قریۀ عرفاندن مصطفی ارطوغرولڭ مكتوبیدر. لاحقەیە كیرسین.

(٢٠١)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

استادیمز حضرتلری،

طلبەلریمزڭ خدمت نوریەدەكی خطالری یوزندن دائما پاك وجودیڭز زحمتلریمزە قاتلانوب، بیڭ تورلی مشكللریمزی حل ایدرك، تورلی تورلی اشكنجە و صیقینتیلری توكّل اولارق تحمّل ایتمكدەسڭز. ای صبر قهرمانی اولان استادیمز، جناب حق سڭا طول عمرلر احسان ایدرك صبریڭزە ما شٓاء اللّٰه بارك اللّٰه دیرز. بزلر طلبەلریڭز، بر آدی عصای موسی، دیگر اسمی آیت الكبرا اولان پك بیوك معجزەلی اثری ضعیف و ناقص عقللریمزلە و عاجز و پك نقصانلی املالی خطالریمزلە و قلملریمزلە یازمش اولدقلریمز، یدنجی شعاع رسالەلریمزی قبول بویوروب، بو مقدّس اثرلرڭ معجزات و معنویاتنە مشتاق و آرزو ایدن طلبەلریڭز قرداشلریمزە هدیە ایدرك اوقویوب و یازمەلرندە و انتشاری ایچون سز منجیمز طرفندن توزیع و ترقّیاتلری مناسب كورورسڭز.

رسالۀ نورڭ عصای موسی رسالەسی، شو عصرڭ پك دغدغەلی و چوق قلبلرڭ نورینی سوندیروب ضلالتلردە قالوب، فسادات و بدعە جریانلرندن حصولە كلن آتشلریلە یانان میلیونلر انسانڭ قلبلرندە یانان او آتشلری سوندیروب

نور ایمان طولدیروب پارلاتان بویلە بر اثر و آب كوثرە ما شٓاء اللّٰه بارك اللّٰه! بویلە ایمان ایدنلرە انسانلر واجب الوجود و تقدَّس حضرتلرینە حقیقی بر قوللق و حضرت محمّد علیە الصّلاة والسّلام پیغمبریمز افندیلرە امّت اولوب تبلیغ بویورمش اولدیغی شریعت احمدیەییؐ و سنّت سنیّەیی ایفا ایتمكلە حضرت قرآن معجز البیانڭ امری قانون الٰهی تطبیق و تأمین ایدرك قرآن معجز البیانڭ تفسیری اولان رسالۀ نور دخی بیڭلر حجّتلری ایلە حقائق ایمانیەلریمزی تقویە ایدوب او ضلالت باتاقلقلرندن چیقاروب، نورلی یوللرە سوق و حركت ایتدیرمكدەدر.

بو عصردە ضلالت و فسادات جریانلرینە قارشو نورلی رسالەلری اوقویوب یازمق و خالصانە تصدیق ایدرك ایمانلریمزی تقلیددن تحقیقە چیقارارق، داها قلبلریمزدە قالان ضلالت و فسادات، بدعە كیرلرینی تمامًا ییقایوب تمیزلەمك اهل اسلام و عباد مسلمینڭ پك بیوك وظیفەلری و وظیفەمزدر. بو مبارك اثرلرڭ بطنندە بزلر آڭلایامییورز. فقط استادیمزڭ علم كلاملری و دیگر قرداشلریمزڭ وصف و بحثلری ایضاح ایتمكدەدر. شویلەكە، هر اهل ایمان و اسلام رسالۀ نورە حقیقت حالدە و صدقیلە باغلانان طلبە اولان قرداشلریمز، كرك بو فانی دنیادە و سعادت ابدیەدە مسعودانە یاشایاجقلردر. و آب كوثر فیضندن فیض آلارق خاصلر ایچنە قاتیلوب حقیقی بر ایمان صاحبی اولاجغمز دویغو ایدیلییور.

مادام بزلرڭ ایچون نە بیوك مژدە و نە بیوك ثروت و نە بیوك تجارت و قزانچدركە، كلمۀ توحیدی و صلوات شریفەلری بر نبذە دخی قلبلریمزدن چیقارمایوب ذكر ایدرك، یارین دهشتلی محشردە او سلاملرلە و او مكتوبلرلە ربّمزە بر قول و پیغمبریمز حضرت محمّد علیە الصّلاة والسّلام افندیمزە و اولاد رسولە و ازواج رسولە و یارلری اولان جهار یار كزین و اصحابین و اقطابین حضورلرندە یوزلریمز آق اولوب، بز مجرملرە شفاعت و یاردیملر ایدرك و منجیمز اولان حضرت استادیمز اولان رسالۀ نور دخی بزلری یاورولی قوش كبی آردینە دوشوروب حضور اللّهە * جلّ جلاله و حضور پیغمبری یەؐ رسالۀ نورڭ نورلی اثرلرینە خدمت ایدن خدمتجیلرڭ امك مكافاتنی ایستر و طلب ایدر و ایدییورز ان شٓاء اللّٰه.

بزلر شیمدی فرصت الدە ایكن قرآن عظیم الشّانڭ فیضندن آقوب كلن و رسالۀ نوردە تجلّی ایدن نورلی كوثر شرابی ایلە قلبلریمزی ییقاتوب، قلبلریمزی تطهیر ایدوب و قاپلریمزە دە طولدیروب یارین محشرڭ دهشتلی، ألملی قراڭلقلی، حرارتلی و داها بیڭ تورلی دردلریمزە درمان، درین و اوزون یوللرە كوپرو اولوب سعادت ابدیەیە واصل أیلەسین.

شبهەمز قالمدیكە رسالۀ نور بو دنیادە انسانلر و طلبەلری و شاكردلری ایچون كوتو خویلرینی تبدیل و كوتو اخلاقلردن ایراق و كوتو عمللردن دخی اوزاق ایدرك، نور ایمانلە مشرّف و سعادت ابدیەیە مظهر، ربّمزلە ملاقات و جمال اللّٰهی

مشاهدە و حبیب اللّٰهڭ صانجاق شریفی آلتنە جمع ایدەجگی ایچون، پك سوكیلی اولان استادیمز حپس منفرددە و چلەخانەدە، غربت اللردە، بیڭ تورلی زحمتلر و بیڭلر تورلی اشكنجەلری تحمّل ایدوب، مولامزە متوكّل اولوب، باشقە بر محلدن امداد طلب ایتمەیە همن اللّٰهە صیغینوب سنەلردنبری وجود پاكنی خراب ایدوب، جاننی دخی نور یوللرینە فدا ایتمكدەدر. كوزل اللّٰهمز مُعٖین اولسون، امداد ایتسین، عنایت ایتسین. آمین آمین آمین. رسالۀ نورڭ قدرت، كرامت، حكمت، علویت، یوجەلگی قرآنڭ نوری و تفسیریدر، معجزەدر.

ای استادیمز حضرتلری، شو جهت ممنونیتمزی تعریف ایدەمەیەجگم. هر استادلر طلبە و شاكردلرینە بیڭ بر تورلی صنعت اوگرتوب فانیدە اعاشەلنسین دییە موقّت عمرە چالیشییورلر. استادلرینە بیڭلرجە دعالرلە منّتدار اولویورلر. ذات پاكڭ بزلرە اوگرتمش اولدیغڭز رسالۀ نور اویلە بر مقدّس صنعتكە، فانیدە بتون صیقینتیلرە مرهم و تریاق و عقبادە دخی سعادت ابدیەیە بر واسطۀ نجات اولدیغی و بو دنیادە دخی ضلالت و فسادت جریانلرینە قارشو بر خنچر، بر ذوالفقار، بر عصای موسیدر.

بویلە بر دردلرڭ درمانی اولان نورلی اثرلری و آب كوثرلری بو عصرە قدر اوزاتوب سز استادیمز طرفندن تألیف ایدیلوب و بزلر عاجز و فقیرلری خدمتجی اولمقلغمزی نصیب ایدن ارحم الرّاحمیندن و پیغمبردن و حیدری و احفاددن و سز استادیمزدن اللّٰهمز راضی اولسون. و مكتوبلری و معلوماتلری كونی كوننە

متانتیلە محللرینە اولاشدیران قرداشلریمزدن دخی اللّٰهمز راضی اولسون

هٰذَا مِنْ فَضْلِ رَبّٖی

قریۀ عرفانڭ چوق قصورلی و سزی چوق زحمتلرە دوچار ایدن طلبەلریڭز روح و جانمزلە سوەرك، حسرتلك چكن اشتیاقلی كوڭللر سلامتلریڭزی دیلر، پاك اللریڭزدن اوپەرك حرمتلریمزی تقدیم و سلاملریمزی صونار، پاك ال و آیاقلریڭزی اوپرز استادیمز افندیمز حضرتلری.

اَلْبَاقٖی هُوَ الْبَاقٖی

چوق قصورلی، چوق خطالی و چوق كناهكار طلبەلریڭزدن قریۀ عرفان طلبەلری نامنە مصطفی ارطوغرول

(٢٠٢)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[اوّلا] سزڭ معراج شریفڭزی بتون روحملە تبریك ایدرم. و كلەجك مبارك كونلر و كیجەلردەكی دعالریڭزە شیمدیدن بیڭلر آمین دیرز.

[ثانیًا] آنطالیەدە نورلرڭ انتشارینە چالیشان محمدلر و احمدلر و علیلر و ابراهیملرە چوق سلام و تبریك و موفّقیتلرینە دعا ایدرز. عجبا اسكیشهردە برابریمزدە بولونان حسین اوستە حیاتدەمیدر، مراق ایدییورم.

[ثالثًا] كاتب عثمانڭ ناصلكە معلوم مكتوبی مدرسة الزّهرانڭ عموم طلبەلری نامنە عصای موسی دە مقام آلمش، اویلە دە اونڭ كیراز باغچەسی رسالۀ نور باغچەسی نامنی بورادە آلوب، اونڭ كیرازلرینی چوقلر تبرّك نیّتیلە آلدیلر. نورلر حسابنە ییدیلر.

[رابعًا] صاوە مدرسۀ نوریەسی حقیقتًا امیدیمزڭ پك فوقندە قهرمانانە نورلرە خدمت ایدییورلر. بڭا كلن مجموعەلردە اونلرڭ خارقە چالیشمەلرینی حیرتلە قارشیلادم. بیڭلر بارك اللّٰه!

صلاح الدّینڭ یازدیغی عصای موسی آخرندە قیصەجق ترجمۀ مؤلّفە دائر مكتوبنی سزە كوندردم. لاحقەیە كیرسین. ایستەینلر و مناسب كورسەڭز كندی نسخەلرینڭ آخرندە یازابیلیر.

عموم قرداش و همشیرەلریمزە سلام

اَلْبَاقٖی هُوَ الْبَاقٖی

قرداشڭز سعید النّورسی

[٢٠٣]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] خسرولە بر روح ایكی جسد و كندیسی و بهادر برادریلە نور خدمتندە چوق اهمّیتلی موقع آلان قهرمان رشدینڭ عجیب بر ال ماكینەسنی نورلر ایچون

جلبنە چالیشمەسی، اهمّیتلی بر فتوحات نوریەنڭ مقدّمەسیدر. ان شٓاء اللّٰه یینە نورلر، نورجیلرڭ لایق اللریلە، قلملری كبی طبع و نشر ایدیلەجك، یبانی و لایق اولمایانلرە محتاج اولمایاجق. فقط هر شیدن اوّل صحّتلی و یاڭلیشسز و كوزل بر طرزدە ماكینە ایلە، ممكن ایسە اوّل اسكی حرفلە یازیلسە، صوڭرە یڭی حرفلە داها مناسبدر. سزلرڭ اصابتلی تدبیریڭزە حوالە ایدییورز.

[ثانیًا] قونیەلی صبرینڭ رأفتە یازدیغی مكتوبنی كوردم، اوندن بیلدمكە، بو صبری، اوتەكی صبری كبی غایت خالص و صمیمی و چالیشقان بر نورجیدر. بیڭ بارك اللّٰه، هم اوڭا، هم اونی تشویق و تشجیع ایدن و خواجەلرڭ یوزلرینی آق ایدن قونیە عالملرینە. باشدە مفسّر مبارك خواجە وهبی اولارق اونلرە و اورادەكی نور شاكردلرینە چوق سلام ایدرز و بو مبارك شهور ثلاثەدە دعالرینی ایسترز

اَلْبَاقٖی هُوَ الْبَاقٖی

قرداشڭز سعید النّورسی

لاحقەیە خسروڭ مكتوبیدر.

(٢٠٤)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق مبارك، چوق قیمتدار، چوق عزیز، چوق سوكیلی استادیمز افندیمز حضرتلری،

بو حقیر طلبەلریڭز بزلر، سوكیلی مبارك استادیمزدن بو هفتە ایچندە ایكی مبارك مكتوب آلدق. بو مبارك مكتوبلردن بریسی، شهور ثلاثەنڭ حلولی و درد معیشتڭ تضییقی ایلە نورلرڭ كتابتنە فتور ویریلمەمسنە.. هم نورلرڭ سربستیتنە امارە اولدیغی اوّلجە سوكیلی استادیمزجە مژدەلنمش اولان یاغمورلرڭ رزقمز اوزرینە مبذولاً یاغمەسی.. خصوصًا بو شهور ثلاثەدە داها چوق كلمەسی و روحلریمزڭ اڭ چوق محتاج اولدیغی رحمتڭ عصای موسی و ذوالفقار معجزات مجموعەلری اللریلە مبذولاً نزول ایتمسی.. و بو بهاردە چیچكلرڭ انواعیلە تزیین ایدیلن طاغلر و طاشلر كبی نورجیلرڭ و اهل ایمانڭ قلبلری فیوضاتلە بزنمەسنە دائردر.

دیگر مبارك مكتوب ایسە، هر ایكی اسپارطەنڭ، خصوصًا كوچك اسپارطەنڭ چوق كوزل، چوق لطافتلی نسخەلری.. و هم قریۀ عرفان و حومە طلبەلریڭزڭ سوكیلی استادیمزە تقدیم ایدیلن فردوسی، قدسی، نورانی هدیەلرینڭ مبارك قهرمان، هم چوق چالیشقان قرداشمز نورجی ابراهیمڭ ألیلە سوكیلی استادیمزە واصل اولدیغنە و سوكیلی مبارك استادیمزڭ فوق الحد ممنونیتلرینە دائردر.

اوت، سوكیلی مبارك استادیمز، سزی دائما شن و شادان كورمك ایستەین اسپارطە و جواری طلبەلریڭز، للّٰە الحمد فتورسز معجزاتلر مجموعەلرینی تماملامقدە و یاغمورلر دە مادّی و معنوی پك كثرتلی یاغمقدە دوام ایدییورلر. حدودسز شكرلر اولسون ربّمزە

اَلْبَاقٖی هُوَ الْبَاقٖی

قصورلی طلبەڭز خسرو

(٢٠٥)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ عَاشِرَاتِ شَعْبَانَ

عزیز، صدّیق قرداشلرم،

[اوّلًا] شعبان شریفڭزی تبریك و موفّقیتڭزە دعا ایدرز.

[ثانیًا] بر لزومە بناءً "داخلیە وكیلیلە بر حسب حال" پارچەسی نامندەكی فقرەیی آچیق مكتوب اولارق بر مناسب غزتە ایلە نشر ایتمك ایچون صالح یشیلە كوندردك. و بر صورتنی باش وكیلە و بریسی دە عدلیە وكیلنە و بری دە داخلیە وكیلنە و بری دە آفیون امنیت مدیرینە ویاخود والیسنە بورانڭ قوماندانی واسطەسیلە كوندرییورز. بر صورتنی دخی یینە سزە كوندرییورز.

[ثالثًا] اگیردیردە علیل علی عثمانڭ اوزون بر مكتوبنی آلدم. خصوصی جوابە حالم مساعد دگل. مكتوبندە اسملری بولونان و باشدە حقّی و (پ) اولارق اورادەكی قرداشلریمزە چوق سلام ایدرز. و علی عثمانڭ بر قسم مكتوبنی لاحقەیە كچیردك. عمومە سلام.

اَلْبَاقٖی هُوَ الْبَاقٖی

قرداشڭز و دعالریڭزدن دائما استفادە ایدن سعید النّورسی

[٢٠٦]

ای امرطاغی حكومتی و ضابطەسی! بو حسب حالی بر سنە اوّل یازمشدم. فقط ویرمدم، صاقلادم. شیمدی بش جهتلە قانونسز، بنی خصوصی اقامتكاهمدە بر خدمتجی یی دە منع و مداخلە ایتمەلری، دنیادە امثالسز بر طرزدە بنی استبداد مطلق آلتنە آلییورلر. قانون نامنە قانونسزلق ایدنلری، انصافە كلمك فكریلە اظهار ایدییورم.

داخلیە وكیلی ایلە حسب حالدن بر پارچەدر.

هیچ بر تاریخدە و زمین یوزندە امثالی وقوع بولمایان بر ظلمە و اون وجهلە قانونسز بر غدرە و تضییقە هدف اولمشم. شویلەكە:

هم شدّتلی سٓوء قصد اثری اولارق زهرلنمەدن خستە.. هم غایت ضعیف، یتمش بر یاشندە اختیار.. هم كیمسەسز، آجیناجق بر غربتدە.. هم پالطو و فانیلە و پاپوجنی صاتمقلە معیشتنی تأمین ایدن فقیر الحال.. هم یگرمی بش سنە منزوی اولمەسندن، بیڭدن آنجق تام صادق بر آدم ایلە كوروشەبیلن بر مَرْدُمْكِریز، متوحّش.. هم یگرمی سنە حیاتنی و اثرلرینی اوچ محكمە و آنقرە اهل وقوفی اینجەدن اینجەیە تدقیقدن صوڭرە بالاتّفاق برائتنە و اثرلری وطنە و ملّتە ضررسز اولارق منفعتلی اولمەسنە قرار ویریلمش بر معصوم.. هم اسكی حرب عمومیدە اهمّیتلی خدمت ایتمش بر اولاد وطن.. هم شیمدی بو ملّتی، بو وطنی،

آنارشیلكدن و اجنبی افسادلرندن قورتارمق ایچون میداندەكی تأثیرلی آثاریلە بتون قوّتیلە چالیشان بر حمیتپرور.. هم محكمەدە یتمش شاهدلە اثبات ایدیلدیگی كبی یگرمی بش سنەدە بر تك غزتەیی اوقومایان، مراق ایتمەین و یدی سنە حرب عمومی یە باقمایان، صورمایان، بیلمەین و اثرلرندە قوّتلی اسباب و دلیللرلە سیاستدن بتون بتون علاقەسنی كسدیگنی اثبات ایدن و دنیاڭزە قاریشمدیغنی عدلیەلریڭز رسمًا اعتراف ایتدیگی ضررسز بر آدم.. و آخرتنە و اخلاصنە ضرر كلمەمك ایچون شدّتلە توجّە عامّەدن قاچان و قرداشلرینڭ اونڭ حقّندەكی حسن ظنلرندن و مدحلرندن چكینن و بگنمەین بو بیچارە سعیدە.. باشدە داخلیە وكیلی اولان سن، آفیون والیسنی و امرطاغ ضابطەسنی مسلّط ایدوب، هر كون بر آی حپس منفرد عذابنی چكدیرمك و تجرید مطلق ایچندە تك باشیلە بر حپس منفرددە طورمەیە مجبور ایتمك، هانكی مصلحتڭز اقتضا ایدر؟ هانكی قانون بو دهشتلی غدرە مساعدە ایدر دییە، حقوق عمومیەیی محافظە ایدن عدلیەنڭ یوكسك دائرەسی واسطەسیلە داخلیە وكیلنە بیان ایدییورم.

ظلمًا بتون حقوق مدنیەدن و انسانیەدن و یاشامق حقّندن محروم ایدیلن سعید النّورسی

علیل علی عثمانڭ مكتوبی. لاحقەیە كیرەبیلیر.

(٢٠٧)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا بَاقِیًا بِشَفَاعَةِ الرَّسُولِ عَلَیْهِ الصَّلَاةُ وَالسَّلَامُ

چوق عزیز، چوق سوكیلی و چوق محترم و شفقتلی استادم افندم حضرتلری،

مبارك شهور ثلاثەلریڭزی تبریكلە، مبارك ال و أتك و بزلرە یمن بركت بخش ایدن قدم مباركەلریڭزە یوزیمی، كوزیمی سورەرك حرمتلرلە بوس ایدرم. بو فقیر، عاجز طلبەڭز، ایكی كون اوّل مبارك آیلرە تبریكڭز اولان مبارك كندی یازیڭز تبدیل ایدیلمدن ایكی مبارك مكتوبڭزی آلدم.

[بریسی] قهرمان طاهری و اینەبولی و قسطمونی قهرمانلرندن آلدیغڭز تبركلرڭ توافقنی بحث ایدن.

[ایكنجیسی] بزلرڭ سعی و غیرتلرینی آرتیران بو مبارك آیلردە بش وجهلە ثواب قزاندیران ذوالفقار معجزۀ قرآنیە و احمدیە چالیشمەمزە دائر مژدە و بشارتلریڭز.

[اوچنجیسی] جانلی بر مكتوبڭز اولان قهرمان طاهری آغابگمڭ بو مكتوبلرلە برابر كلەرك، بر آقشام خانەمزدە قالارق، سز سوكیلی استادیمز حضرتلرینڭ قارشودن سلاملاشمەلریڭزلە، جسمًا بزملە كوروشدیرر كبی آڭلاتمەلری،

بو عاجز، پر قصور طلبەڭزی تعریفندە عاجز بر درجەدە ممنون ایدرك، بو مكرّر تبریكلرڭ بر كوندە كلمەسنی حقّمدە بیوك بر نعمت بیلەرك قبول ایتدم. جناب حق هر ایكیڭزدن ابدیًا راضی اولسون. آمین.

سوكیلی استادم افندم، بز مبارك نورلریڭزی بورادە امّی طلبەڭز چلینكیر واسطەسیلە هركسە، حتّی هر أوە اولاشدیروب اوقوتمقدە و نشرینە چالیشمقدەیز. و نورلر تقدیر ایدیلمكدەدرلر. جناب حقّڭ لطفی و سز سوكیلی استادیمزڭ دعا همّتلری و نورلرڭ تأثیریلە جناب حق بزلرە یولداش ویروب، بو هفتە ایكی دانە عصای موسی سز سوكیلی استادیمزڭ مبارك اللریڭزلە تصحیح ایتدیگڭز بر مسودّەدن تصحیح ایدییورز. و بو آرادە تصحیح ایچون كلەجك آرقداشلرم كلنجەیە قدر دە ایكنجی وظیفۀ ذوالفقاری یازییورم.

اوننجی سوز ذیلیلە و یگرمی بشنجی سوز ذیللریلە برابر همن بیتمك اوزرە. یتمش صحیفە قدر بر شی قالدی. اوندن صوڭرە اون طقوزنجی مكتوبی جناب حقّڭ مساعدەسیلە و دعالریڭز همّتیلە بو مبارك شهورلردە ختام بولدیررم ان شٓاء اللّٰه.

سوكیلی استادم، سنەلردنبری نور ایچندە بولوندیغم حالدە و بتون عمریمی اوڭا صرف ایدوب، حتّی باشقە اسكی كوزل تفسیر كوروب ایچریسندە بعض احتیاج كورولن مسئلە اولوب، اوقونمسی لازم ایكن، وقتڭ ضایع اولمامسی ایچون رسالۀ نوردن آڭلادیغم و آلدیغم فیض كافی دییە اونلری اوقومغە بیلە وقت

كچیرمدیگم حالدە.. نورلری تقدیریمە دائر قلمم قلبمدەكی تقدیر و تحسینلرە ترجمانلق یاپوب، هیچ بر وجیزە یازامامقلغم و بر قسم یڭی قرداشلریمڭ مكتوبلرندەكی كوزل تحسینلری كوروب، كندیمی رسالۀ نوردن اوزاق كوروب، بو كوزل نورلر قلبمدە بر الهام آچمایوب، آچدی ایسە دە قلمم ترجمان اولامدیغنە متأثّر اولویورم. آڭلایورمكە، هر قرداشم ترقّی ایدوب، كندیمی دە تدنّیدە كورویورم.

رسالۀ نوردن آلدیغم ایضاحلە، بن كندیمە یینە بیوك بر لطف اولدیغنی آڭلایارق قبول ایدییورم. چونكە صحّتم یار اولسە ایدی، بن دە بر قسم امثالم كبی مبارك نورلرڭ كوثر شربتلرینی سز ساقی اولان سوكیلی استادمدن آلوب سزلرلە تماس ایدەمزدم بیلییورم. بو قصورلی طلبەڭز فقیر عائلەیە منسوب اولوب، ابتدائیە تحصیلندن باشقە تحصیلم اولمایوب، اون بش، اون سكز سنەدر دە مریضۀ بدنمڭ شدّتلی اضطرابلری یوزندن او تحصیلڭ آچدیغی فكر و ذكا قاپولری قپانوب، بیلكیلریمی اونوتمشدم. شو اون سنەدر دە بولوندیغم خانەدن بر طرفە چیقامایوب، آڭلامق ایستەدیگم مشكللریمی آڭلامق ایچون هیچ بر عالمڭ یاننە وارامییورم. اللّٰهمە شو دنیادەكی بتون ذرّاتلر عددنجە حمد اولسون، شو زمانڭ، حتّی ماضی و مستقبلڭ دە اڭ بیوك و اڭ مهم علماسی اولان رسالۀ نوری بزلرە بخش ایتمش

نور شاكردلرندن آتابگلی علیل علی عثمان