[٣١٣]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] مرحوم شهید حسن فیضینڭ [اَللّٰهُ نُورُ السَّمٰوَاتِ] ایلە باشلایان اوزون مكتوبنی بر پارچە اختصار ایتدم. بعض یرلرینی چیزكیلر ایچنە آلدم. صاقین اطرافنە چیزكیلر چكیلن قسم یازیلماسین. متباقیسنی هم عصای موسی، هم ذوالفقار مجموعەلرینڭ آخرلرندە الحاق ایدەبیلیرسڭز. خصوصًا ماكینە محصولاتنڭ آخرلرندە اولسە و مناسب كوردیگڭز طرزدە ویا داها مختصر اولارق الحاق ایدرسڭز.

[ثانیًا] آنطالیەدەكی اسكی و یڭی نورجیلرە چوق سلام ایدییورم. و او شهرلە چوق علاقەدار اولدیغم و حركات نوریە اورادە بویلە باشلامسی بنی چوق سویندیردی. اللّٰهە چوق شكر ایدییورز.

[ثالثًا] ماكینە ایلە چیقان مجموعەلرڭ باشندە یازیلاجق فقرە شودر: رسالۀ نورڭ بتون اجزالرینی ایكی سنە هم آنقرە، هم دڭزلی محكمەلری و اهل وقوفی تدقیقدن صوڭرە هم برائتمزە، هم عموم رسالۀ نور اجزالرینی بڭا تسلیمە متّفقًا قرار ویرمەلرینە بناءً، نشرلرینە بر مانع یوقدر. بڭا ویریلن رسالۀ نوردن بریسی، بو مجموعەنڭ اجزالریدر.

[رابعًا] ذوالفقارك اسپارطەدە هم مكتبلردە، هم جامعلردە دین لهندەكی اجراآتلر، معنوی فتوحاتی صاییلابیلیر. ان شٓاء اللّٰه اسپارطە ناصل نورلرڭ مدرسەسی اولمش، باشقە ولایتلرە دە درس ویرییور، ان شٓاء اللّٰه شعائر اسلامیەدە دە برنجی حسن مثال و نمونۀ امتثال اولاجق.

[بر حاشیە] اهل سیاستە هیچ باقمدیغم حالدە بوكون تصادفًا قولاغمە كیردیكە، جامعلری قالدیرمق ایچون مجلسدە، بر قسم مبعوثلر چالیشمشلر. عین وقتدە بنی تسمیم و حسن فیضینڭ ئولوم خستەلغی تصادفە بڭزەمییور. بو اوچ سٓوء قصد عین زماندە بربریلە علاقەدار كورونویور. ایكیسی شیمدیلك عقیم قالدی، بریسی بر قهرمان آلدی

سعید النّورسی

خسروڭ مكتوبندە بو فقرە دار الفنون اسمی اونیورسیتەیە تبدّلندن مژدەلی بر معنایە دائر اولمەسندن لاحقەیە كیرسین.

اونیورسیتە كلمەسنڭ "نور" و "نورسی" اسمیلە مناسبتی بیان ایدیلدیگندن، بو عالی مكتب، نظرلردە یوكسلن بو عالی لوحەسیلە دییوركە: "شیمدی بن بڭا باقیلمایان اسكی اسممی بیراقدم. چوقدنبری آه ایدوب حسرتنی چكدیگم ای نور، سنڭ اسمڭی آلدم. غربڭ نوریڭی بوغان ظلمتلری ایچندە ایڭلەیەرك سنی بكلردم. ایشتە بوكون سیلكینوب او ظلمتدن اشراق ایدن نوریڭە وصلت ایچون شرقە قوشوب كلدم. براز بڭا دقّت ایتسەڭ، اسممڭ اورتەسندە

"نور" اسمنی كورورسڭ. داها براز دقّت ایدوب ایلرلەسەڭ، "نورسی" لقبنی چابوق بولورسڭ. او نورسلی نورڭ، نورلی استادینە بڭا كلن بیڭلرلە ذكالی كنچ ازلدن مفتون [یَا رَبَّنَا یَا نُورَ النُّورِ یَا خَالِقَ النُّورِ] نورسلی سعید قولڭلە ویردیگڭ نوریڭە بنی قاندیر. بر پارچە رفاه ایچون "آه" ایدن اولاد وطنی نورڭلە رفاهە قاندیر. "دییور.

چوق قصورلی طلبەڭز خسرو

[٣١٤]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] بو شدّتلی مادّی و معنوی قیشڭ، صیقینتیلی مادّی و معنوی خستەلغی وقتندە دنیادن مفارقت و پك چوق علاقەدار اولدیغم نورجی قرداشلرمدن افتراق احتمالندن كلن ألملر بنی صیقاركن، بردن صدّیق سلیمان، نور سانترالی صبری، عموم او حوالیدەكی قرداشلرم نامنە و نسبی اقربالریمڭ دە حسابنە، عبد المجید و عبد الرحمن معناسندە بورایە كلدیلر. جناب حقّە شكر ایدییورم. اونلرڭ كلمەسی، بر پانزهر حكمندە بڭا علاج اولدی. بن دە بورادەكی عادتمە مخالف اولارق نە اولورسە اولسون یانمە دعوت ایتدم، كلدیلر. ایكی اوچ

ساعت قدر تام بتون مراقلریمی، خصوصًا بارلەدەكی دوستلریمڭ حاللرینی آڭلامقلە، بارلەدەكی اسكی زمانمە مسرورانە بر سیاحت معنویەیی خیالی یاپدق. اوندن بر فرح، بر انشراحلە الیم صیقینتیلرم زائل اولدی. اونلری بر ایكی كون بورادە بیراقمق ایستردم. فقط بو فنا زمان و بورانڭ اوهاملی وضعیتی مساعدە ایتمدی. بو ایكی قرداشمزی، عمومڭزڭ حسابنە قبول ایتدم. و كندیمە بدل، عمومڭزە ایكی جانلی مكتوب اولارق كوندردم.

[ثانیًا] ایكنجی كون، چوق زیادە مراق و علاقە پیدا ایتدیگم دار الفنون كنچلرینڭ، اونیورسیتە طلبەلرینڭ نامنە، شیمدیدن طقوز دانە حقیقی نورجی و كوچك صلاح الدّینلر و عبد الرّحمنلر نوعندە دار الفنونڭ تنویرینە جدّی چالیشدقلرینی بیلدیرن بر مكتوب آلدم. او كوچك عبد الرّحمنلر ایسە، مصطفی اوروچ، قونیەلی ضیا و صبرینڭ مخدوملری فیضی و مهدی و بهاء الدّین، عبد الرحیم و قسطمونیلی عمر و عزیز و شكری و صبری كبی جدّی كنچ نورجیلر، نورلرە صاحب اولمەلری، مرحوم برادرزادەلرم عبد الرحمن و فؤاد یڭیدن اون دانە اولارق دنیایە كلوب وظیفۀ نوریەیە باشلامسی كبی بنی هم سویندیردی، هم خستەلغمی دە خفیفلشدیردی.

[ثالثًا] ذوالفقارڭ موفّقیتلە ماكینە ایلە ختامە یاقینلاشمسی، نورجیلر بلكە بتون مملكت ایچون بر سعادتدر. بو سعادتی الدن قاچیرمامق ایچون، نە قدر احتیاطلی تدبیرلر وارسە یاپارسڭز. اگر فرض محال اولارق، -ان شٓاء اللّٰه اولماز-

آیت الكبرایە یاپیلان تجاوز كبی بر آرامە اولسە، بتون نسخەلر تجاوزە معروض قالماسین. كرچە شیمدی تجاوز ایتمزلر و ایدەمزلر، بلكە مصالحەیە چالیشییورلر.. فقط كیزلی زندیقلر، كندیلرینی استقبالڭ لعنتندن قورتارمق ایچون، البتە بهانەلر آرایورلر و حكم اللرندە بولونانلری آلداتییورلر. اونڭ ایچون، حفظ و عنایت الٰهیەیە تام اعتماد ایدرك احتیاط ایدیلملی. ان شٓاء اللّٰه ذوالفقار كندینی تجاوزدن محافظە ایدەجك و متجاوزلرڭ باشنی یا طاغیتاجق ویا ایمانە كتیرەجك.

[رابعًا] ذوالفقاردن صوڭرە، یا معنوی تاریخچۀ حیات مجموعەسی باشندە عصای موسی دەكی سكزنجی حجّت ایمانیە اولان مناجات و آخرندە اون ایكنجی نوطەدەكی حزین مناجات اولارق.. ویاخود اینەبولی، مادام عصای موسی یی یڭی حروفلە یازییورلر، سز دە اسكی حروفلە عصای موسی یی ماكینە ایلە یازارسڭز. طلسم مجموعەسی كرچە داها مناسبدر. فقط او مجموعە طلسملری بتون بیان ایتمەمش. داها چوق مهم طلسملر وار. بن دە وقت بولامییورم. خستەلق عارضەسی شیمدیلك مساعدە ایتمییور. ان شٓاء اللّٰه صوڭرە اوڭا دە چالیشاجغم. هر نە ایسە، سز بو اوچندن هانكیسنی مناسب كورورسەڭز اوڭا باشلارسڭز.

عموم قرداشلریمزە بیڭلر سلام و سلامتلرینە دعا ایدرز.

اَلْبَاقٖی هُوَ الْبَاقٖی

قرداشڭز سعید النّورسی

مرحوم معلّم حسن فیضینڭ بدلنە، دار الفنون كنچ طلبەلری پك جدّی نورە احتیاجلرینی حسّ ایدوب چالیشمەلرینە بر كوچك نمونە اولارق بو مكتوبلرینی سزە كوندرییورز.

[٣١٥]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق مبارك، چوق مشفق، استادم افندم حضرتلری،

لطف بویوردیغڭز كتابلریڭزی صوڭسز سوینچلر ایچندە آلدق. فقرە و سوزلری احتوا ایدن او كوزل مجموعەیی اوقودق. اشتراك اعمال اخرویە دستورینی و مرحوم حسن فیضینڭ كوزل یازیلرینی تصدیق و روح و جانمزلە اشتراك ایدییورز. ان شٓاء اللّٰه اعمال اخرویە دستوری، اخلاصلە چالیشان صادق رسالۀ نور شاكردلرینە جناب حقّڭ صوڭسز رحمت قاپولرینی آچمەسیلە بو امّت ایچون [رَحْمَةً لِلْعَالَمٖینَ] آیتنڭ بر جلوەسنە مظهر اولور. بو زماندە شریعتڭ مادّی و معنوی احتیاجاتی او قدر آرتمشدركە، سعادت ابدیەسنی قزانمق ایچون ألندە جزئی بر سرمایە ایلە دنیایە كوندریلن ضعیف انسان، اگر عجزی، فقری ایلە برابر او سرمایەیی ابدی سعادتنە مدار اولاجق معنوی بر شركتە ویرمز دە كندینە كوونیرسە، او معنوی تجارتدە قزانمق احتمالی پك آزالیر. اگر اخلاص دائرەسندە

او معنوی شركتە اشتراك ایتسە پك چوق كارلیدر. بالخاصّە رسالۀ نور طلبەلرینڭ آز اولدیغی شو زماندە قرآن حكیم و ایمان حقائقنڭ نشرندە خدمت ایتمك، هركسە میسّر اولمایاجق بر معنوی قزانچ و فضیلتدر.

رسالۀ نورڭ خدمتندە قوللانیلمەسنە مقابل، آتیدە نور فتوحاتنی تام یاپدیغی زمان، بتون اهل ایمانڭ خیر دعالری اعمال دفترینە ایشلنەبیلسین. بوندن بویلە رسالۀ نورە خدمتدە غایە صرف رضای الٰهی اولملیدر. هم عموم رسالۀ نور شاكردلری هر خصوصدە دعا و همّتە محتاج بزم كبی كناهكار و فقیر طلبەلرە خدمتلرینی تام یاپابیلمەسی ایچون دعالری عند الٰهیدە قبولە شایان اولسون. رسالۀ نور، فتوحاتنی كندینە مخصوص فوق العادە بر طرزدە یاپییور و یاپاجقدر. یالڭز بز بو ایشتە عادی بر واسطە اولابیلیرز. رسالۀ نور هیچ بر شیئە آلت اولاماز و ایدیلەمز. اونڭ طلبەلری اوڭا یاراشاجق بر طرزدە صافیلگنی محافظە ایتملیدر. عموم اونیورسیتە طلبەلری، بالخاصّە قونیەلی ضیا، فیضی، مهدی، بهاء الدّین عبد الرحیم و قسطمونیلی عزیز و عمر وسائرە و بو عاجز طلبەڭز اللریڭزدن أوپر، صحّت و عافیتلر دیلرز.

اونیورسیتە نورجیلری نامنە دعاڭزە محتاج مصطفی اوروچ

[٣١٦]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] ایكی مبارك علیلرڭ طوپلادقلری طلسمات قرآنیەنڭ كشافلری اولان پارچەلری مطالعە ایتدم. او طلسملر مجموعەسنی حقیقتًا چوق اهمّیتلی و چوق كوزل كوردم. عموم خلقە دگل، عالملرە و معلّملرە چوق لزومی وار. او مجموعەیی تصحیح ایتدم. سزە كوندرەجگم، مناسب كوردیگڭز زمان ماكینەڭزلە، اگر ماكینەڭز و خسروڭ قلمی كافی كلمییورسە طاهری و كوچك علینڭ اشتراكیلە، قابلسە باشقە یردن بر امانت ماكینە ایلە یازیلسین. یالڭز ایچندەكی یگرمی ایكنجی سوزڭ حكایۀ تمثیلیەسی، ذاتًا عصای موسی دە وار، یازیلماسین. ایكنجی مقامی ایسە توحیدڭ طلسملرینی آچار. اگر سز مشورتلە مناسب كورسەڭز یازارسڭز. یوقسە او دە قالسین. یگرمی یدنجی سوز اولان اجتهاد بحثی شیمدیلك یازیلماسین. و صحابە حقّندەكی ذیلی یازیلسین. بو مجموعەیە داها مناسب كوردیگڭزی علاوە ایدەبیلیرسڭز.

[ثانیًا] ایكنجی اسپارطە اینەبولی قهرمانی نظیف چلبیدن بر مكتوب آلدم. یازمقدە اولدقلری ذوالفقارڭ داها صحّتلی و خطادن سالم اولمسی و او سزڭ یازدقلریڭزڭ اصولڭزە كورە یازیلمەسی ایچون اسپارطە قهرمانلرینڭ یازدقلری

ذوالفقار صحیفەلرندن كوندریلمەسنی رجا ایدییور، سز اوڭا لازم اولان ماكینە محصولاتندن كوندریڭز.

[ثالثًا] زغفرانبولیلی مصطفی اوسمانڭ چوق اهمّیتلی بر جناحی و ایكنجی بر حسن فیضی اولان معلّم احمد فؤادڭ ذوالفقارڭ طبعی ایچون تبرّعنە مقابل، شهید مرحوم حافظ علینڭ تمام رسالۀ نور نسخەلرینی كوندرمك، مناسب كورمشسەڭز، سز مشورتلە نە مناسب كورمشسەڭز بن راضی یم، چوق مناسبدر. رأفتڭ تصحیح ایتدیگی عبد اللّٰه چاوشڭ یازدیغی ذوالفقاری دخی اوڭا كوندرەبیلیرسڭز.

[حاشیە]

اَلْبَاقٖی هُوَ الْبَاقٖی قرداشڭز سعید النّورسی

طلسم مجموعەسنڭ باشنە یازیلاجق اولان پارچە

كائناتڭ معظّم طلسمنی و مغلق معمّاسنی آچان قرآن معجز البیانڭ یوزر طلسملرینی، یینە قرآنڭ فیضیلە رسالۀ نورڭ كشف و اثبات و ایضاح ایتدیگی دین طلسملرندن و معمّالرندن اڭ اهمّیتلی قسمی بو طلسملی مجموعەدر.

تفصیلات ایكنجی مكتوبدەدر.

صفر / ٢ صحیفە / ١

[٣١٧]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] حدسز حمد و شكر ارحم الراحمینەكە، سزلری ذوالفقارڭ خدمتندە موفّق أیلەمش. ختامە یاقینلاشمەڭزی بتون روح و جانملە تبریك ایدییورم. ان شٓاء اللّٰه نورڭ داها چوق مجموعەلرینی یازمەسنە موفّق اولورسڭز. باشدە مناجات و آخرندە تنسیبڭزلە دڭزلی مدافعەنامەسی درج ایدیلن معنوی تاریخچۀ حیات مجموعەسی ایلە و سزە كوندرەجگم طلسملر مجموعەسی، ایكیسی اوّل یازیلسین. اگر ایكیسی برابر اولمازسە، طلسملی مجموعە تقدیم ایدیلسە مناسبدر. صوڭرە سكّۀ غیبی و لاحقە و سزڭ مناسب كوردیگڭز مجموعەلر، اینەبولی و داها یڭی میدانە چیقاجق قهرمانلرلە تشریك مساعی و تقسیم الاعمال ایلە یازدیریرسڭز. بتون چكدیگمز صیقینتیلری و اضطرابلریمزی هیچە ایندیریرسڭز. بلكە او ألملری سرورلرە، لذّتلرە چویریرسڭز.

[ثانیًا] قهرمان نظیفڭ اینەبولی فداكار قرداشلریلە مكمّل چالیشمەلری، خصوصًا ایكنجی بر صلاح الدّین اولان كوچك ابراهیم، كندی خانەسنی كیجەدە نورلرە درسخانە یاپمەسی و سائر فداكار آرقداشلری ذوالفقارڭ تصحیحاتنە و سائر خدمتلردە و لغتلرڭ ترجمەلرندە و خطا صواب- جدولی یاپمقدە شوق ایلە

چالیشمەلری نور دائرەسنی، بلكە بو مملكتی منّتدار ایدییور. جناب حق اونلری موفّق أیلەسین. و اونلردن ابدیًا راضی اولسون. آمین.

نظیفڭ بعض نقطەلردە (سورة العلق) ە عائد رمزدە "ایكی لطافت، نسخەلریمزدە و فهرستەدە یوقدر." دیر صورویور. بنم یانمدەكی نسخەلردە دە یوقدر. عجبا [اِنَّ الْاِنْسَانَ لَیَطْغٰی] یە عائد محرم سرّە دائر اولمەسندنمیدركە، یازمامشم؟ ویاخود بن یازمشم، مستنسخلر سهو ایتمشلر، دییە شیمدیلك بیلەمییورم. ذاتًا معنا بوزولماسە، بویلە كوچك نقصانلر و دقّتلە آڭلاشیلاجق نقطە و حرفلردەكی سهولرڭ او قدر اهمّیتی یوقدر. بیڭ بارك اللّٰه، نظیف حسّاسیتلە، بلكە عصبیّتلە دقّتلی و اهمّیتلی یازییور. ما شٓاء اللّٰه، او قرداشمزڭ زیادە حسّاسیت و عصبیّتی و احتیاطی، كرچە بر درجە كندی استراحتنە طوقونور، فقط رسالۀ نورڭ خدمتندە تام فائدە ویرییور، ضررلرە مانع اولویور.

[ثالثًا] حقیقتًا مرحوم حسن فیضی كبی آز زماندە چوق خدمت ایدن و نورلرە قارشو پك چوق جدّی علاقەدار اولان مصطفی اوسمانڭ خدمتنڭ مقبولیتنە بر دلیل اولارق، حسن فیضینڭ و اونڭ روحلرندە و صداقتلرندە ایكی معلّم اولان احمد فؤاد و مصطفی صونغور و ایكی یوكسك طلبە اولان مصطفی اوروچ و رحمی یی بولمسی و رسالۀ نورڭ او قوّتلی اللرلە خدمتنە چالیشمەسی، او حوالی ایچون بیوك بر سعادتدر.

هم بعض جملەلری تعدیلاتلە برابر لاحقەمزە كچیردیگمز مصطفی اوسمانڭ و

معلّم مصطفی صونغورڭ مشترك عجیب مكتوبلری كوسترییوركە، مرحوم حسن فیضی نوعندە بر سنبل اورادە انكشافە باشلامش، ان شٓاء اللّٰه چوق بیچارەلرڭ ایماننی قورتاراجقلر. خصوصًا اونلرڭ ماهیتندە و اسپارطەنڭ كوچك معصوم قهرمانلرینە بڭزر رحمی نامندە، اون درت یاشندە بر مكتبلی چوجغڭ فداكارانە نورلرڭ درسلرینی غایۀ حیات بیلمسی، بزلری و نورجیلری جدًّا سویندیرییور. او حوالی ایچون كنچلرڭ قورتولمەسنە بر فال خیردر.

رسالۀ نورڭ ذوالفقار و سائر مجموعەلرڭ انتشاری ایچون بیوك یاردیملردە بولونان و مرحوم شهید حافظ علینڭ اڭ مكمّل طرزدە یازدیغی و نور فابریقەسندە تام چالیشقان بر آرقداشی و صادق بر وارثی اولان حافظ مصطفینڭ النە امانت بیراقیلان بتون رسالۀ نور اجزالری اونڭ النە كچمەسنی تأمین ایدن احمد فؤادی و امانتی اوڭا تسلیم ایدن قرداشمز حافظ مصطفی یی و زغفرانبولی مملكتنی و اورادەكی قرداشلریمزی روح و جانمزلە تبریك ایدییورز. ان شٓاء اللّٰه ذوالفقارە ویردیگی هر بر بانقنوطە مقابل، بیڭ كار كورەجك، بیڭلر خیرلرە مدار اولاجق. هم اوڭا، هم قرداشلرندن خطیب ابراهیمە، هم یڭی بر فداكار معلّم اولان مصطفی صونغورە و كوچك بر صلاح الدّین اولان رحمی یە و باشدە مصطفی اوسمان و حفظی اولارق اورادەكی بتون قرداشلریمزە سلام ایدرز.

[رابعًا] رسالۀ نورڭ اركانندن و مرحوم حسن فیضینڭ عین ماهیتندە و خارقە صداقتندە اولان خلیل ابراهیمڭ، حسن فیضینڭ وفاتی حقّندە هم بزی،

هم عموم نورجیلری، هم مملكتنی تعزیە ایدن كوزل مكتوبنی، هم احمد فؤادڭ مكتوبنی، هم ایكی مصطفینڭ وثیقە و اهمّیتلی مكتوبنی لاحقەیە یازدق و سزە دە كوندرییورز. و ذكائی و احمد فیضی "اسكی مقاملرینی تام محافظە ایدییورلر." دییە سلامملە تبلیغ ایدیڭز. و مژدەلی مكتوبڭزی آلدیغم عین زمانندە بزە مژدە ویریلدیكە، مكتبلردە دین درسلری اوقوناجق دییە رادیو سویلەمش.

اَلْبَاقٖی هُوَ الْبَاقٖی

عمومڭزە بیڭلر سلام و دعا ایدن خستە قرداشڭز

سعید النّورسی

لاحقەیە كیرسین.

[٣١٨]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

محترم، مبارك، معزّز، شفقتلی و فضیلتلی استادیمز افندیمز حضرتلرینە،

[اوّلا] (لِكُلِّ مُصٖیبَةٍ [اِنَّا لِلّٰهِ وَاِنَّٓا اِلَیْهِ رَاجِعُونَ]) رسالۀ نور قهرمانلرندن شهید مرحوم حافظ علی افندینڭ رفاقت معنویەسنە بو دفعە واصل اولان حسن فیضی آغابگمزڭ ارتحالی، بزلری جدًّا متأثّر أیلەمشدر. باشدە سز استادیمز افندیمز اولدقلری حالدە، بتون رسالۀ نور طلبەلرینە و كندیسنڭ منسوب اولدیغی مادّی و معنوی افراد عائلەسنە و مدرسۀ نوریەسنە و دڭزلی خلقنە تعزیتلریمی

بیلدیرر و تأثّرلریڭزە اشتراك أیلرم. و ناچیز معنوی هدیەلریمی درگاە الٰهیّەیە تقدیم أیلركن، غریق رحمتلر احسان بویورمەسنی نیازلردە بولونورم. [كُلُّ نَفْسٍ ذَٓائِقَةُ الْمَوْتِ] فحواسنجە، بو عالمدن عالم ارواحە كوتوردیگی، [وَالَّذٖینَ اٰمَنُوا وَعَمِلُوا الصَّالِحَاتِ لَنُبَوِّئَنَّهُمْ مِنَ الْجَنَّةِ غُرَفًا تَجْرٖی مِنْ تَحْتِهَا الْاَنْهَارُ خَالِدٖینَ فٖیهَا ط نِعْمَ اَجْرُ الْعَامِلٖینَ] آیت سبحانیەنڭ اشارات بویوردیغی اجرِ نعیم، برائتنە مظهریتندن طولایی كندیسنە تبریك أیلرم، و قهرمانلر اوجاغندە بیراقدیغی بوشلغە داها چوق حسن فیضیلر سنبل ویرمەسنی، الطاف الٰهیەدن تضرّع و نیاز أیلرم.

محترم افندم، مسموعاتمە نظرًا، دڭزلیدە بوندن یتمش سكسان سنە اوّل، بیوك بر اولیادن حسن فیضی اسمندە بر ذات، بر كون طلبەلرینە: بوكون كردستاندە بر اولیا دنیایە كلدی، دییە بشارتدە بولونمقلە ذات دولتلرینی اشارت بویورمش. بَعْدَهُ دڭزلی یە باشقە باشقە پردەلرلە تشریفڭز، او ذاتڭ روحنی شاد و اعزاز ایچون اولدیغنی تلقّی ایتمشدم. و آز زمان صوڭرە عین اسمدە متوفّی حسن فیضی افندینڭ رسالۀ نورە حرمتلە برنجی حسن فیضی یە امتثالاً استقبال ایتمسی و نورلرە تعشّقلە ادخال انوار اولمسی، بو قناعتمی قات قات زیادەلشدیردی. شیمدی دە دوشوندم: برنجی حسن فیضینڭ وفاتندن صوڭرە سعید یتیشدی.. و نامنە بیراقدیغی ایكنجی حسن فیضی دە وظیفەسنی یاپدی.. و نورلرە غرق اولارق و یرینە بیراقاجغی چوق حسن فیضیلر دە وظیفە باشنە دعوت ایدوب حیاتە وداع ایتدی.