بتون روح و جانمزلە تبریك ایدییورز. عموم قرداشلریمزە و همشیرەلریمزە بیڭلر سلام ایدر، دعا ایدر و دعالریڭزی ایستەیورم.

اَلْبَاقٖی هُوَ الْبَاقٖی

قرداشڭز سعید النّورسی

[٥٩٦]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] مباركلر كویندن علی ایلە حاجی سلیمان و دینار طرفندن عبد الرحمن و همّت و داها اوّل كلن اهمّیتلی بر نورجی همشهریسی یانمە كلدیلر. جناب حقّە چوق شكرلر ایدییورمكە، مباركلر كویندە قولە أوڭی اسكیسی كبی نورلرە شدّتلی علاقەلرینی محافظە ایدییورلر. و اونلرڭ صداقت و اخلاصلرینڭ بر كرامتیدركە، كندیمە مخصوص اون مجموعە كتابلریمی لزومنە بناءً آنقرەیە كوندردیگم و چوق اهمّیتلی و اوزاق یرلردن بندن كتابلری ایستەدكلری عین زماندە، قولە أوڭی مباركلری كندیلرینە مخصوص نور مجموعەلرینی، كوندردیگم مقدارڭ عینی اولارق مدرسة الزّهرانڭ بر هدیەسی اولارق بڭا كتیردیلر. خصوصًا برنجی عبد الرحمن اولان بیوك مصطفینڭ كندی ال یازیسی اولان بتون مكتوبات و لاحقەیی ایچندە بولدم. جناب حق، او كتابلرڭ حرفلری عددنجە هر بریسنە مقابل بیڭ رحمت احسان ایتسین. آمین.

[ثانیًا] اون بر آی خسروڭ استراحتنە فوق العادە خالصانە حپسدە خدمت ایدن

و مدافعاتندە غایت كوزل مقابلە ایدن، نورڭ كوچك قهرمانلرندن مصطفی، دونكی كون بنم یانمە كلدی، دیدی: بن، آغابگم خسروڭ یاننە زیارتنە كیدەجگم. دیدم: كرچە هم سنڭ، هم اونڭ حقّڭزدر بو زیارت. فقط بوكون درت طلبە كلدیلر، اسپارطەیە كیتدیلر، او جهتدە احتیاج قالمدی. سن دە رسالۀ نور حسابنە مهم بر كویدە امام اولدیغڭ ایچون، او خدمت دە بنم شخصی خدمتمدن داها زیادە نورلرە فائدەسی اولدیغی كبی، خسروڭ زیارتندن شیمدیلك داها قیمتدار اولابیلیر. اگر او كویدە خدمت نوریە اولماسەیدی، مصطفی كبی خالص و فداكار خدمتكارە احتیاجم واردی. اویلە ایسە، شیمدیلك زیارتی تأخیر ایت.

[ثالثًا] قونیەلی حاجی صبری قرداشمز یانمە كلدی. بن، صادق، خیری، مصطفی حاضر ایكن، چوق اهمّیتلی صحبتمز حاجی صبری یە مهم بر درس اولدی. بالخاصّە مدرسة الزّهرا اركانلرینڭ، خصوصًا خسروڭ بو وطن و ملّت و عالم اسلامە خدمت ایمانیەلری و تخریبجی دینسزلرڭ دسیسەلرینە سد چكمەلری او قدر بیوك بر حسنەدركە، فرض محال بیڭلر سیّئە اولسە عفو ایتدیرر. اویلە ایسە، باشدە خسرو اولارق او اركانلرڭ هیچ بر حركتنی تنقید ایتمەمك و كمال اخلاص و صمیمیت ایلە اونلرە تساند و تام قرداش اولمق لازمدر دییە بو مأٓلدە بر درس اولدی. ان شٓاء اللّٰه حاجی صبری دە، خواجە صبری و رشدی و امثاللری كبی، روح و جان ایلە علاقەدار و خسروە تام قرداش اولاجق، مشرب اختلافی داها تأثیر ایتمەیەجك.

اَلْبَاقٖی هُوَ الْبَاقٖی

عموم نورجیلرە سلام. خستە قرداشڭز سعید النّورسی

[٥٩٧]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] بتون روح و جانملە كچمش مولد نبویڭزی تبریك ایدییورز.

[ثانیًا] سزڭ نورڭ نشرندەكی موفّقیتڭزی عالم اسلام تبریك ایدوب آلقیشلایاجق. شیمدی دە امارەلری كورونویوركە، ازجملە بر نمونەسی: پاكستان معارف وكیلی نورلر ایچون بنم یانمە كلدی، رسالۀ نورڭ بر مهم قسمنی آلدی. "طقسان میلیون مسلمانلر ایچندە نشرینە چالیشاجغم" دیدی. آلدی، كیتدی. هم بو قدر علیهمزدە منافقلر چالیشدقلری حالدە، هم آوروپەدە، هم آسیەدە اوزاق یرلرە رسالۀ نوری كوتورمشلر. هم ایستەیورلر. هم بَرْلیندە آلمانلر ذوالفقاری آلدقلری وقت، بر غزتەلرندە آلقیشلایارق اعلان ایتمشلر. هم داخلدە اهل ایمان، اڭ زیادە معارضلر اولان اسكی باش باقان و داخلیە وكیلی، یاساق ایتدكلری عصای موسی و ذوالفقاری یاساقلرینە اهمّیت ویرمەیەرك كمال شوق ایلە اوقویورلر. اوقویانلر آنقرەدە پك زیادەدر. هم برقاچ یردە حپسخانە مدیرلری ایكی اوچ ولایتدە قرار ویرمشلركە، بز حپسخانەلری مدرسۀ نوریە یاپاجغزكە، بزم محبوسلر دە دڭزلی، آفیون حپسلری كبی نورلرلە اصلاح اولسونلر.

[ثالثًا] مرحوم برهان نورڭ امّی و كیزلی قهرمانی ایدی. هم اونڭ اقرباسنی،

هم اسپارطەیی، هم مدرسة الزّهرا شاكردلرینی تعزیە ایدییورم. بش آلتی- كون اوّل خبر آلمشدم. شیمدی یە قدر بش آلتی- كون ظرفندە بلكە بیڭ دفعە اوڭا دعا ایتمشم. چونكە آلتی كوندە وردمدە درت یوزە یاقین (اَجِرْنَا مِنَ النَّارِ) دیدیگم وقت، اونی دە نیت ایدییورم. بتون اوقودقلریمی برهانە هدیە ایدییورم.

[رابعًا] نورلر، مكتبلری تام نورلاندیرمەیە باشلادی. مكتب شاكردلرینی، مدرسە طلبەلرندن زیادە نورلرە صاحب و ناشر و شاكرد أیلەدی. ان شٓاء اللّٰه مدرسە اهلی، یاواش یاواش حقیقی ماللری و مدرسە محصولی اولان نورلرە صاحب چیقاجقلر. شیمدی دە چوق مفتیلردن و چوق علمالردن نورلرە قارشو چوق اشتیاق كورولویور و ایستەیورلر. شیمدی اڭ مهمّی تكیەلر اهلی، اهل طریقتدر. بتون قوّتلریلە نور رسالەلرینی نورلاندیرمەلری و صاحب چیقمەلری لازم و الزمدر. [حاشیە]شیمدی یە قدر بن یالڭز ایمان حقیقتنی دوشونوب "طریقت زمانی دگل، بدعەلر مانع اولویور" دیدم. فقط شیمدی سنّت پیغمبریؐ دائرەسندە بتون اون ایكی بیوك طریقتڭ خلاصەسی اولان و طریقلرڭ اڭ بیوك دائرەسی بولونان رسالۀ نور دائرەسی ایچنە، هر طریقت اهلی كندی

طریقتی دائرەسی كبی كوروب كیرمك لازم و الزم اولدیغنی بو زمان كوستردی. هم اهل طریقتڭ اڭ كناهكاری دخی چابوق دینسزلگە كیرەمییور، قلبی مغلوب اولامییور. اونڭ ایچون اونلر تام صارصیلماز، حقیقی نورجی اولابیلیرلر. یالڭز ممكن اولدیغی قدر بدعتلرە و تقوایی قیران بیوك كناهلرە كیرمەمك كركدر.

[خامسًا] شیمدی بو زماندە اڭ بیوك تهلكە اولان زندقە و دینسزلك و آنارشیلك و مادّیونلغە قارشو یالڭز و یالڭز تك بر چارە وار: او دە، قرآنڭ حقیقتلرینە صاریلمقدر. یوقسە قوجە چینی، آز بر زماندە قومونیستلگە چویرن مصیبت بشریە، سیاسی، مادّی قوّتلرلە صوصماز. یالڭز اونی صوصدیران حقیقت قرآنیەدر. رهبر رسالەسندەكی لیلۀ قدر مسئلەسی، شیمدی هم آمریقە، هم آوروپەدە اثری كورولویور. اونڭ ایچون شیمدیكی بو حكومتمزڭ حقیقی قوّتی، حقائق قرآنیەیە طایانمق و خدمت ایتمكدر. بونڭلە احتیاط قوّتی اولان اوچ یوز اللی میلیون اخوّت اسلامیە ایلە اتّحاد اسلام دائرەسندە قرداشلری قزانیر. اسكیدن خریستیان دولتلری بو اتّحاد اسلامە طرفدار دگلدیلر. فقط شیمدی قومونیستلك و آنارشیستلك چیقدیغی ایچون، هم آمریقە، هم آوروپە دولتلری قرآنە و اتّحاد اسلامە طرفدار اولمغە مجبوردرلر.

[سادسًا] یانمە نور طلبەسی بر مبعوث كلدی، دیدیكە: بن عدلیە باقانلغنە كیتدم. آفیوندە نورلری مصادرە قرارینی سویلەدم. عدلیە وكیلی اوز یوروك دیدیكە: "بن آفیون محكمەسنە نورلرڭ تمامًا ویریلمەسنە امر ویردم. حتّی بندەكی

عصای موسی یی دە مؤلّفنە اعادە ایدەجگم "دییە بڭا سویلەدی. خلیل اوز یوروكڭ بو سوزی، دموقراتلرە و نورلرە طرفدارلغنی كوسترییور. عمومە بیڭلر سلام.

اَلْبَاقٖی هُوَ الْبَاقٖی

قرداشڭز سعید النّورسی

آنقرە نورجیلرینە یازیلمش مكتوبدر.

[٥٩٨]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم و نورڭ كنچ قهرمانلری،

[اوّلا] روح و جانمزلە سزڭ آنقرە كبی یردە خارقە بر طرزدە خدمت نوریەڭزی تبریك ایدییورز. حقیقتًا امیدیمزڭ فوقندە اهل معارف و مكتبلیلر قسمندە چوق اهمّیتلی بر انتباهە وسیلە اولدیڭز. بر سنەدە آنقرە كبی بر یردە بو خدمتڭز، اون سنەدە آنجق یاپیلاجق بو وظیفۀ ایمانیّەیی آز بر زماندە یاپدیغڭزە قناعت ایدوب قوّۀ معنویەڭز، اهمّیتسز حادثەلرلە قیریلماسین. بلكە داها شدّتلی چالیشمەڭزە وسیلە اولسون. او كبی یرلردە داخلدن و خارجدن كلن یگرمی قدر سیاسی و اجتماعی جریانلرڭ خودفروشانە و غرضكارانە چارپیشدقلری بر زماندە، قرآن و ایمانە خدمتڭز و اونیورسیتەلیلرڭ نورلرە تقدیركارانە صاحب چیقمەلری، بتون نورجیلری سویندیردیگی كبی، ایلریدە ان شٓاء اللّٰه عالم اسلامی دە سویندیرەجك.

سزلرڭ آز خدمتڭزدە مكافات چوقدر. بعضًا عسكرلكدە آغیر شرائط آلتندە بر ساعت نوبت، بر سنە عبادت حكمندە اولدیغی كبی.. سزلر و استانبول اونیورسیتەلی نورجیلری دخی، آز زماندە چوق وظیفە كوردیڭز. مساعیڭزڭ ثمرەسی آز دە اولسە قناعت ایدیڭز. مجاهدە جبهەسندە بعض ضعیفلرڭ كری چكیلمەسی، جسورلردە داها زیادە قهرمانلق طمارینی تحریك ایتدیگی كبی.. سزڭ كبی نور فداكارلری، وهّاملرڭ چكیلمەسیلە داها زیادە غیرت و ثباتە، بلكە شوق ایلە داها زیادە چالیشمەیە سبب اولمق كركدر.

اوت، رسالۀ نورڭ مهم بر حقیقتندن سز فطرتًا بر درس آلدیڭز. یینە او حقیقتی نظر دقّتە آلیڭز. او دە شودر:

وظیفەمز، اخلاص ایلە، ایمان و قرآنە خدمت ایتمكدر. امّا بزی موفّق ایتمك و خلقە قبول ایتدیرمك و معارضلری قاچیرمق ایسە، او، وظیفۀ الٰهیەدر. بز بوڭا قاریشمایاجغز. مغلوب دە اولسەق، قوّۀ معنویەیە و خدمتمزە نقصانلق ویرمەیەجك. او نقطەدە قناعت ایتمك لازمدر. مثلا، بر زمان اسلامڭ بیوك بر قهرمانی جلال الدّین خوارزم شاهە دیمشلر: "جنكیزە قارشو مظفّر اولاجقسڭ." او دیمش: "وظیفەمز جهاد ایتمكدر. بزی غالب ایتمك وظیفۀ الٰهیەدر. اوڭا قاریشمام." سزڭ شیمدی یە قدر صارصیلمادن خالص خدمتڭزڭ دلالتیلە، سز دە بو قهرمانە اقتدا ایتمشسڭز. بیڭدن بر ایكی آدم سزدن قبول ایتسە، یینە صارصیلمامق كركدر. بعضًا بر ایكی آدم، بیڭە مقابل كلییور.

[ثانیًا] آنقرەدە بو صیرەدە نظرلر دنیایە زیادە چوریلمش. و اقتدار قسمی، داها تام پرنسیبنی قبول ایتمەیە وقت بولامامش. متعدّد پارتیلر كندینە طرفدار بولمق ایچون ویا قباحتلرینی ستر ایتمك ایچون، البتە چوق چالیشییورلر. و اسلامیت و قرآن علیهندەكی خارجدەكی جریانلر، البتە داخلدە بعضیلرینی بولمشلركە، قرآن لهندە جدًّا چالیشانلری اوچورمق، قاچیرمق، اوهام ویرمك كبی پروپاغاندەلرلە، حقیقی فداكار اولمایان ویا دنیا ایلە و فضلە دوستلری ایلە علاقەدار اولانلری اوهاملاندیرییورلر و نورجیلرڭ دە قوّۀ معنویەلرینی قیرمغە چالیشییورلر.

اَلْبَاقٖی هُوَ الْبَاقٖی

سعید النّورسی

[٥٩٩]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق و مبارك قرداشلرم،

[اوّلا] نوردن، بڭا چوق لزومی بولونان مدرسة الزّهرانڭ فتوحاتجی محصولاتنی و قهرمان طاهرینڭ مرحومە حرمی ایلە و مرحومە ایكی كریمەسی نامنە كوندردیگی مجموعەلرینی و ایكی هفتە اوّل مرحوم حافظ علینڭ بر خیر الخلفی مصطفینڭ تام زمانندە تمام مكتوباتنی و نورڭ متین بر قوماندانی رأفت بگڭ كندی قلمیلە

یازدیغی مبارك مجموعەسنی و پك كوزل و معنیدار رؤیالی مكتوبنی آلدم و چوق سویندم. اونلرڭ هر بر حرفنە، جناب ارحم الرّاحمین سزڭ هر بریڭزە، بیڭ حسنە احسان ایتسین. مرحومە خدیجە و مرحومە هجرتڭ و مرحومە عائشەنڭ روحلرینە و قبرلرینە بیڭلر رحمت أیلەسین. آمین.

[ثانیًا] ایكنجی بر خسرو اولان مصطفی اوسمانڭ مكتوبندە صبری نامندە بر قرداشمزڭ، بنم خدمتم ایچون یانمە كلمەسنی ایستەمسی بنی چوق ممنون ایتدی. او كلمش و برقاچ آی خدمت ایتمشجەسنە قبول ایدییورم. فقط شیمدی بنم خدمتمە خارجدن كلمەیە احتیاج قالمامش. نە وقت احتیاج اولورسە او زمان خبردار ایدەجگم. حقیقتًا افلانی حوالیسندە، اسپارطە قهرمانلری ماهیتندە كوچك قهرمانلر یتیشمگە باشلامش.

[ثالثًا] نورڭ دمیر باش كاتبی و شاكردی كاتب عثمانڭ، رسالۀ نور باغچەسندن كوندردیگی یاش اوزوم تبرّكنی و مدرسة الزّهرانڭ چوق اهمّیتلی بر شعبەسی و بر مركزی اولان صاوەنڭ غایت مبارك تبرّكلرینی، قاعدەمە مخالف اولارق اونلرڭ خاطری ایچون قبول ایتدم. و كیمە ییدیرسەم دە، اونلرڭ خیری اولارق ییدیرەجگم.

[رابعًا] نور قهرمانی خسروڭ، بن امرطاغندە ایكن بڭا یازدیغی عموم مكتوبلرندن مهم پارچەلرینی، خصوصًا بنم یازدیغم مكتوبلرڭ خلاصەلرینی حاوی قسملرینی بر دفتردە یازمشدم. فقط بن حپسدە ایكن بریسی خوشنە كیتمش، آلمش،

غائب اولدی. شیمدی تكرار اسكی مكتوبلرندن قرق قدر بندە وار. اونلری ان شٓاء اللّٰه بن اشارت ایدەجگم. بورادە یازدیراماسەم سزە كوندرەجگم. بر دفتردە جمع ایدیلەرك بلكە دە اهمّیتنە بناءً تكثیر ایدیلەجك.

[خامسًا] سوزلر مجموعەسندن اون بش دانەسنی آنقرەیە كوندردم. چوق فائدە ویرمش. اورادەكی نورجیلر قهرمانجەسنە احتیاط پردەسی آلتندە چالیشییورلر.

[سادسًا] سزدە بولونمایان و خسروڭ ایستەدیگی مكتوباتی تصحیح ایتدم. بریسیلە كوندرەجگم. بو دفعە یگرمی دردنجی مكتوبی چوق قیمتلی، چوق اینجە، چوق درین، عین حقیقت كوردم. عمومە بیڭلر سلام.

اَلْبَاقٖی هُوَ الْبَاقٖی

سعید النّورسی

[٦٠٠]

[بِاسْمِهٖ سُبْحَانَهُ]

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق و مبارك قرداشلرم،

[اوّلا] قرداشمز اینەبولی خسروی نظیف چلبی بڭا یازییوركە: "حزب نوریە و صلواتڭ نشرینی بیتیردكدن صوڭرە نە مناسب ایسە نشر ایدەجگم" دییە صورویور. بنجە سزڭ تنسیبڭزلە خستەلر و اختیارلر لمعەلری و اون یدنجی مكتوب اولان چوجقلرڭ قیصەجق تعزیەنامەسی و یگرمی برنجی مكتوب -اختیارلرە خدمت

حقّندەكی قیصە مكتوبڭ- نشری مناسبدر. فقط مدرسة الزّهرانڭ اركانی، هانكی جملە و هانكی فقرە مناسب كورورلرسە، قالدیرابیلیرلر و اصلاح ایدەبیلیرلر. و داها قیصە باشقە مناسب رسالەلر وارسە، علاوە ایدەبیلیرلر. بو مأٓلدە قهرمان نظیفە چابوق جواب كوندریڭز. حقیقتًا، او قرداشمزڭ جوشن الكبیری و حزب نوریەیی صلوات ایلە برابر نشری، نورجیلرە و اهل ایمانە بیوك بر خدمتدر. جناب حق هر بر حرفنە مقابل، اوڭا و یاردیمجیلرینە بیڭ ثواب احسان ایتسین. آمین.

[ثانیًا] یڭی اهل حكومت یاواش یاواش آڭلایوركە، حقیقی قوّت قرآندەدر. و اسلامیت اخوّتی ایلە و ایمانڭ حقائقی ایلە تخریباتجی دوشمانلرە قارشو طایانابیلیرلر. اوت، بر تخریبجی، یگرمی تعمیرجی یی تلاشە دوشورور و بعضًا مغلوب ایدەبیلیر. قوجە چینی كندینە تابع یاپان بر قوّتی، بورادەكی یگرمی میلیون مسلمانە قارشو عادتا مغلوب بر وضعیتدە تجاوزدن طوردیران، مادّی قوّتلر، خارجی داخلی- تدبیرلر، اتّفاقلر دگل، بلكە یالڭز قرآن و ایمانڭ حقیقتلری، اونلرڭ اڭ بیوك قوّتی اولان معنویات قلبیەیی تخریباتلرینە قارشو سد چكمەسی و معنوی یارەلرینی تداوی ایتمەسیدر. و یڭی حكومتڭ معارف وكیلی بو حقیقتی حسّ ایتمشكە، سلفلرینە مخالف اولارق، اڭ زیادە ایمان حقیقتلرینڭ نشرینە، دین درسلرینە اهمّیت ویرییور. حتّی بیوك بر اهمّیتلە شیمدی دە شرق دار الفنونی -تعبیرلرنجە طوغو اونیورسیتەسی- ایچون یوز بیڭ لیرە تخصیص ایدیلدیگنی غزتەلر یازمش.

هم مذكور حقیقتی، هم آنقرە، هم استانبول اونیورسیتەلری او دهشتلی، تخریباتجی قوّتە قارشو هم وطنی، هم كنچلگی قورتاراجق حقائق قرآنیە و ایمانیە اولدیغنی قطعیًّا بیلدیلركە، آنقرەدەكی اونیورسیتەلیلر، بیڭ یدی یوز امضا ایلە معارف وكیلنڭ دین درسلرینی جبری مكتبلرە قویمسی ایچون تبریك ایتمشلر. و استانبول اونیورسیتەسندە یڭی حكومتڭ اڭ مهم بر ركننە دیمشلركە:

"آناطولیدە دین لهندە قوّتلی بر جریان وار. اونلرە دە صولجیلر كبی بر درجە میدان ویرمەیەجگز" دیمەسنە مقابل، او اونیورسیتەنڭ ممثّلی، دین نشریاتی یاپانلر علیهندە اولدیغی حالدە، او رئیسە دیمشكە:

"اگر دیدیگڭ او جریان رسالۀ نور ایسە، نە سز و نە دە آوروپە اونی مغلوب ایدەمز."

بو مسئلە مناسبتیلە مسلك و مشربمە مخالف اولارق اسكی سعیدڭ بر ایكی دقیقە قفاسنی باشمە آلارق دییورمكە:

كفر ایلە ایمان اورتەسی یوقدر. بو مملكتدە اسلامیتە قارشو قومونیست مجادلەسی اورتەسی اولاماز. صاغ و صول اورتەسی اوچ مسلك ایجاب ایتدیرر. اگر اینكیلیز، فرانسز دیسەلر، حقلری وار. صاغ اسلامیت، صول قومونیستلك، اورتەسی دە نصرانیّت دییەبیلیرلر. فقط بو وطندە كفر مطلقە قارشو ایمان و اسلامیتدن باشقە بر دین، بر مذهب اولاماز. اولسە، دینی بیراقوب قومونیستلگە

كیرمكدر. چونكە حقیقی بر مسلمان هیچ بر زمان یهودی و نصرانی اولامییور. اولسە اولسە دینسز اولوب تام آنارشیست اولور.

ان شٓاء اللّٰه، معارف و عدلیە وكیللری كبی سائر اركانلر دە بو اهمّیتلی حقیقتی تام آڭلایاجقلر. صاغ صول- تعبیری یرینە، حق و حقیقت و قرآن و ایمان قوّتنە طایانوب بو وطنی كفر مطلقدن، آنارشیلكدن، زندقەدن و اونلرڭ دهشتلی تخریباتلرندن قورتارمغە چالیشمەلرینی رحمت الٰهیەدن بتون روح و جانمزلە نیاز و رجا ایدییورز. عمومڭزە بیڭلر سلام.

اَلْبَاقٖی هُوَ الْبَاقٖی

سعید النّورسی

[٦٠١]

[بِاسْمِهٖ سُبْحَانَهُ]

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] مدرسة الزّهرانڭ مدرسۀ نوریەسی اولان صاوە قهرمانلرینڭ، باشدە مصطفی كلڭ، غایت كوزل و ایچندە نورڭ چوق مبارك شاكردلرینڭ اسملری بولونان مكتوبی بنی چوق سویندیردی. او مكتوبدە اسملری بولونان او خالص، فداكار قرداشلریمە برر برر سلام و دعا ایدرم و دعالرینی ایسترم.

[ثانیًا] اینەبولی قهرمانی نظیف چلبینڭ بنم حسابمە سزە كوندرەجگی بش یوز جوشن، اوچ یوز حزب الاكبر نوریەدن، امرطاغندە بڭا یوز جوشن،

یوز حزب الاكبر نوریەیی كوندریڭز. اوتەكی قسمی، بنم سزە بورچلرم حسابنە سز اورادە مشتاقلرە ویررسڭز. سز مناسب كوردیگڭز فیئٓاتە ویررسڭز.

[ثالثًا] بر ایكی هفتە اوّل، مصرڭ جامع الازهرینڭ بیوك بر مدرّسی اولان علی رضا، بورایە خصوصی بر آدمی كوندردیگی كبی، ایكی كون اوّل دە اصلاً بخارالی و مدینۀ منوّرەدە مجاور و مصردە بیوك عالملرلە و خصوصًا اسكی شیخ الاسلاممز و دار الحكمتدە بنم آرقداشم مصطفی صبری افندیلە علاقەدار و بو طرفە كلەجگنە دائر اونلرلە كوروشن و بر درجە اونلرڭ نامنە مهم بر عالم یانمە كلدی. بن دە جامع الازهرە هدیەء وقفیەم اولارق، اون بر دانە خصوصی مجموعەلریمی او ذات واسطەسیلە عالم اسلامڭ بیوك مدرسەسی اولان و او عالمڭ اخباریلە شیمدی یگرمی یدی بیڭ طلبەسی بولونان جامع الازهرە هدیە اولارق او ذاتە ویردك.

هم دیدك: باشدە مصطفی صبری و علی رضا و محمد زاهد كوثری اولارق نور مجموعەلرینە بنم بدلمە صاحب و حامی و وارث اولسونلر و عربی یە ترجمەسنە چالیشسینلر، دیدك. مكتوب دە یازدق. او ذات دە آلدی، كیتدی. عموم قرداشلریمە و همشیرەلریمە سلام ایدرم، دعالرینی ایسترم.

اَلْبَاقٖی هُوَ الْبَاقٖی

قرداشڭز سعید النّورسی

تصحیحە وقت بولامدق، سز تصحیح ایدرسڭز و تبدیل دە ایدرسڭز.