[٢٣٦]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] بو قیمتدار مبارك رمضاندە ثوابڭ چوق زیادەلشمەسنە بر سبب اولان شدّتلی خستەلق ایچندە قرآندن هر كون برر جزء، پك چوق ذوقلی و جاذبەدار و ثوابدار اولان حزب اعظم قرآنیدن یگرمی صحیفە اوقوركن قهرمان طاهرینڭ و مرحوم بیوك حافظ علینڭ نە قدر بیوك بر وظیفە یاپدقلرینی و اونڭ و حزب نوریەنڭ توافقلی طبعنە موفّقیتلرینی شكرانلە و چوق حیرتلە قارشیلایوب بیڭلر ما شٓاء اللّٰه بارك اللّٰه دیردم. ان شٓاء اللّٰه شیمدی بر ویا متعدّد حافظ علیلر و طاهریلر اینەبولیدە و دڭزلیدە تظاهر ایتمەیە باشلامەلری، ذوالفقار معجزات دخی بیوك بر فتوحاتە وسیلە اولاجغی بر بشارتدر، بر فال خیردر.

قهرمان نظیفڭ معجزات قرآنیەدن ماكینە محصولاتی اولارق اون صحیفە بزە كوندرمش، بیڭلر آفرین قزانمش. و اهل ایمانی چوق سویندیرمش. سز مناسب كورسەڭز، میوەنڭ اوننجی مسئلەسی ویا خلاصەسی، معجزات قرآنیە ذیللری ایچنە كیرسین. حقیقتًا بابا اوغول نورلرڭ قهرمانیدرلر. جناب حق موفّق و شیطانلرڭ شرّندن محافظە أیلەسین. آمین

[ثانیًا] بوكونلردە راحتسزلق ایچون اوراد بهائیەیی ازبر دگل، كتابە باقارق اوقودم. آخرندە اختتام بهائیە اولان خاتمەسنی، معناسنی بیلەمدیگمدن، اسكیدنبری اوقومییوردم. هایدی بر دفعە بونی دە اوقویایم دیدم. كوردمكە، آلتی بوچوق سطرندە، اون طقوز دفعە نور نور نور كلمەلری وار. قطعی قناعتم كلدیكە، شاە نقشبند، غوث اعظم كبی رسالۀ نوری و قدسی خدمتنی كشفًا مشاهدە ایدوب تحسینكارانە خبر ویرەرك اوڭا اشارتلر ایدییور. بن دە، یالڭز او آلتی سطری و باشدەكی سطری و آخردەكی سطریلە اوتوز سنەلك بهائیە وردیمە، اونلرڭ نورلرڭ انتشارینە معاونتلری نیّتیلە الحاق أیلەدم.

[ثالثًا] آتابگلی لطفی نامندە بر قرداشمز مكتوبندە پك جدّی بر علاقە ایلە نورلرە شاكرد اولمق ایستەیور. مادام قهرمان طاهرینڭ اقرباسیدر. و اسمی لطفیدر. و مدقّقانە مكتوبندە قابلیتنی كوسترییور. البتە مرحوم لطفینڭ وارثلرندن اولمەسنی قبول ایدرز.

[رابعًا] بو مكتوبی صباح یازمشدم. شیمدی درت مكتوبڭزی آلدم، داها باقامدم. هم ایكیسی یڭی حرفلە یازیلدیغندن بیلەمدم. و كیمدن كلدیگنی آڭلایامدم. صوڭرە باقاجغم. اسپارطە یانغینی بنی محزون أیلەدی. كچمش اولسون دیرز. عمومڭزە سلام

اَلْبَاقٖی هُوَ الْبَاقٖی

قرداشڭز سعید النّورسی

خسروڭ كوچك مكتوباتنی آلدم. و اینەبولی قهرمانلرینڭ غیرتلرینە بیڭلر ما شٓاء اللّٰه، بارك اللّٰه.

[٢٣٧]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق، مبارك قرداشلرم،

بو مكتوبی قونیەلی صبری یە كوندرمشم. سزە برای معلومات كوندریلدی.

عزیز، صدّیق قرداشم صبری، رمضانڭزی تبریك ایدییورز. او خواجەنڭ عزیز كلمەسنە اعتراضنە دیرز:

[اوّلا] اسكیدنبری اهل علم مكاتبەلرندە عزیز قرداشم، عزیز آرقداش و عموم خلقڭ محاورەلرندە عزیزم عزیزم تعبیرلری، صفات و معنای لغوی اعتباریلەدر. هم (یُعِزُّ مَنْ یَشَٓاءُ) سرّینە كورە انسانە ویریلن عزیز لفظی، علم صرف اصولنجە (فعیل بنای مفعولدر ) یعنی عزّتە مظهر اولمش دیمكدر.

[ثانیًا] كرچە عزیز اسمی اسمای حسنادندر. اسم اولارق باشقە دە استعمال ایدیلمز. فقط معناسی اعتباریلە صفت اولارق دائما هم عزیز، هم اسمای الٰهیدن حلیم و حكیم و مالك و ملِك و علیم و عالم و مؤمن و سمیع و بصیر كبی چوق اسملر استعمال ایدیلمش. هیچ كیمسەنڭ خاطرینە اعتراض كلمز. یوقسە [اَلسَّلَامُ الْمُؤْمِنُ الْمُهَیْمِنُ الْعَزٖیزُ الْجَبَّارُ الْمُتَكَبِّرُ] [اِنَّ اللّٰهَ عَزٖیزٌ حَكٖیمٌ] دەكی

مؤمن اسمی، صفت معناسیلە عموم مؤمنلرە امّتجە ویریلمسی و حكیم اسمی صفت معناسیلە بتون دوقتورلرە بتون خلق طرفندن استعمال ایدیلمسی، او ذاتڭ اعتراضنە كورە خطا و كناه اولمق لازم كلیر. بونلرە قیاسًا مالك اسمی و سمیع و بصیر اسملری صفت معناسیلە هركسە هر وقت ویریلییور.

[ثالثًا] بنم دە اسكی علمایە اقتداءً بو "عزیز" كلمەسنی صفت اولارق قرداشلریمە ویرمەنڭ سببی ایسە: اونلر دینی و علمی دنیایە آلت یاپمدقلرندن، علمڭ و دینڭ عزّتنی محافظە ایتدكلرندن، تمثیلدە خطا یوق، یوسفڭؑ عزیز مصر اولمسی كبی بونلر دە درجەلرینە كورە بو عصرڭ عزیزلریدرلر. جناب حق اونلری عزیز ایدییور. (یُعِزُّ مَنْ یَشَٓاءُ) سرّینە مظهر ایدییور دییە استعمال ایدییورم.

[رابعًا] اوتەكی خواجەنڭ (وَبِالْاٰیَةِ الْكُبْرٰٓی اَمِنّٖی مِنَ الْفَجَتْ) دە (فَجَتْ) كلمەسنە شبهەسی معناسزدر. چونكە بو كلمە سریانیدر. امام غزالی، امام نور الدّیندن آلدیغی درسلە جلجلوتیەدەكی بتون سریانی كلمەلرینی تفسیر ایتمش. (فَجَتْ) ایسە مصیبت، هلاكت، خطا، بلا كبی معنادەدر دیمش.

[خامسًا] وهبی خواجەنڭ حجّە كیتمەسی مباركدر. اللّٰه سلامت ویرسین. اورادەكی بتون علمایە و دە مفتی یە و نورجیلرە چوق سلام ایدرم. و دعالرینی رجا ایدرم. سنڭ مبارك مخدومڭڭ كوزل منظومەسنی داها اوقویامادم. صوڭرە باقارم

اَلْبَاقٖی هُوَ الْبَاقٖی قرداشڭز سعید النّورسی

رسالۀ نورڭ اركانندن ایكنجی صبرینڭ و خاص آرقداشلرینڭ حسابنە مخدومی فیضی فضائینڭ یازدیغی بو صمیمی فقرەسندەكی "نور طوغمەسی زمانیدر." مژدەسنە آمین دیرز. لاحقەیە كیرسین. بعض كلمەلرینی بیلەمدم. سز اصلاح ایدرسڭز.

[٢٣٨]

بِاسْمِهٖ سُبْحَانَهُ

عزیز استادم افندم حضرتلری،

رسالۀ نور فیضندن آلمش اولدیغم الهام اوزرە یازیلان بو قیمتسز شعرڭ قبولنی رجا ایدرم.

١

اومدیغمز كون پك یاقین

نور طوغمەسی زمانیدر

سماواتدن آقین آقین

نور طوغمەسی زمانیدر.

اللّٰه سویلر قامو ذرّە

دیمك لازم برقاچ كرە

بوندن بویلە وداع شرّە

نور طوغمەسی زمانیدر.

٢

جان مبتلادر علّتە

كیم طایانیر بو ذلّتە

مژدە اولاد ملّتە

نور طوغمەسی زمانیدر.

هر قلب بر كوموش بخوردان

حصّە آل دوشن یاغموردن

شكر رسالۀ نوردن

نور طوغمەسی زمانیدر.

٣

قلب كیتدیگی یولدن امین

دونمەمەیە ایتدك یمین

بیڭ شكر ربّ العالمین

نور طوغمەسی زمانیدر.

كوزیمزدن آقار یاشلر

سوزیمز حمد ایلە باشلار

یوز یگرمی بیڭ قلم ایشلر

نور طوغمەسی زمانیدر.

اوڭمزدە نور دڭزی

سوینچلە بكلەیور بزی

ییقایالم ایچمزی

نور طوغمەسی زمانیدر.

یاردیم أیلە یوجە اللّٰه

هر ایشتە بولالم فلاح

شكر یاقینلاشدی صباح

نور طوغمەسی زمانیدر.

٤

اللّٰهی آڭان سوزلرە

بتون طاغلرە دوزلرە

شول نوردن آیدین یوزلرە

نور طوغمەسی زمانیدر.

كوڭل قورتولسون یاسندن

نور ایچەلم عشق طاسندن

یدی طاغڭ آرقەسندن

نور طوغمەسی زمانیدر.

ئولنجەیە دك عشق ایلە

اللّٰه دییەلم مشق ایلە

اول جنّتدەكی كوشك ایلە

نور طوغمەسی زمانیدر.

بو ایشڭ فنادر صوڭی

ای غافل بیتیر اویقوڭی

اللّٰهە یُوڭَلْتْ دویغوڭی

نور طوغمەسی زمانیدر.

٥

باق اطرافە فكر أیلە

حق یولندە ذكر أیلە

وار اللّٰهە شكر أیلە

نور طوغمەسی زمانیدر.

باقما صاغڭە صولڭە

طوغری یورو حق یولنە

مژدە اللّٰهڭ قولنە

نور طوغمەسی زمانیدر.

رسالۀ نورڭ ماهیتیلە

حق كتابڭ آیتیلە

اللّٰهڭ عنایتیلە

نور طوغمەسی زمانیدر.

یوغمز واریمز بللی

سوكیمز یاریمز بللی

شكر بهاریمز بللی

نور طوغمەسی زمانیدر.

٦

تحمّل قالمدی صبرە

لعنت كوتولگە كبرە

ایشیق دوشر كبی قبرە

نور طوغمەسی زمانیدر.

آڭلاشیلمییور بو نە حال

دنیا دیدیگڭ بر خیال

اویان ای اولاد و عیال

نور طوغمەسی زمانیدر.

كوزلریمز حسرت دونە

درد اگلنمەدە كون كونە

شو قراڭلقلر اوستنە

نور طوغمەسی زمانیدر.

اوغرینە فدا جان بدن

بزلری تسلّی ایدن

نور قایناغی رسالەدن

نور طوغمەسی زمانیدر.

٧

شكرلر اولسون رسالۀ نورە

غرق ایتدی بزی مرادە

خضرؑ یتیشدی امدادە

نور طوغمەسی زمانیدر.

غیری سوز قالماسین دردە

دنیالق هوسلر نرەدە

كونشڭ طوغدیغی یردە

نور طوغمەسی زمانیدر.

صانجاقلە طونانمەدە برج

آزاد اولسون شك شبهە صوچ

حقّە شكر آووچ آووچ

نور طوغمەسی زمانیدر.

یازیق اولسون غافللرە

اللّٰه دیمەین دیللرە

حقّی آرامایان اللرە

نور طوغمەسی زمانیدر.

٨

ییللرجە چكسە دە جفا

كیم حقّنە قیلماز وفا

مؤمن اولانە نە صفا

نور طوغمەسی زمانیدر.

آلنندە اوقوندی یازی

هر قول قسمتنە راضی

چوقدن قورولدی ترازی

نور طوغمەسی زمانیدر.

سماواتڭ حكمتنە

نورلرڭ همّتنە

آخر زمان امّتنە

نور طوغمەسی زمانیدر.

آرایالم عین ایزی

بایراملر بكلەیور بزی

ییقایالم ایچمزی

نور طوغمەسی زمانیدر.

٩

پك ایمرنمە سلطنتە

هانكی دیندار آنا، آتا

غم دریاسی كائناتە

نور طوغمەسی زمانیدر.

بو حسابی بیلن بیلیر

هركس قزانجنی آلیر

حق حقوق ناصل غائب اولور

نور طوغمەسی زمانیدر.

قبەلردن طاشدی اذان

یاقینلاشدی یوم میزان

چالینمق اوزرە بورازان

نور طوغمەسی زمانیدر.

یولمز ربّمز تك بر

كتیر تعالی یە تكبیر

بال بر آری بر پتك بر

نور طوغمەسی زمانیدر.

١٠

یورو عشق كولنە اگیل

كورەجگڭ یالان دگل

وجدانڭە سبیل سبیل

نور طوغمەسی زمانیدر.

یتر بو چاغیروب جوشان

كون كلیر اولورسڭ پیشمان

دینڭە كسیلمە دوشمان

نور طوغمەسی زمانیدر.

كوزیڭی آچ اولما دلی

كائناتدەكی سرّ بللی

آرا دیر دیڭلە تسلّی

نور طوغمەسی زمانیدر.

بو طوتدیغمز حق یولی

یورگمز ایمان طولو

كورمەیز صاغی صولی

نور طوغمەسی زمانیدر.

١١

عاقل اولان حقّی آرار

بوش اوتورمق نەیە یارار

أیلەمە نفسڭە ضرر

نور طوغمەسی زمانیدر.

ایشلەدیگڭ كناه صافی

بو بیتمەین عصیان كافی

كناهی أیلە تلافی

نور طوغمەسی زمانیدر.

چكن چكسین سنی

آلماز حق قلعەسنی

بر كون بولور بلاسنی

نور طوغمەسی زمانیدر.

استاد انكللری یاردی

مژدەنڭ كلمییور آردی

افقی انس و ملك صاردی

نور طوغمەسی زمانیدر.

١٢

آقان كوز یاشلری ایلە

طاغلرڭ طاشلری ایلە

كوگرجین قوشلری ایلە

نور طوغمەسی زمانیدر.

بو بر امتحاندر چتین

یولنی آرا جنّتڭ

اسیری اولما جِنّتڭ

نور طوغمەسی زمانیدر.

بومیدر اللّٰهە قوللق

باق اطرافڭە نە بوللق

اللّٰهی آرا بر یوللق

نور طوغمەسی زمانیدر.

وضعیتڭ علامتی

آڭدیرییور قیامتی

بولمق لازم سلامتی

نور طوغمەسی زمانیدر.

١٣

عجلە أیلە وقت طار

آل نصیبڭی بختیار

نور یولندە كنچ اختیار

نور طوغمەسی زمانیدر.

نە قدر دگیشدی زمان

یتر غم كدر ألأمان

اورتەدە حاضر قهرمان

نور طوغمەسی زمانیدر.

١٤

آق كوگرجین چیرپدی قناد

كوكلردە قوردی سلطنت

كافرە شیطانە عناد

نور طوغمەسی زمانیدر.

قول فضائی آغلایوب دیر

كناه ایشلەدیگڭ یتر

براز اصلاح اول دَرْبَدَرْ

نور طوغمەسی زمانیدر.

صبری و آرقداشلری نامنە چوق كناهكار عاجز فضائی

[٢٣٩]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

سز مادام ذوالفقارە باشلامشسڭز، اوڭا دوام ایدیڭز. صوڭرە تقسیم الاعمال ایلە باشقە مجموعەلری طبع ایدرسڭز. معجزات قرآنیە ذیللری ایچندە منظوم لمعاتدن بر پارچە وار. سزدە وارسە أیی، یوقسە اونی دە بولیڭز.

هم میوەنڭ اوننجی مسئلەسنڭ مناسب كوردیگڭز بر قسمی ویا تمامی ذیللرە كیرسین. اگر ال یازیسیلە بزم ایچون یازیلان ذوالفقار مجموعەسی تماملانمش وارسە كوندریڭز. تا بن دە بو پك عظیم و چوق قیمتلی خدمتە تصحیحملە حصّەدار اولایم. عمومە سلام

اَلْبَاقٖی هُوَ الْبَاقٖی

قرداشڭز سعید النّورسی

بو دقیقە هم افطارە یاقین، هم راحتسزلغم ایچون قیصە كسدم.

[٢٤٠]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] اسپارطەنڭ عجیب یانغینندە مصیبتزدەلرڭ الملرینە بن جدًّا اشتراك ایدییورم. چونكە متعدّد وجهلە بن اسپارطەلی اولدیغم كبی، او مبارك شهر، طاشیلە طوپراغیلە نظرمدە چوق اهمّیتی وار و نورلرڭ جامع الازهری و مدرسة الزّهراسنڭ مركزی حكمندەدر.

بنم طرفمدن او مصیبتزدەلرە دیییڭزكە: "نصّ حدیثلە، بویلە مصیبتلردە اهل ایمانڭ ضایع اولان ماللری تام صدقە حكمندەدر. خصوصًا بو رمضاندە، یوز صدقەدر. او فانی ماللر، باقی و داها چوق ابدی ماللرە انقلاب ایدرلر.

اونڭ ایچون صبر ایچندە بر جهتدە شكر ایتمك كركدر. ان شٓاء اللّٰه دنیادە دخی او كفّارت الذّنوب اولان ضایعڭ یرینە ارحم الرّاحمین احسان ایدر. كچمش اولسون، باشڭز صاغ اولسون، فائدەسز مراق ایتمەییڭز ".

[ثانیًا] بو چشیت قضالرڭ بر سببی، بشرڭ چركین بر خطاسی بولونمەسندن، بو رمضان شریفڭ حرمتنی و قیمتنی محافظە ایتمك و نورلری حمایە ایتمك، هر یردن زیادە نورلرڭ منبعی و مدرسەسی اولان اسپارطە بورچلیدر و وظیفەسیدر. و سفاهتلرە قارشو شعائر اسلامیەیی محافظە ایتمكلە مكلّفدر. (وَاتَّقُوا فِتْنَةً لَا تُصٖیبَنَّ الَّذٖینَ ظَلَمُوا مِنْكُمْ خَٓاصَّةً) سرّیلە بعض ظالم و فاسقلرڭ یوزندن چوق معصوملر یانار و بلا كورور. عجبا بورادە (یعنی امرطاغندە ) و باشقە یرلردە نورلرە ایلیشمەلری كبی بلالرڭ دفعنە بر وسیلەسی اولان رسالۀ نوری اورادە دە بر درجە صوصدیرمەسنە بر كیزلی تشبّثمی واركە، متعدّد واقعە و تجربەلر ایلە اولدیغی كبی، یینە او ظالمانە هجومی طوردیرمق ایچون بو سماوی و آتشلی حادثە چیقدی. حقیقتًا بن هر وقت قلبًا تیترەدم. امان اسپارطە شاكردلرینە ایلیشمەسینلر دییە چوق مراقلە هر هفتەدە كلەجك مكتوبی بكلەیورم.

[ثالثًا] رسمی بر خواجە و بدعەلرە طرفدار وظیفەسی اعتباریلە نورلرڭ پارلاق فتوحاتنە قارشو بر بولانتی ویرمك ایچون هیچ بر شی بولمایارق، یالڭز یوز جوابی بولونان بر كلمەنڭ استعمالنی بهانە بولمشكە، سزە بر صورت جوابی كوندریلمش.

بوندن آڭلاشیلییوركە، منافقلر نورلرە قارشو بدعە طرفداری اولان خواجەلری استعمال ایدییورلر. منافقلرڭ باشقە پلانلری عقیم قالمەسندن، بو الیم و آجی و بولاندیریجی و تأثیرلی پلانی استعمال ایدییورلر.

نورجیلر غایت احتیاط و دقّت و متانت و معترضلری آلدیرمامق و مناقشە ایتمەمك و حبّەیی قبّە یاپمەلرینە قارشو اورتەلقدە بیڭلر اكبر الكبائری كورمییورسڭ. بر كوچوجك و كناهسز بر سهوی كورییورسڭ. و بلكە بو عزیز كلمەسی كبی شیمدی یە قدر اون دفعە اولدیغی كبی، تام طوغری و حقیقت بر مسئلەیی كندی بیلەمییور. یاڭلیشدر دیر، كندیسی خطا ایدر.

[رابعًا] اینەبولی هم ذوالفقاری اسكی حرفلە، هم عصای موسی یی یڭی حرفلە ماكینە ایلە یازییورمیكە، ایكیسندن نمونە كوندریلدی. اگر اویلە ایسە، یوز بیڭ بارك اللّٰه دیرز. عموم قرداشلریمزە سلام و سلامتلرینە دعا ایدرز. و دعالرینی رجا ایدرز

اَلْبَاقٖی هُوَ الْبَاقٖی

قرداشڭز سعید النّورسی