خستەلغمە دە بر مرهم اولدی. بنم اندیشەلریمی دە ازالە ایتدی. جناب حق اونلری و سزلری انس و جن شیطانلرینڭ شرلرندن محافظە أیلەسین. آمین. [حاشیە]

عموم قرداشلریمزە برر برر سلام و سلامتلرینە دعا ایدن و دعالرینی ایستەین خستە قرداشڭز سعید النّورسی

[٣٣٨]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز قرداشلرم و نور شاكردلرینڭ كوچك پهلوانلری،

عصای موسی آخرلرندە -بعض نسخەلرندە- مباركلر پهلوانی بیوك روحلی كوچك علی نامندە بر قرداشمزڭ سؤٓالنە قارشو ویردیگم بر جواب وار. اونی اوقوییڭزكە، او ذاتە بعض معترضلر رسالۀ نورڭ قیمتنی بر درجە قیرمق ایچون دیمشلر: هركس اللّٰهی بیلیر. عادی بر آدم، بر ولی كبی اللّٰهە ایمان ایدر دییە، نورلرڭ پك یوكسك و پك چوق قیمتدار و غایت لزوملی تحشیداتنی زیادە كوسترمك ایستەمشلر.

شیمدی استانبولدە -داها دهشتلی بر فكردە- آنارشی فكرلی، كفر مطلقە دوشمش بر قسم منافقلر، رسالۀ نور كبی، اكمك و صویە احتیاج درجەسندە هركس محتاج اولدیغی ایمانی حقیقتلرینە احتیاجی دوشورمك دسیسەسیلە دییورلركە: هر ملّت، هركس اللّٰهی بیلیر. اونی، داها یڭی درس آلمەیە احتیاجمز چوق یوق، دییە مقابلە ایتمك ایستەیورلر. حالبوكە اللّٰهی بیلمك، بتون كائناتە احاطە ایدن ربوبیّتنە و ذرّەلردن ییلدیزلرە قدر جزئی و كلّی هر شی اونڭ قبضۀ تصرّفندە و قدرت و ارادەسی ایلە اولدیغنە قطعی ایمان ایتمك و ملكندە هیچ بر شریكی اولمادیغنە.. و [لَٓا اِلٰهَ اِلَّا اللّٰهُ] كلمۀ قدسیەسنە، حقیقتلرینە ایمان ایتمك، قلبًا تصدیق ایتمكلە اولور. یوقسە بر اللّٰه وار دییوب، بتون ملكنی اسبابە و طبیعتە تقسیم ایتمك و اونلرە اسناد ایتمك، حاشا، حدسز شریكلری حكمندە اسبابی مرجع طانیمق و هر شیئڭ یانندە حاضر ارادە و علمنی بیلمەمك و شدّتلی امرلرینی طانیمامق و صفتلرینی و كوندردیگی ایلچیلرینی و پیغمبرلرینی بیلمەمك، البتە هیچ بر جهتدە اللّٰهە ایمان حقیقتی اوندە یوقدر. بلكە كفر مطلقدەكی معنوی جهنّمڭ دنیوی تعذیبندن كندینی بر درجە تسلّی یە آلمق ایچون او سوزلری سویلر.

اوت، انكار ایتمەمك باشقەدر، ایمان ایتمك بتون بتون باشقەدر. اوت، كائناتدە هیچ بر ذی شعور، كائناتڭ بتون اجزاسی قدر شاهدلری بولونان خالق ذوالجلالی انكار ایدەمز. ایتسە، بتون كائنات اونی تكذیب ایدەجگی ایچون صوصار، لاقید قالیر. فقط اوڭا ایمان ایتمك، قرآن عظیم الشّانڭ درس ویردیگی كبی، او خالقی

صفتلری ایلە، اسملری ایلە عموم كائناتڭ شهادتنە استنادًا قلبًا تصدیق ایتمك و ایلچیلری ایلە كوندردیگی امرلری طانیمق.. و كناه و امرە مخالفت ایتدیگی وقت، قلبًا توبە و ندامت ایتمك ایلەدر. یوقسە، بیوك كناهلری سربست ایشلەیوب هیچ استغفار ایتمەمك و آلدیرمامق، او ایماندن حصّەسی اولمادیغنە دلیلدر. هر نە ایسە، اولادلرم، اهمّیتلی بر حادثە سزە بو اوزون مسئلەیی قیصەجە بیان ایتمەیە سبب اولدی. شیمدیلك سزلرە رسالۀ نورڭ اهمّیتلی شاكردلری نظریلە باقییورم. مصطفی اوروچ چوق طالعلیدركە، كندی سیستمندە و روحندە و جدّیتندە، آز بر زماندە سزلری بولدی. بر ایكن اون مصطفی اولدی.

سعید النّورسی

[٣٣٩]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، محترم قرداشم محمد صالح،

[اوّلا] ذاتڭزڭ بر رسالە قدر جامع و اوزون و مدقّقانە، حرارتلی مكتوبڭزی كمال مراقلە اوقودم. پشین اولارق سزە بونی بیان ایدییورمكە، رسالۀ نورڭ استادی و رسالۀ نورە جلجلوتیە قصیدەسندە رموزلی اشارتیلە پك چوق علاقەدارلق كوسترن و بنم حقائق ایمانیەدە خصوصی استادم امام علیدرؓ.

و [قُلْ لَٓا اَسْئَلُكُمْ عَلَیْهِ اَجْرًا اِلَّا الْمَوَدَّةَ فِی الْقُرْبٰی] آیتنڭ نصّی ایلە، آل بیتڭ محبّتی، رسالۀ نوردە و مسلگمزدە بر اساسدر. و وهّابیلك طماری، هیچ بر جهتدە نورڭ حقیقی شاكردلرندە اولمامق لازم كلییور. فقط مادام بو زماندە زندقە و اهل ضلالت اختلافدن استفادە ایدوب، اهل ایمانی شاشیرتوب و شعائری بوزارق، قرآن و ایمان علیهندە قوّتلی جریانلری وار. البتە بو مدهش دوشمانە قارشو جزئی تفرّعاتە دائر مدار اختلاف مناقشەلرڭ قاپوسنی آچمامق كركدر.

هم ئولمش انسانلری ذمّ ایتمك، هیچ لزومی یوق. اونلر دار آخرتە، محل جزایە كیتمشلر. لزومسز، ضررلی، اونلرڭ قصورلرینی بیان ایتمك، امر اولونان محبّت آل بیتڭ مقتضاسی دگلدر و لازم دە دگلدر، دییە اهل سنّت والجماعت، صحابەلر زمانندەكی فتنەلردن بحث آچمەیی منع ایتمشلر. چونكە واقعۀ جملدە عشرۀ مبشّرەدن زبیرؓ و طلحهؓ و عائشۀ صدّیقهؓ بولونمەسیلە اهل سنّت والجماعت او حربی اجتهاد نتیجەسی دییوب، حضرت علیؓ حق، اوتەكی طرف حقسز، فقط اجتهاد نتیجەسی اولدیغی جهتلە عفو ایدیلیر. هم وهّابیلك طماری، هم مفرط رافضیلرڭ مذهبلری اسلامیتە ضرر ویرمەسین دییە صفّین حربندەكی باغیلردن دە بحث آچمەیی ضررلی كورویورلر.

حجّاج ظالم، یزید و ولید كبی حریفلرە علم كلامڭ اڭ بیوك علّامەسی اولان سعد تفتازانی، "یزیدە لعنت جائزدر" دیمش، فقط "لعنت واجبدر" دیمەمش.

"خیردر و ثوابی وار" دیمەمش. چونكە هم قرآنی، هم پیغمبری، هم بتون صحابەلرڭ قدسی صحبتلرینی انكار ایدنلر حدسزدر. شیمدی اونلردن میداندە كزنلر چوقدر. شرعًا بر آدم، هیچ ملعونلری خاطرە كتیرمەیوب لعنت ایتمەسە، هیچ بر ضرر یوق. چونكە ذمّ و لعنت ایسە، مدح و محبّت كبی دگل. اونلر عمل صالحدە داخل اولاماز. اگر ضرری وارسە داها فنا.

ایشتە شیمدی كیزلی منافقلر، وهّابیلك طماریلە اڭ زیادە اسلامیتی و حقیقت قرآنیەیی محافظەیە مأمور و مكلّف اولان بر قسم خواجەلری الدە ایدوب، اهل حقیقتی علویلكلە اتهام ایتمكلە بربری علیهندە استعمال ایدرك، دهشتلی بر ضربەیی اسلامیتە اورمەیە چالیشانلر میداندە كزییورلر. سن دە بر پارچەسنی مكتوبڭدە یازییورسڭ. حتّی سن دە بیلییورسڭ، بنم و رسالۀ نورڭ علیهندە استعمال ایدیلن اڭ تأثیرلی واسطەیی، خواجەلردن بولمشلر. شیمدی حرمین شریفینە حكم ایدن وهّابیلر و مشهور، دهشتلی داهیلردن اِبْنِ تَیْمِیَە و اِبْنِ قَیِّمِ الْجَوْزٖینڭ پك عجیب و جاذبەدار اثرلری استانبولدە چوقدنبری خواجەلرڭ النە كچمەسیلە، خصوصًا اولیالر علیهندە و بر درجە بدعەلرە مساعدەكار مشربلرینی كندیلرینە پردە یاپمق ایستەین، بدعەلرە بولاشمش بر قسم خواجەلر، سزڭ محبّت اهل بیتدن كلن و شیمدی اظهاری لازم اولمایان اجتهادیڭزی وسیلە ایدرك هم سڭا، هم نور شاكردلرینە ضربە اورابیلیرلر. مادام ذمّ ایتمەمك و تكفیر ایتمەمكدە بر امر شرعی یوق، فقط ذمدە و تكفیردە حكم شرعی وار. ذمّ و تكفیر،

اگر حقسز اولسە، بیوك ضرری وار. اگر حقلی ایسە، هیچ خیر و ثواب یوق. چونكە تكفیرە و ذمّە مستحق حدسزدرلر. فقط ذمّ ایتمەمك، تكفیر ایتمەمكدە هیچ بر حكم شرعی یوق، هیچ ضرری دە یوق. ایشتە بو حقیقت ایچوندركە، اهل حقیقت، باشدە ائمّۀ اربعە و اهل بیتڭ ائمّۀ اثنا عشر اولارق اهل سنّتڭ، مذكور حقیقتنە مستند اولان قانون قدسیەیی كندیلرینە رهبر ایدوب، اسلاملر ایچندە او اسكی زمان فتنەلرندن مدار بحث و مناقشە ایتمەیی جائز كورمەمشلر، منفعتسز، ضرری وار دیمشلر.

هم او حربلردە، چوق اهمّیتلی صحابەلر، ناصلسە ایكی طرفدە بولونمشلر. او فتنەلری بحث ایتمكدە او حقیقی صحابەلرە، طلحهؓ و زبیرؓ كبی عشرۀ مبشّرەیە دخی طرفكیرانە بر انكار، بر اعتراض قلبە كلیر. خطا وارسە دە توبە احتمالی قوّتلیدر. او اسكی زمانە كیدوب لزومسز، ضررلی، شریعت امر ایتمدن او احواللری تدقیق ایتمكدن ایسە، شیمدی بو زماندە بالفعل اسلامیتە دهشتلی ضربەلر اوران، بیڭلر لعنتە، نفرتە مستحق اولانلرە اهمّیت ویرمەمك كبی بر حالت، مؤمن و مدقّق بر ذاتڭ وظیفۀ قدسیەسنە موافق كلەمز.

حتّی صبری ایلە كوچوجك مناقشەڭز، هم رسالۀ نورە، هم حقائق ایمانیەنڭ انتشارینە اهمّیتلی بر ضرر ویردیگنی -سندن صاقلامام-. عین وقتدە بورادە حسّ ایتدم، متأثّر و متألّم اولدم. صوڭرە سنڭ كبی اهل تحقیق بر عالمڭ رسالۀ نورە اوراجە اهمّیتلی بر خدمتە وسیلە اولاجق صبری اورایە كلمەسی،

ایكیڭزدن بیوك بر خدمت نوریە بكلركن، بالعكس اوچ جهتدە نورە ضرر كلدیگنی حسّ ایتدم و كوردم. عجبا نەدن بو ضرر اولمش؟ دییە، ایكی اوچ كون صوڭرە خبر آلدمكە، صبری معناسز، لزومسز سنڭلە مناقشە ایتمش. سن دە حدّتە كلمشسڭ. ایواه دیدم. "یا ربّی، ارضرومدن امدادیمە یتیشن بو ایكی ذاتڭ مناقشەسنی مصالحەیە تبدیل ایت" دییە دعا ایتدم. رسالۀ نورڭ اخلاص لمعەلرندە دینیلدیگی كبی، شیمدی اهل ایمان، دگل یالڭز مسلمان قرداشلریلە، بلكە خرستیانڭ دیندار روحانیلریلە اتّفاق ایتمەیە و مدار اختلاف مسئلەلری نظرە آلمامق، نزاع ایتمەمك كركدر. چونكە كفر مطلق هجوم ایدییور. سنڭ حمیت دینیە و تجربۀ علمیە و نورلرە قارشو علاقەڭزدن رجا ایدییورمكە، صبری ایلە كچن ماجرایی اونوتمغە چالیش. و اونی دە عفو ایت و حلال ایت. چونكە او كندی قفاسیلە، فكریلە قونوشمامش. اسكیدنبری و خواجەلردن ایشیتدیگی شیلری، لزومسز مناقشە ایلە سویلەمش. بیلیرسڭكە، بیوك بر حسنە و اییلك، چوق كناهلرە كفّارت اولور. او همشهریمز صبری، حقیقتًا نورە و نور واسطەسیلە ایمانە اویلە بر خدمت أیلەمشكە، بیڭ خطاسنی عفو ایتدیرر. سزڭ عالی جنابلغڭزدن، او نور خدمتلری خاطری ایچون، دوست بر همشهری و نور خدمتندە بر آرقداش نظریلە باقملیسڭز.

صحابەلرڭ بر قسمی، او حربلردە عدالت اضافیە و نسبیە و رخصت شرعیەیی دوشونوب تابع اولارق، حضرت علینڭؓ تعقیب ایتدیگی عدالت حقیقیە و

عزیمت شرعیە ایلە برابر زاهدانە، مستغنیانە و مقتصدانە مسلگنی ترك ایدوب، مخالف طرفە بو اجتهاد نتیجەسندە كیردكلرینی، حتّی امام علینڭؓ قرداشی عقیل و حبر الامّە عنواننی آلان عبد اللّٰه ابن عباس دخی بر وقت مخالف طرفندە بولوندقلرندن، حقیقی اهل سنّت والجماعت، (مِنْ مَحَاسِنِ الشَّریعَةِ سَدُّ اَبْوَابِ الْفِتَنِ) بر دستور اساسیۀ شرعیەیە بناءً (طَهَّرَ اللّٰهُ اَیْدِیَنَا فَنُطَهِّرُ اَلْسِنَتَنَا) دییەرك او فتنەلرڭ قاپوسنی آچمق، بحث ایتمك، جائز كورمییورلر. چونكە اعتراضە مستحق برقاچ دانە وارسە، طرفكیرلك طماری ایلە بیوك صحابەلرە، حتّی مخالف طرفندە بولونان آل بیتڭ بر قسمنە و طلحهؓ و زبیرؓ كبی عشرۀ مبشّرەدن بیوك ذاتلرە اعتراضە باشلار، ذمّ و عداوت میلی اویانیر دییە، اهل سنّت او قاپویی قپامق طرفداریدر. حتّی اهل سنّتڭ و علم كلامڭ عظیم اماملرندن مشهور سَعْدِ تَفْتَازَانیٖ، یزید و ولید حقّندە تلعین و تضلیلە جواز ویرمەسنە مقابل، سیّد شریف جرجانی كبی اهل سنّت والجماعتڭ علّامەلری دیمشلر: "كرچە یزید و ولید، ظالم و غدّار و فاجردرلر، فقط سكراتدە ایمانسز كیتدكلری غیبیدر. قطعی بر درجەدە بیلینمەدیگی ایچون، ئولمش شخصلرڭ نصّ قطعی و دلیل قطعی بولونمدیغی وقت، ایمانلە كیتمەسی احتمالی و توبە ایتمك احتمالی ایلە، اویلە خصوصی شخصە لعنت ایدیلمز. بلكە (لَعْنَةُ اللّٰهِ عَلَی الظَّالِمٖینَ وَالْمُنَافِقٖینَ) كبی عمومی بر عنوان ایلە لعنت جائز اولابیلیر. یوقسە ضررلی، لزومسزدر" دییە سعد تفتازانی یە مقابلە ایتمشلر.

سنڭ مدقّقانە و عالمانە مكتوبڭە قارشو اوزون جواب یازمدیغمڭ سببی، هم اهمّیتلی خستەلغم و اهمّیتلی مشغلەلرم ایچندە عجلە بو قدر یازابیلدم.

اَلْبَاقٖی هُوَ الْبَاقٖی قرداشڭز سعید النّورسی

[٣٤٠]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] جنّت الفردوسڭ میوەلری و مدرسة الزّهرانڭ هیئت فعّالەسنڭ صحائف عمللری و دفتر حسنەلری اولان ذوالفقار و آرقداشلرینی، سلامتلە جمعە كیجەسی سرچە قوشنڭ ویردیگی مژدەدن ایكی ساعت صوڭرە كمال سرور ایلە آلدق. سزلرە اونلرڭ حرفلری عددنجە (بَارَكَ اللّٰهُ، وَفَّقَكُمُ اللّٰهُ وَاَسْعَدَكُمُ اللّٰهُ فِی الدَّارَیْنِ) دییوب روح و جانمزلە سزی تبریك ایتدیگمز كبی، بو مملكتی دە تبریك ایدرز. و ذوالفقارڭ ظهورینڭ مقدّمەلری باشلامسی ایلە دین لهندە قوّتلی جریانلرڭ و علیهندەكی تجاوزڭ طورمسی و بر قسمی رجوع ایدوب اسكی خطائیاتڭ تعمیرینە چالیشمەسی اشارتیلە، شیمدی بالفعل تظاهر و نشر اولمسی، ان شٓاء اللّٰه مملكت ایچون اسلامیت جهتندە بیوك بر فائدەسی اولاجق و ظلمتلری طاغیتاجق اشارتنی ویرییور.

اوت، شمالدن كلن كفر مطلق جریاننی طوردیراجق، یالڭز رسالۀ نوردر. سیاست، دیپلوماتلق، او وظیفەیی كورەمز. اونڭ ایچون، وطنپرور و ملّیتجی و سیاستجیلر، نورلرە صاریلمغە مجبوریت وار. او ذوالفقارڭ ظهورە كلمەسی ایچون چالیشانلرڭ شخص معنویسنڭ، بلكە هر بریسنڭ قیامتدەكی دفتر حسناتنە یدی یوز صحیفەسیلە بر تك صحیفۀ حسنات اولمەسنی رحمت الٰهیەدن نیاز ایدییورز. مادام او ایمان حقیقتلری یوكسك بر عبادت و حسنەدر.. و اونڭلە چوقلرڭ ایماننی قورتارمق بیڭلر حسنە حكمندەدر.. و اونڭ ظهورینە چالیشانلرڭ هر بریسی اونی اوقویوب، دیڭلەیوب اعتقاد ایتمەسیلە، عینًا ایشلەدیگی سائر خیراتڭ دفتری كبی بر اخروی سندیدر. البتە اونلرڭ شخص معنویسنڭ آخرتدە دفتر حسناتندن یدی یوز صحیفەسیلە بر تك صحیفە اولارق ذوالفقار عینًا نشر اولمق و بر صحیفەسی حكمنە كچمك حدسز بر رحمتڭ شأنیدر.

[ثانیًا] كرچە نورلر كیردكلری هر یردە غلبە ایدر، فقط متمرّد و معنّد زندیقلر، مادّیونلر، اللرندن كلدیگی قدر فتوحاتنە فتور ویرمك ایچون دسیسەلرە و اهل سیاستە اوهام ویرمگە چابەلایورلر. ان شٓاء اللّٰه بر خلط ایدەمزلر. فقط احتیاط، هر وقت اییدر. (سِرًّا تَنَوَّرَتْ) دستوری دوام ایدییور. تا بونڭ كبی برقاچ مجموعە چیقنجەیە قدر تمكینلی و احتیاطلی بولونمق لزومی وار. حتّی بو دفعە سرّ انّا اعطینانڭ رمزلی رسالەسنی اون اوچ سنەدنبری كورمدیگم حالدە بورایە كوندرمك، بر درجە احتیاط قاعدەسنە مخالف اولدیغی كبی، هركس آڭلاماز. هم تأویل و تفسیر

لازمدر. چونكە لاحقەدە بر مكتوبدە یازمشدمكە، ایكی حقیقت مجملاً بڭا اخطار ایدیلمشدی:

[بریسی] بر درجە طار بر دائرەدە بر نور كوستریلمشدی. بن كنیش بر دائرەدە معنا ویروب، قرق سنە اوّل بر نور كورەجگز دییە مژدە ویرییوردم. حتّی حرّیتدن اوّل، اسكی طلبەلریمە دە او مژدەیی مكرّر سویلەیوردم. ظن ایدردمكە، كنیش سیاست دائرەسندە اولاجق. حالبوكە بو مملكتڭ اڭ زیادە محتاج اولدیغی ایمانی و اسلامی و حیات اجتماعیۀ اسلامیە دائرەسندە رسالۀ نوری كورەجكسڭز دییە حقیقتدن بڭا اخطار ایدیلمش. بر حسّ قبل الوقوع ایلە مصرّانە و تكرار ایلە بن دە خبر ویرییوردم، او حق و حقیقتلی مسئلەنڭ صورتنی دگیشدیرییوردم.

[ایكنجیسی] شعائر اسلامیەیە و سیاست اسلامیەیە ضربە اورانلر اون ایكی، اون اوچ، اون درت، اون آلتی سنە ظرفندە بیوك ضربەلر یییەجكلر دییە بڭا اخطار ایدیلدی. اوّلكی مسئلەنڭ عكسنە اولارق، كنیش دائرەدە وقوع بولاجق او حادثاتی و بیوك جماعتلرە كلن او طوقاتلری، كوچك بر دائرەدە شخصلرە كلەجك طوقاتلر صورتندە معنا ویرمشدمكە، تام عینًا ایكی دائرەدە، هم كوچك، هم بیوك، اون ایكی سنە صوڭرە اڭ مدهشی دنیایی ترك ایتدیگی كبی.. بیوك دائرەدە دە اونڭ كبی دهشتلی جماعتلر، اون ایكی، اون اوچ، اون درت، اون آلتی تاریخلرندە عین طوقاتلری ییدیلر و یییەجكلر دییە اخطار ایدیلدی. بن تأویلملە بو بیوك دائرەیی یالڭز كوچكدە تطبیق ایتدیگم كبی، اوّلكی نور

مسئلەسندە دە بالعكس كوچك دائرەیی و صرف ایمانی حادثۀ نوریەیی، پك كنیش دائرۀ سیاسیەدە تأویلملە معنا ویرمشدم. اونڭ ایچون، سرّ انّا اعطینایی هركس بردن آڭلاماز. هم شخصی اسملری، بویلە مسائل علمیەیە كیرمەمك لازم اولدیغندن، او رسالە، حتّی اون اوچ سنەدنبری ألمە دە كچمدیگندە اصابت وار. قرداشلرم دخی اونی مراق ایتمەسینلر. بری اگر چوق مراق ایتسە، او سرّ انّا اعطینانڭ باشندە شیمدیكی (ثانیًا) ایلە باشلایان فقرەیی و لاحقەدە كچن عین بو مسئلەیە دائر فقرەیی اوقومق لازمدر. یوقسە هیچ باقماسین. اوت، ایكنجی حرب عمومی و او دهشتلی شخصڭ دنیادن كیتمەسیلە و شیمدی دە اونڭ مسلگی كری چكیلمەسی و بر قسمی او مسلگڭ عكسنە دین لهندە رسمًا چالیشمەسی و اهل ایمانڭ استبداد مطلقەدن بر درجە قورتولمسی و آز بر تأویل ایلە او رسالەجگڭ ویردكلری خبر عین تاریخلردە وقوع بولمسی، او سورەنڭ بر لمعۀ اعجازیدر. فقط هیجانلی تأویللرم پردە چكمشدی، حقیقت كیزلنمش.

[ثالثًا] راحتسزلغم، هم دە مشغلەمڭ چوقلغی ایلە تدقیق ایدەمدیگم لغتلرڭ ترجمەسی رسالەجگی كوزلدر. حروف هجانڭ ترتیبیلە یاپیلمش. بن تصحیح و اصلاح و تكمیلنە وقت بولامدیغمدن یینە سزە حوالە ایدییورم. بر ایكی قرداشمز بنم بدلمە برابر باقسینلر. هم مخلص خلوصینڭ اسكی كبی جدّیتلە نورلرە چالیشمەسی خصوصًا حدود مملكتلردە اهمّیتلی خدمت كوردیگنی بیلدیرن مكتوبنڭ بر پارچەسنی لاحقەیە كچمك ایچون ملفوفًا سزە كوندریلدی.

بن یاواش یاواش، ماكینە محصولاتی ذوالفقارڭ درجۀ صحّتنە باقاجغم. طرزی و صورتی پك كوزل و شیرین و دقّتلی و اوقوناقلیدر. ان شٓاء اللّٰه صحّتی دە مكمّلدر. بعض سونوك كلمەلر بولونمسی ضرر ویرمز. اسلام كویندە بزم ایچون یازیلان ایكی ذوالفقار سزە لزومی یوقسە بزە كوندرەبیلیرسڭز.

اَلْبَاقٖی هُوَ الْبَاقٖی

عموم قرداشلریمزە و همشیرەلریمزە سلام و سلامتلر دعا ایدرز

خستە فقط ممنون و مسرور قرداشڭز

سعید النّورسی

[٣٤١]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ تَعَالٰی وَبَرَكَاتُهُ بِعَدَدِ كَلِمَاتِ اللّٰهِ اٰمٖینَ

عزیز و محترم و مشفق استادم،

بوكون دردە دوٓاء، مرضە شفا، قلبە نور و ضیا كتیرن مبارك لَعْلْ رنك خطڭزی آلدم. ایشلریمزدە تصادف اولمادیغنە بر دلیل داها وقوعە كلمش اولدی. یگرمنجی سوزڭ ایكنجی مقامنە باشلامش [وَلَا رَطْبٍ وَلَا یَابِسٍ اِلَّا فٖی كِتَابٍ مُبٖینٍ] آیت جلیلەسنڭ تفسیرینی یازییوركن بو مبارك مكتوب كلدی. صانكە، مكتوبڭ تمامی یازمقدە اولدیغڭ مبارك سوزدەدر، دینیلییور. دون آقشامكی محدود جماعتمە اوچنجی سوزی اوقومش و عَلٰی قَدْرِ الطَّاقَە ایضاح ایتمش، بو صیرەدە

لطیف بر خاطرەڭزی ذكر ایتمشدم. اگیردیردە ایكن زیارتڭزدن دونن بر كوی امامنە برنجی، ایكنجی، اوچنجی سوزلری یازمقلغمی امر بویورمشدیڭز. او صافی ذاتە بو اوچ سوز كافی كلمش، اونی نورلرە علاقەدار ایتمش، خادم و طالبلرە الحاق ایتدیرمش، ابدی یولنی آیدینلاتاجق نورانی بر قندیلە صاحب ایتمشدی.

بتون رسالۀ نور شاكردلرینی اشهاد ایدرك دیرمكە: نورلرڭ بتون اجزاسی بر طوبای جنّت اولان قرآن شجرۀ معنویەسنڭ منوّر میوەلریدر. تك بر میوەنڭ حكمتلە طاقیلدیغی بو نورانی شجرەنڭ اوفاجق دالنە بیلە یاپیشیلسە، یول نورلانیر، حقیقت آڭلاشیلیر. حیات دڭزندە نهایتسز امواج ایچندە یوزن وجود سفینەسی صحّتلی و نورلی بر پوصولە، قلب بتون مكوّناتی و موجوداتی حقیقتلری ایلە كوسترن بر آیینۀ نور. روح و دیگر لطائف ابدە قدر نورلانان یولجیلقلرینی امنیت و ایمانلە یاپاجق غایت قوّتلی بر منبع نور بولورلر. اللّٰهڭ لطف و عنایتیلە خدمت نوریەدە فتورسز و اختیارسز استخدامم دوام ایدییور.

اوت، امر بویوردیغڭز كبی، بزلر اجرتمزی پشینًا آلمشز. بویلە قرآنی و ایمانی خدمتە بتون عجز و نقصانمزلە برابر، بتون رسالۀ نور شاكردلرینڭ استادلرینڭ تحت ریاستندەكی صارصیلماز، اخلاصلی دعالرینڭ معجّل اجرتی اولارق كریم و رحیم ربّمز موفّق ایتمش. (اَلْحَمْدُ لِلّٰهِ هٰذَا مِنْ فَضْلِ رَبّٖی)

نهادە امرلریڭزی شیمدی یازاجغم ان شٓاء اللّٰه. كچن هفتە بورانڭ بر كویندە اوتوران قاسم خواجە ایلە كوروشدك. براز نورلردن مطالعە ایتدك. بر سنەیە