالم اسلام چوق بیوك عالملر كورمش. فقط، او بیوك عالملر راحت یاشامشلر. حالبوكە هركسدن زیادە زحمت چكن سعید النّورسینڭ منزلندە بر لامبەسی یوق درجەسندە دنیایی ترك ایتمش. عجبا توركیە حكومتی، نورجیلرڭ و استادلرینڭ شریعت اسلامیە ایلە عمل ایتمەلری و تشویق ایتمەلری و هیچ بر سیاستە قاریشمدقلری و حكومتە تحكّم ایتمدكلری حالدە، بالعكس آسایش و امنیّتی محافظە ایتدكلری حالدە، حكومت هانكی ضرر توهّم ایتمشكە، بونلرە ایلیشییور، حیرت ایدییورز.

عیسی عبد القادر

[٦٧٧]

بغداددە چیقان، اهمّیتلی، سیاسی بر جریدە اولان اَلدِّفاع غزتەسنڭ محرّری عیسی عبد القادر دییوركە:

نور طلبەلرینڭ مرشدی اولان بدیع الزّمان سعید النّورسی حقّندە اَلدِّفاع غزتەسنی اوقویانلر بندن صورویورلر. "توركیەدەكی نور طلبەلرندن و استادلری

اولان سعید النّورسیدن بزە معلومات ویر "دییورلر. بن دە بونلر حقّندە قیصە بر جواب ویرەجگم. چونكە استادڭ، نورڭ و نور طلبەلرینڭ عربلردە حقّی اولدیغی ایچون، عربلر اونلردن جدّی بحث ایتسینلر. زیرا اسلامیتڭ مادّۀ اساسیەسی اولان عربلر، رسالۀ نوردن زیادەسیلە فائدە كورمگە باشلامشلر.

بو نور طلبەلری رسالۀ نورلە، هم توركیەدە، هم بلاد عربدە قومونیستلگە قارشو محكم بر سد تشكیل ایدییورلر.

بو یازی، دموقراتلر چیقمادن اوّلكی زمانە باقار. اونڭ ایچون، نور طلبەلرینڭ عددی حقّندە مدّعئ عمومینڭ دیدیگی كبی، یالڭز بش یوز بیڭ دگل، بلكە شیمدی توركیەدە میلیونلری آشمش بولونویور و هر كون دە زیادەلشییور.

رسالۀ نور ایسە، اویلە كنیش بر مقیاس ایلە انتشار ایدییوركە، دگل یالڭز توركیەدە و بلاد اسلامیەدە، حتّی اجنبیلردە دە اشتیاقلە ایستەنیلیر اولویور. و نورڭ طلبەلرینڭ شوقلرینی هیچ بر شی قیرامییور. ایشتە نور طلبەلریلە نور رسالەلری و اونلرڭ بو بیوك خدمت قرآنیەلری، دموقرات حكومتنڭ بر بیوك حسنەسیدركە، مبارك عالم اسلامدەكی حركت اسلامیە، بو حكومت دموقراسیە یی تقدیر و تحسینلە قارشیلایور. بتون عراق اهالئ مسلمەسیكە، عرب، تورك، كورد، ایران بو اسلامی خدمتی و قدسی مجاهدەیی كمال فرح ایلە قارشولایورلر. و توركیەدەكی تورك قرداشلریمز، غربڭ یاڭلیش تأثیراتلرینە قارشو، بونلرلە مقاومت كوسترییورلر، قناعتندەدرلر.

عیسی عبد القادر

[٦٧٨]

[بِاسْمِهٖ سُبْحَانَهُ]

صامسون محكمەسندن صورغو و صاوجینڭ، "بیوك جهاد دە" انتشار ایدن بر شكوامە دائر بنی صامسون آغیر جزا محكمەسنە ویرمەلرینە دائر بر دعوتیە كلدی. بڭا اوقودیلر. ایچندە یالڭز درت نقطە، نظر اهمّیتە آلینابیلیر كوردم:

[برنجیسی] بیوك جهادڭ مدیر مسئولی، محكمەدە مدّعی عمومی یە دیمشكە: "سعید النّورسی او مقالەیی بڭا كوندرمش. بن دە نشر ایتدم."

بو مسئلەنڭ حقیقتی شودر: بن خستە ایكن امرطاغندەكی قرداشلرم یانمە كلدیلر. امرطاغندە باشمە كلن ظالمانە حادثەیە دائر قونوشدق. هم خستەلقلی، هم حدّتلی، هم آنقرەیە شكوا صورتندە بر شیلر سویلەمشدم. یانمدەكی خدمتجیم قلمە آلدی. نور طلبەلرینڭ تنسیبیلە آنقرەدەكی بر ایكی نور طلبەسنە كوندروب، تا بعض دیندار مبعوثلرە كوسترسینلر. بو خستەلغمدە بڭا صیقینتی ویریلمەسین. هم كوندریلمش، بعض مبعوثلر دە كورمش. و بیلمدیگمز بر ذاتڭ خوشنە كیدەرك، بیوك جهاد مدیرینە كوندرمش. بن قسم ایدرمكە، او زماندن شیمدی یە قدر بیلمییورمكە كیم كوندرمش؟ فقط نشر اولدقدن صوڭرە بر نسخە بورایە كلمش. یڭی حرفلری بیلمدیگم ایچون بڭا بریسی اوقودی. بن ممنون اولدم. اللّٰه راضی اولسون نشر ایدنلرە دیدم.

كرچە اوتوز بش سنەدنبری سیاستی ترك ایتمشم. فقط بیوك جهاد كبی، خالصانە دینە خدمت ایدن او جریدەیە و اونڭ صاحب و محرّرلرینە، دین نامنە منّتدار

اولدم و اللّٰه راضی اولسون دیدم. خبرم اولمادن و پارە دە ویرمدن دائما بڭا او مبارك غزتە كوندریلییوردی.

[ایكنجی نقطە] بنم صامسوندەكی آغیر جزا محكمەسنە سوق ایدیلمكلگمە دائردر. بو نقطەدە بونی قطعیًّا بیان ایدییورمكە، صامسون حوالیسندە، خصوصًا بیوك جهاد دائرەسنە منسوب مبارك آخرت قرداشلرم و نور طلبەلرینی زیارتلە كورمك ایچون اورایە كیتمك ایستردم. فقط دوقتورلرڭ راپورلریلە قطعی اقتدارسزلغم او درجەیە كلمشكە، بش دقیقەلق قارشومدەكی، بو مسئلەنڭ باشلانغیجی و اساسی اولان محكمەیە، بر بوچوق سنەدر بڭا خبر ویردكلری حالدە كیدەمییورم. مجبوریتلە مدّعئ عمومی و حاكم وظیفەسنی كورن صورغو حاكمی یانمە كلدیلر. مدار سؤآل و جواب بیوك جهاد غزتەسنی دە كتیردیلر. غزتەنڭ بعض سوزلری، بنم سوزلرم ایچنە قاریشدیریلمش. بن دە اونلرە جوابلرینی ویرمشدم. اگر فرضا آغیر جزا، بو اهمّیتسز مسئلەیە اهمّیت ویرسە، بنم محكمەمی اسكیشهرە نقلنە مساعدە ایتسینكە، اورادە صحّیە هیئتندن ایكی آیلق راپورلی زهر خستەلغی ایلە شدّتلی خستە بولوندیغمدن بالذّات بولونابیلیرم. یوقسە امكانی یوقدر.

[اوچنجی نقطە] صاوجی و صورغو حاكمی، ١٦٣ نجی مادّەیە طایانوب، سعید النّورسی یی دینی سیاستە آلت و آسایشە ضررلی پروپاغاندە دییە اتهام ایدییورلر. بو نقطەنڭ حقیقتنی یگرمی طوقوز سنەدر، بش آلتی محكمە و بش آلتی ولایتڭ ضابطەلری