[٣٠٨]

بِاسْمِهٖ سُبْحَانَهُ

[یُوزَنُ مِدَادُ الْعُلَمَٓاءِ بِدِمَٓاءِ الشُّهدَٓاءِ] [مَنْ تَمَسَّكَ بِسُنَّتٖی عِنْدَ فَسَادِ اُمَّتٖی فَلَهُٓ اَجْرُ مِائَةِ شَهٖیدٍ] بو ایكی حدیث شریفدن آلینان الهاملە، رسالۀ نوری یازمەنڭ دنیوی و اخروی پك چوق فائدەلرندن، رسالۀ نوردە بیان ایدیلن و شاكردلرینڭ تجربەلریلە تصدیق ایدیلن یالڭز برقاچ دانەسنی بیان ایدییورز.

بش تورلی عبادتدر:

١- اڭ مهم بر مجاهدە اولان اهل ضلالتە قارشو معنًا مجاهدە ایتمكدر.

٢-استادینە نشر حقیقت جهتندە یاردیم صورتیلە خدمت ایتمكدر.

٣-مسلمانلرە ایمان جهتندە خدمت ایتمكدر.

٤-قلملە علمی تحصیل ایتمكدر.

٥-بعضًا بر ساعتی بر سنە عبادت حكمنە كچن، تفكّری اولان بر عبادتی یاپمقدر.

بش تورلی دنیوی فائدەسی وار:

١-رزقدە بركت.

٢-قلبدە راحت و سرور.

٣-معیشتدە سهولت.

٤-ایشلرندە موفّقیت

٥-طلبەلك فضیلتنی آلمقلە، بتون رسالۀ نور طلبەلرینڭ خاص دعالرینە حصّەدار اولمقدر.

قلملە نورلرە خدمت و صداقتلە طلبەسی اولمەنڭ ایكی مهم نتیجەسی واردر:

١-آیات قرآنیە اشارتیلە، ایمانلە قبرە كیرمكدر.

٢- بتون شاكردلرڭ معنوی قزانچلرینە، نور دائرەسندەكی شركت معنویە سرّیلە، عموم اونلرڭ حسناتلرینە حصّەدار اولمقدر.

هم بو طلبەسزلك زمانندە، ملائكەلرڭ حرمتنە [حاشیە] مظهر اولان طلبۀ علوم دینیە صنفنە داخل اولوب، عالم برزخدە طالعی وارسە، تام موفّق اولمشسە، حافظ علی و میوەدە بحثی كچن مشهور طلبە كبی، شهدا حیاتنە مظهر اولمقدر.

سعید النّورسی

لاحقەیە كچەبیلیر.

[٣٠٩]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق مشفق و چوق سوكیلی استادم، افندم حضرتلرینە،

لطف بویوردیغڭز سویملی مكتوبلریڭزی و نورلرە عائد سكز پارچە امانتلری مسرورانە آلدم. و حدسز درجەدە ممنون اولدم. ان شٓاء اللّٰه همّت و دعالریڭز بركاتیلە و بزم دە المزدن كلدیگی قدر نورلرڭ نشرندە اولان غیرتلریمزڭ

پك یاقیندە ثمرەسنی ویرەجكدر. و یینە ان شٓاء اللّٰه اونیورسیتە كنچلگندە رسالۀ نورە اولان صوڭسز احتیاج، اللّٰهڭ توفیق و عنایتیلە كنچلك طرفندن ادراك اولونوب اونیورسیتەمز بر نور مكتبی حالنە دونەجكدر. چونكە رسالۀ نورە اولان احتیاج پك چوق فضلەدر. ذاتًا رسالۀ نور یڭی نسلڭ اڭ درین احتیاجلرینە قرآن كریم نامنە درس ویرییور. یڭی نسلڭ تربیەسندە و یتیشمەسندە واسطە اولاجق، ربوبیت مطلقەنڭ دە بالذّات بونی اقتضا ایتمەسیلە، بو عصردە قرآن كریم نامنە درس ویرن و هادی وظیفەلگنی تمثیل ایدن رسالۀ نوردر. رسالۀ نور بو احتیاجی قارشیلامق ایچون طوغمشدر. و یینە اونڭ ایچوندركە، رسالۀ نور اجزالری بو دورڭ منوّر طبقەسنە هركسدن زیادە باقییور و درسنی ویرییور. مادامكە درسنی ویرمش و ویرییور، مطلقا اونڭ تلمیذلری دە بولوناجقدر.

بو مناسبتلە بر سنە اوڭجە دیدیگم كبی:

عاشقم، دریاڭە طالمغە كلدم.

قصوریمڭ عفوینی نیازە كلدم.

كوزلرم كورمییور، كورمگە كلدم.

قلبم پاس باغلادی سیلمگە كلدم.

واریمی یوغمی صاتمغە كلدم.

فضلڭلە رضاڭە ایرمگە كلدم.

دردلی یم، درمانم بولمەیە كلدم.

عجزیمی، فقریمی بیانە كلدم.

قولاقلرم دویمییور، دویمغە كلدم.

طاغیلان عقلمی دیرمگە كلدم.

لطفڭلە فلاحە ایرمگە كلدم.

ربّمسڭ دییەرك قاپیڭە كلدم.

بو قدسی وظیفەمدە دخی دیرم:

عاشقم، عشقڭدە دریامی بولدم. دردلی یم، دردمدە درمانڭ بولدم.

بورادەكی عموم نورجی قرداشلریمزڭ باقی حرمت و سلاملری واردر. بالخاصّە واعظ شرف افندی ال و اتكلریڭزدن اوپەرك دعالریڭزی نیاز ایدییورلر. مكتوبمە بو قدرلە صوڭ ویرركن، اڭ درین سوكی و حرمتلرملە ید و قدم شریفلریڭزی اوپەرك صحّت و عافیتلر دیلرم.

اَلْبَاقٖی هُوَ الْبَاقٖی

دعاڭزە چوق محتاج مصطفی اوروچ

لاحقەیە كیرسین.

[٣١٠]

محرّم / ١٢ / ٣

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق عزیز، چوق قیمتدار، چوق مبارك، چوق سوكیلی استادیمز افندیمز حضرتلری،

عالم نورە سفر ایتمسی، سز مبارك استادیمزی چوق آجیتان قهرمان عالیشان مرحوم حسن فیضی حقّندەكی حزنلی مكتوبڭزی آلدق. لاحقەلریمزە قید ایدرك، قرداشلریمزە كوندردك. بورادە بتون طلبەلریڭز، سوكیلی استادیمزڭ فوق الحد

حزنلرینە اشتراك ایدرك، بو مبارك قرداشمزڭ رسالۀ نور حقّندە یازدیغی شهنامەلرینی یاد ایدوب سوكیلی استادیمزڭ امرلرینە اتّباعًا خصوصی دعالریمزە ادخال ایتدك. بر حافظ علی مقابلندە دڭزلی یی سنبل ویرن كریم اللّهدن، بر حسن فیضی مقابلندە دار الفنون ایستەین چوق مبارك و مقبول دعالریڭزە هپ بر آغیزدن آمین، آمین، آمین دییەرك اشتراك ایتدك. جناب حق كریدە قالانلرە، خصوصًا سوكیلی استادیمزە صبر جمیل، اجر جزیل، عمر طویل احسان بویورسون. آمین.

ذوالفقارڭ فتوحاتنی صوڭ كونلردە خلقمزدە دینە قارشو رغبتڭ آرتمسیلە، كرك خلق پارتیسی مبعوثلرندن و كركسە دموقرات پارتیسی اعضالرندن خلقدن نە ایستەدكلری صورولدقجە، هر ایكی پارتی طرفدارلری دە پك حرارتلی بر لسان ایلە "بز چوجقلریمزە دین اوگرتیلمەسنی، مكتبلرە دین درسی قونولمسنی ایستەیورز." دیمەلریلە و بو طلبلرڭ قبول ایدیلەرك ترویجنڭ آنقرە مقاماتنە یازیلدیغنی ممنونیتلە ایشیتمكلە كورویورز. [ذوالفقار چیقسە بیوك فتوحات یاپاجق] دییە اولان سوكیلی استادیمزڭ مژدەلرینی، ذوالفقار داها ساحۀ فعالیتە چیقمادن فتوحاتنە باشلادیغنی سرورلر ایچندە سوكیلی استادیمزە عرض ایدییورز.

اَلْبَاقٖی هُوَ الْبَاقٖی

چوق قصورلی طلبەڭز خسرو

بو فقرە حسن فیضینڭ نور حقّندەكی اوزون مكتوبی باشندە یازیلسین. بز دە یازدق.

[٣١١]

بِاسْمِهٖ سُبْحَانَهُ

رسالۀ نور حقّندە یازیلان بو اوزون و حقیقتلی مكتوبی یازان مرحوم حسن فیضی قرداشمز، عینًا شهید حافظ علی مثللو بر مكتوبندە دیدیگی كبی:

"دخی نذرم بوكە، جانم سڭا قربان اولاجق!"

دیدیگی تصدیقًا، استادینە بدل شهید اولوب، قرداشی بیوك حافظ علینڭ یاننە كیتمش. بو ذات ذوالجناحین، اهل قلب و غایت یوكسك بر اهل علم و حقیقت، اوتوز سنەلك معلّملك پردەسی آلتندە ایمانە خدمت ایتمش. و اون سنەدنبری رسالۀ نوری الدە ایدوب كیزلی پردە آلتندە چالیشمش. صوڭرە دە ایكی سنە ظرفندە طوغریدن طوغری یە رسالۀ نورڭ یوكسك حقیقتلرینی و كمالاتنی چكینمەیەرك روح و جانیلە هركسە اعلان ایتمشدر.

جناب حق رسالۀ نورڭ هر بر حرفنە مقابل اونڭ روحنە و عالم برزخدەكی نورجی آرقداشلرینڭ روحلرینە بیڭلر رحمت أیلەسین. آمین. آمین. آمین.

سعید النّورسی

عزیز، صدّیق قرداشلرم، بونی صالح یشیلڭ اوزون بر مكتوبنە جوابًا یازدیغم و اوڭا كوندردیگم بر مكتوبڭ صورتیدر. یازمغە بر سبب دە بر كون اوّل رؤیادە اوزون بر مكتوب ایلە اهمّیتلی مشغول اولمەمڭ عینًا تعبیری چیقمەسیدر.

[٣١٢]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشم و بو فانی دنیادە حمیّتلی و جدّی بر آرقداشم،

[اوّلا] بتون دوستلرم و همشهریلرمدن اڭ زیادە ذاتڭز و بعض ارضروملی ذاتلر، بنم بو اشكنجەلی و مظلومیّت حالتمدە شفقتكارانە جدّی علاقەدارلغڭزە و امدادیمە فكرًا قوشمەڭزە جدًّا چوق منّتدارم و آخر عمریمە قدر اونوتمایاجغم. سزە بیڭ ما شٓاء اللّٰه و بارك اللّٰه دیرم.

[ثانیًا] مسلگمە و رسالۀ نوردن آلدیغم درسمە بتون بتون مخالف اولارق و اون سنەدنبری فانی دنیانڭ كچیجی، اهمّیتسز حادثەلرینە باقمامق اولان بر دستور حیاتمە دە منافی اولارق، صرف سنڭ خاطرڭ و مراق ایتدیگڭ و بو دفعەكی اوزون مكتوبڭ ایچون وضعیتمە و ظالملرڭ اشكنجەلرینە عائد برقاچ مادّەیی بیان ایدەجگم. [برنجیسی] اوتوز سنە اوّل دار الحكمت اعضاسی ایكن، بر كون آرقداشمزدن و دار الحكمت اعضاسندن سیّد سعد الدّین پاشا دیدیكە: قطعی بر واسطە ایلە خبر آلدم، كوكی اجنبیدە و كندیسی بورادە بولونان بر زندقە قومیتەسی،

سنڭ بر اثریڭی اوقومش. دیمشلركە: بو اثر صاحبی دنیادە قالسە، بز مسلگمزی، یعنی زندقەیی، دینسزلگی بو ملّتە قبول ایتدیرەمیەجگز. بونڭ وجودینی قالدیرملی یز دییە، سنڭ اعدامڭە حكم ایتمشلر. كندیڭی محافظە ایت. بن دە [تَوَكَّلْتُ عَلَی اللّٰهِ] اجل بردر، تغیّر ایتمز دیدم.

ایشتە بو قومیتە، اوتوز سنە، بلكە قرق سنەدنبری هم توسّع ایتدی، هم بنملە مجادلەدە هر بر دسیسەیی استعمال ایتدی. ایكی دفعە امحا ایچون حپسە و اون بر دفعەدر بنی زهرلەمگە چالیشمشلر. (شیمدی اون طقوز دفعە اولدی.) اڭ صوڭ دهشتلی پلانلری، سابق داخلیە وكیلنی و آفیونڭ سابق والیسنی و امرطاغینڭ سابق قائممقام وكیلنی علیهمە سوق ایتمەلریلە، رسمی حكومتڭ نفوذینی بتون شدّتیلە علیهمدە استعمال ایتمەلریدر. بنم كبی ضعیف، اختیار، مَرْدُمْكِریز، فقیر، غریب، خدمتە چوق محتاج بر بیچارەیە او اوچ رسمی مأمورلر، علیهمدە اویلە بر پروپاغاندە و هركسی قورقوتمق او درجەیە كلمشكە، بر مأمور بڭا سلام ایتسە، خبر آلدقلری وقت دگیشدیردكلری ایچون، جاسوسلقدن باشقە هیچ بر مأمور بڭا اوغرامدیغنی و قومشولریمڭ دە بعضیلری قورقولرندن هیچ سلام ایتمدكلرینی كوردیگم حالدە، عنایت و حفظ الٰهی بڭا بر صبر و تحمّل ویردی. امثالسز بو اشكنجە، بو تضییق، بنی اونلرە دخالتە مجبور ایتمدی.

[ایكنجیسی] بلكە تخطّر ایدرسڭ، آنقرەدە دیوان ریاستدە مصطفی كماللە مناقشە زمانندە، اوڭا قارشو دیدم: نماز قیلمایان خائندر، حكمی مردوددر. یوزینە

شدّتلی مقابلە ایتدیگم حالدە، بڭا قارشو اهانت و حقارتە جسارت ایدەمدیگی حالدە، بورادە كوچك بر ضابط و بر چاووش، او اهانتی و حقارتی یاپدیلر. مقصدلری، بنی حدّتە كتیروب بر مسئلە چیقارمق اولمەسندن، حفظ و عنایت الٰهیە بڭا صبر و تحمّل ویردی.

[اوچنجیسی] ایكی سنە، ایكی محكمە، اللرندە تدقیق ایدیلن بتون رسالۀ نور اجزالرندە قانونجە بر وسیلە بولامایوب [حاشیە] بزی و رسالۀ نوری برائت ایتدیردكدن صوڭرە، زندقە قومیتەسی، منافق بعض مأمورلری وسیلە ایدرك، مركز حكومتدە رسمی بر پلان چویروب، بنی بتون بتون خلاف قانون اولارق بتون دوستلرمدن و طلبەلرمدن تجرید و صحّت و حیاتم نقطەسندە اڭ فنا بر یردە، بنی نفی ایتمك نامی آلتندە، حپس منفرد و تجرید مطلق معناسندە بنی امرطاغنە كوندردیلر. شیمدی تحقّق ایتمشكە، ایكی مقصدلە بو معاملەیی یاپییورلر:

(بریسی: ) اسكیدنبری اهانتی قبول ایتمدیگمدن، بنی او صورتدە حدّتە كتیروب بر مسئلە چیقارارق محویمە یول آچمقدی. بوندن بر شی چیقارامدقلری ایچون، زهرلندیرمك واسطەسیلە محویمە چالیشدیلر. فقط عنایت الٰهیە ایلە، نور شاكردلرینڭ دعالری تریاق كبی، پانزهر كبی و صبر و تحمّلم تام بر علاج كبی او پلانی عقیم بیراقدی، او مادّی و معنوی زهرڭ تهلكەسنی كچیردی. كرچە هیچ بر تاریخدە، هیچ بر حكومتدە بو طرزدە اشكنجەلی ظلملر قانون نامنە، حكومت نامنە یاپیلمدیغی حالدە، طمارلریمە طوقوندیراجق طرزدە متمادی ترصّدلرلە هركسی ئوركوتمكلە بنی حدّتە كتیرییوردی. فقط بردن قلبمە اخطار ایدیلدیكە، بو ظالملرە حدّت دگل، آجیمەلیسڭ. اونلرڭ هر بریسی، پك آز بر زمان صوڭرە، سڭا موقّتًا ویردكلری عذاب یرندە بیڭ درجە فضلە باقی عذابلرە و مادّی و معنوی جهنّملرە معروض قالاجقلر. سنڭ انتقامڭ، بیڭ دفعە زیادە اونلردن آلینیر. و بر قسمی، عقلی وارسە، دنیادە دە قالدقجە، كبرنجەیە قدر وجدان عذابی و اعدام ابدی قورقوسیلە اشكنجە چكەجكلر. بن دە اونلرە قارشو حدّتی ترك ایتدم، اونلرە آجیدم. اللّٰه اصلاح ایتسین دیدم.

هم بو عذاب و اشكنجەلرندە پك بیوك ثواب قزانمقلە برابر، رسالۀ نور شاكردلری یرینە و اونلرڭ بدلنە بنملە مشغول اولوب، یالڭز بنی تعذیب ایتمەلری، نورجیلرە بیوك بر فائدە و سلامتلرینە خدمت اولمسی جهتندە دە جناب حقّە شكر ایدییورم و مدهش صیقینتیلرم ایچندە بر سوینچ حسّ ایدییورم.

[دردنجیسی] سنڭ مكتوبڭدە بنم استراحتمی و اگر اقتدارم اولسە، بنم شام و حجاز طرفنە كیتمەمە دائر سزڭ حكومت حاضرەیە مراجعت مادّەسی ایسە:

[اوّلا] بز ایمانی قورتارمق و قرآنە خدمت ایچون، مكّەدە اولسەم دە بورایە كلمك لازمدی. چونكە اڭ زیادە بورادە احتیاج وار. بیڭلر روحم اولسە، بیڭلر خستەلقلە مبتلا اولسەم و زحمتلر چكسەم، یینە بو ملّتڭ ایماننە و سعادتنە خدمت ایچون بورادە قالمغە قرآندن آلدیغم درسلە قرار ویردم و ویرمشز.

[ثانیًا] بڭا قارشو حرمت یرینە حقارت كورمك نقطەسنی مكتوبڭزدە بیان ایدییورسڭز. مصردە، آمریقەدە اولسە ایدیڭز، تاریخلردە حرمتلە یاد ایدیلەجكدیڭز دیرسڭز.

عزیز، دقّتلی قرداشم! بز، انسانلرڭ حرمت و احترامندن و شخصمزە عائد حسن ظن و اكرام و تحسینلرندن مسلگمز اعتباریلە جدًّا قاچییورز. خصوصًا عجیب بر ریاكارلق اولان شهرتپرستلگك جاذبەدار بر خودفروشلق اولان، تاریخلرە شعشعەلی كچمك و انسانلرە أیی كورونمك ایسە، نورڭ بر اساسی و مسلگی اولان اخلاصە ضددر و منافیدر. اونی آرزولامق دگل، بالعكس شخصمز اعتباریلە اوندن ئوركویورز. یالڭز قرآنڭ فیضندن كلن و اعجاز معنویسنڭ لمعاتی اولان و حقیقتلرینڭ تفسیری بولونان و طلسملرینی آچان رسالۀ نورڭ رواجنی و هركسڭ اوڭا احتیاجنی حسّ ایتمەسنی و پك یوكسك قیمتنی هركس تقدیر ایتمەسنی و اونڭ پك ظاهر معنوی كراماتنی و ایمان نقطەسندە زندقەنڭ بتون

دینسزلكلرینی مغلوب ایتدكلرینی و ایدەجكلرینی بیلدیرمك، كوسترمك ایستەیورز و اونی رحمت الٰهیەدن بكلەیورز.

شخصمە عائد اهمّیتسز و جزئی بر مادّەیی حاشیە اولارق بیان ایدییورم:

مادام رجب بگ، قرە كاظم سنڭلە دوست و ظنّمجە اسكی سعیدلە دە مناسبتلری وار، اونلردن اییلك ایستەمك دگل، بلكە بڭا قارشو سلفلری كبی معناسز، لزومسز تضییق و ظلمە میدان ویرمەسینلر. حقیقتًا بورانڭ مادّی و معنوی هواسیلە امتزاج ایدەمییورم. صیقینتیلرم پك فضلە. اقامتكاهمی هم طیشاریدن، هم ایچریدن كلیدلەیورم. هر جهتلە یالڭزم. و بر جهتدە دە قومشوسز، صیقینتیلی بر اوطەدە، خستە بر حالدە حیاتمی كچیرییورم. بعضًا بر كونی، دڭزلیدە بر آی حپسدن فضلە بنی صیقمش. بو یگرمی سنە دهشتلی ظلم ایلە حرّیتمە و سربستیتمە ایلیشمك آرتق یتر. ذاتًا ایكی سنە محكمەلرڭ تدقیقاتیلە و علیهمدەكی منافقلرڭ پلانلری عقیم قالمەسیلە قطعیًّا تبیّن ایتمشكە، شخصمدە و نورلردە بو وطن و ملّتە ضرر توهّم ایتمكلە داها كیمسەیی قاندیرامازلر. بن دە هركس كبی حرّیتمە صاحب اولسەم، بلكە تبدیل هوا ایچون معتدل هواسی بولونان بو قضانڭ بعض كویلرینە كیتمەمە مساعدەكار بر اشعار بورادە اولسە، مناسب اولور. سزە و اورادەكی نور دوستلرینە چوق سلام و دعا ایدییورز.

اَلْبَاقٖی هُوَ الْبَاقٖی قرداشڭز سعید النّورسی

[٣١٣]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] مرحوم شهید حسن فیضینڭ [اَللّٰهُ نُورُ السَّمٰوَاتِ] ایلە باشلایان اوزون مكتوبنی بر پارچە اختصار ایتدم. بعض یرلرینی چیزكیلر ایچنە آلدم. صاقین اطرافنە چیزكیلر چكیلن قسم یازیلماسین. متباقیسنی هم عصای موسی، هم ذوالفقار مجموعەلرینڭ آخرلرندە الحاق ایدەبیلیرسڭز. خصوصًا ماكینە محصولاتنڭ آخرلرندە اولسە و مناسب كوردیگڭز طرزدە ویا داها مختصر اولارق الحاق ایدرسڭز.

[ثانیًا] آنطالیەدەكی اسكی و یڭی نورجیلرە چوق سلام ایدییورم. و او شهرلە چوق علاقەدار اولدیغم و حركات نوریە اورادە بویلە باشلامسی بنی چوق سویندیردی. اللّٰهە چوق شكر ایدییورز.

[ثالثًا] ماكینە ایلە چیقان مجموعەلرڭ باشندە یازیلاجق فقرە شودر: رسالۀ نورڭ بتون اجزالرینی ایكی سنە هم آنقرە، هم دڭزلی محكمەلری و اهل وقوفی تدقیقدن صوڭرە هم برائتمزە، هم عموم رسالۀ نور اجزالرینی بڭا تسلیمە متّفقًا قرار ویرمەلرینە بناءً، نشرلرینە بر مانع یوقدر. بڭا ویریلن رسالۀ نوردن بریسی، بو مجموعەنڭ اجزالریدر.

[رابعًا] ذوالفقارك اسپارطەدە هم مكتبلردە، هم جامعلردە دین لهندەكی اجراآتلر، معنوی فتوحاتی صاییلابیلیر. ان شٓاء اللّٰه اسپارطە ناصل نورلرڭ مدرسەسی اولمش، باشقە ولایتلرە دە درس ویرییور، ان شٓاء اللّٰه شعائر اسلامیەدە دە برنجی حسن مثال و نمونۀ امتثال اولاجق.

[بر حاشیە] اهل سیاستە هیچ باقمدیغم حالدە بوكون تصادفًا قولاغمە كیردیكە، جامعلری قالدیرمق ایچون مجلسدە، بر قسم مبعوثلر چالیشمشلر. عین وقتدە بنی تسمیم و حسن فیضینڭ ئولوم خستەلغی تصادفە بڭزەمییور. بو اوچ سٓوء قصد عین زماندە بربریلە علاقەدار كورونویور. ایكیسی شیمدیلك عقیم قالدی، بریسی بر قهرمان آلدی

سعید النّورسی

خسروڭ مكتوبندە بو فقرە دار الفنون اسمی اونیورسیتەیە تبدّلندن مژدەلی بر معنایە دائر اولمەسندن لاحقەیە كیرسین.

اونیورسیتە كلمەسنڭ "نور" و "نورسی" اسمیلە مناسبتی بیان ایدیلدیگندن، بو عالی مكتب، نظرلردە یوكسلن بو عالی لوحەسیلە دییوركە: "شیمدی بن بڭا باقیلمایان اسكی اسممی بیراقدم. چوقدنبری آه ایدوب حسرتنی چكدیگم ای نور، سنڭ اسمڭی آلدم. غربڭ نوریڭی بوغان ظلمتلری ایچندە ایڭلەیەرك سنی بكلردم. ایشتە بوكون سیلكینوب او ظلمتدن اشراق ایدن نوریڭە وصلت ایچون شرقە قوشوب كلدم. براز بڭا دقّت ایتسەڭ، اسممڭ اورتەسندە