بو معصوم كاظمڭ باباسی سكز سنە صداقتلە سعید نورسی یە خدمت ایدوب برنجی صفدە نورلرە شاكرد اولمش. لاحقەیە كیرسین.

(١٦٦)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

پك محترم استادم حضرتلری، جد و اجداد، آنا و بابامدن سوكیلی استادم افندم، بالخاصّە عرض تعظیملرلە مبارك دست و دامن فاضلانەلریڭی اوپرم. عزیز استادم، شیمدی یە قدر نقصان بر دوشونجە، بندەڭزی شو طریق مستقیم و منوّردن كری بیراقدی. او خطام دە شودركە: عسكرلگمڭ یاقینلاشمسی طولاییسیلە هم او خدمتی یاپمق، هم وظیفۀ دینیەمی عارضەسز بر شكلدە ادا ایدەبیلمك، هم بر صنعت ایلە مجهّز اولمق آمالیلە، آنقرەیە اویلە بر فابریقەیە مقدّما كیتمشدم. بزم او حركتمزڭ یاڭلیش اولدیغنی، اورادن ایشە نهایت ویردیریلمك و حقیقی مقصدە شروع ایتمك ایچون جناب ربّ منّان، منبع نور اولان بارلەمزە كوندردی و نورلرە قاووشدیردی. شیمدی كمال خواهشلە دریای نورە طالوب یوزمەیە، خیری شرّی-، حقّی باطلی- سزمەیە للّٰە الحمد باشلادم. و نهایتسز فیوضاتە مستغرق اولدمكە، صباحدن آقشامە قدر یازییورم، طورمییورم. كون بكون شوقم تزاید ایدییور. حتّی آچلغمی دە حسّ ایدەمییورم.

یالڭز نماز وقتی شو چوق تجارتلی خرمانی بیراقییورم. عسكرلگم كلنجەیە قدر ان شٓاء اللّٰه عصای موسی یی دە اكمال ایتمەیە چالیشاجغم.

سوكیلی استادم، ایلك مطلع نور اولان مملكتمز شو بر ایكی سنە اوّلە قدر مع الاسف دور فترتە بڭزر بر حالە كلمشدی. شیمدی ایسە او ظلمتلی بلوط آلتندە محكوم و مغلوب كبی كورونن مملكتمزدە، نورجیلق شایان افتخار بر شكلدە پارلادی و تجسّم ایتدی. علیهدار كبی كورونن بر قسم شخصلر رسالۀ نورە توز بیلە قوندیراماز بر حالە كلدیلر. (اَلْحَمْدُ لِلّٰهِ هٰذَا مِنْ فَضْلِ رَبّٖی)

شایان حیرتدركە، دیندارلرە، خصوصیلە نورجیلرە یاپیلان تعرّضلر، یگانە شمس قرآنی پیدرپی سیسلندیرمك و سوندیرمك املیلە او عظیم جنایت ارتكاب ایدیلدیگی حالدە، جناب كبریا قات قات بر شوق و صارصیلماز بر غیرت ایلە حدسز طالبلری احسان بویورارق، او نیت فاسدە و مقاصد كریهەیی عقیم بیراقدی. "بر شمعەكە، مولا یاقا. اوفلەمكلە سونمز." قطعۀ معنیدارینی خاطرلاتدی.

عاجز بر طلبەڭز، بارلەدە مهاجر حافظ احمد مخدومی حافظ مصطفی كاظم

ما شٓاء اللّٰه، كاظم تام مكمّل قونوشویورسڭ. بن مراق ایتدم، عجبا بو كوزل یازی و افادە سنڭمیدر؟ بن اورادە ایكن سن كوچك بر چوجق ایدڭ. شیمدی اللی یاشندە، مدقّق، محاكمەلی بر نورجی طرزندە حسّ ایتدم.

سعید النّورسی

خانملرڭ بر خسروی اولان آسیەنڭدر. لاحقەیە كچسین.

(١٦٧)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

استادم افندم،

نورلی اللریڭزدن أوپر، راحتسزلغڭزڭ تمامیلە شفاسنی عاجزانە نیاز ایتمكدەیم. مولام كوزل أیلر ان شٓاء اللّٰه. مساعدەڭزلە، ابدی حیاتمە كوچمدن یازمغە مجبور اولدم. دنیا چلەلری، ماسوالر طولاییسیلە تقلیددە قالدم. لایقیلە قول اولوب معبودیمی بولامدم. حضرت قرآنڭ نورلریلە نورلانوب، سلطان انبیا افندیمزە لایقیلە امّت اولامدم. پیر پیرانڭ بندەسی اولوب، استغفار صوییلە پاك اولامدم. مقصدم، كوزل عمرم بوشە كیتمدن یوكسك همّتڭز، یوجە یوجە دعالریڭز ایلە یازدقلریمە نائل اولورم امیدیلە تسلّی اولمقدەیم. سزی ربّ العالمینە امانت ایدرم.

قرداشڭز آسیە

(١٦٨)

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق قرداشلرم،

[اوّلا] مصطفی اوسمانڭ مكتوبنی، چیزكیلر اورتەسندەكی قسمی، نورلرڭ توسّعنە دائر اولمەسندن لاحقەیە كیرسین. هم او كوزل خطّیلە یازدیغی عصای موسی مجموعەسنی بڭا كوندرمەسنە مقابل، بندن بنم تصحیحمدن كچمش بر دیگر نسخەیی ایستەیور. او هانكی واسطە ایلە كوندرسە، بز دە اوڭا كوندرەجگز. حقیقتًا او و رفقالری نورلرە تام باغلی و چالیشییورلر. خصوصی مكتوب یازامدیغمدن كوجنمەسینلر.

[ثانیًا] یشیل صالح بورانڭ قائممقام مقامی واسطەسیلە بڭا مكتوبلر یازدیغی سببلە، صوردیغی سؤآللر بر پارچە اونلری اوخشامق ایچون، بر قسمی اهمّیتسز و بر قسمی دە جوابی ظاهردر. بو ذات حقیقتًا بزملە زیادە علاقەداردر. شیمدی بو دقیقەدە چالیشقانلردن حسنە یازدیغی بر مكتوبنی كوردم. ایچندە دییور: سعید ایچون بن رئیسە و باش وكیلە مكتوب یازاجغم.

اَلْبَاقٖی هُوَ الْبَاقٖی

قرداشڭز سعید نورسی

نورلرە آز زماندە چوق خدمت ایدن مصطفی اوسمانڭ مكتوبیدر.

(١٦٩)

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

سوكیلی استادم،

زغفرانبولیدەكی فعالیت نور، نورڭ ساحۀ انتشارینڭ دیگر جبهەلریلە مقایسە ایدیلیرسە بر درجە دە اهمّیتسز بر حالدە ایسە دە، حقّڭ لطفنە و بر چكردكدن بیڭلر دانە ویرمك عنایت و حكمتنە طایانارق و نور ساحەسنڭ وقتیلە علم و عرفان منبعی اولان بو مملكتمزدە دە توسیعنە، قبولی محقّق اولان دعالریڭزی طلب نیّتیلە بر مقدار معلومات ویرییورز.

اوت، عزیز استادم. بزلر دە هر طرفدەكی قرداشلریمز كبی نورڭ معنوی فتوحاتنی مملكتمزدە كلّی اولارق مشاهدە ایدییورز. بو خصوصدە طلبەلر اوزرندەكی تصرّف، امداد، عنایت، وقایە، محافظە، صفوت قلب، جمعیت خاطر، نفی خواطر، دوام حضور، مجانبت اخلاق سیّئە، مقارنت اعمال حسنە وسائرە وسائرە كبی لطفلرندن بحثی زائد كورویورم.

عمومی اولارق ایسە، مملكتمز نورڭ دائرەسنە داخل اولالی هركسدە عبادات و طاعاتە دواملی بر میل و آرزو، خصوصًا چوجق و بیوكلردە و چوجغنە ایلك ایمان درسنی ویرەجك، اسلامڭ بناسنڭ تملنی یاورونڭ قلبنە

آتاجق اولان آنالردە، حتّی بالذّات كوردیگم طورون صاحبی اولمش دە قرآنی اوگرنمەمش ویاخود اونوتمش اولان ننەلردە قرآن اوقومغە و اوگرنمگە بر غیرت وار و أوگرنییورلر. (اَلْحَمْدُ لِلّٰهِ هٰذَا مِنْ فَضْلِ رَبّٖی)

عزیز استادم، ارككلرڭ غفلت و صاپدیغی شو دوردە قادینلرڭ چوبانی اویونە طالدیغندن، سفاهت و رذالت نسا سوروسنە صالدیردیغی بر هنگامدە، هنوز قلبلری ئولمەمش و اكثریتی تشكیل ایدن مؤمنات (ای نسوان! حیات باقیەڭزی ئولدیرمكلە قالمییورسڭز. اللّٰهڭ فطرت اسلامیە اوزرە یدلریڭزە امانت ایتدیگی و جانڭزدن چوق صیانت ایتدیگڭز، كوز ببگڭز یاورولریڭزی الڭزلە ئولدیرییور، حیات باقیەلرینی محو ایدییور، آتشە اللریڭزلە آتییورسڭز. بو یوزدن آیریجە شدّتلی عذابە كرفتار اولاجقسڭز!) ندای غیبیسنی دویمشلر كبی مولدلر وسیلەسیلە طوپلانارق، دواملی صورتدە وعظ و نصیحتلر ایلە بربرلرینی انتباهە دعوت ایتمەلری نە ایلە تأویل ایدیلەبیلیر؟ كیم بونڭ نورڭ فتوحاتی اولمدیغنی شو عجیب دوردە ادّعا ایدەبیلیر؟

حتّی أولردە قرآن خواجەلغی یاپان متعدّد قادینلرە علاوةً، بر دە رسمًا بر قرآن درسخانەسی آچیلمەسنە بعض اصحاب وجدانڭ غیرتی و بو وظیفەنڭ اهمّیتلی بر نور طلبەسنە تكلیفی و اونڭ دە مساعدە ایدیلیرسە قبول ایتمسی، ناصل نورڭ فتوحاتی دگلدر دییە انكار ایدیلیر؟

عزیز استادم، بو حاللر بویلە اولمقلە برابر، خسرو و طاهری افندیلر

قرداشلریمزڭ غیرت و همّتیلە مملكتمزە هدیە ایدیلن سوزلرڭ تمامنی و لمعەلری دواملی صورتدە مشتاقلرە و لایق اولان اللرە ویرییورز. حیرانلقلە اوقویورلر. بونلر آراسندە آرا آرا یازانلر دە وار. حتّی تقاعدە سوق ایدیلمەسیلە برابر دائرۀ ناردن قورتولوب، دائرۀ نورە دخالت ایدن بر معلّم قرداشمز محمد افندی، سوزلرڭ اون سكزینی یازدی. عصای موسی دە دە دردنجی حجّت ایمانیەلردە چوق دوام ایدییور. الحمد للّٰه، اوّلجە زیارتڭز شرفنە نائل اولانلر، عمومًا رابطە و علاقەلرینی شدّتلە محافظە ایدییورلر، اوقویورلر. بعضیسی دە آرا آرا یازییورلر. دواملی یازانلری دە وار، الحمد للّٰه.

سوكیلی استادم، مشتاقلر آراسندە حالاً عسكر بولونان، قرآن حروفاتی بیلمدیگندن نورڭ درسلرندن آنجق دیڭلەمكلە استفادە ایدەبیلن و صرف بو درسی آلمق ایچون آرا آرا اذنلی كلن زهدی اسمندە بر قرداش وار. بو چوجغی مملكتمزڭ بر كوچك علیسی اولاجغنی اینانییورم. عشق و شوقی و رابطەسی چوق قوّتلی و زیادەدر. یازی و قرآن اوگرنمەسی ایچون دعالریڭزی نیاز أیلرم. بو چوجغڭ باباسی دە اوقویور، بلكە آننەسی دە. چونكە آناسی قادینلرە وعظ و نصیحت ایدن بر صالحەدر. آرا آرا بزدن كتاب آلییورلر. هر حالدە نور دائرەسنە تمامًا كیرمەلری مطلوب اولان بر عائلەدركە، خانەلری مملكتمزڭ بر مدرسۀ نوریەسی اولابیلیر. بو خصوصدە دعاڭزی یالواریرم.

خدمتكاریڭز، نیاز مندیڭز مصطفی

[١٧٠]

یشیل صالحڭ چالیشقان حسنە استادیمز حقّندە یازدیغی مكتوبە مقابل استادیمزڭ یازدیغی مكتوبیدر.

عزیز قرداشم حسن افندی! سن بنم طرفمدن قیمتلی قرداشمز محمد صالح افندی یە یازكە، بن ئولنجەیە قدر اونڭ بو انسانیتنی اونوتمایاجغم. و اوڭا چوق منّتدارم و چوق سلام و دعا ایدرم. فقط بن هر صیقینتی یە قارشو تحمّلە قرار ویرمشم. هم بن اییلگی او رئیسلردن بكلەمییورم. هم استانبولە كیدن طاهری، بنم طرفمدن یشیل صالحە جانلی بر مكتوبدر.

اَلْبَاقٖی هُوَ الْبَاقٖی

قرداشڭز سعید النّورسی

[١٧١]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] طاهرینڭ استانبولە كیتمەسی، ان شٓاء اللّٰه خیردر. و خسروڭ پك چوق وظیفەلرینی تمامًا یاپمەسی، قناعتم كلدیكە، بارلەدە بولوندیغم زمان بتون یازانلرڭ تصحیحاتنی و تألیف خدمتنی یاپمقدە تحقّق ایدن بیوك عنایت و خارقە موفّقیت، عینًا خسرودە و یاردیمجیلرندە دخی نمونەسی وار.

[ثانیًا] طاهرینڭ [حاشیەجك] دڭزلی حپسندە اونوتولماز، خالصانە خدمتی ایلە و نورلرە صارصیلماز صداقتیلە و یاڭیلماز ذكاوتیلە و چكیلمز بهادرلغیلە، دائرۀ نوردە اهمّیتلی مقامی ایچون، بتون بو دفعەكی مكتوبنی لاحقەیە كچیردك. باشدە نورڭ شاكردلرندن والدەسی زبیدە اولارق، اقرباسنە و رفقاسنە سلام ایدرم. جناب حق اونلردن ابدًا راضی اولسون. آمین.

[ثالثًا] نسلاً قریشیلردن احمد قریشی، محترم پدریلە و عمّ زادەسی احمد ایلە نورلرڭ خاص ناشر و طلبەلرندن اولمسی، او حوالی شاكردلرینڭ نامنە نورلر حقّندە كوزل منظوم فقرەلری لاحقەیە كیردی. جناب حق اونلری موفّق أیلەسین. آمین.

[رابعًا] اگیردیر قصبەسندە، اسملرینی یازمدیغم غایت اهمّیتلی قرداشلریمز وار. اونلرە و محمد صبری كبی بیوك سانترالە استنادًا و صبرینڭ یازیسنە بڭزتدیگم دقّتلی و كوزل افادەلی بر مكتوبی چالیشقان و جدّی قرداشلریمزدن چلینكیر علیدن آلدم. اونڭ آرزوسیلە عیننی لاحقەیە كچیردك. اوڭا و اونی چالیشدیرانە ما شٓاء اللّٰه و وَفَّقَكُمُ اللّٰهْ دیرز.

[خامسًا] بو دفعە تكرار یشیل صالح، تاریخچۀ حیاتمە عائد اسكی و یڭی حپسمزە و تألیف اولونان نورلرە دائر اون اهمّیتلی سؤآللری صورویور. تا یازمقدە

اولدیغی بو عصرڭ تاریخچۀ علماسنڭ ایچندە یازسین. بن ایسە شیمدی باشمی قاشییاجق قدر وقت بولامییورم. سزلر و فیضی و عبد المجید و صلاح الدّین كبی نورلر نقطەسندە حیاتمی بیلن و تدقیق ایدنلر.. و اختیار و آیت حسبیە و تاریخچۀ حیات و اسكی و یڭی مدافعات رسالەلری جواب ویرسینلر. یشیل صالحە قارشو صحیفەدەكینی یازدم. سز دە آیری بر جواب یازارسڭز. عمومە سلام و سلامتلرینە دعا ایدرز.

اَلْبَاقٖی هُوَ الْبَاقٖی

قرداشڭز سعید النّورسی

شهید مرحوم حافظ علینڭ مبارك رفیقۀ ابدیەسی اُمُّ هانینڭ كندی یازدیغی و بزە هدیە ایتدیگی اوننجی سوزڭ ذیللریلە هر بر حرفنە مقابل، هم اوڭا، هم او شهیدە بیڭلر رحمت و حسنات دفترلرینە یازیلسین. آمین. یشیل صالحڭ سؤآللرینی سزە كوندردك.

استادیمزڭ یشیل صالحە یازدیغی مكتوبدر.

[١٧٢]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

عزیز، صدّیق، عالی جناب اسكی و یڭی قرداش یشیل صالح،

بندن، سركذشت حیاتمە عائد صوردیغڭ مادّەلرە غایت قیصە و مجمل

اشارت ایدیلەجك. بر زمان صوڭرە ان شٓاء اللّٰه باشقەلر ایضاحلە جواب ویرەجكلر. فقط تاریخە كچمك و بو عصر عالملرینڭ ایچندە كندی عادی شخصمی نسل آتی یە كوسترمك، بیلدیرمك، نە ایسترم و نە دە لیاقتم وار. جناب حقّە حدسز شكر ایدرمكە، بنی بڭا بگندیرمەمش. دهشتلی قصورلریمی بڭا كوسترمش.

هم انسانلرە كندینی بیلدیرمك، بر شهرتپرستلك اولمەسندن.. بر انانیت، بر خودفروشلق، بر ریاكارلق احتمالی وار. بو ایسە بزم كبیلرە تام ضرردر.

هم بن، مادام بو عصردە مادّةً و معنًا منفرد یاشامغە و حیات اجتماعیەدن چكیلمەیە مجبور اولمشم.. البتە حقّم یوقدركە، حیات اجتماعیەیی كچیرنلر ایچندە تاریخە بینوب استقبالدەكیلرە كورونەیم. یالڭز بو جهت واركە، رسالۀ نورڭ، بو وطنە و بو ملّتە پك بیوك منفعتی، محكمەلرڭ و اهل وقوفلرڭ متّفقًا قرارلریلە تحقّق ایتمش. بو نقطۀ نظردە، بنم اهمّیتسز، بیچارە، پریشان، چوق قصورلی شخصیتم دگل، بلكە یالڭز قرآنڭ مالی و مأٓلی اولان رسالۀ نور نامنە، سزڭ سؤآللریڭزە جواب ایچون بن اشارتلر ایدرم، صوڭرە دە رسالۀ نور و شاكردلری ایضاحلە جواب ویرسینلر.

[اوّلا] اوتوز سنە اوّلكی حیاتمڭ تاریخچەسنی مرحوم عبد الرّحمن یازمش، طبع ایدیلمش.

[ثانیًا] رسالۀ نورڭ ظهور زماننڭ بر نوع تاریخچەسی، اسكیشهر حپسنڭ مدافعەنامەسیلە دڭزلی حپسندەكی مدافعە رسالەلریلە "اختیارلر لمعەسی" و "آیت حسبیە رسالەسی" و "اون آلتنجی مكتوب" لە "هجمات ستّە" و "اشارات ثلاثە" و "اشارات سبعە" رسالەلری كبی نور اجزالری، سؤآللریڭزە تفصیلاً جواب ویرمك ایچون محكمە بڭا اعادە ایتدیگی و شیمدی ألمدە بولونمایان رسالەلر، بر زمان الڭزە كلەجك. ان شٓاء اللّٰه سزی هیچ اونوتمایاجغم. بو حالمدە بو علاقەدارلغڭز، بنم چوق آغیر صیقینتیلریمی خفیفلشدیردی. اللّٰه سندن راضی اولسون، آمین

اَلْبَاقٖی هُوَ الْبَاقٖی

قرداشڭز سعید النّورسی

(١٧٣)

یشیل صالحڭ استادیمزدن صوردیغی اون بر سؤآلیدر.

محترم استاد،

سزڭ حقّڭزدە شاعر مرحوم محمد عاكف بگ ایلە دار الحكمة الاسلامیە اعضالغندە بولونمش اولان مرحوم شوكت افندیدن دیڭلەدیگم قیمتلی نوطلرم واردر. حال ترجمەڭزی او ذاتلردن دویدقلریمی یازمق مجبوریتندە قالدیغم ایچون لطفًا سؤآللریمە قیصە قیصە جواب یازیڭز. كندی نامڭە یازاجغڭ حال وصیتنامەڭزی آرزو ایتدیگڭ قدر مفصّل یازمقدە امر سزڭدر

محمد صالح یشیل اوغلی

سؤٓال: ١-هانكی تاریخدە و نرەدە جناب حق سزی دنیایە كتیردی؟

٢-بابا و بیوك باباڭزڭ آدی و مسلكلرینی لطفًا یازیڭز؟

٣-كیملردن، نرەدە درس اوقودیڭز؟ و نرەدە كیملرە درس اوقوتدیڭز؟

٤-واندە، وان والیسی طاهر پاشانڭ أوندە نە قدر قالدیڭز؟ و او ذاتە نە اوقوتدیڭز؟ (مشروطیتڭ ایكنجی سنەسندە ارضرومە والی اولارق كلن طاهر پاشا مرحوم، بر رمضان افطارندە، سفرە باشندە سزڭ مزایاڭزدن اوزون اوزادی یە بر شیلر آڭلاتمشدی.)

٥-مشروطیتڭ اعلانندن قاچ آی اوّل استانبولە كلدیڭز؟ اتّحادجیلر، خلقە نصیحت ایچون سزی سلانیكە كوتورمشلردی. سلانیكدن صوڭرە سزی روم ایلیدە هانكی شهرلری كزدیردیلر؟

٦-بالقان حربنە اشتراك ایتدیڭزمی؟

٧- عمومی حربدە نرەدە اسیر اولدیڭز؟ روسلر سزە هانكی شهرلرینی كزدیردیلر؟ حقّڭزدە نە كبی معاملە یاپدیلر؟ تضییقدە، حقارتدە بولوندیلرمی

٨- اسارتدن هانكی تاریخدە استانبولە كلدیڭز؟ هانكی تاریخدە، دار الحكمة الاسلامیە علیّەسنە اعضا اولدیڭز؟

٩-ملّت مجلسنڭ ایلك دورەسندە آنقرەیە كلدیگڭز زمان اوّلا حرمتە، بر هفتە صوڭرە دە مجلسڭ تنفّس صالونندە و صوبە باشندە آبدست، نماز، جناب حقدن یاردیم ایستەییڭز، سوزلریڭزدن طولایی رئیس جمهورلە

مناقشەدن صوڭرە، آنقرەدن اوزاقلاشدیغڭزدن نە قدر صوڭرە ایلك اولارق نرەدن نرەیە نفی ایدیلدیڭز؟ و اول وقت دیانت ریاستی طرفندن، بر امرە مستندًا سزە واعظلك نامیلە اللی لیرە معاش تخصیص ایدیلمش ایكن، بو معاشی نەدن قبول ایتمدیڭز؟

١٠-هانكی شهر ویا قصبەدە منفی ایكن، یازدیغڭز كتابلر بهانەسیلە اسكیشهرە سوق و محكوم ایدیلدیڭز؟ و قاچ سنە حپسدە قالدیڭز؟ و حپسدن چیقاریلدقدن صوڭرە نرەیە نفی اولوندیڭز؟

١١-قسطمونیدن كیمڭ اخباریلە حكومت سزی دڭزلی جزا اوینە سوق ایتدی؟ قاچ آی حپسخانەدە قالدیڭز؟ حپسڭزە سبب اولان كتابلر تدقیق اولونوب، مضر اولمادقلری آڭلاشیلمقلە، حكمًا سربست بیراقیلدقدن صوڭرە، او حیاتڭزڭ محصولی اولان آثاریڭز سزە اعادە ایدیلدیمی؟

لطفًا پك قیصەجە بو سؤآللرڭ جوابنی یازیڭز.

نورلرڭ بر قهرمانی و بر خسروی اولان صادقڭ بو فقرەسی، كرچە حدّمدن پك چوق زیادە مقام ویرمش، فقط اونڭ فوق العادە توصیفاتی هم دعای معنوی، هم حقیقی استادی اولان رسالۀ نورڭ شخص معنویسی نامنە قبول ایدوب، لاحقەیە كچیردك.