جانم، عریانی اریك خوشابی ایستەدی. بن بیلمییوردم، اونوتمشدم، شدّتلی بر آرزو ایلە حرارتمی تسكین ایدەجك اسكیدە آلیشدیغم و چوق استعمال ایتدیگم عریانی اریك، بر قوطو ایچندە و آسیەنڭ خاص آرقداشلرندن نورجی شریفە خانمڭ شكریلە ألمە ویریلدی. بن دە بو چوق طاتلی ایكی توافقڭ خاطری ایچون هم معصوملرڭ، هم اونلرڭ تبرّكلرینی یوز مثلی قدر قبول ایتدم. عمومە بیڭلر سلام.

قرداشڭز دعاڭزە محتاج سعید

معجزەلی قرآنڭ كاتبی مبارك خسروڭ مكتوبندن بو كوزل پارچەیی لاحقەیە كچیردك. ما شٓاء اللّٰه، ذوالفقار معجزات مجموعەسنی تام لایق بر طرزدە تعریف ایتمش.

(١٨٩)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

سوكیلی استادیمزڭ لاحقەیە قید ایتدیگمز مبارك مكتوبلرندن بریسی، قهرمان طاهری ایلە كوندریلن [و عصای موسی نڭ بر ذیلی و مؤلّفنڭ بر ترجمۀ حیاتی] نامنی آلان مجموعەنڭ مصحَّح اولارق طبع ایدیلمەسنە و اسپارطە مدرسة الزّهراسی

طلبەلرینڭ نورە عائد خدمتلرندن قیمتدار استادیمزڭ ممنونیتلرینە و صورتًا كوروشولمدیگندن قهرمان طاهرینڭ متأثّر اولمامسنە دائردر.

ایكنجی مبارك مكتوبڭز، فرعونلاشمقدە طاش و دمیر كبی سرت مادّەلری هیچە صایان و قراڭلقلی و ظلمتلی كیجەلردن داها زیادە ظلملی ظلمتلرە كومولن و فضیلت و انسانیّت دویغولرندن بی بهرە اولان قلبلرە الندەكی وحدانیت الٰهیە عصاسیلە ایندیردیگی ضربەلرلە، او بارد و ظلمانی قلبلردن تصدیق الوهیت و قبول اسلامیت كبی نورلر فیشقیرتان و اهل ایمانڭ نورانی قلبلرینی كونش مثال نورلریلە طولدیران عصای موسی مجموعەسنە دنك اولمق اوزرە، الٰهی و سماوی برهانلرلە مالامال و بو روحلریلە متمادیًا دوراننی كوسترن منوّر و عظمتلی سما و یاشادیغی عصرلر بوینجە متمادیًا تازەلنمكدە بولونان و قوجە زمین موجوداتنی خالق ذوالجلال نامنە ضبط و تسخیر ایدرك انكار الوهیتلە طغیان ایدن ظالم بشرڭ طاغی نفسلرینڭ حدودسز طاشقینلقلرینی صوڭسز بر ندامتە چویرن و بتون سیّئٓاتنی نهایتسز بر استغفار ایلە تمیزلتمەیە قوشدیران و اهل ایمانە، "ایشتە جنّت باقیە، هایدی كیرمگە چالیش" دیین و نهایتسز برهانلرینڭ چوق طاتلی، چوق شیرین اذعان لسانلری اوستندە او فضل الٰهی اثری اولان جنّتڭ اڭ صوڭ و اڭ كوزل و اڭ بیوك و اڭ لطیف میوەسی اولان رؤیتڭ بر نوع عظمتلی لذّتنی شو حیات فانیەدە ویرن و مسعود و مستریح یاشاتمەیە وسیلە اولان نورڭ معجزاتلر مجموعەسنە (ذو الفقار

معجزات احمدیە و قرآنیە) اسمی ویریلمسی بزلری پك چوق سوینچلرە غرق ایتدی.

هم سوكیلی مبارك استادیمزڭ مدرسة الزّهرانڭ خدمت نوریەلرندن ممنونیتنی اظهارە وسیلە اولان حقیر و قصورلی، لیاقتسز نورجی خسروڭ مكتوبنڭ، هم صاوە قهرمانلرندن متوفّی نورجی حافظ محمدڭ قهرمان قرداشلری نورجی مصطفی و علینڭ خالص كوزل مكتوبلرینی، هم نورجی مبارك قرداشمز خلیل ابراهیمڭ خوش مكتوبنڭ لاحقەلریمزە قید ایدیلمك اوزرە كوندریلدیگنە دائردر.

اوچنجی مبارك مكتوبڭز، اوقودقجە، یازدقجە ذوقمزڭ تزییدینە سبب اولان و بر دعای نبویدەكی پك یوكسك ثواب و پك بیوك فضیلتی قبول ایتمكدە وسوسەیە دوشن و بنم كبی ضعیف عقلنڭ شعورسزلغندن و آزالمش رؤیتنڭ ادراكسزلگندن استفادە ایدرك قلبنە كیرن وسوسە و شبهەلری، درت اهمّیتلی و قیمتلی جوابلریلە سراب كبی اریتوب یوق ایدن و آیینۀ صمد اولان او كوزل قلبی او كبی وسوسەلردن تمیزلەین او كوزل مكتوبڭز، او شیرین افادەلریڭز، جدًّا مدحە چوق سزا، تحسینە چوق لایق ذكر جمیل ایلە استادیمزی تبریكە چوق شایستەدر كوردك.

دردنجی مبارك مكتوبڭز، خاصلرە مخصوص بر درجە محرمدر، یازیلمش. حقیقی حمایەكارلری، جدّی صاحبلری و عوام مؤمنینڭ معتمدلری اولان مدرّسونڭ

قاچمەلرندن طولایی، یگرمی سنەدر تلاش و تخاشی پردەسی آلتندەكی خدمتلە و خارقە و معجزەواری بر حالتلە انتشار ایدن و للّٰە الحمد بوكوندە (سِرًّا تَنَوَّرَتْ) پردەسندن چیقان رسالۀ نورە ألآن دخالت ایتمەین خواجەلرڭ بو دهشتلی خطالری یوزندن مستحق اولدقلری دهشتلی و شدّتلی طوقاتلری یوزلرینە و باشلرینە قرنلر بوینجە ایندیرن نورڭ نورلی ذوالفقارلری اولان اشارات سبعە، سكزنجی لمعە، وهّابیلك حقّندەكی رسالە ایلە علماء السّوئە اولان شدّتلی و دهشتلی توبیخلری ایچندە استانبول علماسنە نظر شفقتلە باقان و پردە آلتندە نورجیلرڭ قوّۀ معنویەلرینی قیرمق ایچون واسطە اولان بعض خواجەلرە آلدانمایارق، صارصیلمایارق، مناقشەسز، دوستانە معاملە ایتمەمزی امر ایدن او كوزل مثلسز یازیلریڭز، نورڭ حوض كبیرندن كلن و نورجیلری سٖیراب ایدن و خارقەلریلە جن و شیطانلری حیرتلرە دوشورن بو مدنیّت عصرندە علّامۀ عصر اولان بیوك استادیمزڭ عرش اعظملە باغلی اولان قرآندن سوزولن و بشری سعادتە سوروكلەین خوش و بدیع سوزلریدرلر.

جناب حق سوكیلی مبارك استادیمزدن ابدیًا خوشنود و راضی اولسون. آمین، آمین، آمین.

اَلْبَاقٖی هُوَ الْبَاقٖی اَلْحُبُّ فِی اللّٰهِ

قصورلی طلبەڭز خسرو

(١٩٠)

بِاسْمِهٖ سُبْحَانَهُ

عزیز، صدّیق قرداشلرم،

حافظ علینڭ تام وارثی حسن فیضینڭ بو كوزل مرثیەسنی بر سنە اوّل تحرّیدن صاقینمق ایچون كتابلرم ایچندە بر یرە صاقلامشدم و اونوتمشدم. ایكی كون اوّل كتابلری آلدم، بو چیقدی. قاچ دفعە شهید مرحومڭ مزارینە خیالًا كیتدم، بونی اوقودم. سزە دە لاحقەیە كیرمك ایچون كوندردم.

سعید النّورسی

شهید مغفور حافظ علی افندینڭ قبرینی زیارت ایدركن..

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

استادم افندم حضرتلری، كچن جمعە كونی صباحی قرداشلرملە برابر شهید مغفور حافظ علی افندی یی زیارت و سلامڭزی تبلیغ ایدركن روح شریفنە خطابًا اورادە سویلەمش اولدیغم بو ابیاتی سزە دە تقدیم ایدییورم. قبول بویورمەڭزی رجا ایدر و مبارك اللریڭزی اوپرم افندم.

ای نور یولنڭ یولجیسی، ای روح منوّر

بو مدفن پاكڭ اولا روحڭ كبی انور

ای ئولمەین، ای فدیۀ استاد مبارك

راضی اولا اللّٰە تعالی و تبارك

كوندردی سلام باق سڭا اول حضرت استاد

هم روح عزیزی دیدی هر دم اولا دلشاد

قرآن كریم اوغرینە فانیدەكی خدمت

بخش أیلەدی شیمدی سڭا صوڭسز ابدیّت

بو مقبرەلر فخر ایدەجك حشرە قدر هپ

امواتە اوقوت نسخۀ نور آچ یینە مكتب

یرلردە بشر كوگدە بتون نورلی ملكلر

هر كون صونویور روحڭ ایچون عرشە دیلكلر

ای منبع انوار و ای حافظ اسرار

ای جاننی جانانە ویرن ذات فداكار

حافظ دییە بن نامڭی دویدم او حضوردە

مدحڭ اوقونور هم دە بوكون مجلس نوردە

صون كوثر صافی بزە سنسڭ یینە ساقی

بخش أیلەمش اللّٰه سڭا بر عالم باقی

صورمام سڭا بر شی نە بوكوندن نە دە دوندن

بر نقطە اوقوت سن بزە اسرار لدندن

آه چوقمی اوزاق طوغمەسی بر شوق شدیدڭ

كیتسەم یولنە سن كبی بر شانلی شهیدڭ

فیضی! یورو سن حضرت استادە یاقین اول

حافظ كبی فردوسە بولورسڭ اورادن یول

شاكردیڭز حسن فیضی

میلاسلی خلیل ابراهیمڭ، طواسلی ملّا محمدە یازدیغی مكتوبدر.

(١٩١)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدَ الْاٰبِدٖینَ

بو غریب مكتوب، مادام نورلرڭ شخص معنویسنی معترضلرە قارشو مدافعە ایدییور و خسروە یازمش، لاحقەیە كچمك ایچون خسروڭ و رفقاسنڭ رأیلرینە حوالەدر

سعید النّورسی

قرداشم ملّا محمد افندی،

سزی متأثر ایدن او واعظڭ ناخوش سوزلری اوزاقدن اوزاغە بنم دە قولاغمە كلدی. او ذات دیمشكە: سعید، امام علیدن چوق بحث ایدییور، او مناسبتلە علویدر. یعنی علویلك ایلە اتهام أیلەیورمش. بندەڭز بونی ایشیتنجە دیدمكە: اگر علویلك بویلە ایسە، بزلر ازلدن علوی یز. و بو كبی علویلگە جاندن طرفدارز. نور محمّدڭؐ ظلّی، قرآن عظیم الشّانڭ دلّالی، جهار یار كزینڭ سایەسی، ابو بكرڭؓ صدقیّتی، عمر الفاروقڭؓ حقلە باطلی فرقدە عدالتی، ذی النّورینڭؓ حیاسیلە

نور رحمیتی، علی كرّم اللّە وجهەنڭؓ شاە ولایتلە ممتاز فضیلتی، امام حسنڭؓ فراغتی، امام حسینڭؓ شجاعتی، او اهل سنّتڭ مجتهدی و حق مذهبلرڭ محب طرفداری، امام اعظمڭ و امام شافعینڭ، امام مالكڭ و امام احمد حنبلڭ نور فراستلری، اصابتلری، اتّقالری.. اسلامیتڭ اولو العلمی، ایمانڭ سراجی، نور دڭزینڭ طالغیجی، انسانیتڭ رهبری، شجرۀ ولایتڭ عقدۀ حیاتیەسی، اقطاب ولایتڭ عالی قدری، الوان طریقتڭ منشوری و حقیقتڭ میوەسی و آخر زمانڭ امامی و درّ یكتاسی اولان محبّ سبحانی استادیمز اولان رسالۀ نوری و شخص معنویسنی بیلمەینلر وارسە، بیلمش اولسونلركە، او بزم كوزیمزڭ نوری، كوڭلمزڭ سروری، آخر زمانڭ مجدّد امامی، هم قادریدر هم نقشی، هم شاذلیدر هم علوی، هم رفاعیدر هم مولوی، هم محیی الدّیندر هم دهلوی، هم خالدیدر هم ضیائی، هم مجدّددر. هم رسالۀ نور.. بایزیدڭ، جلال الدّین رومینڭ، امام ربّانینڭ، احمد بدوینڭ، ابراهیم دسوقینڭ، خرقانینڭ، امام سُهْرَوَردینڭ، نجم الدّین كبرانڭ، محمّد حنفینڭ (قَدَّسَ اللّٰهُ اَسْرَارَهُمْ وَنَوَّرَ قُلُوبَهُمْ بِبَرَكَاتِهِمْ) حضراتنڭ مشربلرینی و آثار جمیلەلرینی كندیسندە تجمّع ایتمش كتاب شكلندە بر نور مجسّمدر.

بونڭلە برابر بو ماهیتدەكی رسالۀ نورڭ ترجمانی اولان قرداشمز، بو كبی شخصی حقّندەكی توصیفلری قبول ایتمەیوب، بو كبی اوصافە لیاقتە حائز بولونمدیغنی و علی العادە افراد امّتدن بر فرد اولدیغنی سویلر. لكن دقّت ایدیلیرسە كورولوركە،

یتمش یاشندە، ضعیف، نحیف و غریب، كیمسەسز اولدیغی حالدە، كندیسندە [حقّڭ نوری] دوشمانلرڭ كوزینە او قدر بیوك و اهمّیتلی كورونویوركە، بر تك ضعیف و دنیادن متجرّد و غریب و نحیف وجود شریفلرینە قارشو عادتا اوردولر تحشید ایدیلییور. عجبا نە ایچون بویلە كیمسەسز اختیار بر انساندن توحّش ایدیلییور؟

نە ایسە عزیز قرداشم، متأثّر اولما! بو امتحان سفرەسندە بولونان بر چشید نعمتلردن كیمیسی باقلاوە ییر، كیمی بورك، كیمیسی چوربە ایچر، كیمی باقوب كچر. هم قرداشم، مسموعاتە نظرًا او واعظ ذات صوڭرەدن یا بر معنوی طوقات ییدی ویاخود انصافە كلمش اولملیكە، كیتدیگی یردن بزم حافظڭ عمجەسنە مكتوبلە بیان اعتذار ایدوب دیمشكە: بنم سزە اوّلجە او ذات عالی قدر حقّندەكی تفوّهاتمە قیمت ویرمەیڭ. بن او سوزلردە چوق خطا ایتمش اولدیغمی آڭلادم، مأٓلندە بیان ندامت و معذرت أیلەمشدر. و سزڭ كوسترمش اولدیغڭز جدّی علاقەدن طولایی سزی تبریك أیلرم.

هم باق امام علی رضی اللّٰه عنه و كرم اللّٰه وجهه قصیدۀ جلجلوتیەسندە (فَیَا حَامِلَ الْاِسْمِ الَّذٖی جَلَّ قَدْرُهُ٭ تَوَقّٰی بِهٖ كُلَّ الْاُمُورِ تَسَلَّمَتْ٭ فَقَاتِلْ وَلَا تَخْشَ وَحَارِبْ وَلَا تَخَفْ٭ وَدُسْ كُلَّ اَرْضٍ بِالْوُحُوشِ تَعَمَّرَتْ٭ وَاَقْبِلْ وَلَا تَهْرَبْ وَخَاصِمْ مَنْ تَشَٓاءُ٭ وَلَا تَخْشَ بَاْسًا لِلْمُلُوكِ وَلَوْ حَوَتْ٭ فَلَا حَیَّةٌ تَخْشٰی وَلَا عَقْرَبٌ تَرٰی٭ وَلَٓا اَسَدٌ یَأْتٖٓی اِلَیْكَ بِهَمْهَمَتْ٭ وَلَا تَخْشَ مِنْ سَیْفٍ

وَلَا طَعْنَ خَنْجَرٍ٭ وَلَا تَخْشَ مِنْ رُمْحٍ وَلَا شَرٌّ اَسْهَمَتْ) كلام انسجام عالیلرندە (وَلَا تَخْشَ وَلَا تَخْشٰی وَلَا تَهْرَبْ) لر ایلە مؤیّد اولدیغنی و (تَوَقّٰی بِهٖ كُلَّ الْاُمُورِ تَسَلَّمَتْ) كرامت علویەسندە بو كبی طعنلرە اهمّیت ویرمە، متأثّر اولما دییە اشارت ایدییور، دینیلسە سزادر. (اَللّٰهُ اَعْلَمُ بِالصَّوَابِ)

اَلْبَاقٖی هُوَ الْبَاقٖی

قرداشڭز میلاسلی خلیل ابراهیم

زغفرانبولی رسالۀ نور طلبەلرینڭ مكتوبیدر. لاحقەیە كچەبیلیر. بو قرداشمز رسالۀ نورە خطاب ایدییور. یوقسە ترجمان، بو توصیفاتی كندینە هیچ قبول ایتمز و كندینی لایق كورمز

سعید النّورسی

(١٩٢)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ عِلْمِ اللّٰهِ اَبَدًا دَٓائِمًا

ای رسالۀ نور! ای مظهر اسم البدیع والنّور! و ای معجزۀ كلام مالك الملك والدّهور! و ای ملاذ الجمهور شفاء الصّدور! و ای رافع اعلام السنّە! و ای قامع اضالیل البدعە! و ای منشأ فیوضات ربّانی! و ای منبع فتوحات صمدانی! و ای دوای دای فوائد! و ای اكسیر نَیْلِ مراد! و ای فرد فرید آوان! و ای استاد كلّ

و یكانۀ زمان! و ای فَرْیَادْرَسِ دَرْمَانْدَكَانْ! و ای ملجأ بیچارەكان! و ای ناشر انوار حقیقت! و ای واقف اسرار عبودیت! و ای واحد العصر فرید الزّمان! و ای یكانۀ وقت بدیع الزّمان! و ای یكانۀ خصم دجّال سفیان! و ای محافظ شریعت غرّای احمدی و حضرت قرآن! و ای منادئ قرآن و حقائق ایمان! و ای حامئ اهل سنّت و اهل ایمان! و ای مجاهد فی سبیل اللّٰه! و ای قاتل الزّندیق! و ای نوریلە شاكردلرینی اذن الٰهیلە بوكونڭ اڭ مشفق، اڭ مرحمتلی، اڭ جسارتلی، اڭ صبور، اڭ راضی، اڭ شكور، اڭ حلیم، اڭ رفیق، اڭ عفیف، اڭ علیم، اڭ هشیار، اڭ بشاش، اڭ هشاش، اڭ صدوق اللّسان، اڭ قلیل الفضول، اڭ قلیل الزّلل، اڭ كثیر العمل برر حقیقی مسلمان یاپان رسالۀ نور! و ای شاكر شاكردلری زغفرانبولی طلبەلرینڭ فقیرانە، عاجزانە، ذلیلانە بر حرمتنامەسی و تبریكنامەسی! باشدە مبارك افندیمز حضرتلری اولمق اوزرە هر بررلریڭزڭ پاك و نور صاچان مبارك اللریڭزدن حسرت و حرمتلە اوپرز.

بو سنە هر بررلریمزە بوكون ایچون ادراكی نصیب و میسّر اولان و درت لیلۀ معظّمۀ مباركە ایلە وایەدار قدسیت بولونان مبارك شهور ثلاثەنڭ عزیز و سوكیلی استادیمز و اونڭ قبولی محقّق و موعود اولان دعالری بركاتیلە مسعود بولونان عموم رسالۀ نور شاكردلری و اهل ایمان ایچون نورلی فیضلی و خیرلی اولمەسنی جناب ارحم الرّاحمیندن نیاز أیلر، تكرار تكرار حرمتلە اللریڭزدن اوپرز.

١ رجب شریف ١٣٦٥ زغفرانبولی رسالۀ نور طلبەلری

لاحقەیە كیرسین

خسروڭ مكتوبیدر.

(١٩٣)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز و مبارك استادیمز افندیمز حضرتلری،

بو دفعەكی شهور ثلاثەمزی تبریك ایدن بو مبارك مكتوبڭزلە برلكدە كوندریلن و باش حرفی [ب] اولان بسملە ایلە باشلایان رسالۀ نورڭ... و باش حرفی [ب] اولان و شاكردلری اونڭلە كمالە اولاشان بدیع بر استادڭ... و باش حرفی [ب] ایلە باشلایان ایلك مسكنلری اولان بارلەنڭ.. هم طلبۀ نورڭ باش قهرمانلری نامنە اسمنڭ باشی [ب] حرفی ایلە باشلایان بارلەلی نورجی بحری ایلە، او مبارك كویڭ مبارك رفقالرندن و اسمی ایلە یاد ایدیلن صنعتنڭ باش حرفی [ب] ایلە باشلایان بربر محمدڭ و دیگر قرداشلرینڭ رسالۀ نورە فوق العادە خدمتلرینڭ بر كرامتی اولارق، سوكیلی مبارك استادیمز صباحدە بزە یازدقلری مكتوبڭ اورتە قسمنی بوش بیراقارق نهایت قسمنی تماملامشلر. آقشامدە آلدقلری بو ایكی مبارك قرداشلریمزڭ بری منظوم، دیگری منثور مكتوبلرندە یازدقلری خالصانە خدمت و صداقتلرینی پارلاق بر صورتدە كوسترن كوزل و سویملی یازیلری و سویملی و كوزل استادیمزڭ

او بیوك قدسی روحلرینە بو مكتوبلرڭ كلمكدە اولدقلری اعلام ایدیلمكلە كرامتنی كوسترمش و بزە یازیلمش. بو مكتوبڭ بوش بیراقیلان اورتە قسمنی او مبارك قریەنڭ اسكی و یڭی مبارك نورجیلری نامنە بو ایكی مبارك نورجینڭ، بو ایكی مبارك مكتوبلری، مبارك نورلرڭ صحیفەلری آراسنە كیرمەسنە امر ویریلمكلە تماملانمش.

هم مرحوم عبد الرحمندن منحل قالان وظیفەیە اڭ باشدە صاری بیچاقلی الماس قلملی مصطفینڭ معنًا تصاحب ایتدیگی حالدە معذرتندن تام یاپامامەسی و هم چوق سنەلرلە سوكیلی استادیمزە جدّی خدمت ایدن بارلەلی مهاجر حافظ احمدڭ نورلرڭ باش طلبەلرندن اولدیغنی سوكیلی استادیمز حسّ ایتدیگی حالدە كندندە كوزوكمەمسی، بو حقیقتڭ چوق سنەلر صوڭرە بو ایكی مبارك ذاتڭ متعلّقاتندە چوق بارز بر شكلدە ظهوری، بزی چوق كرەلر دوشونجەلریمزدە محجوب ایدن [حقیقتلرڭ دركندە سوكیلی مبارك استادیمزی آلداتمایان بر خاطرەیە] رسالۀ نورڭ نائلیتندن طولایی اڭ باشدە سوكیلی مبارك استادیمزی، هم رسالۀ نوری، هم بتون نورجیلری بتون زمانلردە بتون روحمزلە تبریك ایدییورز. و بزی بویلە شاشماز و شاشیرتماز بر حقیقتلە مادّی و معنوی مرزوق ایدن ربّمزە نهایتسز شكرلر ایدییورز. و دییورزكە: بزلر دوشونجەلریمزدە دائما محجوب اولسەق دە، بو حقیقتلر داها چوق تظاهر ایتسە، داها چوق استفادە ایتسەك.

میلیونلر شكرلر كوزل ربّمزە، نهایتسز صلات و سلام سوكیلی رسولمزە، صوڭسز دعای رحمت مبارك استادیمزە اولسون دیر دعا ایدرز.

اَلْبَاقٖی هُوَ الْبَاقٖی

قصورلی طلبەڭز خسرو

[١٩٤]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ دَٓائِمًا

عزیز، صدّیق، صارصیلماز، اوصانماز، چكینمز، چكیلمز قرداشلرم،

[اوّلا] بو یاز، درد معیشت جهتیلە و بو شهور ثلاثە، عبادت حیثیتیلە بر درجە نورلرڭ كتابتنە فتور ویرەبیلیر دییە بیان ایدرزكە: بالعكس، یازمغە شوق ویرر و ویرمك كركدر. چونكە نورڭ خدمتی هم معیشت، هم راحت قلبە بركتلریلە یاردیم ایتدیگی كبی، عبادت تفكّری نوعندن اولمسی جهتیلە، مبارك آیلرڭ ثوابلرینە بیوك یاردیمی وار.

[ثانیًا] نورڭ بر شاكردی بڭا دیدیكە: "كچن سنە داها نورلر بزە تسلیم اولمادن و خصوصی بر اعادە نتیجەسندە بورادە رحمت دخی خصوصی بر درجە تظاهریلە دیمشدڭكە: نە وقت تام سربستیتلە نورلر اوقونسە و یازیلسە و بزە اعادە ایدیلسە، یاغمورلە رحمت تام اولاجق، خبر ویرمشدڭ. حقیقتًا بو بهاردە هم عصای موسی هر طرفدە مراقلە یازیلمەسی و اوقونمسی، هم ذوالفقار معجزات