[٣٠٣]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] (لِكُلِّ مُصٖیبَةٍ [اِنَّا لِلّٰهِ وَاِنَّٓا اِلَیْهِ رَاجِعُونَ]) رسالۀ نورڭ قهرمانلرندن و حافظ علینڭ مقامنە كچن مرحوم حسن فیضینڭ وفاتی، دڭزلی یە و رسالۀ نور دائرەسنە و بو مملكتە و عالم اسلامە بیوك بر ضایعاتدر. فقط كندیسی، پك صمیمی و خالص و فوق العادە بیاناتیلە و درسلریلە، ان شٓاء اللّٰه كندی یرندە چوق حسن فیضیلرڭ یتیشمەسنە بر زمین احضار ایتمش، صوڭرە كیتمش. عینًا برادرزادەم عبد الرحمن كبی، بر ایكی سنەدە اون سنە قدر نورلرە قیمتلی خدمت ایتدی. كویا او دە، عبد الرّحمن دە، چابوق دنیادن كیدەجگز دییە، اون سنەلك وظیفەیی بر ایكی سنەدە كوردیلر. بن، مرحوم حسن فیضینڭ وفاتنی، اونڭ شخصی اعتباریلە تبریك ایدییورم. و دڭزلی یی و نور دائرەسنی و بو مملكتی جدًّا تعزیە ایدییورم. بو چشیت ذوالجناحین و حقیقی مؤمن و مدقّق بر عالم و یوكسك بر ادیب، معلّم و تأثیرلی بر واعظ و مدرّسی غائب ایتدیگی ایچون بیوك بر مصیبتدر. جناب حق، ان شٓاء اللّٰه دڭزلی كبی قهرمانلر اوجاغندن چوق حسن فیضی روحندە نورلرە صاحب و ناشر چیقاراجق. بر دانە طوپراق آلتنە كیرر، وفات ایدر، فقط یوز دانە سنبلندە میدانە كلدیگی كبی، رحمت الٰهیەدن

امیدوارزكە، حسن فیضی دە اویلە قدسی بر سنبل ویرەجك! چوق حسن فیضیلر نور دائرەسندە یتیشەجكلر، وظیفەسنی داها زیادە یاپاجقلر.

[ثانیًا] بو قهرمان قرداشمزڭ، حیاتدە قالدیغی كبی، دفتر حسناتنە هر بریمز، معنوی قزانچلریمزی عمومدە اولدیغی كبی، خصوصی بر صورتدە دخی او قرداشمزە هدیە ایتملی ییز. بن كندم اونی دە، حافظ علی، حافظ محمد و صاوەلی احمد و محمد زهدینڭ بشنجیسی اولارق اولیای عظیمەنڭ خاص دائرەسندە، معنوی قزانچلریمی اوڭا دە باغیشلامەیە قرار ویردم. او ذاتڭ آغیر شرائط آلتندە نورلرڭ انتشارینە بیوك خدمت ایدن نور حقّندەكی فقرەلری، لاحقەدە اولدیغی كبی، مناسب كوردیگڭز بعض مجموعەلرڭ آخرینە دە او تأثیرلی مكتوبلرینڭ برر دانەسنی الحاق ایدیڭز. ناصلكە عصای موسی و ذوالفقاردە یازیلییور، تا اونڭ او جانلی فقرەلری، اونڭ بدلنە نورلرە خدمت ایتسین.

هم بنم بدلمە، اونڭ كوچوجك مدرسۀ نوریەسی اولان خانەسندەكی اقرباسنە و دڭزلی و جوارندەكی بیوك مدرسۀ نوریەدەكی رفیقلرینە و طلبەلرینە و نور شاكردلرینە تعزیەمزی تبلیغ ایدوب دیییڭزكە: بن، بتون عمرمدە، بو درجە، بر وفاتدن بو قدر متأثّر اولوب آغلامامشدم.

هم سزە بوندن اوّل یازدیغم مكتوبدەكی شدّتلی حدّتم و دماغمدەكی پریشانیت، شیمدی تحقّق ایتدیكە، او قهرمان قرداشمزڭ وفاتی كونندن باشلامش. حتّی او تأثیر، اختیاریمی سلب ایتمشدی. ئولەجگم دییە خدمتجی یە وصیتمی سویلەدم.

دیمك ایكنجی بر روحم حكمندە، حسن فیضی بنم بدلمە ئولمش و ئولویور. حتّی اونڭ وفات مكتوبنی، بتون بتون عادتمە مخالف بر بوچوق ساعت ألمدە ایكن آچامییوردم. هر نە ایسە... بتون بو الیم آجیلرە مقابل، عنایت الٰهیە امدادە كلدی.. هم كندیمی، هم اونی، هم نورجیلری مسرورانە روح و جانمزلە تعزیە ایچندە تبریك ایتدم. بیڭ بارك اللّٰه و بیڭلر رَحِمَەُ اللّٰه دیدم، ترخیصنی آلقیشلادم.

[ثالثًا] مرحوم حسن فیضینڭ برزخە كیتمەسی و وظیفەسی منحل قالمسی و مكتبلیلری نورلرە سوق ایدن یوكسك معلّملك و مكتب فنوندە متفنّنلك صفتلری چوق مكتبلیلرە بر پارلاق نمونۀ اقتدا اولمسی جهتنی تأسّفلە دوشونوركن، بردن عین سیستمدە هم معلّم، هم ایكی مخدومیلە نورجی، هم حسن نامندە، هم بو ایكی حسنلر كبی مستثنا و فداكار بر معلّم اولان احمد فؤادی نور دائرەسنە كیرمگە وسیلە بولونان دادایلی حافظ حسنڭ اوچ سنەدنبری هیچ مكتوبنی آلمدیغم و حالنی و نورلرە دوامنی بیلەمدیگم حالدە، بر مكتوبنی آلدم. دیدم: بر معلّم حسن كیتدی، یرینە بر معلّم حسن و چوق فداكار دیگر بر معلّم احمد كلدی. عین وقتدە، حجّە كیدن یڭی كلن بولوادینلی بر حسن یانمە كلدی. نور دائرەسنە كیردی، رسالەلری آلدی، تنوّر ایتمەیە باشلادی.

اوچ درت ساعت صوڭرە، امرطاغنڭ بر خسروی و فیضیسی، چوق خیرلی اولان طبیب خیری یانمە كلدی. دیدی: بورانڭ اهمّیتلی بر مكتب معلّمی عبد الرحمن،

نورلرە طلبە اولمق ایستەیور. قبول ایتسەڭز، عصای موسی یی ویرەجگز. دیدم: ویریڭز.

هم او مرحوم حسن فیضی كبی آز زماندە چوق خدمت ایدن قرداشمز مصطفی اوسمانڭ او كوندە كلن مكتوبنی كوردمكە، قسطمونی لیسەسنی قسمًا بر جهتدە شرفلندیرن، شیمدی دار الفنونی نورلاندیرمەیە چالیشان مكتبلی مصطفی، نور ماكینەسی مناسبتیلە نورلرە ضرر كلمەمك ایچون مطبوعات قانوننی خاطرلاتوب احتیاطكارانە مخابرەسندن بحث ایدییور. [حاشیە]

بن دیدم: حدسز شكر اولسونكە، بر معلّم ترخیص ایدیلدی، اونڭ بدلنە ایكی حسن و ایكی مصطفی و اوچ معلّم و بر چالیشقان متعلّم، وظیفەلری ایچندە دڭزلی قهرماننڭ وظیفەسنی كورویورلر. ایشتە بو حال اشارت ایدركە، ناصل حافظ علی كیتدی، دڭزلی اونڭ یرینە كلدی، آجیسنی اونوتدیردی. اویلە دە بر حسن فیضی كیتدی، یرینە بر دار الفنون كلەجك، ان شٓاء اللّٰه آجیسنی اونوتدیراجق. عموم قرداشلریمە سلام

اَلْبَاقٖی هُوَ الْبَاقٖی

قرداشڭز و دعاڭزلە خستەلغڭ تهلكەسنی كچیرن سعید النّورسی

[٣٠٤]

محرّم / ٣

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلًا] قهرمان نظیفڭ و حقیقتًا نظیف روحندە و صداقتندە كندی آرقداشلرینڭ ماكینە ایلە و سائر جهتدە نورە خدمتلری، بو مملكتی جدًّا منّتدار ایدەجك بر وضعیتدەدرلر. جناب حق اونلری موفّق أیلەسین. آمین. خصوصًا ماكینەلرینڭ محصولاتی هم زینتلی، هم آچیق، هم صحّتلی [حاشیە] اولمەسندن، بیوك بر موفّقیتدر. جناب حق نظیفە چوق صلاح الدّینلر، ابراهیملر ویرمش.

بنم كندی یازیملە، ذوالفقارڭ باشندە بر پارچە یازیمی ایستەیور. كوندردیگی یاغلی درت صحیفەیی، كندی یازیملە بو راحتسزلغم زمانندە بالذّات یازامدیغمدن، بن سویلەیوب بنم دائمی كاتبم یازسین. بعض كلمەلری بن یازاجغم.

نظیف قرداشمزڭ هم استانبول، هم اینەبولی نورجیلرینڭ نامنە بایرام و یڭی سنە تبرّكی حسابنە كوندردیگی مادّی اوچ نوع تبرّكی آلدم. اونلرڭ عمومی نامنە عادتمە مخالف اولارق قبول ایتدم. اللّٰه اونلردن راضی اولسون. آمین. اونلرڭ خاطری ایچون قاعدەمی قیردم. و معنوی و فردوسی اولان نور

ذوالفقاری ایكنجی صلاح الدّین اولان كوچك ابراهیمڭ نامنە و اكثریت مطلقە سوزلری غایت كوزل بر صورتدە یازان نظیف صداقتندە و علاقەسندە بولونان قرداشمز مصطفی اوسمانڭ عموم زغفرانبولی نورجیلری نامنە كوندریلن ایكی مجموعەیی دە برابر آلدق. جناب حق ذوالفقارڭ و او ایكی مجموعەنڭ حرفلری عددنجە اونلرڭ، ابراهیم و مصطفی و عزّت و رفقالرینڭ و یاردیمجیلرینڭ دفتر اعماللرینە حسناتلر یازسین. و هر حرفنە مقابل یوز رحمت أیلەسین. آمین.

حقیقتًا مصطفی اوسمان، اهمّیتلی و چوق غیرتلی ایكی جناح بولدی. نظیفڭ صلاح الدّینی و ابراهیمی كبی، معلّم احمد فؤادی و دار الفنوندەكی مصطفی اوروجی بولمش. او ایكی جناحلە، ان شٓاء اللّٰه نور خدمتندە چوق ایش كورەجكلر. حتّی مصطفی اوروجلە معلّم احمد فؤاد كبی ذاتلرڭ بو صیرەدە تأثیرلی بر صورتدە خدمت نوریەیە كچمەلری، دڭزلی قهرمانی حسن فیضینڭ وفات آجیسنی بر درجە ازالە ایدییورلر. كوچك ابراهیم، نظیفە ایكنجی بر صلاح الدّین حكمنە كچوب چولوق و چوجغیلە، رفیقەسیلە و قرداشیلە نورە و ماكینەیە پك جدّی چالیشمەسی، مكتوبندە ناملری بولونان صالح و كُلجی حسین [حاشیە] و عثمان و زهدی و عزّت و عمر و سائرە اورادەكی نورجیلرڭ ثباتكارانە، صارصیلمادن نور خدمتندە ترقّی

ایتمەلری، بزلری چوق مسرور ایتدكلری كبی، بو مملكتی ایلریدە چوق منّتدار ایدەجكلر. ما شٓاء اللّٰه اینەبولی، كوچك اسپارطە و تام بر مدرسۀ نوریە اولدیغنی اثبات ایتدیلر.

[ثانیًا] نورس كویی و نورسی لقبملە و نورلرە مناسبتدار اونیورسیتە مكتبنڭ پك غیرتلی بر نورجیسی و بر عبد الرحمن و بر صلاح الدّین قابلیتندە مصطفی اوروجە، اوّلجە اسكی حرفلە كوندردیگمز مجموعەلردن صوڭرە، یڭی حرفلە سكز طقوز پارچەیی دە، اونڭ ایستەمسی و اونیورسیتە طلبەلری چوق محتاج و مشتاقدر دیمەسی اوزرینە كوندردك. فقط او كنچ شاكرد تجربەسی آز اولمەسندن، نورلرڭ حمایەسنە كافی كلمدیگندن و لایق اللرە ویرمك و معطّل قالمامق ایچون، نور شاكردلری، خصوصًا استانبولە یاقین ویا اوغرایان یاخود استانبولڭ ایچندە بولونانلر، نورڭ نشر و حمایەسندە اوڭا یاردیم ایتمك لازمدر.

[ثالثًا] دڭزلینڭ بر معنوی قهرمانی مرحوم حسن فیضینڭ * رحمت اللّٰه علیە اسپارطە قهرمانی مرحوم حافظ علینڭ * رحمت اللّٰه علیە یاننە كیتمەسی، كرچە بزی چوق متأثّر ایدییور، فقط اونڭ غایت خاص بر طلبەسی و نورڭ خالص بر شاكردی صدّیق محرّمڭ دیدیگی كبی دیرز: او، بر جهتدە ئولمەمش، بلكە وظیفەسنی عجلە بیتیرمش. عالم برزخە استراحت ایچون كیتمش، ترخیص ایدیلمش. حافظ علی ایلە برابر، معنًا، شفاعتلریلە و بیراقدقلری تأثیرلی نور حقّندەكی اثرلریلە یاردیم ایدییورلر، یینە معنًا نورە

چالیشییورلر. البتە معنوی شهید حكمندە اولمەلرندن، میوەنڭ اون برنجی مسئلەسندەكی علم نحو طلبەسنڭ كندینی مدرسەدە بیلدیگی كبی، حافظ علی ایلە نور حقیقتلرینڭ مذاكرەسنی و وفات ایدن نورجیلر دائرەسندە مشغول اولمەلرینی، مرحمت الٰهیەدن قوّتلی امیدوارز. ان شٓاء اللّٰه جناب حق اونڭ وظیفەسنی دنیادە كوردیرەجك نور دائرەسندە چوق حسن فیضیلر [حاشیە] یتیشدیرەجك.

یالڭز او مبارك قرداشم، بنم كبی رسمی علاجلردن چكینمدیگی ایچون بر سهودر. بن اوندن زیادە اضطرابدە ایكن، نورجیلرڭ دعاسی یتر دییە مادّی علاجلری آرامادم. و خستەلق حقّندە كیمسەنڭ فكرینی آلوب اوهام ایتمدم. او مرحوم قرداشمز، بو نقطەدە بڭا موافقتە موفّق اولامامش. نورلر حقّندە پارلاق فقرەلرندە، بو بیچارە قرداشنە كندینی قربان ایتمەیە سوز ویردیگندن و نور وظیفەسنی عجلە یاپمەسیلە استراحت عالمنە كیتدی. بن هم اونڭ اقرباسنی،

هم محرّم كبی قیمتلی، جدّی طلبەلرینی و دڭزلی و جواری نورجیلرینی تكرار تعزیە ایدوب، بزلر كبی اونلر دە او مرحومی حسناتلرینە حصّەدار ایدرك حسنات جهتندە ئولمەمش كبی، دفتر حسناتنە حسنەلر یازدیرسینلر دییەرك، عموم اونلرە بیڭلر سلام و اوڭا بیڭلر رحمت دیرز.

[رابعًا] بر زمان بیڭ قلملە نورلرە چالیشان صاو قهرمانلرندن و نورلرڭ اهمّیتلی شاكردلرندن مصطفی ییلدیزڭ هدهد مثال قوشی، هُدْهُدْ سلیمانی نوعندە نور ایشلری حقّندە خارقە وضعیتلری كوسترمك عجیب دگل، چوق امثالی وار. قوشلرڭ نورلرە علاقەدارلقلری، چوق حادثەلرلە تحقّق ایتمش. حپسخانەدە، حقیقتًا شخصمە و نورجیلرڭ اتّحادینە و محبوسلرڭ نورجیلرلە توافقنە اونوتولمایاجق درجەدە حلمی ایلە خدمت ایدن و مملكتندە حپسدن اوّل و صوڭرە قهرمانانە چالیشان و اسمنە تام مطابق صادق بگڭ، اقرباسیلە و والدەسیلە تبریكنە و بنم ناممە اورادە قربان كسدیگنە مقابل، بیڭ بارك اللّٰه و ما شٓاء اللّٰه دیرز. و اونڭلە رسالۀ نورە هم طلبە و بزە سلام كوندرن صالح اوغلی عثمانە، هم سلام ایدرز، هم نور دائرەسندە قبول ایدیلدی دیرز.

[خامسًا] هر حالدە برنجی نكتۀ كنزیەدە ایكی یردە ” لا“ نڭ یرندە ” لام“ ڭ سهوًا یازیلمەسی، تصحیح ایدیلملی. ماكینە محصولاتندە مناسب كوردیگڭز زمان تصحیح ایدیلسین. بهانە آرایان اعتراضجیلر، بو سهودن بولانتی ویرەبیلیرلر.

نظیفڭ ذوالفقار باشندە ذوالفقار قیلیجنڭ صورتنی كوزل یاپمش، بزە كوندرمش. بز دە سزە بر عددینی كوندرییورز. هم مصطفی اوروجڭ، هم حسن فیضینڭ فقرەسی لاحقەیە كچمك ایچون برابردر. نظیفڭ كوندردیگی یاغلی درت صحیفەیە، باشدە نورڭ محكمە طرفندن سربستیتنە دائر بر فقرە و فلسفە حقّندەكی ایكی قسمە دائر فقرە و معترضلرە قارشو اوچ اساس فقرەسی و بو مجموعە بیوك بر باغچەدر، هر آدم، هر میوەسنی الدە ایدەمزسە دە نە قدر بیلسە كاردر، الخ.. فقرەسی یازیلاجق.

اَلْبَاقٖی هُوَ الْبَاقٖی

عمومڭزە بیڭلر سلام و موفّقیتلریڭزە و سلامتڭزە بیڭلر دعا و دعالریڭزە محتاج و دعالریڭزدن دائما استفادە ایدن قرداشڭز، خستە فقط تهلكەسنی كچیرن

سعید النّورسی

قهرمان نظیفڭ ذوالفقارلە برابر عصای موسی یی یڭی حروفلە كوزلجە یازمسی، چوق اصابتدر. حقیقتًا كنچلرە، خصوصًا استانبول دار الفنوننە چوق لزومی وار. بو دفعە اوچ صحیفەیی نمونە ایچون بزە كوندرمش.

تصحیحدن صوڭرە لاحقەیە كیرسین.

[٣٠٥]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

چوق محترم و مشفق استادم افندم حضرتلرینە،

قرداشم جیلانڭ باباسیلە كوندرمش اولدیغڭز مكتوبڭزی صوڭسز سوینچلر ایچندە آلدم. چوق سوكیلی و مشفق استادم حضرتلری، بو یوكسك لطفلریڭزە مظهر اولدیغمدن طولایی نە قدر ممنون اولدیغمی تعریفدن عاجزم. جناب حقّڭ بو احساننە قارشو نە قدر شكر ایتسەم یینە آزدر.

عالی جناب استادم افندم، سزڭ یینە تسمّمدن راحتسز اولدیغڭزی أوگرننجە چوق اوزولدم. ان شٓاء اللّٰه بوڭا جرئت ایدن زندیقلرڭ اللری یاقیندە قورور. كوندرمش اولدیغڭز نور اجزالرندن عصای موسی نڭ بریسنی مطالعە ایچون متقاعد حاكم بگە ویردم، چوق ممنون اولدیلر. ذاتًا سز استادیمز استانبولدە بولوندیغڭز صیرەلردە كندیلرینی طانیرلرمش، سزە عرض حرمت و سلاملری واردر. واعظ شرف بگ ایسە، یینە سز استادیمز استانبولدە ایكن زیارتڭزە كلیر و كیدرلرمش. داها او زماندن طلبە ایمشلر. بن كتابلر كلمدن اوڭجە یانمدە بولونان میوە رسالەسنی تقدیم ایتمشدم. شیمدی دە ذوالفقار مجموعەسنی تقدیم ایدەجگم. و دیدیگڭز كبی آیت الكبرانڭ سكسان سكزنجی صحیفەسنی كوسترەجگم،

دیگر كتابلر ایسە، مراقلی اونیورسیتەلی كنچلر طرفندن اوقونویورلر. اونیورسیتە كنچلگنڭ رسالۀ نورە اكمك، صو، هوا، ضیا كبی احتیاجی واردر. ان شٓاء اللّٰه سوكیلی استادیمز اشعار بویوردیغڭز كبی، اونیورسیتە یاقیندە نور مكتبی حالنە كیرەجكدر.

ذاتًا بن سوكیلی استادیمە اولان اڭ درین سوكی و صمیمی اشتیاقمی اظهار ایچون فعّال بر خدمت ایستەیوردم. یارادانە صوڭسز شكر اولسونكە، بونی پك كجیكدیرمدی. بنم ایچون دنیا و آخرت اذواقی، حقیقی سعادتم، نورلرە خدمتم نسبتندەدر. بو قدسی وظیفەیی بتون قصور و عجزملە برابر بو حقیقتلرە اولان فضلە احتیاجمدن طولایی، سز مشفق استادیمڭ عالی همّتیلە، ربّمڭ بیوك بر لطفی تلقّی ایدییورم.

سوكیلی، مشفق استادم، سزڭ نظارت و علوی حمایەڭز، اڭ صیقینتیلی زمانلرمدە امدادیمە یتیشدیگی كبی، ان شٓاء اللّٰه خدمت خصوصندە مستجاب اولان دعالریڭزی بزدن اسیركەمەیوب، لطف ایدرسڭز. ذاتًا مشفق استادم، سز قسطمونیدە دیمشدیڭز: مصطفی، سنڭ اوزرڭدە باباڭدن زیادە حقّم وار. بن قیصە فهمملە بر شی آڭلایامامشدم، عبد اللّٰه ایلە بڭا اولان نصیحتلریڭز داها حالا اسكی تازەلگیلە قولاقلرمدە چینلایور. حقّە بر چوق یوللردن كیدیلەبیلیر، فقط اڭ قیصە یول، طوغری یول اولان رسالۀ نور یولیدر.

بزم ایچون آیریلق یوقدر، برزخدە قبردە دخی برابرز. آه نە بیوك سعادت! فقط طویابیلمك، بوڭا قارشو بن دە دیرم:

ای معنوی بابامز، علمدە استادیمز، دیمشدڭكە: دنیادە، برزخدە، عقبادە بز دائما برابرز ان شٓاء اللّٰه، آیریلمایز. بو قصورلی طلبەڭزی ان شٓاء اللّٰه بو بشارتدن محروم ایتمزسڭز. هم یونس امرە كبی نورلر یولندە دیرم:

نە غم بوندە بیڭ كز ئولورسەم، بوندە ئولوم اولماز ئولمزم آرتق

یانسین جانم، یانسین عشقڭ اودینە، بویاندم رنكنە صولمازم آرتق

بنی ارشاد ایدن نور كاملدر، یاپیشدم النە، دونمزم آرتق

چوق سوكیلی استادم، افندم، چوق قصورلی اولان بو عاجز طلبەڭز هر خصوصدە دعالریڭزە محتاج اولدیغم كبی، بالخاصّە نورلرڭ نشرندە، نورلرە یاراشاجق بر طرزدە بر اسلوبی و سویلەمە و دویورمە قابلیتنی دعاڭز بركتیلە اومویورم. چونكە صیقیلغان و طوتوغم. مكتوبمە صوڭ ویرركن ال و آیاقلریڭزدن أوپر، عرض حرمت أیلرم. صحّتلر و عافیتلر دیلرم، سوكیلی استادم افندم.

چوق قصورلی و دعالریڭزە محتاج مصطفی اوروچ

[٣٠٦]

بِاسْمِهٖ سُبْحَانَهُ

مرحوم حسن فیضی، نورلردن آلدیغی حقیقت درسنی، نورلرە اشارت ایدرك كوزل تنظیم ایتمش. لاحقەیە كیرسین

سعید النّورسی

كوزل اوقو، هر ذرّەدە جوشقون برر معنا وار،

درد اهلنە بو معنادە جانلر صونان ادا وار.

ویرمك ایچون پارلاقلغی، غملی كوڭل اوینە،

بر باق هلە، هر جلادن اوستون اولان جلا وار.

درین، كوزل دوشونجە ایلە اینجەلرسەڭ بونی سن،

ضعیفلامش روحلر ایچون طاغلر كبی غدا وار.

هم دیلرسەڭ، توكنمەین سرمایۀ ثروتی،

آچ كوزیڭی نورلرە باق، ایشتە سڭا طوفان كبی غنا وار.

بنی طانی، یورو قولم، یورو دییە بزلرە،

هر نفسدە شفقت ایلە ربّمزدن ندا وار.

دویمش ایسەڭ بو ندایی، هر ذرّەنڭ دیلندن،

مژدە اولسون، آرتق سڭا جنّت دینن صفا وار.

اوزاقلرە باقما، نورلرە باق، یورو عالَم اونڭ آیینەسی،

كورمزمیسڭ، هر یوزندە عین رنكدە ضیا وار.