جناب ارحم الراحیمندن تضرّع و نیاز أیلرمكە، رسالۀ نورە و استادیمزە بو حسن فیضینڭ آجیسنی اونوتدیراجق داها چوق حسن فیضیلر احسان بویورسون. و اونلرڭ باشلرندە استادیمزی مسعود و بختیار و معمّر بویورمەسنی، اونڭ دریای رحمتندن، فضلندن، عنایتندن، احسانندن، اكرامندن، انعامندن، الطافندن امیدوار اولوب، كورمكلگمزی تضرّع و نیاز أیلرم

اَلْبَاقٖی هُوَ الْبَاقٖی

كناهكار، عاجز، قصورلی قرداشڭز خلیل ابراهیم

[٣١٩]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

پك مبارك و محترم، چوق سوكیلی و مشفق استادم افندم حضرتلری،

نورلرڭ نشری و طبعی حقّندەكی استرحاماتمی ردّ ایتمیەرك قبول و بو حقیر و بیچارە شاكردیڭزی محضا بر لطف و عنایتڭزلە اڭ كری صفدەكی یرندن خاصلر صفنە آلمقلە تلطیف و تسریر بویوردیڭز. تشكّرلریمی عرض ایدرم. بو زواللی ملّتمزی كوستردیگڭز نورلی یولدە، شریعت احمدیەؐ جادّەسندە ایزیڭزدن یورور كورمكلە، ربّم سز استادیمز افندیمزی هم بو دنیادە مسرور أیلەسین، هم دە نور سببیلە ایمانلرینی قورتارارق اهل جنّت اولدقلرینی عالم آخرتدە تماشا بویورمقلە سزلری ابدًا ممنون أیلەسین. آمین، آمین، آمین.

قیمتلی استادم افندم، كائناتڭ طلسمنی چوزن حضرت قرآنڭ اسرارینی بز محتاجلرە كوسترن، تقلیدی ایماندن بز بیچارەلری تحقیقی ایمانە ترفیع ایتدیرن، روحلریمزی نورلر عالمنە یوكسلتن رسالۀ نوری بزلرە آرماغان ایتمكلە، اوزریمزە كچن حقلریڭز پك بیوك و چوق آغیردر. بو چوق قصورلی بیچارە شاكردیڭز بو اونوتولماز اییلكلریڭزڭ، حدسز و أولچوسز حقلریڭزڭ شكرینی و خدمتنی أودەیەمەمكلە دلخونم. كوڭل نە قدر ایستركە، آزاد قبول ایتمز بر كولە كبی قالان عمریمی، ذاتی و شخصی خدمتلریڭزە وقف ایدەیم. بز بیچارەلرڭ ایمانلریمزی قورتارمق و ابدی سعادتلریمزی تأمین آرزوسیلە چارپان او مبارك و مشفق قلبڭزە ربّم الم و كدر ویرمەسین. اوندەكی بتون صیقینتیلری فرح و سرورە تبدیل و تحویل أیلەسین. آمین، آمین، آمین. او قلب مباركی اینجیتنلرە اللّٰە ذوالجلال ایمان و انصافلە عنایت و قلبلرینی نورلرە مسخّر أیلەسین. آمین، آمین، آمین.

الٰهی یا ربّی، سدرۀ عرش معلّا حرمتنە، استادیمز سعید النّورسی افندیمزڭ معنوی خواصّندن و مشار الیهڭ دعالرندن بو دنیادە بزلری محروم ایتمە یا ربّی! آمین، آمین. عالم آخرتدە سوكیلی حبیبڭڭ لواء الحمد اسملی صانجاغی آلتندە بز نورجیلری استادیمزڭ یانندە بر قافلۀ نور اولارق حشر و جمع أیلە یا ربّی آمین، آمین، آمین. ال و آیاقلریڭزی حرمتلە أوپر دعالریڭزی رجا ایدرم، استادم افندم.

اَلْبَاقٖی هُوَ الْبَاقٖی

دعالریڭزە پك محتاج، قصورلی شاكردیڭز زغفرانبولی افلانی ناحیەسندە متقاعد معلّم احمد فؤاد

[٣٢٠]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق عزیز، چوق مبارك، چوق سوكیلی و چوق مشفق استادم افندم حضرتلری،

[اوّلا] مبارك و مُتَیَمِّنْ اللریڭزدن و پاك آیاقلریڭزدن صوڭسز حسرت و اشتیاق، تعظیم و احتراملە أوپر رسالۀ نورڭ كنیش و كلّی و فوق التصوّر فتوحاتی طولاییسیلە تبریكلریمی عرض أیلرم.

[ثانیًا] زغفرانبولی یە قدر تشریف ایدوب، باشدە ذاتڭزە و عموم نورجی قرداشلریمزە سلام و حرمتلر ایدن مبارك قرداشمز فؤاد و خطیب ابراهیم و دیگر قرداشلرینڭ و یینە رسالۀ نورە، مجنونڭ لیلٰی یە اولان علاقەسی قدر علاقە ایدوب، تعشّق ایدوب هم بز عاجزلری زیارت، هم ذات فضیلتمئاب افندیمزە حرمت و سلاملرینی بیلدیرمەمزی رجا مقصدیلە ماشیًا طاغلر، درەلر آشوب بورایە كلن [و اوچنجی فقرەدە بحث ایدەجگم مصطفی و قرداشلرینڭ درس آرقداشی اولان] اون درت یاشندەكی نورجی رحمینڭ نهایتسز حرمت و سلاملرینی یوكسك حضورلریڭزە عرض أیلر، عموم نورجیلر ایچون، خصوصًا مملكتمز و جواری نورجیلری و خصوصًا استقبالی نورلاندیراجق بو كنچ نورجیلر ایچون، قبولی محقّق اولان دعالریڭزی نیاز أیلرم

اَلْبَاقٖی هُوَ الْبَاقٖی

مصطفی

بو معلّم قرداشمز، زندقە قومیتەسنڭ درس اسمنی ویردیگی زهرلی پاستەلرلە بسلنمش.. مدهش زهرلی ایگنەلرلە شیرینغە ایدیلمش.. اسمی ویریلن مادّیونلق و طبیعیّونلق فكرلری تمامًا كندیسنە بر حقیقت دییە تلقین ایدیلمش.. و تمامًا او مدهش فكرلر قبول ایتدیریلمش.. و بو فكرلری نشرە و یڭی نسلە، هنوز زهرلنمەین و قلبلری ئولدیریلەمەین كویلی، صاف و تمیز دینداشلریمزە آشیلامق اوزرە توظیف ایدیلمش.. كرك تحصیل حیاتی بوینجە و كركسە وظیفە آلدقدن صوڭرە و رسالۀ نور دائرەسنە دخالت ایتمدن اوّل او آلدیغی زهرلرلە یڭی نسلە و هر كوروشدیگنە زهر صاچان و نوردن آلدیغی قوّتلی و حجّتلی ایمانی درسلرلە كیتدیگی یولڭ اوچوروم و قراڭلق بر فلاكت و هلاكت یولی اولدیغنی كوروب ندامتلە توبەكار اولوب، شیمدی چوق جدّیتلە و چوق فعّال بر حالدە ایمان و قرآن و نور خدمتندە چالیشان.. و چوق قیصە بر زماندە هم قرآن عظیم الشّانی، هم قرآن حروفاتنی اپیجە أوگرنن.. و هم كندی كبی مدهش زهرلرلە مسموم بر كنچ معلّمڭ و داها كوچك و بیوك بر چوق فردلرڭ نور دائرەسنە قوشمەلرینە وسیلە اولان.. و یگانە سعادت یولی دییە كوستریلن مادّیونلق و طبیعیّونلق یوللرندە سیاحت ایتمش.. و سیر ایتدیگی فلاكت و هلاكت یولنڭ حقیقتنی ادراك ایدرك كندینی ایمان و ایقان جادّەسنە آتان.. و بو ایكی یولی تام مقایسە و موازنە ایدەبیلن.. و زندیقلر طرفندن مادّیونلق و طبیّعیونلغی پردە آلتندە نشرە مأمور ایدیلن بر كیمسە اولوب، بو مكتوبی كنچلگڭ درین یارەلرینی كوسترن

بر وثیقە و شدید احتیاجلرینی آچیقلایان بر اعلاننامە و بو یارەلرە دە آنجق و آنجق رسالۀ نورڭ بر مرهم و او تسمّملرە آنجق و آنجق رسالۀ نورڭ بر تریاق اولدیغنی پك آچیق كوسترمسی سببیلە بر مهم سند اولارق كوردم. و سوكیلی استادیمزی أوزمەمك ایچون یڭی یازی اصلنی قرآن حروفاتنە تبدیل ایدرك تقدیم ایدییورم.

[٣٢١]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

پك مبارك و محترم و مشفق استادم افندم حضرتلری،

[اوّلا] ال و آیاقلریڭزی چوق درین حرمتلرملە ابدیًا اوپرم. بو بیچارە و زواللی كنچ طلبەڭزڭ شو عاجزانە مكتوبی، او بیچارەنڭ رسالۀ نورە قارشو صوڭسز حیرانلغنڭ چوق اوفاق بر افادەسیدر. بوندن بر سنە اوّل، قسطمونی گول كوی مكتبندە بولوندیغم بو چالیشلر كوینە أوگرتمن اولارق كلدیگم زمان، بتون عقلم و فكرم، هر شیئم غفلت پردەسی آلتندە ایدی. بتون حقائقلرە آیقیری اویدیریلمش و افسانەلشمش، یالان شیلرڭ پشندە چیرپینییوردم، حتّی بتون مكتب حیاتم مدّتنجە و كویدە كیجە یاریلرینە قدر غزتە ستونلرندە سیاست، افسانە، رومان یازیلرینی اوقویور، كوزلرم اویقوسز قالان او كیجەلر سببیلە آغریمغە باشلایوردی. رادیو دیڭلەمك، چالغی چالمق، برنجی احتیاجم حالندە ایدی.

صوڭرە خلق آراسنە چیقوب [سفیان اوردوسنڭ ییقیجیلغنی بر انقلاب حالندە خلقە آڭلاتمق مراقندە ایدم.] شیمدی بتون روح و جانملە ردّ ایتدیگم او سوزلرڭ همن هپسندە "ای داهیلر داهیسی، یاراتدیغڭ كنچلك..." و سائرە كبی ایمانسزلرڭ سوزلرینی سویلردم.

شیمدی بتون عمریمڭ نَفَسی قدر، بو سوزلریمی رد ایدییورم. و عادتا شو آندەكی بیچارە دورومملە، او زماندەكی دیوانە و سفیلانە دوروممی تحقیر ایدییورم. بنی بو دوروملردن تلقینی و ارشادیلە قرآن یولنە چویرمگە سبب اولان فؤاد خواجەیە.. و بنم رسالۀ نور یولنە كیرمەمە سبب اولان و نورڭ قلبلرینە طاملاتدیغی الهام آتشلریلە بو زواللی یی عشقە كتیرن مصطفی اوسمان كبی زغفرانبولیلی قرداشلریمە.. و رسالۀ نورڭ الهامیلە، مطالعەسیلە اثرلر نشر ایدن و بو اثرلرلە حقیقتی بڭا تلقین ایدن شمس الدّین یشیلە ابدیًا منّتدارم. او زمانكی غفلت و كفر ایچندە كچن حیاتمە باقارق، بوكونكی ایمانلی، عشقلی، فقط اڭ كریدە و اڭ زواللی حیاتمی چوق مسعود كورویورم. و بو بختیارلغە بنی قاووشدیران جناب ارحم الرّاحمینە یوز بیڭلر دفعە شكر ایدییورم. و او قدیر ذوالجلالدن بو فقیر حقیری، بو زواللی بیچارەیی، بو پریشان عاصی یی كنیش شفقتیلە قبول ایدن افندم استادم حضرتلرندن ابدیًا راضی اولمەسنی بیڭلرلە نیاز ایدییورم. او نور ایمان یولندەكی بیچارەلگملە حدّم اولمادن مادّیاتە طاپان او بدبختلرە صانكە شویلە دییەسم كلییور و دییورم:

ای غفلت اویقوسی ایچندە یوتدیریلان زهرلرلە اویوشمش، سرسملشمش، كورلشمش، صاغیرلاشمش.. و بهیمی ذوقلرلە جوشوب، انسانلقدن میلیونلر درجەدە آشاغی دوشوب، حقیقی ألملر و اضطرابلر ایچندە چیرپینان بدبختلر! كلڭ، سز و بن، بتون هوائی شیلردن، بو حیوانی آرزولردن ألمزی و كوڭلمزی چكەلم. آتش قاینایان صحرادە قورویان بوغازیمزە بر آووچ صو احتیاجی كبی، شو عصردە اسباب و طبیعت زهرلریلە اویوشان و قورویان و ئولومە یوز طوتان قلبمز بر نور ایمان ایستەیور. بر آب حیات بكلەیور. كلڭ، بتون دنیامزی و ایچندەكیلری ابدی ترك ایلە حقائق قرآنیەنڭ اوڭندە دیز چوكەلم. و او حقائقڭ كوستردیگی ابدی سعادت یولنە دونەلم. اوّلجە یورودیگمز شقاوت و هلاكت یولنڭ كیرلرندن و چركاب كفر و ضلالتدن آرینمق، تمیزلنمك ایچون نور دڭزینە طالالم. و بوكون و بو عصرڭ رهبر سعادتی اولان و بو عصردە سعادت ابدیەنڭ اڭ برنجی وسیلەسی اولان نور مدرسەسنە رسالۀ نور درسلرینە قوشالم.

ساعتلرجە، كونلرجە، ییللرجە آلقیشلایوب طوردیغمز او یالانجی سفیللردن و اونلرڭ حقیقت دییە كوستردكلری خیال پشندن، او فلاكت یولندن آیریلالم، واز كچەلم، ظلمتدن نورە دونەلم. اوتوز سنەدنبری یالڭز رضای الٰهی ایچون، كیمسەدن منّت و آلقیش ایستەمدن، عقلڭ و حوصلەنڭ قبول ایتمەیەجگی، بشر وجودینڭ تحمّل ایدەمەیەجگی جانیانە ظلملرە كوگس كرن بدیع الزّمان

سعید النّورسی افندیمزڭ اوڭنە كلەلم. اونڭ درسلرینە كوڭل باغلایالم. اونڭ رسالەلرینی استاد ایدینەلم. او ذات، بزدن آلقیش ایستەمز، هدیە ایستەمز، اجرت ایستەمز، حرمت ایستەمز. یالڭز بر شی ایستر: ایمانڭی قورتار. مادّەیە باقما، معنایە باق. عاجز انسانە طاپما، اللّٰهە طاپ. اوت، ای غافل و ضلالت یولندەكی اسكی آرقداشلرم! او ذات، شو آندە بولوندیغی كمالات انسانیەنڭ ذروەسندن كندینی كوچك كوسترمك ایستەیور. ادنا كوسترمك ایستەیور. اویلە ایكن، بزم دیوانە و یالانجی قهرمانلریمز، یووارلاندقلری عادی و پیس چوقوردە كندیلرینی یوكسكدە كوروب، میلیونلرە دە كوسترمك ایستەیورلر. و اویلە دە هر كون و هر فرصت بولدقجە "بن شونی یاپدم، بن بونی یاپدم." دییە ییقدقلری معنویات و انسانلق آبدەسنی اعلان ایدرك، میلیونلردن دە آلقیش، منّتدارلق دیلنییورلر. وا أسفا! وا ویلتا! میلیونلر اسفلر و یازیقلر اولسون اونلرە و اونلرڭ جانیانە و شقیانە قهرمانلقلرینی تقدیر و تبریك ایدنلرە!

صوڭرە كلڭ، باقڭ. او استادڭ و نورڭ طلبەلرینە باقڭ، اونلردەكی صداقتڭ، باغلیلغڭ درجەسنە باقڭ. اونلردەكی اخلاصڭ، عشقڭ، ایمانڭ و یوزلرندەكی نورڭ قوّتنە باقڭ. و اویلە ایسە كلڭ، باقوب باقوب دە حیران قالدیغمز او مباركلرڭ كیتدیگی یولە كیدەلم.

اَلْبَاقٖی هُوَ الْبَاقٖی

دعاڭزە چوق محتاج، چوق قصورلی طلبەڭز مصطفی صونغور

[٣٢٢]

دڭزلی اهل وقوفنڭ راپوریدر.

بو پارچە هم لاحقەیە، هم استادیمزڭ مدافعاتنڭ نهایتنە یازیلاجقدر.

[بو راپور عبرت ایچون لاحقەیە یازیلسین.]

برنجی اهل وقوفڭ راپوریدركە، بتون قوّتیلە بزی محكوم ایتمك ایچون چالیشمشلر، فقط عنایت الٰهیە اونلرڭ هجوملرینی نورلرڭ پارلاق فتوحاتنە وسیلە أیلەدی.

ایشتە عنایت الٰهیەنڭ پارلاق بر نمونەسی. بتون قوّتلریلە محكومیتمزە چالیشان برنجی اهل وقوفڭ بو راپورلری، رسالۀ نورە تقدیركارانە بر مدحیّە حكمنە كچدی. بز دخی او اهل وقوفی حلال ایتدك، دوست اولدق.

علیهمدە چوق چالیشان اهل وقوفڭ راپورندندر. آنقرە اهل وقوفی بونلردن آیریدر. بر درجە انصافلی راپورلر دە آیریدر.

صوچلیلردن سعید النّورسی، نام دیگر بدیع الزّمان، كندی افادەسی وجهلە، مقدَّما شرق حركاتندە ایلكیلی كورولن.. و او تاریخدە وان ولایتندە اقامت ایتمكدە ایكن، اسپارطەدە اقامتە مأمور ایدیلدیگی صیرەدە، باشدە توصیف ایدیلن عین صوچی ایشلەدیگندن أوتوری، اسكیشهر آغیر جزا محكمەسندە ٢٧ / ٤ / ٩٣٥ تاریخندە توقیف ایدیلەرك كندیسنە اویدیردیغی برقاچ شخصلە

برلكدە یاپیلان طوروشمەلرندن صوڭرە، بدیع الزّمانڭ بر سنە مدّتلە حپسە قونولمەسنە و شریكلرینڭ دە مختلف جزالرە چارپدیریلدیغی، اسكیشهر جمهوریت مدّعی عمومیلگندن جلب اولونان دوسیە میانندە موجود ٨ / ١١ / ٩٤٣ تاریخلی قید رسمیدن آڭلاشیلمقدەدر.

بو صورتلە مدّت محكومیتلرینی اكمالدن صوڭرە قسطمونیدە اقامتە مأمور ایدیلن سعید النّورسی، شورادە بورادە یینە كندیسنە یاقین حسّ ایتدیگی بعض كیمسەلرڭ دە اشتراك و یاردیملریلە و بونلرلە صاف و بیچارە دینیلەجك درجەدە بولونانلری كندینە اویدیرمق صورتیلە، یازی ایلە و بالذّات كوروشمەلرلە بعض فكر نشریاتنە دوامە باشلادقلری و بو فعّالیتلری ١٩٤٣ تمّوز و آغستوس آیلری تاریخندە، چیوریلڭ حومە ناحیەسندە بعض اوفاق تفك فعلی حركتلری كوزە چارپمەسی اوزرینە كویڭ ایلری كلنلری و خلق طرفندن تعقیب ایدیلەرك ایشڭ حقیقتنە وقوف پیدا ایتمك املیلە چیبان كبی میدانە چیقانلرڭ ماهیّتنی آراشدیرركن، علاقەلی ادارە مأمورلری طرفندن شبهەلی كورولن كیمسەلرڭ أو و دكّانلرندە آرامەلر یاپیلارق نتیجەدە "رسالۀ نور" اسملی متعدّد جزؤدن عبارت كتابلرلە، برقاچ مكتوب الە كچمەسی اوزرینە، بو بابدەكی تحقیقات درینلشدیریلەرك، بو میاندە قسطمونیدە اقامتە مأمور ایدیلن سعیدڭ أوندە یاپیلان ١٤ / ٨ / ٩٤٣ و ١٨ / ٩ / ٩٤٣ تاریخلرندە آرامەلردە اوینڭ اودون كومور طولابنڭ ایچریسندە و اودونلرڭ آلتندە، چیویلی بولونان بر طولابڭ ایچندە و صوبە اوزرندە صو

ایصیتمق ایچون قوللانیلان تنەكە ایچندن [حاشیە]بعض كتاب و ال یازمسی مكتوب وسائرەنڭ میدانە چیقاریلدیغی.. و بونلرڭ بی طرف اهل وقوف طرفندن تدقیقندە، رسالەلردن، رسالۀ نورڭ ٢٤ نجی لمعەسی تستّر حقّندە اولدیغی و اوزرندە محرم اشارتی بولوندیغی و بو رسالەنڭ باش صحیفەسندە درت حكمتدن بحث اولونمقدە و مختلف صورتلرلە تستّرڭ قالقمەسنە هجوم ایتمكدە.. و بو رسالەنڭ صوڭلرینە طوغری قادین باجاقلرینڭ تشهیری طولاییسیلە بونلرڭ جهنّمدە یاقیلاجغی..

و ٢٩ نجی مكتوبڭ آلتنجی قسمندە ایسە "محرمدر" اشارتلریلە رسالۀ نورڭ شاكردلرینە (آلتی اوگوت) ویرمكدە.. و (برنجیسندە) حبّ جاهە آلدانمامق و او قدسی خدمتلرندن، او معنوی و علوی جهادلرندن واز كچمەملرینە، بونڭ ایچون ثروت حرصنە و شان و شرفە و عوام نظرندە موقع صاحبی اولمغە هیچ اهمّیت ویریلمەمسی ایستنمكدەدر. و بونلرڭ اهل آخرت ایچون چوق ضرری وار دینیلمكدە

و اهل الحاد خفیّەلرینە و اهل ضلالتڭ پروپاغاندەجیلرینە آلت اولماملری توصیە ایدیلمكدەدر.

(ایكنجی اوگوت) رسالۀ نورڭ نشرندە و بوڭا عائد فكرلرڭ تعمیمندە اصلا قورقولمامسی و بو جهاد معنویدن واز كچیلمەمسی توصیە اولونمقدە.. و كندیلرینە بو ایشلردن واز كچیلمەسنی سویلەینلرە "حزب القرآن اطرافمزدە چوریلمش محكم بر سوردر. حیات ابدیّەمزە یوزدە یوز ضرر ویرن بر یولە بزی اختیاریمزلە سوق ایدەمزسڭز. اوستە باشمز اولان سعید النّورسینڭ یوزندن بزم كبی اوڭا دوست اولانلردن كیم ضرر كورمش، كیم بلا كورمشكە، بز كورەجگز" دینیلمكدە.. و (اوچنجی اوگوت) اولارق طمع یوزندن آلدانمامق ایچون تلقینلر یاپیلمقدەدر.

و یینە شاكردلرینە خطابًا "سعیدە نەدن بو قدر حرمت ایدوب آرقەسنە دوشویورسڭز" دیینلرە قارشو (دردنجی اوگوت) ایلە جواب ویرمك ایستەنیلمكدەدركە، بو دە كندیسنڭ اسلام دیننڭ نشرینە چالیشان و خدمت قرآنیەدە بولونان بر شخص اولوب، كندیسی یوق اولسە دخی بر چوق مركزلردە چالیشانلر بولوناجغنی سویلەمكدەدر. (بشنجی و آلتنجی اوگوتلرلە) داها بر طاقیم شاكردلری اعتماد و اعتقادە دعوت ایتمكدەدر.

بو كتابڭ ذیلندە قیرمیزی مركّبلە و اوچ آی اشارتیلە "محرمدر" دییە یازیلی اولان قسمندە، استقبالدە كلەجك نفرت و تحقیردن صاقینمق ایچون شو محرم ذیلی، یازدیغی.. و كندیلرینە مسلّط اولان انصافسز، ظالم و غدّارلرە قارشو بر عرض حال

اولدیغنی.. و كندی تعمیر ایتدیگی خصوصی معبدندە خصوصی عبادتنە، اذان و قامتدن طولایی مداخلە ایدیلدیگی ایچون صبرینڭ توكندیگی.. ملّتڭ مقدّراتیلە كیفی اوینایان فرعون مشرب قومیتەنڭ باشلرینە خطاب ایتدیگنی.. و بو اهل بدعەدن آلتی سؤٓالنە جواب ایستەدیگنی.. تجاوزڭ قانونسز اولدیغی.. خصوصی عبادتە قانون یاپیلامایاجغنی.. حرّیت وجدان دستورینی قیرمق جرئتیلە لادینی سیاست تعقیب ایدیلدیگی حالدە، دین اهلنە یاپیلان بو تجاوزڭ صورغوسز قالمایاجغنی.. كندیسی كبی شافعی اولانلرە هانكی اصوللە مداخلە ایدیلدیگنی.. كندیسی كبی باشقە ملّتدن اولانلرە توركجە قامت مجبوریتنڭ هانكی اصول ایلە تكلیف ایدیلدیگنی.. و اڭ نهایت "ای دین و آخرتنی دنیایە صاتان بدبختلر! یاشامەڭزی ایسترسەڭز، بڭا ایلیشمەییڭز. ایلیشیرسەڭز انتقامم مضاعف بر صورتدە سزدن آلیناجغنی بیلیڭز و تیترەییڭز. جسارتڭز وارسە ایلیشیڭز. یاپاجغڭز وارسە كورەجگڭز واردر." دییە هجوم ایدیلمكدەدر.

٢٩ نجی مكتوبڭ یدنجی قسمندە "شیمدیلك خاص و امین طلبەلرە مخصوصدر و محرمدر." اشارتلریلە، اهل بدعەنڭ اجنبی انقلابجیلردن موهوم بر فكر آلارق خریستیانلقدەكی پروتستانلق كبی، اسلامیتدە دینی بر انقلاب یاپمق ایستەدكلرینی.. خریستیانلقدە (احكام اجتماعیە عیسیؑ طرفندن دگل، حواریلر طرفندن وضع ایدیلدیگنە كورە) انقلابڭ جائز اولابیلەجگنی.. مسلمانلقدە بویلە شیلرڭ جائز اولامایاجغنی.. ملّیتڭ، اسلامیت فكری یرینە كچمەیەجگنی.. سوسیالیزم و

بولشویزم كبی عصری فكرلرڭ عنصریّتی و ملّتپرورلگی قیردیغنی.. بناءً علیه توركلك فكرینڭ اسلاملق فكری ایچندە اریمەسی ایجاب ایتدیگنی.. آخر زماندە كلەجك اڭ بیوك مجتهدڭ فساد زمانندە هم حاكم، هم مهدی، هم مرشد، هم خطیب اعظم اولان و اهل بیتە منسوب اولان بر ذات نورانی اولاجغنی.. آوروپەئی دستورلریلە مجادلە اصولنی اسكی سعید ایكن یاپدیغنی.. و بو طرزدە غلبەنڭ اسلامیتڭ قیمتنی آزالتمق كبی بر محذور بولونمسی یوزندن بو مسلگی ترك ایتدیگنی.. اسلامیت اساسلرینی ٣٠ نجی و ٢٤ نجی و ٢٩ نجی سوزلر و مكتوبلرلە برهانلریلە اثبات ایتدیگنی بیان ایتمكدەدر.

"اسكیشهر حپسخانەسنڭ صاقلاناجق بر میوەسیدر" دییە ال یازمسی دیگر بر رسالەدە، بر عالم معنادە امام علی یەؓ صوردیغی سؤٓالە جوابًا "(عُجْمٍ) دن مقصد، شكلسز حرفلردركە، لائیك حكومت زمانندە تعمّم ایدن لاتین حرفلریدر" یولندە بر جواب آلدیغنی.. جفر و ابجد حسابلریلە بو كلمەیی احتوا ایدن فقرەنڭ لاتین حرفلرینڭ رسمًا قبول تاریخی اولان ١٣٤٨ تاریخنە توافق ایتدیگنی، رسالۀ نورڭ بر مصیبت نتیجەسندە كیزلنەرك، كیزلی پردە آلتندە پارلامسی، امام علینڭؓ بر كرامتی اولدیغنی.. رسالۀ نورڭ سبب تسمیەسی، اسمای حسنا ایچندەكی اسم بدیعڭ مظهری اولدیغنی، و امام علینڭؓ "یا رب بنم ییلدیزیمی نور ایلە آخر زمانە قدر بدیع ایشیقلاندیر" یولندەكی دعاسنڭ، بو زماندە رسالۀ نور ایلە قبول ایدیلدیگنی بیان ایتمكدەدر.