بر وثیقە و شدید احتیاجلرینی آچیقلایان بر اعلاننامە و بو یارەلرە دە آنجق و آنجق رسالۀ نورڭ بر مرهم و او تسمّملرە آنجق و آنجق رسالۀ نورڭ بر تریاق اولدیغنی پك آچیق كوسترمسی سببیلە بر مهم سند اولارق كوردم. و سوكیلی استادیمزی أوزمەمك ایچون یڭی یازی اصلنی قرآن حروفاتنە تبدیل ایدرك تقدیم ایدییورم.

[٣٢١]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

پك مبارك و محترم و مشفق استادم افندم حضرتلری،

[اوّلا] ال و آیاقلریڭزی چوق درین حرمتلرملە ابدیًا اوپرم. بو بیچارە و زواللی كنچ طلبەڭزڭ شو عاجزانە مكتوبی، او بیچارەنڭ رسالۀ نورە قارشو صوڭسز حیرانلغنڭ چوق اوفاق بر افادەسیدر. بوندن بر سنە اوّل، قسطمونی گول كوی مكتبندە بولوندیغم بو چالیشلر كوینە أوگرتمن اولارق كلدیگم زمان، بتون عقلم و فكرم، هر شیئم غفلت پردەسی آلتندە ایدی. بتون حقائقلرە آیقیری اویدیریلمش و افسانەلشمش، یالان شیلرڭ پشندە چیرپینییوردم، حتّی بتون مكتب حیاتم مدّتنجە و كویدە كیجە یاریلرینە قدر غزتە ستونلرندە سیاست، افسانە، رومان یازیلرینی اوقویور، كوزلرم اویقوسز قالان او كیجەلر سببیلە آغریمغە باشلایوردی. رادیو دیڭلەمك، چالغی چالمق، برنجی احتیاجم حالندە ایدی.

صوڭرە خلق آراسنە چیقوب [سفیان اوردوسنڭ ییقیجیلغنی بر انقلاب حالندە خلقە آڭلاتمق مراقندە ایدم.] شیمدی بتون روح و جانملە ردّ ایتدیگم او سوزلرڭ همن هپسندە "ای داهیلر داهیسی، یاراتدیغڭ كنچلك..." و سائرە كبی ایمانسزلرڭ سوزلرینی سویلردم.

شیمدی بتون عمریمڭ نَفَسی قدر، بو سوزلریمی رد ایدییورم. و عادتا شو آندەكی بیچارە دورومملە، او زماندەكی دیوانە و سفیلانە دوروممی تحقیر ایدییورم. بنی بو دوروملردن تلقینی و ارشادیلە قرآن یولنە چویرمگە سبب اولان فؤاد خواجەیە.. و بنم رسالۀ نور یولنە كیرمەمە سبب اولان و نورڭ قلبلرینە طاملاتدیغی الهام آتشلریلە بو زواللی یی عشقە كتیرن مصطفی اوسمان كبی زغفرانبولیلی قرداشلریمە.. و رسالۀ نورڭ الهامیلە، مطالعەسیلە اثرلر نشر ایدن و بو اثرلرلە حقیقتی بڭا تلقین ایدن شمس الدّین یشیلە ابدیًا منّتدارم. او زمانكی غفلت و كفر ایچندە كچن حیاتمە باقارق، بوكونكی ایمانلی، عشقلی، فقط اڭ كریدە و اڭ زواللی حیاتمی چوق مسعود كورویورم. و بو بختیارلغە بنی قاووشدیران جناب ارحم الرّاحمینە یوز بیڭلر دفعە شكر ایدییورم. و او قدیر ذوالجلالدن بو فقیر حقیری، بو زواللی بیچارەیی، بو پریشان عاصی یی كنیش شفقتیلە قبول ایدن افندم استادم حضرتلرندن ابدیًا راضی اولمەسنی بیڭلرلە نیاز ایدییورم. او نور ایمان یولندەكی بیچارەلگملە حدّم اولمادن مادّیاتە طاپان او بدبختلرە صانكە شویلە دییەسم كلییور و دییورم:

ای غفلت اویقوسی ایچندە یوتدیریلان زهرلرلە اویوشمش، سرسملشمش، كورلشمش، صاغیرلاشمش.. و بهیمی ذوقلرلە جوشوب، انسانلقدن میلیونلر درجەدە آشاغی دوشوب، حقیقی ألملر و اضطرابلر ایچندە چیرپینان بدبختلر! كلڭ، سز و بن، بتون هوائی شیلردن، بو حیوانی آرزولردن ألمزی و كوڭلمزی چكەلم. آتش قاینایان صحرادە قورویان بوغازیمزە بر آووچ صو احتیاجی كبی، شو عصردە اسباب و طبیعت زهرلریلە اویوشان و قورویان و ئولومە یوز طوتان قلبمز بر نور ایمان ایستەیور. بر آب حیات بكلەیور. كلڭ، بتون دنیامزی و ایچندەكیلری ابدی ترك ایلە حقائق قرآنیەنڭ اوڭندە دیز چوكەلم. و او حقائقڭ كوستردیگی ابدی سعادت یولنە دونەلم. اوّلجە یورودیگمز شقاوت و هلاكت یولنڭ كیرلرندن و چركاب كفر و ضلالتدن آرینمق، تمیزلنمك ایچون نور دڭزینە طالالم. و بوكون و بو عصرڭ رهبر سعادتی اولان و بو عصردە سعادت ابدیەنڭ اڭ برنجی وسیلەسی اولان نور مدرسەسنە رسالۀ نور درسلرینە قوشالم.

ساعتلرجە، كونلرجە، ییللرجە آلقیشلایوب طوردیغمز او یالانجی سفیللردن و اونلرڭ حقیقت دییە كوستردكلری خیال پشندن، او فلاكت یولندن آیریلالم، واز كچەلم، ظلمتدن نورە دونەلم. اوتوز سنەدنبری یالڭز رضای الٰهی ایچون، كیمسەدن منّت و آلقیش ایستەمدن، عقلڭ و حوصلەنڭ قبول ایتمەیەجگی، بشر وجودینڭ تحمّل ایدەمەیەجگی جانیانە ظلملرە كوگس كرن بدیع الزّمان

سعید النّورسی افندیمزڭ اوڭنە كلەلم. اونڭ درسلرینە كوڭل باغلایالم. اونڭ رسالەلرینی استاد ایدینەلم. او ذات، بزدن آلقیش ایستەمز، هدیە ایستەمز، اجرت ایستەمز، حرمت ایستەمز. یالڭز بر شی ایستر: ایمانڭی قورتار. مادّەیە باقما، معنایە باق. عاجز انسانە طاپما، اللّٰهە طاپ. اوت، ای غافل و ضلالت یولندەكی اسكی آرقداشلرم! او ذات، شو آندە بولوندیغی كمالات انسانیەنڭ ذروەسندن كندینی كوچك كوسترمك ایستەیور. ادنا كوسترمك ایستەیور. اویلە ایكن، بزم دیوانە و یالانجی قهرمانلریمز، یووارلاندقلری عادی و پیس چوقوردە كندیلرینی یوكسكدە كوروب، میلیونلرە دە كوسترمك ایستەیورلر. و اویلە دە هر كون و هر فرصت بولدقجە "بن شونی یاپدم، بن بونی یاپدم." دییە ییقدقلری معنویات و انسانلق آبدەسنی اعلان ایدرك، میلیونلردن دە آلقیش، منّتدارلق دیلنییورلر. وا أسفا! وا ویلتا! میلیونلر اسفلر و یازیقلر اولسون اونلرە و اونلرڭ جانیانە و شقیانە قهرمانلقلرینی تقدیر و تبریك ایدنلرە!

صوڭرە كلڭ، باقڭ. او استادڭ و نورڭ طلبەلرینە باقڭ، اونلردەكی صداقتڭ، باغلیلغڭ درجەسنە باقڭ. اونلردەكی اخلاصڭ، عشقڭ، ایمانڭ و یوزلرندەكی نورڭ قوّتنە باقڭ. و اویلە ایسە كلڭ، باقوب باقوب دە حیران قالدیغمز او مباركلرڭ كیتدیگی یولە كیدەلم.

اَلْبَاقٖی هُوَ الْبَاقٖی

دعاڭزە چوق محتاج، چوق قصورلی طلبەڭز مصطفی صونغور

[٣٢٢]

دڭزلی اهل وقوفنڭ راپوریدر.

بو پارچە هم لاحقەیە، هم استادیمزڭ مدافعاتنڭ نهایتنە یازیلاجقدر.

[بو راپور عبرت ایچون لاحقەیە یازیلسین.]

برنجی اهل وقوفڭ راپوریدركە، بتون قوّتیلە بزی محكوم ایتمك ایچون چالیشمشلر، فقط عنایت الٰهیە اونلرڭ هجوملرینی نورلرڭ پارلاق فتوحاتنە وسیلە أیلەدی.

ایشتە عنایت الٰهیەنڭ پارلاق بر نمونەسی. بتون قوّتلریلە محكومیتمزە چالیشان برنجی اهل وقوفڭ بو راپورلری، رسالۀ نورە تقدیركارانە بر مدحیّە حكمنە كچدی. بز دخی او اهل وقوفی حلال ایتدك، دوست اولدق.

علیهمدە چوق چالیشان اهل وقوفڭ راپورندندر. آنقرە اهل وقوفی بونلردن آیریدر. بر درجە انصافلی راپورلر دە آیریدر.

صوچلیلردن سعید النّورسی، نام دیگر بدیع الزّمان، كندی افادەسی وجهلە، مقدَّما شرق حركاتندە ایلكیلی كورولن.. و او تاریخدە وان ولایتندە اقامت ایتمكدە ایكن، اسپارطەدە اقامتە مأمور ایدیلدیگی صیرەدە، باشدە توصیف ایدیلن عین صوچی ایشلەدیگندن أوتوری، اسكیشهر آغیر جزا محكمەسندە ٢٧ / ٤ / ٩٣٥ تاریخندە توقیف ایدیلەرك كندیسنە اویدیردیغی برقاچ شخصلە

برلكدە یاپیلان طوروشمەلرندن صوڭرە، بدیع الزّمانڭ بر سنە مدّتلە حپسە قونولمەسنە و شریكلرینڭ دە مختلف جزالرە چارپدیریلدیغی، اسكیشهر جمهوریت مدّعی عمومیلگندن جلب اولونان دوسیە میانندە موجود ٨ / ١١ / ٩٤٣ تاریخلی قید رسمیدن آڭلاشیلمقدەدر.

بو صورتلە مدّت محكومیتلرینی اكمالدن صوڭرە قسطمونیدە اقامتە مأمور ایدیلن سعید النّورسی، شورادە بورادە یینە كندیسنە یاقین حسّ ایتدیگی بعض كیمسەلرڭ دە اشتراك و یاردیملریلە و بونلرلە صاف و بیچارە دینیلەجك درجەدە بولونانلری كندینە اویدیرمق صورتیلە، یازی ایلە و بالذّات كوروشمەلرلە بعض فكر نشریاتنە دوامە باشلادقلری و بو فعّالیتلری ١٩٤٣ تمّوز و آغستوس آیلری تاریخندە، چیوریلڭ حومە ناحیەسندە بعض اوفاق تفك فعلی حركتلری كوزە چارپمەسی اوزرینە كویڭ ایلری كلنلری و خلق طرفندن تعقیب ایدیلەرك ایشڭ حقیقتنە وقوف پیدا ایتمك املیلە چیبان كبی میدانە چیقانلرڭ ماهیّتنی آراشدیرركن، علاقەلی ادارە مأمورلری طرفندن شبهەلی كورولن كیمسەلرڭ أو و دكّانلرندە آرامەلر یاپیلارق نتیجەدە "رسالۀ نور" اسملی متعدّد جزؤدن عبارت كتابلرلە، برقاچ مكتوب الە كچمەسی اوزرینە، بو بابدەكی تحقیقات درینلشدیریلەرك، بو میاندە قسطمونیدە اقامتە مأمور ایدیلن سعیدڭ أوندە یاپیلان ١٤ / ٨ / ٩٤٣ و ١٨ / ٩ / ٩٤٣ تاریخلرندە آرامەلردە اوینڭ اودون كومور طولابنڭ ایچریسندە و اودونلرڭ آلتندە، چیویلی بولونان بر طولابڭ ایچندە و صوبە اوزرندە صو

ایصیتمق ایچون قوللانیلان تنەكە ایچندن [حاشیە]بعض كتاب و ال یازمسی مكتوب وسائرەنڭ میدانە چیقاریلدیغی.. و بونلرڭ بی طرف اهل وقوف طرفندن تدقیقندە، رسالەلردن، رسالۀ نورڭ ٢٤ نجی لمعەسی تستّر حقّندە اولدیغی و اوزرندە محرم اشارتی بولوندیغی و بو رسالەنڭ باش صحیفەسندە درت حكمتدن بحث اولونمقدە و مختلف صورتلرلە تستّرڭ قالقمەسنە هجوم ایتمكدە.. و بو رسالەنڭ صوڭلرینە طوغری قادین باجاقلرینڭ تشهیری طولاییسیلە بونلرڭ جهنّمدە یاقیلاجغی..

و ٢٩ نجی مكتوبڭ آلتنجی قسمندە ایسە "محرمدر" اشارتلریلە رسالۀ نورڭ شاكردلرینە (آلتی اوگوت) ویرمكدە.. و (برنجیسندە) حبّ جاهە آلدانمامق و او قدسی خدمتلرندن، او معنوی و علوی جهادلرندن واز كچمەملرینە، بونڭ ایچون ثروت حرصنە و شان و شرفە و عوام نظرندە موقع صاحبی اولمغە هیچ اهمّیت ویریلمەمسی ایستنمكدەدر. و بونلرڭ اهل آخرت ایچون چوق ضرری وار دینیلمكدە

و اهل الحاد خفیّەلرینە و اهل ضلالتڭ پروپاغاندەجیلرینە آلت اولماملری توصیە ایدیلمكدەدر.

(ایكنجی اوگوت) رسالۀ نورڭ نشرندە و بوڭا عائد فكرلرڭ تعمیمندە اصلا قورقولمامسی و بو جهاد معنویدن واز كچیلمەمسی توصیە اولونمقدە.. و كندیلرینە بو ایشلردن واز كچیلمەسنی سویلەینلرە "حزب القرآن اطرافمزدە چوریلمش محكم بر سوردر. حیات ابدیّەمزە یوزدە یوز ضرر ویرن بر یولە بزی اختیاریمزلە سوق ایدەمزسڭز. اوستە باشمز اولان سعید النّورسینڭ یوزندن بزم كبی اوڭا دوست اولانلردن كیم ضرر كورمش، كیم بلا كورمشكە، بز كورەجگز" دینیلمكدە.. و (اوچنجی اوگوت) اولارق طمع یوزندن آلدانمامق ایچون تلقینلر یاپیلمقدەدر.

و یینە شاكردلرینە خطابًا "سعیدە نەدن بو قدر حرمت ایدوب آرقەسنە دوشویورسڭز" دیینلرە قارشو (دردنجی اوگوت) ایلە جواب ویرمك ایستەنیلمكدەدركە، بو دە كندیسنڭ اسلام دیننڭ نشرینە چالیشان و خدمت قرآنیەدە بولونان بر شخص اولوب، كندیسی یوق اولسە دخی بر چوق مركزلردە چالیشانلر بولوناجغنی سویلەمكدەدر. (بشنجی و آلتنجی اوگوتلرلە) داها بر طاقیم شاكردلری اعتماد و اعتقادە دعوت ایتمكدەدر.

بو كتابڭ ذیلندە قیرمیزی مركّبلە و اوچ آی اشارتیلە "محرمدر" دییە یازیلی اولان قسمندە، استقبالدە كلەجك نفرت و تحقیردن صاقینمق ایچون شو محرم ذیلی، یازدیغی.. و كندیلرینە مسلّط اولان انصافسز، ظالم و غدّارلرە قارشو بر عرض حال

اولدیغنی.. و كندی تعمیر ایتدیگی خصوصی معبدندە خصوصی عبادتنە، اذان و قامتدن طولایی مداخلە ایدیلدیگی ایچون صبرینڭ توكندیگی.. ملّتڭ مقدّراتیلە كیفی اوینایان فرعون مشرب قومیتەنڭ باشلرینە خطاب ایتدیگنی.. و بو اهل بدعەدن آلتی سؤٓالنە جواب ایستەدیگنی.. تجاوزڭ قانونسز اولدیغی.. خصوصی عبادتە قانون یاپیلامایاجغنی.. حرّیت وجدان دستورینی قیرمق جرئتیلە لادینی سیاست تعقیب ایدیلدیگی حالدە، دین اهلنە یاپیلان بو تجاوزڭ صورغوسز قالمایاجغنی.. كندیسی كبی شافعی اولانلرە هانكی اصوللە مداخلە ایدیلدیگنی.. كندیسی كبی باشقە ملّتدن اولانلرە توركجە قامت مجبوریتنڭ هانكی اصول ایلە تكلیف ایدیلدیگنی.. و اڭ نهایت "ای دین و آخرتنی دنیایە صاتان بدبختلر! یاشامەڭزی ایسترسەڭز، بڭا ایلیشمەییڭز. ایلیشیرسەڭز انتقامم مضاعف بر صورتدە سزدن آلیناجغنی بیلیڭز و تیترەییڭز. جسارتڭز وارسە ایلیشیڭز. یاپاجغڭز وارسە كورەجگڭز واردر." دییە هجوم ایدیلمكدەدر.

٢٩ نجی مكتوبڭ یدنجی قسمندە "شیمدیلك خاص و امین طلبەلرە مخصوصدر و محرمدر." اشارتلریلە، اهل بدعەنڭ اجنبی انقلابجیلردن موهوم بر فكر آلارق خریستیانلقدەكی پروتستانلق كبی، اسلامیتدە دینی بر انقلاب یاپمق ایستەدكلرینی.. خریستیانلقدە (احكام اجتماعیە عیسیؑ طرفندن دگل، حواریلر طرفندن وضع ایدیلدیگنە كورە) انقلابڭ جائز اولابیلەجگنی.. مسلمانلقدە بویلە شیلرڭ جائز اولامایاجغنی.. ملّیتڭ، اسلامیت فكری یرینە كچمەیەجگنی.. سوسیالیزم و

بولشویزم كبی عصری فكرلرڭ عنصریّتی و ملّتپرورلگی قیردیغنی.. بناءً علیه توركلك فكرینڭ اسلاملق فكری ایچندە اریمەسی ایجاب ایتدیگنی.. آخر زماندە كلەجك اڭ بیوك مجتهدڭ فساد زمانندە هم حاكم، هم مهدی، هم مرشد، هم خطیب اعظم اولان و اهل بیتە منسوب اولان بر ذات نورانی اولاجغنی.. آوروپەئی دستورلریلە مجادلە اصولنی اسكی سعید ایكن یاپدیغنی.. و بو طرزدە غلبەنڭ اسلامیتڭ قیمتنی آزالتمق كبی بر محذور بولونمسی یوزندن بو مسلگی ترك ایتدیگنی.. اسلامیت اساسلرینی ٣٠ نجی و ٢٤ نجی و ٢٩ نجی سوزلر و مكتوبلرلە برهانلریلە اثبات ایتدیگنی بیان ایتمكدەدر.

"اسكیشهر حپسخانەسنڭ صاقلاناجق بر میوەسیدر" دییە ال یازمسی دیگر بر رسالەدە، بر عالم معنادە امام علی یەؓ صوردیغی سؤٓالە جوابًا "(عُجْمٍ) دن مقصد، شكلسز حرفلردركە، لائیك حكومت زمانندە تعمّم ایدن لاتین حرفلریدر" یولندە بر جواب آلدیغنی.. جفر و ابجد حسابلریلە بو كلمەیی احتوا ایدن فقرەنڭ لاتین حرفلرینڭ رسمًا قبول تاریخی اولان ١٣٤٨ تاریخنە توافق ایتدیگنی، رسالۀ نورڭ بر مصیبت نتیجەسندە كیزلنەرك، كیزلی پردە آلتندە پارلامسی، امام علینڭؓ بر كرامتی اولدیغنی.. رسالۀ نورڭ سبب تسمیەسی، اسمای حسنا ایچندەكی اسم بدیعڭ مظهری اولدیغنی، و امام علینڭؓ "یا رب بنم ییلدیزیمی نور ایلە آخر زمانە قدر بدیع ایشیقلاندیر" یولندەكی دعاسنڭ، بو زماندە رسالۀ نور ایلە قبول ایدیلدیگنی بیان ایتمكدەدر.

یڭی حرفلرلە و داقتیلو ایلە یازیلان بر رسالەدە، اسكی حرفی اوقومەسنی بیلمەین كنچلری رسالۀ نور دائرەسنە آلمەیە غیرت اولارق یازیلمش اولدیغی بیان ایدیلمكدەدر.

یینە سعید نورسی طرفندن یازیلان "اسكیشهر حپسخانەسنڭ بر میوەسی" اولوب، احمد نظیف طرفندن ال یازیسیلە هدیە ایدیلمش. اوتوز برنجی لمعەنڭ برنجی شعاعی اسملی رسالە اولوب، باشدە [ایشبو اشارات قرآنیە كتابنە محرم طائفۀ نسا ال سورەمز، بو طائفەیە ممنوعدر. غایت احتراز اولونمسی توصیە اولونور] [حاشیە]دییە باشلایوب، بو رسالە صحیفەلری ایچندە رسالۀ نور مؤلّفنڭ اسمی و طوغومی اوزرندە جفر و ابجد حسابلریلە یاپیلان استخراجلر كورولمكدەدر.

اسكی حرفلرلە یازیلی رسالۀ نورڭ ٣١ نجی مكتوبنڭ ١٥ نجی لمعەسی اولان "فهرست" اسملی رسالەدەكی آخر قسمی، خسرو، صبری، حافظ علی، رشدی، حافظ حسین طرفندن تألیف ایدیلدیگی.. و بونلرڭ ایچندە خسرو تألیفنڭ داها چوق اولدیغی.. و بونلرە دعا ایدیلدیگی.. دیگر بر جلددە رسالۀ نورڭ كوچك شاكردلری و یازانلری ایچندە و صاو كویندە مارانغوز احمد، اگیردیرڭ كوك درە كویندە عمر خواجە اوغوللرندن عبد اللّٰه اوغلی عمر و خواجەسی، چوجغی مصطفی و خواجەسی احمد و احمد ذكی، حاجی حافظ اوغلی حافظ محمد، حافظ محمد

اوغلی بكر كبی ٩ اِلٰی ١٣ یاشلرندەكی چوجقلرڭ، بو حافظ محمدڭ أوندە طوپلانارق اسكی یازی اوگرنوب رسالۀ نوری یازدقلرینی.. نور فابریقەسنڭ اسلام كویندە اولدیغنی آڭلاتمقدەدر.

رسالۀ نورڭ ٣١ نجی مكتوبنڭ ٢٨ نجی لمعەسنڭ نهایتنە، رسالۀ نور طلبەلرینڭ كچەجی مصطفی، مصطفی، علی، سلیمان، رشدی، عبد اللّٰه، خسرو، رأفت، دیگر سلیمان، صبری، خلوصی، بكر بگ، عاصم، حافظ علی، غالب، كوچك لطفی، ذكائی، عبد الباقی، شاملی حافظ توفیق اسملری یازیلمشدر.

یینە بو رسالەنڭ ایكنجی قسمنڭ دردنجی صحیفەسندە، حپسخانەنڭ كندیلری ایچون بر عنایت ربّانیە اولدیغنی.. آخر زماندە اڭ فیضلی بر چلەخانە اولوب دوشمانلرینە قارشو احتیاطلی طاورانمق لازم كلدیگنی.. بو یرڭ یعنی حپسڭ اڭ حسّاس بر امتحان میدانی اولدیغنی تلقین ایتمكدەدر.

بو رسالەنڭ صوڭلرینە طوغری "بر دستور" باشلغی آلتندە، رسالۀ نور طلبەلرینڭ، نوری خارجدە آرامامەلری.. و اگر آرارلرسە نورڭ پنجرەسندن ایشیق بولارق معنوی كونشە بدل، بر لامبەیی بولاجقلرینی، بلكە دە كونشی غائب ایدەجكلرینی.. دائرەیە كیرمدن اوّل هر فرد شیخنی محافظە ایدەبیلەجگنی.. و فقط دائرەیە كیردكدن صوڭرە آنجق اورادە مرشد آراناجغنی.. دائرە خارجندەكی طریقتلرە احتیاج بیراقمایاجغنی و رسالۀ نور دائرەسنڭ چوق كنیش اولوب شاكردلرینڭ

پك چوق اولدیغی.. عقلی باشندە بر آدمڭ بو الماس كبی مسلگی ترك ایدوب باشقە مسلكلرە كیرمەیەجگی یازیلمقدەدر.

و نهایتە طوغری تنقیدە باشلانارق، كندیسی رسالۀ نوری و شاكردلرینی مدافعە ایتدیگی حالدە، اونلرڭ انكاردە بولونارق كندیسنی شاهدسز بیراقدقلرینی.. و بونجە منسوبلرڭ باشقە طریقت آرامق اوزرە آیریلمق تمایللرینی كوستردكلرینی.. آنجق طلبەلری آراسندە قولە أوڭیلی كوچك علی و لطفی كبی خالص رسالۀ نور طلبەلرینی خارجدەكی بیوك بر ولی یە ترجیح ایتدیگنی..

و یینە ابجد و جفر حسابلریلە بر طاقیم استخراجلردە بولونارق، ازجملە حقّندە تطبیقی ایستەنیلن ١٦٣ نجی مادّەنڭ كندیسی حقّندە تعقیبات یاپیلمەسنی ایستەین ١٦٣ مبعوثڭ عددینە توافق ایتدیگنی [حاشیە]بیان ایتمكدەدر.

سعید النّورسینڭ بورایە قدر خلاصةً ذكر ایدیلن رسالۀ نور پارچەلرندن ماعدا، بو ایشلە علاقەدار اولان موقوف دیگر صوچلی خسرو الٓخرە اسملردن صوڭرە، بو صوچلیلرڭ أولرندە و دكّانلرندە و اوزرلرندە یاپیلان آرامەلردە، اوراق میانندە موجود هر برینە عائد آرامە ضبط ورقەلرندە یازیلی اولدیغی اوزرە، جمعیتڭ بانیسی بدیع الزّمانلە، یینە اوراق میانندە موجود مظنونلرڭ أولرندە، دكّانلرندە و اوزرلرندە چیقان و جمعیتلە علاقەلرینی كوسترن وثائق مكتوبلر، اهل وقوف معرفتیلە یاپدیردیغمز تدقیقاتە نظرًا، هر بری حقّندە راپوردە یازیلی

اولدیغی اوزرە، بو مظنونلر طوغریدن طوغری یە و برابرجە، بر قسمنڭ سعید كردی ایلە اشتراك ایدرك قورولان نقشبندی جمعیتنڭ انكشافنە یاردیم ایتدكلری.. و بر قسمنڭ دە بو شكلە كیرمەلری.. و رسالۀ نور شاكردلرینڭ مخابرە ایتمك صورتیلە سعیدڭ فعّالیتنە معنًا و مادّةً اشتراكلە آنڭ مقصدلرینە خدمت ایتدكلری.. و بالنّتیجە جملەسنڭ دینی حسّیاتی آلت ایدرك، دولتڭ امنیّتنی اخلال ایدەبیلەجك حركتە خلقی تشویق.. و بو بابدە قورولان رسالۀ نور جمعیتنڭ تشكّلنە یاردیمدە بولوندقلرینی، یاپیلان حاضرلق و ایلك تحقیقات صیرەسندە، یمینلی افادەلری آلینان شاهدلرڭ شهادتی، آرامە ضبط وَرَقَەلری و اهل وقوف طرفندن ویریلن راپور و صوچلیلرڭ تأویلاً واقع اعتراضلریلە آڭلاشیلمقدەدر.

صوچلیلرڭ بو حركتلری، تورك جزا قانوننڭ ١٦٣/ ١-٢، ١٧٣، ٣١٣، ٦٤، ٦٥ نجی مادّەلری موجبنجە...

[٣٢٣]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] قهرمان طاهرینڭ بزە یازدیغی ذوالفقارڭ باشنە قونمق ایچون محكمە اعادەسنڭ فقرەسندن صوڭرە، آنقرە اهل وقوف راپورینڭ نتیجەسنی دە