[١٦٣]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز و سوكیلی استادم افندم،

[اوّلا] مبارك اللریڭزدن أوپر، صحّت و عافیتڭزە دعالر ایدرم.

[ثانیًا] بش معصوم، قرآن حكیمی ختمە موفّق اولدیلر. موجبنجە عمل ایتمك ایچون دە، استادیمزڭ دعاسنی استرحام ایدییورلر. رسالۀ نوردن دردنجی سوز دە، كندیلرینە یازدیریلدی. كنچلك رهبری یازدیریلمقدەدر.

[ثالثًا] استانبولە والدەمڭ زیارتنە كیتمك ایستەیورم. ان شٓاء اللّٰه عصای موسی رسالەسندن اورادەكی علما و صلحانڭ استفادە ایتمسی ایچون مناسب كوردیگڭز قدر، استادیمز طرفندن تصحیح اولونانلردن كوندریلمەسنی رجا ایدییورز. استادیمزە یاردیم اولمق اوزرە بورادە بر نسخەسنی تصحیح ایتدم، ایكنجیسنە باشلادم. فقط استادیمزڭ تصحیحی اكسیكسزدر. اگر سزڭ تصحیح ایتدیگڭز نسخەلردن بر دانەسی یانمدە اولسە، او زمان اكسیكسز تصحیحە موفّق اولابیلیرز. زیرا علما النە كچەجگی ایچون خطاسز اولمسی اقتضا ایدەجگی استادیمزجە معلومدر.

[رابعًا] لمعەلری یازاركن یینە ذهنم بر یرە طاقیلدی. استادیمزە صورمق مجبوریتندە قالدم. مراقلی طلبەڭزڭ سؤٓال صورمقدە سزی یورمقدن متولّد

قصورینی عفو بویورمەڭزی رجا ایدرم. مادام حقائق قرآنیەیی اوگرنمگە عزم ایتمشز و اونڭ ایچون رسالۀ نورە طلبە اولمشز. و مادام استادیمز دلّال قرآندر. و حقائق ایمانیەنڭ نشریلە مشغولدر. و مادام بتون حیاتنی او یولە حصر ایتمش. و طلبەلرینە دە اویلە توصیە أیلەمشدر. و مادام دڭزلی محكمەسی و آنقرە اهل وقوفنجە بتون مؤلَّفات تدقیق ایدیلمش. محتویاتی حقائق ایمانیەدن عبارت اولدیغی تصدیق اولونمشدر. او حالدە سویلەنیلمیەجك و یازیلامایاجق بر حقیقت قالمدیغی قناعتندە اولارق شو سؤآلی عرض ایدییورم.

اون سكزنجی لمعەدە (آلتنجی امارە قوّتلیدر فقط یازاماییز. یدنجی امارە ظاهردر فقط كوسترەمییورز) دینیلییور. ایشتە بو جملەلردە یازیلدیغی كوندنبری مراقم تكاثف ایتمش، فقط زمانی اولمدیغندن صورامامشدم. بوكون بو حقیقتڭ دە اوگرنیلمەسی زمانی كلدیگی قناعتندەیم. شاید بوكوندە دخی یازیلمەسنی استادیمز تصویب بویورمازلرسە، هیچ اولمازسە صورت خصوصیەدە و محرمانە اولارق بو حقیقتی بیلدیرمەڭزی استرحام ایدر و تكرار مبارك اللریڭزدن اوپەرك دعاڭزی ایسترم افندم.

اسرار قرآنیەنڭ انكشافنە عاشق، قصورلی و عاجز طلبەڭز رأفت

[١٦٤]

صلاح الدّینڭ مكتوبیدر.

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

سوكیلی، حقیقتلی، شفقتلی، فاطن العصر [حاشیە] استادم افندم حضرتلری،

حرمتلە و اشتیاقلە مبارك ال و آیاقلریڭزدن اوپرم. و دنیوی اوزون، اخروی دائمی عمرلە صحّت و عافیت و سعادتلریڭزی تمنّی ایدرم.

١-الحمد للّٰه بورادە تكرار دكّان آچابیلدك. ترقّی و تعالیسی ایچون قیمتلی دعالریڭزە محتاجم.

٢-یڭی دنیانڭ حقیقت اوغرندە چالیشمق ایستەین دیندار میسیونرلری شمالدن چیقان اژدرڭ، مغربدن مشرقە قدر اوزانان قولنڭ قورقونچ، وحشی عظمتیلە بیڭلرجە انسانی زهرلی پنچەسیلە یاقەلادیغنی و زهرلی دیلیلە ایصیردیغنی كوردكلری حالدە، دنیوی منفعتلر ایچون چالیشان دیپلوماتلری كبی بو زواللیلرڭ هم دنیوی، هم اخرویلرینی قورتارمق ایچون بو دهشتلی جاناور خورتلاغە قارشو، مسلمانلرلە برلكدە جبهە آلمەلری ایجاب ایتدیگنی رسالۀ نوردن حسّ ایتمەم اوزرینە، پدرملە بالاستشارە یڭی دنیانڭ دیندار میسیونرلرینی ایقاظ و عیسویلرڭ بر نوع ممثّلی اولان بو مستشرقلرڭ،

عیسویلرڭ بو فلاكتندن مسئول اولدقلرینی خاطرلاتمق و سلامت و سعادتلری ایچون او دهشتلی جاناوری یگانە ئولدیرەجك و آطومدن داها مؤثّر سلاح اولان عصای موسی یی و معجزات احمدیەییؐ ویردم. دقّتلە اوقویورلر. تأثیر ویریلمسی ایچون دعاڭزە محتاجدرلر. ان شٓاء اللّٰه اتّحاد ایدرلر.

٣- استانبولدە رسالۀ نورە مشتاق چوغالمقدەدر. بو سببلە آیری آیری دفترلرە یازیلمش بر طاقیم رسالۀ نورلە بر ایكی طاقیم عصای موسی نڭ (طاهرینڭ استانبولدە كوسترەجگی یرە) كوندریلمەسنڭ و اورادە محافظەسنڭ تأمیننی رجا ایدرم. بر ایكی آی ظرفندە كیتدیگمدە بر كتبخانە واسطەسیلە نشرینە اهمّیت ویریلەجكدر.

دعاڭزە محتاج چوق كناهكار و قصورلی ص. عبد الرحمن

طقوز سنە هیچ كوجندیرمدن كمال صداقتلە استادینە خدمت ایدن

بارلەلی صدّیق سلیمانڭدر.

[١٦٥]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق سوكیلی استادم افندم حضرتلری،

بتون خانەم خلقی مبارك ال و آیاقلریڭزی أوپر و خاك پایڭزە یوز و كوزلریمزی

سوررز. بو متحسّر و بیچارە خدمتكاریڭز بو كرە شو پریشان عریضەیی تقدیملە عرض حال ایتمك حسّیاتندە بولوندم. عفو كریمانەلرینی نیاز ایدییورم. سرمایۀ سرورم افندم. طقوز سنە قدر اهمّیتلی بر مدّت ایچندە اونوتولاماز مشرّفیتلردن صوڭرە اوزریمزە عارض اولان آتش مفارقت یوركلریمزی پك زیادە داغدار ایتمكدەدر. هر زمان معلوم اوطەڭزە واردقجە و چشمەڭزە اوغرادقجە، یاقیندن اوزاقدن چیناریڭزی كوردكجە و چاشیرلی نام یایلەدەكی مشهور ییلدیز سرایندن داها قیمتدار تخت سلیمانی كبی متحرّك قطران و چام سرایڭز و هر سڭیركندە كچدكجە اوزون قویو نام موقّت قوناق محللری كبی قدم شریفڭزلە مشرّف اولان محلّات و منازلی كوردكجە، او منزللردن صورییورم: هانی سزڭ مكینڭز، نرەدە سزڭ و بزم سلطانمز؟ عجبا بو كوزلریمزە او نورانی و مبارك كوزلرە بر داها ناظر و شاهد اولمق میسّر اولورمی؟ بنم بو كبی واقعاتی خاطرلادقجە قلبم، كوزم، روحم حتّی نفسم باش باشە چاتوب نالان و كریان اولویورلر.

ای آب حیات چشمەسی، سنڭ دە خار خار آقان كوزلریڭڭ یاشلری دەمی او محبوب ذی شانمزڭ فراقندن نشئت ایدییور؟ ای آغاچلر، سزڭ شو مغمومانە و محزونانە و متألّمانە خیشیلتیلریڭز، او باعث شرف ولی نعمتڭ مفارقت و بعدیتندن طولاییمی سزلر متأثّرانە آه و انینلر ایلە ایڭلەیورسڭز؟ و اظهار اسف ایدییورسڭز؟ ای حجرۀ عالیشان، سنڭ اوزون زمان مستغفرانە، مسبّحانە و

موحّدانە و مهلّلانە و مفسّرانە ییلدیریم صداسی كبی عرش اعظمە صعود ایدن و عالملری جذبەیە و جوش و خروشە كتیرن و پك خارقە نشئە و نشاطی اطرافە صاچمقلە ئولمش قلبلری احیا ایدن جلوەكر صدا و ندالرڭ انقطاعە اوغرادی. شیمدیكی شو عجیب سكوتڭ او شرفبخش مكینڭڭ افتراق و تحسّری سببیلەمیدر؟

فقط بز ربّمزە كمال اعتماد ایلە مربوطز. مادامكە او نعمت معنویە و او دولت قدسیە، بزە خیالمزە بیلە كلمەین بر صورتدە ویریلدی. یینە او دولت و سعادتە ملاقات میسّر اولور. و كون طوغمدن نەلر طوغار دیمكلە معنًا اونلری و ظاهرًا روح پر ملالمی تسلّی ایدییورم. هلە طُومْسُی تعبیر ایتدیگمز محلدە صارپڭ اوزرندە یالچین و یانغین قلەسی كبی سیوری قایانڭ باشنە بلبلواری اوتوروب، چای ایچمەڭ و ایچیرمەڭز هیچ خاطرمدن كیتمییور.

آه! او ذوقلی و شوقلی و نورانی حیاتڭ عودتنی درت كوزلە كورمەیی ربّم تعالی حضرتلرینڭ لطف و كرمندن بكلەیورم.

هم شونی دە افتخارلە مژدە و عرض أیلرمكە، او زماندنبری قوراقلقدن تحجّر ایتمش قیراچ اراضی كبی، قابل حرث و زراعت اولمایان بارلەدەكی روحلرە دخی، حمدًا ثمّ حمدًا، حیات رحمتی یاغمەیە باشلامش. كوچك الماس صاپانلر ایلە اوندن فضلە چفتجیلر، نور تخوملرینی اكوب سورمەیە باشلادیلر و فعالیتدەدرلر. اللّٰهمدن موفّقیتلر دیلرم. قضامز دە كذا

بارلەلی سلیمان

بو معصوم كاظمڭ باباسی سكز سنە صداقتلە سعید نورسی یە خدمت ایدوب برنجی صفدە نورلرە شاكرد اولمش. لاحقەیە كیرسین.

(١٦٦)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

پك محترم استادم حضرتلری، جد و اجداد، آنا و بابامدن سوكیلی استادم افندم، بالخاصّە عرض تعظیملرلە مبارك دست و دامن فاضلانەلریڭی اوپرم. عزیز استادم، شیمدی یە قدر نقصان بر دوشونجە، بندەڭزی شو طریق مستقیم و منوّردن كری بیراقدی. او خطام دە شودركە: عسكرلگمڭ یاقینلاشمسی طولاییسیلە هم او خدمتی یاپمق، هم وظیفۀ دینیەمی عارضەسز بر شكلدە ادا ایدەبیلمك، هم بر صنعت ایلە مجهّز اولمق آمالیلە، آنقرەیە اویلە بر فابریقەیە مقدّما كیتمشدم. بزم او حركتمزڭ یاڭلیش اولدیغنی، اورادن ایشە نهایت ویردیریلمك و حقیقی مقصدە شروع ایتمك ایچون جناب ربّ منّان، منبع نور اولان بارلەمزە كوندردی و نورلرە قاووشدیردی. شیمدی كمال خواهشلە دریای نورە طالوب یوزمەیە، خیری شرّی-، حقّی باطلی- سزمەیە للّٰە الحمد باشلادم. و نهایتسز فیوضاتە مستغرق اولدمكە، صباحدن آقشامە قدر یازییورم، طورمییورم. كون بكون شوقم تزاید ایدییور. حتّی آچلغمی دە حسّ ایدەمییورم.

یالڭز نماز وقتی شو چوق تجارتلی خرمانی بیراقییورم. عسكرلگم كلنجەیە قدر ان شٓاء اللّٰه عصای موسی یی دە اكمال ایتمەیە چالیشاجغم.

سوكیلی استادم، ایلك مطلع نور اولان مملكتمز شو بر ایكی سنە اوّلە قدر مع الاسف دور فترتە بڭزر بر حالە كلمشدی. شیمدی ایسە او ظلمتلی بلوط آلتندە محكوم و مغلوب كبی كورونن مملكتمزدە، نورجیلق شایان افتخار بر شكلدە پارلادی و تجسّم ایتدی. علیهدار كبی كورونن بر قسم شخصلر رسالۀ نورە توز بیلە قوندیراماز بر حالە كلدیلر. (اَلْحَمْدُ لِلّٰهِ هٰذَا مِنْ فَضْلِ رَبّٖی)

شایان حیرتدركە، دیندارلرە، خصوصیلە نورجیلرە یاپیلان تعرّضلر، یگانە شمس قرآنی پیدرپی سیسلندیرمك و سوندیرمك املیلە او عظیم جنایت ارتكاب ایدیلدیگی حالدە، جناب كبریا قات قات بر شوق و صارصیلماز بر غیرت ایلە حدسز طالبلری احسان بویورارق، او نیت فاسدە و مقاصد كریهەیی عقیم بیراقدی. "بر شمعەكە، مولا یاقا. اوفلەمكلە سونمز." قطعۀ معنیدارینی خاطرلاتدی.

عاجز بر طلبەڭز، بارلەدە مهاجر حافظ احمد مخدومی حافظ مصطفی كاظم

ما شٓاء اللّٰه، كاظم تام مكمّل قونوشویورسڭ. بن مراق ایتدم، عجبا بو كوزل یازی و افادە سنڭمیدر؟ بن اورادە ایكن سن كوچك بر چوجق ایدڭ. شیمدی اللی یاشندە، مدقّق، محاكمەلی بر نورجی طرزندە حسّ ایتدم.

سعید النّورسی

خانملرڭ بر خسروی اولان آسیەنڭدر. لاحقەیە كچسین.

(١٦٧)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

استادم افندم،

نورلی اللریڭزدن أوپر، راحتسزلغڭزڭ تمامیلە شفاسنی عاجزانە نیاز ایتمكدەیم. مولام كوزل أیلر ان شٓاء اللّٰه. مساعدەڭزلە، ابدی حیاتمە كوچمدن یازمغە مجبور اولدم. دنیا چلەلری، ماسوالر طولاییسیلە تقلیددە قالدم. لایقیلە قول اولوب معبودیمی بولامدم. حضرت قرآنڭ نورلریلە نورلانوب، سلطان انبیا افندیمزە لایقیلە امّت اولامدم. پیر پیرانڭ بندەسی اولوب، استغفار صوییلە پاك اولامدم. مقصدم، كوزل عمرم بوشە كیتمدن یوكسك همّتڭز، یوجە یوجە دعالریڭز ایلە یازدقلریمە نائل اولورم امیدیلە تسلّی اولمقدەیم. سزی ربّ العالمینە امانت ایدرم.

قرداشڭز آسیە

(١٦٨)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[اوّلا] مصطفی اوسمانڭ مكتوبنی، چیزكیلر اورتەسندەكی قسمی، نورلرڭ توسّعنە دائر اولمەسندن لاحقەیە كیرسین. هم او كوزل خطّیلە یازدیغی عصای موسی مجموعەسنی بڭا كوندرمەسنە مقابل، بندن بنم تصحیحمدن كچمش بر دیگر نسخەیی ایستەیور. او هانكی واسطە ایلە كوندرسە، بز دە اوڭا كوندرەجگز. حقیقتًا او و رفقالری نورلرە تام باغلی و چالیشییورلر. خصوصی مكتوب یازامدیغمدن كوجنمەسینلر.

[ثانیًا] یشیل صالح بورانڭ قائممقام مقامی واسطەسیلە بڭا مكتوبلر یازدیغی سببلە، صوردیغی سؤآللر بر پارچە اونلری اوخشامق ایچون، بر قسمی اهمّیتسز و بر قسمی دە جوابی ظاهردر. بو ذات حقیقتًا بزملە زیادە علاقەداردر. شیمدی بو دقیقەدە چالیشقانلردن حسنە یازدیغی بر مكتوبنی كوردم. ایچندە دییور: سعید ایچون بن رئیسە و باش وكیلە مكتوب یازاجغم.

اَلْبَاقٖی هُوَ الْبَاقٖی

قرداشڭز سعید نورسی

نورلرە آز زماندە چوق خدمت ایدن مصطفی اوسمانڭ مكتوبیدر.

(١٦٩)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

سوكیلی استادم،

زغفرانبولیدەكی فعالیت نور، نورڭ ساحۀ انتشارینڭ دیگر جبهەلریلە مقایسە ایدیلیرسە بر درجە دە اهمّیتسز بر حالدە ایسە دە، حقّڭ لطفنە و بر چكردكدن بیڭلر دانە ویرمك عنایت و حكمتنە طایانارق و نور ساحەسنڭ وقتیلە علم و عرفان منبعی اولان بو مملكتمزدە دە توسیعنە، قبولی محقّق اولان دعالریڭزی طلب نیّتیلە بر مقدار معلومات ویرییورز.

اوت، عزیز استادم. بزلر دە هر طرفدەكی قرداشلریمز كبی نورڭ معنوی فتوحاتنی مملكتمزدە كلّی اولارق مشاهدە ایدییورز. بو خصوصدە طلبەلر اوزرندەكی تصرّف، امداد، عنایت، وقایە، محافظە، صفوت قلب، جمعیت خاطر، نفی خواطر، دوام حضور، مجانبت اخلاق سیّئە، مقارنت اعمال حسنە وسائرە وسائرە كبی لطفلرندن بحثی زائد كورویورم.

عمومی اولارق ایسە، مملكتمز نورڭ دائرەسنە داخل اولالی هركسدە عبادات و طاعاتە دواملی بر میل و آرزو، خصوصًا چوجق و بیوكلردە و چوجغنە ایلك ایمان درسنی ویرەجك، اسلامڭ بناسنڭ تملنی یاورونڭ قلبنە

آتاجق اولان آنالردە، حتّی بالذّات كوردیگم طورون صاحبی اولمش دە قرآنی اوگرنمەمش ویاخود اونوتمش اولان ننەلردە قرآن اوقومغە و اوگرنمگە بر غیرت وار و أوگرنییورلر. (اَلْحَمْدُ لِلّٰهِ هٰذَا مِنْ فَضْلِ رَبّٖی)

عزیز استادم، ارككلرڭ غفلت و صاپدیغی شو دوردە قادینلرڭ چوبانی اویونە طالدیغندن، سفاهت و رذالت نسا سوروسنە صالدیردیغی بر هنگامدە، هنوز قلبلری ئولمەمش و اكثریتی تشكیل ایدن مؤمنات (ای نسوان! حیات باقیەڭزی ئولدیرمكلە قالمییورسڭز. اللّٰهڭ فطرت اسلامیە اوزرە یدلریڭزە امانت ایتدیگی و جانڭزدن چوق صیانت ایتدیگڭز، كوز ببگڭز یاورولریڭزی الڭزلە ئولدیرییور، حیات باقیەلرینی محو ایدییور، آتشە اللریڭزلە آتییورسڭز. بو یوزدن آیریجە شدّتلی عذابە كرفتار اولاجقسڭز!) ندای غیبیسنی دویمشلر كبی مولدلر وسیلەسیلە طوپلانارق، دواملی صورتدە وعظ و نصیحتلر ایلە بربرلرینی انتباهە دعوت ایتمەلری نە ایلە تأویل ایدیلەبیلیر؟ كیم بونڭ نورڭ فتوحاتی اولمدیغنی شو عجیب دوردە ادّعا ایدەبیلیر؟

حتّی أولردە قرآن خواجەلغی یاپان متعدّد قادینلرە علاوةً، بر دە رسمًا بر قرآن درسخانەسی آچیلمەسنە بعض اصحاب وجدانڭ غیرتی و بو وظیفەنڭ اهمّیتلی بر نور طلبەسنە تكلیفی و اونڭ دە مساعدە ایدیلیرسە قبول ایتمسی، ناصل نورڭ فتوحاتی دگلدر دییە انكار ایدیلیر؟

عزیز استادم، بو حاللر بویلە اولمقلە برابر، خسرو و طاهری افندیلر

قرداشلریمزڭ غیرت و همّتیلە مملكتمزە هدیە ایدیلن سوزلرڭ تمامنی و لمعەلری دواملی صورتدە مشتاقلرە و لایق اولان اللرە ویرییورز. حیرانلقلە اوقویورلر. بونلر آراسندە آرا آرا یازانلر دە وار. حتّی تقاعدە سوق ایدیلمەسیلە برابر دائرۀ ناردن قورتولوب، دائرۀ نورە دخالت ایدن بر معلّم قرداشمز محمد افندی، سوزلرڭ اون سكزینی یازدی. عصای موسی دە دە دردنجی حجّت ایمانیەلردە چوق دوام ایدییور. الحمد للّٰه، اوّلجە زیارتڭز شرفنە نائل اولانلر، عمومًا رابطە و علاقەلرینی شدّتلە محافظە ایدییورلر، اوقویورلر. بعضیسی دە آرا آرا یازییورلر. دواملی یازانلری دە وار، الحمد للّٰه.

سوكیلی استادم، مشتاقلر آراسندە حالاً عسكر بولونان، قرآن حروفاتی بیلمدیگندن نورڭ درسلرندن آنجق دیڭلەمكلە استفادە ایدەبیلن و صرف بو درسی آلمق ایچون آرا آرا اذنلی كلن زهدی اسمندە بر قرداش وار. بو چوجغی مملكتمزڭ بر كوچك علیسی اولاجغنی اینانییورم. عشق و شوقی و رابطەسی چوق قوّتلی و زیادەدر. یازی و قرآن اوگرنمەسی ایچون دعالریڭزی نیاز أیلرم. بو چوجغڭ باباسی دە اوقویور، بلكە آننەسی دە. چونكە آناسی قادینلرە وعظ و نصیحت ایدن بر صالحەدر. آرا آرا بزدن كتاب آلییورلر. هر حالدە نور دائرەسنە تمامًا كیرمەلری مطلوب اولان بر عائلەدركە، خانەلری مملكتمزڭ بر مدرسۀ نوریەسی اولابیلیر. بو خصوصدە دعاڭزی یالواریرم.

خدمتكاریڭز، نیاز مندیڭز مصطفی

[١٧٠]

یشیل صالحڭ چالیشقان حسنە استادیمز حقّندە یازدیغی مكتوبە مقابل استادیمزڭ یازدیغی مكتوبیدر.

عزیز قرداشم حسن افندی! سن بنم طرفمدن قیمتلی قرداشمز محمد صالح افندی یە یازكە، بن ئولنجەیە قدر اونڭ بو انسانیتنی اونوتمایاجغم. و اوڭا چوق منّتدارم و چوق سلام و دعا ایدرم. فقط بن هر صیقینتی یە قارشو تحمّلە قرار ویرمشم. هم بن اییلگی او رئیسلردن بكلەمییورم. هم استانبولە كیدن طاهری، بنم طرفمدن یشیل صالحە جانلی بر مكتوبدر.

اَلْبَاقٖی هُوَ الْبَاقٖی

قرداشڭز سعید النّورسی

[١٧١]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] طاهرینڭ استانبولە كیتمەسی، ان شٓاء اللّٰه خیردر. و خسروڭ پك چوق وظیفەلرینی تمامًا یاپمەسی، قناعتم كلدیكە، بارلەدە بولوندیغم زمان بتون یازانلرڭ تصحیحاتنی و تألیف خدمتنی یاپمقدە تحقّق ایدن بیوك عنایت و خارقە موفّقیت، عینًا خسرودە و یاردیمجیلرندە دخی نمونەسی وار.