[ثانیًا] رسالۀ نورڭ ظهور زماننڭ بر نوع تاریخچەسی، اسكیشهر حپسنڭ مدافعەنامەسیلە دڭزلی حپسندەكی مدافعە رسالەلریلە "اختیارلر لمعەسی" و "آیت حسبیە رسالەسی" و "اون آلتنجی مكتوب" لە "هجمات ستّە" و "اشارات ثلاثە" و "اشارات سبعە" رسالەلری كبی نور اجزالری، سؤآللریڭزە تفصیلاً جواب ویرمك ایچون محكمە بڭا اعادە ایتدیگی و شیمدی ألمدە بولونمایان رسالەلر، بر زمان الڭزە كلەجك. ان شٓاء اللّٰه سزی هیچ اونوتمایاجغم. بو حالمدە بو علاقەدارلغڭز، بنم چوق آغیر صیقینتیلریمی خفیفلشدیردی. اللّٰه سندن راضی اولسون، آمین

اَلْبَاقٖی هُوَ الْبَاقٖی

قرداشڭز سعید النّورسی

(١٧٣)

یشیل صالحڭ استادیمزدن صوردیغی اون بر سؤآلیدر.

محترم استاد،

سزڭ حقّڭزدە شاعر مرحوم محمد عاكف بگ ایلە دار الحكمة الاسلامیە اعضالغندە بولونمش اولان مرحوم شوكت افندیدن دیڭلەدیگم قیمتلی نوطلرم واردر. حال ترجمەڭزی او ذاتلردن دویدقلریمی یازمق مجبوریتندە قالدیغم ایچون لطفًا سؤآللریمە قیصە قیصە جواب یازیڭز. كندی نامڭە یازاجغڭ حال وصیتنامەڭزی آرزو ایتدیگڭ قدر مفصّل یازمقدە امر سزڭدر

محمد صالح یشیل اوغلی

سؤٓال: ١-هانكی تاریخدە و نرەدە جناب حق سزی دنیایە كتیردی؟

٢-بابا و بیوك باباڭزڭ آدی و مسلكلرینی لطفًا یازیڭز؟

٣-كیملردن، نرەدە درس اوقودیڭز؟ و نرەدە كیملرە درس اوقوتدیڭز؟

٤-واندە، وان والیسی طاهر پاشانڭ أوندە نە قدر قالدیڭز؟ و او ذاتە نە اوقوتدیڭز؟ (مشروطیتڭ ایكنجی سنەسندە ارضرومە والی اولارق كلن طاهر پاشا مرحوم، بر رمضان افطارندە، سفرە باشندە سزڭ مزایاڭزدن اوزون اوزادی یە بر شیلر آڭلاتمشدی.)

٥-مشروطیتڭ اعلانندن قاچ آی اوّل استانبولە كلدیڭز؟ اتّحادجیلر، خلقە نصیحت ایچون سزی سلانیكە كوتورمشلردی. سلانیكدن صوڭرە سزی روم ایلیدە هانكی شهرلری كزدیردیلر؟

٦-بالقان حربنە اشتراك ایتدیڭزمی؟

٧- عمومی حربدە نرەدە اسیر اولدیڭز؟ روسلر سزە هانكی شهرلرینی كزدیردیلر؟ حقّڭزدە نە كبی معاملە یاپدیلر؟ تضییقدە، حقارتدە بولوندیلرمی

٨- اسارتدن هانكی تاریخدە استانبولە كلدیڭز؟ هانكی تاریخدە، دار الحكمة الاسلامیە علیّەسنە اعضا اولدیڭز؟

٩-ملّت مجلسنڭ ایلك دورەسندە آنقرەیە كلدیگڭز زمان اوّلا حرمتە، بر هفتە صوڭرە دە مجلسڭ تنفّس صالونندە و صوبە باشندە آبدست، نماز، جناب حقدن یاردیم ایستەییڭز، سوزلریڭزدن طولایی رئیس جمهورلە

مناقشەدن صوڭرە، آنقرەدن اوزاقلاشدیغڭزدن نە قدر صوڭرە ایلك اولارق نرەدن نرەیە نفی ایدیلدیڭز؟ و اول وقت دیانت ریاستی طرفندن، بر امرە مستندًا سزە واعظلك نامیلە اللی لیرە معاش تخصیص ایدیلمش ایكن، بو معاشی نەدن قبول ایتمدیڭز؟

١٠-هانكی شهر ویا قصبەدە منفی ایكن، یازدیغڭز كتابلر بهانەسیلە اسكیشهرە سوق و محكوم ایدیلدیڭز؟ و قاچ سنە حپسدە قالدیڭز؟ و حپسدن چیقاریلدقدن صوڭرە نرەیە نفی اولوندیڭز؟

١١-قسطمونیدن كیمڭ اخباریلە حكومت سزی دڭزلی جزا اوینە سوق ایتدی؟ قاچ آی حپسخانەدە قالدیڭز؟ حپسڭزە سبب اولان كتابلر تدقیق اولونوب، مضر اولمادقلری آڭلاشیلمقلە، حكمًا سربست بیراقیلدقدن صوڭرە، او حیاتڭزڭ محصولی اولان آثاریڭز سزە اعادە ایدیلدیمی؟

لطفًا پك قیصەجە بو سؤآللرڭ جوابنی یازیڭز.

نورلرڭ بر قهرمانی و بر خسروی اولان صادقڭ بو فقرەسی، كرچە حدّمدن پك چوق زیادە مقام ویرمش، فقط اونڭ فوق العادە توصیفاتی هم دعای معنوی، هم حقیقی استادی اولان رسالۀ نورڭ شخص معنویسی نامنە قبول ایدوب، لاحقەیە كچیردك.

(١٧٤)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

استادیمز، افندیمز حضرتلری،

دڭزلیدن عودتمزدن صوڭرە، قائم والدەم جاریەڭز بر رؤیای صادقە ایلە فقیرخانەیە استادیمز افندیمزڭ یدِ مباركلرندە بر اركك چوجق طوتارق، تشریف بویوردقلرینی كورمش. جناب قادر مطلق لطف و كرمیلە خزینۀ رحمتندن استادیمز افندیمزە بر خادم و خدمت قرآنیە و نوریەدە بر طلبە احسان بویورمشدر.

استادیمز افندیمزڭ مقدّس و معزّز خاطرەلرینی، اولاد و احفادیمزە دورًا تسلیم ایتمك و لایق اولمادیغمز حالدە شفقت و مروّت و كمالات انسانیەنڭ و اخلاق محمّدیەنڭؐ بر تمثالی و شمائل احمدیەنڭؐ بر آیینەسی و بو عجیب عصردە كفرڭ اڭ قویو باتاقلغنە دوشمش و ارتداد و الحادڭ قورومەسندە (جزئیتلری كریدە بیراقان) دنائت و زهرجیلك انتریقەلرندە اولان زندقە قومیتەسنە قارشو، حقیقت قرآنیە و ایمانیە و شریعت احمدیەییؐ نصف عصردن فضلە مساعی حیاتی بوینجە، اللّٰهدن باشقە هیچ بر قوّتدن قورقمایارق اڭ آغیر تضییق، اڭ آغیر شرائط و اڭ قویو ظلم و زهرلرڭ تأثیرندن صارصیلمایارق، اڭ صوڭ آجیلرە مفتخرانە و شكر مطلقلە قارشو قویارق، بلا فتور مدافعە ایدن.. و رسالة النّور ایلە كفری صوصدیران.. و بو مجاهدەسنی فیٖ سبیلِ اللّٰه

هیچ بر امل و دنیوی بر غایە و مقام آرامادن تك باشنە باشاران.. حضرت رسول علیە الصّلاة والسّلامڭ معنوی نسل شریفی.. و امام علی كرّم اللّە وجهەنڭ معنوی حفیدی.. و حضرت غوث اعظم شاە كیلانی رضی اللّٰە عنهڭ مریدی.. و دڭزلی اوتلندە خسرو و عاطف قرداشلریمزلە شاهد اولدیغمز قضاءً قیریلان اون آلتی سنەلك ییمك قاشیغنە كوستردیگی علاقە ایلە وفاكارلغڭ تمثالی.. و بو عجیب عصرڭ مجلس معنویدە مبعوثی.. و بو علوی و قدسی وظیفەلرڭ ممثّلی استادیمز افندیمزڭ توجّە قدسیلریلە نائل و شرفیاب اولدیغمز خدمت قرآنیە و نوریەدە، عاجز و حقیر شخصمە لطف بویورولان حصّەمزە وارث یاپمق و قرآن معجز البیانڭ دلّالی استادیمز افندیمزڭ جناح حمایە و شفقتلرینە تسلیم ایتمك نیت عاجزانەسیلە كوچك طلبەڭزڭ اسمنی سعید قویدق.

استادیمز افندیمزە قارشو طقوز آیدر اعترافنە جسارت ایدەمدیگمز بو جرئتمزڭ عفو بویورولمسنی و اولاد معنوی و رسالۀ نور طلبەلگنە قبولنی، خاك پایڭزدن رجا و نیاز ایدرك، صوچمزڭ عفوینە و دیلگمزڭ قبولنە ظاهری بر اشارت اولمق اوزرە، كوچك طلبەڭز سعیدی كنیەلندیرمەڭزی و عموم رسالۀ نور طلبەلرینە یازمق لطفندە بولونمش اولدیغڭز التفاتنامەلردەكی نجمیەلر كلمەسنە صاحب چیقارق بو دعا و التفاتڭ ایچریسندە ان شٓاء اللّٰه بن خستە و عاجزە دە وارمدر دییە شفاعت و توجّهڭزی صوڭسز حرمتلرلە مبارك ال و آیاقلریڭزی

اوپەرك دیلەین والدەم جاریەڭزڭ استرحام و نیازینی و تهذیب اخلاق یولنی و بو عصری جریانلردن ایمانلرینی و اركان ایمانیە و اسلامیە دائرەسندە احتیاجات دنیویە و اخرویەلرینی آنجق و آنجق استادیمز افندیمزڭ همّت و دعالری بركاتیلە و سراج النّورڭ نور و فیضیلە قورتاروب محافظەسنە قانع بولونان و ایمان ایدن و بو توجّه و دعا و همّتە چوق محتاج، صحّتی مختل و عاجزە تیزەم فطنت و قرداشم و بتون خانە خلقمز و افراد عائلەمز و بو عادی و عاجز خادمڭزلە برابر خاك پایڭزدن رجا و استرحام و نیاز ایدرك دیلرز. محترم شفقتلی، مرحمتلی، مروّتلی استادیمز افندیمز.

سونمش روحلریمزی خزینۀ قرآندن آلدیغی نورلر ایلە حیاتلاندیران فرید الزّمان استادم، افندم.

اوّلا، حاضرلانمش كاغدلرە قوپیە كاغدلریلە یازی ماكینەسی اصولی اسكی حروف و قوپیە قلمیلە بر دفعەدە بش نسخە اولارق رسالۀ نور اجزالرینی دعالریڭز بركاتیلە یازییورم. عربی نسخەلری یازدقدن صوڭرە هم تصحیح ایتمك، هم حركەلەمك ایچون تكرار الدن كچیرەرك یاڭلیشسز اولمەسنە دقّت و غیرت ایدییورم. اوّلجە، سكینەیی اون طقوز آیت و دعالریلە برابر و بو دفعە دە یڭی دلائل خیرات و آیت الكبرانڭ خلاصة الخلاصەسی و سكینەیی بر مجموعە حالندە یازدم. رسالۀ نورڭ یازی یازامایان طلبەلرینە هدیە اولارق ویرییورم. استادیمڭ بو دفعەكی امرلری اوزرینە اقتصاد، اخلاص، اون بر مسئلەسی ایلە

برابر دڭزلی حپسنڭ میوەسی، اوتوز ایكنجی سوزڭ برنجی موقفی، طبیعت رسالەسی، اوتوزنجی لمعەنڭ ایكنجی و اوچنجی نكتەلری، اوننجی سوزڭ طوقوزنجی حقیقتی، اوتوز اوچنجی مكتوبڭ اون یدنجی پنجرەسی و شكر حقّندەكی رسالەلری، ألمدە یازمقدە اولدیغم لمعاتڭ ختامندە عین اصولدە بش نسخە اولارق مجموعە حالندە یازوب، ان شٓاء اللّٰه بر نسخەسنی استادیمز افندیمزە تقدیم ایدەجگم.

رسالۀ نورڭ یڭی طلبەلرندن یازی ایلە خدمت ایدن عمر، چوق دقّت و فوق العادە ایمان و مراقلە اوقویان كریم، كنچ و فوق العادە مراقلی و استادیمزڭ مشتاقی یڭی یازی ایلە میوە رسالەسنی یازان و اسكی حروفلە یازمق و اوقومق ایچون چالیشان خسرو كمال حرمت و تعظیم و اشتیاقلە خاك پایڭزدن اوپەرك توجّه و دعالریڭزی خلوصئ ثانی قرداشمزلە برابر نیاز ایدرلر افندم.

جناب ارحم الرّاحمیندن حضرت استادیمزی بالعموم طلبە و شاكرد و اخوانلریلە برابر خدمت قرآنیە و نوریەدە ابدًا دائم و موفّق بویورمەسنی و زندیقلرڭ و اهل ضلالت و طغیانڭ شر و تسلّطلرندن امین و محافظە بویورارق، عنایت الٰهیەنڭ دوامنی و اوزون سنەلر استادیمز افندیمزڭ باشمزدن اكسیك اولمایارق صحّت و عافیتلە مجاهدۀ ایمانیەدەكی علوی و قدسی وظیفۀ دیانت پرورانەلرینە شوق مطلق ایلە دوامنی اوزون ییللر داها نصیب بویوروب، بز بیچارە و عاجز طلبەلرڭ أوكسز قالمامسنی و هر كوشەدە آچدقلری نورلر صاچان مدرسۀ نوریەلرڭ جدّ امجدلری سیّد هاشمیدنؐ آلدقلری الهاملە مژدەلەدكلری

استقبالدەكی جهان شمول عمومی تدریساتڭ ثمرەلرینی دنیا كوزیلە كورەرك، بو مبارك وطنڭ باغرینە و بو مبارك وطن اولادلرینڭ سینە و قلبلرینە ابدە قدر سونمەیەجك سراج النّورڭ نوریلە دیكدكلری ایمان فیدانلرینڭ میوەلرینی قانارق طاتمەلرینی، باركاە عزّت و شفقتدن [مِمَّا رَزَقْنَاهُمْ یُنْفِقُونَ] سرّیلە دیلرز. سوكیلی استادیمز افندیمز. [حاشیە]

فقیر، حقیر، بیچارە، عاجز، عادی خادمڭز م. صادق

حضرت استادیمز اولان رسالۀ نوردن باشقە كیم اولابیلەجگنی دفعاتلە سویلەمكدن كندیمی آلامامشدم.

شاهد اولدیغمز بتون وقایع بونی بزلرە كوسترمدیمی؟ دڭزلی حپسنڭ مدافعەنامەسی اولان شاە اثر، بتون اوقویوجیلرینی، بتون دیڭلەییجیلرینی و حتّی زندیقلری دخی حقیقتە سجدە ایتدیرمدیمی؟ مدافعاتی تكرار تكرار اوقودقجە، دگل اوصانچ ویرمك، حقیقت قات قات جانلانمییورمی؟ روح و ایمان شاهلانمییورمی؟ هانكی اثر واركە ایكی دفعە اوقوینجە تأثیرینی غائب ایتمەسین؟ بو شاە اثر و بتون رسائل النّور اجزالری اوقودقجە اوقومق ایستنمییورمی؟ قرآن معجز البیانڭ بو خاصّەسی آخر زماندە خزینۀ قرآندن آلینارق رسالۀ نورڭ شخص معنویسنڭ قلمندە تجلّیسی دگلمیدر؟ اوت، معجزۀ قرآنڭ عصریمزدە تجلّی ایدن بر معجزەسیدر. بو قدر آجی و آغیر شرطلر آلتندە، بو عجیب عصردە، بو حقیقتلری، دگل یاریم عصر، حتّی یاریم كون كیم مدافعە و محافظە ایدەبیلدی؟ بو حقیقتلری مدافعە و محافظە و نشر ایدن، او شرفلی نسل كریم عربڭ قاننی طمارلرندە طاشییان و معنوی احفادندن باشقە كیم اولابیلیر؟ بو اذنسز یازیلر، قلبمە و روحمە عكس ایدن نورڭ عظمت و هیبت و قوّتندن ایلری كلییور. جناب واجب الوجودڭ لطف و كرمندن استادیمز افندیمزە اوزون عمرلرلە صحّت و عافیتڭ احساننی عنایت الٰهیەدن دعا و نیاز و تضرّعلرلە ایستەیەرك، خاك پایڭزی أوپر و توجّهڭزڭ بقاسنی دیلرم استادم، افندم حضرتلری.

خادمڭز م. صادق

(١٧٥)

اصللری قریشی و نورلرڭ جدّی طلبەلری اولان

احمدلرڭ و رفقالرینڭ نامنە لاحقەیە كچیردك.

١

سوزڭ باشلانغیجی اولسون بسم اللّٰه

لطف و احسانلە توفیق ویررسە اللّٰه

قبولە قرین اولور ان شٓاء اللّٰه

٢

اسم ذاتدر اللّٰه رحمن الرّحیم

جملە اسمی جمع ایدر بو ای حكیم

خاطر عاجزە كلدی بر سوزكە سویلەیەیم

سوزلرڭ نورینی اظهار أیلەیەیم

٣

بو مگر الهام ربّانی اولور

ان شٓاء اللّٰه دردیمڭ درمانی اولور

یوقسە بن نردە دخی سوز نردەدر

بو عنایتلر دخی هپ سندەدر

٤

سویلنیلن سوزلر هپ كلییور نوردن

درس ویرییور انس و جان و حسن طیوردن

رسالۀ نور اولسون درسمز هر آن

اونڭ منبعی و حقیقتیدر حضرت قرآن

٥

سوكیلی استاددر اوڭا ترجمان

هر دم آرتسین نوری هم كمال ایمان

تزیید عمر أیلەسین حضرت رحمن

٦

هر آن بزلر او نوردن فیض آلالم

نورلانارق بحر انوارە طالالم

نورە باقان كوزلر ابدیًا ئولمز

بو بهارڭ نَوْرَسْتە كُلی هیچ بر زمان صولماز

٧

مؤذّن اللّٰە اكبر دیینجە بزلر جوشالم

ماسوایی ترك ایدوب مسجدلرە قوشالم

صف صف اولوب دە بر نظام قورالم

حضور حقّدە ال باغلایوب دیوان طورالم

٨

اولمایالم سوكیلی قرداش عاصی، نفس و هوایە تابع

كنچلگمز باقی اولسون اولالم قانون الٰهی یە مطیع

چوق بیوك تجارت و سعادتدر بزلرە عبادت

اڭ بیوك خسارت و هلاكتدر بزلرە سفاهت

٩

انسان اولورسە خودگام خوداندیش هم دە بدبین

ایشی واویلا اولور ظاهری و باطنی چركین

درسندن فیض آلوب اولملی ییز بختیار هم دە خدابین

عالم اسلامی ایشیقلاندیروب حیران ایدن رسالۀ نورڭ

١٠

چوق قورقونچ و ألملی منزللری بیلدیرر رسالۀ نور

طوپراق آلتندە ملكلرلە قونوشمەیی سودیرر رسالۀ نور

بو مكانە اڭ چوق انسیّت حاضرلایان رسالۀ نور

ایلك منزلدەكی قورقولری كیدریر رسالۀ نور

١١

عالم نورانی حیاتنی كورەمەینلرە كوستریر رسالۀ نور

دغدغۀ دنیادن ترخیص اولانلرە نفس آلدیرر رسالۀ نور

بیڭلر سنەلك یوللرڭ لامبەسیدر رسالۀ نور

امثالسز نمونەلك چیچك باغچەسیدر رسالۀ نور

١٢

عصرڭ [عُرْوَةُ الْوُثْقٰی] سی رسالۀ نور

اونی طوتان هر زمان قورتولور

حبل متینكە [حَبْلُ اللّٰهْ] در رسالۀ نور

اونی طوتان هر ایستەدیگنی بولور

١٣

محكم و قوپماز (زنجیر) در رسالۀ نور

ال آتوب طوتان نجات بولور

صارصیلماز بر ایمان ایلە صحرای نوری سیر ایدەلم

ال الە طوتوشوب هپ برابر كیدەلم

١٤

یوكسل آرتق ای نور مبارك بردنبرە

صلات و سلاملر كوتور بزدن اولو پیغمبرەؐ

پرنور اولسون یولمز تا ازلدن ابدە

حدسز آرماغانلر كوتور حضرت محمّدەؐ

١٥

نورلە طولسون بو ارض هم دە اولسون پایدار

بو مبارك نورڭ محافظیدر حضرت حَیْدَرْؓ

استیلای ارضدن تا عرشە قدر یاصلان

شاد اولسون غوث اعظم؈ ایلە حضرت آسلانؓ

١٦

طلبۀ رسائل النّور هم باشدە استاد

هپ برابر ایستەیورز ابدی سعادت

اومویورز دریای مرحمتڭدن رحمت

عصیانمز عفو ایدوب بقامزی ویر یا رب

١٧

تا ازلدن بو یورت نورە سزا

طوپراغندە یاتان جملۀ موتا

مغفرتلە اولسونلر عفو عطا

١٨

دعالریمز قبول ایت یا ربّ العالمین

تَوَفَّنٖی مُسْلِمًا وَاَلْحِقْنٖی بِالصَّالِحٖینَ

دَوْرەكانیدەكی نورجیلر نامنە چوق عاجز چوق قصورلی طلبەلریڭز احمد قریشی و نعمان احمد

نورڭ بیوك سانترالی صبرینڭ چالیشقان بر یاردیمجیسی چلینكیر علینڭ امّیلگنڭ خاطری ایچون لاحقەیە كیردی.

(١٧٦)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ بِعَدَدِ مَا لَا یُحْصٰی وَمَا لَا نِهَایَةَ لَهُ

پك چوق شفقتكار استادم افندم حضرتلری،

مبارك و رحمت صاچان ال و یمن بركت بخش ایدن آیاقلریڭزی كمال حسرت و اشدّ اشتیاقلە اوپویورز. تكرارلرلە اوپویورز. هم بو فقیر قولڭز كبی امّی و چوق قصورلی بر بیچارەیی دە دائرۀ نوریڭزە مرحمتًا آلمق كبی بر كرمكارلغڭزلە شاد و سوینچلرە مستغرق بویورمەڭزی نیاز یكانە غایۀ امل و آرزومدر. بندەڭز دڭزلی زیارتمدە، بر دفعە او معهود طار قاپودە، همن بر ایكی ثانیە قدر بر مدّت مشرّف و قهرمان نورانی بختیارلرە تماس و تشرّفمی، هر ایشڭ فوقندە بر موفّقیت بیلمشدم. للّٰە الحمد، او زمانلردنبری نور سانتراللگی، فعّال نور خادملری طرفندن عهدۀ عاجزانەمە ویریلدی. بندەڭز دە، صارصیلماز بر عزم و متانتلە (بِسْمِ اللّٰهِ وَفِّقْنَا یَا خَیْرَ النَّاصِرٖینَ) دییەرك وظیفەمە سعیە باشلادم. بوندن طولایی قلبمدە پارلایان مسرّت و بهجتڭ درجاتنی تصویر و عرض ایدەبیلمك امكانسز اولمقلە، اونی آنجق قلب و روح رونتگننە