[٢٢٠]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا

عزیز، صدّیق قرداشلرم،

قسطمونی خسروی و سلیمان رشدیسی اولان محمد فیضی و امینڭ، استادلرینڭ قسطمونیدەكی حیاتنڭ بر تاریخچەسنی، حسن ظن ایلە حدّمدن چوق فضلە ثنالرینی تبدیل ایتمەیەرك قبولمڭ سببی شودركە: بوكونلردە آفیونڭ بیوك مأموری، بر چاووشی بڭا اهانتە واسطە یاپوب، كویا توجّە عامّەیی حقّمدە قیرارق، تا بو ولایت، دڭزلی، اسپارطە كبی نورلرە تام صاحب چیقماسین و نورلر پارلاماسین. كرچە بن تحمّل ایتدم، فقط بورانڭ یڭی شاكردلرینڭ تأثّرلرندن متأثّردم. دوشونوركن، محمد فیضینڭ بو صمیمانە و عالمانە، حرمتكارانە مكتوبی، او حریفڭ و او آمرینڭ اهانتلرینی یوزلرینە اوروب هیچە ایندیرەرك، تأثّراتمی تام سیلدی، سوپوردی. بیڭلر درجە او ایكی بدبختدن یوكسك اولان ایكی نورجینڭ بویلە مدح و حرمتلری، اونلرڭ قانونسز جبر و اهانتلرینە عین زماندە تام تامنە توافقی، فیضی و امینڭ صداقتلرینڭ بر كرامتی اولدیغنی قناعت ایتدیگمدر.

س٭ع

رسالۀ نورڭ غایت اهمّیتلی بر شاكردی و چوق زمان سر كاتبی محمد فیضینڭ و سكز سنە سلیمانلر كبی صداقتلە نورلرە و بزە محمد فیضی ایلە برابر خدمت ایدن امینڭ بر فقرەلریدر. اونلرڭ خاطرلری ایچون هیچ ایلیشمدم. استادلری حقّندە چوق زیادە حسن ظنلرینی قیرمدم. عینًا لاحقەیە كچەبیلیر.

(٢٢١)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

بِعَدَدِ حُرُوفَاتِ رَسَٓائِلِ النُّورِ الْمَقْرُٓوئَةِ وَالْمَكْتُوبَةِ

چوق سوكیلی، چوق قیمتدار، چوق مشفق استادیمز افندیمز حضرتلری،

[اوّلا] لیلۀ معراجڭزی تبریك ایدر، ال و آیاقلریڭزدن أوپر، قصوریمزڭ عفوینی رجا ایدرز.

[ثانیًا] استادیمزڭ ترجمۀ حالنە مراق ایدنلرە دیرزكە: قرآن حكیم اوتوز اوچ آیاتنڭ اعجازكار اشاراتیلە، امام علی رضی اللّٰه عنه جلجلوتیە و ارجوزەسندە كرامتكار دلالاتیلە، غوث اعظم قدّس سرّە بشارتكار بیاناتیلە، استادیمزڭ حقیقی ترجمۀ حالنی و رسالۀ نورڭ حقیقی ماهیّتنی بیان ایتمشلر. استادیمزڭ شخص معنویسنی بیلمك ایستەینلر، رسالۀ نورڭ اشارات قرآنیە و كرامات علویّە و كرامت غوثیە رسالەلرینی، اگر ممكن اولورسە رسالۀ نورڭ سائر اجزالرینی دقّتلە تتبّع ایتمەلری لازمدر.

یالڭز بزم استادیمز حقّندەكی قناعت قطعیەمز شودركە: اسم نور و اسم حكیمە مظهریتلە قرآن حكیمڭ خزینەسندن نائل اولدیغی حقائق و معارفی، یگانە تحدیث نعمت مقصدیلە بشرە اعلان ایدن بو علّامۀ ذوفنون بدیع الزّمان حضرتلری اخلاق محمّدیە علیە الصّلاة والسّلام ایلە تخلّق ایتمش، نفس و هوا برزخلرندن كچمش، مكارم اخلاقڭ اڭ ممتاز و مستثنا بر تمثال مجسّمی اولارق بو عصردە بولونمش. شیمدی یە قدر بتون حیاتندە شایان حیرت بر علوّ همّت و سكینت و عفّت و محویّت ایچندە یاشامش. غنای قلبی، توكّل و قناعتی خارق العادە، معیشت و قیافتی پك سادە و مكارم اخلاقی پك فوق العادە، دنیایە ذرّە قدر میل محبّت ایتمز.

هم اویلە بر طرزدە عزّت علمیەیی حیاتندە محافظە ایتمشكە، اصلا كیمسەیە عرض افتقار ایتمەمك حیاتنڭ مهم بر دستوریدر. دنیا كندیلرینە توجّه ایتمش دە اوندن یوز چویرمش اولان استادیمز، امر معاشدە جناب حقّڭ عنایتیلە عفّت و نزاهتنی دائما محافظە ایدر. صدقە، زكات و هدیەلری آلماز. بز یقینًا بیلییورزكە، قسطمونیدە بولوندقلری زمان اوتوردقلری أوڭ ایجارینی ویرمك ایچون یورغاننی صاتدیلر دە، یینە هیچ بر صورتلە هدیە قبول ایتمدیلر.

هم استادیمز تكلّف و تعظّمدن اصلا خوشلانماز. و طلبەلرینڭ دە تكلّف قیدندن آزادە اولمەلرینی امر ایدر. و بویورورلركە، تكلّف شرعًا و حكمتًا فنادر. چونكە تكلّف سوداسی، انسانی حدّ معروفی تجاوزە سوق ایدر. متكلّف اولانلر

بعضًا خودبینانە بر تظاهر و تفاخر طوری و موقّت و صوغوق بر ریاكار وضعیتی طاقینمقدن قورتولماز. حالبوكە بونلرڭ ایكیسی دە اخلاصی زدەلر.

هم استادیمز غایت متواضع، تفوّق و تمیّز داعیەلرندن، شهرت سودالرندن زیادەسیلە صاقینیرلر. كندیلرینە مخصوص صافی مشربی، او كبی جان صیقاجق شیلردن عالیدر. هركسە هلە اختیارلرە و چوجقلرە و فقرالرە رفق و ملایمتلە، اخوّتكارانە بر معاملۀ خالصانەدە بولونورلر. مبارك یوزلرندە مهابت و بشاشتلە قاریشیق بر نور وقار لمعان ایدر. هیبتلە برابر، آثارِ اُنْسْ و الفت دخی كورونور دائما متبسّم بولونورلر. فقط بعضًا تجلّیاتڭ مقتضاسی اولارق مهابت و جلال نظری او درجە تظاهر ایدركە، آرتق او زمان یانندە بولونوب دە سوز سویلەمك ایستەین آدمڭ عادتا دیلی طوتولییور دە، نە دیمك ایستەدیگی آڭلاشیلمازدی. بو عاجزلر چوق دفعە بو حالی مشاهدە ایتدك.

استادیمزڭ آز سویلەمك عادتیدر. فقط سویلەدیگی وجیز سوزلر هر حالدە دستور حكمت اولارق پك معنیدار، پك شموللی، برر جامع الكلمدرلر. استادیمز نە كیمسەیی ذمّ ایدر و نە دە یانندە كیمسەیی غیبت ایتدیرر. بونلردن اصلا خوشلانماز. قصور و خطالری ستر ایدرلر. هم او قدر حسن ظنّە مالكدرلركە، حتّی كندیسی حقّندە بر ناسزا سوز تبلیغ ایدنە، حاشا بو یالاندر، بو سوزی سویلەدی دیدیگڭ ذات، بویلە سوزی سویلەمز بویورورلر.

استادیمزڭ نفسلە مجاهدەدە او درجە بر رسوخ و اختصاصی واردركە، اصلا حظوظات نفسانیەلرینە خدمت ایتمزلر. بر انسانە كافی كلمەیەجك قدر آز ییرلر و آز اویورلر. كیجەلردە صباحە قدر جالب رقّت بر حال خاشعانە ایلە عبودیتدە بولونورلر. یاز و قیش بو عادتلری تخلّف ایتمز. تهجّد و مناجات و اورادلرینی اصلا ترك ایتمزلر. حتّی بر رمضان شریفدە، پك شدّتلی خستەلقدە، آلتی كون صوم وصال ایچندە عبودیتدەكی مجاهدەلرینی ترك ایتمەدیلر. قومشولری هر زمان دیرلركە: بز سزڭ استادیڭزی سكز سنە، یاز و قیش كیجەلری، عین وقتلردە صباحە قدر حزین و مُحْرِقْ صداسیلە مناجات سسلرینی دیڭلر، بویلە فاصلەسز دواملی مجاهدەسنە حیرتلر ایچندە قالیردق.

هم استادیمز طهارت و نظافت شرعیەیە صوڭ درجە رعایت ایدر. هر زمان آبدستلی اولارق بولونور. اصلا مبارك وقتنی بوش كچیرمز. یا رسالۀ نور تألیفیلە ویا تصحیحیلە مشغول ویا مناجات جوشنیەیی قرائت ویا سجدەكاە عبودیتدە قائم ویا تفكّر آلاء الٰهیە بحرینە مستغرق بولونوردی. اكثریتلە یاز زمانی شهرە اوزاق اورمانلق طاغ واردی، استادیمزلە اورایە كیدردك. یولدە هم رسالۀ نوری تصحیح ایدرلر، هم بو عاجز طلبەلرینڭ اوقودقلری رسالەیە دقّت ایدرلر. تصحیح ایچون خطالرینی سویلرلر. ویاخود اسكی مؤلّفاتندن بریسندن درس ویررلر. بو صورتلە یولدە بیلە مبارك وقتنی وظیفە ایلە كچیریرلردی. اوت، بز اعتراف ایدییورزكە، استادیمزڭ نطقندەكی لطافت و

الفتندەكی حلاوت او درجە فیض بخش ایدردیكە، انسان صباحدن آقشامە قدر او وضعیتدە درس آلسە یول یوروسە، اصلا صیقیلمق احتمالی یوقدی.

هم استادیمز رسالۀ نورڭ خدمتنی هر شیئە ترجیح ایدرلر و بویورورلردیكە، یگرمی سنەدر قرآن حكیمدن و رسالۀ نوردن باشقە بر كتابی نە مطالعە ایتمشم و نە دە یانمدە بولوندیرمشم. رسالۀ نور كافی كلییور. اوت، فیّاض مطلق طرفندن بتون حقائق قرآنیە قلب منوّرینە الهام و القای كلّی ایلە افاضە اولونور دە قرآن معجز البیاندن باشقە نەیە محتاج اولور. بوندە شبهەسی اولانلر، رسالۀ نورە دقّت ایتسینلر.

جناب حق استادیمزە رسالۀ نورڭ تألیفندە اویلە بر اقتدار بدیع احسان ایتمشدركە، بو هركسە نصیب اولاجق خصلتلردن دگلدر. او كوزلم نور رسالەلری هر بری غربتدە، هم خستەلق ایچندە، طاغدە، باغدە، كاتبسز، تحمّلی مشكل غایت آغیر شرائط داخلندە، ظاهری نیجە مشكلاتلرلە میدانە كلمش دە مؤمنلرڭ امدادینە یتیشمشلردر. فقط جناب حقّە حدسز شكر اولسونكە، عنایت الٰهیە خارقە بر طرزدە استادیمزە فوق العادە بر موفّقیت احسان ایتمشدر.

ایشتە بو سردندركە، جناب حق استادیمزە كائناتی بر كتاب، سما و ارضی برر صحیفە كبی كشف و شهودلە بِحَقِّ الیقین اوقویاجق بر اقتدار ویرمش. محض عنایتیلە بویلە قدسی بر اثرە صاحب قیلمشدر. اوت آیات تشریعیەیی حاوی

قرآن معجز البیانڭ حقائق و معارفنی و آیات تكوینیەیی شامل، كتاب كبیر كائناتڭ وظائف و معانیسنی بیان ایدوب معرفت اللّٰهڭ اڭ یوكسك درجاتنە عروجە نوع بشری تشویق ایدن و بوكونكی كوندە ئولمگە یوز طوتان قلبلری بیلە اذن الٰهی ایلە اهتزازە كتیرەجك قدر خارقە بر اثر بدیعە، بر سَرَیَانِ سریعە اولان رسالۀ نورلە نشر حقائق ایدن بو وجود مسعودلە بشریت افتخار ایتمك لازم كلیركن، چوق غریبدركە، اهل شقاوت طرفندن زهر ویریلمەیە جسارت، طاش آتدیریلمەیە بیلە جرئت ایدیلییور. اوت، [اَشَدُّ الْبَلَٓاءِ عَلَی الْاَنْبِیَٓاءِ ثُمَّ الْاَوْلِیَٓاءِ] سرّیلە، انبیانڭ وارثی اولانلرڭ تورلی تورلی بلالرە اوغرامەلری حكمت الٰهیە اقتضاسندن اولمەسیلە، او زمرۀ مباركە كبی استادیمز دخی نیجە نیجە بلالرە هدف اولمشلر. حتّی قسطمونی یە ایلك تشریف ایتدكلری زمان چوجقلر بر بدبخت شقی طرفندن تشویق ایدیلوب آبدست آلمق ایچون چشمەیە چیقدقلری وقت، طاش آتدیرمشلر. فقط استادیمز دائما كوردیگی اذا و جفالرە، اُولُو الْعَزْمَانَە صبر و تحمّل ایدر، هم صفای صدرە و سلامت قلبە مالك اولدقلرندن او چوجقلرە دخی حدّت ایتمەیوب بویورورلردیكە: بڭا بونلر سورۀ یٰسٓ دن مهم بر آیتڭ نكتەسنی كشفمە سبب اولدیلر دییە اونلرە دعا ایدرلردی. صوڭرە بو چوجقلر استادیمزڭ دعاسی بركاتیلە شایان حیرت بر حال كسب ایتدیلركە، استادیمزی اوزاق یاقین نرەدە كورسەلر قوشارق یاننە كلیرلر، مبارك ألنی اوپرلر، دعاسنی آلیرلردی.

هم استادیمزڭ خارقە حالاتی و شایان حیرت غرائب احوالی، باشدە رسالۀ نور اولارق پك چوقدر. اوت، بز اعتراف ایدییورزكە، استادیمز بزم خاطرات قلبمزی بزدن زیادە اوقور، چوق دفعە بزی خبریمز اولمدیغی بر مسئلەدن شدّتلە تلاشلە ایقاظ ایدرلر، بزی حیرتدە بیراقیرلر، فقط كونلر كچدكدن صوڭرە عینًا استادیمزڭ ایقاظ ایتدیگی شیلە قارشیلاشیر، عقلمز باشمزە كلیردی.

بعضًا استادیمزلە طاغە كیتدیگمز زمان، داها شهرە دونمك زمانی كلمدن بردنبرە استادیمز قالقارلر. بزە دە امر ایدرلردی. حكمتنی صورمق ایستەدیگمزدە، عجلە كیدەلم، رسالۀ نور خدمتی ایچون بزی بكلەیورلر. حقیقتًا شهرە عودتمزدە مطلقا مهم بر رسالۀ نور شاكردی بزی بكلەمكدە ویا برقاچ دفعە كلمش كیتمش، قومشولر خبر ویررلردی.

یینە بر كون مولانا خالد حضرتلرینڭ كوچك عاشق نامندە بر طلبەسنڭ نسلندن مبارك بر خانم (او خانم آسیەدر) یانندە چوق سنەلردنبری محافظە ایتدیگی مولانا حضرتلرینڭ جبّەسنی رمضان شریفدە تبرّكًا استادڭ یانندە قالسین دییە فیضی ایلە كوندریر. استادیمز همن امین قرداشمزە ییقامق ایچون امر ایدرك جناب حقّە شكر ایتمەیە باشلار. فیضینڭ خاطرینە كلیركە: بو خانم بنم ایلە یگرمی كون ایچون كوندردی. استادم نەدن صاحب چیقییور؟ حیرتلر ایچندە قالیر. صوڭرە او خانمی كورور. فیضی یە دیركە: استادڭ هدیەلری قبول ایتمدیگندن بو صورتلە بلكە قبول ایدر دییە اویلە سویلەمشدم. فقط امانت اونڭدر.

جانمز دخی فدا اولسون دیر. او قرداشمزی دە حیرتدن قورتاریر. اوت، مبارك استادیمز، او جبّەیی مولانا خالددن صوڭرە وظیفۀ تجدید دین كندیلرینە انتقالنە ظاهر بر علامت تلقّی ایدرك بلا تردّد صاحب چیقمش اولملیدرلر. هم اویلە اولمق لازم. چونكە حدیث صحیحدە [اِنَّ اللّٰهَ یَبْعَثُ لِهٰذِهِ الْاُمَّةِ عَلٰی رَأْسِ كُلِّ مِائَةِ سَنَةٍ مَنْ یُجَدِّدُ لَهَا دٖینَهَا] بویورولمش. مولانا خالد حضرتلرینڭ ولادتی بیڭ یوز طقسان اوچ، استادیمز حضرتلرینڭ ایسە بیڭ ایكی یوز طقسان اوچدر. بو حدیثڭ تام ایضاحی رسالۀ غوثیەدە واردر.

یینە بر زمان فیضی، استانبولدە غایت جاذبەدار بر عالمڭ درسنە قاپیلارق اورادە قالمق نیت ایتمش. فقط عجبا استادم مساعدە ایدرمی؟ دییە متردّد ایكن، او كونلردە بورادن بر رسالۀ نور شاكردینڭ فیضی یە یازدیغی مكتوبنی استادیمز كورورلر. و او مكتوبڭ ذیلنە (استانبول اسكی سعیدی بیلیر. یڭی سعیدڭ قرداشی فیضی یی آلداتوب كندینە چكمەسین. رسالۀ نور راضی دگل) یازمشلر. فیضی استانبولدە بو مكتوبی آلنجە بردن آییلیر. عقلی باشنە كلیر. استادندن قصورینڭ عفوینی ایستر. یینە دڭزلی حپسی وقعەسندن اوّل آرا صیرە لطیفە طرزندە بزلرە، خصوصًا فیضی یە لطیفە طرزندە استادیمز بویورورلردیكە: جزاڭز وار. طوقات یییەجكسڭز، حپسە كیرەجكسڭز، دییە دڭزلی حپسمزی بزە رمزًا خبر ویروب، هم بزی ایقاظ، هم قبل الوقوع بو مهم حادثەیی كشفنی بیان ایدییورلردی. حقیقتًا چوق كچمدی، استادیمزڭ دیدیگی كبی چیقدی.

یینە دڭزلی حپسی حادثەسندن اوّل بویوردیلركە: قرداشلرم، چوقدندر سكز سنەدن فضلە بر یردە قالمامشم. شیمدی بورایە كلەلی سكز سنە اولویور. بو سنە هر حالدە یا وفات ایدەجگم ویا باشقە بر یرە نقل ایدەجگم دییە قسطمونیدن تشریفنی خبر ویرییورلردی. هم دڭزلی حپسی مصیبتندن اوّل استادیمز بویورویورلردیكە: قرداشلرم، رسالۀ نورە برقاچ جهتدە هجوم حسّ ایدییورم. زیادە احتیاط ایدیڭز. حقیقتًا چوق كچمدی. استانبولدە بر اختیار خواجە بیلمەیەرك بر رسالەنڭ بر مسئلەسنە اعتراض ایدییور. صوڭرە اسكی فتوا امینی مرحوم علی رضا أفندی حضرتلری او خواجەنڭ اعتراضنی رد و رسالۀ نورڭ حقّانیتنی تام تصدیق ایدییور. بر مدّت صوڭرە بردن حیوان ئوركوب استادیمزڭ مبارك باجاغی اینجیتدی. آیلرجە اضطرابلر ایچندە وظیفۀ عبودیتنی و رسالۀ نورڭ خدمت قدسیەسنی چوق مشكلاتلرلە ایفا ایدەبیلدی. صوڭرە تكرار طاغدە مدهش بر زهرلەمەدن غایت آغیر صورتدە خستە ایكن دڭزلی حپسی توقیفی میدانە چیقدی. فقط او فرد فرید، تحمّلی پك مشكل بو دهشتلی حالدە هم خدمت ایمانیە و قرآنیەدەكی عزم متیننی، هم عبودیتدەكی وظائفنی ایفایە صوڭ درجە غیرت ایدوب اصلا فتور كتیرمدن اُولُو الْعَزْمَانَە بر صبر ایلە اثبات ایدییوردی.

یینە استادیمز توقیفمزدن اوّل مكرّرًا بویورورلردیكە: اهل دنیا رسالۀ نورە ایلیشمەسینلر. اگر ایلیشیرلرسە آفتلرڭ هجومنە سبب اولورلر. حقیقتًا هركسجە دە

معلومدركە: رسالۀ نور شاكردلری توقیف ایدیلیر ایدیلمز، هر طرفدە آفتلر، زلزلەلر، خستەلقلر باشلادی. تا رسالۀ نورڭ حقّانیتی تصدیق اولونوب وطنە فائدەلی اولدیغی اعتراف ایدیلنجەیە قدر چوق یرلردە، ازجملە قسطمونیدە زلزلە دوام ایتدی. حتّی قسطمونینڭ تاریخی یوكسك قلعەسیكە، بعض رسالەلرڭ مدرسەسی حكمنە كچمشدی. رسالۀ نورە و مؤلّفی اولان استادیمزە اشتیاق و حسرتندن ماتم طوتوب، اڭ صاغلام كوكلی طاشلرینی آشاغی آتارق استادیمزڭ اخبار غیبیسنی مادّةً تصدیق ایتمشدر.

استادیمز توقیفمزدن مقدّم بویوردیلركە: رسالۀ نورە مدهش بر هجوم پلانی وار. فقط مراق ایتمەییڭز. مژدە و عنایت الٰهیە امدادیمزە یتیشەجك. شویلەكە: بوكون اوقومق ایچون حزب اعظم نوری یی آچمشدم. بردن قارشومە [وَاصْبِرْ لِحُكْمِ رَبِّكَ فَاِنَّكَ بِاَعْیُنِنَا وَسَبِّحْ بِحَمْدِ رَبِّكَ] آیتی چیقدی. معنًا، بڭا باق دیدی بن دە باقدم، كوردمكە: معناسنڭ چوق طبقەلرندن خصوصًا معنای اشاریسیلە و جفریسیلە هم حپس مصیبتنە، هم نجاتمزە اشارت و بزە بشارت ایدییور بویوردیلر. ایشتە دڭزلی محكمەسی برائت قرارینی ویرمزدن طقوز آی اوّل، بلا تردّد بو آیتڭ دفینەسندن آلدیغی جوهری اظهار ایدوب هم آیت كریمەنڭ مهم بر نكتۀ اعجازینی كشف، هم دە بو قوّۀ معنویەیە محتاج، ضعیف طلبەلرینی تبشیر ایتمكلە بزی مسرور أیلەمشلردر. بو آیتڭ تام ایضاحی دڭزلی مدافعەسندە و لاحقەدەدر.

نسخۀ نادرۀ زمان اولان استادیمز، غایت شجیع و متین و اُولُو الْعَزْمَانَە بر جسارت فوق العادەیە مالك بر لسان الحقدركە، حق یولندە سوز سویلەمكدن چكینمز. لوم لائمدن قورقمازلر. بر كون اسم اللّٰه یازیلی قبر طاشلرینی لاغیملر اوزرینە قوركن كورورلر. اورادە دنیاجە مهم ذاتلر دە حاضر اولدقلری حالدە، كیمسەنڭ سویلەیەمدیگی حقلی و فقط غایت آجی سوزلرلە او حقسز ایشە و داها باشقە مدهش حقسز ایشلرە سدّ سدید اولمشلردر.

هم مملكتمزدە هر كیم استادیمزی رنجیدە ایتمەیە جسارت ایتمشسە، رسالۀ نورە ضرر كتیرمشسە، مطلقا سٓوء عاقبتە اوغرامشلردر. بعضیلری دخالت ایدوب عقللری باشلرینە كلمش ایسە دە، بعضیلری جزالرینی چكمشلردر. بو وقعەلرڭ بعضیلری لاحقەدە یازیلمشدر.

[الحاصل] مبارك استادیمزڭ اوصاف كمالنی و محاسن احوالنی بزم كبی عاجزلرڭ بحقٍّ تصویر و تعریف ایدەبیلمەسنە امكان یوقدر. خالق ذوالجلال والجمال، استادیمزی بر وجود مستثنا اولارق یاراتمش. و توفیقِ الٰهیسنە مظهر قیلمشدر. نە سعادت اوڭاكە، خیر دعاسنە و فیض توجّهنە عرض احتیاج ایدر. مبارك استادیمز مملكتمزدە بولوندقجە فاصلەسز نشر حقائق أیلەمش. و بزم سعادتمز ایچون فیض بخش ایدن مبارك نَفَسنی صرف ایتمشدر. جناب ارحم الرّاحمیندن بتون روح و جانمزلە نیاز ایدرزكە، محشر كونندە دخی [اَلسَّعٖیدُ سَعٖیدٌ فٖی بَطْنِ اُمِّهٖ] حدیث شریفنە مظهر اولان استادیمز، دفینۀ علوم و فنون بدیع البیان،

علّامۀ بدیع الزّمان سعید النورسی حضرتلریلە برلكدە حشر ایتسین. تاكە: او قورقولی كوندە، نورلی، مشفق، مبارك ألیلە ألمزی طوتسون. حضور رسول اكرم علیە الصّلاة والسّلامە بزی كوتورسون ان شٓاء اللّٰە تعالی.

رسالۀ نور شاكردلرندن فیضی، امین

[٢٢٢]

بِاسْمِهٖ سُبْحَانَهُ

قرداشلرم،

شیمدی تبیّن ایتدیكە، بنی قرەقولە چاغیرمق، لزومسز بهانەلرلە بنی حكومتە جلب ایتمكدەكی مقصد، اهانت و خلقڭ نظرندە اهمّیتسزلگم و بڭا متّهَم وضعیتی ویرمك ایچون ایدی. شیمدی تحمّلم قالمدی. ممكن اولدقجە اورایە بنی چاغیرمامق لازمدر. جزا حاكمنی كوریڭز. بڭا بر دعوا وكیلی طرزندە بر آدمی بولیڭز. بنم بدلمە لزوم اولسە قرەقولە كیتسین. یگرمی بش سنە منزوی بر آدم، بویلە اهانتكار انسانلرلە كوروشمك، اشكنجەلی بر عذابدر. بن سكز سنە، قسطمونیدە بر تك دفعە والینڭ اصرار ایلە یاننە و ایكی دفعە دە پولیسخانەیە كیتدم. بورادە سببسز اون دفعەدن كچدی. بن داها كیدەمم. هم دوقتوردن بر راپور آلیڭز، یوقسە بو شهرە مادّی معنوی ضرردر. [حاشیە]

س٭ع

[٢٢٣]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

بِعَدَدِ عَاشِرَاتِ دَقَٓائِقِ شَهْرِ شَعْبَانَ وَرَمَضَانَ

عزیز، صدّیق قرداشلرم،

[اوّلًا] شیمدی تام تحقّق ایتدیكە، زلزلە رسالۀ نور ایلە علاقەداردر. خسروڭ، مدافعاتمدە یازیلان درت زلزلە مسئلەسنی تصدیق ایدن بو كیجەكی شدّتلی درت دفعە اولان زلزلەدر. بڭا و نورلرە و بو مملكتە قطعی بر سٓوء قصد اثری اولارق، حكومت ایچریسندە خدمتجیمە باغیرارق، شخصمە تحقیركارانە اهانت و شتم ایدوب "كیت، اوڭا سویلە!" دیین و قائممقامڭ امر جبریسی ایلە، "خستە دە اولسە بورایە كتیریڭز!" دییە بكجیلرە و ژاندارمەلرە امر ویرن.. و پردە آلتندە آفیونڭ بیوك مأمورینە طایانان امرطاغ ضابطەسی، هم بورادە نور شاكردلرینڭ شوقلرینە، هم نورلرڭ بورادە یازیلمەسنە، هم بڭا اهمّیتلی صیقینتی ویردیگی عین وقتدە، بورادە بویلە هیچ كورولمەمش بو شدّتلی زلزلەنڭ كلمەسی كوسترییوركە، رسالۀ نور، بر وسیلۀ دفع بلادر. تعطیلە اوغرادقجە بلا فرصت بولوب كلیر.

[ثانیًا] نورلرە آز زماندە چوق خدمت ایدن مصطفی اوسمانڭ غایت تواضعكارانە و محویتكارانە مكتوبی، تام اونڭ خالصانە صداقتنی و اخلاصنی اثبات ایدوب اون بش سنەلك خاصلرە اوموز اوموزە كلدیگنی كوستریر.