[٢٨٦]

اینەبولی نورجیلری حقّندە قیصە بر تعریفەدر.

[برنجی] استادندن و نورندن منعكس هر آن ٭ بر سلطان، بر كهیلان وقارڭ عظمتندن كزركن صوقاقدە تیترر زمین، كورلر ملكلر هیبتندن ٭ چارپار قلبم كورنجە كوشەدن، دیر ایچین ایچین نظیف كلییور ٭ بتون كوزلر اوڭا دیكیلمش، كیمی بگنمز تمرّدندن ٭ كیمی باقاماز یوزینە اوتانجندن ٭ كیمی قلبندن عاشق، خوف خلقدن حقّی اظهار ایدەمز ٭ نورجی قلبندە طیق طاق، صانكە حضور استاددە ٭ بویورڭ لطفًا اوتورالم ٭ استاد حسابنە جواب ٭ صاغ اول، تشكّر ایدرم ٭ بعضًا، پكی موافق، هایدی اوتورالم ٭ بیلكە كوڭللر مسرور او آندە ٭ ملكلر بیلە تبسّمدە ٭ ناچیز قلمم ناصل تعریف ایتسین ٭ سیاستدن بحثدە بر فیصیلتی ٭ بز نظیفی سیاستجی دییوردق ٭ شیمدی آڭلادقكە، اونلر نورجی ایمشلر ٭ اوت، احمد نظیف چلبی، مادّی معنوی مملكتی قورتارمق كلفتنی تك باشنە بیلە صیرتنە آلدیغی زمان علیهندە یاپیلان ظالمانە اڭ فنا تلقّیلرڭ وقارینی بوزمایان بو قرداشڭ ایمانی خدمتنە عالم اسلام منّتداردر.

[ایكنجیسی] ذكی و تحصیللی اولوب، بتون بیلكیسنی و ذكاسنی رسالۀ نوردن تحصیل ایدن، چوق غیرتلە چالیشان، رسالۀ نوری شرقدە غربدە یایان، آمریقە میسیونرلرینە، یعنی آمریقە قطعەسنە رسالۀ نوری طانیتدیران،

تام مسلمانجە نشریات یاپان بر مجموعەجی، شاعر نجیب فاضل ایلە رسالۀ نورڭ آراسنی بولارق سابق چكینكنلگی اورتەدن قالدیروب عصای موسی مجموعەسنی ویرەرك، رمزًا، پارچە پارچە انتشارینە سبب اولان و كرك طبع و كرك رسالۀ نورڭ عمومی-خصوصی چوق مهم ایشلرندە باش رولی آلان و چالیشان، عبد الرّحمن صلاح الدّین.

[اوچنجی] ظاهردە كوچك بوییلە، معنا طولو لسانیلە، پك تمیز، آنادن طوغمە كیرلنمەمش هر كون تزاید ایدن كوزل خوییلە، رسالەدەكی غیرت و عبرت نمونەسی، چوق تقدیرە دگر كیدیشاتیلە، منطق و بیلكی طولو خطابیلە، اینەبولی رسالۀ نور طلبەلرینڭ طوپلیلق و تساند تمثالیلە و خانەسنی بالذّات بتون طلبەیە آچیق بر مدرسۀ نوریە وضعیتنە كتیرمسیلە، مملكتمزی تمثیلدە چوق ایلری كیدن، حقیقتًا شرفلی و چوق چالیشقان قرداشمز كوچك ابراهیم.

[دردنجی] رسالۀ نورە انتسابلە كنچلگنڭ ایلك سرخوشلقلرندن چابوق آییلان و جدّی، صارصیلماز زهد و تقواسیلە و چالیشمەسیلە نوری تعریف و توصیفدە خوش صحبتیلە، كوزل یازی تصحیحجی و محرمیتلە مادّی و معنوی نورە خدمتی قطعی و چوق جدّی وقار و حیثیت تقدیركارلغیلە تمیز بر ناصیۀ عرفان حالنە كلن ایكنجی مبارك زكریا اولان محمد بن صالح.

[بشنجی] سوكیلی استادیمزڭ شفالی نظرلریلە، نورڭ تداویسنە مظهر اولمش، كنچلگنی بو صورتلە سفاهتڭ ألندن قورتارمش، امّی اولدیغی حالدە تردّدسز

تسلیمیتیلە نور حسابنە كلجیلگی و ایكی اوصافی برلشدیرمسیلە، اسپارطەنڭ كوزل یازیلی نورلرینی یوزلرجە لیرە صرفندن چكینمەیەرك مملكتمزدە انتشار ایتدیروب، بورایی تام غیرتە كتیرمسیلە، قوۀ حافظە و ناطقەسنڭ درستلگی سببیلە نور حقیقتلرینی آرزو ایدنلرە كاتبلرڭ اكثرندن داها أیی ایضاح ایتمەسیلە، أوینی، كوزل باغچەسنی نور درسخانەسی حالنە كتیرمسیلە، خوش صحبتیلە رسالۀ نورڭ حیثیت و عظمتنی كوسترمكدە چوق أیی طانینان قرداشمز كُلجی حسین.

[آلتنجی] سفلی بر حیاتلە اوتوز بش یاشنی خرجایوب استقبالندن قورقارق رسالۀ نورڭ قوجاغنە آتیلان، امّی دینەجك درجەدە یازیدە نقصان اولدیغی حالدە، حافظ مصطفی قرداشمز اینەبولی یە كلدیگی زمان ألندن طوتوب كرامت نوریەیی بالذّات بو قرداشلریمزە كوسترن، اوندن صوڭرە بورانڭ اڭ كوزل قلمنی قوللانان، رسالۀ نورە درین باغلیلغیلە طانینان، نور جادّۀ كبراسنە كیردیگندن طولایی چوق بیوك سفاهت، فلاكت چوقورندن قورتولدیغندن چوق سوینچ و نشئەلی اولان، كرك مادّی، كرك معنوی نورلرە یاردیمدە ذوق دویارق چالیشان و ایچمزدە چوق سویلن قرداشمز نعلبند احمد.

[یدنجی] رسالۀ نور طلبەلرینڭ رمضاندە توقیفی صیرەسندە اسپارطەدن كتیرتمش اولدیغی كتابلرڭ ایچندە [هجمات ستّە و بشنجی شعاع كبی رسالەلرڭ] سندە وار دییە پستیل كبی كیجە صباحە قدر دوگولوب، یینە صبر ایدرك بر چوق

زورلقلرڭ اوڭنە كچیلمەسنە سبب اولان، كونلرجە اضطرابنی چكدیگی حالدە ذرّە قدر شكایت ایتمەین، رسالۀ نورە طلبە اولمادن اوّلكی غفلت، نوری الدە ایتمك صورتیلە حسناتە تبدیلندن دائما شكران، انتشارندە كرك یازی و كرك مادّی فراغتدە غیرت كوسترن قرداشمز سمرجی طورسون.

[سكزنجی] سوكیلی استادینڭ ألنی اوپمەسیلە و قلمە صاریلوب نورلری یازمغە باشلامەسیلە حیرت ویریجی بر دگیشیكلگیلە، صوڭ درجە چالیشان، صوڭ زمانلردە كندی یازیسنی چوق كوزل صایمدیغی ایچون صالح قرداشمزلە برابر تصحیحجیلكدە چوق ایلری ایش كورن، رسالۀ نورە آچیقدن آچیغە دیل اوزاتانلرە قارشو شاهین باقیشیلە اونلری صوصدیران، فراغت و غیرتیلە اتّحاد و تشبّثدە قوّتلی تسلیمیت و خیر خواهلغیلە آڭیلان و سویلن قرداشمز بیوك ابراهیم.

[طوقوزنجی] كنچ بر شخصیّت اولدیغی حالدە، اخلاص سببیلە رسالۀ نورڭ متنوّع كرامت و كونش كبی حقیقتلریلە بتون كوینڭ اوڭجە ایلری كلنلرینی فنالقلردن، شیمدی دە كوچك-بیوك اهالینڭ قسم اعظمنی رسالۀ نور دائرەسنە صوقمغە موفّق اولان، بتون سنە كوینڭ چوجقلرینە قرآن درسی ویرمك و بالخاصّە رسالۀ نورڭ یازیسندە چوق غیرت كوسترن، بتون كوینی اولدیغی كبی، حتّی جوار كویلرە دە یاردیمدە تأثیر كوسترن و اونلری دە رسالۀ نورە تشویق ایدرك اصلاحنە سبب اولان، متواضع، مكرّم، تقوا و حسن اخلاقە صاحب اولمق كوزللگنە مظهر اولان، كوینڭ بر چوق چوجقلرینە رسالۀ نور

درسلرینی بالذّات چالیشدیران وعظ و خطبەسنی رسالۀ نوردن آلدیغی الهام ایلە سویلەدیگنی هر آن اعلان ایدن، اورزە كویی خطیبی ملّا رفعت.

[اوننجی] چوق كوزل یازیسیلە بتون طلبەلرڭ باشقەلرینە یازدیرمق حسّنی دویانلرڭ یازی ایشلرینی صیرتنە آلان، یگرمی درت ساعتدە برقاچ ساعتجگنی ییمك و اویقو كبی ضروری ایشلرندن ماعدا بتون كوننی یازی یازمقلە رسالۀ نورڭ كولكەسندە حق، دیانت و تقوایە و كندینە مخصوص اهل قلب اولمش، نور یازیجیسی و كاتب عنواننە بحقٍّ لیاقت كوسترن عزّت.

[اون برنجی: ] رسالۀ نوری ایلك اوقویوشدە عاشقی اولان و كوز یاشلریلە قرآن قلمنی ایصلاتان، كویندە تك اولدقلری حالدە اهل الحادڭ اڭ آتشلی زمانلرندە بیلە ایمان و قرآن درسلرینە چالیشان و كوینڭ چوجقلرینی چالیشدیران عمر آغا.

[اون ایكنجی: ] قرداشی بیوك روحلی كوچك ابراهیم قرداشمزڭ توصیە و غیرتیلە چوق قالین پاس و غفلت و سفاهت چوقورندن رسالۀ نورڭ ایشیغی سایەسندە قورتولان، آز زماندە چوق چالیشان، عمومە چوق هر جهتدە یاردیم ایدن قرداشمز اسماعیل.

رسالۀ نورە سوكیسی، چالیشقانلغی، باغلیلغی ایلە، كوزل یازیسیلە، تشویق و ترغیبیلە سویلن ملّا احمد، عمر لطفی، مبارك زكریا، دباغجی اسماعیل اِلٰی آخِر داها چوق وار.

نور شاكردی علی عثمان

[٢٨٧]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] چوق علاقەدار اولدیغم قسطمونی نورجیلرڭ باشی حكمندە مرحوم شیخ ضیاء الدّینڭ وفاتی، بزی چوق متأثّر أیلەدی. او ذات، اسكیدنبری خالد ضیاء الدّین، احمد ضیاء الدّین، حضرت ضیاء الدّینڭ دردنجیسی، بو شیخ ضیاء الدّین اولارق دائما، هر كون بتون معنوی قزانچلریمی اونلرە دە باغیشلایورم. ان شٓاء اللّٰه دوام دە ایدەجگم. قسطمونینڭ خسروی اولان محمد فیضی بزم بدلمزە، هم او مرحومڭ اقرباسنی تعزیە، هم قسطمونی و جوارندەكی نورجیلرڭ بایرامنی تبریك ایتدیگمزی تبلیغ ایتسین. خصوصًا حلمی، امینلر، تحسینلر، احسانلر، احمدلر، حافظلر وسائرە و نورجی همشیرەلرە هم سلام، هم بایراملرینی تبریك ایدییورم. هم اورادەكی قومشولریمە و دوستلریمە آیریجە سلام ایدرم.

[ثانیًا] مدرسة الزّهرانڭ دمیر باش شاكردلرندن كاتب عثمانڭ اورانڭ شاكردلری نامنە بایرام تبریكلری ایچندە حقّمدە و حقّمزدە غایت كوزل و تأثیرلی، ان شٓاء اللّٰه مقبول، مبارك دعالری، بنم بو صیقینتیلی خستەلغمدە سرورلی بر انشراح ویرمسی، او دعالرڭ مقبولیتنە بر امارە تلقّی ایتدم. اسپارطە خلوصیسی رأفتڭ بنم یرمدە تصحیحاتە باشلامسی و مباركلردن طاهرینڭ جدّی آرقداشی

عبد اللّٰه چاوشڭ ذوالفقارینی بنم ایچون تصحیح ایتمسی، بنی چوق ممنون و منّتدار أیلەدی.

[ثالثًا] نورلرلە علاقەسی چوق قوّتلی و آز بر زماندە چوق ایش كورن مصطفی اوسمانڭ، زغفرانبولی شاكردلری نامنە بایرام تبریكی مناسبتیلە نورڭ اخبارات غیبیەسنڭ تظاهرینە دائر اوزون مكتوبنڭ مسلگمزە مخالف اولان سیاست مادّەلرینی بیراقوب، یالڭز باشدە و آخردە بر قسمنی لاحقەیە كچیردك. هم اوڭا، هم ایكی معصومی و رفیقەسی ایلە نورلرە چالیشان حفظی یە و او جواردەكی نورجیلرە بالمقابلە بایراملرینی تبریك و موفّقیتلرینە دعا ایدییورز.

[رابعًا] آیدین طرفندە بولونان و اسكیدنبری اهمّیتلی بر قرداشمز خلیل ابراهیمڭ نور درسندە بر ذكی آرقداشی و حپسخانەدە نورلرڭ قوّتلی بر دعوا وكیلی احمد فیضینڭ سزلرە یازدیغی كوزل تبریكنامەسنی و شدّتلی علاقەسنڭ دوام ایتمەسنی كوردم، چوق مسرور اولدم. ان شٓاء اللّٰه او قوّتلی نورجی، او طرفی تنویر ایدەجك. ذاتًا اویلە بریسی اویلە بر یردە لازم ایمش. بنم طرفمدن اوڭا چوق سلام. و شدّتلی علاقەسنی و بایرامنی و اورادە نورلرلە علاقەدار اولانلرڭ بایراملرینی تبریك ایدییورز. خصوصًا، حاجی امین اقربالرینە چوق سلام ایدییورم. دڭزلی و جوارندە و حپسندە بتون قرداشلریمزە و نورجیلرە، خصوصًا دڭزلی خسروی حسن فیضی و رفقاسی و نورلری بڭا كتیرن حافظ مصطفی و یالواچلی م، ق، ی و حاكم عادل و نورڭ سربستیتنە خدمت ایدن

محرّم كبی ذاتلرە و حپسدە بزە قرداش اولوب چوق انسانیّت كوسترن ذاتلرە، هم بایراملرینی تبریك، هم چوق سلام ایدییورز. و اونلری اونوتمییورز و اونوتامییورز.

عموم نورجیلرە بیڭلر سلام

اَلْبَاقٖی هُوَ الْبَاقٖی

قرداشڭز سعید النّورسی

آلتی یدی سنە كمال صداقتلە بڭا و رسالۀ نورڭ كتابتنە حقیقتلی خدمت ایدن قسطمونی خسروی محمد فیضینڭ مكتوبی، شخصمە عائد قسمی، حدّمدن پك چوق زیادە مقام ویرمسی، كرچە مسلگمە مخالفدر. فقط اونڭ، او حسن ظنلری، حقّمدە بر مقبول دعادر دییە ایلیشمدم. اونڭ كبی دقّتلی، نورڭ سر كاتبنڭ یازیسنە ایلیشمەملی دییە عینًا لاحقەیە كیرمەسنی قبول ایتدم

س٭ع

[٢٨٨]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق سوكیلی، مشفق استادم افندم حضرتلری،

مبارك لیالئ عشرەڭزی، هم قدسی بایرامڭزی، هم رسالۀ نورڭ تنوّرینی تبریك و باشدە سوكیلی استادم اولارق عموم رسالۀ نور شاكردلری و بتون اهل ایمان حقّندە بو مبارك لیالی و ایّامڭ مژدەلی، بشارتلی و سرورلی اولمەسنی

جناب ارحم الرّاحمیندن نیاز و استرحام ایدر، سوكیلی استادیمزڭ خیرە یوكسلن نورلی مبارك اللرندن أوپر، كلّیت كسب ایتمش مقبول دعالرینی بكلر، اڭ درین حرمتلریمی تقدیم ایدرز.

بو دفعە یینە سوكیلی استادم، شاكردلریڭز حسن ظنلرینی قیرییورسڭز. و شخصمە فضلە قیمت ویرمەییڭز، بویورویورسڭز. البتە بو حال، كمال تواضع و قدسیتڭزە دلالت ایدییور. فقط سوكیلی استادم، سزڭ صورتڭز عنایت حقلە عین حقیقت، شخصڭز عین شخص معنوی اولمش. جناب حق سزی اسم اعظمنڭ تجلّیسنە مظهر [اَفَمَنْ شَرَحَ اللّٰهُ صَدْرَهُ لِلْاِسْلَامِ فَهُوَ عَلٰی نُورٍ مِنْ رَبِّهٖ] آیتنڭ سرّینە نائل بویوروب، مبارك قلبڭزە اویلە خارقە بر قدسیت و حكمت، صدریڭزە اویلە بر انشراح و وسعت احسان أیلەمشكە، ایشتە او مسعود صدر واسعڭ سیمای معنویسی اولان علوی قلبڭزدە، كلیات نوردە، رسالۀ نورڭ سوزلری نامنی آلان و هر بری غایت خارقە برر ایمان تحقیقی حجّتلری اولان اوتوز اوچ عدد سراج النّور، هم رسالۀ نورڭ مكتوباتی نامنی آلان و هر بری برر برهان وحدانیت و رسالت اولان اوتوز اوچ عدد [مَصَابٖیحُ النُّورْ] هم رسالۀ نورڭ لمعەلری نامنی آلان و نور هدایت جادّەلرینی كوسترن [لَمَعَاتُ النُّورْ]، هم رسالۀ نورڭ شعاعلری نامنی آلان و نور معرفت و محبّت الٰهی دوربینلری اولان [شُعَاعَاتُ النُّورْ]، قلبڭزدن طلوع و ظهور بولمش. اذن حقلە اولو الابصارە طریق هدایتی كوسترییور.

[اَللّٰهُمَّ لَا مَانِعَ لِمَٓا اَعْطَیْتَ٭ وَلَا مُعْطِیَ لِمَا مَنَعْتَ] سوكیلی استادم، ایشتە شاكردلریڭز حسن ظنلرندەكی افراط، بو حقیقتی كاه رسالۀ نورڭ، نور هدایت و نور توفیق و نورلی توافق مصابیحلریلە زینتلی سیمای معنویسی اولان نورلی صحیفەلرندە، كاه سوكیلی استادیمزڭ نور علم حقیقت و نور حكمتلە منوّر مسعود سیماسندە یینە رسالۀ نوردن آچیلان دیدۀ نور ایمان و چشم بصیرتلە تماشالرندن حاصل اولان پر صفای قلبی و متشكّرانە و تقدیركارانە و استحسانكارانە و منّتدارانە، سلسلۀ تفكّراتلرندن نشئت ایدن بر سرور روحانیتڭ تمثّل و تجسّم ایتمش برر میوەسی و صورتی وار.

چوق دفعەدر علاقەدارانە مراقلە صوردیغڭز محترم، فاضل، مرحوم شیخ ضیاء الدّین افندی، عالم نورە ارتحال أیلەدی. جناب حق، باشدە سوكیلی استادیمز اولارق بتون نورجیلری خدمت قدسیۀ نوریەدە دائم بویورسون، آمین. حقیقتًا بو مبارك ذات، آخر عمرینە قدر بورادە بتون علما و مشایخ و اشراف ایچندە رسالۀ نورە و سوكیلی استادیمزە قارشو جدّی علاقەدارلغنی كوسترمكدن كری قالمازدی.

حتّی بر بایرامدە زیارتنە كیتمشدك. جماعت حضورندە "نە غم، امّت محمّد علیە الصّلاة والسّلامەكە، رسول اكرم علیە الصّلاة والسّلام كبی شفیعلری اولا. نە قورقو، دڭزڭ طالغەسندن اول كیمسەیەكە، نوح علیه السّلام كمیجی اولا. نە حزن، نە كدر سزلرەكە، بدیع الزّمان كبی مدافعڭز، سعید النّورسی حضرتلری كبی

استادیڭز اولا. "دییەرك سعدئ شیرازینڭ (چِە غَمْ دِیوَارِ اُمَّتْ رَاكِە بَاشَدْ چُونْ تُوپُشْتِیبَانَ٭ چِە بَاكْ اَزْمَوْجِ بَحْرْآنْ رَاكِە بَاشَدْ نُوحْ كَشْتِیبَانْ) بیتلرینی اوقویوب، استادیمزی حرمتلە یاد أیلەمشدر. (رَحْمَةُ اللّٰهِ تَعَالٰی عَلَیْهِ رَحْمَةً وَاسِعَةً. اَللَّهُمَّ نَوِّرْ قَبْرَهُ بِنُورِ حَقَٓائِقِ رِسَالَةِ النُّورِ. اٰمٖینَ)

محمد فیضی

لاحقەیە كیرسین.

[٢٨٩]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق مبارك، چوق سوكیلی استادیمز، افندیمز حضرتلری،

ارسال بویورمش اولدیغڭز، برنجی مكتوبڭزدە كچن لیالئ عشرەمزڭ هر بر كیجەسی برر لیلۀ قدر و لیلۀ برات و لیلۀ معراج قدر بیوك قیمتلری اولدیغنی، قرآن عظیم الشّانڭ [وَالْفَجْرِ٭ وَلَیَالٍ عَشْرٍ] سورۀ جلیلەسیلە اثبات ایدرك و او كیجەلردە بز عاجز قصورلیلرڭ دعالریمزڭ مقبولیتی ایچون رحمت الٰهیەیە ال آچوب دعا ایتدیگڭزدن چوق ممنون و متشكّرز. جناب حقّە حدسز و حدودسز شكرلر اولسونكە، شو آخر زماندە بز عاجزلری انسان اولارق یاراتوب. كندی ذاتنە قول و حبیب ذی شان افندیمزؐ حضرتلرینە امّت اولارق خلق ایدوب و سز چوق مبارك و حق حقیقتلرڭ قهرمانی و حضرت قرآنڭ سر ترجمانی اولان

استادیمز حضرتلرینە طلبە و بو زمانە قدر بر داها مثلی كتیریلمەین رسالۀ نورە شاكرد قبول اولوندیغمزە مدیون شكرانز. و اسرار قرآنیە و ایمانیەنڭ حقیقتلرینی بزە اوگرتن سز حمیتپرور و صبر قهرمانی استادیمز افندیمز حضرتلری ایچون میلیونلر سنە عمریمز اولسە، كیجە و كوندوز خدمتڭزدە بولونسەق و دائما جناب حقّە سعادت و سلامتڭز ایچون دعالر یاپسەق، یینە حقّڭزی أودەیەمەیز.

جناب رسالتپناه حضرتلری اولان نبیّ ذیشان صلّی اللّٰە علیە وسلّم افندیمز حضرتلری دنیایە تشریفندە 《 امّتی، امّتی》 و آخرتە، دار بقایە تشریف بویوردقلرندە یینە 《 امّتی، امّتی》 دییە مولاسنە قاووشدیغی كبی، سز عزیز استادیمز دە، سكرات كبی اولان دهشتلی و آغیر خستەلق و صیقینتیلریڭزدە، بز عاجز قصورلیلرە دعا ایدییورسڭز. جناب حق، امّت محمّدڭ سعادت و سلامتی ایچون یاپدیغڭز دعالریڭزی عند الوهیتندە قبول بویورسون. آمین.

و حضرت ابراهیم علیە السّلامڭ بو یوم عرفە و بایرام كونندە كوزینڭ یاشنی دیڭدیرن و اسماعیل علیە السّلامی بیچاقدن قورتاروب سلامتە چیقاران و بتون ملائكەلری و انبیا و اولیا روحلرینی شاد و خُرّم ایدن بو مبارك كونلر حرمتنە جناب حق وجود شریفڭزە شفا ویرسین. آمین. و بو مبارك عَرَفَە و بایراملرڭ امثال كثیرەسیلە مشرّف أیلەسین. آمین. و بز عاجز قصورلیلری نورڭ فتوحاتی ایچون و دنیایە اعلانی ایچون اذن الٰهی ایلە آرقەڭزە آلوب حق و حقیقتلری میدانە چیقاردیغڭز كبی، اویلە دە، یینە دنیادە بزلری پشڭزە آلوب،

حجّە كوتوروب، نبیّ ذیشان علیە وسلَّم افندیمز حضرتلرینڭ اشیگنە یوزیمزی سورەرك كوز یاشلریمزی آقیتمقلر نصیب و میسّر أیلەسین. آمین. و آخرتدە دە، یینە اول نبیّ ذیشان افندیمز حضرتلرینڭ شفاعتنی جملەمزە احسان أیلەسین. آمین آمین آمین.

بو طرفدن جملە قرداشلریمز، قلبلر طولوسی سلام ایلە مبارك اللریڭزدن أوپر و بایرام شریفڭزی تبریك ایدرك امثال كثیرەسیلە مشرّف اولمقلغڭزی تكرار تكرار جناب واجب الوجود حضرتلرندن تمنّی و نیاز ایدرز، افندیمز حضرتلری.

قصورلی طلبەڭز و دعاڭزە محتاج عثمان كاتب

[٢٩٠]

چوق سوكیلی، چوق قیمتدار، چوق مبارك و چوق مشفق استادیمز، افندیمز حضرتلری،

مبارك ال و آیاقلریڭزدن تعظیم و احتراملە اوپەرك، عموم نورجی قرداشلریمزلە برابر عید سعید اضحاڭزی بتون روح و جانمزلە تبریك و تسعید أیلر، بو حیات فانیەدە ادراك ایتدیگڭز سنەلر بوینجە، بشر ایچون چوق اهمّیتلی و مقدّس و لزوملی اولان حیاتڭز و بو مسعود و نزیه حیاتڭ اهمّیتلی و قیمتلی و حیات و وجود قدر لزوملی اولان ثمرەسی رسالۀ نورلە عموم بشرە [ایستر بیلمەسینلر، ایستر بیلسینلر] علی التوالی نور و فیض و بركت القا ایتدیگڭزدن، یینە

روح و جانمزلە تبریك و بز نورجیلر دە خاص بر توجّهلە و رسالۀ نورڭ نفس قدر لزوملی درسلریلە هر نفسمزدە بیوك بر بایرام یاپدیران ذات فضیلت مئابڭزە صوڭسز منّتدارلقلریمزی عرض ایدركن، جناب ارحم الرّاحمین حضرتلرندن شویلە نیاز أیلرز: یا ربّی، سوكیلی استادیمزڭ عمرینی مُزداد و سعادت و سلامت دائمە ایچندە داها چوق سنەلر بزملە بو حیات فانیەدە برابر أیلە. و رسالۀ نوری، كفر و ضلالت باتاقلقلرندە چیرپینان بشرە بالذّات اوقوتمەسنی نصیب و میسّر أیلە و بز زواللیلری ابدیًا اونڭ كوستردیگی یولدن و اوندن آییرما. و اوندن و عموم نورجیلردن راضی اول. آمین.

خدمتكارلریڭز و طلبەلریڭز، زغفرانبولی و جواری قصورلی نورجیلری رسالۀ نور شاكردلری سیاستە تنزّل ایتمدكلرندن، بو مصطفی قرداشمزڭ نورڭ فتوحاتی حسابنە یازدیغی اوچ درت مادّە یازیلمدی. نورجیلرە لزومی یوق. یالڭز نتیجە و حاشیەسی یازیلدی.

نتیجة النتیجە، بو كنچلك ممثّلی اولان كنچ، بیلمەیەرك، عادتا بو حادثەنڭ دلالت و اشاراتیلە رسالۀ نورڭ حقیقتلرینی تصدیق و حق و عین حقیقت اولدیغنە بتون كنچلك نامنە امضا قویویور. و فقیر، قطعیًّا تصدیق ایدییورمكە، بز نورجیلرە مژدەلەدیگڭز عنایات و الطاف سبحانیە پیدرپی تظاهر ایدییور. و دین و ایمان و قرآن علیهنە حركتە كچمك ایستەینلرە، درحال بر مخالف و معارض كتلە ظهور و یوزلرندن سترەلری، ماسكەلری آلینارق، انظار ناسدە