حجّە كوتوروب، نبیّ ذیشان علیە وسلَّم افندیمز حضرتلرینڭ اشیگنە یوزیمزی سورەرك كوز یاشلریمزی آقیتمقلر نصیب و میسّر أیلەسین. آمین. و آخرتدە دە، یینە اول نبیّ ذیشان افندیمز حضرتلرینڭ شفاعتنی جملەمزە احسان أیلەسین. آمین آمین آمین.

بو طرفدن جملە قرداشلریمز، قلبلر طولوسی سلام ایلە مبارك اللریڭزدن أوپر و بایرام شریفڭزی تبریك ایدرك امثال كثیرەسیلە مشرّف اولمقلغڭزی تكرار تكرار جناب واجب الوجود حضرتلرندن تمنّی و نیاز ایدرز، افندیمز حضرتلری.

قصورلی طلبەڭز و دعاڭزە محتاج عثمان كاتب

[٢٩٠]

چوق سوكیلی، چوق قیمتدار، چوق مبارك و چوق مشفق استادیمز، افندیمز حضرتلری،

مبارك ال و آیاقلریڭزدن تعظیم و احتراملە اوپەرك، عموم نورجی قرداشلریمزلە برابر عید سعید اضحاڭزی بتون روح و جانمزلە تبریك و تسعید أیلر، بو حیات فانیەدە ادراك ایتدیگڭز سنەلر بوینجە، بشر ایچون چوق اهمّیتلی و مقدّس و لزوملی اولان حیاتڭز و بو مسعود و نزیه حیاتڭ اهمّیتلی و قیمتلی و حیات و وجود قدر لزوملی اولان ثمرەسی رسالۀ نورلە عموم بشرە [ایستر بیلمەسینلر، ایستر بیلسینلر] علی التوالی نور و فیض و بركت القا ایتدیگڭزدن، یینە

روح و جانمزلە تبریك و بز نورجیلر دە خاص بر توجّهلە و رسالۀ نورڭ نفس قدر لزوملی درسلریلە هر نفسمزدە بیوك بر بایرام یاپدیران ذات فضیلت مئابڭزە صوڭسز منّتدارلقلریمزی عرض ایدركن، جناب ارحم الرّاحمین حضرتلرندن شویلە نیاز أیلرز: یا ربّی، سوكیلی استادیمزڭ عمرینی مُزداد و سعادت و سلامت دائمە ایچندە داها چوق سنەلر بزملە بو حیات فانیەدە برابر أیلە. و رسالۀ نوری، كفر و ضلالت باتاقلقلرندە چیرپینان بشرە بالذّات اوقوتمەسنی نصیب و میسّر أیلە و بز زواللیلری ابدیًا اونڭ كوستردیگی یولدن و اوندن آییرما. و اوندن و عموم نورجیلردن راضی اول. آمین.

خدمتكارلریڭز و طلبەلریڭز، زغفرانبولی و جواری قصورلی نورجیلری رسالۀ نور شاكردلری سیاستە تنزّل ایتمدكلرندن، بو مصطفی قرداشمزڭ نورڭ فتوحاتی حسابنە یازدیغی اوچ درت مادّە یازیلمدی. نورجیلرە لزومی یوق. یالڭز نتیجە و حاشیەسی یازیلدی.

نتیجة النتیجە، بو كنچلك ممثّلی اولان كنچ، بیلمەیەرك، عادتا بو حادثەنڭ دلالت و اشاراتیلە رسالۀ نورڭ حقیقتلرینی تصدیق و حق و عین حقیقت اولدیغنە بتون كنچلك نامنە امضا قویویور. و فقیر، قطعیًّا تصدیق ایدییورمكە، بز نورجیلرە مژدەلەدیگڭز عنایات و الطاف سبحانیە پیدرپی تظاهر ایدییور. و دین و ایمان و قرآن علیهنە حركتە كچمك ایستەینلرە، درحال بر مخالف و معارض كتلە ظهور و یوزلرندن سترەلری، ماسكەلری آلینارق، انظار ناسدە

تشهیر ایدیلییور. مژدەلریڭز هپ تظاهردە و رسالۀ نورڭ حقیقتلری دوشمانلری طرفندن بیلە تصدیق اولونمقدە سوكیلی استادم. [حاشیە]

[٢٩١]

لاحقەیە كیرسین

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُ

چوق سوكیلی، چوق مبارك، چوق معزّز، چوق قیمتلی قرداشلرم،

ایكی سنەدنبری عادتا آراڭزدن چكیلمش و عادتا رسالۀ نوری و اونڭ مبشّر افخمنی اونوتمش كبی سكوت ایتدم. رسالۀ نور بلبللری شاقیركن، عشاق حقیقت شمس هدایتڭ حوالیسندە انواع نعامات غرام آلود ایلە ترنّمساز اولوركن،

شمس محمّدیەنڭؐ آخر زماندە دفعۀ ثانیەدەكی طلوع دلفرینی قارشوسندە حیرانلغڭ اڭ یوجە تحسّساتیلە بر جماعت قدسیە، بر حزب الٰهی، او اكرام الٰهینڭ سروری ایلە اعظمی بر جوشقونلق كوستریركن، بن حسّسز، جامد بر طاش پارچەسی كبی صوصدم. استاد مبجّلڭ فراقی احتمالیلە تحسّر وولقانلری فیشقیریركن، صداقت فوّارەلری چالقانیركن، بن صویی كسیلمش بر چشمە كبی، بر دگرمن كبی صوسز، نوری سونمش بر لامبە كبی ضیاسز قالدم.

فقط عزیز، سوكیلی، مبارك قرداشلرم، هیچ محض نور رسالت محمّدیە علیە الصّلاة والسّلام اولان رسالۀ نورڭ جاذبەسنە بر دفعە معروض قالان بر انسانڭ، او جاذبۀ دل ربایی ترك ایتمەسنە، اونڭ منشر اجملندن، او معدن شفقت و كرمدن واز كچمەسنە امكان وارمیدر؟ خیر، سوكیلی قرداشلرم، دائمی بو بیچارە، بو پر قصور انسان، سزڭ دائمی و ابدی مالڭز، ئوز مملوكڭز و رحمت الٰهیەنڭ فیضیلە اونی سزدن آییراجق هیچ بر قوّت یوقدر. او محض نور قرآن اولان رسالۀ نورڭ آزاد قبول ایتمز بندەسی، اونڭ منبع اقدسنڭ لاینعزل كولەسیدر.

سوكیلی قرداشلرم، ان شٓاء اللّٰه شیمدی یە قدر سویلەمەسنە مساعدە ایدیلمەین لسانمە مساعدە ویریلەجك و مكتوبلرم كسیلمیەجكدر. بالوسیلە عید اضحیڭزی جان و یوركدن تبریك ایدر، جملەڭزە قارشو حسرت و اشتیاقمڭ حدودسزلغنی عرض ایدرم سوكیلی قرداشلرم.

پر قصور و بیچارە قرداشڭز احمد فیضی قول

[٢٩٢]

بِاسْمِهٖ سُبْحَانَهُ

ذی الحجّە (١٦)

مكتوب نو (٢)

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] نظیف چلبینڭ اینەبولی خالص قرداشلریمزڭ نامنە بایرام تبریكی ایلە.. و ذوالفقارڭ غایت دقّت و اهمّیت و احتیاط ایلە دوام خدمتی و معجزات قرآنیەیی دە بیتیروب ذیللرندن بر قسمنی دە تمام ایتمسی.. و عبد الرحمن صلاح الدّینڭ آمریقە میسیونرلرینە درت بش آی اوقوتدیردیغی عصای موسی و معجزات احمدیەیی امین بر واسطە ایلە بزم ناممزە جامع الازهرە هدیە ایدوب كوندرمەسنی.. و اهمّیتلی بر نور شاكردی احمد قریشینڭ اونلرڭ ماكینەسنڭ مصرفنە یوز بانقنوط ویرمەسنی بیان ایدن بر مكتوبنی آلدم. بو قهرمان نظیف قرداشمزە و غایت جدّی و ثباتكار و تام علاقەدار اینەبولی نورجیلرینە و احمد قریشی و رفقالرینە، هم بایراملرینی، هم دواملی خدمتلرینی، هم یوكسك صداقتلرینی، هم ذوالفقارڭ طبع موفّقیتنی، هم صلاح الدّینڭ جامع الازهرلە مدرسة الزّهرانڭ مناسبتنی تأمینە چالیشمەسنی روح و جانمزلە تبریك ایدییورز. جناب حق اونلری موفّق أیلەسین. آمین. و خدمتلرینی تام مقبول أیلەسین. آمین.

[ثانیًا] جامع الازهر علماسنە كوندریلن ایكی نسخە بنم تصحیحمدن كچمەمش. بعض حركەلر و عربی كلمەلردە سهولر البتە واردر. خصوصًا آخردەكی عربی

خلاصة الخلاصە حركەلرندە علم نحوجە، باشقە نسخەلردە متعدّد سهولر كوردم. اونڭ ایچون، تام عربی خواجەلرینڭ تدقیقندن كچمش برر نسخە عصای موسی [حاشیە] و ذوالفقاردن، مناسب كوردیگڭز زمان جامع الازهرە كوندرمكلە برابر، اونلرە یازیڭزكە: نور رسالەلرینڭ مدرسة الزّهراسی، جامع الازهرڭ شفقتنە چوق محتاج بر مخدومیدر، بر طلبەسیدر. شدّتلی دوشمانلرڭ هجومنە هدف اولمش بر شاكردیدر و بتون مدرسەلرڭ باشی و عالم اسلامی دائما تنویر ایدن او بیوك جامع الازهرڭ كوچك بر دائرە و شعبەسیدر. اونڭ ایچون، او عالی قدر استاد و مشفق پدر و حمیتكار مرشد اعظم، بیچارە اولادینە و شاكردینە تام یاردیم ایتمەسنی، اونلرڭ علوی همّتندن بكلەیورز. او پك بیوك استادیمزە تقدیم ایدیلن ایكی كتاب ایسە، بر طلبە، درسنی نە درجە آڭلامش دییە آقشامدە باباسنە و استادینە یازوب ویرمسی كبی، او ایكی درسمز، او شفقتلی علّامەلرڭ نظر مسامحەلرینە عرض ایدیلمش، دییە بر مكتوب یازارسڭز.

[ثالثًا] پك چوق علاقەدار اولدیغم و اشارت غوثیە ایلە نور شاكردلرینڭ تمل طاشلرندن بولونان بارلە، بَدْرَە، اگیردیر دائرەسندە ایكی خلوصی و امكدار صادق سلیمان ایلە برابر چوق ذاتلرڭ اسمی بولونان اوچ تبریك مكتوبلرینی برابر آلدم. یگرمی سنە اوّلكی بارلە حیاتمی تام خاطرمدە احیا ایتدی. بن باشدە او اركان ثلاثە و یڭی قهرمانلردن علی عثمان و بحری اولارق عمومڭزڭ برر برر، خصوصًا بارلەدەكی اسكی دوستلریمڭ بایراملرینی تبریك ایدییورز. اونلری اونوتامییورم. هر كون دعامدە و قزانچلرمدە حصّەداردرلر. خصوصًا مرحوم مصطفی چاووش و مهاجر حافظ احمد و اشرف بگ مرحوملری چوق دفعە حزینانە و مشتاقانە تخطّر ایدییورم. اونلرڭ اقربالرینە دە بالخاصّە سلام ایدییورم. نور سانترالی صبری [خلوصئ ثانی ]، برنجی خلوصی یە عصای موسی یی كوندرمسی، چوق كوزل اولمش. اللّٰه ایكیسنی موفّق أیلەسین. آمین.

و نورلرڭ انتشارینە چوق اهمّیتلی خدمتی بولونان بر ذاتڭ، مرحوم پدرینڭ مزارینە دائر سؤٓالنڭ جوابنی صبری یە حوالە و او ذاتە دە چوق سلام ایدییورم. و ایكی خلوصینڭ دائما دمیر باش، حقیقتلی آرقداشلری حقّی یە دە بالخاصّە سلام و نە حالدە اولدیغنی و كیفنی صورییورم. و برنجی خلوصینڭ مكتوبندە بزە و نورلرە قارشو چوق علاقە كوسترن آلوارلی محمد و ادریس افندیلرە چوق سلام ایدییورم

اَلْبَاقٖی هُوَ الْبَاقٖی

عمومڭزە بیڭلر سلام و دعا ایدن قرداشڭز سعید النّورسی

[٢٩٣]

بِاسْمِهٖ سُبْحَانَهُ

وَاِنْ مِنْ شَیْءٍ اِلَّا یُسَبِّحُ بِحَمْدِهٖ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

آغابگم عبد الرحمن صلاح الدّینڭ مدرسة الزّهرانڭ جامع الازهر رئیسنە كوندردیگی عصای موسی و ذوالفقار معجزات احمدیەدن بر قسمی مناسبتیلە لطیف بر حادثەیی محرم بر یردن ایشیتدم. عینًا یازییورم. قرق سنەیە یاقین بر زمان اوّل استاد استانبولە كیتدیگی وقت، علمالر مناظرە ایدوب الزام ایدەمەمشلر. مشهور جامع الازهر رئیسی علّامە بر ذات اورایە كلمش. خواجەلر اوڭا دیمشلر: "بزم بدلمزە اونی الزام ایت." او دە بعض خواجەلرلە آیاصوفیە آولیسندەكی چایخانەدە راست كلمش. و كلەجك سؤآل جواب- وقوع بولمش. فقط جوابڭ ایكنجی پارچەسی متعصّب بعض ذاتلرە آغیر كلمش، اعتراض ایتمشلر. سنڭ بو مملكت حقّندە سٓوء ظنّڭ وار دیمشلر. اونڭ ایچون استاد، صوڭرە واقعەیی حكایە ایتدیگی وقت باشقەلرینڭ تعصّبنە ایلیشمەمك ایچون ایكنجی قسمی سویلەمییوردی. فقط، او زمان سویلەدی. اوت دیدی، واقعە شویلەدر: جامع الازهر رئیسی، علّامە شیخ بخیت حضرتلری، قرق سنە اوّل استانبول علماسنڭ تدبیریلە استادیمزی الزام ایتمك ایچون آیاصوفیە چایخانەسندە بعض خواجەلرلە كلدیگی وقت، اڭ برنجی صوردیغی سؤٓال بودر: [یَٓا اَخٖی مَاتَقُولُ فٖی حَقِّ اَوْرُوبَا وَالْعُثْمَانِیَّةِ] یعنی آوروپە و عثمانلی مملكتی حقّندە فكرڭ نەدر؟

استاد دە دیمشكە: (اِنَّ اَوْرُوبَا حَامِلَةٌ بِالْاِسْلَامِ فَسَتَلِدُهُ یَوْمًامَا٭ وَاِنَّ هٰذِهِ الْمَمْلَكَةَ حَامِلَةٌ بَاَوْرُوبِا وَسَتَلِدُهَا اَیْضًا یَوْمًامَا) یعنی آوروپە اسلامیتلە حاملەدر، البتە بر كون طوغوراجق. و بو مملكت دە بر آوروپەیی طوغوراجق. [بو جملە محرمدر]. چونكە اونڭ مدنیتیلە حاملەدر. او وقت جامع الازهر رئیسی خواجەلرە دیمشكە: "بو آدملە مناظرە ایدیلمز، الزام ایدیلمز. بنم فكرم دە بو مركزدەدر." اوت، او رئیسڭ تقدیرینە مظهر اولان استادڭ ویردیگی او خبرڭ یاریسی چیقمش. ان شٓاء اللّٰه اوتەكی یاریسی دە چیقاجقدر. بو فكرە بناءًدركە، ایشیتدیگمە و آڭلادیغمە كورە، استاد بو حربڭ اوّلندە بر سنە "بر دولت، اسلامیتە قوّت ویرەجك و اسلام اولاجق" دییە مراقلە باقمش. صوڭرە آڭلادیكە، زمانی كلمەمش. داها یدی سنە باقمدی. بو وسیلە ایلە عموم نورجی قرداشلریمزڭ اللرندن أوپر، بایراملرینی تبریك و سلام ایدرم.

رسالۀ نورڭ عاجز، بیچارە بر شاكردی و خادمی جیلان

[٢٩٤]

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] پك چوق علاقەدار اولدیغم و رسالۀ نورڭ غایت اهمّیتلی بر مركزی و آز زماندە، پك چوق نور ایشنی كورن دڭزلی خسروی و غایت جدّی و صادق

رفقالری، خصوصًا حاكم عادل و محرّم و حافظ مصطفی وسائرەنڭ نامنە بایرام تبریكیلە، حسن فیضینڭ شدّتلی و تهلكەلی خستەلغنی بیان ایدن بر مكتوبی، چوق اهمّیتلی بر قرداشمز اولان محرّمدن آلدم. قناعت قطعیەم كلدیكە، حسن فیضی، عینًا شهید حافظ علی * رحمت اللّٰه علیە كبی، بنم مصیبتمڭ قسم اعظمنی كندینە آلوب معنوی بر فداكارلق أیلەمش. حافظ علینڭ بنم بدلمە برقاچ امارە ایلە برزخە كیتدیگی كبی، بو حسن فیضی دە عین خستەلغم زمانندە، عین وقتدە، عین مدّتدە، عین طرزدە، عین صیقینتیلی طیشاری یە چیقمامقدە توافقی، قوّتلی بر امارەدركە، بڭا چوق آجییان و شفقت ایدن او قرداشمز، معنًا خستەلغمی قسمًا كندینە آلدی. بو درت جهتلە توافق ایچندە یالڭز بر فرق وار. بنمكی زهردن، تسمّمدن.. اونڭكی صوغوقدن كلمەسیدر. البتە خستە رسالەسی بزم بدلمزە اونی تسلّی ایدوب، عیادت المریض كبی كیفنی صورمش و خستەلقدەكی بیوك ثوابلر صیقینتیلرینی سرورە قلب ایتمش. جناب حق شفای عاجل احسان أیلەسین. آمین.

هم اونی، هم مكتوب یازانی، هم اورادەكی بتون نورجیلرڭ و دوستلرڭ، خصوصًا حپسخانەدە و كوردیگمز محبوسلرڭ و حپسخانەدە كوردیگمز مأمورلرڭ بایراملرینی روح و جانمزلە تبریك ایدییورز.

[ثانیًا] هم ارضروم، هم بنم مملكتمڭ، هم قونیەنڭ حسابنە فوق العادە نورلرڭ انتشارینە و لزوملی و لایق یرلرە یتیشدیرمەسنە پك چوق خدمت ایدن و سانترال صبرینڭ تام بر ایكنجی صبریسی اولان بو قونیەلی صبری قرداشمز اشرفلە،

هم بر تبریك مكتوبی هم دە بایرام تبرّكی كوندرمش. بن هم اونڭ، هم قونیە نورجیلری و علمالری و حجازدن كلەجك خواجە وهبینڭ هم حجّنی، هم بایراملرینی بتون روح و جانمزلە تبریك ایدییورز. هم صبرینڭ تبرّكنی دە، هدیە قبول ایتمەمك قاعدەمە مخالف اولمامق ایچون اوڭا كوندردیگم و كوندرەجگم مجموعەلرڭ مقابلنە اولارق، حقّمدە اهمّیتلی اهالیسیلە چوق علاقەدار ارضروم حسابنە قبول ایدییورم.

[ثالثًا] بر زمان بارلەدە تمثیل ایچون یازدیغم بر رسالەدە، ایكی آدم استانبولە كیدەجك. بریسنڭ یوزدە طقسان طقوز دوستی استانبولدەدر. اونڭ ایچون اورایە اشتیاقلە كیدر. اوتەكی اونڭ عكسی، الٰی آخر.. مأٓلندە بر شی یازیلمش. شیمدی عینًا بو خستەلغمڭ اخطاریلە، كچمش زمانە كچدم و او زمانلردە حیاتمی كچیردیگم مملكتلردە دە خیالًا كزدم. او شیرین حیاتمڭ دورەلرندە، هر مملكتدە یوز دوستمدن آنجق بر ایكیسنی كورەبیلدم. اوتەكیلر، برزخ مملكتلرندە.. حتّی كندی نورس كویمدە، بر تك عمجەزادەم و طلبەم ملّا داودؒ، او دە اسكی احبابلرم، اقربالرم یاننە، برزخە كیتدیگنی كوردم. یگرمی سنەكی آیری آیری ایكنجی وطنم صاییلان بارلە، قسطمونی كبی یرلردە، اوچ قسم دوستدن آنجق ایكی قسمنی كوردم. اوتەكیلر دە كیتمك أوزرەدرلر. بو خیالی حقیقتە بناءً، حقیقتًا نورلرڭ ایشیغیلە نورانی كوردیگمز برزخە كیتمك، بڭا دگل آغیر كلمك، بلكە بر اشتیاق ویردی. بنم بدلمە هم وظیفەمی كوروب، هم ثواب قزاندیراجق یوزر خسرولر،

طاهریلر، نظیفلر، عثمانلر، عبد الرّحمنلر، علیلر، صبریلر، فیضیلر، احمدلر، محمدلر، مصطفیلر، صادقلر، عثمانلر و هكذا، نورلرڭ بهادرلری دنیادە آرقەمدە قالدقلری، ئولومی بڭا چوق خفیفلشدیرییورلر. یالڭز كناه جهتندە ئولویورم، حسنات جهتندە یاشایورم دییە اللّٰهە حدسز شكر ایدییورم.

عمومڭزە بیڭلر سلام

اَلْبَاقٖی هُوَ الْبَاقٖی

قرداشڭز سعید النّورسی

[٢٩٥]

٢١ ذی الحجّە ٥

بِاسْمِهٖ سُبْحَانَهُ

اَلسَّلَامُ عَلَیْكُمْ وَرَحْمَةُ اللّٰهِ وَبَرَكَاتُهُٓ اَبَدًا دَٓائِمًا

عزیز، صدّیق قرداشلرم،

[اوّلا] زغفرانبولی افلانی ناحیەسی، ملایم كویندە متقاعد معلّم بر قرداشمز و نورڭ خاص بر شاكردی، نورلرڭ نشری و طبعی ایچون عادتا سرمایەسنڭ قسم اعظمنی تبرّع ایتمك ایستەیور، قبولنی رجا ایدییور. بن بو خالص و خاص قرداشمزڭ فداكارانە و خالصانە رجاسنی رد ایدەمییورم، و دنیا ماللری قاعدۀ شخصیەمە كیرمدیگی و معاونتلری كندیمە قبول ایتمدیگم ایچون، بو ایشدەكی مصلحتی دە بیلەمییورم. ایكی اسپارطەنڭ قهرمانلرینە و خسرو و طاهری و آرقداشلرینە و نظیف و رفیقلرینە بو مسئلەیی حوالە ایدییورم. نورڭ نشری ایچون بویلە چوق بیوك بر خیر و ثوابە مانع اولامام. سزلر یا بتون نیت ایتدیگی

مقداری ویاخود بر قسمنی ایكی حصّە ایلە، بری بیوك اسپارطەنڭ، بری كوچك اسپارطەنڭ ماكینەلرینە ویریلسین. اونڭ ایستەدیگی كبی یا تبرّع ویا ایلریدە باشقە معاونت ایدنلر كبی بر مقابلە نوعندە، یا نورلردن ویا باشقە بر ایستەدیگی نە وارسە ویرمك صورتیلە او خاص قرداشمزی ممنون ایدرسڭز.

[ثانیًا] رسالۀ نورڭ اركانندن اسكیدنبری علاقە و صداقتدە ترقّی ایدن خلیل ابراهیمڭ ایكی مكتوبندن كندی قلمیلە اولان مكتوب لاحقەیە كیرمەسنی سزە حوالە ایدییورم. ایكنجی مكتوبی پك كوزل و اهمّیتلی، فقط حقّمدە حدّمدن چوق زیادە ثنالری طی ایدیلمك و نورلر حقّندەكی حقیقتلی توصیفلری باقی قالمق و یاخود شخصمی قالدیروب یرینە رسالۀ نوری قویمق شرطیلە، بنم بدلمە بریڭز اورادە تعدیل ایدوب لاحقەیە كیرەبیلیر. هم اوڭا و محمد افندی و شفیق بگە، هم اورادەكی نور شاكردلرینە و میلاس مفتیلگندەكی الیاس وصّاف ذاتە بالمقابلە چوق سلام و بایراملرینی تبریك ایدییورز.

[ثالثًا] اینەبولی و جواری رسالۀ نور شاكردلری نامنە بر تبریك مكتوبی ایچندە، غایت صمیمی، رسالۀ نورە قارشو موفّقیتلە خدمتلرینە دائر و بو اهمّیتسز شخصمە قارشو جدّی شفقتلری و حقیقی قرداشدن زیادە علاقەلرینی كوردم. وقتم یوقكە، تعدیل، تصحیح ایدەیم. سزە حوالە ایدوب عینًا ویا قسمًا لاحقەیە كیرسین. اونی یازان و ناملرینە یازیلان ذاتلرە، قرداشلریمزە پك چوق سلام و بیڭلر بارك اللّٰه دیرز.

[رابعًا] استانبولە اونیورسیتەسی اقتصاد دار الفنوننە كیدن زغفرانبولیلی و صلاح الدّین و عبد الرحمن روحندە و غیرتندە تخمین ایتدیگمز بریسنە، هم تصحیحدن كچمش افە شكرینڭ بر ذوالفقاری، هم ایكی عصای موسی یی، هم یڭی حرفلە نظیف چلبینڭ و اسكی حروفلە مصطفی اوسمانڭ یازدیغی، بریسی اسپارطەلی خلیل ابراهیمڭ ذوالفقارینی، هم صاو قهرمانلرندن ابراهیم مصطفی نڭ عصای موسی سنی، بش آلتی رسالەیی كوندردك. اونڭ ألندە قالاجق لایقلرە اوقوتدیراجق. فقط حجّە كیدن نظیف و بارلەلی حاجی بكر و صلاح الدّین كبی قرداشلریمزڭ نظارتندە اولاجق. و سعردلی فرساف قریەسندن ملّا سراج الدّین دخی بونڭلە علاقەدار اولسون.

استانبولە كوندردیگمز ذوالفقار و عصای موسی، افە شكرینڭ و نظیف و مصطفی اوسمانڭ و ایكی ابراهیمڭ یازدقلری نسخەلردر. ان شٓاء اللّٰه بو بش قهرمانلرڭ نسخەلری قهرمانانە ایش كورەجك. تصحیحدن كچدیگی ایچون صلاح الدّین اون-اون بش كونە قدر بر ذوالفقاری اینەبولی یە آلسین. كندی نسخەسیلە مقابلە ایتسین. تكرار او طلبە مصطفی یە تسلیم ایتسین. و ملّا سراج الدّینە بنم طرفمدن چوق سلام ایتسین، اونی خاص دوستلرمدن بیلییورم. اسكی سعیدڭ اهمّیتلی بر طلبەسی اولان ملّا جلال یرندە، بو بیچارە یڭی سعید ایچون یاردیمجی اولسون.